Read 𐴇𐴞𐴁𐴌𐴝𐴕𐴞𐴀𐴡𐴥𐴓𐴢 13

𐴇𐴞𐴁𐴌𐴝𐴕𐴞𐴀𐴡𐴥𐴓𐴢13

𐴀𐴝𐴓𐴧𐴝𐴌 𐴉𐴡𐴏𐴡𐴥𐴕 𐴇𐴠𐴥𐴊𐴔𐴡𐴃𐴊𐴝𐴌𐴞

¹𐴁𐴝𐴥𐴘𐴧𐴝𐴓𐴞 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴝𐴥𐴃𐴢 𐴃𐴝𐴥𐴑𐴡.²𐴔𐴟𐴏𐴝𐴥𐴉𐴠𐴌 𐴀𐴡𐴥𐴑𐴧𐴡𐴓𐴡𐴌𐴠 𐴔𐴠𐴀𐴔𐴝𐴕𐴊𐴝𐴌𐴞 𐴒𐴡𐴙𐴃𐴧𐴡𐴥 𐴕𐴡 𐴉𐴡𐴀𐴌𐴝𐴘𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴞𐴥 𐴇𐴡𐴊𐴟𐴥𐴕𐴠 𐴀𐴡𐴥𐴃𐴢 𐴕𐴡 𐴉𐴝𐴘 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌𐴠 𐴔𐴠𐴀𐴔𐴝𐴕𐴊𐴝𐴌𐴞 𐴒𐴡𐴙𐴅𐴧𐴠𐴥 𐴊𐴠 𐴘𐴡𐴥 𐴀𐴝𐴏𐴠𐴤.³𐴎𐴞𐴘𐴡𐴥𐴓𐴡𐴌 𐴇𐴡𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴕𐴞𐴎𐴠 𐴎𐴞𐴘𐴡𐴥𐴓𐴡𐴃𐴢 𐴀𐴝𐴏𐴡𐴤 𐴉𐴝𐴥𐴚𐴒𐴡𐴌𐴞 𐴘𐴝𐴦𐴊𐴢 𐴌𐴝𐴙𐴑𐴧𐴡𐴥, 𐴀𐴝𐴦𐴌 𐴁𐴡𐴊𐴏𐴡𐴥𐴓𐴧𐴟𐴑 𐴒𐴡𐴌𐴝𐴥 𐴎𐴝𐴌 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴕𐴞𐴎𐴡𐴌𐴠𐴥 𐴒𐴡𐴌𐴝𐴥 𐴎𐴝𐴌 𐴉𐴝𐴥𐴚𐴒𐴡𐴌𐴞 𐴘𐴝𐴦𐴊𐴢 𐴌𐴝𐴙𐴑𐴧𐴡𐴥.⁴𐴁𐴞𐴘𐴝𐴥𐴐𐴝𐴥𐴊𐴞𐴌𐴠 𐴁𐴠𐴒𐴧𐴟𐴥𐴕𐴠 𐴀𐴞𐴎𐴧𐴡𐴃𐴢 𐴒𐴡𐴙𐴅𐴧𐴡𐴥, 𐴀𐴝𐴦𐴌 𐴎𐴝𐴔𐴝𐴘 𐴁𐴡𐴖𐴢 𐴖𐴡𐴥𐴌 𐴁𐴟𐴥𐴃𐴡𐴌𐴠 𐴔𐴞𐴓𐴔𐴞𐴓𐴝𐴁𐴡𐴌 𐴀𐴞𐴔𐴝𐴕𐴊𐴝𐴌𐴞 𐴌𐴝𐴙𐴑𐴧𐴡𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴃𐴡 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴎𐴠𐴕𐴝𐴤𐴑𐴟𐴌𐴡𐴌 𐴁𐴞𐴏𐴝𐴌 𐴒𐴡𐴌𐴞𐴥 𐴎𐴝𐴘𐴁𐴡.⁵𐴕𐴞𐴎𐴡𐴌 𐴀𐴝𐴊𐴡𐴃𐴡𐴌𐴠 𐴄𐴞𐴛𐴝-𐴉𐴡𐴘𐴐𐴝𐴤𐴌 𐴓𐴝𐴓𐴡𐴥𐴏𐴡𐴃𐴧𐴟 𐴊𐴟𐴌𐴠𐴥 𐴌𐴝𐴙𐴑𐴧𐴡𐴥, 𐴕𐴞𐴎𐴡𐴃𐴧𐴟 𐴎𐴞𐴀𐴕 𐴀𐴝𐴏𐴠𐴤 𐴇𐴞𐴥𐴀𐴕 𐴓𐴡𐴥𐴘 𐴑𐴟𐴥𐴐𐴞 𐴃𐴝𐴥𐴙𐴑𐴧𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴕𐴞𐴎𐴠𐴁𐴝𐴎𐴠 𐴈𐴡𐴘𐴧𐴠𐴥 𐴊𐴠, ”𐴀𐴝𐴀𐴛 𐴃𐴡𐴌𐴠𐴥 𐴁𐴞𐴓𐴑𐴟𐴥𐴓𐴢 𐴉𐴠𐴥𐴓𐴝𐴘 𐴕𐴡 𐴎𐴝𐴘𐴧𐴟𐴔, 𐴀𐴝𐴦𐴌 𐴁𐴞𐴓𐴑𐴟𐴥𐴓𐴢 𐴉𐴞𐴄𐴢 𐴕𐴡 𐴊𐴞𐴘𐴟𐴔.“ ⁶𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌𐴝 𐴇𐴞𐴥𐴔𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴈𐴡𐴀𐴘𐴢 𐴉𐴝𐴌𐴞 𐴊𐴠 𐴑𐴞, ”𐴔𐴝𐴁𐴟𐴊𐴢 𐴀𐴝𐴣𐴀𐴌 𐴔𐴡𐴊𐴡𐴃𐴒𐴝𐴥𐴌; 𐴀𐴝𐴀𐴛 𐴕𐴡 𐴋𐴡𐴦𐴌𐴝𐴘𐴧𐴟𐴥𐴔. 𐴀𐴞𐴕𐴏𐴝𐴥𐴕𐴠 𐴀𐴝𐴣𐴀𐴌𐴠𐴥 𐴑𐴞𐴦 𐴒𐴡𐴌𐴞𐴥 𐴉𐴝𐴌𐴞𐴁𐴡𐴥 𐴊𐴠𐴥؟“

⁷𐴃𐴟𐴣𐴀𐴝𐴥𐴌𐴝𐴌 𐴏𐴡𐴥𐴊𐴧𐴝𐴌 𐴀𐴡𐴥𐴑𐴧𐴡𐴓𐴡𐴌𐴠 𐴘𐴝𐴦𐴊𐴢 𐴌𐴝𐴙𐴑𐴧𐴡𐴥, 𐴎𐴠𐴃𐴝𐴌𐴝𐴤 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴙𐴅𐴧𐴠𐴥; 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴎𐴞𐴕𐴊𐴞𐴒𐴞𐴌 𐴏𐴡𐴓𐴝𐴏𐴡𐴓𐴡𐴌 𐴕𐴡𐴃𐴞𐴎𐴝𐴌 𐴀𐴟𐴎𐴟 𐴑𐴞𐴥𐴘𐴝𐴓𐴢 𐴒𐴡𐴌𐴞𐴥 𐴀𐴞𐴥𐴃𐴝𐴌𐴝𐴌 𐴋𐴡𐴥𐴙𐴓𐴧𐴝 𐴀𐴞𐴔𐴝𐴕 𐴀𐴡𐴓𐴝 𐴀𐴡𐴥𐴘𐴎𐴡𐴒𐴡𐴘.⁸𐴀𐴞𐴏𐴝𐴤 𐴔𐴡𐴀𐴏𐴞𐴤 𐴒𐴠𐴓𐴢 𐴊𐴠 𐴇𐴝𐴙𐴓𐴧𐴝, 𐴀𐴝𐴙𐴅𐴧𐴝, 𐴀𐴠𐴊𐴧𐴠 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴀𐴠𐴑 𐴋𐴡𐴙𐴓𐴧𐴝.⁹𐴋𐴡𐴙𐴓𐴧𐴝 𐴁𐴡𐴋𐴡𐴙𐴓𐴧𐴝 𐴀𐴠𐴊𐴧𐴠 𐴀𐴡𐴏𐴞𐴕 𐴃𐴝𐴦𐴓𐴞𐴔𐴠 𐴀𐴞𐴑𐴧𐴝𐴤 𐴀𐴟𐴙𐴑𐴧𐴝𐴤 𐴀𐴡𐴥𐴘 𐴕𐴡 𐴎𐴝𐴘𐴡𐴒𐴡𐴥𐴘; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴝𐴥𐴓𐴝 𐴀𐴡𐴥𐴙𐴓𐴊𐴠, 𐴊𐴞𐴓𐴢 𐴈𐴝𐴥𐴕𐴝𐴘𐴠 𐴕𐴡 𐴁𐴡𐴥𐴓𐴑𐴠 𐴌𐴝𐴇𐴝𐴥𐴔𐴡𐴃𐴠 𐴁𐴠 𐴔𐴡𐴎𐴁𐴟𐴃𐴢 𐴃𐴝𐴥𐴑𐴡𐴕; 𐴈𐴝𐴥𐴕𐴝 𐴓𐴡𐴥𐴘 𐴁𐴞𐴌𐴝𐴕𐴝 𐴀𐴡𐴥𐴘𐴧𐴝 𐴀𐴡𐴥𐴑𐴧𐴡𐴓𐴠 𐴃𐴡 𐴑𐴠𐴏𐴧𐴟𐴥 𐴉𐴝𐴥𐴘𐴊𐴝 𐴉𐴝𐴘𐴧𐴠𐴥 𐴊𐴠 𐴕𐴝𐴥𐴘.¹⁰𐴀𐴝𐴣𐴀𐴌𐴝𐴃𐴧𐴟 𐴀𐴠𐴑𐴧𐴝𐴥𐴕 𐴀𐴠𐴕𐴊𐴞𐴓𐴧𐴝 𐴑𐴟𐴌𐴁𐴝𐴕𐴞-𐴒𐴝𐴥𐴣 𐴀𐴝𐴏𐴠𐴤, 𐴎𐴞𐴘𐴝𐴥𐴕𐴡𐴃𐴧𐴟 𐴄𐴝𐴔𐴁𐴟𐴌 𐴇𐴠𐴥𐴊𐴔𐴡𐴃𐴢-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴠 𐴑𐴠𐴏𐴧𐴟𐴥 𐴈𐴝𐴥𐴘𐴁𐴝𐴌 𐴇𐴡𐴥𐴑 𐴕𐴝𐴥𐴘.¹¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠 𐴅𐴝𐴕𐴟𐴖𐴝𐴌 𐴀𐴡𐴥𐴑𐴧𐴡𐴓𐴡𐴌 𐴓𐴡𐴖𐴢 𐴁𐴡𐴌𐴡 𐴀𐴞𐴔𐴝𐴔𐴠 𐴀𐴠𐴁𐴧𐴠 𐴂𐴝𐴑 𐴎𐴝𐴒𐴝𐴃𐴢 𐴒𐴟𐴕𐴝𐴤𐴌 𐴑𐴟𐴌𐴁𐴝𐴕𐴞 𐴊𐴞 𐴁𐴡𐴓𐴧𐴝 𐴓𐴡𐴘𐴎𐴝, 𐴇𐴞𐴥𐴀𐴕𐴡𐴌 𐴅𐴞𐴏𐴞𐴥𐴔𐴡𐴌𐴠 𐴑𐴠𐴔𐴉𐴡𐴥𐴌 𐴁𐴝𐴀𐴌𐴠 𐴁𐴠 𐴉𐴟𐴌𐴝𐴃𐴢 𐴊𐴞𐴉𐴠𐴥𐴓𐴝 𐴎𐴝𐴘𐴃𐴡.¹²𐴇𐴠𐴥𐴃𐴡𐴓𐴧𐴝 𐴃𐴡 𐴀𐴞𐴏𐴝𐴤𐴘𐴠 𐴘𐴡𐴥 𐴐𐴡𐴥𐴀𐴌𐴡𐴌 𐴒𐴠𐴘𐴍𐴡𐴌 𐴁𐴝𐴀𐴌𐴠 𐴊𐴟𐴑-𐴎𐴟𐴓𐴟𐴥𐴔 𐴉𐴝𐴀𐴙𐴓𐴢, 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴕𐴞𐴎𐴡𐴌 𐴓𐴡𐴖𐴢 𐴖𐴠𐴥 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴞𐴥 𐴁𐴡𐴓𐴧𐴝.¹³𐴇𐴠𐴥𐴃𐴡𐴓𐴧𐴝, 𐴀𐴝𐴘𐴧𐴡𐴤, 𐴀𐴞𐴥𐴁𐴝𐴌 𐴁𐴠𐴀𐴞𐴎𐴧𐴡𐴃𐴞𐴌𐴠 𐴕𐴞𐴎𐴡𐴌 𐴖𐴡𐴌𐴠 𐴓𐴡𐴘𐴧𐴡𐴌𐴠 𐴀𐴝𐴣𐴀𐴌𐴝 𐴑𐴠𐴔𐴉𐴡𐴥𐴌 𐴁𐴝𐴀𐴌𐴠 𐴀𐴞𐴥𐴁𐴝𐴌 𐴇𐴠𐴥𐴍𐴠 𐴎𐴝𐴘.¹⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴠𐴍𐴠𐴥 𐴃𐴡 𐴀𐴝𐴣𐴀𐴌𐴝𐴃𐴧𐴟 𐴄𐴞𐴑𐴞 𐴃𐴝𐴥𐴑𐴠 𐴊𐴠 𐴐𐴡𐴥𐴀𐴌 𐴕𐴝𐴥𐴘, 𐴁𐴡𐴥𐴓𐴑𐴠 𐴀𐴝𐴣𐴀𐴌𐴝 𐴀𐴝𐴘𐴁𐴝𐴤𐴌 𐴀𐴝𐴏𐴠𐴤 𐴊𐴠 𐴐𐴡𐴥𐴀𐴌𐴡𐴌 𐴃𐴝𐴓𐴝𐴐𐴡𐴃𐴢 𐴁𐴠 𐴀𐴝𐴏𐴞𐴤.

¹⁵𐴇𐴠𐴥𐴃𐴡𐴓𐴧𐴝, 𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴀𐴞𐴏𐴝𐴤𐴌 𐴊𐴟𐴖𐴝𐴌𐴝 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴓𐴝𐴒𐴝𐴃𐴝𐴌 𐴃𐴝𐴦𐴌𐴞𐴉𐴡𐴌 𐴑𐴟𐴌𐴁𐴝𐴕𐴞 𐴂𐴠𐴦𐴐𐴢 𐴒𐴡𐴌𐴞𐴥, 𐴘𐴝𐴥𐴕𐴞 𐴀𐴝𐴣𐴀𐴌𐴝𐴌 𐴊𐴟𐴘 𐴀𐴟𐴣𐴄𐴠𐴥 𐴀𐴞𐴥𐴁𐴝𐴌 𐴕𐴝𐴔𐴡𐴌 𐴑𐴟𐴥𐴓𐴝𐴏𐴝 𐴃𐴝𐴦𐴌𐴞𐴉𐴢 𐴒𐴡𐴌𐴠𐴥 𐴊𐴠 𐴒𐴟𐴓𐴝𐴒𐴝𐴓𐴝 𐴊𐴡𐴥𐴌𐴝𐴘.¹⁶𐴀𐴝𐴦𐴌 𐴁𐴝𐴥𐴓𐴝𐴘 𐴒𐴡𐴙𐴃𐴧𐴡𐴥 𐴀𐴠𐴊𐴧𐴠 𐴊𐴝𐴕-𐴏𐴡𐴥𐴃𐴑𐴝 𐴊𐴞𐴦𐴃𐴡 𐴕𐴡 𐴉𐴡𐴀𐴌𐴝𐴘𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥𐴕𐴊𐴞𐴓𐴧𐴝 𐴑𐴟𐴌𐴁𐴝𐴕𐴞 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴀𐴝𐴓𐴧𐴝 𐴑𐴟𐴥𐴐𐴞 𐴀𐴡𐴥.

¹⁷𐴃𐴟𐴣𐴀𐴝𐴥𐴌𐴝𐴌 𐴏𐴡𐴥𐴊𐴧𐴝𐴌 𐴀𐴡𐴥𐴑𐴧𐴡𐴓𐴡𐴌 𐴈𐴡𐴃𐴝𐴤 𐴔𐴝𐴕𐴞𐴘𐴡𐴥, 𐴀𐴠𐴊𐴧𐴠 𐴕𐴞𐴎𐴡𐴌𐴠𐴥 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴞𐴘𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴎𐴝𐴕𐴡𐴌𐴠 𐴀𐴟𐴘𐴃𐴝𐴌𐴝𐴤𐴌 𐴋𐴡𐴥𐴙𐴓𐴧𐴝 𐴉𐴝𐴀𐴌𐴝 𐴊𐴞𐴥 𐴌𐴝𐴑𐴠𐴥 𐴎𐴠𐴃𐴝𐴌𐴝𐴤𐴃𐴧𐴟 𐴀𐴞𐴥𐴏𐴝𐴉𐴢 𐴊𐴞𐴥𐴘𐴝 𐴉𐴡𐴌𐴞𐴁𐴡𐴥. 𐴇𐴠𐴥𐴕𐴊𐴞𐴓𐴧𐴝 𐴀𐴠𐴃𐴡𐴓𐴧𐴝𐴤 𐴒𐴡𐴙𐴅𐴧𐴡𐴥, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴈𐴝𐴔 𐴇𐴞𐴥𐴘𐴝𐴕 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴒𐴡𐴌𐴠𐴥, 𐴊𐴟𐴑𐴧𐴠𐴥 𐴕𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴊𐴟𐴑𐴧𐴠𐴥 𐴒𐴡𐴙𐴓𐴧𐴠𐴥 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴇𐴡𐴕𐴡𐴤 𐴉𐴝𐴥𐴘𐴊𐴝 𐴕𐴡 𐴀𐴡𐴥𐴘𐴁𐴡.

¹⁸𐴀𐴝𐴣𐴀𐴌𐴝𐴓𐴧𐴝 𐴊𐴟𐴖𐴝 𐴒𐴡𐴙𐴅𐴧𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝𐴃𐴧𐴟 𐴀𐴠𐴑𐴞𐴕 𐴀𐴝𐴏𐴠𐴤 𐴊𐴠, 𐴀𐴝𐴣𐴀𐴌𐴝𐴌 𐴊𐴞𐴓𐴢 𐴏𐴝𐴥𐴉𐴢, 𐴀𐴝𐴣𐴀𐴌𐴝 𐴇𐴝𐴥𐴀𐴌 𐴑𐴠𐴏𐴧𐴟𐴥𐴃𐴢 𐴇𐴡𐴥𐴑 𐴉𐴡𐴣𐴃𐴠𐴥 𐴏𐴡𐴓𐴞𐴃𐴡𐴥 𐴏𐴝𐴥𐴘.¹⁹𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴝𐴥𐴀𐴏𐴒𐴡𐴌𐴞 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴞𐴥𐴌, 𐴃𐴟𐴣𐴀𐴝𐴥𐴌𐴝 𐴊𐴟𐴖𐴝 𐴒𐴡𐴌𐴞𐴥𐴁𐴝 𐴊𐴠, 𐴀𐴝𐴀𐴛 𐴎𐴠𐴕 𐴇𐴝𐴥𐴌𐴝 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴝𐴁𐴝𐴌 𐴀𐴝𐴀𐴘𐴢 𐴉𐴝𐴌𐴞.

𐴊𐴟𐴖𐴝 𐴊𐴞𐴘𐴝 𐴀𐴠𐴊𐴧𐴠 𐴀𐴝𐴇𐴠𐴥𐴌𐴞 𐴈𐴡𐴃𐴝𐴤

²⁰𐴘𐴝𐴓𐴝, 𐴐𐴝𐴥𐴕𐴃𐴞 𐴊𐴡𐴦𐴘𐴝 𐴀𐴝𐴓𐴧𐴝 𐴎𐴞𐴁𐴝𐴤𐴘𐴠 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴞 𐴌𐴝𐴎𐴞𐴕𐴝𐴔𐴝𐴌 𐴓𐴡𐴖𐴢 𐴖𐴡𐴥𐴌 𐴀𐴟𐴏𐴞𐴥𐴓𐴝𐴘𐴠 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥, 𐴘𐴝𐴥𐴕𐴞 𐴁𐴠𐴥𐴌𐴝𐴏𐴡𐴥𐴀𐴓𐴢 𐴏𐴡𐴌𐴡𐴘𐴝 𐴋𐴡𐴣𐴀𐴌𐴒𐴗𐴝𐴥 𐴌𐴠,²¹𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴇𐴝𐴥𐴀𐴌 𐴒𐴡𐴔 𐴈𐴝𐴔𐴡𐴃𐴢 𐴇𐴝𐴥𐴄𐴞 𐴁𐴝𐴕𐴡𐴗𐴑, 𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴒𐴡𐴌𐴞𐴥 𐴁𐴡𐴓𐴧𐴝; 𐴀𐴝𐴦𐴌 𐴎𐴞𐴘𐴝𐴥𐴕 𐴓𐴡𐴥𐴘 𐴀𐴞𐴥𐴁𐴝 𐴑𐴟𐴥𐴐𐴞 𐴀𐴡𐴥 𐴇𐴞𐴥𐴘𐴝𐴕 𐴀𐴝𐴣𐴀𐴌𐴝𐴌 𐴁𐴟𐴥𐴃𐴡𐴌𐴠 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴊𐴟𐴖𐴝𐴌𐴝 𐴒𐴡𐴌𐴡𐴥𐴗𐴑, 𐴎𐴞𐴁𐴝𐴤𐴌 𐴃𐴝𐴦𐴌𐴞𐴉𐴢 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴉𐴡𐴙𐴅𐴧𐴡𐴕𐴃𐴡 𐴇𐴝𐴥𐴔𐴞𐴐𐴝 𐴀𐴡𐴥𐴖𐴝𐴃𐴢 𐴃𐴝𐴥𐴑𐴠. 𐴀𐴝𐴦𐴔𐴞𐴕.

²²𐴀𐴡𐴥 𐴁𐴝𐴥𐴘𐴁𐴡𐴘𐴕𐴝𐴥𐴙𐴕, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴁𐴠𐴐𐴝𐴤𐴁𐴞𐴐𐴞𐴤 𐴀𐴝𐴌𐴡𐴏𐴢 𐴒𐴡𐴌𐴞𐴥𐴌, 𐴏𐴡𐴁𐴡𐴥𐴌𐴡𐴌 𐴏𐴝𐴥𐴀𐴣𐴃𐴠 𐴀𐴠 𐴕𐴡𐴏𐴞𐴥𐴘𐴡𐴃𐴞 𐴈𐴡𐴃𐴝𐴤 𐴒𐴟𐴥𐴕 𐴉𐴟𐴥𐴕𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴁𐴝𐴙𐴄𐴧𐴝𐴥𐴃𐴢 𐴓𐴠𐴑𐴞𐴥𐴉𐴠𐴓𐴝𐴘𐴞.²³𐴃𐴟𐴣𐴀𐴝𐴥𐴌𐴝𐴌𐴠 𐴎𐴝𐴕𐴝𐴘𐴊𐴞𐴌, 𐴀𐴝𐴣𐴀𐴌𐴝𐴌 𐴁𐴝𐴥𐴘 𐴃𐴞𐴔𐴡𐴥𐴃𐴞 𐴎𐴞𐴘𐴡𐴥𐴓𐴡𐴃𐴧𐴟 𐴇𐴝𐴥𐴓𐴝𐴏𐴢 𐴀𐴡𐴥𐴘𐴒𐴞𐴘𐴡𐴘; 𐴘𐴡𐴥𐴒𐴧𐴗𐴝 𐴇𐴝𐴥𐴌𐴝 𐴉𐴡𐴀𐴣𐴏𐴞𐴓𐴠, 𐴀𐴝𐴀𐴛 𐴘𐴡𐴥𐴒𐴧𐴗𐴝𐴌𐴠 𐴉𐴟𐴥𐴖𐴝𐴣𐴃𐴞 𐴓𐴡𐴦𐴘𐴢 𐴃𐴟𐴣𐴀𐴝𐴥𐴌𐴝𐴌𐴠 𐴏𐴝𐴘𐴃𐴡𐴥 𐴀𐴝𐴙𐴐𐴧𐴟𐴤𐴔.²⁴𐴃𐴟𐴣𐴀𐴝𐴥𐴌𐴝𐴌 𐴃𐴝𐴔𐴝𐴥𐴔 𐴏𐴡𐴥𐴊𐴧𐴝𐴌 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴊𐴧𐴠 𐴂𐴝𐴑 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴏𐴡𐴥𐴓𐴝𐴔 𐴊𐴞𐴥𐴘𐴞 𐴈𐴡𐴘𐴧𐴡𐴥. 𐴀𐴞𐴄𐴝𐴓𐴞𐴌 𐴒𐴟𐴥𐴕𐴠 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴓𐴝𐴔 𐴎𐴝𐴕𐴝𐴌.

²⁵𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕𐴡𐴌 𐴖𐴡𐴌𐴠 𐴌𐴝𐴇𐴝𐴥𐴔𐴡𐴃𐴢 𐴎𐴝𐴌𐴞 𐴃𐴝𐴥𐴑𐴡𐴗𐴑.

The Word for the World International

https://app.library.bible/content/87faca8b51c22590