Read 𐴘𐴡𐴇𐴝𐴥𐴕𐴧𐴝 20

𐴘𐴡𐴇𐴝𐴥𐴕𐴧𐴝20

𐴀𐴞𐴏𐴝𐴤𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠

¹𐴇𐴝𐴥𐴉𐴃𐴝𐴌 𐴉𐴡𐴀𐴘𐴓𐴝 𐴊𐴞𐴕 𐴉𐴡𐴥𐴎𐴡𐴌 𐴀𐴡𐴑𐴃𐴡𐴥𐴃𐴢 𐴀𐴝𐴕𐴊𐴝𐴤𐴌 𐴃𐴝𐴥𐴑𐴞𐴃𐴠, 𐴔𐴡𐴌𐴞𐴘𐴝𐴔 𐴔𐴝𐴑𐴊𐴝𐴥𐴓𐴞𐴕𐴞 𐴈𐴡𐴁𐴡𐴌 𐴒𐴗𐴝𐴃𐴢 𐴒𐴞𐴦𐴘𐴠𐴥, 𐴀𐴝𐴦𐴌 𐴊𐴠𐴙𐴑𐴧𐴠𐴥 𐴊𐴠, 𐴈𐴡𐴁𐴡𐴌𐴡𐴌 𐴔𐴟𐴑𐴡𐴃𐴧𐴟 𐴐𐴞𐴥𐴓𐴢 𐴓𐴝𐴕 𐴓𐴝𐴌𐴞𐴉𐴠𐴓𐴝𐴘𐴧𐴝.²𐴇𐴠𐴥𐴃𐴟𐴕𐴡𐴃𐴢 𐴇𐴞𐴥𐴁𐴝 𐴊𐴟𐴣𐴌𐴞 𐴏𐴝𐴥𐴘𐴔𐴡𐴕 𐴉𐴞𐴃𐴡𐴌 𐴀𐴠𐴊𐴧𐴠 𐴀𐴡𐴙𐴕𐴧𐴡 𐴐𐴝𐴥𐴌𐴞𐴃𐴢 𐴎𐴞𐴁𐴝𐴤𐴌𐴠 𐴀𐴞𐴏𐴝𐴤𐴘𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴃𐴧𐴡𐴥, 𐴀𐴞𐴥𐴃𐴝𐴌𐴝𐴌 𐴇𐴠𐴥𐴍𐴠 𐴒𐴞𐴦𐴘𐴠𐴥, 𐴎𐴝𐴘 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴔𐴝𐴙𐴕𐴐𐴠𐴥 𐴔𐴝𐴓𐴞𐴑𐴡𐴌𐴠 𐴈𐴡𐴁𐴡𐴌𐴡𐴃𐴧𐴟 𐴓𐴡𐴘𐴒𐴞𐴘𐴠𐴥𐴒𐴡𐴘; 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴇𐴡𐴍𐴠𐴥 𐴀𐴠𐴙𐴅𐴧𐴠𐴥𐴒𐴡𐴘 𐴀𐴝𐴣𐴀𐴌𐴝 𐴕𐴡 𐴎𐴝𐴕𐴞.“

³𐴇𐴠𐴥𐴃𐴟𐴕𐴡𐴃𐴢 𐴉𐴞𐴃𐴡𐴌 𐴀𐴠𐴊𐴧𐴠 𐴇𐴠𐴥 𐴀𐴡𐴙𐴕𐴧𐴡 𐴐𐴝𐴥𐴌𐴞𐴃𐴧𐴗𐴝 𐴕𐴠𐴦𐴓𐴞 𐴈𐴡𐴁𐴡𐴌𐴡𐴃𐴢 𐴎𐴝𐴦𐴃𐴢 𐴊𐴡𐴙𐴅𐴧𐴠.⁴𐴀𐴞𐴥𐴃𐴝𐴌𐴝 𐴊𐴟𐴕𐴞𐴥 𐴎𐴡𐴕 𐴀𐴠𐴑𐴧𐴟 𐴉𐴟𐴥𐴖𐴝𐴣𐴃𐴞 𐴊𐴟𐴣𐴌𐴝𐴃𐴢 𐴀𐴝𐴐𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴀𐴡𐴙𐴕𐴧𐴡 𐴐𐴝𐴥𐴌𐴞𐴃𐴧𐴗𐴝 𐴉𐴞𐴃𐴡𐴌𐴡𐴌𐴠 𐴁𐴝𐴥𐴌𐴝𐴘 𐴎𐴝𐴘 𐴈𐴡𐴁𐴡𐴌𐴡𐴃𐴢 𐴀𐴝𐴒𐴠 𐴉𐴡𐴀𐴣𐴙𐴐𐴧𐴠.⁵𐴘𐴡𐴥𐴒𐴧𐴗𐴝𐴘𐴠 𐴕𐴞𐴘𐴟𐴥𐴌𐴞 𐴁𐴟𐴥𐴃𐴡𐴌𐴔𐴞𐴥𐴑𐴧𐴝 𐴏𐴝𐴘𐴧𐴠𐴥 𐴌𐴝𐴥𐴌, 𐴇𐴡𐴇𐴡𐴥𐴕𐴡𐴌 𐴇𐴡𐴦𐴌 𐴒𐴟𐴥𐴕 𐴀𐴝𐴏𐴠𐴤 𐴊𐴠 𐴊𐴠𐴙𐴑𐴧𐴠𐴥, 𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝 𐴁𐴟𐴥𐴃𐴡𐴌𐴠 𐴕𐴡𐴥 𐴎𐴝.⁶𐴃𐴝𐴌𐴉𐴡𐴌𐴠 𐴏𐴝𐴥𐴘𐴔𐴡𐴕 𐴉𐴞𐴃𐴡𐴌 𐴀𐴡𐴥 𐴘𐴡𐴥𐴒𐴧𐴗𐴝𐴌 𐴉𐴞𐴏𐴠𐴤-𐴉𐴞𐴏𐴠𐴤 𐴀𐴝𐴀𐴘𐴢 𐴉𐴡𐴀𐴣𐴙𐴐𐴧𐴠, 𐴀𐴝𐴦𐴌 𐴈𐴡𐴁𐴡𐴌 𐴒𐴗𐴝𐴌 𐴁𐴟𐴥𐴃𐴡𐴌𐴠 𐴒𐴡𐴥𐴙𐴓𐴧𐴠; 𐴘𐴡𐴥𐴒𐴧𐴗𐴝𐴘𐴠 𐴘𐴡𐴥 𐴇𐴡𐴇𐴡𐴥𐴕𐴡𐴌 𐴇𐴡𐴦𐴌 𐴒𐴟𐴥𐴕 𐴀𐴝𐴏𐴠𐴤 𐴊𐴠 𐴊𐴠𐴙𐴑𐴧𐴠𐴥,⁷𐴀𐴝𐴦𐴌 𐴎𐴠 𐴇𐴡𐴦𐴌 𐴒𐴝𐴥𐴕 𐴀𐴞𐴏𐴝𐴤𐴌 𐴔𐴝𐴃𐴝𐴥𐴃𐴢 𐴁𐴠𐴌𐴝𐴤𐴘𐴊𐴞𐴓𐴢 𐴇𐴞𐴥𐴘𐴝𐴕 𐴇𐴡𐴇𐴡𐴥𐴕𐴡𐴌 𐴇𐴡𐴦𐴌𐴡𐴌 𐴉𐴟𐴥𐴖𐴝𐴣𐴃𐴞 𐴕𐴝𐴥𐴘, 𐴁𐴡𐴥𐴓𐴑𐴠 𐴀𐴝𐴓𐴡𐴑 𐴒𐴡𐴌𐴞 𐴀𐴠𐴑𐴧𐴝𐴥𐴕𐴡𐴃𐴢 𐴁𐴡𐴙𐴄𐴧𐴝.⁸𐴇𐴠𐴥𐴃𐴟𐴕𐴡𐴃𐴢 𐴎𐴠 𐴀𐴡𐴙𐴕𐴧𐴡 𐴐𐴝𐴥𐴌𐴞𐴃𐴧𐴗𐴝 𐴈𐴡𐴁𐴡𐴌𐴡𐴃𐴢 𐴀𐴝𐴒𐴠 𐴉𐴡𐴀𐴣𐴙𐴐𐴧𐴞𐴓𐴢, 𐴘𐴡𐴥𐴒𐴧𐴗𐴝 𐴘𐴡𐴥 𐴁𐴟𐴥𐴃𐴡𐴌𐴠 𐴒𐴡𐴥𐴙𐴓𐴧𐴠, 𐴀𐴝𐴦𐴌 𐴊𐴠𐴑𐴞𐴥 𐴁𐴞𐴐𐴧𐴝𐴥𐴐𐴢 𐴒𐴡𐴙𐴅𐴧𐴞𐴥𐴓𐴢.⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥𐴃𐴟𐴕 𐴉𐴡𐴙𐴅𐴧𐴡𐴕𐴃𐴡 𐴃𐴡 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴃𐴧𐴟 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴖𐴝𐴌 𐴎𐴡𐴌𐴟𐴌 𐴊𐴠 𐴂𐴝𐴑-𐴑𐴝𐴓𐴝𐴔𐴡𐴌 𐴇𐴠𐴥 𐴈𐴡𐴃𐴝𐴤 𐴕𐴡𐴥 𐴁𐴟𐴎𐴠𐴥.¹⁰𐴃𐴝𐴌𐴉𐴡𐴌𐴠 𐴇𐴠𐴥 𐴐𐴝𐴥𐴌𐴞𐴃𐴧𐴟𐴕 𐴕𐴞𐴎𐴡𐴌 𐴒𐴡𐴥𐴌𐴡𐴃𐴢 𐴖𐴝𐴦𐴉𐴠𐴏𐴢 𐴒𐴞𐴦𐴘𐴠𐴥𐴒𐴡𐴘.

𐴔𐴡𐴌𐴞𐴘𐴝𐴔 𐴔𐴝𐴑𐴊𐴝𐴥𐴓𐴞𐴕𐴞𐴌𐴠 𐴀𐴞𐴏𐴝𐴤𐴘𐴠 𐴊𐴝𐴈𐴝𐴤𐴊𐴞𐴘𐴠

¹¹𐴓𐴠𐴑𐴞𐴕 𐴔𐴡𐴌𐴞𐴘𐴝𐴔 𐴈𐴡𐴁𐴡𐴌𐴡𐴌 𐴁𐴝𐴀𐴌𐴑𐴟𐴓𐴠 𐴃𐴞𐴥𐴘𐴝𐴘 𐴈𐴝𐴣𐴊𐴝𐴃𐴢 𐴀𐴝𐴐𐴧𐴞𐴥𐴓𐴢; 𐴇𐴞𐴥𐴁𐴝 𐴈𐴝𐴣𐴊𐴞-𐴈𐴝𐴣𐴊𐴞 𐴕𐴞𐴘𐴟𐴥𐴌𐴞 𐴈𐴡𐴁𐴡𐴌 𐴒𐴗𐴝𐴌 𐴁𐴟𐴥𐴃𐴡𐴌𐴔𐴞𐴥𐴑𐴧𐴝 𐴏𐴝𐴘𐴧𐴠𐴥,¹²𐴀𐴝𐴦𐴌 𐴊𐴠𐴙𐴑𐴧𐴠𐴥 𐴊𐴠, 𐴀𐴞𐴏𐴝𐴤𐴌 𐴓𐴝𐴐𐴢 𐴎𐴞𐴘𐴡𐴥𐴣𐴃𐴢 𐴌𐴝𐴑𐴝𐴤 𐴒𐴞𐴥𐴀𐴓𐴢 𐴇𐴞𐴥𐴛𐴡𐴃𐴢 𐴊𐴡𐴥𐴓𐴝 𐴇𐴡𐴦𐴌 𐴉𐴞𐴕𐴊𐴝𐴤 𐴊𐴟𐴖𐴝𐴥 𐴉𐴞𐴥𐴌𐴞𐴏𐴃𐴝 𐴁𐴡𐴀𐴘𐴢 𐴃𐴝𐴥𐴙𐴑𐴧𐴠, 𐴀𐴠𐴒𐴧𐴗𐴝𐴤 𐴐𐴞𐴥𐴃𐴝𐴕 𐴀𐴡𐴃𐴧𐴟, 𐴀𐴝𐴌 𐴀𐴠𐴒𐴧𐴗𐴝𐴤 𐴉𐴡𐴘𐴃𐴝𐴥𐴕 𐴀𐴡𐴃𐴧𐴟.

¹³𐴇𐴞𐴥𐴀𐴕𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴡𐴥 𐴔𐴝𐴘𐴝𐴉𐴟𐴖𐴝, 𐴃𐴟𐴘 𐴈𐴝𐴣𐴊𐴡𐴀𐴌 𐴑𐴞𐴘𐴝𐴥؟“
𐴇𐴞𐴥𐴁𐴝𐴘𐴠 𐴇𐴞𐴥𐴀𐴕𐴡𐴌𐴠 𐴈𐴡𐴀𐴌 𐴊𐴠, ”𐴔𐴝𐴙𐴕𐴐𐴠𐴥 𐴀𐴝𐴣𐴀𐴌 𐴔𐴝𐴓𐴞𐴑𐴡𐴌𐴠 𐴓𐴡𐴘𐴒𐴞𐴘𐴠𐴥𐴒𐴡𐴘; 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴇𐴡𐴍𐴠𐴥 𐴀𐴠𐴙𐴅𐴧𐴠𐴥𐴒𐴡𐴘 𐴀𐴝𐴀𐴛 𐴕𐴡 𐴎𐴝𐴕𐴞.“¹⁴𐴇𐴞𐴥𐴘𐴝𐴕 𐴈𐴡𐴀𐴘𐴢 𐴁𐴝𐴦𐴊𐴠 𐴇𐴞𐴥𐴁𐴝𐴘𐴠 𐴉𐴞𐴏𐴧𐴝𐴥 𐴉𐴞𐴥𐴌𐴞 𐴊𐴠𐴑𐴠𐴥𐴌 𐴊𐴠, 𐴀𐴞𐴏𐴝𐴤 𐴃𐴞𐴥𐴘𐴝𐴘𐴧𐴝; 𐴔𐴡𐴕𐴃𐴡𐴌 𐴀𐴞𐴥𐴁𐴝 𐴀𐴞𐴏𐴝𐴤 𐴊𐴠 𐴇𐴞𐴥𐴘𐴝𐴕 𐴇𐴞𐴥𐴁𐴝𐴘𐴠 𐴕𐴡𐴥 𐴏𐴞𐴕𐴠𐴥.

¹⁵𐴀𐴞𐴏𐴝𐴤𐴘𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴡𐴥 𐴔𐴝𐴘𐴝𐴉𐴟𐴖𐴝, 𐴃𐴟𐴘 𐴈𐴝𐴣𐴊𐴡𐴀𐴌 𐴑𐴞𐴘𐴝𐴥؟ 𐴃𐴟𐴘 𐴇𐴝𐴌𐴠𐴤 𐴃𐴟𐴖𐴡𐴀𐴌 𐴊𐴠𐴥؟“
𐴔𐴡𐴌𐴞𐴘𐴝𐴔𐴠 𐴀𐴞𐴏𐴝𐴤𐴌𐴠 𐴁𐴝𐴒𐴝𐴕 𐴏𐴡𐴥𐴣𐴓𐴡𐴘𐴝 𐴁𐴡𐴓𐴞 𐴄𐴝𐴥𐴀𐴌𐴞 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴅𐴡𐴕𐴝𐴥𐴁𐴢, 𐴀𐴞𐴥𐴁𐴝𐴌𐴠 𐴎𐴡𐴊𐴞 𐴃𐴟𐴀𐴛 𐴓𐴡𐴘𐴒𐴞𐴘𐴡𐴥 𐴊𐴠 𐴀𐴡𐴥𐴘𐴓𐴠, 𐴀𐴞𐴥𐴁𐴝𐴌𐴠 𐴇𐴡𐴍𐴠𐴥 𐴀𐴠𐴙𐴅𐴧𐴡𐴥𐴒𐴡𐴘 𐴊𐴠 𐴀𐴝𐴣𐴀𐴌𐴠𐴥 𐴈𐴡𐴀, 𐴀𐴝𐴀𐴛 𐴀𐴞𐴥𐴁𐴝𐴌𐴠 𐴓𐴡𐴘𐴎𐴝𐴘𐴧𐴟𐴥𐴔𐴁𐴡𐴘.“

¹⁶𐴀𐴞𐴏𐴝𐴤𐴘𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴔𐴡𐴌𐴞𐴘𐴝𐴔!“𐴔𐴡𐴌𐴞𐴘𐴝𐴔𐴠 𐴉𐴞𐴥𐴌𐴞 𐴇𐴞𐴁𐴌𐴟𐴤 𐴎𐴟𐴁𐴝𐴕𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴌𐴝𐴁𐴧𐴟𐴥𐴕𐴞!“ 𐴎𐴞𐴘𐴝𐴥𐴕𐴡𐴌 𐴔𐴝𐴀𐴕𐴞, 𐴀𐴟𐴏𐴃𐴝𐴃𐴢.

¹⁷𐴀𐴞𐴏𐴝𐴤𐴘𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴠𐴥 𐴊𐴡𐴥𐴌𐴞 𐴕𐴡 𐴌𐴝𐴑𐴞𐴥𐴐𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴀𐴝𐴙𐴅𐴧𐴡𐴤 𐴖𐴡𐴌𐴠 𐴁𐴝𐴉𐴡𐴌 𐴇𐴠𐴥𐴍𐴠 𐴕𐴡𐴥 𐴎𐴝𐴘𐴒𐴡𐴥𐴘; 𐴁𐴡𐴥𐴓𐴑𐴠 𐴀𐴝𐴣𐴀𐴌 𐴁𐴝𐴥𐴘𐴧𐴝𐴙𐴕 𐴕𐴟𐴥𐴕𐴡𐴌 𐴇𐴠𐴥𐴍𐴠 𐴎𐴝𐴘 𐴈𐴡𐴀𐴒𐴡𐴘 𐴊𐴠, ’𐴎𐴞𐴁𐴝𐴤 𐴀𐴝𐴣𐴀𐴌 𐴀𐴠𐴊𐴧𐴠 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴢, 𐴎𐴞𐴁𐴝𐴤 𐴀𐴝𐴣𐴀𐴌 𐴀𐴠𐴊𐴧𐴠 𐴃𐴟𐴣𐴀𐴝𐴥𐴌𐴝𐴌 𐴀𐴝𐴓𐴧𐴝, 𐴀𐴝𐴀𐴛 𐴖𐴡𐴌𐴠 𐴀𐴞𐴥𐴁𐴝𐴌 𐴇𐴠𐴥𐴍𐴠 𐴁𐴠 𐴎𐴝𐴙𐴌𐴒𐴡𐴥𐴘.‘ “

¹⁸𐴃𐴡𐴥𐴘 𐴔𐴡𐴌𐴞𐴘𐴝𐴔 𐴔𐴝𐴑𐴊𐴝𐴥𐴓𐴞𐴕𐴞 𐴀𐴝𐴀𐴘𐴢 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴎𐴝𐴕𐴝𐴘𐴧𐴠𐴥 𐴊𐴠, 𐴇𐴞𐴥𐴁𐴝𐴘𐴠 𐴔𐴝𐴓𐴞𐴑𐴡𐴌𐴠 𐴊𐴠𐴙𐴑𐴧𐴠𐴥, 𐴀𐴝𐴦𐴌 𐴇𐴞𐴥𐴁𐴝𐴌𐴠 𐴈𐴡𐴃𐴝𐴤 𐴇𐴞𐴥𐴀𐴕 𐴀𐴞𐴥𐴁𐴝𐴘𐴠 𐴈𐴡𐴘𐴧𐴠𐴥 𐴊𐴠.

𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴊𐴝𐴈𐴝𐴤𐴊𐴞𐴘𐴠

¹⁹𐴇𐴠𐴥 𐴊𐴞𐴕 𐴀𐴡𐴌, 𐴘𐴝𐴥𐴕𐴞 𐴇𐴝𐴥𐴉𐴃𐴝𐴌 𐴉𐴡𐴀𐴘𐴓𐴝 𐴊𐴞𐴕𐴡𐴌 𐴇𐴝𐴥𐴣𐴎𐴞𐴕𐴧𐴝, 𐴎𐴠𐴣𐴃𐴧𐴠𐴥 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴋𐴡𐴦𐴌𐴠 𐴐𐴝𐴥𐴌𐴞𐴃𐴧𐴟𐴕 𐴎𐴠𐴍𐴠𐴥 𐴎𐴡𐴔𐴝 𐴀𐴡𐴥𐴘 𐴃𐴝𐴥𐴙𐴑𐴧𐴠 𐴇𐴠𐴥𐴍𐴞𐴘𐴝𐴌 𐴊𐴟𐴖𐴝𐴌 𐴀𐴡𐴥𐴑𐴧𐴡𐴓𐴢 𐴁𐴝𐴣𐴊𐴝𐴤 𐴀𐴝𐴐𐴧𐴞𐴥𐴓𐴢, 𐴀𐴞𐴏𐴝𐴤 𐴀𐴝𐴀𐴘𐴢 𐴀𐴞𐴥𐴃𐴝𐴌𐴝𐴌 𐴔𐴝𐴎𐴠𐴥 𐴃𐴞𐴥𐴘𐴝𐴘𐴧𐴠, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴏𐴧𐴝𐴓𐴝𐴔𐴟 𐴀𐴝𐴓𐴝𐴘𐴑𐴟𐴔.“²⁰𐴇𐴞𐴥𐴘𐴝𐴕 𐴈𐴡𐴀𐴘𐴢 𐴁𐴝𐴦𐴊𐴠, 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴞𐴥𐴁𐴝𐴌 𐴊𐴟𐴕𐴞𐴥 𐴀𐴝𐴥𐴃𐴢 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴒𐴝𐴦𐴌 𐴋𐴝𐴥𐴑 𐴊𐴝𐴈𐴝𐴤𐴘𐴧𐴠. 𐴐𐴝𐴥𐴌𐴞𐴃𐴧𐴟𐴕𐴠 𐴔𐴝𐴓𐴞𐴑𐴡𐴌𐴠 𐴊𐴠𐴑𐴞𐴥 𐴁𐴞𐴐𐴞𐴤 𐴑𐴟𐴥𐴐𐴞 𐴀𐴡𐴥𐴘𐴧𐴠.

²¹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴝𐴁𐴝𐴌 𐴈𐴡𐴀𐴌 𐴊𐴠, ”𐴀𐴝𐴏𐴧𐴝𐴓𐴝𐴔𐴟 𐴀𐴝𐴓𐴝𐴘𐴑𐴟𐴔. 𐴁𐴝𐴉𐴠 𐴎𐴠𐴕𐴊𐴞𐴓𐴧𐴝 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠, 𐴇𐴠𐴥𐴕𐴊𐴞𐴓𐴧𐴝 𐴀𐴝𐴀𐴛 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌𐴠 𐴊𐴞𐴉𐴠𐴍𐴝𐴥𐴙𐴌.“²²𐴇𐴞𐴥𐴘𐴝𐴕 𐴈𐴡𐴀𐴘𐴢, 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴉𐴟𐴥 𐴊𐴞𐴥 𐴈𐴡𐴀𐴌 𐴊𐴠, ”𐴂𐴝𐴑-𐴌𐴟𐴀 𐴓𐴡𐴦.²³𐴃𐴟𐴣𐴀𐴝𐴥𐴌𐴝 𐴎𐴠𐴃𐴝𐴌𐴝𐴤𐴌 𐴒𐴟𐴕𐴝𐴤 𐴔𐴝𐴉𐴢 𐴒𐴡𐴌𐴞𐴥𐴁𐴝, 𐴀𐴞𐴥𐴃𐴝𐴌𐴝𐴌 𐴒𐴟𐴕𐴝𐴤 𐴔𐴝𐴉𐴢 𐴀𐴡𐴥𐴘𐴁𐴡; 𐴀𐴝𐴦𐴌 𐴎𐴠𐴃𐴝𐴌𐴝𐴤𐴌 𐴒𐴟𐴕𐴝𐴤 𐴔𐴝𐴉𐴢 𐴕𐴡 𐴒𐴡𐴌𐴞𐴥𐴁𐴝, 𐴀𐴞𐴥𐴃𐴝𐴌𐴝𐴌 𐴒𐴟𐴕𐴝𐴤 𐴔𐴝𐴉𐴢 𐴕𐴡 𐴀𐴡𐴥𐴘𐴁𐴡.“

𐴀𐴞𐴏𐴝𐴤𐴘𐴠 𐴃𐴡𐴥𐴔𐴝𐴏𐴡𐴌𐴠 𐴊𐴝𐴈𐴝𐴤𐴊𐴞𐴘𐴠

²⁴𐴔𐴡𐴕𐴃𐴡𐴌 𐴃𐴡𐴥𐴔𐴝𐴏𐴢, 𐴎𐴞𐴁𐴝𐴤 𐴁𐴝𐴌𐴡𐴥 𐴎𐴡𐴕 𐴐𐴝𐴥𐴌𐴞𐴃𐴧𐴟𐴕𐴡𐴃𐴧𐴟 𐴀𐴠𐴎𐴧𐴡𐴕, 𐴎𐴞𐴁𐴝𐴤𐴌𐴠 𐴎𐴡𐴦𐴣𐴙𐴑𐴧𐴝 𐴋𐴝𐴑𐴠, 𐴘𐴡𐴥𐴒𐴧𐴗𐴝 𐴀𐴞𐴏𐴝𐴤 𐴀𐴝𐴙𐴐𐴧𐴞𐴤𐴓𐴢 𐴊𐴠 𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴕𐴟 𐴀𐴝𐴐𐴧𐴞𐴥𐴓𐴢.²⁵𐴇𐴠𐴥𐴃𐴡𐴓𐴧𐴝 𐴀𐴡𐴙𐴕𐴧𐴡 𐴐𐴝𐴥𐴌𐴞𐴃𐴧𐴟𐴕𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴔𐴝𐴓𐴞𐴑𐴡𐴌𐴠 𐴊𐴠𐴙𐴑𐴧𐴞𐴥.“
𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴠𐴃𐴟𐴥𐴕 𐴀𐴝𐴀𐴛 𐴀𐴞𐴥𐴁𐴝𐴌 𐴊𐴟𐴕𐴞𐴥 𐴀𐴝𐴥𐴃𐴡𐴃𐴢 𐴎𐴡𐴓𐴡𐴙𐴌 𐴊𐴝𐴑 𐴕𐴡𐴥 𐴊𐴠𐴑𐴞𐴥 𐴀𐴝𐴦𐴌 𐴎𐴡𐴓𐴡𐴙𐴌 𐴎𐴝𐴒𐴝 𐴇𐴞𐴥𐴘𐴝𐴕𐴡𐴃𐴢 𐴀𐴝𐴣𐴀𐴌 𐴀𐴡𐴦𐴣𐴓𐴢 𐴒𐴡𐴥𐴓𐴝𐴘 𐴕𐴡𐴥 𐴊𐴞𐴥 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴋𐴝𐴥𐴑𐴡𐴃𐴢 𐴀𐴝𐴣𐴀𐴌 𐴀𐴝𐴥𐴃𐴢 𐴒𐴡𐴥𐴓𐴝𐴘𐴊𐴞 𐴕𐴡𐴥 𐴏𐴝𐴀𐴘𐴢, 𐴇𐴠𐴥𐴃𐴟𐴕 𐴀𐴝𐴀𐴛 𐴁𐴞𐴐𐴧𐴝𐴥𐴐𐴢 𐴕𐴡 𐴒𐴡𐴙𐴅𐴧𐴟𐴥𐴔.“

²⁶𐴘𐴝𐴥𐴌 𐴀𐴝𐴣𐴐𐴄𐴡 𐴊𐴞𐴕 𐴁𐴝𐴦𐴊𐴠, 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕 𐴀𐴝𐴁𐴝𐴌 𐴒𐴡𐴥𐴌𐴡𐴌 𐴁𐴟𐴥𐴃𐴡𐴌𐴠 𐴎𐴡𐴔𐴝 𐴀𐴡𐴥𐴘𐴧𐴠, 𐴀𐴝𐴦𐴌 𐴃𐴡𐴥𐴔𐴝𐴏𐴢 𐴀𐴡𐴥 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢. 𐴊𐴟𐴖𐴝𐴌 𐴀𐴡𐴥𐴑𐴧𐴡𐴓𐴢 𐴁𐴝𐴣𐴊𐴝𐴤 𐴊𐴠 𐴀𐴡𐴥𐴘𐴓𐴠 𐴘𐴡, 𐴀𐴞𐴏𐴝𐴤 𐴀𐴝𐴀𐴘𐴢 𐴀𐴞𐴥𐴃𐴝𐴌𐴝𐴌 𐴔𐴝𐴎𐴠𐴥 𐴃𐴞𐴥𐴘𐴝𐴘𐴧𐴠, 𐴀𐴝𐴦𐴌 𐴈𐴡𐴀𐴌 𐴊𐴠, ”𐴀𐴝𐴏𐴧𐴝𐴓𐴝𐴔𐴟 𐴀𐴝𐴓𐴝𐴘𐴑𐴟𐴔.“²⁷𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴃𐴡𐴥𐴔𐴝𐴏𐴡𐴌𐴠 𐴈𐴡𐴀𐴌 𐴊𐴠, ”𐴃𐴡𐴌 𐴀𐴡𐴦𐴣𐴓𐴢 𐴀𐴠𐴍𐴠𐴥 𐴀𐴝𐴕, 𐴀𐴝𐴦𐴌 𐴀𐴝𐴣𐴀𐴌 𐴀𐴝𐴥𐴃𐴢 𐴏𐴝𐴀; 𐴃𐴡𐴌 𐴀𐴝𐴥𐴃𐴢 𐴀𐴝𐴣𐴀𐴌 𐴋𐴝𐴥𐴑𐴡𐴃𐴢 𐴒𐴡𐴥𐴓𐴝𐴘𐴊𐴠. 𐴕𐴝𐴁𐴞𐴐𐴧𐴝𐴥𐴐𐴢 𐴕𐴡 𐴒𐴡𐴌𐴞𐴥𐴐𐴢, 𐴁𐴡𐴥𐴓𐴑𐴠 𐴁𐴞𐴐𐴧𐴝𐴥𐴐𐴢 𐴒𐴡𐴥𐴌.“

²⁸𐴃𐴡𐴥𐴔𐴝𐴏𐴠 𐴎𐴟𐴖𐴝𐴁𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴡𐴥 𐴀𐴝𐴣𐴀𐴌 𐴔𐴝𐴓𐴞𐴑, 𐴀𐴝𐴣𐴀𐴌 𐴀𐴝𐴓𐴧𐴝!“

²⁹𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴃𐴡𐴥𐴔𐴝𐴏𐴢, 𐴃𐴟𐴘 𐴃𐴡 𐴀𐴝𐴣𐴀𐴌𐴠𐴥 𐴊𐴠𐴙𐴑𐴧𐴡𐴥𐴏𐴢 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴠𐴥𐴕𐴝 𐴀𐴞𐴔𐴝𐴕 𐴀𐴝𐴙𐴕𐴧𐴡𐴤𐴏𐴢. 𐴔𐴟𐴁𐴝𐴌𐴠𐴑 𐴀𐴟𐴘𐴃𐴝𐴌𐴝𐴤 𐴎𐴠𐴃𐴝𐴌𐴝𐴤 𐴀𐴝𐴣𐴀𐴌𐴠𐴥 𐴕𐴡 𐴊𐴠𐴑𐴞𐴥𐴓𐴠 𐴘𐴡 𐴃𐴡𐴀 𐴀𐴞𐴔𐴝𐴕 𐴀𐴝𐴕𐴠𐴤.“

𐴀𐴠 𐴏𐴞𐴥𐴘𐴝𐴌𐴝 𐴖𐴝𐴌 𐴔𐴡𐴑𐴏𐴡𐴥𐴃𐴢

³⁰𐴁𐴠𐴐𐴡𐴥𐴑, 𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌 𐴔𐴟𐴀𐴕𐴃𐴟 𐴀𐴝𐴌𐴡𐴤 𐴁𐴡𐴀𐴗𐴃𐴢 𐴑𐴠𐴌𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴒𐴡𐴙𐴅𐴧𐴞𐴥𐴓𐴢, 𐴎𐴞𐴀𐴕𐴡𐴌𐴠 𐴀𐴠 𐴏𐴞𐴥𐴘𐴝𐴌𐴝𐴃𐴢 𐴓𐴠𐴑𐴝𐴥 𐴕𐴡𐴥 𐴎𐴝;³¹𐴔𐴡𐴕𐴃𐴡𐴌 𐴀𐴞𐴀𐴕𐴡𐴌𐴠 𐴀𐴠𐴃𐴡𐴓𐴧𐴝𐴤 𐴓𐴠𐴑𐴝𐴥 𐴒𐴞𐴥𐴘𐴠 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴞𐴔𐴝𐴕 𐴀𐴝𐴕𐴡𐴤 𐴊𐴠, 𐴀𐴞𐴏𐴝𐴤 𐴀𐴡𐴥𐴙𐴓𐴊𐴠 𐴔𐴡𐴀𐴏𐴞𐴤, 𐴀𐴝𐴓𐴧𐴝𐴌 𐴉𐴟𐴖𐴝; 𐴀𐴝𐴦𐴌 𐴇𐴠𐴥𐴕𐴊𐴞𐴓𐴧𐴝 𐴀𐴞𐴔𐴝𐴕 𐴀𐴝𐴕𐴞𐴤 𐴃𐴟𐴣𐴀𐴝𐴥𐴌𐴝 𐴎𐴠𐴕 𐴀𐴞𐴥𐴁𐴝𐴌 𐴕𐴝𐴔𐴠 𐴎𐴞𐴕𐴊𐴞𐴒𐴞 𐴇𐴝𐴥𐴏𐴞𐴓𐴢 𐴒𐴡𐴌𐴡𐴤.

The Word for the World International

https://app.library.bible/content/87faca8b51c22590