Read 𐴔𐴝𐴌𐴑𐴟𐴏𐴢 14

𐴔𐴝𐴌𐴑𐴟𐴏𐴢14

𐴀𐴞𐴏𐴝𐴤𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴏𐴡𐴥𐴓𐴧𐴝

¹𐴀𐴝𐴎𐴝𐴊𐴞𐴌-𐴀𐴞𐴊𐴢 𐴀𐴠𐴊𐴧𐴠 𐴐𐴟𐴥𐴄𐴝𐴌-𐴏𐴝𐴥𐴌𐴝 𐴌𐴟𐴄𐴞𐴌-𐴀𐴞𐴊𐴢 𐴀𐴝𐴘𐴃𐴠𐴤 𐴊𐴟𐴘 𐴊𐴞𐴕 𐴀𐴝𐴏𐴠𐴤. 𐴀𐴝𐴦𐴌 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌𐴠 𐴑𐴞𐴦 𐴁𐴡𐴃𐴠 𐴎𐴟𐴘𐴃𐴠𐴥𐴒𐴡𐴌𐴞 𐴊𐴡𐴥𐴌𐴞𐴉𐴠𐴓𐴝𐴘 𐴔𐴝𐴌𐴞𐴉𐴠𐴥𐴓𐴝𐴘 𐴉𐴝𐴌𐴞𐴁𐴡𐴥 𐴊𐴠 𐴇𐴞𐴥𐴘𐴝𐴕𐴡𐴌 𐴃𐴝𐴓𐴝𐴐𐴡𐴃𐴢 𐴀𐴝𐴐𐴧𐴞𐴥𐴓𐴢.²𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴀𐴞𐴊𐴡𐴌 𐴀𐴡𐴑𐴃𐴡𐴥𐴃𐴢 𐴕𐴡, 𐴔𐴝𐴕𐴟𐴥𐴙𐴐𐴡𐴌 𐴁𐴟𐴥𐴃𐴡𐴌𐴠 𐴀𐴟𐴥𐴌𐴟𐴏𐴧𐴟𐴓𐴢 𐴀𐴡𐴥𐴘𐴃𐴡𐴉𐴝𐴌𐴠.“

𐴁𐴠𐴃𐴝𐴥𐴕𐴞𐴘𐴝 𐴉𐴝𐴌𐴝𐴃𐴢 𐴀𐴞𐴏𐴝𐴤𐴌 𐴔𐴝𐴃𐴝𐴥𐴃𐴢 𐴀𐴝𐴣𐴃𐴡𐴌 𐴋𐴝𐴥𐴓𐴞𐴊𐴞𐴘𐴠

³𐴀𐴞𐴏𐴝𐴤 𐴁𐴠𐴃𐴝𐴥𐴕𐴞𐴘𐴝𐴃𐴢 𐴑𐴟𐴌𐴟𐴏𐴢 𐴁𐴞𐴘𐴝𐴌𐴝𐴙𐴔𐴧𐴝 𐴏𐴝𐴥𐴘𐴔𐴡𐴕𐴡𐴌 𐴒𐴡𐴥𐴌𐴡𐴃𐴢 𐴃𐴝𐴥𐴑𐴞𐴃𐴠, 𐴀𐴞𐴥𐴁𐴝𐴘𐴠 𐴈𐴝𐴥𐴕𐴝 𐴈𐴝𐴥𐴀𐴌 𐴊𐴠 𐴇𐴠𐴥𐴣𐴃𐴧𐴠, 𐴇𐴠𐴥𐴍𐴠 𐴀𐴠𐴒𐴧𐴗𐴝𐴤 𐴔𐴝𐴘𐴝𐴉𐴟𐴖𐴝𐴘𐴠 𐴉𐴟𐴥𐴖𐴝𐴣𐴃𐴞 𐴉𐴝𐴃𐴧𐴡𐴥𐴌𐴡𐴌 𐴇𐴝𐴥𐴣𐴌𐴞𐴃𐴢 𐴒𐴡𐴥𐴌𐴞 𐴇𐴝𐴥𐴄𐴞 𐴕𐴝𐴌𐴋-𐴒𐴝𐴏𐴡𐴌 𐴁𐴞𐴐𐴞𐴤 𐴔𐴡𐴀𐴚𐴒𐴝 𐴀𐴝𐴣𐴃𐴡𐴌 𐴓𐴡𐴦𐴘𐴢 𐴀𐴝𐴙𐴐𐴧𐴠𐴥. 𐴁𐴝𐴦𐴊𐴠 𐴇𐴞𐴥𐴁𐴝𐴘𐴠 𐴇𐴝𐴥𐴣𐴌𐴞 𐴖𐴝 𐴁𐴝𐴥𐴚𐴒𐴞 𐴀𐴝𐴣𐴃𐴡𐴌 𐴒𐴟𐴥𐴕 𐴀𐴞𐴏𐴝𐴤𐴌 𐴔𐴝𐴃𐴝𐴥𐴃𐴢 𐴋𐴝𐴥𐴓𐴞𐴊𐴞𐴘𐴠.

⁴𐴔𐴡𐴕𐴃𐴡𐴌 𐴇𐴡𐴊𐴟𐴥𐴕𐴡𐴃𐴧𐴟 𐴒𐴡𐴔 𐴕𐴡 𐴓𐴝𐴒𐴞 𐴀𐴝𐴉𐴡𐴤𐴏𐴡𐴃𐴢 𐴈𐴡𐴖𐴝𐴤𐴇𐴡𐴘 𐴒𐴡𐴌𐴠𐴥𐴌 𐴊𐴠, ”𐴀𐴠 𐴀𐴝𐴣𐴃𐴡𐴌 𐴒𐴟𐴥𐴕 𐴑𐴞𐴘𐴝𐴥 𐴁𐴡𐴌𐴁𐴝𐴊𐴢 𐴊𐴞𐴉𐴠𐴥𐴓𐴝𐴘𐴧𐴠؟⁵𐴀𐴠 𐴀𐴝𐴣𐴃𐴡𐴌 𐴒𐴟𐴥𐴕 𐴊𐴠 𐴃𐴞𐴕 𐴐𐴡𐴥𐴃𐴢 𐴊𐴞𐴕𐴝𐴥𐴌𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴊𐴞𐴥 𐴁𐴠𐴏𐴞 𐴄𐴞𐴛𐴝 𐴒𐴟𐴥𐴕 𐴒𐴡𐴌𐴞𐴉𐴢 𐴀𐴡𐴥𐴑𐴧𐴡𐴓𐴡𐴌𐴠 𐴊𐴞𐴦𐴉𐴠𐴥𐴓𐴝𐴘 𐴉𐴝𐴙𐴃𐴧𐴡.“ 𐴇𐴠𐴥𐴕𐴊𐴞𐴓𐴧𐴝 𐴈𐴡𐴀𐴘𐴢 𐴀𐴞𐴥𐴃𐴝𐴌𐴝 𐴇𐴞𐴥𐴁𐴝𐴌𐴠 𐴁𐴡𐴥𐴄𐴁𐴡𐴍𐴝𐴥𐴘𐴧𐴠.

⁶𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴀𐴞𐴁𐴝𐴤𐴌𐴠 𐴒𐴡𐴙𐴃𐴧𐴡𐴥 𐴊𐴡; 𐴃𐴟𐴣𐴀𐴝𐴥𐴌𐴝 𐴀𐴞𐴁𐴝𐴤𐴌𐴠 𐴉𐴠𐴌𐴠𐴐𐴝𐴕 𐴑𐴞𐴘𐴝𐴥 𐴒𐴡𐴌𐴡𐴤𐴌؟ 𐴀𐴞𐴁𐴝𐴤𐴘𐴠 𐴀𐴝𐴣𐴀𐴌 𐴁𐴝𐴥𐴓𐴝𐴘 𐴀𐴠𐴥𐴕𐴝 𐴒𐴡𐴙𐴅𐴧𐴠𐴥.⁷𐴒𐴡𐴌𐴞𐴁𐴢 𐴀𐴡𐴥𐴑𐴧𐴡𐴓𐴢 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴕𐴞𐴃𐴧𐴞 𐴀𐴝𐴏𐴠𐴤, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴎𐴠𐴃𐴟𐴥𐴕𐴡𐴃𐴢 𐴔𐴡𐴕𐴠𐴈𐴡𐴀 𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝𐴌 𐴁𐴝𐴥𐴓𐴝𐴘 𐴒𐴡𐴌𐴞𐴥 𐴉𐴝𐴌𐴞𐴁𐴝𐴥; 𐴔𐴡𐴕𐴃𐴡𐴌 𐴀𐴝𐴣𐴀𐴌𐴠𐴥 𐴃𐴟𐴣𐴀𐴝𐴥𐴌𐴝 𐴕𐴞𐴃𐴧𐴞 𐴕𐴡 𐴉𐴝𐴘𐴁𐴝.⁸𐴀𐴞𐴁𐴝𐴤𐴘𐴠 𐴎𐴞𐴘𐴝𐴥𐴕 𐴉𐴝𐴙𐴅𐴧𐴠𐴥 𐴇𐴞𐴥𐴘𐴝𐴕 𐴀𐴠𐴥𐴕𐴝 𐴒𐴡𐴙𐴅𐴧𐴠𐴥. 𐴀𐴞𐴁𐴝𐴤𐴘𐴠 𐴀𐴝𐴣𐴀𐴌 𐴊𐴡𐴇𐴡𐴥𐴕𐴡𐴓𐴧𐴝 𐴀𐴝𐴣𐴀𐴌 𐴒𐴝𐴦𐴃𐴢 𐴀𐴝𐴒𐴠 𐴓𐴡𐴥𐴃𐴞 𐴀𐴝𐴣𐴃𐴡𐴌 𐴋𐴝𐴥𐴓𐴞𐴊𐴞𐴘𐴠 𐴊𐴠.⁹𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴉𐴟𐴌𐴝 𐴊𐴟𐴕𐴞𐴘𐴝𐴙𐴃𐴢 𐴎𐴠𐴍𐴠𐴥-𐴎𐴠𐴍𐴠𐴥 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥 𐴎𐴝𐴘𐴁𐴡, 𐴀𐴠 𐴔𐴝𐴘𐴝𐴉𐴟𐴖𐴝 𐴖𐴝𐴘𐴠 𐴎𐴞𐴘𐴝𐴥𐴕 𐴒𐴡𐴙𐴅𐴧𐴠𐴥 𐴇𐴞𐴥𐴘𐴝𐴕𐴡𐴌𐴠 𐴘𐴡𐴥 𐴀𐴞𐴁𐴝𐴤𐴌 𐴘𐴝𐴊𐴒𐴝𐴌𐴞 𐴀𐴞𐴥𐴏𐴝𐴉𐴠 𐴇𐴠𐴥𐴍𐴠-𐴇𐴠𐴥𐴍𐴠 𐴈𐴡𐴖𐴝𐴤 𐴎𐴝𐴘𐴁𐴡.“

𐴀𐴞𐴏𐴝𐴤𐴌𐴠 𐴊𐴡𐴥𐴌𐴞𐴊𐴞 𐴁𐴡𐴓𐴧𐴝 𐴘𐴡𐴇𐴟𐴥𐴊𐴝𐴌 𐴌𐴝𐴎𐴞

¹⁰𐴁𐴝𐴦𐴊𐴠 𐴘𐴡𐴇𐴟𐴥𐴊𐴝 𐴀𐴞𐴏𐴑𐴝𐴥𐴌𐴞𐴘𐴠𐴃𐴢, 𐴎𐴠𐴦 𐴀𐴝𐴐𐴧𐴞𐴥𐴓𐴢 𐴁𐴝𐴌𐴡𐴥 𐴎𐴡𐴕 𐴐𐴝𐴥𐴌𐴞𐴃𐴧𐴟𐴕𐴡𐴃𐴧𐴟 𐴀𐴠𐴎𐴧𐴡𐴕, 𐴀𐴞𐴥𐴃𐴠 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴒𐴞𐴦𐴘𐴠𐴥, 𐴀𐴞𐴏𐴝𐴤𐴌𐴠 𐴀𐴞𐴥𐴃𐴝𐴌𐴝𐴌 𐴀𐴝𐴥𐴃𐴡𐴃𐴢 𐴊𐴡𐴥𐴌𐴞𐴊𐴞 𐴉𐴝𐴌𐴠 𐴉𐴝𐴥𐴕.¹¹𐴇𐴞𐴥𐴘𐴝𐴕 𐴉𐴟𐴥𐴕𐴞 𐴀𐴞𐴥𐴃𐴝𐴌𐴝 𐴑𐴟𐴥𐴐𐴞 𐴀𐴡𐴥𐴘𐴧𐴠, 𐴀𐴝𐴦𐴌 𐴀𐴞𐴥𐴃𐴝𐴌𐴠 𐴄𐴞𐴛𐴝 𐴊𐴞𐴦𐴁𐴡 𐴁𐴡𐴓𐴞 𐴖𐴝𐴦𐴊𐴝 𐴊𐴞𐴘𐴠𐴥. 𐴃𐴝𐴌𐴉𐴡𐴌𐴠 𐴀𐴞𐴥𐴃𐴠 𐴀𐴞𐴏𐴝𐴤𐴌𐴠 𐴊𐴡𐴥𐴌𐴞𐴊𐴞 𐴁𐴡𐴓𐴧𐴝 𐴔𐴡𐴑𐴝𐴌 𐴃𐴝𐴓𐴝𐴐𐴡𐴃𐴢 𐴀𐴝𐴐𐴧𐴞𐴥𐴓𐴢.

𐴐𐴝𐴥𐴌𐴞𐴃𐴧𐴟𐴕𐴡𐴌 𐴉𐴟𐴥𐴖𐴝𐴣𐴃𐴞 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴈𐴝𐴥𐴕𐴝

¹²𐴐𐴟𐴥𐴄𐴝𐴌-𐴏𐴝𐴥𐴌𐴝 𐴌𐴟𐴄𐴞𐴌-𐴀𐴞𐴊𐴡𐴌 𐴉𐴡𐴀𐴘𐴓𐴝 𐴊𐴞𐴕 𐴀𐴡𐴃𐴢, 𐴎𐴠 𐴊𐴞𐴕 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴈𐴝𐴥𐴕𐴝𐴓𐴧𐴝 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴏𐴡𐴥𐴀 𐴑𐴟𐴌𐴁𐴝𐴕𐴞 𐴒𐴡𐴌𐴠𐴥, 𐴀𐴞𐴏𐴝𐴤𐴌 𐴐𐴝𐴥𐴌𐴞𐴃𐴧𐴟𐴕𐴠 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴣𐴃𐴧𐴟 𐴇𐴡𐴕𐴊𐴞𐴓𐴧𐴝 𐴔𐴡𐴕𐴠𐴈𐴡𐴀𐴌, 𐴃𐴟𐴀𐴛 𐴇𐴝𐴥𐴘 𐴉𐴝𐴌𐴡 𐴉𐴝𐴥𐴕 𐴀𐴝𐴣𐴀𐴌𐴝 𐴇𐴡𐴍𐴠𐴥 𐴎𐴝𐴘 𐴃𐴟𐴣𐴀𐴝𐴥𐴣𐴌 𐴓𐴧𐴝 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴈𐴝𐴥𐴕𐴝𐴌 𐴃𐴡𐴘𐴧𐴝𐴌𐴞 𐴒𐴡𐴙𐴃𐴧𐴝𐴥𐴔؟“

¹³𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴊𐴟𐴘 𐴎𐴡𐴕 𐴐𐴝𐴥𐴌𐴞𐴃𐴡𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴢 𐴊𐴞𐴉𐴠𐴍𐴝𐴥𐴘𐴧𐴠, ”𐴃𐴟𐴣𐴀𐴝𐴥𐴌𐴝 𐴐𐴡𐴥𐴀𐴌𐴡𐴃𐴢 𐴎𐴡𐴦; 𐴎𐴡𐴑𐴡𐴃𐴢 𐴒𐴡𐴌𐴞 𐴉𐴝𐴕𐴞𐴥 𐴓𐴡𐴘𐴎𐴝𐴌 𐴊𐴠 𐴀𐴠𐴥𐴎𐴧𐴡𐴕 𐴔𐴝𐴕𐴟𐴥𐴙𐴐𐴠 𐴃𐴟𐴣𐴀𐴝𐴥𐴌𐴝 𐴓𐴧𐴡𐴥𐴘 𐴔𐴞𐴓𐴞𐴁𐴡𐴥; 𐴀𐴞𐴥𐴁𐴝𐴌 𐴉𐴞𐴏𐴠𐴤-𐴉𐴞𐴏𐴠𐴤 𐴎𐴝𐴘𐴧𐴡.¹⁴𐴀𐴞𐴥𐴁𐴝 𐴎𐴠 𐴒𐴡𐴥𐴌𐴡𐴃𐴢 𐴒𐴡𐴥𐴓𐴠 𐴇𐴠𐴥 𐴒𐴡𐴥𐴌 𐴒𐴝𐴕𐴡𐴌 𐴒𐴞𐴌𐴡𐴥𐴏𐴡𐴌𐴠 𐴈𐴡𐴘𐴁𐴝𐴤 𐴊𐴠, ’𐴀𐴟𐴏𐴃𐴝𐴃𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴔𐴠𐴀𐴔𐴝𐴕-𐴈𐴝𐴥𐴕𐴝 𐴇𐴡𐴍𐴠𐴥, 𐴎𐴞𐴘𐴝𐴥𐴕𐴡𐴃𐴢 𐴀𐴝𐴀𐴛 𐴀𐴝𐴣𐴀𐴌 𐴐𐴝𐴥𐴌𐴞𐴃𐴧𐴟𐴕𐴡𐴌 𐴉𐴟𐴥𐴖𐴝𐴣𐴃𐴞 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴈𐴝𐴥𐴕𐴝 𐴇𐴝𐴥𐴘 𐴉𐴝𐴙𐴅𐴧𐴟𐴔؟“ ‘¹⁵𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴇𐴝𐴥𐴣𐴎𐴝𐴘𐴧𐴝 𐴀𐴠𐴊𐴧𐴠 𐴃𐴡𐴘𐴧𐴝𐴌 𐴒𐴡𐴙𐴅𐴧𐴝𐴥 𐴀𐴠𐴑𐴧𐴝𐴥𐴕 𐴖𐴡𐴌𐴡𐴌 𐴄𐴝𐴓𐴝𐴌 𐴋𐴡𐴣𐴀𐴌 𐴑𐴝𐴔𐴝𐴥𐴌𐴝 𐴊𐴝𐴈𐴝𐴤𐴘𐴁𐴡. 𐴇𐴠𐴥𐴍𐴠 𐴀𐴝𐴣𐴀𐴌𐴝𐴓𐴧𐴝 𐴃𐴡𐴘𐴧𐴝𐴌 𐴒𐴡𐴙𐴅𐴧𐴡𐴥.“

¹⁶𐴃𐴡𐴥𐴘 𐴐𐴝𐴥𐴌𐴞𐴃𐴧𐴟𐴕 𐴎𐴝𐴘 𐴐𐴡𐴥𐴀𐴌𐴡𐴃𐴢 𐴒𐴡𐴥𐴙𐴓𐴧𐴠, 𐴀𐴝𐴦𐴌 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥 𐴇𐴠𐴥𐴕𐴊𐴞𐴓𐴧𐴝 𐴉𐴝𐴘𐴧𐴠𐴥; 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴈𐴝𐴥𐴕𐴝 𐴃𐴡𐴘𐴧𐴝𐴌 𐴒𐴡𐴙𐴅𐴧𐴠𐴥.

¹⁷𐴎𐴠𐴣𐴃𐴧𐴠𐴥 𐴇𐴝𐴥𐴣𐴎𐴢 𐴀𐴡𐴥𐴘𐴧𐴠, 𐴀𐴞𐴏𐴝𐴤 𐴁𐴝𐴌𐴡𐴥 𐴎𐴡𐴕 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴉𐴟𐴥𐴖𐴝𐴣𐴃𐴞 𐴓𐴡𐴦𐴘𐴢 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥.¹⁸𐴀𐴞𐴥𐴃𐴝𐴌𐴝 𐴁𐴡𐴀𐴘𐴢 𐴈𐴝𐴥𐴕𐴝 𐴈𐴝𐴥𐴀𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴠𐴎𐴧𐴡𐴕𐴠 𐴀𐴝𐴣𐴀𐴌𐴠𐴥 𐴊𐴡𐴥𐴌𐴞𐴊𐴞𐴁𐴡; 𐴀𐴞𐴥𐴃𐴠 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴕𐴝 𐴈𐴝𐴥𐴀𐴌.“

¹⁹𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴉𐴠𐴌𐴠𐴐𐴝𐴕 𐴀𐴡𐴥𐴘 𐴎𐴡𐴕𐴉𐴡𐴃𐴞 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴀𐴞𐴥𐴃𐴠 𐴀𐴝𐴀𐴛 𐴕𐴡 𐴊𐴠 𐴕𐴡 𐴕𐴠𐴥؟“

²⁰𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴞𐴥𐴃𐴠 𐴁𐴝𐴌𐴡𐴥 𐴎𐴡𐴕 𐴕𐴟𐴕𐴡𐴃𐴧𐴟 𐴀𐴠𐴎𐴧𐴡𐴕, 𐴀𐴞𐴥𐴃𐴠 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴇𐴡𐴊𐴧𐴝𐴤𐴃𐴢 𐴌𐴟𐴄𐴞 𐴁𐴟𐴌𐴝𐴌.²¹𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴃𐴡 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴎𐴠𐴕𐴊𐴞𐴓𐴧𐴝 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤 𐴇𐴠𐴥𐴕𐴊𐴞𐴓𐴧𐴝 𐴀𐴠𐴥𐴕𐴝 𐴎𐴝𐴦𐴌; 𐴔𐴡𐴕𐴃𐴡𐴌 𐴀𐴝𐴉𐴏𐴟𐴥𐴏𐴢 𐴔𐴝𐴕𐴟𐴥𐴙𐴐𐴢 𐴀𐴟𐴘𐴃𐴝𐴌 𐴖𐴡𐴌𐴠, 𐴎𐴝𐴌 𐴊𐴟𐴖𐴝𐴌𐴝 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴊𐴡𐴥𐴌𐴝 𐴇𐴝𐴥𐴘𐴁𐴡. 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴠 𐴃𐴡 𐴎𐴡𐴌𐴔𐴡 𐴕𐴡 𐴀𐴡𐴥𐴘𐴃𐴡 𐴁𐴡𐴥𐴓𐴞 𐴀𐴞𐴥𐴃𐴝𐴌 𐴓𐴧𐴝 𐴒𐴡𐴔 𐴀𐴝𐴐𐴧𐴞𐴥𐴓𐴢.“

𐴐𐴝𐴥𐴌𐴞𐴃𐴧𐴟𐴕𐴡𐴌 𐴉𐴟𐴥𐴖𐴝𐴣𐴃𐴞 𐴀𐴞𐴏𐴝𐴤𐴌 𐴀𐴝𐴇𐴠𐴥𐴌𐴞 𐴈𐴝𐴥𐴕𐴝

²²𐴀𐴞𐴥𐴃𐴝𐴌𐴝 𐴇𐴝𐴥𐴀𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴏𐴝𐴤𐴘𐴠 𐴌𐴟𐴄𐴞 𐴓𐴡𐴦𐴘𐴢 𐴀𐴝𐴓𐴧𐴝𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴁𐴝𐴥𐴚𐴒𐴞 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴊𐴞𐴦 𐴈𐴡𐴀𐴌 𐴊𐴠, ”𐴓𐴡𐴦, 𐴘𐴝𐴀𐴕 𐴀𐴝𐴣𐴀𐴌 𐴒𐴝𐴦.“

²³𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴉𐴞𐴘𐴝𐴓𐴝 𐴓𐴡𐴦𐴘𐴢 𐴀𐴝𐴓𐴧𐴝𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴞𐴥 𐴀𐴞𐴥𐴃𐴝𐴌𐴝𐴌𐴠 𐴊𐴞𐴦𐴘𐴠𐴥, 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴈𐴠𐴥𐴕𐴃𐴟 𐴈𐴝𐴥𐴘𐴧𐴠.

²⁴𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴞𐴀𐴕 𐴀𐴡𐴥𐴙𐴓𐴊𐴠 𐴕𐴡𐴘𐴝 𐴌𐴝𐴎𐴞𐴕𐴝𐴔𐴝𐴓𐴧𐴝 𐴀𐴝𐴣𐴀𐴌 𐴓𐴡𐴖𐴢, 𐴎𐴞𐴀𐴕𐴡𐴌𐴠 𐴁𐴡𐴀𐴗𐴃𐴢 𐴑𐴞𐴘𐴡𐴥𐴌 𐴓𐴧𐴝 𐴋𐴝𐴥𐴓𐴞𐴊𐴞𐴘𐴟𐴔.²⁵𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴝𐴀𐴛 𐴀𐴠 𐴀𐴝𐴚𐴒𐴟𐴌𐴡𐴌 𐴌𐴡𐴐𐴢 𐴀𐴞𐴀𐴕 𐴀𐴝𐴁𐴝𐴌 𐴕𐴝 𐴈𐴝𐴥𐴘𐴧𐴟𐴔, 𐴀𐴡𐴃𐴡𐴥𐴊𐴞𐴕 𐴎𐴠𐴃𐴡𐴥𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴃𐴢 𐴕𐴡𐴘𐴝 𐴒𐴡𐴌𐴞 𐴕𐴝𐴥 𐴇𐴝𐴥𐴘.“

²⁶𐴘𐴝𐴥𐴌𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴀𐴠𐴒𐴧𐴗𐴝𐴤 𐴏𐴠𐴀𐴌 𐴒𐴝𐴀𐴘𐴢, 𐴎𐴝𐴘𐴃𐴟𐴕 𐴉𐴝𐴀𐴌𐴡𐴃𐴢 𐴒𐴞𐴦𐴘𐴠𐴥.

𐴉𐴞𐴃𐴡𐴌𐴠 𐴀𐴞𐴕𐴑𐴝𐴌 𐴒𐴡𐴌𐴝𐴥𐴌 𐴁𐴝𐴦𐴁𐴟𐴃𐴠 𐴀𐴞𐴏𐴝𐴤𐴌 𐴀𐴝𐴒𐴟𐴕 𐴈𐴡𐴃𐴝𐴤

²⁷𐴃𐴝𐴌𐴉𐴡𐴌𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕𐴡𐴌 𐴊𐴞𐴓𐴡𐴃𐴢 𐴐𐴡𐴥𐴀𐴑 𐴀𐴝𐴘𐴁𐴡𐴤 𐴀𐴝𐴦𐴌 𐴊𐴝𐴥𐴘𐴁𐴝𐴒𐴡𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴃𐴡 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤,’𐴀𐴝𐴀𐴛 𐴏𐴡𐴥𐴀𐴓𐴢 𐴏𐴡𐴌𐴡𐴘𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴧𐴟𐴔,𐴃𐴡𐴥𐴘 𐴏𐴡𐴥𐴀𐴓𐴢 𐴀𐴡𐴥𐴑𐴧𐴡𐴓𐴢 𐴐𐴞𐴥𐴣𐴍𐴝𐴐𐴞𐴄𐴧𐴝𐴤 𐴀𐴡𐴥𐴘𐴎𐴝𐴘𐴁𐴡𐴘.‘

²⁸𐴔𐴡𐴕𐴃𐴡𐴌 𐴀𐴝𐴣𐴀𐴌𐴠𐴥 𐴎𐴞𐴕𐴊𐴝 𐴒𐴡𐴌𐴝𐴥 𐴎𐴝𐴘 𐴁𐴝𐴦𐴊𐴠, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴀𐴝𐴒𐴠 𐴒𐴝𐴓𐴞𐴓𐴡𐴃𐴢 𐴎𐴝𐴘𐴧𐴟𐴔.“

²⁹𐴉𐴞𐴃𐴡𐴌𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴁𐴠𐴒𐴧𐴟𐴥𐴕𐴠 𐴀𐴞𐴔𐴝𐴕𐴡𐴃𐴧𐴟 𐴎𐴝𐴘𐴓𐴠𐴥 𐴘𐴡, 𐴀𐴝𐴀𐴛 𐴕𐴡 𐴎𐴝𐴘𐴧𐴟𐴔.“

³⁰𐴀𐴞𐴏𐴝𐴤𐴘𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴡𐴌𐴠𐴥 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴝𐴙𐴅𐴧𐴝 𐴌𐴝𐴙𐴃𐴧𐴝 𐴌𐴝𐴃𐴝𐴑𐴟𐴌𐴝𐴤 𐴊𐴟𐴘𐴁𐴝𐴌 𐴁𐴝𐴑 𐴊𐴞𐴁𐴝𐴌 𐴀𐴝𐴒𐴠, 𐴃𐴟𐴘 𐴕𐴞𐴎𐴠 𐴀𐴝𐴣𐴀𐴌𐴠𐴥 𐴃𐴞𐴕 𐴁𐴝𐴌 𐴀𐴞𐴕𐴑𐴝𐴌 𐴒𐴡𐴌𐴞𐴥𐴁𐴞.“

³¹𐴓𐴠𐴑𐴞𐴕 𐴉𐴞𐴃𐴡𐴌𐴠 𐴀𐴝𐴌𐴡𐴤 𐴎𐴟𐴌𐴠 𐴈𐴡𐴀𐴌 𐴊𐴠, ”𐴎𐴡𐴊𐴞 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴣𐴌 𐴉𐴟𐴥𐴖𐴝𐴣𐴃𐴞 𐴔𐴡𐴌𐴝 𐴉𐴡𐴌𐴠 𐴘𐴡𐴥, 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴀𐴞𐴕𐴑𐴝𐴌 𐴕𐴡 𐴒𐴡𐴙𐴅𐴧𐴟𐴥𐴔.“ 𐴇𐴠𐴥𐴕𐴊𐴞𐴓𐴧𐴝 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴈𐴡𐴘𐴧𐴠𐴥.

𐴒𐴠𐴃𐴏𐴝𐴥𐴔𐴝𐴕𐴞 𐴁𐴝𐴒𐴝𐴕𐴡𐴃𐴢 𐴀𐴞𐴏𐴝𐴤𐴌 𐴊𐴟𐴖𐴝

³²𐴘𐴝𐴥𐴌𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴀𐴠𐴑𐴧𐴝𐴥𐴕 𐴎𐴝𐴒𐴝𐴃𐴢 𐴀𐴝𐴙𐴐𐴧𐴠𐴥, 𐴎𐴞𐴘𐴝𐴥𐴕𐴡𐴌𐴠 𐴒𐴠𐴃𐴏𐴝𐴥𐴔𐴝𐴕𐴞 𐴈𐴡𐴀. 𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴎𐴠𐴃𐴟𐴥𐴕 𐴊𐴟𐴖𐴝 𐴒𐴡𐴙𐴅𐴧𐴟𐴥𐴔 𐴇𐴠𐴥𐴃𐴟𐴕 𐴀𐴞𐴣𐴘𐴡𐴥𐴃𐴢 𐴁𐴡𐴀𐴘𐴢 𐴃𐴝𐴥𐴑𐴡.“³³𐴀𐴞𐴥𐴁𐴝𐴘𐴠 𐴉𐴟𐴥𐴖𐴝𐴣𐴃𐴞 𐴉𐴞𐴃𐴡𐴌 𐴀𐴡𐴌𐴠, 𐴘𐴝𐴑𐴟𐴁𐴡𐴌𐴠 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝𐴌𐴠 𐴓𐴡𐴘𐴒𐴞𐴘𐴠𐴥, 𐴀𐴝𐴦𐴌 𐴇𐴠𐴥𐴍𐴠 𐴀𐴞𐴥𐴁𐴝𐴃𐴧𐴟 𐴀𐴡𐴐𐴝𐴥𐴕𐴃𐴞 𐴀𐴠𐴊𐴧𐴠 𐴁𐴞𐴐𐴞𐴤 𐴉𐴠𐴌𐴠𐴐𐴝𐴕𐴞 𐴓𐴝𐴒𐴝𐴃𐴢 𐴊𐴡𐴙𐴅𐴧𐴠.³⁴𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴁𐴞𐴐𐴞𐴤 𐴀𐴡𐴐𐴝𐴥𐴕𐴃𐴞𐴘𐴠 𐴀𐴝𐴣𐴀𐴌 𐴉𐴡𐴌𐴝𐴕 𐴕𐴠𐴦𐴓𐴞𐴎𐴝𐴘𐴃𐴡𐴥𐴘 𐴏𐴝𐴥𐴌. 𐴃𐴟𐴣𐴀𐴝𐴥𐴌𐴝 𐴀𐴞𐴣𐴘𐴡𐴥𐴃𐴢 𐴃𐴝𐴥𐴑𐴞 𐴏𐴠𐴃𐴡𐴕 𐴃𐴝𐴥𐴑𐴡.“

³⁵𐴁𐴝𐴦𐴊𐴠 𐴀𐴞𐴥𐴁𐴝 𐴈𐴠𐴥𐴕𐴃𐴟 𐴀𐴠𐴑𐴧𐴝𐴥𐴒𐴡𐴌𐴞 𐴔𐴟𐴀𐴔𐴧𐴞𐴑𐴧𐴝 𐴎𐴝𐴘, 𐴔𐴠𐴍𐴞𐴃𐴢 𐴉𐴡𐴌𐴞 𐴊𐴟𐴖𐴝 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠 𐴊𐴠, 𐴎𐴡𐴊𐴞 𐴉𐴝𐴌𐴞𐴓𐴠𐴥 𐴇𐴠𐴥 𐴊𐴟𐴑𐴧𐴡𐴥𐴌 𐴀𐴡𐴑𐴃𐴡𐴥𐴌𐴠 𐴀𐴞𐴥𐴁𐴝𐴃𐴧𐴟 𐴊𐴟𐴌 𐴒𐴡𐴌𐴞𐴥𐴉𐴠𐴓𐴝𐴘𐴃𐴡.³⁶𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴀𐴡𐴥 𐴀𐴝𐴁𐴧𐴝, 𐴀𐴡𐴥 𐴁𐴝𐴉𐴢, 𐴃𐴟𐴀𐴛 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴒𐴡𐴌𐴞𐴥 𐴉𐴝𐴌𐴡. 𐴀𐴠 𐴊𐴟𐴑-𐴔𐴡𐴏𐴞𐴁𐴡𐴃𐴡𐴌 𐴉𐴞𐴘𐴝𐴓𐴝 𐴘𐴞𐴁𐴝𐴤 𐴀𐴝𐴣𐴀𐴃𐴧𐴟 𐴊𐴟𐴌 𐴒𐴡𐴌𐴞𐴥𐴉𐴠𐴓𐴡; 𐴔𐴡𐴕𐴃𐴡𐴌 𐴃𐴡𐴀 𐴀𐴝𐴣𐴀𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴕𐴡, 𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴣𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴀𐴡𐴥𐴑.“

³⁷𐴁𐴝𐴦𐴊𐴠 𐴀𐴞𐴥𐴁𐴝 𐴀𐴝𐴀𐴘𐴢 𐴀𐴞𐴥𐴃𐴝𐴌𐴝𐴌𐴠 𐴒𐴟𐴥𐴔𐴡𐴃𐴢 𐴓𐴡𐴦𐴃𐴢 𐴉𐴝𐴘𐴧𐴠𐴥, 𐴀𐴝𐴦𐴌 𐴉𐴞𐴃𐴡𐴌𐴡𐴌𐴠 𐴈𐴡𐴀𐴌 𐴊𐴠, ”𐴏𐴝𐴥𐴘𐴔𐴡𐴕, 𐴃𐴟𐴘 𐴒𐴟𐴥𐴔𐴡𐴃𐴢 𐴕𐴞𐴥𐴑𐴞؟ 𐴃𐴟𐴘 𐴀𐴠𐴑 𐴒𐴡𐴥𐴕𐴋𐴝 𐴀𐴟𐴥𐴊𐴧𐴗𐴝 𐴏𐴠𐴃𐴡𐴕 𐴃𐴝𐴥𐴑𐴞 𐴕𐴡 𐴉𐴝𐴌𐴡𐴀𐴌 𐴊𐴠𐴥؟³⁸𐴏𐴠𐴃𐴡𐴕 𐴃𐴝𐴥𐴑𐴡 𐴀𐴝𐴦𐴌 𐴊𐴟𐴖𐴝 𐴒𐴡𐴌𐴡𐴤, 𐴎𐴠𐴀𐴕𐴠 𐴀𐴠𐴕𐴃𐴝𐴥𐴕𐴡𐴃𐴢 𐴕𐴡 𐴉𐴡𐴌𐴡; 𐴁𐴠𐴐𐴡𐴥𐴑 𐴌𐴟𐴀𐴃𐴧𐴟 𐴔𐴡𐴕𐴠𐴈𐴡𐴀𐴌, 𐴔𐴡𐴕𐴃𐴡𐴌 𐴅𐴞𐴏𐴞𐴥𐴔 𐴑𐴡𐴔𐴎𐴟𐴌 𐴊𐴠.“

³⁹𐴀𐴞𐴥𐴁𐴝 𐴀𐴝𐴁𐴝𐴌 𐴎𐴝𐴘 𐴀𐴠𐴑𐴞𐴤 𐴋𐴡𐴥𐴙𐴓𐴧𐴝 𐴈𐴡𐴃𐴝𐴤 𐴈𐴡𐴀𐴘𐴢 𐴊𐴟𐴖𐴝 𐴒𐴡𐴙𐴅𐴧𐴠𐴥.⁴⁰𐴀𐴞𐴥𐴁𐴝 𐴖𐴝𐴦𐴉𐴠𐴏𐴢 𐴀𐴝𐴀𐴘𐴢, 𐴀𐴞𐴥𐴃𐴝𐴌𐴝𐴌𐴠 𐴀𐴝𐴁𐴝𐴌 𐴒𐴟𐴥𐴔𐴡𐴃𐴢 𐴓𐴡𐴦𐴃𐴢 𐴉𐴝𐴘𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝𐴌 𐴏𐴟𐴑 𐴒𐴟𐴥𐴔𐴠 𐴁𐴡𐴥𐴌 𐴀𐴡𐴥𐴘𐴒𐴞𐴓𐴒𐴡𐴘; 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴑𐴞𐴦 𐴎𐴟𐴖𐴝𐴁𐴢 𐴊𐴞𐴁𐴡 𐴇𐴡𐴘 𐴕𐴡 𐴉𐴝𐴌𐴠.

⁴¹𐴀𐴞𐴥𐴁𐴝 𐴃𐴞𐴏𐴝𐴥𐴌𐴝𐴁𐴝𐴌 𐴀𐴝𐴀𐴘𐴧𐴡𐴌𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴝𐴙𐴅𐴧𐴡𐴤 𐴀𐴟𐴥𐴊𐴧𐴗𐴝 𐴒𐴟𐴥𐴔𐴡𐴃𐴢 𐴀𐴠𐴊𐴧𐴠 𐴀𐴝𐴌𐴝𐴔 𐴒𐴡𐴌𐴝𐴥𐴃𐴢 𐴀𐴝𐴏𐴡𐴤 𐴊𐴠؟ 𐴀𐴡𐴥𐴘𐴧𐴠, 𐴀𐴡𐴑𐴃𐴡𐴥 𐴉𐴡𐴀𐴣𐴙𐴐𐴧𐴠𐴒𐴝𐴘. 𐴏𐴡𐴀, 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴡𐴌 𐴀𐴝𐴥𐴃𐴡𐴃𐴢 𐴊𐴡𐴥𐴌𐴞𐴊𐴞𐴘𐴝 𐴎𐴝𐴘𐴁𐴡.⁴²𐴀𐴟𐴍𐴡𐴥, 𐴎𐴝𐴘𐴒𐴡𐴥𐴘. 𐴏𐴡𐴀, 𐴀𐴝𐴣𐴀𐴌𐴠𐴥 𐴊𐴡𐴥𐴌𐴞𐴊𐴡𐴘𐴝 𐴋𐴝𐴥𐴑𐴠 𐴉𐴡𐴀𐴣𐴙𐴐𐴧𐴠𐴒𐴝𐴘.“

𐴀𐴞𐴏𐴝𐴤𐴌 𐴒𐴠𐴌𐴠𐴉𐴃𐴝𐴌𐴞

⁴³𐴀𐴞𐴥𐴁𐴝𐴘𐴠 𐴇𐴞𐴥𐴀𐴕 𐴈𐴡𐴀𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴠𐴥𐴇𐴡𐴕 𐴘𐴡𐴇𐴟𐴥𐴊𐴝 𐴉𐴡𐴀𐴣𐴙𐴐𐴧𐴠𐴒𐴝𐴘, 𐴎𐴠𐴦𐴕𐴞𐴑𐴞 𐴁𐴝𐴌𐴡𐴥 𐴎𐴡𐴕 𐴕𐴟𐴥𐴕𐴡𐴃𐴧𐴟 𐴀𐴠𐴎𐴧𐴡𐴕. 𐴀𐴞𐴥𐴃𐴝𐴌 𐴉𐴟𐴥𐴖𐴝𐴣𐴃𐴞 𐴀𐴠𐴑 𐴊𐴡𐴓𐴢 𐴔𐴝𐴕𐴟𐴥𐴙𐴐𐴢 𐴃𐴡𐴓𐴟𐴖𐴝𐴌 𐴀𐴠𐴊𐴧𐴠 𐴓𐴝𐴍𐴞𐴥-𐴐𐴟𐴥𐴍𐴝 𐴓𐴡𐴦𐴘𐴢 𐴀𐴝𐴙𐴐𐴧𐴠𐴥, 𐴎𐴠𐴃𐴝𐴌𐴝𐴤𐴌𐴠 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴀𐴡𐴥𐴙𐴓𐴊𐴠 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠, 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴠, 𐴀𐴠𐴊𐴧𐴠 𐴔𐴟𐴌𐴟𐴁𐴧𐴞 𐴀𐴡𐴥𐴑𐴧𐴡𐴓𐴠.

⁴⁴𐴎𐴠𐴦𐴕𐴞𐴑𐴞 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞𐴊𐴠𐴌, 𐴀𐴞𐴥𐴃𐴠 𐴃𐴝𐴌𐴝𐴥𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴢 𐴀𐴠𐴑𐴧𐴝𐴥𐴕 𐴕𐴞𐴐𐴝𐴥𐴕 𐴊𐴞𐴀𐴓𐴢, ”𐴀𐴝𐴀𐴛 𐴎𐴞𐴁𐴝𐴤𐴌𐴠 𐴀𐴝𐴂𐴧𐴝𐴤 𐴊𐴞𐴘𐴟𐴔, 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝. 𐴀𐴞𐴥𐴁𐴝𐴌𐴠 𐴒𐴠𐴌𐴠𐴉𐴃𐴝𐴌 𐴒𐴡𐴌𐴞𐴥𐴉𐴠𐴓𐴝𐴘𐴧𐴡 𐴀𐴝𐴦𐴌 𐴏𐴡𐴙𐴑𐴧𐴝𐴓𐴢 𐴊𐴞 𐴓𐴡𐴘𐴎𐴝𐴘𐴧𐴡𐴒𐴡𐴥𐴘.“⁴⁵𐴘𐴡𐴇𐴟𐴥𐴊𐴝 𐴀𐴝𐴀𐴘𐴢 𐴔𐴡𐴃𐴧𐴡𐴌 𐴀𐴞𐴥𐴁𐴝𐴌 𐴀𐴞𐴥𐴣𐴘𐴡𐴃𐴢 𐴒𐴞𐴦𐴘𐴠𐴥, 𐴀𐴝𐴦𐴌 ”𐴌𐴝𐴁𐴧𐴞𐴥!“ 𐴈𐴡𐴀𐴘𐴢 𐴀𐴞𐴥𐴁𐴝𐴌𐴠 𐴀𐴝𐴂𐴧𐴝𐴤 𐴊𐴞𐴥𐴘𐴠.⁴⁶𐴁𐴝𐴦𐴊𐴠 𐴀𐴠𐴥𐴇𐴡𐴕 𐴃𐴝𐴌𐴝𐴥 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞 𐴒𐴠𐴌𐴠𐴉𐴃𐴝𐴌 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.⁴⁷𐴔𐴡𐴕𐴃𐴡𐴌 𐴋𐴝𐴥𐴑𐴠 𐴃𐴞𐴥𐴘𐴝𐴘 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴞𐴥𐴃𐴝𐴌𐴝𐴃𐴧𐴟 𐴀𐴠𐴎𐴧𐴡𐴕𐴠 𐴕𐴞𐴎𐴡𐴌 𐴃𐴡𐴓𐴟𐴖𐴝𐴌 𐴕𐴠𐴦𐴓𐴝𐴘𐴧𐴠, 𐴀𐴝𐴦𐴌 𐴇𐴞𐴥𐴘𐴝𐴕 𐴏𐴡𐴓𐴝𐴘 𐴁𐴡𐴌𐴡 𐴀𐴞𐴔𐴝𐴔𐴡𐴌 𐴒𐴟𐴓𐴝𐴔𐴡𐴌 𐴈𐴝𐴕 𐴈𐴝𐴍𐴞𐴉𐴠𐴥𐴓𐴝𐴘𐴧𐴠.

⁴⁸𐴀𐴞𐴏𐴝𐴤𐴘𐴠 𐴃𐴝𐴌𐴝𐴥𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴋𐴝𐴈𐴝𐴣𐴙𐴄𐴢 𐴊𐴡𐴥𐴙𐴃𐴧𐴡 𐴀𐴝𐴙𐴐𐴧𐴡𐴥 𐴉𐴝𐴥𐴚𐴒𐴡𐴌𐴞 𐴃𐴡𐴓𐴟𐴖𐴝𐴌 𐴀𐴠𐴊𐴧𐴠 𐴓𐴝𐴍𐴞𐴥-𐴐𐴟𐴥𐴍𐴝 𐴓𐴡𐴥𐴘 𐴀𐴝𐴣𐴀𐴌𐴠𐴥 𐴊𐴡𐴥𐴙𐴃𐴧𐴡 𐴀𐴝𐴙𐴐𐴧𐴡𐴥 𐴊𐴠؟⁴⁹𐴀𐴝𐴀𐴛 𐴃𐴡 𐴉𐴡𐴃𐴧𐴞𐴥 𐴊𐴞𐴕 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞 𐴃𐴝𐴦𐴓𐴞𐴔 𐴊𐴞𐴃𐴝𐴔, 𐴀𐴝𐴦𐴌 𐴇𐴠𐴥𐴣𐴃𐴧𐴠 𐴊𐴠 𐴀𐴝𐴣𐴀𐴌𐴠𐴥 𐴒𐴠𐴌𐴠𐴉𐴃𐴝𐴌 𐴕𐴡𐴥 𐴒𐴡𐴌𐴡𐴤. 𐴔𐴡𐴕𐴃𐴡𐴌 𐴀𐴞𐴀𐴕 𐴀𐴠𐴃𐴡𐴓𐴧𐴝𐴤 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴂𐴝𐴑-𐴑𐴝𐴓𐴝𐴔𐴡𐴌 𐴈𐴡𐴃𐴝𐴤 𐴉𐴟𐴌𐴝 𐴀𐴡𐴥𐴘𐴎𐴝𐴒𐴡𐴘.“⁵⁰𐴇𐴠𐴥𐴃𐴟𐴕𐴡𐴃𐴢 𐴐𐴝𐴥𐴌𐴞𐴃𐴢 𐴁𐴠𐴒𐴧𐴟𐴥𐴕𐴠 𐴀𐴞𐴥𐴁𐴝𐴌𐴠 𐴀𐴠𐴌𐴞 𐴊𐴝𐴥𐴘𐴒𐴞𐴘𐴡𐴘.

⁵¹𐴀𐴠𐴎𐴧𐴡𐴕 𐴅𐴟𐴖𐴝𐴕 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝𐴌 𐴉𐴞𐴏𐴠𐴤-𐴉𐴞𐴏𐴠𐴤 𐴎𐴝𐴦𐴃𐴢 𐴀𐴝𐴐𐴧𐴞𐴥𐴓𐴢, 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴁𐴞𐴘𐴡𐴏𐴧𐴡𐴌 𐴒𐴝𐴦𐴃𐴢 𐴑𐴠𐴏𐴧𐴟𐴥 𐴕𐴡𐴥 𐴉𐴞𐴣𐴊𐴠𐴤, 𐴀𐴠𐴑𐴧𐴝𐴥𐴕 𐴏𐴝𐴊𐴧𐴡𐴌 𐴁𐴠𐴌𐴝𐴘𐴧𐴠𐴥 𐴊𐴠. 𐴃𐴝𐴌𐴝𐴥 𐴘𐴡𐴥𐴒𐴧𐴗𐴝𐴌𐴠 𐴊𐴡𐴥𐴙𐴃𐴧𐴡 𐴏𐴝𐴘𐴧𐴠𐴥,⁵²𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴘𐴠 𐴏𐴝𐴊𐴧𐴡𐴌 𐴒𐴝𐴥𐴕 𐴉𐴠𐴥𐴓𐴝𐴘 𐴁𐴞𐴘𐴡𐴏𐴧𐴡𐴌 𐴊𐴟𐴣𐴌𐴊𐴞𐴘𐴠𐴥.

𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴌 𐴔𐴟𐴀𐴕𐴃𐴟 𐴀𐴞𐴏𐴝𐴤

⁵³𐴃𐴝𐴌𐴉𐴡𐴌𐴠 𐴃𐴝𐴌𐴝𐴥 𐴀𐴞𐴏𐴝𐴤𐴌𐴠 𐴁𐴡𐴌𐴡 𐴀𐴞𐴔𐴝𐴔𐴡𐴌 𐴇𐴝𐴣𐴏𐴠 𐴓𐴡𐴘𐴒𐴞𐴘𐴡𐴥𐴘, 𐴀𐴝𐴦𐴌 𐴃𐴝𐴔𐴝𐴥𐴔 𐴋𐴡𐴣𐴀𐴌 𐴀𐴞𐴔𐴝𐴔, 𐴔𐴟𐴌𐴟𐴁𐴧𐴞 𐴀𐴠𐴊𐴧𐴠 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴎𐴡𐴔𐴝 𐴀𐴡𐴥𐴘𐴧𐴠.⁵⁴𐴉𐴞𐴃𐴡𐴌 𐴊𐴟𐴌𐴠𐴥-𐴊𐴟𐴌𐴠𐴥 𐴃𐴝𐴥𐴘 𐴀𐴞𐴥𐴁𐴝𐴌 𐴉𐴞𐴏𐴠𐴤-𐴉𐴞𐴏𐴠𐴤 𐴁𐴡𐴌𐴡 𐴀𐴞𐴔𐴝𐴔𐴡𐴌 𐴀𐴟𐴍𐴝𐴥𐴕𐴡𐴌 𐴁𐴟𐴥𐴃𐴡𐴌𐴠 𐴉𐴡𐴙𐴅𐴧𐴡𐴕𐴃𐴡 𐴒𐴞𐴦𐴘𐴠𐴥, 𐴀𐴝𐴦𐴌 𐴉𐴝𐴀𐴌𐴝𐴊𐴝𐴌 𐴀𐴡𐴥𐴑𐴧𐴡𐴓𐴡𐴌 𐴉𐴟𐴥𐴖𐴝𐴣𐴃𐴞 𐴁𐴡𐴀𐴘𐴢 𐴀𐴡𐴦𐴙𐴕 𐴉𐴟𐴖𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.

⁵⁵𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴢 𐴄𐴞𐴥𐴘𐴝𐴘𐴠 𐴀𐴞𐴏𐴝𐴤𐴌 𐴀𐴟𐴓𐴋𐴝 𐴒𐴡𐴁𐴝𐴤𐴌 𐴃𐴝𐴓𐴝𐴐𐴡𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴁𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘 𐴉𐴝𐴌𐴠 𐴉𐴝𐴥𐴕; 𐴔𐴡𐴕𐴃𐴡𐴌 𐴇𐴡𐴕𐴡𐴤 𐴒𐴡𐴁𐴝𐴤 𐴕𐴡𐴥 𐴉𐴝𐴦.⁵⁶𐴁𐴠𐴐𐴡𐴥𐴑 𐴁𐴡𐴀𐴗𐴃𐴢 𐴎𐴡𐴕𐴠 𐴀𐴞𐴥𐴁𐴝𐴌 𐴀𐴟𐴓𐴋𐴝 𐴔𐴞𐴏𐴝𐴥 𐴒𐴡𐴁𐴝𐴤 𐴊𐴞𐴥𐴓𐴢, 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝𐴌 𐴒𐴡𐴁𐴝𐴤 𐴔𐴞𐴓𐴢 𐴕𐴝𐴥 𐴇𐴝𐴥.

⁵⁷𐴉𐴡𐴌𐴠 𐴇𐴡𐴊𐴟𐴥𐴕𐴠 𐴀𐴟𐴍𐴞𐴤 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴀𐴠𐴕𐴊𐴞𐴓𐴧𐴝 𐴔𐴞𐴏𐴝𐴥 𐴒𐴡𐴁𐴝𐴤 𐴊𐴞𐴥𐴘𐴠,⁵⁸”𐴀𐴝𐴣𐴀𐴌𐴝 𐴀𐴞𐴁𐴝𐴤𐴘𐴠 𐴀𐴠𐴀𐴕 𐴈𐴡𐴘𐴧𐴠𐴥 𐴊𐴠 𐴉𐴟𐴥𐴙𐴕𐴧𐴞, ’𐴀𐴝𐴀𐴛 𐴀𐴝𐴥𐴃𐴡𐴌 𐴁𐴝𐴕𐴝𐴘𐴧𐴝 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴢 𐴘𐴝𐴀𐴕 𐴁𐴝𐴥𐴚𐴒𐴞𐴉𐴠𐴓𐴝𐴘, 𐴃𐴞𐴕 𐴊𐴞𐴕𐴡𐴌 𐴁𐴟𐴥𐴃𐴡𐴌𐴠 𐴀𐴝𐴌 𐴀𐴠𐴑𐴧𐴝𐴥𐴕 𐴁𐴝𐴕𐴝𐴘𐴊𐴞𐴘𐴟𐴔, 𐴎𐴞𐴘𐴝𐴥𐴕 𐴀𐴝𐴥𐴃𐴡𐴌 𐴁𐴝𐴕𐴝𐴘𐴧𐴝 𐴕𐴡 𐴀𐴡𐴥𐴘𐴁𐴡.‘ “⁵⁹𐴓𐴠𐴑𐴞𐴕 𐴀𐴠𐴁𐴝𐴌 𐴀𐴡𐴥 𐴀𐴞𐴥𐴃𐴝𐴌𐴝𐴌 𐴒𐴡𐴁𐴝𐴤 𐴔𐴞𐴓𐴢 𐴕𐴝𐴥 𐴇𐴝𐴥.

⁶⁰𐴇𐴠𐴥𐴃𐴟𐴕𐴡𐴃𐴢 𐴁𐴡𐴌𐴡 𐴀𐴞𐴔𐴝𐴔𐴠 𐴀𐴟𐴍𐴞𐴤 𐴔𐴟𐴀𐴕𐴃𐴟 𐴃𐴞𐴥𐴘𐴝𐴘 𐴀𐴞𐴏𐴝𐴤𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴀𐴛 𐴇𐴡𐴕𐴡𐴤 𐴎𐴟𐴖𐴝𐴁𐴢 𐴕𐴡 𐴊𐴞𐴁𐴝؟ 𐴔𐴝𐴕𐴟𐴥𐴙𐴐𐴢 𐴀𐴞𐴃𐴝𐴌𐴝𐴤 𐴃𐴟𐴣𐴀𐴝𐴥𐴣𐴌 𐴀𐴟𐴓𐴋𐴝 𐴀𐴞𐴀𐴕 𐴑𐴞𐴦 𐴒𐴡𐴁𐴝𐴤 𐴊𐴠𐴌؟“⁶¹𐴔𐴡𐴕𐴃𐴡𐴌 𐴀𐴞𐴥𐴁𐴝 𐴕𐴞𐴎𐴝𐴥𐴔 𐴔𐴝𐴥𐴌𐴞 𐴃𐴝𐴥𐴙𐴑𐴧𐴞𐴓𐴢, 𐴀𐴝𐴦𐴌 𐴇𐴡𐴕𐴡𐴤 𐴎𐴟𐴖𐴝𐴁𐴢 𐴕𐴡𐴥 𐴊𐴠.
𐴁𐴡𐴌𐴡 𐴀𐴞𐴔𐴝𐴔𐴠 𐴀𐴝𐴁𐴝𐴌 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴀𐴛 𐴑𐴞𐴥 𐴃𐴝𐴦𐴌𐴞𐴉𐴊𐴝𐴥𐴌 𐴀𐴝𐴓𐴧𐴝𐴌 𐴉𐴟𐴖𐴝 𐴔𐴡𐴀𐴏𐴞𐴤؟“

⁶²𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴀𐴡𐴥𐴘 𐴀𐴝𐴀𐴛. 𐴃𐴟𐴣𐴀𐴝𐴥𐴌𐴝 𐴊𐴠𐴑𐴞𐴥𐴁𐴝, 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴀𐴝𐴓𐴧𐴝 𐴃𐴝𐴥𐴓𐴝𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴁𐴡𐴘𐴍𐴝𐴤 𐴀𐴝𐴏𐴠𐴤 𐴀𐴠𐴊𐴧𐴠 𐴀𐴝𐴏𐴔𐴝𐴕𐴡𐴌 𐴔𐴞𐴘𐴟𐴥𐴓𐴝𐴃𐴢 𐴒𐴡𐴥𐴌𐴞 𐴀𐴝𐴘𐴧𐴠𐴤𐴌.“

⁶³𐴁𐴡𐴌𐴡 𐴀𐴞𐴔𐴝𐴔𐴠 𐴕𐴞𐴎𐴡𐴌 𐴒𐴝𐴙𐴌𐴡𐴌 𐴇𐴡𐴦𐴌 𐴉𐴝𐴥𐴍𐴞 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝𐴃𐴧𐴟 𐴀𐴝𐴌 𐴑𐴞𐴦 𐴒𐴡𐴁𐴝𐴤 𐴓𐴝𐴒𐴠𐴌 𐴊𐴠𐴥؟⁶⁴𐴃𐴟𐴣𐴀𐴝𐴥𐴌𐴝 𐴃𐴡 𐴀𐴞𐴁𐴝𐴤𐴌 𐴑𐴟𐴉𐴠𐴥𐴌𐴞 𐴉𐴟𐴥𐴙𐴕𐴧𐴡; 𐴃𐴟𐴣𐴀𐴝𐴥𐴌𐴝𐴌 𐴌𐴝𐴘 𐴑𐴞𐴦؟“
𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴀𐴞𐴥𐴁𐴝 𐴔𐴡𐴦𐴃𐴡𐴌 𐴓𐴝𐴦𐴘𐴠𐴑 𐴁𐴡𐴓𐴞 𐴉𐴡𐴥𐴃𐴟𐴖𐴝 𐴊𐴞𐴥𐴘𐴠.⁶⁵𐴃𐴝𐴌𐴉𐴡𐴌𐴠 𐴇𐴡𐴊𐴟𐴥𐴕𐴠 𐴀𐴞𐴥𐴁𐴝𐴌𐴠 𐴏𐴠𐴥𐴂𐴢 𐴔𐴝𐴌𐴝𐴃𐴢 𐴊𐴡𐴙𐴅𐴧𐴠, 𐴀𐴝𐴦𐴌 𐴀𐴞𐴥𐴁𐴝𐴌𐴠 𐴏𐴟𐴑 𐴁𐴝𐴕𐴊𐴞 𐴒𐴟𐴥𐴐𐴝 𐴔𐴝𐴌𐴞 𐴈𐴡𐴀𐴌 𐴊𐴠, ”𐴇𐴡𐴕𐴠 𐴔𐴝𐴙𐴅𐴧𐴠𐴥 𐴀𐴝𐴕𐴃𐴝𐴏𐴢 𐴒𐴡𐴌 𐴏𐴝𐴥𐴘!“ 𐴁𐴝𐴦𐴊𐴠 𐴉𐴝𐴀𐴌𐴝𐴊𐴝𐴌 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴓𐴡𐴘𐴎𐴝𐴘 𐴏𐴟𐴖𐴝𐴌 𐴔𐴝𐴙𐴅𐴧𐴞𐴥𐴓𐴢.

𐴀𐴞𐴏𐴝𐴤𐴌𐴠 𐴉𐴞𐴃𐴡𐴌𐴡𐴌 𐴀𐴞𐴕𐴑𐴝𐴌

⁶⁶𐴉𐴞𐴃𐴡𐴌 𐴕𐴞𐴏𐴠 𐴀𐴟𐴍𐴝𐴥𐴕𐴡𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴡𐴑𐴃𐴡𐴥𐴃𐴢, 𐴁𐴡𐴌𐴡 𐴀𐴞𐴔𐴝𐴔𐴡𐴌 𐴁𐴝𐴣𐴊𐴞 𐴔𐴝𐴘𐴝𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴠𐴎𐴧𐴡𐴕 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥.⁶⁷𐴀𐴝𐴦𐴌 𐴉𐴞𐴃𐴡𐴌 𐴀𐴡𐴦𐴙𐴕 𐴉𐴟𐴖𐴝𐴥𐴌 𐴊𐴠 𐴊𐴠𐴑𐴞𐴥, 𐴀𐴞𐴥𐴁𐴝𐴌 𐴀𐴟𐴎𐴟 𐴏𐴝𐴀𐴘𐴢 𐴈𐴡𐴀𐴌 𐴊𐴠, ”𐴃𐴟𐴀𐴛 𐴘𐴡𐴥 𐴃𐴡 𐴕𐴝𐴏𐴝𐴥𐴌𐴞 𐴀𐴞𐴏𐴝𐴤𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴝.“

⁶⁸𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴢 𐴀𐴞𐴕𐴑𐴝𐴌 𐴒𐴡𐴌𐴞𐴥𐴊𐴞𐴘𐴠, ”𐴃𐴟𐴀𐴛 𐴑𐴞𐴘𐴡𐴥𐴌 𐴁𐴝𐴦𐴁𐴟𐴃𐴠 𐴈𐴡𐴀𐴌 𐴀𐴝𐴀𐴛 𐴕𐴡 𐴎𐴝𐴕𐴞 𐴀𐴝𐴦𐴌 𐴕𐴡 𐴘𐴡𐴥 𐴁𐴟𐴎𐴞𐴥𐴌.“ 𐴁𐴝𐴦𐴊𐴠 𐴀𐴞𐴥𐴁𐴝 𐴁𐴝𐴀𐴌𐴠 𐴁𐴝𐴦𐴕𐴋𐴝𐴃𐴢 𐴒𐴞𐴦𐴘𐴠𐴥𐴒𐴡𐴘. 𐴇𐴠𐴥𐴃𐴟𐴕𐴡𐴃𐴢 𐴌𐴝𐴃𐴝𐴑𐴟𐴌𐴝𐴤 𐴁𐴝𐴑 𐴊𐴞𐴘𐴠𐴥.

⁶⁹𐴁𐴝𐴣𐴊𐴞 𐴔𐴝𐴘𐴝𐴉𐴟𐴖𐴝 𐴖𐴝𐴘𐴠 𐴀𐴞𐴥𐴁𐴝𐴌𐴠 𐴀𐴝𐴁𐴝𐴌 𐴊𐴠𐴙𐴑𐴧𐴠𐴥 𐴌𐴝𐴥𐴌, 𐴋𐴝𐴥𐴑𐴠 𐴃𐴞𐴥𐴘𐴝𐴘 𐴀𐴝𐴏𐴠𐴤 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴞𐴁𐴝𐴤 𐴃𐴝𐴌𐴝𐴥𐴌 𐴁𐴟𐴥𐴃𐴡𐴃𐴧𐴟 𐴀𐴠𐴑𐴎𐴡𐴕!“⁷⁰𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴝𐴁𐴝𐴌 𐴀𐴞𐴕𐴑𐴝𐴌 𐴒𐴡𐴌𐴞𐴥𐴊𐴞𐴘𐴠.
𐴇𐴡𐴃𐴟𐴥𐴕 𐴁𐴝𐴦𐴊𐴠 𐴋𐴝𐴥𐴑𐴠 𐴃𐴞𐴥𐴘𐴝𐴘 𐴀𐴝𐴏𐴠𐴤 𐴊𐴠 𐴀𐴞𐴥𐴃𐴝𐴌𐴝 𐴉𐴞𐴃𐴡𐴌𐴡𐴌𐴠 𐴀𐴝𐴁𐴝𐴌 𐴈𐴡𐴀𐴌 𐴊𐴠, ”𐴏𐴡𐴥𐴘𐴧𐴞 𐴃𐴟𐴀𐴛 𐴃𐴝𐴌𐴝𐴥𐴌 𐴁𐴟𐴥𐴃𐴡𐴃𐴧𐴟 𐴀𐴠𐴑𐴎𐴡𐴕, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴀𐴛 𐴘𐴡𐴥 𐴒𐴝𐴓𐴞𐴓𐴡𐴌 𐴔𐴝𐴕𐴟𐴥𐴙𐴐𐴢.“

⁷¹𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴈𐴡𐴏𐴡𐴥𐴔 𐴇𐴝𐴥𐴘 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴖𐴡𐴌𐴠 𐴓𐴝𐴀𐴕𐴡𐴃𐴢 𐴀𐴡𐴥𐴑 𐴎𐴡𐴊𐴞 𐴀𐴝𐴀𐴛 𐴔𐴞𐴏𐴝𐴥 𐴈𐴡𐴃𐴝𐴤 𐴈𐴡𐴀𐴙𐴌 𐴊𐴠 𐴀𐴡𐴥𐴘𐴓𐴠. 𐴃𐴟𐴣𐴀𐴝𐴥𐴌𐴝 𐴎𐴠 𐴔𐴝𐴕𐴟𐴥𐴙𐴐𐴧𐴗𐴝𐴌 𐴈𐴡𐴃𐴝𐴤 𐴈𐴡𐴀𐴌 𐴀𐴝𐴀𐴛 𐴀𐴞𐴥𐴁𐴝𐴌𐴠 𐴕𐴡 𐴏𐴞𐴕𐴞𐴥.“

⁷²𐴁𐴝𐴦𐴊𐴠 𐴀𐴠𐴥𐴇𐴡𐴕-𐴀𐴠𐴥𐴇𐴡𐴕 𐴌𐴝𐴃𐴝𐴑𐴟𐴌𐴝𐴤 𐴊𐴟𐴏𐴝𐴥𐴌𐴝𐴁𐴝𐴌 𐴁𐴝𐴑 𐴊𐴞𐴘𐴠𐴥. 𐴇𐴠𐴥𐴃𐴟𐴕𐴡𐴃𐴢 𐴉𐴞𐴃𐴡𐴌𐴡𐴃𐴧𐴟 𐴈𐴡𐴃𐴝𐴤 𐴖𐴝𐴀𐴕 𐴔𐴡𐴕𐴡𐴃𐴢 𐴀𐴟𐴙𐴄𐴧𐴠𐴥 𐴎𐴞𐴘𐴝𐴥𐴕 𐴀𐴞𐴏𐴝𐴤𐴘𐴠 𐴀𐴞𐴥𐴁𐴝𐴌𐴠 𐴈𐴡𐴀𐴙𐴓𐴢, 𐴑𐴞 𐴈𐴡𐴘𐴓𐴠𐴥, ”𐴌𐴝𐴃𐴝𐴑𐴟𐴌𐴝𐴤 𐴊𐴟𐴘𐴁𐴝𐴌 𐴁𐴝𐴑 𐴊𐴞𐴁𐴝𐴌 𐴀𐴝𐴒𐴠 𐴃𐴟𐴘 𐴀𐴝𐴣𐴀𐴌𐴠𐴥 𐴃𐴞𐴕 𐴁𐴝𐴌 𐴀𐴞𐴕𐴑𐴝𐴌 𐴒𐴡𐴌𐴞𐴥𐴁𐴞.“𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴇𐴞𐴥𐴘𐴝𐴕 𐴔𐴡𐴕𐴡𐴃𐴢 𐴒𐴡𐴌𐴞𐴥 𐴈𐴝𐴣𐴊𐴝𐴃𐴢 𐴊𐴡𐴙𐴅𐴧𐴠.

The Word for the World International

https://app.library.bible/content/87faca8b51c22590