𐴓𐴟𐴑𐴝𐴥𐴏𐴢5

𐴐𐴟𐴥𐴌𐴟𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴋𐴝𐴙𐴑𐴧𐴠𐴥

1𐴀𐴠𐴑 𐴊𐴞𐴕 𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴒𐴠𐴕𐴠𐴏𐴝𐴥𐴌𐴠𐴃𐴢 𐴋𐴞𐴀𐴌 𐴑𐴟𐴓𐴡𐴃𐴢 𐴃𐴞𐴥𐴘𐴝𐴘 𐴀𐴝𐴐𐴧𐴞𐴥𐴓𐴢, 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌 𐴏𐴝𐴘𐴌𐴡𐴥 𐴋𐴝𐴑𐴡𐴃𐴧𐴟 𐴄𐴠𐴥𐴓𐴝𐴄𐴠𐴓𐴞 𐴒𐴡𐴌𐴞𐴥-𐴒𐴡𐴌𐴞𐴥 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴉𐴟𐴥𐴕𐴝𐴃𐴢 𐴀𐴝𐴐𐴧𐴞𐴥𐴓𐴢.2𐴀𐴞𐴥𐴁𐴝𐴘𐴠 𐴋𐴞𐴀𐴌 𐴇𐴝𐴣𐴏𐴝 𐴓𐴡𐴘 𐴊𐴟𐴘𐴧𐴝𐴥𐴕 𐴕𐴡𐴦 𐴊𐴠𐴙𐴑𐴧𐴠𐴥, 𐴎𐴞𐴀𐴕𐴡𐴃𐴧𐴟 𐴎𐴝𐴙𐴓𐴧𐴝 𐴀𐴡𐴥𐴑𐴧𐴡𐴓𐴠 𐴓𐴝𐴔𐴞 𐴀𐴞𐴥𐴃𐴝𐴌𐴝𐴌 𐴎𐴝𐴓𐴢 𐴊𐴟𐴥𐴘𐴉𐴠𐴓𐴝𐴃𐴢 𐴀𐴝𐴐𐴧𐴞𐴥𐴓𐴢.3𐴀𐴞𐴥𐴁𐴝 𐴈𐴠𐴥𐴕𐴃𐴟 𐴀𐴠𐴑𐴧𐴝𐴥𐴕 𐴕𐴡𐴦𐴃𐴢 𐴀𐴟𐴙𐴄𐴧𐴠𐴥𐴒𐴡𐴘, 𐴎𐴞𐴘𐴝𐴥𐴕 𐴀𐴡𐴥𐴙𐴓𐴊𐴠 𐴏𐴝𐴥𐴘𐴔𐴡𐴕 𐴀𐴡𐴌, 𐴁𐴝𐴦𐴊𐴠 𐴀𐴞𐴥𐴁𐴝𐴌𐴠 𐴕𐴡𐴦 𐴒𐴝𐴥𐴕 𐴑𐴟𐴓𐴡𐴃𐴧𐴟 𐴀𐴠𐴑𐴧𐴝𐴥𐴒𐴡𐴌𐴞 𐴊𐴟𐴌𐴠𐴥 𐴓𐴡𐴘𐴎𐴝𐴘𐴃𐴡𐴥 𐴈𐴡𐴘𐴧𐴠𐴥. 𐴃𐴝𐴌𐴉𐴡𐴌𐴠 𐴀𐴞𐴥𐴁𐴝 𐴁𐴡𐴀𐴘𐴢 𐴕𐴡𐴦𐴃𐴧𐴟 𐴃𐴝𐴥𐴘 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠.
4𐴎𐴠𐴣𐴃𐴧𐴠𐴥 𐴀𐴞𐴥𐴁𐴝𐴃𐴧𐴟 𐴃𐴝𐴦𐴓𐴞𐴔 𐴊𐴞𐴘𐴝 𐴀𐴡𐴥𐴘𐴧𐴠, 𐴀𐴞𐴥𐴁𐴝𐴘𐴠 𐴏𐴝𐴥𐴘𐴔𐴡𐴕𐴡𐴌𐴠 𐴈𐴡𐴀𐴌 𐴊𐴠, ”𐴕𐴡𐴦 𐴒𐴝𐴥𐴕 𐴔𐴟𐴌 𐴉𐴝𐴕𐴞𐴥𐴃𐴢 𐴓𐴡𐴘𐴎𐴝𐴘 𐴀𐴠𐴑𐴧𐴟𐴥𐴉𐴢 𐴔𐴝𐴏𐴢 𐴏𐴝𐴘 𐴁𐴡𐴓𐴧𐴝 𐴎𐴝𐴓𐴢 𐴉𐴠𐴥𐴓𐴡.“
5𐴏𐴝𐴥𐴘𐴔𐴡𐴕𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴟𐴥𐴎𐴟𐴌, 𐴀𐴝𐴣𐴀𐴌𐴝 𐴌𐴝𐴙𐴃𐴁𐴡𐴥𐴌 𐴔𐴠𐴀𐴕𐴧𐴡𐴃𐴢 𐴒𐴡𐴌𐴞𐴥 𐴑𐴠𐴏𐴧𐴟𐴥 𐴕𐴡𐴥 𐴉𐴝𐴘. 𐴃𐴡𐴀 𐴃𐴟𐴀𐴛 𐴎𐴠𐴃𐴧𐴡𐴥𐴃𐴢 𐴈𐴡𐴀𐴌, 𐴀𐴝𐴀𐴛 𐴎𐴝𐴓𐴢 𐴉𐴠𐴥𐴓𐴝𐴘𐴧𐴟𐴔.“
6𐴀𐴞𐴥𐴃𐴝𐴌𐴝 𐴎𐴝𐴓𐴢 𐴉𐴠𐴥𐴓𐴝𐴘𐴧𐴠 𐴌𐴝𐴥𐴌, 𐴀𐴠𐴊𐴟𐴥𐴕 𐴔𐴝𐴏𐴢 𐴉𐴡𐴙𐴅𐴧𐴠𐴥 𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴃𐴝𐴌𐴝𐴌 𐴎𐴝𐴓𐴢 𐴉𐴝𐴥𐴍𐴞 𐴎𐴝𐴌𐴒𐴡𐴘.7𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴀𐴞𐴥𐴃𐴝𐴌𐴝𐴌 𐴎𐴠 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴢 𐴀𐴡𐴙𐴕𐴧𐴡 𐴕𐴡𐴦𐴃𐴢 𐴀𐴝𐴏𐴠𐴤 𐴀𐴞𐴥𐴃𐴝𐴌𐴝𐴌𐴠 𐴀𐴞𐴐𐴝𐴥𐴌𐴝 𐴒𐴡𐴌𐴞𐴥 𐴔𐴝𐴃𐴝𐴘𐴧𐴠𐴥, 𐴎𐴠𐴀𐴕𐴠 𐴀𐴝𐴀𐴘𐴢 𐴀𐴞𐴥𐴃𐴝𐴌𐴝𐴌𐴠 𐴔𐴡𐴊𐴡𐴃𐴢 𐴒𐴡𐴌𐴠𐴥. 𐴃𐴡𐴥𐴘 𐴃𐴝𐴌𐴝𐴥 𐴀𐴝𐴀𐴘𐴢 𐴊𐴟𐴕𐴞𐴥 𐴕𐴡𐴦 𐴀𐴠𐴊𐴧𐴟𐴥𐴌 𐴁𐴡𐴥𐴙𐴅𐴧𐴠, 𐴎𐴠𐴀𐴕 𐴕𐴞𐴥𐴑𐴞 𐴇𐴞𐴥𐴀𐴕 𐴋𐴟𐴉𐴡𐴥𐴔-𐴋𐴟𐴉𐴡𐴥𐴔 𐴀𐴡𐴥𐴘𐴧𐴠.
8𐴇𐴞𐴥𐴘𐴝𐴕 𐴊𐴠𐴑𐴞𐴥 𐴏𐴝𐴥𐴘𐴔𐴡𐴕 𐴉𐴞𐴃𐴡𐴌𐴠 𐴀𐴞𐴏𐴝𐴤𐴌 𐴉𐴡𐴦𐴃𐴢 𐴉𐴡𐴌𐴞 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴀𐴝𐴣𐴀𐴌 𐴈𐴠𐴥𐴕𐴃𐴟 𐴎𐴡𐴦𐴒𐴡𐴥𐴘; 𐴀𐴝𐴀𐴛 𐴃𐴡 𐴒𐴟𐴕𐴝𐴤𐴒𐴝𐴌 𐴔𐴝𐴕𐴟𐴥𐴙𐴐𐴢.“9𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴇𐴠𐴥𐴊𐴟𐴕 𐴔𐴝𐴏𐴢 𐴉𐴝𐴘𐴧𐴠𐴥 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴎𐴠𐴃𐴝𐴌𐴝𐴤 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴑𐴟𐴥𐴁𐴢 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴓𐴒𐴡𐴘.10𐴇𐴠𐴥𐴕𐴊𐴞𐴓𐴧𐴝, 𐴎𐴠𐴁𐴠𐴊𐴝𐴙𐴌 𐴉𐴟𐴀𐴝𐴙𐴕 𐴘𐴝𐴑𐴟𐴁𐴢 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝 𐴘𐴡𐴥, 𐴎𐴠𐴃𐴝𐴌𐴝𐴤 𐴀𐴝𐴐𐴧𐴞𐴥𐴓𐴢 𐴏𐴝𐴥𐴘𐴔𐴡𐴕𐴡𐴌 𐴏𐴝𐴥𐴀𐴣𐴃𐴞.
𐴀𐴞𐴏𐴝𐴤𐴘𐴠 𐴏𐴝𐴥𐴘𐴔𐴡𐴕𐴡𐴌𐴠 𐴈𐴡𐴀𐴌 𐴊𐴠, ”𐴕𐴡 𐴋𐴡𐴦𐴌𐴝𐴐𐴢, 𐴀𐴠𐴇𐴡𐴥𐴕𐴡𐴃𐴧𐴟 𐴓𐴡𐴥𐴃𐴞 𐴃𐴟𐴘 𐴔𐴝𐴕𐴟𐴥𐴙𐴐𐴢 𐴊𐴡𐴥𐴌𐴞𐴁𐴞.“
11𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴀𐴞𐴥𐴃𐴝𐴌𐴝𐴌 𐴕𐴡𐴦 𐴒𐴟𐴥𐴕 𐴑𐴟𐴓𐴡𐴃𐴢 𐴀𐴝𐴙𐴕𐴧𐴠𐴤, 𐴀𐴝𐴦𐴌 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴀𐴠𐴌𐴞 𐴀𐴞𐴥𐴁𐴝𐴌 𐴉𐴞𐴏𐴝𐴥𐴓𐴞 𐴊𐴡𐴙𐴅𐴧𐴠.

𐴀𐴠𐴎𐴧𐴡𐴕 𐴑𐴟𐴌𐴟𐴏𐴢 𐴁𐴞𐴘𐴝𐴌𐴝𐴙𐴔𐴧𐴝 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴧𐴠

12𐴀𐴠𐴑𐴁𐴝𐴌 𐴀𐴞𐴏𐴝𐴤 𐴀𐴠𐴑𐴧𐴝𐴥𐴕 𐴐𐴡𐴥𐴀𐴌𐴡𐴃𐴢 𐴀𐴝𐴐𐴧𐴞𐴥𐴓𐴢, 𐴇𐴠𐴥𐴍𐴠 𐴑𐴟𐴌𐴟𐴏𐴠 𐴉𐴟𐴌𐴝𐴘𐴧𐴝 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢. 𐴘𐴡𐴥𐴒𐴧𐴗𐴝𐴘𐴠 𐴀𐴞𐴏𐴝𐴤𐴌𐴠 𐴊𐴠𐴙𐴑𐴧𐴠𐴥 𐴌𐴝𐴥𐴌, 𐴀𐴟𐴣𐴀𐴘𐴃𐴡𐴘 𐴉𐴡𐴌𐴞 𐴀𐴞𐴥𐴁𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴠𐴥𐴌 𐴊𐴠, ”𐴀𐴡𐴥 𐴔𐴝𐴓𐴞𐴑, 𐴃𐴟𐴀𐴛 𐴏𐴝𐴘𐴓𐴠𐴥 𐴀𐴝𐴣𐴀𐴌𐴠𐴥 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴞𐴥 𐴉𐴝𐴌𐴞𐴁𐴝𐴥.“
13𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴀𐴝𐴥𐴃𐴢 𐴁𐴝𐴌𐴝𐴤𐴘 𐴘𐴡𐴥𐴒𐴧𐴗𐴝𐴌𐴠 𐴊𐴡𐴥𐴌𐴞 𐴈𐴡𐴀𐴌 𐴊𐴠, ”𐴀𐴝𐴀𐴛 𐴏𐴝𐴀𐴘𐴢; 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴎𐴡𐴒𐴡𐴘.“𐴃𐴡𐴥𐴘 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴘𐴡𐴥𐴒𐴧𐴗𐴝𐴃𐴧𐴟 𐴑𐴟𐴌𐴟𐴏𐴢 𐴁𐴞𐴘𐴝𐴌𐴝𐴔 𐴒𐴞𐴦𐴘𐴠𐴥𐴒𐴡𐴘.
14𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴕𐴞𐴐𐴡𐴥𐴃𐴢 𐴒𐴡𐴙𐴅𐴧𐴠𐴥 𐴊𐴠, ”𐴘𐴝𐴀𐴕 𐴇𐴡𐴕𐴡𐴤𐴑𐴞𐴘𐴡𐴌𐴠 𐴕𐴡 𐴈𐴡𐴘𐴧𐴡𐴥, 𐴁𐴡𐴥𐴓𐴑𐴠 𐴎𐴝𐴘 𐴕𐴞𐴎𐴡𐴌𐴠𐴥 𐴀𐴞𐴔𐴝𐴔𐴡𐴌 𐴇𐴝𐴣𐴏𐴠 𐴊𐴝𐴈𐴡𐴥𐴒𐴡𐴘, 𐴀𐴝𐴦𐴌 𐴃𐴟𐴀𐴛 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴧𐴡 𐴊𐴠 𐴇𐴞𐴥𐴘𐴝𐴕 𐴔𐴝𐴙𐴕𐴐𐴡𐴥𐴌 𐴇𐴝𐴣𐴏𐴠 𐴒𐴡𐴁𐴝𐴤 𐴀𐴡𐴥 𐴉𐴝𐴕, 𐴔𐴟𐴀𐴏𐴝𐴘𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠 𐴇𐴠𐴥 𐴑𐴟𐴌𐴁𐴝𐴕𐴞 𐴊𐴡𐴒𐴡𐴥𐴘.“
15𐴓𐴠𐴑𐴞𐴕 𐴀𐴞𐴏𐴝𐴤𐴌 𐴈𐴡𐴥𐴁𐴡𐴌 𐴀𐴝𐴌𐴡𐴤 𐴁𐴞𐴐𐴞𐴤𐴒𐴡𐴌𐴞 𐴉𐴡𐴥𐴓𐴞𐴒𐴞𐴘𐴡𐴘, 𐴀𐴝𐴦𐴌 𐴁𐴠𐴐𐴝𐴤𐴁𐴞𐴐𐴞𐴤 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴞𐴥𐴁𐴝𐴌 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴉𐴟𐴥𐴕𐴞 𐴁𐴡𐴓𐴧𐴝 𐴀𐴠𐴊𐴧𐴠 𐴕𐴞𐴎𐴡𐴌 𐴁𐴞𐴘𐴝𐴌𐴝𐴔 𐴀𐴡𐴥𐴑𐴧𐴡𐴓𐴡𐴃𐴧𐴟 𐴒𐴡𐴔 𐴀𐴡𐴥𐴘 𐴁𐴡𐴓𐴧𐴝 𐴀𐴝𐴀𐴃𐴢 𐴃𐴝𐴥𐴑𐴞𐴃𐴡.16𐴔𐴡𐴕𐴃𐴡𐴌 𐴀𐴞𐴥𐴁𐴝 𐴕𐴞𐴎𐴠 𐴀𐴠𐴒𐴝𐴎𐴝𐴥-𐴀𐴠𐴒𐴝𐴎𐴝𐴥 𐴁𐴡𐴐𐴡𐴥𐴃𐴞-𐴏𐴝𐴥𐴌𐴝 𐴎𐴝𐴒𐴝𐴃𐴢 𐴎𐴝𐴘 𐴊𐴟𐴖𐴝 𐴒𐴡𐴙𐴃𐴧𐴡𐴥.

𐴀𐴠𐴎𐴧𐴡𐴕 𐴀𐴝𐴣𐴃𐴟𐴌𐴡𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

17𐴀𐴠𐴑 𐴊𐴞𐴕 𐴎𐴠𐴣𐴃𐴧𐴠𐴥 𐴀𐴞𐴏𐴝𐴤𐴘𐴠 𐴃𐴝𐴦𐴓𐴞𐴔 𐴊𐴠𐴌, 𐴇𐴠𐴥𐴍𐴠 𐴇𐴡𐴦𐴎𐴧𐴡𐴕 𐴉𐴠𐴥𐴌𐴡𐴐𐴞 𐴀𐴠𐴊𐴧𐴠 𐴐𐴡𐴥𐴌𐴞𐴘𐴡𐴃𐴡𐴌 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴁𐴡𐴘𐴍𐴝𐴤 𐴀𐴝𐴐𐴧𐴞𐴥𐴓𐴢, 𐴎𐴠𐴃𐴝𐴌𐴝𐴤 𐴀𐴝𐴙𐴐𐴧𐴠𐴥 𐴊𐴠 𐴀𐴡𐴥𐴙𐴓𐴊𐴠 𐴒𐴝𐴓𐴞𐴓𐴡𐴌 𐴉𐴡𐴃𐴧𐴞𐴥 𐴉𐴝𐴌𐴝 𐴃𐴧𐴟, 𐴘𐴡𐴇𐴟𐴥𐴊𐴞𐴘𐴝 𐴃𐴧𐴟, 𐴀𐴠𐴊𐴧𐴠 𐴅𐴠𐴌𐴟𐴥𐴏𐴝𐴓𐴠𐴔 𐴀𐴡𐴃𐴧𐴟. 𐴀𐴝𐴦𐴌 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴌𐴠 𐴒𐴡𐴔 𐴒𐴡𐴌𐴞𐴥 𐴁𐴡𐴓𐴧𐴝 𐴔𐴝𐴁𐴟𐴊𐴡𐴌 𐴑𐴟𐴊𐴟𐴌𐴟𐴃𐴢 𐴀𐴞𐴏𐴝𐴤𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢.18𐴇𐴠𐴥 𐴀𐴡𐴑𐴃𐴡𐴥𐴃𐴢 𐴇𐴡𐴊𐴟𐴥𐴕 𐴔𐴝𐴙𐴕𐴐𐴠𐴥 𐴀𐴠𐴑 𐴀𐴝𐴣𐴃𐴟𐴌 𐴔𐴝𐴕𐴟𐴥𐴙𐴐𐴡𐴌𐴠 𐴁𐴞𐴏𐴝𐴥𐴕𐴝𐴃𐴢 𐴒𐴡𐴥𐴌𐴞 𐴁𐴡𐴀𐴘𐴢 𐴀𐴝𐴙𐴕𐴧𐴠𐴤; 𐴀𐴞𐴥𐴃𐴝𐴌𐴝 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴞𐴥𐴓𐴢 𐴊𐴠, 𐴘𐴡𐴥𐴒𐴧𐴗𐴝𐴌𐴠 𐴒𐴡𐴥𐴌𐴡𐴌 𐴁𐴟𐴥𐴃𐴡𐴌𐴠 𐴒𐴡𐴥𐴓𐴝𐴘 𐴀𐴞𐴏𐴝𐴤𐴌 𐴔𐴟𐴀𐴕𐴃𐴟 𐴀𐴠𐴌𐴞 𐴁𐴡𐴓𐴧𐴝.19𐴔𐴡𐴕𐴃𐴡𐴌 𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴔𐴝𐴕𐴟𐴥𐴙𐴐𐴡𐴌 𐴎𐴝𐴔𐴡𐴓𐴧𐴝 𐴁𐴡𐴥𐴓𐴞 𐴘𐴡𐴥𐴒𐴧𐴗𐴝𐴌𐴠 𐴁𐴟𐴥𐴃𐴡𐴌𐴠 𐴓𐴡𐴘𐴎𐴝𐴘𐴁𐴝𐴥𐴌 𐴌𐴝𐴏𐴃𐴝 𐴕𐴡𐴥 𐴉𐴝𐴦, 𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴒𐴡𐴥𐴌𐴡𐴌 𐴏𐴝𐴥𐴊𐴡𐴌 𐴖𐴡𐴌𐴠 𐴀𐴟𐴙𐴄𐴧𐴠𐴥𐴒𐴡𐴘, 𐴀𐴝𐴦𐴌 𐴏𐴝𐴥𐴕𐴞 𐴁𐴝𐴘 𐴘𐴡𐴥𐴒𐴧𐴗𐴝𐴌𐴠 𐴁𐴞𐴏𐴝𐴥𐴕𐴝 𐴐𐴡𐴥𐴀 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴔𐴝𐴎𐴠𐴥𐴇𐴝𐴓𐴠 𐴀𐴞𐴏𐴝𐴤𐴌 𐴔𐴟𐴀𐴕𐴃𐴟 𐴓𐴝𐴔𐴝𐴘𐴊𐴞𐴘𐴠𐴥.
20𐴀𐴞𐴥𐴃𐴝𐴌𐴝𐴌 𐴀𐴞𐴔𐴝𐴕 𐴊𐴠𐴑𐴞𐴥 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠 ”𐴊𐴟𐴏𐴃𐴡𐴥, 𐴃𐴡𐴌 𐴒𐴟𐴕𐴝𐴤 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴒𐴞𐴥𐴘𐴠.“
21𐴇𐴞𐴥𐴘𐴝𐴕𐴠 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴁𐴝𐴥𐴉𐴝𐴃𐴢 𐴊𐴡𐴙𐴅𐴧𐴠 𐴊𐴠, ”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝 𐴇𐴡𐴕, 𐴎𐴞𐴁𐴝𐴤𐴘𐴠 𐴑𐴟𐴉𐴠𐴥𐴌𐴞 𐴒𐴡𐴌𐴠𐴥𐴌؟ 𐴏𐴞𐴌𐴞𐴥𐴉𐴢 𐴀𐴝𐴓𐴧𐴝 𐴁𐴝𐴊𐴠 𐴒𐴟𐴕𐴝𐴤 𐴔𐴝𐴉𐴢 𐴒𐴡𐴌𐴞𐴥𐴉𐴝𐴌𐴡𐴘𐴝 𐴇𐴡𐴕 𐴀𐴝𐴏𐴠𐴤؟“
22𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌 𐴁𐴝𐴥𐴉𐴝𐴕𐴞𐴌𐴠 𐴎𐴝𐴕𐴞, 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴊𐴞𐴓𐴠-𐴊𐴞𐴓𐴠 𐴇𐴠𐴥𐴕𐴊𐴞𐴓𐴧𐴝 𐴑𐴞𐴘𐴝𐴥 𐴁𐴝𐴥𐴉𐴡𐴌؟23𐴈𐴡𐴘𐴃𐴠𐴤 𐴇𐴡𐴕 𐴕𐴝𐴥𐴕 𐴀𐴝𐴏𐴝𐴤𐴕, 𐴑𐴞 ’𐴃𐴡𐴌 𐴒𐴟𐴕𐴝𐴤 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴒𐴞𐴥𐴘𐴠,‘ 𐴀𐴝𐴦𐴌 𐴕𐴝𐴥𐴑𐴞, ’𐴀𐴟𐴍𐴞𐴤 𐴀𐴝𐴥𐴣𐴄𐴢‘؟24𐴓𐴠𐴑𐴞𐴕 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴌𐴝𐴌𐴠 𐴘𐴝𐴀𐴕 𐴎𐴝𐴕𐴝𐴘𐴊𐴞𐴃𐴡 𐴔𐴡𐴕𐴠𐴈𐴡𐴀𐴌, 𐴀𐴠 𐴊𐴟𐴕𐴞𐴘𐴝𐴙𐴃𐴢 𐴒𐴟𐴕𐴝𐴤 𐴔𐴝𐴉𐴢 𐴒𐴡𐴌𐴞𐴥𐴁𐴝𐴌 𐴑𐴠𐴥𐴔𐴡𐴃𐴝 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴃𐴧𐴟 𐴀𐴝𐴏𐴠𐴤.“𐴃𐴡𐴥𐴘 𐴀𐴞𐴥𐴁𐴝𐴘𐴠 𐴀𐴝𐴣𐴃𐴟𐴌 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴡𐴌𐴠𐴥 𐴈𐴡𐴀𐴙𐴌, 𐴀𐴟𐴄𐴢, 𐴃𐴡𐴌 𐴁𐴞𐴏𐴝𐴥𐴕𐴝 𐴃𐴟𐴓𐴞𐴤 𐴓𐴡𐴦𐴘𐴢 𐴒𐴡𐴥𐴌𐴡𐴃𐴢 𐴎𐴝𐴦𐴒𐴡𐴥𐴘.“25𐴘𐴡𐴥𐴒𐴧𐴗𐴝 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴀𐴞𐴥𐴃𐴝𐴌𐴝𐴌 𐴔𐴟𐴀𐴕𐴃𐴟 𐴀𐴟𐴙𐴄𐴧𐴠𐴥, 𐴀𐴝𐴦𐴌 𐴕𐴞𐴎𐴠 𐴕𐴠𐴍𐴞 𐴀𐴝𐴐𐴧𐴞𐴥𐴓𐴢 𐴊𐴠 𐴁𐴞𐴏𐴝𐴥𐴕𐴝 𐴖𐴝 𐴃𐴟𐴓𐴞𐴤 𐴓𐴡𐴦𐴘𐴢 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴞𐴥-𐴒𐴡𐴌𐴞𐴥 𐴒𐴡𐴥𐴌𐴡𐴃𐴢 𐴒𐴞𐴦𐴘𐴠𐴥𐴒𐴡𐴘.26𐴇𐴞𐴥𐴘𐴝𐴕𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠. 𐴀𐴞𐴥𐴃𐴝𐴌𐴝 𐴑𐴟𐴥𐴁𐴢 𐴋𐴡𐴦𐴌𐴝𐴘𐴎𐴝𐴘 𐴈𐴡𐴀𐴌 𐴊𐴠, ”𐴀𐴝𐴙𐴅𐴧𐴝 𐴀𐴝𐴣𐴀𐴌𐴝 𐴇𐴝𐴌𐴇𐴝𐴥𐴕𐴝 𐴊𐴠𐴙𐴑𐴧𐴞𐴥!“

𐴀𐴞𐴏𐴝𐴤𐴘𐴠 𐴓𐴠𐴀𐴜𐴞𐴌𐴠 𐴋𐴝𐴙𐴑𐴧𐴠𐴥

27𐴘𐴝𐴥𐴌𐴁𐴝𐴦𐴊𐴠 𐴀𐴞𐴏𐴝𐴤 𐴁𐴝𐴀𐴌𐴑𐴟𐴓𐴠 𐴎𐴝𐴘 𐴊𐴠𐴑𐴠𐴥𐴌 𐴊𐴠, 𐴓𐴠𐴀𐴜𐴞 𐴕𐴝𐴔𐴡𐴌 𐴀𐴠𐴥𐴎𐴧𐴡𐴕 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴇𐴝𐴥𐴎𐴝𐴕𐴝 𐴃𐴟𐴓𐴠𐴥 𐴊𐴠 𐴒𐴡𐴥𐴌𐴡𐴃𐴢 𐴁𐴡𐴀𐴘𐴢 𐴃𐴝𐴥𐴙𐴑𐴧𐴠. 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴊𐴡𐴌𐴡.“28𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴀𐴠𐴌𐴞 𐴀𐴟𐴍𐴞𐴤 𐴀𐴞𐴥𐴁𐴝𐴌 𐴉𐴞𐴏𐴝𐴥𐴓𐴞 𐴊𐴡𐴙𐴅𐴧𐴠.
29𐴁𐴝𐴦𐴊𐴠 𐴓𐴠𐴀𐴜𐴞𐴘𐴠 𐴕𐴞𐴎𐴡𐴌 𐴒𐴡𐴥𐴌𐴡𐴃𐴢 𐴀𐴞𐴏𐴝𐴤 𐴓𐴧𐴝 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴈𐴝𐴥𐴕𐴝 𐴒𐴡𐴙𐴅𐴧𐴠𐴥; 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴘𐴃𐴡 𐴁𐴡𐴙𐴐𐴧𐴠𐴥 𐴊𐴠 𐴇𐴠𐴥𐴍𐴠 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴀𐴡𐴙𐴕𐴧𐴡 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴋𐴡𐴣𐴀𐴌 𐴀𐴠𐴑 𐴊𐴡𐴓𐴢 𐴀𐴝𐴐𐴧𐴞𐴥𐴓𐴢.
30𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴀𐴞𐴥𐴃𐴝𐴌𐴝𐴌 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴀𐴠𐴕𐴊𐴞𐴓𐴧𐴝 𐴐𐴠𐴥𐴑𐴝𐴘𐴡𐴃𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, ”𐴃𐴟𐴣𐴀𐴝𐴥𐴌𐴝 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝𐴌 𐴀𐴠𐴊𐴧𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴡𐴌 𐴉𐴟𐴥𐴖𐴝𐴣𐴃𐴞 𐴑𐴞𐴘𐴝𐴥 𐴈𐴝𐴥𐴕𐴝-𐴉𐴞𐴕𐴝 𐴈𐴡𐴥𐴀؟“31𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴃𐴧𐴟 𐴃𐴡 𐴋𐴝𐴑𐴄𐴡𐴌 𐴕𐴡 𐴓𐴝𐴒𐴠, 𐴔𐴡𐴕𐴃𐴡𐴌 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴃𐴧𐴟 𐴁𐴠 𐴓𐴝𐴒𐴠.32𐴀𐴝𐴀𐴛 𐴃𐴡𐴖𐴝𐴥𐴌 𐴊𐴝𐴖𐴡𐴃𐴢 𐴊𐴞𐴃𐴡 𐴀𐴝𐴙𐴐𐴧𐴞𐴤 𐴊𐴠 𐴉𐴡𐴌𐴇𐴠𐴥𐴏𐴒𐴝𐴌 𐴀𐴡𐴥𐴑𐴧𐴡𐴓𐴡𐴌𐴠 𐴕𐴡, 𐴁𐴡𐴥𐴓𐴑𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴢 𐴀𐴡𐴌𐴠.“

𐴌𐴟𐴎𐴝𐴌 𐴁𐴝𐴦𐴁𐴟𐴃𐴠 𐴏𐴟𐴥𐴖𐴝𐴓𐴢

33𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴘𐴝𐴇𐴝𐴥𐴘𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴃𐴡 𐴀𐴠𐴒𐴝𐴎𐴝𐴥-𐴀𐴠𐴒𐴝𐴎𐴝𐴥 𐴌𐴟𐴎𐴝 𐴌𐴝𐴑𐴠𐴥 𐴀𐴠𐴊𐴧𐴠 𐴊𐴟𐴖𐴝 𐴒𐴡𐴌𐴠𐴥, 𐴇𐴠𐴥𐴕𐴊𐴞𐴓𐴧𐴝 𐴉𐴠𐴥𐴌𐴡𐴐𐴞𐴌 𐴒𐴟𐴥𐴕𐴠 𐴘𐴡𐴥 𐴒𐴡𐴌𐴠𐴥, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴣𐴌 𐴒𐴟𐴥𐴕𐴠 𐴃𐴡 𐴈𐴝𐴥𐴕𐴝-𐴉𐴞𐴕𐴝 𐴁𐴝𐴊𐴢 𐴊𐴠𐴊𐴠 𐴕𐴝𐴥𐴘.“
34𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴊𐴟𐴓𐴝𐴤 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞𐴃𐴠 𐴑𐴞𐴥 𐴃𐴟𐴣𐴀𐴝𐴥𐴌𐴝 𐴁𐴡𐴘𐴌𐴝𐴙𐴃𐴧𐴝𐴌𐴠 𐴌𐴟𐴎𐴝 𐴌𐴝𐴑𐴝𐴤𐴘 𐴉𐴝𐴌𐴞𐴁𐴝𐴥؟35𐴔𐴡𐴕𐴃𐴡𐴌 𐴀𐴠𐴀𐴕 𐴊𐴞𐴕 𐴀𐴝𐴘𐴁𐴡𐴤, 𐴎𐴠𐴣𐴃𐴧𐴠𐴥 𐴊𐴟𐴓𐴝𐴤𐴌𐴠 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴡𐴥𐴃𐴧𐴟 𐴓𐴡𐴘𐴉𐴠𐴥𐴓𐴝 𐴎𐴝𐴘𐴁𐴡, 𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝 𐴊𐴞𐴕 𐴇𐴞𐴥𐴀𐴕𐴡𐴃𐴢 𐴌𐴟𐴎𐴝 𐴌𐴝𐴑𐴞𐴥𐴁𐴡.“
36𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠 𐴔𐴠𐴀𐴏𐴝𐴓𐴢 𐴓𐴝𐴕 𐴀𐴡𐴥 𐴈𐴡𐴘𐴧𐴠𐴥, ”𐴇𐴡𐴕𐴡𐴤𐴑𐴞𐴘𐴠 𐴃𐴡 𐴕𐴡𐴘𐴝 𐴉𐴟𐴐𐴝𐴥𐴑𐴡𐴃𐴧𐴟 𐴀𐴠𐴑𐴧𐴝𐴥𐴒𐴡𐴌𐴞 𐴉𐴝𐴥𐴍𐴞 𐴓𐴡𐴦𐴘𐴢 𐴉𐴟𐴌𐴝𐴕 𐴀𐴠𐴑𐴒𐴗𐴝𐴥𐴃𐴢 𐴃𐴝𐴓𐴞 𐴊𐴠𐴊𐴠 𐴕𐴝𐴥𐴘; 𐴎𐴡𐴊𐴞 𐴊𐴞𐴓𐴠𐴥 𐴃𐴡 𐴕𐴡𐴘𐴝 𐴖𐴝 𐴘𐴡𐴥 𐴉𐴝𐴥𐴍𐴞 𐴎𐴝𐴘𐴁𐴡𐴘, 𐴀𐴝𐴦𐴌 𐴕𐴡𐴘𐴝 𐴖𐴝𐴃𐴧𐴟 𐴓𐴡𐴘𐴧𐴠𐴥 𐴊𐴠 𐴃𐴝𐴓𐴞 𐴒𐴝𐴥𐴕 𐴀𐴡𐴥 𐴉𐴟𐴌𐴝𐴕 𐴕𐴗𐴝𐴥𐴃𐴢 𐴕𐴡 𐴇𐴝𐴥𐴍𐴞𐴁𐴡.37𐴇𐴠𐴥𐴕𐴊𐴞𐴓𐴧𐴝, 𐴇𐴡𐴕𐴡𐴤𐴑𐴞𐴘𐴠 𐴕𐴡𐴘𐴝 𐴀𐴝𐴚𐴒𐴟𐴌𐴡𐴌 𐴌𐴡𐴐𐴡𐴌𐴠 𐴉𐴟𐴌𐴝𐴕 𐴏𐴝𐴔𐴝𐴌𐴝𐴌 𐴇𐴡𐴥𐴙𐴓𐴧𐴝𐴃𐴢 𐴌𐴝𐴑𐴠𐴥 𐴊𐴠 𐴕𐴝𐴥𐴘; 𐴎𐴡𐴊𐴞 𐴌𐴝𐴑𐴞𐴥𐴓𐴠 𐴃𐴡 𐴕𐴡𐴘𐴝 𐴌𐴡𐴐𐴧𐴟𐴥𐴕𐴠 𐴇𐴡𐴥𐴙𐴓𐴧𐴝 𐴒𐴟𐴥𐴕 𐴉𐴝𐴥𐴍𐴞𐴉𐴠𐴓𐴝𐴘 𐴒𐴡𐴓𐴞𐴎𐴝𐴘𐴁𐴡𐴥𐴘, 𐴀𐴝𐴦𐴌 𐴇𐴡𐴥𐴙𐴓𐴧𐴝 𐴒𐴟𐴥𐴕 𐴀𐴡𐴥 𐴁𐴡𐴌𐴁𐴝𐴊𐴢 𐴎𐴝𐴘𐴁𐴡𐴘.38𐴇𐴠𐴥𐴃𐴡𐴓𐴧𐴝, 𐴕𐴡𐴘𐴝 𐴀𐴝𐴚𐴒𐴟𐴌𐴡𐴌 𐴌𐴡𐴐𐴡𐴌𐴠 𐴕𐴡𐴘𐴝 𐴏𐴝𐴔𐴝𐴌𐴝𐴌 𐴇𐴡𐴥𐴙𐴓𐴧𐴝𐴃𐴢 𐴌𐴝𐴑𐴝𐴤 𐴉𐴡𐴌𐴠.39𐴇𐴡𐴕𐴡𐴤𐴑𐴞𐴘𐴠 𐴃𐴡 𐴉𐴟𐴌𐴝𐴕 𐴀𐴝𐴚𐴒𐴟𐴌𐴡𐴌 𐴌𐴡𐴐𐴢 𐴇𐴝𐴥𐴘 𐴁𐴝𐴦𐴊𐴠 𐴕𐴡𐴘𐴝 𐴀𐴝𐴚𐴒𐴟𐴌𐴡𐴌 𐴌𐴡𐴐𐴢 𐴈𐴝𐴥𐴘𐴃𐴡 𐴀𐴝𐴎𐴧𐴟 𐴒𐴡𐴌𐴠𐴥 𐴊𐴠 𐴕𐴝𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴠𐴦 𐴈𐴡𐴀 𐴊𐴠, ’𐴉𐴟𐴌𐴝𐴕 𐴕𐴟𐴥𐴕 𐴁𐴠 𐴁𐴠𐴀𐴃𐴡𐴌.‘ “

The Word for the World International

https://app.library.bible/content/87faca8b51c22590