Read 𐴘𐴡𐴇𐴝𐴥𐴕𐴧𐴝 13

𐴘𐴡𐴇𐴝𐴥𐴕𐴧𐴝13

𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌 𐴄𐴠𐴥𐴚 𐴊𐴟𐴥𐴖𐴝𐴘𐴊𐴞𐴘𐴠

¹𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴀𐴠𐴑𐴧𐴝𐴥𐴒𐴡𐴌𐴞 𐴀𐴝𐴒𐴡𐴌 𐴈𐴡𐴃𐴝𐴤. 𐴀𐴞𐴏𐴝𐴤𐴘𐴠 𐴎𐴝𐴙𐴕𐴃𐴡 𐴊𐴠, 𐴀𐴞𐴥𐴁𐴝 𐴀𐴠 𐴊𐴟𐴕𐴞𐴘𐴝𐴙𐴃𐴧𐴟 𐴁𐴝𐴉𐴡𐴌 𐴇𐴠𐴥𐴍𐴠 𐴎𐴝𐴘𐴁𐴝𐴌 𐴀𐴡𐴑𐴃𐴡𐴥 𐴀𐴝𐴀𐴘𐴒𐴞𐴘𐴡𐴘. 𐴊𐴟𐴕𐴞𐴘𐴝𐴙𐴃𐴢 𐴔𐴝𐴎𐴠𐴥 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌 𐴕𐴞𐴎𐴡𐴌 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝𐴌𐴠 𐴀𐴞𐴥𐴁𐴝𐴘𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴃𐴧𐴡𐴥 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴀𐴝𐴇𐴠𐴥𐴌𐴞 𐴉𐴡𐴙𐴅𐴧𐴡𐴕𐴃𐴡 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴅𐴧𐴞𐴥𐴓𐴢.

²𐴇𐴠𐴥𐴣𐴃𐴧𐴠 𐴁𐴞𐴘𐴝𐴓𐴡𐴌 𐴈𐴝𐴥𐴕𐴝𐴌 𐴀𐴡𐴑𐴃𐴡𐴥 𐴀𐴝𐴐𐴧𐴞𐴥𐴓𐴢. 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞𐴊𐴞 𐴁𐴡𐴓𐴧𐴝 𐴀𐴞𐴁𐴞𐴓𐴞𐴥𐴐𐴠 𐴏𐴝𐴥𐴘𐴔𐴡𐴕𐴡𐴌 𐴉𐴟𐴖𐴝 𐴘𐴡𐴇𐴟𐴥𐴊𐴝 𐴀𐴞𐴏𐴑𐴝𐴥𐴌𐴞𐴘𐴠𐴃𐴡𐴌 𐴊𐴞𐴓𐴡𐴃𐴢 𐴀𐴝𐴒𐴠 𐴓𐴡𐴥𐴃𐴞 𐴕𐴞𐴘𐴡𐴃𐴢 𐴒𐴡𐴥𐴓𐴝𐴘𐴊𐴞𐴘𐴠.³𐴀𐴞𐴏𐴝𐴤𐴘𐴠 𐴎𐴝𐴙𐴕𐴃𐴡 𐴊𐴠, 𐴁𐴝𐴉𐴠 𐴀𐴞𐴥𐴁𐴝𐴌 𐴀𐴝𐴥𐴃𐴡𐴃𐴢 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴊𐴞𐴦𐴉𐴠𐴥𐴓𐴝𐴘𐴧𐴠 𐴀𐴝𐴦𐴌 𐴀𐴞𐴥𐴁𐴝 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴀𐴝𐴙𐴐𐴧𐴠𐴥 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴇𐴠𐴥𐴍𐴠 𐴁𐴠 𐴉𐴞𐴥𐴌𐴞 𐴎𐴝𐴦𐴌;⁴𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴘𐴠 𐴈𐴝𐴥𐴕𐴝 𐴀𐴠𐴌𐴞 𐴀𐴟𐴙𐴄𐴧𐴞𐴥𐴓𐴢, 𐴀𐴝𐴦𐴌 𐴕𐴞𐴎𐴡𐴌 𐴒𐴝𐴦𐴌 𐴖𐴡𐴌𐴡𐴌 𐴇𐴡𐴦𐴌 𐴑𐴟𐴥𐴓𐴞 𐴀𐴠𐴔𐴧𐴞𐴑𐴧𐴝𐴤 𐴀𐴠𐴙𐴅𐴧𐴠𐴥, 𐴁𐴝𐴦𐴊𐴠 𐴀𐴠𐴑𐴧𐴝𐴥𐴕 𐴒𐴝𐴕𐴏𐴝𐴥 𐴓𐴡𐴦𐴘𐴢 𐴑𐴠𐴣𐴙𐴓𐴡𐴃𐴢 𐴁𐴝𐴙𐴕𐴊𐴠𐴤.⁵𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴒𐴝𐴀𐴓𐴝𐴃𐴢 𐴉𐴝𐴕𐴞𐴥 𐴋𐴝𐴥𐴓𐴞 𐴐𐴝𐴥𐴌𐴞𐴃𐴧𐴟𐴕𐴡𐴌 𐴄𐴠𐴥𐴚 𐴊𐴟𐴥𐴖𐴝𐴘 𐴊𐴞𐴥𐴘𐴝𐴃𐴢 𐴊𐴡𐴙𐴅𐴧𐴠, 𐴀𐴝𐴦𐴌 𐴀𐴞𐴥𐴁𐴝𐴌 𐴑𐴠𐴣𐴙𐴓𐴡𐴃𐴢 𐴁𐴝𐴙𐴕𐴊𐴞𐴥𐴓𐴢 𐴊𐴠 𐴒𐴝𐴕𐴏𐴝𐴥 𐴒𐴝𐴥𐴕 𐴓𐴡𐴥𐴘 𐴇𐴞𐴥𐴀𐴕 𐴉𐴟𐴣𐴏𐴞𐴥 𐴊𐴞𐴥𐴘𐴝𐴃𐴢 𐴊𐴡𐴙𐴅𐴧𐴠.

⁶𐴁𐴝𐴦𐴊𐴠 𐴀𐴞𐴥𐴁𐴝 𐴏𐴝𐴥𐴘𐴔𐴡𐴕 𐴉𐴞𐴃𐴡𐴌𐴡𐴌 𐴀𐴞𐴥𐴣𐴘𐴡𐴃𐴢 𐴉𐴡𐴀𐴣𐴙𐴐𐴧𐴠. 𐴉𐴞𐴃𐴡𐴌𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴃𐴟𐴀𐴛 𐴀𐴝𐴣𐴀𐴌 𐴄𐴠𐴥𐴚 𐴊𐴟𐴥𐴖𐴝𐴘 𐴊𐴞𐴥𐴁𐴝 𐴊𐴠𐴥؟“

⁷𐴀𐴞𐴏𐴝𐴤𐴘𐴠 𐴀𐴞𐴥𐴁𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴑𐴞𐴦 𐴒𐴡𐴌𐴞𐴥𐴌 𐴃𐴟𐴘 𐴀𐴠𐴇𐴡𐴥𐴕 𐴕𐴡 𐴁𐴟𐴎𐴞𐴥𐴁𐴞, 𐴔𐴡𐴕𐴃𐴡𐴌 𐴉𐴡𐴌𐴠 𐴁𐴟𐴎𐴞𐴥𐴁𐴞.“

⁸𐴉𐴞𐴃𐴡𐴌𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴁𐴞𐴓𐴑𐴟𐴥𐴓𐴢 𐴀𐴝𐴣𐴀𐴌 𐴄𐴠𐴥𐴚 𐴕𐴡 𐴊𐴟𐴥𐴘𐴧𐴡.“
𐴀𐴞𐴏𐴝𐴤𐴘𐴠 𐴀𐴞𐴥𐴁𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴎𐴡𐴊𐴞 𐴃𐴡𐴌 𐴄𐴠𐴥𐴚 𐴕𐴡 𐴊𐴟𐴥𐴘, 𐴃𐴡𐴥𐴀𐴘𐴓𐴠 𐴃𐴡𐴌 𐴓𐴧𐴡𐴘 𐴀𐴝𐴣𐴀𐴌 𐴓𐴧𐴡𐴥𐴘 𐴇𐴡𐴕𐴡𐴤 𐴇𐴝𐴥𐴃𐴞𐴓𐴢 𐴕𐴝𐴥𐴘.“

⁹𐴇𐴠𐴥𐴃𐴟𐴕𐴡𐴃𐴢 𐴏𐴝𐴥𐴘𐴔𐴡𐴕 𐴉𐴞𐴃𐴡𐴌𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴃𐴡𐴥𐴀𐴘𐴓𐴠 𐴏𐴞𐴌𐴞𐴥𐴉𐴢 𐴀𐴝𐴣𐴀𐴌 𐴄𐴠𐴥𐴚 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌 𐴀𐴝𐴥𐴃𐴧𐴟𐴕 𐴀𐴠𐴊𐴧𐴠 𐴔𐴝𐴃𐴝𐴥 𐴘𐴡𐴥 𐴊𐴟𐴥𐴖𐴝𐴘𐴊𐴡.“

¹⁰𐴀𐴞𐴏𐴝𐴤𐴘𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴎𐴠𐴦𐴕𐴞𐴑𐴞 𐴒𐴝𐴦 𐴊𐴟𐴥𐴘𐴉𐴠𐴓𐴝𐴘𐴧𐴠, 𐴀𐴞𐴥𐴃𐴝𐴃𐴧𐴟 𐴏𐴞𐴌𐴞𐴥𐴉𐴢 𐴄𐴠𐴥𐴚 𐴊𐴟𐴥𐴖𐴝 𐴉𐴡𐴌𐴠 𐴊𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴠 𐴃𐴡 𐴉𐴟𐴌𐴝𐴉𐴟𐴌𐴞 𐴏𐴝𐴥𐴉𐴏𐴟𐴃𐴝𐴌𐴝. 𐴃𐴟𐴣𐴀𐴝𐴥𐴌𐴝 𐴏𐴝𐴥𐴉𐴢, 𐴔𐴡𐴕𐴃𐴡𐴌 𐴁𐴠𐴒𐴧𐴟𐴥𐴕 𐴕𐴡.“¹¹𐴀𐴞𐴏𐴝𐴤𐴘𐴠 𐴎𐴝𐴕𐴠 𐴀𐴞𐴥𐴁𐴝𐴌𐴠 𐴇𐴡𐴕𐴠 𐴊𐴡𐴥𐴌𐴞𐴊𐴞𐴁𐴡 𐴊𐴠; 𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴘𐴠 𐴈𐴡𐴘𐴧𐴠𐴥 𐴊𐴠, ”𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕 𐴏𐴝𐴥𐴉𐴢 𐴕𐴡.“

¹²𐴃𐴡𐴥𐴘 𐴎𐴠𐴣𐴃𐴧𐴠𐴥 𐴀𐴞𐴥𐴁𐴝𐴃𐴧𐴟 𐴀𐴞𐴥𐴃𐴝𐴌𐴝𐴌 𐴄𐴠𐴥𐴚 𐴊𐴟𐴥𐴘𐴧𐴝 𐴀𐴡𐴥𐴘𐴧𐴠, 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴇𐴡𐴦𐴌 𐴉𐴞𐴣𐴊𐴞𐴥 𐴀𐴝𐴁𐴝𐴌 𐴁𐴡𐴙𐴐𐴧𐴠𐴥. 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴑𐴞𐴦 𐴒𐴡𐴙𐴅𐴧𐴞𐴥 𐴊𐴠 𐴁𐴟𐴙𐴅𐴧𐴡𐴥 𐴕𐴠𐴥؟¹³𐴃𐴟𐴣𐴀𐴝𐴥𐴌𐴝 𐴃𐴡 𐴀𐴝𐴣𐴀𐴌𐴠𐴥 𐴀𐴟𐴏𐴃𐴝𐴃𐴢 𐴀𐴠𐴊𐴧𐴠 𐴔𐴝𐴓𐴞𐴑 𐴋𐴝𐴑𐴡, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴇𐴞𐴥𐴘𐴝𐴕 𐴏𐴡𐴥𐴘𐴧𐴞 𐴈𐴡𐴀, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴇𐴠𐴥𐴕𐴊𐴞𐴓𐴧𐴝 𐴀𐴡𐴥𐴘.¹⁴𐴃𐴡𐴥𐴘 𐴀𐴝𐴀𐴛 𐴎𐴠𐴃𐴧𐴡𐴥𐴃𐴢 𐴃𐴟𐴣𐴀𐴝𐴥𐴌𐴝𐴌 𐴔𐴝𐴓𐴞𐴑 𐴀𐴠𐴊𐴧𐴠 𐴀𐴟𐴏𐴃𐴝𐴃𐴢 𐴀𐴡𐴥𐴘 𐴃𐴟𐴣𐴀𐴝𐴥𐴌𐴝𐴌 𐴄𐴠𐴥𐴚 𐴊𐴟𐴥𐴖𐴝𐴘 𐴊𐴞𐴥𐴘𐴞, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴘𐴡𐴥 𐴀𐴠𐴎𐴧𐴡𐴕𐴠 𐴀𐴝𐴌 𐴀𐴠𐴎𐴧𐴡𐴕𐴡𐴌 𐴄𐴠𐴥𐴚 𐴊𐴟𐴥𐴖𐴝𐴘 𐴊𐴞𐴥𐴘𐴝𐴌 𐴎𐴡𐴌𐴟𐴌.¹⁵𐴀𐴝𐴀𐴛 𐴒𐴡𐴌𐴞𐴥 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴑𐴧𐴝𐴥𐴕 𐴕𐴡𐴔𐴟𐴕𐴝 𐴊𐴝𐴈𐴝𐴤𐴘𐴧𐴞 𐴊𐴠, 𐴎𐴠𐴀𐴕𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴒𐴡𐴙𐴅𐴧𐴞𐴥 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴒𐴡𐴌𐴡𐴤.¹⁶𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴒𐴟𐴓𐴝𐴔 𐴕𐴞𐴎𐴡𐴌 𐴒𐴞𐴌𐴡𐴥𐴏𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴕𐴡, 𐴀𐴝𐴦𐴌 𐴎𐴞𐴁𐴝𐴤𐴌𐴠 𐴊𐴞𐴉𐴠𐴍𐴝𐴥 𐴒𐴞𐴥𐴘𐴠 𐴀𐴞𐴥𐴁𐴝 𐴘𐴡𐴥 𐴊𐴞𐴉𐴠𐴍𐴡𐴥𐴘𐴝𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴕𐴡.¹⁷𐴘𐴝𐴓𐴝 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴞𐴀𐴕 𐴎𐴝𐴕𐴡, 𐴎𐴡𐴊𐴞 𐴀𐴝𐴔𐴡𐴥𐴓𐴢 𐴒𐴡𐴌𐴡𐴤 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝 𐴔𐴟𐴁𐴝𐴌𐴠𐴑.

¹⁸”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕𐴡𐴌 𐴈𐴡𐴃𐴝𐴤 𐴈𐴡𐴀𐴙𐴌 𐴊𐴠 𐴕𐴡; 𐴀𐴝𐴀𐴛 𐴎𐴝𐴕𐴞 𐴀𐴝𐴀𐴛 𐴇𐴡𐴕𐴃𐴝𐴌𐴝𐴤𐴌𐴠 𐴁𐴝𐴏𐴞𐴥𐴓𐴡𐴘𐴧𐴞. 𐴔𐴡𐴕𐴃𐴡𐴌 𐴇𐴠𐴥𐴕𐴊𐴞𐴓𐴧𐴝 𐴀𐴠𐴃𐴡𐴓𐴧𐴝𐴤 𐴀𐴡𐴥𐴌 𐴎𐴠𐴀𐴕𐴠 𐴂𐴝𐴑-𐴑𐴝𐴓𐴝𐴔𐴡𐴌 𐴈𐴡𐴃𐴝𐴤 𐴘𐴝𐴀𐴕 𐴉𐴟𐴌𐴝 𐴀𐴡𐴥, ’𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴌𐴟𐴄𐴞 𐴈𐴝𐴥𐴀, 𐴀𐴞𐴥𐴃𐴠 𐴀𐴝𐴣𐴀𐴌 𐴀𐴟𐴓𐴋𐴝 𐴓𐴝𐴃𐴞𐴥 𐴃𐴟𐴙𐴓𐴧𐴠𐴥.‘

¹⁹”𐴇𐴞𐴥𐴘𐴝𐴕 𐴀𐴡𐴥𐴘𐴁𐴝𐴌 𐴀𐴝𐴒𐴠 𐴀𐴝𐴀𐴛 𐴘𐴝𐴓𐴝 𐴓𐴡𐴥𐴃𐴞 𐴃𐴟𐴣𐴀𐴝𐴥𐴌𐴝𐴌𐴠 𐴎𐴝𐴕𐴝𐴘𐴊𐴞𐴌, 𐴎𐴠𐴀𐴕𐴠 𐴇𐴞𐴥𐴘𐴝𐴕 𐴀𐴡𐴥𐴘𐴓𐴠 𐴃𐴟𐴣𐴀𐴝𐴥𐴌𐴝 𐴀𐴠𐴑𐴞𐴕 𐴒𐴡𐴌𐴡𐴤 𐴊𐴠, 𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴀𐴞𐴥𐴁𐴝.²⁰𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴎𐴠𐴦𐴕𐴞𐴑𐴞 𐴀𐴝𐴀𐴛 𐴊𐴞𐴉𐴠𐴍𐴝𐴥𐴘𐴊𐴠 𐴘𐴡𐴥𐴒𐴧𐴗𐴝𐴌𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥, 𐴀𐴞𐴥𐴃𐴠 𐴀𐴝𐴣𐴀𐴌𐴠𐴥 𐴑𐴡𐴁𐴟𐴓𐴢 𐴒𐴡𐴌𐴠𐴥 𐴊𐴠; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌𐴠𐴥 𐴑𐴡𐴁𐴟𐴓𐴢 𐴒𐴡𐴌𐴠𐴥, 𐴀𐴞𐴥𐴃𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴀𐴞𐴥𐴁𐴝𐴌𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥 𐴊𐴠.“

𐴀𐴞𐴏𐴝𐴤𐴌𐴠 𐴊𐴡𐴥𐴌𐴞𐴊𐴡𐴘𐴝𐴌 𐴁𐴝𐴦𐴁𐴟𐴃𐴠 𐴀𐴝𐴒𐴟𐴕 𐴈𐴡𐴃𐴝𐴤

²¹𐴀𐴞𐴏𐴝𐴤𐴃𐴧𐴟 𐴇𐴞𐴥𐴀𐴕 𐴈𐴡𐴘𐴧𐴝𐴤 𐴀𐴡𐴥𐴘 𐴁𐴝𐴦𐴊𐴠, 𐴊𐴞𐴓𐴡𐴃𐴢 𐴉𐴠𐴌𐴠𐴐𐴝𐴕 𐴓𐴝𐴙𐴒𐴧𐴠𐴥, 𐴀𐴝𐴦𐴌 𐴈𐴡𐴀𐴘𐴉𐴠𐴓𐴝𐴘𐴧𐴠 𐴊𐴠 𐴑𐴞, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴀𐴠𐴎𐴧𐴡𐴕𐴠 𐴀𐴝𐴣𐴀𐴌𐴠𐴥 𐴊𐴡𐴥𐴌𐴞 𐴊𐴞𐴁𐴝.“

²²𐴐𐴝𐴥𐴌𐴞𐴃𐴧𐴟𐴕𐴠 𐴀𐴞𐴏𐴝𐴤𐴘𐴠 𐴇𐴝𐴌 𐴈𐴡𐴃𐴝𐴤 𐴈𐴡𐴀𐴌 𐴊𐴠 𐴁𐴟𐴎𐴞𐴥 𐴕𐴡 𐴉𐴝𐴌𐴞 𐴀𐴠𐴎𐴧𐴡𐴕𐴡𐴌 𐴀𐴟𐴎𐴟 𐴀𐴠𐴎𐴧𐴡𐴕𐴠 𐴏𐴝𐴀𐴃𐴢 𐴊𐴡𐴙𐴅𐴧𐴠.²³𐴀𐴞𐴥𐴃𐴝𐴌𐴝𐴃𐴧𐴟 𐴎𐴠 𐴐𐴝𐴥𐴌𐴞𐴃𐴧𐴗𐴝𐴌𐴠 𐴀𐴞𐴏𐴝𐴤𐴘𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴃𐴧𐴡𐴥, 𐴘𐴡𐴥𐴒𐴧𐴗𐴝 𐴀𐴞𐴏𐴝𐴤𐴌 𐴒𐴝𐴦𐴃𐴢 𐴀𐴠𐴥𐴓𐴝𐴕 𐴊𐴞𐴥 𐴁𐴡𐴘𐴍𐴝𐴤 𐴀𐴝𐴐𐴧𐴞𐴥𐴓𐴢.²⁴𐴏𐴝𐴥𐴘𐴔𐴡𐴕 𐴉𐴞𐴃𐴡𐴌𐴠 𐴇𐴠𐴥 𐴐𐴝𐴥𐴌𐴞𐴃𐴧𐴗𐴝𐴌𐴠 𐴀𐴞𐴐𐴝𐴥𐴌𐴝 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴀𐴞𐴥𐴁𐴝𐴘𐴠 𐴇𐴝𐴌 𐴈𐴡𐴃𐴝𐴤 𐴈𐴡𐴀𐴌 𐴊𐴠 𐴉𐴟𐴏𐴝𐴥𐴌 𐴒𐴡𐴌𐴡𐴤.“

²⁵𐴃𐴡𐴥𐴘 𐴇𐴠𐴥 𐴐𐴝𐴥𐴌𐴞𐴃𐴧𐴗𐴝 𐴀𐴞𐴏𐴝𐴤𐴌 𐴒𐴝𐴦𐴃𐴢 𐴀𐴠𐴥𐴓𐴝𐴕 𐴊𐴞𐴥 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴔𐴝𐴓𐴞𐴑, 𐴀𐴞𐴥𐴃𐴠 𐴇𐴡𐴕؟“

²⁶𐴀𐴞𐴏𐴝𐴤𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴌𐴟𐴄𐴞𐴌 𐴄𐴟𐴑𐴟𐴍𐴝 𐴘𐴝𐴀𐴕 𐴁𐴟𐴌𐴝𐴘 𐴀𐴝𐴀𐴛 𐴎𐴝𐴌𐴠𐴥 𐴊𐴞𐴦𐴘𐴟𐴔, 𐴃𐴠𐴦 𐴀𐴡𐴥𐴙𐴓𐴊𐴠 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴠.“𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴌𐴟𐴄𐴞𐴌 𐴄𐴟𐴑𐴟𐴍𐴝 𐴒𐴝𐴥𐴕 𐴁𐴟𐴌𐴝𐴘 𐴏𐴝𐴥𐴘𐴔𐴡𐴕 𐴀𐴞𐴏𐴑𐴝𐴥𐴌𐴞𐴘𐴠𐴃𐴡𐴌 𐴉𐴟𐴖𐴝 𐴘𐴡𐴇𐴟𐴥𐴊𐴝𐴌𐴠 𐴊𐴞𐴦𐴘𐴠𐴥.²⁷𐴌𐴟𐴄𐴞𐴌 𐴄𐴟𐴑𐴟𐴍𐴝 𐴒𐴝𐴥𐴕 𐴓𐴡𐴦𐴘𐴢 𐴁𐴝𐴦𐴊𐴠 𐴐𐴡𐴥𐴘𐴃𐴝𐴕 𐴀𐴞𐴥𐴃𐴝𐴌 𐴁𐴟𐴥𐴃𐴡𐴌𐴠 𐴒𐴡𐴥𐴓𐴞𐴒𐴞𐴘𐴡𐴘.
𐴇𐴠𐴥𐴃𐴡𐴓𐴧𐴝 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴘 𐴎𐴞𐴘𐴝𐴥𐴕 𐴒𐴡𐴌𐴞𐴥𐴁𐴞 𐴇𐴞𐴥𐴘𐴝𐴕 𐴃𐴡𐴌𐴝𐴃𐴡𐴌𐴞 𐴒𐴡𐴌.“²⁸𐴔𐴡𐴕𐴃𐴡𐴌 𐴈𐴝𐴥𐴕𐴝 𐴈𐴝𐴥𐴘𐴃𐴡 𐴁𐴡𐴙𐴐𐴧𐴠𐴥 𐴊𐴠 𐴀𐴞𐴥𐴃𐴝𐴌𐴝 𐴇𐴡𐴕𐴡𐴤𐴑𐴞𐴘𐴠 𐴕𐴡𐴥 𐴁𐴟𐴎𐴠𐴥 𐴊𐴠, 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴠 𐴈𐴡𐴃𐴝𐴤 𐴇𐴞𐴥𐴘𐴝𐴕 𐴑𐴞𐴘𐴡𐴥𐴓𐴧𐴝 𐴈𐴡𐴘𐴧𐴠𐴥.²⁹𐴇𐴡𐴊𐴟𐴥𐴕𐴠 𐴄𐴝𐴥𐴀𐴙𐴅𐴧𐴞𐴓𐴢 𐴊𐴠, 𐴘𐴡𐴇𐴟𐴥𐴊𐴝𐴃𐴧𐴟 𐴎𐴠𐴃𐴧𐴡𐴥𐴃𐴢 𐴄𐴞𐴛𐴝𐴌 𐴉𐴠𐴄𐴞 𐴀𐴝𐴐𐴧𐴞𐴥𐴓𐴢 𐴇𐴠𐴥𐴃𐴡𐴓𐴧𐴝 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥 𐴊𐴠, ”𐴀𐴞𐴊𐴡𐴓𐴧𐴝 𐴎𐴞𐴀𐴕 𐴎𐴡𐴌𐴟𐴌 𐴇𐴞𐴥𐴀𐴕 𐴑𐴞𐴕𐴞 𐴀𐴝𐴕𐴒𐴡𐴥𐴘,“ 𐴀𐴝𐴌𐴕𐴡𐴥𐴘𐴓𐴠 𐴒𐴡𐴌𐴞𐴉𐴢 𐴀𐴡𐴥𐴑𐴧𐴡𐴓𐴡𐴌𐴠 𐴑𐴠𐴏𐴧𐴟𐴥 𐴊𐴠𐴦𐴒𐴡𐴥𐴘.³⁰𐴀𐴞𐴥𐴃𐴠 𐴌𐴟𐴄𐴞𐴌 𐴄𐴟𐴑𐴟𐴍𐴝 𐴒𐴝𐴥𐴕 𐴓𐴡𐴦𐴘𐴢 𐴃𐴡𐴌𐴝𐴃𐴡𐴌𐴞 𐴁𐴝𐴀𐴌𐴑𐴟𐴓𐴠 𐴕𐴠𐴦𐴓𐴞𐴒𐴞𐴘𐴡𐴥𐴘. 𐴇𐴞𐴥𐴘𐴝𐴓𐴝 𐴌𐴝𐴙𐴃𐴢.

𐴕𐴡𐴘𐴝 𐴇𐴡𐴥𐴑𐴟𐴔

³¹𐴀𐴞𐴥𐴃𐴠 𐴁𐴝𐴀𐴌𐴠 𐴎𐴝𐴘𐴒𐴡𐴥𐴘 𐴁𐴝𐴦𐴊𐴠, 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴘𐴝𐴓𐴝 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌 𐴔𐴡𐴈𐴞𐴥𐴔𐴝 𐴎𐴝𐴇𐴠𐴥𐴌 𐴀𐴡𐴥𐴘𐴁𐴝𐴌 𐴀𐴡𐴑𐴃𐴡𐴥 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴀𐴝𐴓𐴧𐴝𐴌 𐴔𐴡𐴈𐴞𐴥𐴔𐴝 𐴀𐴞𐴥𐴁𐴝𐴌 𐴊𐴟𐴖𐴝𐴌𐴝 𐴎𐴝𐴇𐴠𐴥𐴌 𐴀𐴡𐴥𐴘𐴁𐴡.³²𐴎𐴠𐴣𐴃𐴧𐴠𐴥 𐴀𐴞𐴥𐴁𐴝𐴌 𐴊𐴟𐴖𐴝𐴌𐴝 𐴀𐴝𐴓𐴧𐴝𐴌 𐴔𐴡𐴈𐴞𐴥𐴔𐴝 𐴎𐴝𐴇𐴠𐴥𐴌 𐴀𐴡𐴥𐴘𐴁𐴡, 𐴇𐴠𐴥𐴣𐴃𐴧𐴠 𐴀𐴝𐴓𐴧𐴝𐴘𐴠 𐴘𐴡𐴥 𐴕𐴞𐴎𐴡𐴌 𐴊𐴟𐴖𐴝𐴌𐴝 𐴇𐴠𐴥 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌 𐴔𐴡𐴈𐴞𐴥𐴔𐴝 𐴎𐴝𐴇𐴠𐴥𐴌 𐴒𐴡𐴌𐴞𐴥𐴁𐴡, 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴔𐴡𐴈𐴞𐴥𐴔𐴝 𐴁𐴞𐴐𐴞𐴤 𐴃𐴡𐴌𐴝𐴃𐴡𐴌𐴞 𐴎𐴝𐴇𐴠𐴥𐴌 𐴒𐴡𐴌𐴞𐴥𐴁𐴡.

³³”𐴀𐴡𐴥 𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴌 𐴑𐴠𐴏𐴧𐴟𐴥 𐴀𐴡𐴑𐴃𐴡𐴥 𐴉𐴡𐴙𐴅𐴧𐴡𐴕𐴃𐴡 𐴀𐴝𐴏𐴞𐴤 𐴊𐴠. 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴃𐴝𐴓𐴝𐴐𐴢 𐴒𐴡𐴌𐴞𐴥𐴁𐴝, 𐴔𐴡𐴕𐴃𐴡𐴌 𐴀𐴝𐴀𐴛 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴎𐴠𐴕𐴊𐴞𐴓𐴧𐴝 𐴈𐴡𐴀𐴘𐴓𐴝𐴔, 𐴇𐴠𐴥𐴕𐴊𐴞𐴓𐴧𐴝 𐴘𐴝𐴓𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴘𐴡𐴥 𐴈𐴡𐴀𐴙𐴌, ’𐴀𐴝𐴀𐴛 𐴎𐴠𐴍𐴠𐴥 𐴎𐴝𐴙𐴌𐴒𐴡𐴥𐴘 𐴇𐴠𐴥𐴍𐴠 𐴃𐴟𐴣𐴀𐴝𐴥𐴌𐴝 𐴀𐴝𐴀𐴘𐴢 𐴕𐴡 𐴉𐴝𐴌𐴞𐴁𐴝𐴥.‘

³⁴”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴑𐴧𐴝𐴥𐴕 𐴕𐴡𐴘𐴝 𐴇𐴡𐴥𐴑𐴟𐴔 𐴊𐴞𐴥𐴌, 𐴑𐴞 𐴈𐴡𐴘𐴓𐴠𐴥, 𐴃𐴟𐴣𐴀𐴝𐴥𐴌𐴝 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤. 𐴀𐴝𐴀𐴛 𐴎𐴠𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴅𐴧𐴞𐴥, 𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤.³⁵𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤, 𐴇𐴞𐴥𐴘𐴝𐴕𐴠 𐴁𐴠𐴒𐴧𐴟𐴥𐴕𐴠 𐴎𐴝𐴕𐴞𐴁𐴡𐴥 𐴊𐴠, 𐴃𐴟𐴣𐴀𐴝𐴥𐴌𐴝 𐴀𐴡𐴥𐴘𐴓𐴝𐴊𐴠 𐴀𐴝𐴣𐴀𐴌 𐴀𐴟𐴔𐴧𐴡𐴃𐴢.“

𐴉𐴞𐴃𐴡𐴌𐴠 𐴀𐴞𐴕𐴑𐴝𐴌 𐴒𐴡𐴌𐴝𐴥𐴌 𐴁𐴝𐴦𐴁𐴟𐴃𐴠 𐴀𐴞𐴏𐴝𐴤𐴌 𐴀𐴝𐴒𐴟𐴕 𐴈𐴡𐴃𐴝𐴤

³⁶𐴏𐴝𐴥𐴘𐴔𐴡𐴕 𐴉𐴞𐴃𐴡𐴌𐴠 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴃𐴟𐴀𐴛 𐴇𐴡𐴍𐴠𐴥 𐴎𐴡𐴀𐴌𐴒𐴡𐴘 𐴊𐴠𐴥؟“
𐴀𐴞𐴏𐴝𐴤𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴎𐴠𐴍𐴠𐴥 𐴎𐴝𐴙𐴌𐴒𐴡𐴥𐴘, 𐴇𐴠𐴥𐴍𐴠 𐴃𐴟𐴘 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴘𐴝𐴓𐴝 𐴀𐴝𐴀𐴘𐴢 𐴕𐴡 𐴉𐴝𐴌𐴞𐴁𐴞𐴥, 𐴓𐴠𐴑𐴞𐴕 𐴉𐴡𐴌𐴠 𐴀𐴝𐴀𐴘𐴢 𐴉𐴝𐴌𐴞𐴁𐴞𐴥.“

³⁷𐴉𐴞𐴃𐴡𐴌𐴠 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴔𐴝𐴓𐴞𐴑, 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴉𐴟𐴥𐴖𐴝𐴣𐴃𐴞 𐴘𐴝𐴓𐴝 𐴑𐴞𐴘𐴝𐴥 𐴀𐴝𐴀𐴘𐴢 𐴕𐴡 𐴉𐴝𐴙𐴃𐴧𐴝𐴔؟ 𐴀𐴝𐴀𐴛 𐴃𐴡 𐴃𐴟𐴣𐴀𐴝𐴥𐴣𐴌 𐴓𐴧𐴝 𐴁𐴡𐴥𐴓𐴞 𐴕𐴞𐴎𐴡𐴌 𐴎𐴝𐴕 𐴀𐴟𐴥𐴊𐴧𐴗𐴝 𐴊𐴞𐴉𐴠𐴥𐴓𐴝𐴘𐴧𐴟𐴔.“

³⁸𐴀𐴞𐴏𐴝𐴤𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴃𐴟𐴘 𐴀𐴝𐴣𐴀𐴌 𐴓𐴧𐴝 𐴃𐴡𐴌 𐴎𐴝𐴕 𐴊𐴞𐴉𐴠𐴥𐴓𐴝𐴘𐴁𐴞 𐴊𐴠𐴥؟ 𐴀𐴝𐴀𐴛 𐴃𐴡𐴌𐴠𐴥 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴌𐴝𐴃𐴝𐴑𐴟𐴌𐴝𐴤 𐴁𐴝𐴑 𐴊𐴞𐴁𐴝𐴌 𐴀𐴝𐴒𐴠 𐴃𐴟𐴘 𐴀𐴝𐴣𐴀𐴌𐴠𐴥 𐴃𐴞𐴕 𐴁𐴝𐴌 𐴀𐴞𐴕𐴑𐴝𐴌 𐴒𐴡𐴌𐴞𐴥𐴁𐴞.

The Word for the World International

https://app.library.bible/content/87faca8b51c22590