Read 𐴘𐴡𐴇𐴝𐴥𐴕𐴧𐴝 10

𐴘𐴡𐴇𐴝𐴥𐴕𐴧𐴝10

𐴁𐴠𐴥𐴌𐴝𐴏𐴡𐴥𐴀𐴓𐴢 𐴏𐴡𐴌𐴡𐴘𐴝𐴌 𐴔𐴠𐴀𐴏𐴝𐴓𐴢

¹”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴎𐴠𐴦𐴕𐴞𐴑𐴞 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴀𐴝𐴣𐴌𐴝𐴙𐴓𐴡𐴃𐴢 𐴊𐴟𐴖𐴝𐴌 𐴁𐴝𐴥𐴘 𐴕𐴡 𐴒𐴡𐴥𐴓𐴠, 𐴔𐴡𐴕𐴃𐴡𐴌 𐴀𐴡𐴙𐴕𐴧𐴡 𐴁𐴡𐴓𐴞 𐴉𐴝𐴌𐴝𐴤𐴘 𐴒𐴡𐴥𐴓𐴠, 𐴀𐴞𐴥𐴃𐴠 𐴏𐴟𐴌 𐴀𐴠𐴊𐴧𐴠 𐴋𐴝𐴈𐴝𐴣𐴙𐴄𐴢.²𐴓𐴠𐴑𐴞𐴕 𐴎𐴠𐴦𐴕𐴞𐴑𐴞 𐴊𐴟𐴖𐴝𐴌 𐴁𐴝𐴥𐴘 𐴒𐴡𐴥𐴓𐴠, 𐴘𐴡𐴥𐴒𐴧𐴗𐴝 𐴀𐴡𐴥𐴙𐴓𐴊𐴠 𐴁𐴠𐴥𐴌𐴝𐴏𐴡𐴥𐴀𐴓𐴢 𐴏𐴡𐴌𐴡𐴘𐴝.³𐴘𐴡𐴥𐴒𐴧𐴗𐴝𐴌𐴠 𐴊𐴟𐴖𐴝𐴌 𐴏𐴡𐴦𐴛𐴊𐴝𐴌𐴠 𐴊𐴟𐴖𐴝𐴌 𐴑𐴟𐴥𐴓𐴞𐴊𐴠, 𐴀𐴝𐴦𐴌 𐴁𐴠𐴥𐴌𐴝𐴏𐴡𐴥𐴀𐴓𐴢 𐴀𐴡𐴥𐴑𐴧𐴡𐴓𐴠 𐴘𐴡𐴥𐴒𐴧𐴗𐴝𐴌 𐴀𐴝𐴁𐴝𐴏𐴢 𐴉𐴟𐴥𐴕𐴠. 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴁𐴠𐴥𐴌𐴝𐴏𐴡𐴥𐴀𐴓𐴢 𐴀𐴡𐴥𐴑𐴧𐴡𐴓𐴡𐴌𐴠 𐴕𐴝𐴔 𐴊𐴡𐴌𐴞-𐴊𐴡𐴌𐴞 𐴔𐴝𐴃𐴝𐴘 𐴁𐴝𐴀𐴌𐴠 𐴀𐴝𐴕𐴠𐴤.⁴𐴎𐴠𐴣𐴃𐴧𐴠𐴥 𐴘𐴡𐴥𐴒𐴧𐴗𐴝𐴃𐴧𐴟 𐴕𐴞𐴎𐴡𐴌 𐴁𐴠𐴥𐴌𐴝𐴏𐴡𐴥𐴀𐴓𐴢 𐴁𐴠𐴒𐴧𐴟𐴥𐴕𐴡𐴌𐴠 𐴁𐴝𐴀𐴌𐴠 𐴀𐴝𐴙𐴕𐴧𐴝𐴤 𐴀𐴡𐴥, 𐴘𐴡𐴥𐴒𐴧𐴗𐴝 𐴇𐴞𐴥𐴀𐴕𐴡𐴌 𐴀𐴝𐴒𐴠-𐴀𐴝𐴒𐴠 𐴎𐴝𐴦, 𐴀𐴝𐴦𐴌 𐴁𐴠𐴥𐴌𐴝𐴏𐴡𐴥𐴀𐴓𐴢 𐴇𐴞𐴥𐴀𐴕 𐴘𐴡𐴥𐴒𐴧𐴗𐴝𐴌 𐴉𐴞𐴏𐴠𐴤-𐴉𐴞𐴏𐴠𐴤 𐴀𐴝𐴘𐴧𐴠𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴌 𐴀𐴝𐴁𐴝𐴏𐴢 𐴇𐴞𐴥𐴀𐴕𐴠 𐴏𐴞𐴕𐴠𐴥.⁵𐴔𐴡𐴕𐴃𐴡𐴌 𐴇𐴞𐴥𐴀𐴕 𐴀𐴡𐴏𐴞𐴕 𐴔𐴝𐴕𐴟𐴥𐴙𐴐𐴡𐴌 𐴉𐴞𐴏𐴠𐴤-𐴉𐴞𐴏𐴠𐴤 𐴁𐴞𐴓𐴑𐴟𐴥𐴓𐴢 𐴕𐴡 𐴎𐴝𐴘𐴁𐴡, 𐴁𐴡𐴥𐴓𐴑𐴠 𐴀𐴞𐴥𐴃𐴝𐴃𐴧𐴟 𐴊𐴝𐴥𐴘𐴎𐴝𐴘𐴁𐴡𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴀𐴕𐴠 𐴀𐴡𐴏𐴞𐴕 𐴔𐴝𐴕𐴟𐴥𐴙𐴐𐴡𐴌 𐴀𐴝𐴁𐴝𐴏𐴢 𐴕𐴡 𐴏𐴞𐴕𐴠𐴥.“⁶𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠 𐴔𐴠𐴀𐴏𐴝𐴓𐴢 𐴓𐴝𐴕 𐴈𐴡𐴘𐴧𐴠𐴥, 𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴑𐴞𐴦 𐴈𐴡𐴘𐴃𐴡𐴤 𐴏𐴝𐴥𐴌 𐴊𐴠 𐴇𐴞𐴥𐴘𐴝𐴕 𐴀𐴞𐴥𐴃𐴝𐴌𐴝 𐴕𐴡𐴥 𐴁𐴟𐴎𐴠𐴥.

𐴀𐴞𐴏𐴝𐴤 𐴀𐴡𐴥𐴙𐴓𐴊𐴠 𐴒𐴡𐴔 𐴁𐴠𐴥𐴌𐴝𐴏𐴡𐴥𐴀𐴓𐴢 𐴏𐴡𐴌𐴡𐴘𐴝

⁷𐴇𐴠𐴥𐴃𐴡𐴓𐴧𐴝 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴝𐴁𐴝𐴌 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴁𐴠𐴥𐴌𐴝𐴏𐴡𐴥𐴀𐴓𐴢 𐴓𐴟𐴕𐴡𐴌 𐴊𐴟𐴖𐴝𐴌 𐴀𐴡𐴥𐴘𐴓𐴝𐴔 𐴊𐴠 𐴀𐴝𐴀𐴛.⁸𐴀𐴝𐴣𐴀𐴌 𐴀𐴝𐴒𐴠 𐴎𐴠𐴃𐴝𐴌𐴝𐴤 𐴀𐴝𐴙𐴐𐴧𐴞𐴤𐴓𐴢 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴏𐴟𐴌 𐴀𐴠𐴊𐴧𐴠 𐴋𐴝𐴈𐴝𐴣𐴙𐴄𐴢, 𐴔𐴡𐴕𐴃𐴡𐴌 𐴁𐴠𐴥𐴌𐴝𐴏𐴡𐴥𐴀𐴓𐴢 𐴓𐴟𐴕𐴠 𐴀𐴞𐴥𐴃𐴝𐴌𐴝𐴌 𐴈𐴡𐴃𐴝𐴤 𐴕𐴡𐴥 𐴉𐴟𐴥𐴕𐴠.⁹𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴊𐴟𐴖𐴝𐴌. 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴊𐴞𐴥 𐴁𐴟𐴥𐴃𐴡𐴌𐴠 𐴒𐴡𐴥𐴓𐴠, 𐴀𐴞𐴥𐴃𐴠 𐴕𐴠𐴅𐴝𐴃𐴢 𐴉𐴝𐴘𐴁𐴡. 𐴀𐴞𐴥𐴃𐴠 𐴁𐴟𐴥𐴃𐴡𐴌𐴠 𐴀𐴝𐴘𐴁𐴡𐴤 𐴀𐴠𐴊𐴧𐴠 𐴁𐴝𐴀𐴌𐴠 𐴎𐴝𐴘𐴁𐴡, 𐴀𐴝𐴦𐴌 𐴏𐴡𐴌𐴞𐴁𐴝𐴥𐴌 𐴎𐴝𐴒𐴝 𐴉𐴝𐴘𐴁𐴡.¹⁰𐴏𐴟𐴌 𐴃𐴡 𐴏𐴞𐴌𐴞𐴥𐴉𐴢 𐴏𐴟𐴌𐴞, 𐴑𐴟𐴥𐴕 𐴀𐴠𐴊𐴧𐴠 𐴊𐴡𐴥𐴚𐴐𐴡 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴠𐴥𐴕𐴝 𐴀𐴝𐴘𐴧𐴠𐴤. 𐴓𐴠𐴑𐴞𐴕 𐴀𐴝𐴀𐴛 𐴀𐴝𐴙𐴐𐴧𐴞𐴤 𐴊𐴠, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴎𐴞𐴕𐴊𐴞𐴒𐴞 𐴉𐴝𐴦 𐴀𐴝𐴦𐴌 𐴇𐴠𐴥 𐴎𐴞𐴕𐴊𐴞𐴒𐴞 𐴎𐴠𐴕 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴌𐴝𐴉𐴟𐴌𐴞 𐴒𐴡𐴌𐴞 𐴃𐴝𐴥𐴑𐴠.“

¹¹𐴒𐴡𐴔 𐴁𐴠𐴥𐴌𐴝𐴏𐴡𐴥𐴀𐴓𐴢 𐴏𐴡𐴌𐴡𐴘𐴝 𐴀𐴡𐴥𐴘𐴓𐴝𐴔 𐴊𐴠 𐴀𐴝𐴀𐴛. 𐴒𐴡𐴔 𐴏𐴡𐴌𐴡𐴘𐴝𐴘𐴠 𐴃𐴡 𐴁𐴠𐴥𐴌𐴝𐴏𐴡𐴥𐴀𐴓𐴢 𐴀𐴡𐴥𐴑𐴧𐴡𐴓𐴡𐴓𐴧𐴝 𐴕𐴞𐴎𐴡𐴌 𐴎𐴝𐴕 𐴊𐴠.¹²𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴔𐴟𐴎𐴟𐴌, 𐴀𐴞𐴥𐴃𐴠 𐴀𐴝𐴏𐴡𐴥𐴓𐴢 𐴏𐴡𐴌𐴡𐴘𐴝 𐴕𐴡, 𐴀𐴞𐴥𐴃𐴠 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴒𐴞𐴌𐴡𐴥𐴏𐴢 𐴀𐴡𐴥 𐴕𐴡. 𐴀𐴞𐴥𐴃𐴠 𐴌𐴝𐴚𐴑𐴟𐴣𐴙𐴌 𐴀𐴝𐴘𐴧𐴠𐴤𐴌 𐴊𐴠 𐴊𐴠𐴑𐴞𐴥𐴓𐴠 𐴁𐴠𐴥𐴌𐴝𐴏𐴡𐴥𐴀𐴓𐴢 𐴉𐴠𐴥𐴓𐴝𐴘 𐴊𐴝𐴥𐴘𐴎𐴝𐴒𐴡𐴘, 𐴃𐴡𐴥𐴘 𐴌𐴝𐴚𐴑𐴟𐴣𐴙𐴌 𐴀𐴝𐴀𐴘𐴢 𐴁𐴠𐴥𐴌𐴝𐴏𐴡𐴥𐴀𐴓𐴢 𐴓𐴟𐴕𐴡𐴌𐴠 𐴊𐴡𐴥𐴌𐴞 𐴐𐴞𐴥𐴣𐴍𐴝𐴐𐴞𐴄𐴧𐴝𐴤 𐴒𐴡𐴌𐴞𐴥𐴉𐴠𐴓𐴠.¹³𐴀𐴞𐴥𐴃𐴠 𐴀𐴠𐴃𐴡𐴓𐴧𐴝𐴤 𐴊𐴝𐴥𐴘𐴎𐴝𐴒𐴡𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴠 𐴀𐴡𐴥𐴙𐴓𐴊𐴠 𐴔𐴟𐴎𐴟𐴌, 𐴀𐴝𐴦𐴌 𐴀𐴞𐴥𐴃𐴝𐴃𐴧𐴟 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴁𐴝𐴦𐴁𐴟𐴃𐴠 𐴇𐴡𐴕𐴡𐴤 𐴏𐴞𐴕𐴃𐴝𐴁𐴝𐴥𐴉𐴝𐴕𐴝 𐴕𐴝𐴥𐴘.

¹⁴𐴒𐴡𐴔 𐴁𐴠𐴥𐴌𐴝𐴏𐴡𐴥𐴀𐴓𐴢 𐴏𐴡𐴌𐴡𐴘𐴝 𐴀𐴡𐴥𐴘𐴓𐴝𐴔 𐴊𐴠 𐴀𐴝𐴀𐴛. 𐴀𐴝𐴀𐴛 𐴀𐴝𐴣𐴀𐴌 𐴁𐴠𐴥𐴌𐴝𐴏𐴡𐴥𐴀𐴓𐴢 𐴀𐴡𐴥𐴑𐴧𐴡𐴓𐴡𐴌𐴠 𐴏𐴞𐴕𐴞𐴥, 𐴀𐴝𐴦𐴌 𐴇𐴞𐴥𐴀𐴕𐴠 𐴘𐴡𐴥 𐴀𐴝𐴣𐴀𐴌𐴠𐴥 𐴏𐴞𐴕𐴠𐴥,¹⁵𐴎𐴠𐴕𐴊𐴞𐴓𐴧𐴝 𐴁𐴝𐴉𐴠 𐴀𐴝𐴣𐴀𐴌𐴠𐴥 𐴏𐴞𐴕𐴠𐴥 𐴀𐴝𐴦𐴌 𐴀𐴝𐴀𐴛 𐴁𐴝𐴉𐴡𐴌𐴠 𐴏𐴞𐴕𐴞𐴥. 𐴀𐴝𐴀𐴛 𐴀𐴝𐴣𐴀𐴌 𐴁𐴠𐴥𐴌𐴝𐴏𐴡𐴥𐴀𐴓𐴢 𐴀𐴡𐴥𐴑𐴧𐴡𐴓𐴡𐴓𐴧𐴝 𐴕𐴞𐴎𐴡𐴌 𐴎𐴝𐴕 𐴊𐴞.¹⁶𐴀𐴝𐴣𐴀𐴃𐴧𐴟 𐴀𐴝𐴌𐴡𐴤 𐴇𐴡𐴊𐴟𐴥𐴕 𐴁𐴠𐴥𐴌𐴝𐴏𐴡𐴥𐴀𐴓𐴢 𐴀𐴝𐴏𐴠𐴤, 𐴎𐴞𐴀𐴕 𐴀𐴠 𐴎𐴝𐴥𐴑𐴡𐴃𐴢 𐴕𐴝𐴥𐴘. 𐴀𐴝𐴣𐴀𐴃𐴧𐴟 𐴇𐴞𐴥𐴀𐴕𐴡𐴌𐴠 𐴘𐴡𐴥 𐴓𐴡𐴘𐴀𐴝𐴕𐴝𐴤 𐴉𐴡𐴌𐴞𐴁𐴡𐴥, 𐴀𐴝𐴦𐴌 𐴇𐴞𐴥𐴀𐴕𐴠 𐴘𐴡𐴥 𐴀𐴝𐴣𐴀𐴌 𐴀𐴝𐴁𐴝𐴏𐴢 𐴉𐴟𐴥𐴕𐴞𐴁𐴡. 𐴃𐴡𐴥𐴘 𐴀𐴠𐴒𐴧𐴗𐴝𐴤 𐴎𐴝𐴥𐴑 𐴀𐴡𐴥𐴘𐴁𐴡 𐴀𐴠𐴊𐴧𐴠 𐴀𐴠𐴒𐴧𐴗𐴝𐴤 𐴏𐴡𐴌𐴡𐴘𐴝 𐴀𐴡𐴥𐴘𐴁𐴡.

¹⁷”𐴁𐴝𐴉𐴠 𐴀𐴝𐴣𐴀𐴌𐴠𐴥 𐴀𐴠𐴃𐴡𐴓𐴧𐴝𐴤 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴀𐴝𐴣𐴀𐴌 𐴎𐴝𐴕 𐴊𐴞, 𐴎𐴠𐴀𐴕𐴠 𐴇𐴞𐴥𐴘𐴝𐴕 𐴀𐴝𐴁𐴝𐴌 𐴓𐴡𐴘𐴉𐴠𐴥𐴓𐴝𐴘 𐴉𐴝𐴌𐴞.¹⁸𐴇𐴡𐴕𐴡𐴤𐴑𐴞𐴘𐴠 𐴇𐴞𐴥𐴘𐴝𐴕 𐴀𐴝𐴣𐴀𐴃𐴧𐴟 𐴓𐴡𐴘𐴉𐴠𐴥𐴓𐴝 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴀𐴛 𐴕𐴞𐴎𐴠 𐴇𐴞𐴥𐴘𐴝𐴕 𐴊𐴞 𐴊𐴠. 𐴀𐴝𐴣𐴀𐴃𐴧𐴟 𐴇𐴞𐴥𐴘𐴝𐴕 𐴊𐴞𐴁𐴝𐴌 𐴀𐴡𐴥 𐴑𐴠𐴥𐴔𐴡𐴃𐴝 𐴀𐴝𐴏𐴠𐴤, 𐴀𐴝𐴦𐴌 𐴀𐴝𐴣𐴀𐴃𐴧𐴟 𐴇𐴞𐴥𐴘𐴝𐴕 𐴀𐴝𐴁𐴝𐴌 𐴖𐴝𐴦𐴉𐴠𐴏𐴢 𐴓𐴡𐴘𐴁𐴝𐴌 𐴀𐴡𐴥 𐴑𐴠𐴥𐴔𐴡𐴃𐴝 𐴀𐴝𐴏𐴠𐴤. 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴞𐴥𐴁𐴝𐴌 𐴇𐴡𐴥𐴑𐴟𐴔 𐴇𐴞𐴥𐴘𐴝𐴕 𐴀𐴝𐴀𐴛 𐴉𐴝𐴘𐴧𐴞𐴥 𐴊𐴠 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌 𐴁𐴝𐴉𐴡𐴌 𐴃𐴡𐴌𐴉𐴡𐴥𐴃𐴧𐴟.“

¹⁹𐴈𐴡𐴃𐴝𐴤 𐴇𐴞𐴥𐴀𐴕𐴡𐴌 𐴎𐴡𐴌𐴞𐴘𐴝 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴀𐴝𐴁𐴝𐴌 𐴉𐴝𐴀𐴄𐴝-𐴉𐴝𐴀𐴄𐴞 𐴉𐴡𐴘𐴊𐴝 𐴀𐴡𐴥𐴘𐴒𐴞𐴘𐴡𐴘.²⁰𐴀𐴞𐴥𐴃𐴝𐴌𐴝 𐴁𐴡𐴀𐴗𐴃𐴢 𐴎𐴡𐴕𐴠 𐴈𐴡𐴀𐴌 𐴊𐴠, ”𐴀𐴞𐴁𐴝𐴤𐴌𐴠 𐴁𐴟𐴥𐴃𐴠 𐴉𐴝𐴘𐴧𐴠𐴥, 𐴀𐴞𐴁𐴝𐴤 𐴉𐴡𐴦𐴓𐴢. 𐴃𐴟𐴣𐴀𐴝𐴥𐴌𐴝 𐴀𐴞𐴁𐴝𐴤𐴌 𐴈𐴡𐴃𐴝𐴤 𐴑𐴞𐴘𐴝𐴥 𐴉𐴟𐴥𐴕𐴡𐴌؟“

²¹𐴀𐴝𐴌 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, ”𐴔𐴡𐴕𐴃𐴡𐴌 𐴀𐴠 𐴈𐴡𐴃𐴝𐴤 𐴒𐴟𐴥𐴕 𐴃𐴡 𐴀𐴠𐴒𐴧𐴗𐴝𐴤 𐴁𐴟𐴥𐴃𐴠-𐴉𐴝𐴘𐴧𐴝 𐴔𐴝𐴕𐴟𐴥𐴙𐴐𐴡𐴌 𐴈𐴡𐴃𐴝𐴤𐴌 𐴋𐴡𐴥𐴙𐴓𐴧𐴝 𐴕𐴡. 𐴁𐴟𐴥𐴃𐴠 𐴀𐴝𐴣𐴊𐴝𐴤𐴌 𐴏𐴟𐴑 𐴑𐴟𐴥𐴓𐴞𐴊𐴞 𐴉𐴝𐴌𐴠 𐴕𐴞𐴑𐴞𐴥؟“

𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌𐴠 𐴀𐴞𐴕𐴑𐴝𐴌 𐴒𐴡𐴙𐴅𐴧𐴠𐴥

²²𐴘𐴝𐴥𐴌𐴁𐴝𐴦𐴊𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴈𐴝𐴕𐴟𐴥𐴑𐴝-𐴀𐴞𐴊𐴢 𐴀𐴡𐴥𐴘𐴧𐴠. 𐴇𐴠𐴥𐴣𐴃𐴧𐴠 𐴐𐴞𐴥𐴃𐴑𐴝𐴓𐴢 𐴀𐴝𐴐𐴧𐴞𐴥𐴓𐴢,²³𐴀𐴝𐴦𐴌 𐴀𐴞𐴏𐴝𐴤 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴁𐴟𐴥𐴃𐴡𐴌𐴠 𐴏𐴡𐴥𐴓𐴡𐴔𐴝𐴕𐴡𐴌 𐴁𐴝𐴦𐴕𐴋𐴝𐴃𐴢 𐴄𐴡𐴀𐴓𐴝𐴃𐴢 𐴀𐴝𐴐𐴧𐴞𐴥𐴓𐴢.²⁴𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴏𐴝𐴘𐴌𐴡𐴥 𐴋𐴝𐴥𐴑𐴡𐴃𐴧𐴟 𐴒𐴞𐴥𐴌𐴞𐴊𐴡𐴌𐴞 𐴈𐴡𐴀𐴌 𐴊𐴠, ”𐴃𐴟𐴀𐴛 𐴀𐴝𐴣𐴀𐴌𐴝𐴌𐴠 𐴀𐴝𐴌 𐴇𐴡𐴃𐴡𐴥𐴊𐴞𐴕 𐴀𐴝𐴕𐴊𐴝𐴐𐴝𐴤𐴃𐴢 𐴌𐴝𐴑𐴞𐴥𐴁𐴝؟ 𐴃𐴟𐴀𐴛 𐴎𐴡𐴊𐴞 𐴔𐴡𐴀𐴏𐴞𐴤 𐴊𐴠 𐴀𐴡𐴥𐴘𐴓𐴠, 𐴀𐴝𐴣𐴀𐴌𐴝𐴌𐴠 𐴏𐴝𐴥𐴉𐴢-𐴏𐴝𐴥𐴉𐴢 𐴒𐴡𐴥𐴌𐴞 𐴈𐴡𐴀.“

²⁵𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴘𐴧𐴞𐴥, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴃𐴡 𐴁𐴞𐴐𐴧𐴝𐴥𐴐𐴢 𐴕𐴡 𐴒𐴡𐴌𐴡𐴤. 𐴎𐴠 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴀𐴝𐴀𐴛 𐴀𐴝𐴣𐴀𐴌 𐴁𐴝𐴉𐴡𐴌 𐴕𐴝𐴔𐴠 𐴒𐴡𐴌𐴞𐴥, 𐴇𐴞𐴥𐴀𐴕𐴠 𐴀𐴝𐴣𐴀𐴌 𐴒𐴡𐴁𐴝𐴤 𐴊𐴠𐴥.²⁶𐴓𐴠𐴑𐴞𐴕 𐴃𐴟𐴣𐴀𐴝𐴥𐴌𐴝 𐴀𐴠𐴃𐴡𐴓𐴧𐴝𐴤 𐴁𐴞𐴐𐴧𐴝𐴥𐴐𐴢 𐴕𐴡 𐴒𐴡𐴌𐴡𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴁𐴠𐴥𐴌𐴝𐴏𐴡𐴥𐴀𐴓𐴢 𐴓𐴟𐴕𐴡𐴃𐴧𐴟 𐴕𐴡.²⁷𐴀𐴝𐴣𐴀𐴌 𐴁𐴠𐴥𐴌𐴝𐴏𐴡𐴥𐴀𐴓𐴢 𐴀𐴡𐴥𐴑𐴧𐴡𐴓𐴠 𐴀𐴝𐴣𐴀𐴌 𐴀𐴝𐴁𐴝𐴏𐴢 𐴉𐴟𐴥𐴕𐴠, 𐴀𐴝𐴀𐴛 𐴇𐴞𐴥𐴀𐴕𐴡𐴌𐴠 𐴏𐴞𐴕𐴞𐴥, 𐴀𐴝𐴦𐴌 𐴇𐴞𐴥𐴀𐴕 𐴀𐴝𐴣𐴀𐴌 𐴉𐴞𐴏𐴠𐴤-𐴉𐴞𐴏𐴠𐴤 𐴀𐴝𐴘𐴧𐴠𐴤.²⁸𐴀𐴝𐴀𐴛 𐴇𐴞𐴥𐴀𐴕𐴡𐴌𐴠 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴊𐴞𐴦; 𐴇𐴞𐴥𐴀𐴕 𐴇𐴡𐴕𐴡𐴤𐴊𐴞𐴕 𐴊𐴡𐴥𐴚𐴐𐴡 𐴕𐴡 𐴀𐴡𐴥𐴘𐴁𐴡; 𐴀𐴝𐴌𐴡𐴤 𐴀𐴝𐴣𐴀𐴌 𐴀𐴝𐴥𐴃𐴡𐴃𐴧𐴟 𐴇𐴞𐴥𐴀𐴕𐴡𐴌𐴠 𐴇𐴡𐴕𐴡𐴤𐴑𐴞𐴘𐴠 𐴇𐴝𐴌𐴞𐴤𐴓𐴡𐴘𐴉𐴠𐴓𐴝𐴘 𐴕𐴡 𐴉𐴝𐴌𐴞𐴁𐴡𐴥.²⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌 𐴁𐴝𐴉𐴢, 𐴎𐴞𐴁𐴝𐴤𐴘𐴠 𐴇𐴞𐴥𐴀𐴕𐴡𐴌𐴠 𐴀𐴝𐴣𐴀𐴌𐴠𐴥 𐴊𐴞𐴦𐴘𐴠𐴥, 𐴀𐴞𐴥𐴁𐴝 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌. 𐴇𐴡𐴕𐴡𐴤𐴑𐴞𐴘𐴠 𐴀𐴝𐴣𐴀𐴌 𐴁𐴝𐴉𐴡𐴌 𐴀𐴝𐴥𐴃𐴡𐴃𐴧𐴟 𐴇𐴞𐴥𐴀𐴕𐴡𐴌𐴠 𐴇𐴝𐴌𐴞𐴤𐴓𐴡𐴘𐴉𐴠𐴓𐴝𐴘 𐴕𐴡 𐴉𐴝𐴌𐴠.³⁰𐴀𐴝𐴀𐴛 𐴀𐴠𐴊𐴧𐴠 𐴁𐴝𐴉𐴢 𐴀𐴠𐴑.“

³¹𐴇𐴞𐴥𐴘𐴝𐴕 𐴉𐴟𐴥𐴕𐴞 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴔𐴝𐴙𐴃𐴧𐴡 𐴀𐴝𐴁𐴝𐴌 𐴐𐴞𐴥𐴓𐴡𐴌 𐴊𐴡𐴓𐴝 𐴉𐴠𐴣𐴍𐴝𐴘 𐴓𐴡𐴘𐴧𐴠𐴥.³²𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴊𐴠 𐴁𐴝𐴉𐴡𐴌 𐴃𐴡𐴌𐴉𐴡𐴥𐴃𐴧𐴟 𐴃𐴟𐴣𐴀𐴝𐴥𐴌𐴝𐴌𐴠 𐴁𐴡𐴀𐴗𐴃𐴢 𐴒𐴡𐴔-𐴒𐴡𐴔 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤𐴘𐴧𐴞. 𐴇𐴞𐴥𐴀𐴕𐴡𐴃𐴧𐴟 𐴇𐴡𐴕𐴧𐴝𐴥𐴕 𐴀𐴡𐴥𐴓𐴧𐴝 𐴁𐴡𐴥𐴓𐴞 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴐𐴞𐴥𐴓𐴡𐴌 𐴊𐴡𐴓𐴝 𐴔𐴝𐴙𐴃𐴧𐴡 𐴏𐴡𐴀𐴌 𐴊𐴠𐴥؟“

³³𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴒𐴡𐴔 𐴈𐴝𐴔𐴡𐴓𐴧𐴝 𐴁𐴡𐴥𐴓𐴞 𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴣𐴌𐴠 𐴐𐴞𐴥𐴓𐴡𐴌 𐴊𐴡𐴓𐴝 𐴔𐴝𐴌𐴞𐴌 𐴊𐴠 𐴕𐴡, 𐴁𐴡𐴥𐴓𐴑𐴠 𐴑𐴟𐴉𐴠𐴥𐴌𐴞 𐴒𐴡𐴙𐴅𐴧𐴡𐴥 𐴊𐴠 𐴇𐴠𐴥𐴃𐴡𐴓𐴧𐴝. 𐴃𐴟𐴀𐴛 𐴔𐴝𐴕𐴟𐴥𐴙𐴐𐴢 𐴀𐴡𐴥𐴘 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴀𐴝𐴓𐴧𐴝 𐴊𐴝𐴁𐴞 𐴒𐴡𐴌𐴡𐴤𐴌.“

³⁴𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴌 𐴐𐴡𐴥𐴌𐴞𐴘𐴡𐴃𐴡𐴃𐴢 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤 𐴊𐴠 𐴕𐴡 𐴕𐴠𐴥, 𐴀𐴝𐴓𐴧𐴝𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥 𐴊𐴠, ’𐴃𐴟𐴣𐴀𐴝𐴥𐴌𐴝 𐴀𐴡𐴥𐴘𐴓𐴝𐴊𐴠 𐴑𐴟𐴥𐴊𐴝‘ ؟³⁵𐴎𐴠𐴃𐴝𐴌𐴝𐴤𐴌 𐴇𐴝𐴣𐴏𐴠 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴑𐴝𐴓𐴝𐴔 𐴀𐴝𐴙𐴐𐴧𐴠𐴥, 𐴀𐴞𐴥𐴃𐴝𐴌𐴝𐴌𐴠 𐴃𐴡 𐴑𐴟𐴥𐴊𐴝 𐴁𐴡𐴥𐴓𐴞 𐴈𐴡𐴖𐴝𐴤 𐴒𐴞𐴥𐴘𐴠. 𐴂𐴝𐴑-𐴑𐴝𐴓𐴝𐴔𐴡𐴌 𐴈𐴡𐴃𐴝𐴤 𐴃𐴡 𐴁𐴝𐴊𐴢 𐴊𐴞 𐴕𐴡 𐴉𐴝𐴌𐴠.³⁶𐴁𐴝𐴉𐴢 𐴕𐴞𐴎𐴠 𐴀𐴠𐴥𐴕𐴝 𐴀𐴝𐴣𐴀𐴌𐴠𐴥 𐴁𐴝𐴏𐴞𐴥𐴓𐴡𐴘𐴧𐴠 𐴀𐴠𐴊𐴧𐴠 𐴊𐴟𐴕𐴞𐴘𐴝𐴙𐴃𐴢 𐴊𐴞𐴉𐴠𐴍𐴝𐴥𐴘𐴧𐴠. 𐴀𐴝𐴀𐴛 𐴎𐴠𐴃𐴧𐴡𐴥𐴃𐴢 𐴈𐴡𐴘𐴧𐴞𐴥, ’𐴀𐴝𐴀𐴛 𐴀𐴝𐴓𐴧𐴝𐴌 𐴉𐴟𐴖𐴝,‘ 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝 𐴑𐴠𐴀𐴕𐴒𐴡𐴌𐴞 𐴈𐴡𐴀𐴌 𐴊𐴠, ’𐴃𐴟𐴀𐴛 𐴀𐴝𐴓𐴧𐴝𐴌 𐴑𐴟𐴉𐴠𐴥𐴌𐴞 𐴒𐴡𐴙𐴅𐴧𐴡𐴥؟‘³⁷𐴎𐴡𐴊𐴞 𐴀𐴝𐴀𐴛 𐴀𐴝𐴣𐴀𐴌 𐴁𐴝𐴉𐴡𐴌 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴕𐴡 𐴒𐴡𐴌𐴞𐴥, 𐴃𐴡𐴥𐴀𐴘𐴓𐴠 𐴀𐴝𐴣𐴀𐴌𐴠𐴥 𐴁𐴞𐴐𐴧𐴝𐴥𐴐𐴢 𐴕𐴡 𐴒𐴡𐴙𐴅𐴧𐴡𐴥;³⁸𐴓𐴠𐴑𐴞𐴕 𐴎𐴡𐴊𐴞 𐴇𐴞𐴥𐴀𐴕 𐴒𐴡𐴌𐴞𐴥, 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴁𐴞𐴐𐴧𐴝𐴥𐴐𐴢 𐴕𐴡 𐴒𐴡𐴙𐴓𐴧𐴠𐴥 𐴘𐴡, 𐴈𐴝𐴔 𐴇𐴞𐴥𐴀𐴕𐴡𐴌𐴠 𐴁𐴞𐴐𐴧𐴝𐴥𐴐𐴢 𐴒𐴡𐴌𐴡𐴤, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴎𐴝𐴕𐴡 𐴀𐴠𐴊𐴧𐴠 𐴁𐴟𐴎𐴡𐴥 𐴊𐴠, 𐴁𐴝𐴉𐴢 𐴀𐴝𐴣𐴀𐴌 𐴁𐴟𐴥𐴃𐴡𐴌𐴠 𐴀𐴝𐴏𐴠𐴤 𐴀𐴝𐴦𐴌 𐴀𐴝𐴀𐴛 𐴁𐴝𐴉𐴡𐴌 𐴁𐴟𐴥𐴃𐴡𐴌𐴠 𐴀𐴝𐴏𐴞𐴤.“³⁹𐴇𐴠𐴥𐴃𐴟𐴕𐴡𐴃𐴢 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴝𐴁𐴝𐴌 𐴀𐴞𐴏𐴝𐴤𐴌𐴠 𐴒𐴠𐴌𐴠𐴉𐴃𐴝𐴌 𐴒𐴡𐴙𐴃𐴧𐴡𐴥 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴀𐴞𐴥𐴁𐴝 𐴀𐴞𐴥𐴃𐴝𐴌𐴝𐴌 𐴀𐴝𐴥𐴃𐴡𐴃𐴧𐴟 𐴇𐴝𐴥𐴌𐴞𐴒𐴞𐴓𐴒𐴡𐴘.

⁴⁰𐴃𐴝𐴌𐴉𐴡𐴌𐴠 𐴀𐴞𐴏𐴝𐴤 𐴀𐴝𐴁𐴝𐴌 𐴅𐴡𐴌𐴊𐴝𐴥𐴕 𐴇𐴝𐴥𐴓𐴡𐴌 𐴉𐴝𐴌𐴑𐴟𐴓𐴠 𐴎𐴝𐴘 𐴃𐴝𐴥𐴙𐴑𐴧𐴠𐴒𐴡𐴘, 𐴎𐴠𐴍𐴠𐴥 𐴀𐴝𐴒𐴠 𐴘𐴝𐴇𐴝𐴥𐴘𐴝𐴘𐴠 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴃𐴡.⁴¹𐴁𐴡𐴀𐴗𐴃𐴢 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴙𐴐𐴧𐴞𐴤𐴓𐴢; 𐴀𐴞𐴥𐴃𐴝𐴌𐴝 𐴈𐴡𐴘𐴃𐴡𐴤 𐴊𐴠, ”𐴘𐴝𐴇𐴝𐴥𐴘𐴝𐴘𐴠 𐴇𐴡𐴕𐴡𐴤 𐴑𐴠𐴌𐴝𐴔𐴡𐴃𐴢 𐴕𐴡𐴥 𐴒𐴡𐴌𐴠𐴥, 𐴔𐴡𐴕𐴃𐴡𐴌 𐴃𐴡𐴀 𐴘𐴝𐴇𐴝𐴥𐴘𐴝𐴘𐴠 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴌 𐴁𐴝𐴦𐴁𐴟𐴃𐴠 𐴎𐴞𐴀𐴕-𐴎𐴞𐴀𐴕 𐴈𐴡𐴀𐴙𐴓𐴢 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴏𐴡𐴥𐴘𐴧𐴞.“⁴²𐴇𐴠𐴥𐴍𐴠 𐴁𐴡𐴀𐴗𐴃𐴢 𐴎𐴡𐴕𐴠 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤.

The Word for the World International

https://app.library.bible/content/87faca8b51c22590