Read 𐴘𐴡𐴇𐴝𐴥𐴕𐴧𐴝 12

𐴘𐴡𐴇𐴝𐴥𐴕𐴧𐴝12

𐴁𐴠𐴃𐴝𐴥𐴕𐴞𐴘𐴝 𐴉𐴝𐴌𐴝𐴃𐴢 𐴀𐴞𐴏𐴝𐴤𐴌 𐴄𐴠𐴥𐴚𐴡𐴃𐴢 𐴀𐴝𐴣𐴃𐴡𐴌 𐴋𐴝𐴥𐴓𐴞𐴊𐴞𐴘𐴠

¹𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴏𐴡𐴥 𐴊𐴞𐴕 𐴀𐴝𐴒𐴠, 𐴀𐴞𐴏𐴝𐴤 𐴁𐴠𐴃𐴝𐴥𐴕𐴞𐴘𐴝𐴃𐴢 𐴀𐴝𐴙𐴐𐴧𐴠𐴥, 𐴎𐴠𐴍𐴠𐴥 𐴀𐴡 𐴓𐴝𐴏𐴝𐴥𐴌 𐴃𐴝𐴥𐴑𐴞𐴃𐴡, 𐴎𐴞𐴁𐴝𐴤𐴌𐴠 𐴀𐴞𐴥𐴁𐴝𐴘𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴙𐴅𐴧𐴞𐴥𐴓𐴢.²𐴇𐴠𐴥𐴍𐴠 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴓𐴧𐴝 𐴁𐴞𐴘𐴝𐴓𐴡𐴌 𐴈𐴝𐴥𐴕𐴝 𐴒𐴡𐴙𐴅𐴧𐴠𐴥. 𐴔𐴡𐴌𐴡𐴃𐴝𐴘𐴠 𐴇𐴠𐴥𐴊𐴔𐴡𐴃𐴢 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴘𐴃𐴡 𐴁𐴡𐴙𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴓𐴝𐴏𐴝𐴥𐴌 𐴀𐴡𐴥 𐴀𐴝𐴐𐴧𐴞𐴥𐴓𐴢.³𐴇𐴠𐴥𐴃𐴟𐴕𐴡𐴃𐴢 𐴔𐴡𐴌𐴞𐴘𐴝𐴔𐴠 𐴇𐴝𐴥𐴄𐴞 𐴕𐴝𐴌𐴋-𐴒𐴝𐴏𐴡𐴌 𐴁𐴞𐴐𐴞𐴤 𐴔𐴡𐴀𐴚𐴒𐴝 𐴀𐴝𐴎𐴧𐴠𐴥𐴌 𐴀𐴝𐴣𐴃𐴡𐴌 𐴓𐴡𐴦𐴘𐴢 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴇𐴞𐴥𐴀𐴕 𐴀𐴞𐴏𐴝𐴤𐴌 𐴉𐴡𐴦𐴃𐴢 𐴋𐴝𐴥𐴓𐴞𐴊𐴞 𐴕𐴞𐴎𐴡𐴌 𐴏𐴟𐴓𐴢 𐴓𐴡𐴘 𐴀𐴞𐴥𐴁𐴝𐴌 𐴉𐴡𐴦 𐴉𐴟𐴣𐴏𐴞𐴥𐴊𐴞𐴘𐴠. 𐴇𐴠𐴥 𐴀𐴝𐴣𐴃𐴡𐴌𐴡𐴌 𐴑𐴟𐴥𐴐𐴁𐴡𐴘𐴠 𐴒𐴡𐴥𐴌 𐴒𐴝𐴥𐴕 𐴁𐴡𐴥𐴌𐴞𐴒𐴞𐴓𐴒𐴡𐴘.

⁴𐴔𐴡𐴕𐴃𐴡𐴌 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴡𐴃𐴧𐴟 𐴀𐴠𐴎𐴧𐴡𐴕 𐴎𐴠𐴦𐴕𐴞𐴑𐴞 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞𐴊𐴞𐴁𐴡 𐴊𐴠 𐴀𐴝𐴏𐴠𐴤, 𐴇𐴠𐴥 𐴘𐴡𐴇𐴟𐴥𐴊𐴝 𐴀𐴞𐴏𐴑𐴝𐴥𐴌𐴞𐴘𐴠𐴃𐴠 𐴈𐴡𐴀𐴌 𐴊𐴠,⁵”𐴀𐴠 𐴀𐴝𐴣𐴃𐴡𐴌 𐴒𐴟𐴥𐴕 𐴑𐴞𐴘𐴝𐴥 𐴃𐴞𐴕 𐴐𐴡𐴥𐴃𐴢 𐴊𐴞𐴕𐴝𐴥𐴌 𐴊𐴞𐴥 𐴁𐴠𐴏𐴞 𐴄𐴞𐴛𐴝 𐴒𐴟𐴥𐴕 𐴒𐴡𐴌𐴞𐴉𐴢 𐴀𐴡𐴥𐴑𐴧𐴡𐴓𐴡𐴌𐴠 𐴊𐴞𐴦 𐴕𐴡𐴥 𐴉𐴠𐴓𐴠؟“⁶𐴀𐴞𐴥𐴃𐴠 𐴈𐴡𐴃𐴝𐴤 𐴇𐴞𐴥𐴘𐴝𐴕 𐴒𐴡𐴌𐴞𐴉𐴢 𐴀𐴡𐴥𐴑𐴧𐴡𐴓𐴡𐴓𐴧𐴝 𐴏𐴞𐴕𐴃𐴝𐴁𐴝𐴥𐴉𐴝𐴕𐴝 𐴃𐴝𐴥𐴑𐴞 𐴈𐴡𐴘𐴧𐴠𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴠 𐴏𐴟𐴌 𐴀𐴝𐴐𐴧𐴞𐴥𐴓𐴢; 𐴄𐴞𐴛𐴝𐴌 𐴉𐴠𐴄𐴞 𐴀𐴞𐴥𐴃𐴝𐴌 𐴇𐴠𐴥𐴍𐴠 𐴃𐴝𐴥𐴑𐴞𐴃𐴡 𐴀𐴞𐴥𐴏𐴝𐴉𐴠, 𐴘𐴞𐴥𐴁𐴝𐴃𐴢 𐴎𐴞𐴀𐴕 𐴀𐴠𐴌𐴝 𐴎𐴝𐴘𐴃𐴡 𐴈𐴠𐴥𐴕𐴃𐴟 𐴀𐴞𐴥𐴃𐴠 𐴏𐴟𐴌 𐴒𐴡𐴌𐴞𐴥𐴉𐴠𐴓𐴝𐴘𐴃𐴡.

⁷𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴇𐴞𐴥𐴁𐴝𐴌𐴠 𐴒𐴡𐴙𐴃𐴧𐴡𐴥 𐴊𐴡; 𐴇𐴞𐴥𐴁𐴝𐴘𐴠 𐴀𐴞𐴀𐴕 𐴀𐴝𐴣𐴀𐴌 𐴊𐴡𐴇𐴡𐴥𐴕𐴡𐴌 𐴊𐴞𐴕𐴡𐴓𐴧𐴝 𐴁𐴠 𐴌𐴝𐴙𐴑𐴧𐴠𐴥.⁸𐴒𐴡𐴌𐴞𐴁𐴢 𐴀𐴡𐴥𐴑𐴧𐴡𐴓𐴢 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴕𐴞𐴃𐴧𐴞 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴀𐴝𐴣𐴀𐴌𐴠𐴥 𐴃𐴟𐴣𐴀𐴝𐴥𐴌𐴝 𐴕𐴞𐴃𐴧𐴞 𐴕𐴡 𐴉𐴝𐴘𐴁𐴝.“

𐴓𐴝𐴏𐴝𐴥𐴌𐴡𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴏𐴡𐴥𐴓𐴧𐴝

⁹𐴀𐴞𐴏𐴝𐴤 𐴁𐴠𐴃𐴝𐴥𐴕𐴞𐴘𐴝𐴃𐴢 𐴀𐴝𐴙𐴐𐴧𐴠𐴥 𐴊𐴠 𐴎𐴝𐴕𐴞 𐴉𐴝𐴌𐴞 𐴁𐴠𐴐𐴝𐴤𐴁𐴞𐴐𐴞𐴤 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥. 𐴀𐴞𐴥𐴃𐴝𐴌𐴝 𐴏𐴞𐴌𐴞𐴥𐴉𐴢 𐴀𐴞𐴏𐴝𐴤 𐴓𐴧𐴝 𐴀𐴝𐴙𐴐𐴧𐴠𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴓𐴝𐴏𐴝𐴥𐴌𐴡𐴌𐴠 𐴏𐴝𐴘 𐴁𐴡𐴓𐴧𐴝 𐴘𐴡𐴥, 𐴎𐴞𐴁𐴝𐴤𐴌𐴠 𐴀𐴞𐴥𐴁𐴝𐴘𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴙𐴅𐴧𐴞𐴥𐴓𐴢.¹⁰𐴓𐴠𐴑𐴞𐴕 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴓𐴝𐴏𐴝𐴥𐴌𐴡𐴌𐴠 𐴘𐴡𐴥 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴏𐴡𐴥𐴓𐴧𐴝 𐴒𐴡𐴙𐴅𐴧𐴠𐴥,¹¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴌 𐴎𐴡𐴌𐴞𐴘𐴝 𐴁𐴡𐴀𐴗𐴃𐴢 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴃𐴝𐴌𐴝𐴌 𐴈𐴠𐴥𐴕𐴃𐴟 𐴎𐴝𐴘𐴒𐴡𐴥𐴘 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤𐴌.

𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴞𐴏𐴝𐴤 𐴁𐴝𐴀𐴣𐴐𐴧𐴝𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴒𐴡𐴥𐴙𐴓𐴧𐴠

¹²𐴃𐴝𐴌𐴉𐴡𐴌 𐴊𐴞𐴕، 𐴎𐴠 𐴁𐴠𐴐𐴝𐴤𐴁𐴞𐴐𐴞𐴤 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴞𐴊𐴡𐴃𐴢 𐴀𐴝𐴙𐴐𐴧𐴠𐴥, 𐴀𐴞𐴥𐴃𐴝𐴌𐴝 𐴉𐴟𐴥𐴙𐴕𐴧𐴠 𐴊𐴠, 𐴀𐴞𐴏𐴝𐴤 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴝𐴘𐴧𐴠𐴤𐴌,¹³𐴃𐴡𐴥𐴘 𐴀𐴞𐴥𐴃𐴝𐴌𐴝 𐴇𐴝𐴥𐴎𐴟-𐴒𐴝𐴏𐴡𐴌 𐴋𐴝𐴒𐴧𐴗𐴝 𐴀𐴡𐴥𐴑𐴧𐴡𐴓𐴢 𐴓𐴡𐴦𐴘𐴢 𐴀𐴞𐴥𐴁𐴝 𐴓𐴧𐴡𐴥𐴘 𐴊𐴡𐴓𐴝 𐴀𐴡𐴥𐴘𐴃𐴡 𐴕𐴠𐴦𐴙𐴓𐴧𐴠𐴥, 𐴀𐴝𐴦𐴌 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠,”𐴇𐴡𐴥𐴏𐴝𐴕𐴝! 𐴔𐴟𐴁𐴝𐴌𐴠𐴑 𐴀𐴟𐴁𐴝𐴤 𐴎𐴞𐴁𐴝𐴤 𐴔𐴝𐴁𐴟𐴊𐴡𐴌 𐴕𐴝𐴔𐴠 𐴀𐴝𐴘𐴧𐴠𐴤𐴌, 𐴁𐴠𐴐𐴡𐴥𐴑, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴞𐴏𐴌𐴝𐴥𐴙𐴓𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴀𐴣𐴐𐴧𐴝!“

¹⁴𐴀𐴞𐴏𐴝𐴤𐴘𐴠 𐴀𐴠𐴒𐴧𐴗𐴝𐴤 𐴒𐴝𐴊𐴝𐴤𐴌 𐴏𐴡𐴥𐴀 𐴉𐴝𐴘 𐴘𐴞𐴥𐴁𐴝𐴌 𐴖𐴡𐴌𐴠 𐴁𐴡𐴙𐴐𐴧𐴞𐴥𐴓𐴢; 𐴎𐴠𐴕𐴊𐴞𐴓𐴧𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤,¹⁵”𐴀𐴡𐴥 𐴏𐴞𐴥𐴘𐴡𐴕𐴡𐴌 𐴎𐴠𐴥𐴌𐴉𐴟𐴖𐴝, 𐴕𐴡 𐴋𐴡𐴦𐴌𐴝𐴘𐴧𐴡𐴥;𐴏𐴡𐴀, 𐴃𐴟𐴣𐴀𐴝𐴥𐴣𐴌 𐴁𐴝𐴀𐴣𐴐𐴧𐴝𐴒𐴝𐴊𐴝𐴤𐴌 𐴏𐴡𐴥𐴀𐴌 𐴖𐴡𐴌𐴠 𐴁𐴡𐴀𐴘𐴢 𐴀𐴝𐴘𐴧𐴠𐴤𐴌.“

¹⁶𐴀𐴞𐴏𐴝𐴤𐴌 𐴐𐴝𐴥𐴌𐴞𐴃𐴧𐴟𐴕𐴠 𐴇𐴞𐴥𐴀𐴕 𐴀𐴝𐴒𐴠 𐴁𐴟𐴎𐴞𐴥 𐴕𐴡𐴥 𐴉𐴝𐴌𐴠; 𐴔𐴡𐴕𐴃𐴡𐴌 𐴎𐴠𐴣𐴃𐴧𐴠𐴥 𐴀𐴞𐴏𐴝𐴤𐴌 𐴔𐴡𐴈𐴞𐴥𐴔𐴝 𐴎𐴝𐴇𐴠𐴥𐴌 𐴀𐴡𐴥𐴘𐴧𐴠, 𐴃𐴡𐴥𐴘 𐴀𐴞𐴥𐴃𐴝𐴌𐴝𐴃𐴧𐴟 𐴔𐴡𐴕𐴡𐴃𐴢 𐴀𐴟𐴙𐴄𐴧𐴠𐴥 𐴊𐴠, 𐴇𐴞𐴥𐴀𐴕 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴁𐴠 𐴓𐴠𐴑𐴝𐴥 𐴒𐴞𐴥𐴘𐴠, 𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴇𐴠𐴥𐴀𐴕-𐴇𐴠𐴥𐴀𐴕 𐴒𐴡𐴙𐴅𐴧𐴠𐴥.

¹⁷𐴀𐴞𐴏𐴝𐴤𐴘𐴠 𐴓𐴝𐴏𐴝𐴥𐴌𐴡𐴌𐴠 𐴈𐴡𐴁𐴡𐴌𐴡𐴃𐴧𐴟 𐴋𐴝𐴑𐴞 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴙𐴅𐴧𐴞𐴥𐴓𐴢 𐴊𐴠 𐴇𐴠𐴥𐴣𐴃𐴧𐴠 𐴎𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝 𐴇𐴞𐴥𐴘𐴝𐴕𐴡𐴌 𐴁𐴝𐴦𐴁𐴟𐴃𐴠 𐴒𐴡𐴁𐴝𐴤 𐴊𐴞𐴥𐴘𐴝𐴃𐴢 𐴀𐴝𐴐𐴧𐴞𐴥𐴓𐴢.¹⁸𐴇𐴠𐴥𐴃𐴡𐴓𐴧𐴝 𐴁𐴡𐴥𐴓𐴞 𐴘𐴡𐴥 𐴇𐴠𐴥 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤 𐴓𐴧𐴡𐴥𐴘 𐴊𐴡𐴓𐴝 𐴀𐴡𐴥𐴘𐴃𐴡 𐴒𐴞𐴀𐴓𐴢 𐴊𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴉𐴟𐴥𐴙𐴕𐴧𐴞𐴓𐴢 𐴊𐴠, 𐴇𐴠𐴥 𐴑𐴠𐴌𐴝𐴔𐴡𐴃𐴢 𐴃𐴝𐴥𐴕 𐴀𐴞𐴥𐴁𐴝𐴘𐴠 𐴁𐴠 𐴒𐴡𐴙𐴅𐴧𐴠𐴥.¹⁹𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴇𐴞𐴥𐴘𐴝𐴕𐴡𐴓𐴧𐴝 𐴀𐴝𐴉𐴡𐴤𐴏𐴡𐴃𐴢 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴃𐴡 𐴊𐴠𐴑𐴡𐴥𐴌, 𐴀𐴝𐴣𐴀𐴌𐴝𐴌 𐴇𐴡𐴕𐴡𐴤 𐴉𐴝𐴥𐴘𐴊𐴝 𐴕𐴡 𐴀𐴡𐴥𐴌. 𐴏𐴡𐴀, 𐴉𐴟𐴌𐴝 𐴊𐴟𐴕𐴞𐴘𐴝𐴘 𐴀𐴞𐴥𐴁𐴝𐴌 𐴉𐴞𐴏𐴝𐴥𐴓𐴞 𐴀𐴡𐴥𐴘𐴒𐴞𐴘𐴡𐴘.“

𐴇𐴡𐴊𐴟𐴥𐴕 𐴒𐴞𐴌𐴞𐴥𐴑 𐴔𐴝𐴕𐴟𐴥𐴙𐴐𐴠 𐴀𐴞𐴏𐴝𐴤𐴌 𐴃𐴝𐴓𐴝𐴐𐴢 𐴒𐴡𐴙𐴅𐴧𐴠𐴥

²⁰𐴇𐴠𐴥 𐴀𐴞𐴊𐴡𐴃𐴢 𐴎𐴠𐴃𐴝𐴌𐴝𐴤 𐴀𐴠𐴁𐴝𐴦𐴊𐴡𐴃𐴢 𐴒𐴡𐴙𐴃𐴧𐴡𐴥 𐴀𐴝𐴙𐴐𐴧𐴠𐴥, 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴇𐴡𐴊𐴟𐴥𐴕 𐴒𐴞𐴌𐴞𐴥𐴑 𐴔𐴝𐴕𐴟𐴥𐴙𐴐𐴢 𐴀𐴡𐴥 𐴀𐴝𐴐𐴧𐴞𐴥𐴓𐴢.²¹𐴀𐴞𐴥𐴃𐴝𐴌𐴝 𐴉𐴞𐴓𐴞𐴥𐴂𐴡𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ”𐴅𐴡𐴕𐴝𐴥𐴁𐴢, 𐴀𐴝𐴣𐴀𐴌𐴝𐴃𐴧𐴟 𐴀𐴞𐴏𐴝𐴤𐴌𐴠 𐴏𐴝𐴘𐴃𐴡𐴥 𐴔𐴡𐴕𐴠𐴈𐴡𐴀𐴌.“ 𐴉𐴞𐴓𐴞𐴥𐴂𐴢 𐴀𐴡𐴥𐴙𐴓𐴊𐴠 𐴒𐴝𐴓𐴞𐴓𐴡𐴌 𐴁𐴠𐴃𐴏𐴝𐴥𐴘𐴊𐴝 𐴉𐴝𐴌𐴝𐴌 𐴔𐴝𐴕𐴟𐴥𐴙𐴐𐴢.²²𐴉𐴞𐴓𐴞𐴥𐴂𐴠 𐴎𐴝𐴘 𐴇𐴞𐴥𐴘𐴝𐴕 𐴀𐴠𐴕𐴊𐴠𐴌𐴞𐴘𐴝𐴏𐴡𐴌𐴠 𐴈𐴡𐴘𐴧𐴠𐴥, 𐴁𐴝𐴦𐴊𐴠 𐴀𐴠𐴕𐴊𐴠𐴌𐴞𐴘𐴝𐴏𐴠 𐴀𐴠𐴊𐴧𐴠 𐴉𐴞𐴓𐴞𐴥𐴂𐴠 𐴎𐴝𐴘 𐴀𐴞𐴏𐴝𐴤𐴌𐴠 𐴈𐴡𐴘𐴧𐴠𐴥𐴒𐴡𐴘.

²³𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌 𐴔𐴡𐴈𐴞𐴥𐴔𐴝 𐴎𐴝𐴇𐴠𐴥𐴌 𐴒𐴡𐴌𐴝𐴥 𐴎𐴝𐴘𐴁𐴝𐴌 𐴀𐴡𐴑𐴃𐴡𐴥 𐴀𐴝𐴙𐴐𐴧𐴠𐴥.²⁴𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴒𐴞𐴣𐴘𐴟𐴌 𐴁𐴞𐴏𐴢 𐴎𐴠𐴃𐴟𐴥𐴕 𐴔𐴠𐴍𐴞𐴃𐴢 𐴉𐴡𐴌𐴞 𐴕𐴡𐴥 𐴔𐴡𐴌𐴠, 𐴇𐴠𐴥𐴃𐴟𐴕 𐴒𐴝𐴦𐴒𐴝 𐴃𐴝𐴥𐴑𐴠; 𐴔𐴡𐴕𐴃𐴡𐴌 𐴎𐴡𐴊𐴞 𐴔𐴡𐴌𐴠, 𐴘𐴞𐴥𐴁𐴝𐴃𐴢 𐴁𐴡𐴀𐴗𐴃𐴢 𐴉𐴡𐴥𐴏𐴡𐴓𐴢 𐴀𐴡𐴥𐴑𐴧𐴡𐴓𐴢 𐴊𐴡𐴥𐴌𐴠.²⁵𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴎𐴝𐴕𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴘𐴝𐴕 𐴇𐴝𐴥𐴌𐴝𐴘𐴉𐴠𐴓𐴝𐴘𐴁𐴡; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴀𐴠 𐴊𐴟𐴕𐴞𐴘𐴝𐴙𐴃𐴢 𐴕𐴞𐴎𐴡𐴌 𐴎𐴝𐴕𐴡𐴌𐴠 𐴊𐴠𐴀𐴘𐴢 𐴕𐴡 𐴉𐴝𐴌𐴠, 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴘𐴝𐴕 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞𐴓𐴧𐴝 𐴁𐴝𐴏𐴝𐴘 𐴌𐴝𐴑𐴞𐴥𐴁𐴡.²⁶𐴇𐴡𐴕𐴡𐴤𐴑𐴞𐴘𐴠 𐴀𐴝𐴣𐴀𐴌 𐴇𐴠𐴥𐴊𐴔𐴡𐴃𐴢 𐴒𐴡𐴙𐴃𐴧𐴡𐴥 𐴏𐴝𐴘𐴓𐴠𐴥, 𐴀𐴞𐴥𐴃𐴝𐴃𐴧𐴟 𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴊𐴡𐴌𐴝 𐴉𐴡𐴌𐴞𐴁𐴡𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴎𐴠𐴍𐴠𐴥, 𐴀𐴝𐴣𐴀𐴌 𐴈𐴝𐴥𐴀𐴊𐴠𐴔 𐴀𐴡𐴥 𐴇𐴠𐴥𐴍𐴠 𐴁𐴠 𐴀𐴡𐴥𐴘𐴁𐴡. 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴇𐴠𐴥𐴊𐴔𐴡𐴃𐴢 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴠 𐴀𐴝𐴣𐴀𐴌 𐴁𐴝𐴉𐴠 𐴀𐴞𐴎𐴧𐴡𐴃𐴢 𐴒𐴡𐴌𐴞𐴥𐴁𐴡.

𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴔𐴡𐴦𐴃𐴡𐴌 𐴁𐴝𐴦𐴁𐴟𐴃𐴠 𐴀𐴝𐴒𐴟𐴕 𐴈𐴡𐴃𐴝𐴤 𐴈𐴡𐴘𐴧𐴠𐴥

²⁷”𐴘𐴝𐴓𐴝 𐴀𐴝𐴣𐴀𐴌 𐴌𐴟𐴀 𐴉𐴠𐴌𐴠𐴐𐴝𐴕 𐴀𐴡𐴥𐴘𐴒𐴞𐴘𐴡𐴘. 𐴀𐴝𐴀𐴛 𐴑𐴞𐴥 𐴀𐴠𐴕𐴊𐴞𐴓𐴧𐴝 𐴈𐴡𐴘𐴃𐴝𐴥𐴔 𐴕𐴠𐴥, ’𐴀𐴡𐴥 𐴁𐴝𐴉𐴢, 𐴀𐴝𐴣𐴀𐴌𐴠𐴥 𐴀𐴠 𐴀𐴡𐴑𐴃𐴡𐴥𐴃𐴧𐴟 𐴁𐴝𐴏𐴝𐴘 𐴌𐴝𐴑𐴡𐴥‘؟ 𐴕𐴡, 𐴀𐴝𐴀𐴛 𐴀𐴠 𐴀𐴡𐴑𐴃𐴡𐴥 𐴉𐴡𐴙𐴅𐴧𐴡𐴕𐴃𐴡 𐴇𐴠𐴥𐴃𐴡𐴓𐴧𐴝 𐴀𐴠𐴥𐴕𐴝 𐴀𐴝𐴙𐴐𐴧𐴞𐴤.²⁸𐴀𐴡𐴥 𐴁𐴝𐴉𐴢, 𐴃𐴟𐴣𐴀𐴝𐴥𐴣𐴌 𐴕𐴝𐴔𐴡𐴌 𐴔𐴡𐴈𐴞𐴥𐴔𐴝 𐴎𐴝𐴇𐴠𐴥𐴌 𐴒𐴡𐴌𐴡𐴤.“
𐴇𐴠𐴥𐴃𐴟𐴕𐴡𐴃𐴢 𐴀𐴝𐴏𐴔𐴝𐴕𐴡𐴃𐴧𐴟 𐴀𐴠𐴒𐴧𐴗𐴝𐴤 𐴀𐴝𐴁𐴝𐴏𐴢 𐴉𐴟𐴥𐴕𐴝 𐴒𐴞𐴥𐴘𐴠 𐴊𐴠, ”𐴀𐴝𐴀𐴛 𐴇𐴞𐴥𐴘𐴝𐴕 𐴎𐴝𐴇𐴠𐴥𐴌 𐴒𐴡𐴙𐴅𐴧𐴞𐴥 𐴘𐴡𐴥, 𐴀𐴝𐴦𐴌 𐴀𐴝𐴁𐴝𐴌 𐴎𐴝𐴇𐴠𐴥𐴌 𐴒𐴡𐴙𐴅𐴧𐴟𐴥𐴔 𐴀𐴡𐴥.“²⁹𐴎𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴇𐴠𐴥𐴍𐴠 𐴃𐴞𐴥𐴘𐴝𐴘 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝 𐴇𐴠𐴥 𐴀𐴝𐴁𐴝𐴏𐴢 𐴏𐴗𐴝𐴥 𐴉𐴟𐴥𐴕𐴞 𐴋𐴠𐴁𐴝 𐴔𐴝𐴙𐴃𐴧𐴠𐴥 𐴊𐴠 𐴁𐴡𐴥𐴓𐴞 𐴈𐴡𐴘𐴧𐴠𐴥. 𐴀𐴝𐴌 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, ”𐴀𐴞𐴥𐴁𐴝 𐴓𐴧𐴡𐴥𐴘 𐴇𐴡𐴕𐴡𐴤 𐴉𐴞𐴥𐴌𐴞𐴏𐴃𐴝𐴘𐴠 𐴈𐴡𐴃𐴝𐴤 𐴈𐴡𐴘𐴧𐴠𐴥 𐴊𐴠.“

³⁰𐴀𐴞𐴏𐴝𐴤𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴇𐴠𐴥 𐴀𐴝𐴁𐴝𐴏𐴢 𐴏𐴗𐴝𐴥 𐴀𐴝𐴣𐴀𐴌 𐴖𐴝𐴏𐴃𐴠𐴥 𐴀𐴝𐴙𐴐𐴧𐴠𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴌𐴝𐴌 𐴖𐴝𐴏𐴃𐴠𐴥.³¹𐴘𐴝𐴓𐴝 𐴀𐴠 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴡𐴥𐴌 𐴁𐴞𐴏𐴝𐴌 𐴒𐴡𐴌𐴞𐴥𐴁𐴝𐴌 𐴀𐴡𐴑𐴃𐴡𐴥 𐴀𐴝𐴀𐴘𐴒𐴞𐴘𐴡𐴘, 𐴀𐴝𐴦𐴌 𐴘𐴝𐴓𐴝 𐴀𐴠 𐴊𐴟𐴕𐴞𐴘𐴝𐴙𐴌 𐴏𐴡𐴥𐴊𐴧𐴝𐴌𐴡𐴌𐴠 𐴕𐴠𐴦𐴓𐴝𐴘𐴊𐴞𐴘𐴝 𐴎𐴝𐴘𐴁𐴡.³²𐴀𐴝𐴣𐴀𐴌𐴠𐴥 𐴎𐴠𐴣𐴃𐴧𐴠𐴥 𐴎𐴡𐴁𐴞𐴕𐴡𐴃𐴧𐴟 𐴖𐴡𐴌𐴠 𐴃𐴟𐴓𐴞𐴤𐴉𐴠𐴓𐴝 𐴎𐴝𐴘𐴁𐴡, 𐴇𐴠𐴥𐴣𐴃𐴧𐴠 𐴃𐴝𐴔𐴝𐴥𐴔 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴝𐴣𐴀𐴌 𐴇𐴝𐴣𐴏𐴠 𐴄𐴝𐴕𐴞 𐴃𐴟𐴓𐴞𐴤𐴉𐴠𐴓𐴝𐴘𐴧𐴟𐴔.“³³𐴈𐴡𐴃𐴝𐴤 𐴇𐴞𐴥𐴀𐴕 𐴓𐴡𐴥𐴘 𐴀𐴞𐴥𐴁𐴝𐴘𐴠 𐴀𐴞𐴐𐴝𐴥𐴌𐴝 𐴊𐴞𐴥𐴘𐴠 𐴊𐴠 𐴑𐴞, 𐴀𐴞𐴥𐴁𐴝 𐴇𐴡𐴕 𐴔𐴡𐴦𐴃𐴠 𐴔𐴡𐴌𐴞𐴁𐴡𐴥.

³⁴𐴔𐴝𐴕𐴟𐴥𐴙𐴐𐴧𐴟𐴥𐴕𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴐𐴡𐴥𐴌𐴞𐴘𐴡𐴃𐴡𐴃𐴧𐴟 𐴉𐴟𐴥𐴙𐴕𐴧𐴞 𐴊𐴠, 𐴔𐴡𐴀𐴏𐴞𐴤 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴃𐴝𐴥𐴑𐴞𐴁𐴡, 𐴃𐴡𐴥𐴘 𐴃𐴟𐴀𐴛 𐴑𐴠𐴀𐴕𐴒𐴡𐴌𐴞 𐴈𐴡𐴀𐴌 𐴊𐴠, ’𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌𐴠 𐴈𐴝𐴥𐴔𐴝𐴈𐴝 𐴖𐴡𐴌𐴠 𐴃𐴟𐴓𐴞𐴤𐴉𐴠𐴓𐴝 𐴎𐴝𐴘𐴁𐴡؟‘𐴇𐴠𐴥 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴀𐴞𐴥𐴁𐴝 𐴇𐴡𐴕؟“

³⁵𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴕𐴟𐴌 𐴃𐴟𐴣𐴀𐴝𐴥𐴌𐴝𐴌 𐴊𐴡𐴌𐴔𐴞𐴘𐴝𐴕𐴡𐴃𐴢 𐴀𐴝𐴌 𐴑𐴠𐴏𐴧𐴟𐴥 𐴀𐴡𐴑𐴃𐴡𐴥 𐴉𐴡𐴙𐴅𐴧𐴡𐴕𐴃𐴡 𐴁𐴠 𐴀𐴝𐴏𐴠𐴤. 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴕𐴟𐴌 𐴃𐴝𐴥𐴑𐴞𐴃𐴠 𐴀𐴝𐴥𐴣𐴍𐴝𐴃𐴢 𐴃𐴝𐴥𐴑𐴡, 𐴀𐴝𐴌𐴕𐴡𐴥𐴘𐴓𐴠 𐴀𐴝𐴕𐴊𐴝𐴤𐴌𐴠 𐴃𐴟𐴣𐴀𐴝𐴥𐴌𐴝𐴌𐴠 𐴁𐴝𐴥𐴌𐴝𐴘𐴎𐴝𐴘𐴁𐴡𐴘. 𐴎𐴠𐴦𐴕𐴞𐴑𐴞 𐴀𐴝𐴕𐴊𐴝𐴤𐴌𐴡𐴃𐴢 𐴀𐴝𐴥𐴣𐴍𐴠, 𐴀𐴞𐴥𐴃𐴠 𐴃𐴡 𐴇𐴡𐴙𐴑𐴧𐴝𐴤 𐴎𐴝𐴦𐴌 𐴇𐴡𐴘 𐴕𐴡 𐴉𐴝𐴌𐴠.³⁶𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴕𐴟𐴌 𐴃𐴝𐴥𐴑𐴞𐴃𐴠 𐴕𐴟𐴌𐴡𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴡𐴤, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴕𐴟𐴌𐴡𐴌 𐴉𐴟𐴀𐴝𐴙𐴕 𐴁𐴡𐴕𐴞𐴎𐴡𐴒𐴡𐴥𐴘.“𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴕𐴝𐴁𐴞𐴐𐴧𐴝𐴥𐴐𐴢
𐴀𐴞𐴏𐴝𐴤𐴘𐴠 𐴈𐴡𐴃𐴝𐴤 𐴇𐴞𐴥𐴀𐴕 𐴈𐴡𐴀𐴘𐴢 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝𐴌 𐴈𐴠𐴥𐴕𐴃𐴟 𐴎𐴝𐴘𐴒𐴡𐴥𐴘 𐴕𐴞𐴎𐴡𐴌𐴠𐴥 𐴀𐴞𐴥𐴃𐴝𐴌𐴝𐴃𐴧𐴟 𐴓𐴟𐴑𐴝𐴘 𐴌𐴝𐴙𐴑𐴧𐴞𐴥𐴓𐴢.³⁷𐴀𐴞𐴥𐴁𐴝𐴘𐴠 𐴀𐴠𐴊𐴟𐴥𐴕 𐴁𐴞𐴐𐴞𐴤 𐴑𐴠𐴌𐴝𐴔𐴡𐴃𐴢 𐴀𐴞𐴥𐴃𐴝𐴌𐴝𐴌 𐴔𐴟𐴀𐴕𐴃𐴟 𐴒𐴡𐴌𐴞𐴥𐴓𐴠 𐴘𐴡, 𐴃𐴡𐴀 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴕𐴟𐴥 𐴀𐴝𐴕𐴠𐴤.³⁸𐴇𐴠𐴥𐴕𐴊𐴞𐴓𐴧𐴝 𐴀𐴠𐴃𐴡𐴓𐴧𐴝𐴤 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴘𐴠𐴏𐴝𐴥𐴘𐴝 𐴕𐴡𐴁𐴞𐴘𐴠 𐴈𐴡𐴀𐴙𐴓𐴢 𐴊𐴠 𐴈𐴡𐴃𐴝𐴤 𐴘𐴝𐴀𐴕 𐴉𐴟𐴌𐴝 𐴀𐴡𐴥,”𐴀𐴡𐴥 𐴔𐴝𐴁𐴟𐴊𐴢, 𐴀𐴝𐴣𐴀𐴌𐴝𐴌 𐴂𐴡𐴘𐴒𐴝𐴔 𐴇𐴡𐴕𐴠 𐴀𐴠𐴑𐴞𐴕 𐴒𐴡𐴙𐴅𐴧𐴠𐴥؟𐴀𐴝𐴦𐴌 𐴔𐴝𐴁𐴟𐴊𐴡𐴌 𐴋𐴟𐴖𐴝𐴥𐴣𐴌 𐴁𐴡𐴓𐴢 𐴇𐴝𐴌 𐴇𐴝𐴣𐴏𐴠 𐴎𐴝𐴇𐴠𐴥𐴌 𐴀𐴡𐴥𐴘𐴧𐴠؟“

³⁹𐴀𐴞𐴥𐴃𐴝𐴌𐴝 𐴀𐴠𐴃𐴡𐴓𐴧𐴝𐴤 𐴁𐴠 𐴀𐴞𐴔𐴝𐴕 𐴀𐴝𐴕𐴞𐴤 𐴕𐴡𐴥 𐴉𐴝𐴌𐴠, 𐴎𐴠𐴕𐴊𐴞𐴓𐴧𐴝 𐴇𐴠𐴥 𐴘𐴠𐴏𐴝𐴥𐴘𐴝𐴘𐴠 𐴀𐴝𐴌𐴡𐴤 𐴈𐴡𐴘𐴧𐴠𐴥, 𐴑𐴞 𐴈𐴡𐴘𐴓𐴠𐴥,⁴⁰”𐴀𐴝𐴓𐴧𐴝𐴘𐴠 𐴀𐴞𐴥𐴃𐴝𐴌𐴝𐴌 𐴏𐴟𐴑 𐴀𐴝𐴣𐴊𐴝𐴤 𐴒𐴡𐴌𐴞𐴥𐴊𐴞𐴘𐴠,𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴊𐴞𐴓𐴢 𐴊𐴡𐴌𐴡𐴤 𐴒𐴡𐴌𐴞𐴥𐴊𐴞𐴘𐴠,𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴏𐴟𐴑𐴠𐴤 𐴕𐴡 𐴊𐴠𐴑𐴠𐴥,𐴊𐴞𐴓𐴠 𐴕𐴡 𐴁𐴟𐴎𐴠𐴥, 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴒𐴡𐴔 𐴒𐴡𐴌𐴞𐴥𐴊𐴞 𐴁𐴡𐴓𐴧𐴝 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴉𐴞𐴥𐴌𐴞 𐴕𐴟 𐴀𐴝𐴘𐴧𐴠𐴤.“

⁴¹𐴘𐴠𐴏𐴝𐴥𐴘𐴝𐴘𐴠 𐴈𐴡𐴃𐴝𐴤 𐴇𐴞𐴥𐴀𐴕 𐴀𐴞𐴏𐴝𐴤𐴌 𐴔𐴡𐴈𐴞𐴥𐴔𐴝 𐴊𐴠𐴑𐴞𐴥 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴈𐴡𐴘𐴁𐴝𐴥𐴐𐴧𐴡𐴃𐴢 𐴈𐴡𐴘𐴧𐴠𐴥 𐴊𐴠.

⁴²𐴃𐴡𐴀 𐴕𐴠𐴃𐴝 𐴀𐴡𐴥𐴑𐴧𐴡𐴓𐴡𐴃𐴧𐴟 𐴐𐴡𐴥𐴀 𐴁𐴡𐴀𐴗𐴃𐴢 𐴎𐴡𐴕𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤, 𐴔𐴡𐴕𐴃𐴡𐴌 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴃𐴝𐴌𐴝𐴌𐴠 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴧𐴟 𐴕𐴠𐴦𐴓𐴝𐴘𐴊𐴞𐴁𐴡 𐴊𐴠 𐴇𐴞𐴥𐴘𐴝𐴕𐴡𐴌 𐴋𐴡𐴦𐴌𐴠 𐴀𐴞𐴥𐴃𐴝𐴌𐴝 𐴇𐴞𐴥𐴘𐴝𐴕 𐴐𐴞𐴥𐴑𐴝𐴌 𐴕𐴡 𐴒𐴡𐴙𐴃𐴧𐴡𐴥;⁴³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴀𐴝𐴓𐴧𐴝𐴃𐴧𐴟 𐴀𐴞𐴎𐴧𐴡𐴃𐴢 𐴉𐴝𐴦𐴌 𐴃𐴟𐴥𐴖𐴝𐴌𐴡 𐴔𐴝𐴕𐴟𐴥𐴙𐴐𐴡𐴃𐴧𐴟 𐴀𐴞𐴎𐴧𐴡𐴃𐴢 𐴉𐴝𐴦 𐴁𐴞𐴐𐴞𐴤 𐴉𐴡𐴏𐴡𐴥𐴕 𐴒𐴡𐴙𐴃𐴧𐴡𐴥.

𐴀𐴞𐴏𐴝𐴤𐴌 𐴈𐴡𐴃𐴝𐴤𐴘𐴠 𐴔𐴝𐴙𐴕𐴐𐴡𐴥𐴌 𐴁𐴞𐴏𐴝𐴌 𐴒𐴡𐴌𐴞𐴥𐴁𐴡

⁴⁴𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤, 𐴘𐴡𐴥𐴒𐴧𐴗𐴝 𐴏𐴞𐴌𐴞𐴥𐴉𐴢 𐴀𐴝𐴣𐴀𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴟𐴁𐴝𐴤𐴌 𐴖𐴡𐴌𐴠 𐴘𐴡𐴥 𐴀𐴝𐴕𐴠𐴤 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠.⁴⁵𐴎𐴠𐴦𐴕𐴞𐴑𐴞 𐴀𐴝𐴣𐴀𐴌𐴠𐴥 𐴊𐴠𐴑𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴀𐴞𐴥𐴁𐴝𐴌𐴠 𐴁𐴠 𐴊𐴠𐴑𐴠𐴥.⁴⁶𐴀𐴝𐴀𐴛 𐴀𐴠 𐴊𐴟𐴕𐴞𐴘𐴝𐴙𐴃𐴢 𐴕𐴟𐴌 𐴀𐴞𐴥𐴏𐴝𐴉𐴠 𐴀𐴝𐴙𐴐𐴧𐴞𐴤, 𐴎𐴠𐴀𐴕𐴠 𐴎𐴠𐴦 𐴑𐴞𐴘𐴠𐴥 𐴀𐴝𐴣𐴀𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤, 𐴘𐴡𐴥𐴒𐴧𐴗𐴝 𐴀𐴝𐴕𐴊𐴝𐴤𐴌𐴡𐴃𐴢 𐴕𐴡 𐴃𐴝𐴥𐴑𐴠.

⁴⁷”𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴀𐴝𐴣𐴀𐴌 𐴈𐴡𐴃𐴝𐴤 𐴉𐴟𐴥𐴕𐴠 𐴔𐴡𐴕𐴃𐴡𐴌 𐴇𐴞𐴥𐴀𐴕 𐴀𐴝𐴔𐴡𐴥𐴓𐴢 𐴕𐴡 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴌 𐴁𐴞𐴏𐴝𐴌 𐴀𐴝𐴀𐴛 𐴕𐴡 𐴒𐴡𐴌𐴞𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴡𐴥𐴌 𐴁𐴞𐴏𐴝𐴌 𐴒𐴡𐴙𐴃𐴧𐴡𐴥 𐴀𐴝𐴙𐴐𐴧𐴞𐴤 𐴊𐴠 𐴕𐴡, 𐴁𐴡𐴥𐴓𐴑𐴠 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴡𐴥𐴌𐴠 𐴁𐴝𐴏𐴝𐴘𐴃𐴡𐴥 𐴀𐴝𐴙𐴐𐴧𐴞𐴤 𐴊𐴠.⁴⁸𐴎𐴠𐴦𐴕𐴞𐴑𐴞 𐴀𐴝𐴣𐴀𐴌𐴠𐴥 𐴀𐴞𐴕𐴑𐴝𐴌 𐴒𐴡𐴌𐴠𐴥 𐴀𐴝𐴦𐴌 𐴀𐴝𐴣𐴀𐴌 𐴈𐴡𐴃𐴝𐴤 𐴑𐴡𐴁𐴟𐴓𐴢 𐴕𐴡 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴌 𐴁𐴞𐴏𐴝𐴌𐴇𐴝𐴌 𐴀𐴝𐴏𐴠𐴤. 𐴎𐴠 𐴈𐴡𐴃𐴝𐴤 𐴀𐴝𐴀𐴛 𐴈𐴡𐴘𐴧𐴞𐴥, 𐴑𐴞𐴘𐴝𐴔𐴡𐴃𐴡𐴌 𐴊𐴞𐴕 𐴇𐴞𐴥𐴀𐴕𐴠 𐴁𐴠 𐴘𐴡𐴥𐴒𐴧𐴗𐴝𐴌 𐴁𐴞𐴏𐴝𐴌 𐴒𐴡𐴌𐴞𐴥𐴁𐴡.⁴⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴕𐴞𐴎𐴡𐴌 𐴃𐴡𐴌𐴉𐴡𐴥𐴃𐴧𐴟 𐴑𐴠𐴏𐴧𐴟𐴥 𐴈𐴡𐴘𐴧𐴞𐴥 𐴊𐴠 𐴕𐴝𐴥𐴘, 𐴔𐴡𐴕𐴃𐴡𐴌 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴇𐴠𐴥 𐴁𐴝𐴉𐴢 𐴕𐴞𐴎𐴠 𐴀𐴝𐴣𐴀𐴌𐴠𐴥 𐴇𐴡𐴥𐴑𐴟𐴔 𐴒𐴡𐴙𐴅𐴧𐴠𐴥 𐴊𐴠, 𐴀𐴝𐴣𐴀𐴃𐴧𐴟 𐴑𐴞𐴦-𐴑𐴞𐴦 𐴈𐴡𐴖𐴝𐴤 𐴉𐴡𐴌𐴞𐴁𐴡𐴥 𐴀𐴝𐴦𐴌 𐴑𐴞𐴦-𐴑𐴞𐴦 𐴁𐴡𐴘𐴧𐴝𐴕 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥.⁵⁰𐴀𐴝𐴀𐴛 𐴎𐴝𐴕𐴞 𐴀𐴞𐴥𐴁𐴝𐴌 𐴇𐴡𐴥𐴑𐴟𐴔𐴠 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞𐴃𐴢 𐴓𐴡𐴘𐴎𐴝; 𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴎𐴞𐴀𐴕 𐴈𐴡𐴀𐴘𐴢 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴁𐴝𐴉𐴠 𐴀𐴝𐴣𐴀𐴌𐴠𐴥 𐴎𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥 𐴇𐴠𐴥𐴕𐴊𐴞𐴓𐴧𐴝 𐴁𐴠 𐴈𐴡𐴀𐴘𐴢.“

The Word for the World International

https://app.library.bible/content/87faca8b51c22590