Read 𐴇𐴞𐴁𐴌𐴝𐴕𐴞𐴀𐴡𐴥𐴓𐴢 12

𐴇𐴞𐴁𐴌𐴝𐴕𐴞𐴀𐴡𐴥𐴓𐴢12

𐴔𐴝𐴁𐴟𐴊𐴡𐴌 𐴃𐴡𐴌𐴁𐴞𐴘𐴡𐴃𐴢

¹𐴇𐴠𐴥𐴃𐴡𐴓𐴧𐴝, 𐴀𐴝𐴣𐴀𐴌𐴝𐴃𐴧𐴟 𐴎𐴠𐴃𐴧𐴡𐴥𐴃𐴢 𐴀𐴠𐴑𐴧𐴝𐴥𐴕 𐴋𐴡𐴣𐴀𐴌 𐴔𐴞𐴘𐴟𐴥𐴓𐴝𐴌 𐴋𐴡𐴥𐴙𐴓𐴧𐴝 𐴀𐴝𐴣𐴀𐴌𐴝𐴌 𐴏𐴝𐴘𐴌𐴡𐴥𐴑𐴟𐴓𐴃𐴟 𐴒𐴡𐴁𐴝𐴤 𐴀𐴡𐴥𐴑𐴧𐴡𐴓𐴢 𐴀𐴝𐴏𐴠𐴤, 𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴘𐴡𐴥 𐴇𐴝𐴥𐴀𐴌 𐴉𐴟𐴣𐴎𐴝𐴤𐴌𐴠 𐴀𐴠𐴊𐴧𐴠 𐴀𐴝𐴏𐴝𐴤𐴕𐴡𐴌 𐴏𐴝𐴥𐴀𐴣𐴃𐴠 𐴉𐴝𐴥𐴕𐴡𐴃𐴢 𐴉𐴠𐴥𐴓𐴝 𐴊𐴠 𐴒𐴟𐴕𐴝𐴤𐴌𐴠 𐴊𐴟𐴌 𐴒𐴡𐴌𐴞𐴥𐴉𐴠𐴓𐴝𐴘𐴧𐴡𐴌𐴠, 𐴎𐴠 𐴎𐴞𐴁𐴧𐴝𐴃𐴢 𐴀𐴝𐴣𐴀𐴌𐴝𐴌 𐴔𐴟𐴀𐴔𐴧𐴞𐴑𐴧𐴝 𐴄𐴞𐴥𐴑 𐴒𐴡𐴌𐴝𐴥 𐴒𐴞𐴥𐴘𐴠 𐴘𐴞𐴥𐴁𐴝𐴃𐴢 𐴏𐴡𐴁𐴡𐴥𐴌𐴠 𐴊𐴟𐴣𐴌𐴝𐴃𐴢 𐴃𐴝𐴥𐴑𐴞,²𐴕𐴡𐴎𐴡𐴌 𐴀𐴞𐴏𐴝𐴤𐴌 𐴇𐴞𐴥𐴑𐴧𐴝 𐴌𐴝𐴑𐴞𐴥𐴘𐴡𐴌𐴠, 𐴎𐴞𐴁𐴝𐴤 𐴀𐴡𐴥𐴙𐴓𐴊𐴠 𐴀𐴞𐴔𐴝𐴕𐴡𐴌 𐴁𐴝𐴕𐴞 𐴀𐴠𐴊𐴧𐴠 𐴇𐴝𐴥𐴄𐴞-𐴒𐴡𐴌𐴡𐴤𐴘𐴝, 𐴎𐴞𐴁𐴝𐴤𐴘𐴠 𐴕𐴞𐴎𐴡𐴌 𐴔𐴟𐴀𐴔𐴧𐴞𐴑𐴧𐴝 𐴄𐴞𐴥𐴑 𐴒𐴡𐴌𐴝𐴥 𐴒𐴞𐴥𐴀𐴓𐴢 𐴊𐴠 𐴑𐴟𐴥𐴐𐴞𐴓𐴧𐴝, 𐴐𐴡𐴥𐴌𐴔𐴡𐴌 𐴇𐴞𐴥𐴑𐴧𐴝 𐴕𐴡 𐴏𐴝𐴀𐴘𐴢 𐴑𐴟𐴥𐴌𐴟𐴐𐴡𐴌 𐴊𐴟𐴑 𐴁𐴡𐴌𐴊𐴝𐴐𐴢 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴘𐴝𐴓𐴝 𐴀𐴝𐴓𐴧𐴝𐴌 𐴃𐴡𐴑𐴃𐴡𐴥𐴌 𐴊𐴠𐴕 𐴋𐴝𐴥𐴑𐴠 𐴁𐴡𐴀𐴘𐴢 𐴃𐴝𐴥𐴙𐴑𐴧𐴠.³𐴀𐴞𐴥𐴁𐴝 𐴎𐴞𐴁𐴝𐴤𐴘𐴠 𐴕𐴞𐴑𐴞 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴡𐴃𐴧𐴟 𐴇𐴠𐴥𐴕𐴊𐴞𐴓𐴧𐴝 𐴊𐴟𐴐𐴧𐴡𐴕𐴞 𐴐𐴡𐴥𐴀𐴘𐴧𐴠, 𐴀𐴞𐴥𐴁𐴝𐴌 𐴇𐴝𐴥𐴓𐴡𐴃𐴢 𐴁𐴝𐴥𐴉𐴞𐴏𐴡, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴢 𐴑𐴡𐴔𐴎𐴟𐴌 𐴕𐴡 𐴀𐴝𐴦𐴌 𐴇𐴞𐴥𐴔𐴧𐴡𐴃𐴢 𐴕𐴝 𐴇𐴝𐴥𐴌𐴡.⁴𐴒𐴟𐴕𐴝𐴤 𐴓𐴡𐴥𐴘 𐴓𐴝𐴌𐴝𐴥𐴘 𐴒𐴡𐴌𐴞𐴥 𐴃𐴟𐴣𐴀𐴝𐴥𐴌𐴝𐴃𐴧𐴟 𐴃𐴡 𐴀𐴝𐴙𐴅𐴧𐴡𐴤 𐴕𐴞𐴎𐴡𐴌 𐴓𐴡𐴖𐴢 𐴁𐴝𐴥𐴐𐴝 𐴊𐴠 𐴇𐴠𐴥𐴊𐴧𐴟𐴌 𐴔𐴟𐴑𐴝𐴁𐴠𐴓𐴝 𐴒𐴡𐴌𐴝𐴥 𐴕𐴡𐴥 𐴉𐴡𐴌𐴠;⁵𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴀𐴡 𐴕𐴡𐴏𐴞𐴥𐴘𐴡𐴃𐴡𐴌𐴠 𐴉𐴡𐴀𐴌𐴝𐴘𐴉𐴠𐴓𐴝𐴘𐴧𐴡, 𐴎𐴞𐴘𐴝𐴥𐴕 𐴃𐴟𐴣𐴀𐴝𐴥𐴌𐴝𐴌𐴠 𐴉𐴟𐴀𐴝𐴙𐴕 𐴊𐴡𐴌𐴠 𐴒𐴡𐴌𐴠𐴥 𐴉𐴝𐴥𐴕 𐴒𐴡𐴌𐴝𐴥 𐴒𐴞𐴥𐴘𐴠, 𐴑𐴞 𐴈𐴡𐴘𐴓𐴠𐴥, ”𐴀𐴡𐴥 𐴀𐴝𐴣𐴀𐴌 𐴉𐴟𐴖𐴝, 𐴔𐴝𐴁𐴟𐴊𐴡𐴌 𐴃𐴡𐴌𐴁𐴞𐴘𐴡𐴃𐴡𐴌𐴠 𐴀𐴠𐴥𐴐𐴑𐴝𐴌𐴝 𐴕𐴡 𐴒𐴡𐴌𐴞𐴥𐴐𐴢, 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴃𐴡𐴌𐴠𐴥 𐴁𐴡𐴥𐴄𐴁𐴡𐴍𐴝𐴥𐴘𐴓𐴠 𐴔𐴡𐴕 𐴐𐴡𐴥𐴣𐴍𐴡 𐴕𐴡 𐴒𐴡𐴌𐴞𐴥𐴐𐴢,⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴁𐴟𐴊𐴠 𐴎𐴝𐴌𐴠𐴥 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥 𐴀𐴞𐴥𐴃𐴝𐴌𐴠 𐴁𐴠 𐴃𐴡𐴌𐴁𐴞𐴘𐴡𐴃𐴢 𐴒𐴡𐴌𐴠𐴥, 𐴀𐴝𐴦𐴌 𐴎𐴝𐴌𐴠𐴥 𐴀𐴞𐴥𐴁𐴝𐴘𐴠 𐴉𐴟𐴖𐴝 𐴀𐴞𐴥𐴏𐴝𐴉𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥 𐴀𐴞𐴥𐴃𐴝𐴌𐴠 𐴁𐴠 𐴀𐴟𐴎𐴟 𐴒𐴡𐴌𐴠𐴥.“

⁷𐴃𐴟𐴣𐴀𐴝𐴥𐴌𐴝 𐴎𐴠 𐴊𐴟𐴑 𐴁𐴡𐴌𐴊𐴝𐴐𐴢 𐴒𐴡𐴌𐴡𐴤 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝𐴌 𐴃𐴡𐴌𐴁𐴞𐴘𐴡𐴃𐴢 𐴀𐴡𐴓𐴧𐴝; 𐴀𐴝𐴓𐴧𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴉𐴟𐴀𐴝𐴙𐴕 𐴀𐴞𐴥𐴏𐴝𐴉𐴠 𐴁𐴠 𐴏𐴡𐴥𐴓𐴧𐴟𐴑 𐴒𐴡𐴌𐴠𐴥𐴌. 𐴀𐴠𐴕𐴊𐴞𐴓𐴧𐴝 𐴇𐴡𐴕𐴡𐴤 𐴉𐴟𐴖𐴝 𐴀𐴝𐴏𐴠𐴤 𐴕𐴠𐴥 𐴎𐴝𐴌𐴠𐴥 𐴁𐴝𐴉𐴠 𐴃𐴡𐴌𐴁𐴞𐴘𐴡𐴃𐴢 𐴕𐴡 𐴒𐴡𐴌𐴠𐴥 𐴊𐴠𐴥؟⁸𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴃𐴡𐴌𐴁𐴞𐴘𐴡𐴃𐴢 𐴕𐴡 𐴉𐴡𐴦, 𐴎𐴞𐴘𐴝𐴥𐴕𐴡𐴃𐴢 𐴁𐴠𐴒𐴧𐴟𐴥𐴕 𐴐𐴡𐴥𐴌𐴞𐴑 𐴀𐴝𐴏𐴠𐴤, 𐴃𐴡𐴥𐴀𐴘𐴓𐴠 𐴃𐴡 𐴃𐴟𐴣𐴀𐴝𐴥𐴌𐴝 𐴎𐴡𐴌𐴝 𐴉𐴟𐴀𐴝𐴙𐴕, 𐴏𐴡𐴥𐴘𐴧𐴞 𐴉𐴟𐴀𐴝𐴙𐴕 𐴕𐴡.⁹𐴀𐴝𐴌𐴡𐴤 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥, 𐴀𐴝𐴣𐴀𐴌𐴝𐴃𐴧𐴟 𐴀𐴝𐴣𐴀𐴌𐴝𐴌𐴠 𐴃𐴡𐴌𐴁𐴞𐴘𐴡𐴃𐴢 𐴒𐴡𐴙𐴃𐴧𐴡𐴥 𐴊𐴠 𐴀𐴞𐴕𐴏𐴝𐴥𐴕𐴞 𐴁𐴝𐴉𐴢 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴀𐴝𐴣𐴀𐴌𐴝 𐴀𐴞𐴥𐴃𐴝𐴌𐴝𐴌𐴠 𐴀𐴞𐴎𐴧𐴡𐴃𐴢 𐴒𐴡𐴙𐴃𐴧𐴝𐴥𐴔. 𐴃𐴡𐴥𐴘 𐴀𐴝𐴣𐴀𐴌𐴝𐴃𐴧𐴟 𐴌𐴟𐴀𐴈𐴝𐴥𐴕𐴞𐴌 𐴁𐴝𐴉𐴡𐴌 𐴃𐴡𐴌𐴁𐴞𐴘𐴡𐴃𐴡𐴃𐴢 𐴕𐴞𐴎𐴡𐴌𐴠𐴥 𐴒𐴡𐴏𐴝𐴥𐴘𐴊𐴡𐴕 𐴀𐴝𐴌𐴡𐴤 𐴁𐴞𐴐𐴞𐴤 𐴎𐴡𐴌𐴟𐴌𐴞 𐴕𐴡 𐴕𐴠𐴥, 𐴎𐴠𐴀𐴕𐴠 𐴀𐴝𐴣𐴀𐴌𐴝 𐴎𐴞𐴕𐴊𐴞𐴒𐴞 𐴉𐴝𐴘؟¹⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴁𐴟𐴎𐴝𐴥 𐴔𐴡𐴎𐴞𐴕 𐴀𐴝𐴣𐴀𐴌𐴝𐴌𐴠 𐴑𐴠𐴏𐴧𐴟𐴥 𐴊𐴞𐴕𐴡𐴓𐴧𐴝 𐴀𐴠𐴥𐴕𐴝 𐴃𐴡𐴌𐴁𐴞𐴘𐴡𐴃𐴢 𐴒𐴡𐴙𐴃𐴧𐴡𐴥, 𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴝𐴌𐴠 𐴀𐴝𐴣𐴀𐴌𐴝𐴌 𐴁𐴝𐴥𐴓𐴝𐴘 𐴓𐴧𐴝 𐴁𐴠 𐴃𐴡𐴌𐴁𐴞𐴘𐴡𐴃𐴢 𐴒𐴡𐴌𐴠𐴥, 𐴎𐴠𐴀𐴕𐴠 𐴀𐴝𐴣𐴀𐴌𐴝 𐴀𐴞𐴥𐴁𐴝𐴌 𐴂𐴝𐴑𐴞𐴌 𐴁𐴝𐴥𐴒𐴞 𐴀𐴡𐴥𐴘𐴎𐴝𐴘𐴒𐴡𐴘.¹¹𐴇𐴡𐴕𐴡𐴤 𐴃𐴡𐴌𐴁𐴞𐴘𐴡𐴃𐴡𐴌𐴠 𐴒𐴡𐴌𐴠𐴥 𐴊𐴠 𐴇𐴠𐴥𐴣𐴃𐴧𐴠 𐴑𐴟𐴥𐴐𐴞 𐴓𐴝𐴒𐴠 𐴊𐴠 𐴕𐴝𐴥𐴘, 𐴁𐴡𐴥𐴓𐴑𐴠 𐴊𐴟𐴑 𐴁𐴠 𐴓𐴝𐴒𐴠; 𐴔𐴡𐴕𐴃𐴡𐴌 𐴎𐴠𐴃𐴝𐴌𐴝𐴤 𐴇𐴞𐴥𐴀𐴕 𐴔𐴝𐴕𐴞-𐴔𐴝𐴕𐴞 𐴑𐴟𐴖𐴝𐴐𐴢 𐴀𐴡𐴥𐴘𐴎𐴝𐴒𐴡𐴘, 𐴀𐴞𐴥𐴃𐴝𐴌𐴝𐴓𐴧𐴝 𐴇𐴞𐴥𐴀𐴕𐴠 𐴉𐴡𐴌𐴠 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴐𐴝𐴥𐴕𐴃𐴞 𐴀𐴡𐴓𐴝 𐴉𐴡𐴥𐴏𐴡𐴓𐴢 𐴊𐴡𐴥𐴌𐴝.

¹²𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴓𐴟𐴃𐴝 𐴀𐴝𐴥𐴃𐴡𐴌𐴠 𐴀𐴠𐴊𐴧𐴠 𐴑𐴡𐴔𐴎𐴟𐴌 𐴀𐴝𐴣𐴍𐴟𐴥𐴌𐴠 𐴔𐴡𐴎𐴁𐴟𐴃𐴢 𐴒𐴡𐴌𐴡𐴤,¹³𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴄𐴠𐴥𐴚𐴡𐴓𐴧𐴝 𐴀𐴟𐴎𐴟 𐴌𐴝𐴏𐴃𐴝 𐴁𐴝𐴕𐴡, 𐴎𐴠𐴀𐴕𐴠 𐴓𐴠𐴚 𐴄𐴠𐴥𐴚 𐴔𐴝𐴎𐴟𐴌 𐴕𐴡 𐴀𐴡𐴥, 𐴁𐴡𐴥𐴓𐴑𐴠 𐴒𐴡𐴔 𐴀𐴡𐴥𐴘𐴎𐴝𐴒𐴡𐴘.

𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴡𐴌𐴠 𐴀𐴞𐴕𐴑𐴝𐴌 𐴒𐴡𐴌𐴝𐴥𐴌 𐴀𐴟𐴥𐴣𐴐𐴞𐴘𐴝𐴌𐴞

¹⁴𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕 𐴓𐴡𐴥𐴘 𐴐𐴝𐴥𐴕𐴃𐴞𐴃𐴢 𐴃𐴝𐴥𐴑𐴞𐴁𐴝𐴌, 𐴀𐴝𐴦𐴌 𐴂𐴝𐴑 𐴀𐴡𐴥𐴘𐴁𐴝𐴌 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴡𐴥, 𐴂𐴝𐴑 𐴕𐴡 𐴀𐴡𐴥𐴘𐴓𐴠 𐴃𐴡 𐴇𐴡𐴕𐴡𐴤𐴑𐴞𐴘𐴠 𐴔𐴝𐴓𐴞𐴑𐴡𐴌𐴠 𐴕𐴡 𐴊𐴠𐴑𐴞𐴥𐴁𐴡.¹⁵𐴏𐴝𐴘𐴧𐴡𐴥, 𐴇𐴡𐴕𐴡𐴤𐴑𐴞𐴘𐴠 𐴎𐴠𐴕 𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴡𐴃𐴧𐴟 𐴔𐴝𐴀𐴌𐴟𐴔 𐴕𐴡 𐴀𐴡𐴥; 𐴇𐴡𐴕𐴡𐴤 𐴎𐴡𐴇𐴡𐴥𐴌-𐴃𐴞𐴃𐴝 𐴒𐴝𐴏𐴢 𐴎𐴠𐴕 𐴁𐴝𐴌𐴞𐴥 𐴀𐴟𐴍𐴞𐴤 𐴊𐴟𐴑 𐴕𐴡 𐴊𐴠 𐴀𐴝𐴦𐴌 𐴇𐴞𐴥𐴘𐴝𐴕𐴠 𐴁𐴡𐴀𐴗𐴃𐴢 𐴎𐴡𐴕𐴡𐴌𐴠 𐴕𐴝𐴉𐴝𐴑 𐴒𐴡𐴌𐴞𐴥 𐴕𐴡 𐴉𐴠𐴓𐴠;¹⁶𐴇𐴡𐴕𐴡𐴤𐴑𐴞𐴘𐴠 𐴎𐴠𐴕 𐴎𐴠𐴕𐴝𐴤𐴑𐴟𐴌 𐴘𐴝𐴥 𐴀𐴞𐴏𐴡𐴥𐴌 𐴋𐴡𐴥𐴙𐴓𐴧𐴝 𐴁𐴠𐴊𐴞𐴕𐴞 𐴕𐴡 𐴀𐴡𐴥, 𐴎𐴠𐴦𐴕𐴞𐴑𐴞 𐴀𐴠𐴑 𐴀𐴡𐴑𐴃𐴡𐴥𐴌 𐴈𐴝𐴥𐴕𐴝𐴓𐴧𐴝 𐴕𐴞𐴎𐴡𐴃𐴧𐴟 𐴉𐴡𐴀𐴘𐴓𐴝-𐴉𐴟𐴖𐴝𐴌 𐴇𐴡𐴥𐴑 𐴀𐴝𐴐𐴧𐴞𐴥𐴓𐴢 𐴊𐴠 𐴇𐴞𐴥𐴘𐴝𐴕 𐴁𐴠𐴏𐴞𐴉𐴠𐴥𐴓𐴝𐴙𐴓𐴢.¹⁷𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴘𐴝𐴥𐴌𐴁𐴝𐴦𐴊𐴠 𐴎𐴠𐴣𐴃𐴧𐴠𐴥 𐴘𐴡𐴥𐴒𐴧𐴗𐴝𐴃𐴧𐴟 𐴊𐴟𐴖𐴝 𐴉𐴝𐴘𐴃𐴡 𐴔𐴡𐴕𐴠𐴈𐴡𐴘𐴧𐴠𐴥, 𐴘𐴡𐴥𐴒𐴧𐴗𐴝𐴌𐴠 𐴀𐴞𐴕𐴑𐴝𐴌 𐴒𐴡𐴌𐴞𐴥𐴉𐴠𐴓𐴝 𐴒𐴞𐴥𐴘𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴘𐴠 𐴈𐴝𐴣𐴊𐴞-𐴈𐴝𐴣𐴊𐴞 𐴇𐴠𐴥 𐴊𐴟𐴖𐴝𐴌 𐴃𐴝𐴓𐴝𐴐𐴢 𐴒𐴡𐴙𐴓𐴧𐴠𐴥 𐴘𐴡, 𐴘𐴡𐴥𐴒𐴧𐴗𐴝𐴘𐴠 𐴔𐴡𐴕 𐴉𐴞𐴥𐴌𐴝𐴘𐴉𐴠𐴓𐴝𐴘𐴁𐴝𐴌 𐴔𐴡𐴑𐴝 𐴕𐴡𐴥 𐴉𐴝𐴦.

¹⁸𐴃𐴟𐴣𐴀𐴝𐴥𐴌𐴝 𐴀𐴡 𐴉𐴝𐴀𐴌𐴡𐴌 𐴇𐴠𐴥𐴍𐴠 𐴀𐴝𐴙𐴐𐴧𐴡𐴥 𐴊𐴠 𐴕𐴡, 𐴎𐴞𐴁𐴝𐴤𐴌𐴠 𐴊𐴡𐴥𐴌𐴞 𐴉𐴝𐴙𐴅𐴧𐴞𐴥𐴓𐴢 𐴀𐴝𐴦𐴌 𐴎𐴞𐴁𐴝𐴤 𐴀𐴡𐴦𐴙𐴕 𐴓𐴡𐴘 𐴎𐴡𐴙𐴓𐴧𐴞𐴥𐴓𐴢, 𐴎𐴞𐴁𐴝𐴤𐴃𐴢 𐴒𐴟𐴄𐴒𐴟𐴙𐴄𐴧𐴝 𐴀𐴝𐴕𐴊𐴝𐴤𐴌, 𐴃𐴟𐴖𐴝𐴥𐴕,¹⁹𐴐𐴞𐴥𐴛𐴝𐴌 𐴀𐴝𐴁𐴝𐴏𐴢, 𐴀𐴠𐴊𐴧𐴠 𐴈𐴡𐴃𐴝𐴤𐴌 𐴀𐴠𐴕𐴊𐴞𐴓𐴧𐴝 𐴀𐴝𐴁𐴝𐴏𐴢 𐴀𐴝𐴐𐴧𐴞𐴥𐴓𐴢, 𐴎𐴠𐴀𐴕 𐴕𐴞𐴥𐴑𐴞 𐴎𐴠𐴃𐴝𐴌𐴝𐴤 𐴇𐴞𐴥𐴀𐴕 𐴉𐴟𐴥𐴙𐴕𐴧𐴞𐴓𐴢 𐴀𐴞𐴥𐴃𐴝𐴌𐴝 𐴉𐴡𐴥𐴌𐴞𐴘𐴝𐴃𐴢 𐴒𐴡𐴙𐴅𐴧𐴞𐴥𐴓𐴢 𐴊𐴠, 𐴀𐴞𐴥𐴃𐴝𐴌𐴝𐴌𐴠 𐴀𐴝𐴌 𐴇𐴡𐴕𐴡𐴤 𐴈𐴡𐴃𐴝𐴤 𐴈𐴡𐴖𐴝𐴤 𐴕𐴡 𐴎𐴝𐴘 𐴁𐴡𐴓𐴧𐴝,²⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴀𐴠 𐴇𐴡𐴥𐴑𐴟𐴔 𐴘𐴝𐴀𐴕 𐴐𐴡𐴥𐴀𐴘𐴢 𐴕𐴡𐴥 𐴉𐴝𐴌𐴠 𐴊𐴠 𐴑𐴞, ”𐴎𐴡𐴊𐴞 𐴇𐴡𐴕𐴡𐴤 𐴅𐴝𐴕𐴟𐴖𐴝𐴌𐴠 𐴀𐴟𐴥𐴊𐴧𐴗𐴝 𐴉𐴝𐴀𐴌𐴒𐴗𐴝𐴥𐴌𐴠 𐴏𐴟𐴥𐴘𐴓𐴠, 𐴘𐴞𐴥𐴁𐴝𐴌𐴠 𐴉𐴝𐴃𐴧𐴡𐴥𐴌 𐴔𐴝𐴌𐴞 𐴔𐴝𐴌𐴞𐴉𐴠𐴥𐴓𐴝 𐴎𐴝𐴘𐴁𐴡.“ ²¹𐴀𐴝𐴦𐴌 𐴀𐴞𐴥𐴃𐴝𐴌𐴝 𐴎𐴞𐴘𐴝𐴥𐴕 𐴊𐴠𐴙𐴑𐴧𐴞𐴥𐴓𐴢 𐴇𐴞𐴥𐴘𐴝𐴕 𐴀𐴠𐴀𐴕 𐴋𐴡𐴦𐴌𐴡𐴌 𐴀𐴝𐴐𐴧𐴞𐴥𐴓𐴢, 𐴎𐴠𐴀𐴕 𐴕𐴞𐴥𐴑𐴞 𐴔𐴟𐴀𐴏𐴝𐴘𐴠 𐴈𐴡𐴀𐴙𐴓𐴢; ”𐴀𐴝𐴀𐴛 𐴋𐴡𐴦𐴌𐴠 𐴇𐴝𐴉𐴞𐴌.“ ²²𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴌𐴝 𐴏𐴞𐴥𐴘𐴡𐴕 𐴉𐴝𐴀𐴌𐴡𐴌 𐴇𐴠𐴥𐴍𐴠 𐴁𐴠 𐴀𐴝𐴙𐴐𐴧𐴡𐴥, 𐴘𐴝𐴥𐴕𐴞 𐴎𐴞𐴕𐴊𐴝 𐴀𐴝𐴓𐴧𐴝𐴌 𐴐𐴡𐴥𐴀𐴌 𐴀𐴝𐴏𐴔𐴝𐴕𐴞 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴇𐴠𐴥𐴍𐴠. 𐴃𐴟𐴣𐴀𐴝𐴥𐴌𐴝 𐴀𐴝𐴙𐴐𐴧𐴡𐴥 𐴊𐴠 𐴀𐴡𐴥𐴙𐴓𐴊𐴠 𐴓𐴝𐴑-𐴓𐴝𐴑 𐴉𐴞𐴥𐴌𐴞𐴏𐴃𐴝𐴌²³𐴀𐴠𐴊𐴧𐴠 𐴉𐴡𐴀𐴘𐴓𐴝-𐴉𐴟𐴀𐴝𐴙𐴕 𐴀𐴟𐴘𐴃𐴝𐴌𐴝𐴤𐴌 𐴊𐴡𐴓𐴢 𐴀𐴡𐴃𐴢, 𐴘𐴝𐴥𐴕𐴞 𐴎𐴡𐴔𐴝𐴥𐴃𐴢 𐴀𐴡𐴃𐴢, 𐴎𐴠𐴃𐴝𐴌𐴝𐴤𐴌 𐴏𐴠𐴌𐴝𐴥𐴚 𐴀𐴝𐴏𐴔𐴝𐴕𐴡𐴃𐴢 𐴀𐴝𐴏𐴠𐴤, 𐴀𐴝𐴦𐴌 𐴎𐴞𐴁𐴝𐴤 𐴁𐴠𐴒𐴧𐴟𐴥𐴕𐴡𐴌 𐴁𐴞𐴏𐴝𐴌𐴇𐴝𐴌 𐴇𐴠𐴥 𐴀𐴝𐴓𐴧𐴝𐴌 𐴇𐴠𐴥𐴍𐴠 𐴀𐴠𐴊𐴧𐴠 𐴇𐴝𐴥𐴄𐴞 𐴒𐴡𐴌𐴝𐴥 𐴒𐴞𐴥𐴘𐴠 𐴊𐴠 𐴉𐴡𐴌𐴇𐴠𐴥𐴏𐴒𐴝𐴌 𐴀𐴞𐴥𐴃𐴝𐴌𐴝𐴌 𐴌𐴟𐴀 𐴀𐴡𐴥𐴑𐴧𐴡𐴓𐴡𐴌 𐴇𐴠𐴥𐴍𐴠,²⁴𐴀𐴝𐴦𐴌 𐴕𐴡𐴘𐴝 𐴌𐴝𐴎𐴞𐴕𐴝𐴔𐴝𐴌 𐴀𐴟𐴏𐴞𐴥𐴓𐴝 𐴀𐴞𐴏𐴝𐴤𐴌 𐴇𐴠𐴥𐴍𐴠 𐴀𐴠𐴊𐴧𐴠 𐴐𐴞𐴥𐴣𐴍𐴝 𐴒𐴞𐴥𐴘𐴠 𐴊𐴠 𐴓𐴡𐴖𐴢 𐴀𐴟𐴀𐴙𐴕𐴡𐴌 𐴇𐴠𐴥𐴍𐴠, 𐴎𐴞𐴀𐴕𐴠 𐴀𐴝𐴁𐴠𐴓𐴡𐴌 𐴓𐴡𐴖𐴢 𐴖𐴡𐴥𐴌 𐴃𐴟𐴥𐴖𐴝𐴌𐴡 𐴁𐴠𐴀𐴃𐴡𐴌 𐴈𐴡𐴃𐴝𐴤 𐴈𐴡𐴀.²⁵𐴏𐴝𐴘𐴧𐴡𐴥, 𐴈𐴡𐴃𐴝𐴤 𐴈𐴡𐴀𐴌 𐴊𐴠 𐴀𐴞𐴥𐴁𐴝𐴌𐴠 𐴀𐴞𐴕𐴑𐴝𐴌 𐴕𐴡 𐴒𐴡𐴙𐴅𐴧𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴟𐴘𐴃𐴝𐴌𐴝𐴤 𐴎𐴠𐴃𐴧𐴡𐴥𐴃𐴢 𐴊𐴟𐴕𐴞𐴘𐴝𐴙𐴃𐴢 𐴇𐴠𐴥𐴊𐴝𐴘𐴧𐴡𐴃𐴢 𐴒𐴡𐴙𐴃𐴧𐴡𐴥 𐴊𐴠 𐴘𐴡𐴥𐴒𐴧𐴗𐴝𐴌𐴠 𐴀𐴞𐴕𐴑𐴝𐴌 𐴒𐴡𐴌𐴞𐴥 𐴁𐴝𐴏𐴞 𐴕𐴡𐴥 𐴉𐴝𐴌𐴠, 𐴃𐴡𐴥𐴘 𐴀𐴝𐴣𐴀𐴌𐴝 𐴎𐴡𐴊𐴞 𐴀𐴝𐴏𐴔𐴝𐴕𐴡𐴃𐴧𐴟 𐴇𐴠𐴥𐴊𐴝𐴘𐴧𐴡𐴃𐴢 𐴒𐴡𐴌𐴠𐴥 𐴊𐴠 𐴀𐴞𐴥𐴁𐴝𐴃𐴧𐴟 𐴔𐴟𐴦 𐴉𐴞𐴥𐴌𐴝𐴘𐴉𐴠𐴓𐴝𐴘, 𐴀𐴝𐴣𐴀𐴌𐴝 𐴃𐴡 𐴁𐴝𐴏𐴞 𐴉𐴝𐴌𐴞𐴁𐴝𐴥𐴌 𐴕𐴝𐴥𐴘.²⁶𐴇𐴠𐴥𐴣𐴃𐴧𐴠 𐴀𐴞𐴥𐴁𐴝𐴌 𐴀𐴝𐴁𐴝𐴏𐴠 𐴃𐴡 𐴊𐴟𐴕𐴞𐴘𐴝𐴘-𐴊𐴝𐴌𐴞 𐴃𐴡𐴥𐴃𐴧𐴡𐴌𐴝𐴙𐴓𐴢, 𐴔𐴡𐴕𐴃𐴡𐴌 𐴘𐴝𐴓𐴝 𐴀𐴞𐴥𐴁𐴝𐴘𐴠 𐴀𐴠𐴕𐴊𐴞𐴓𐴧𐴝 𐴖𐴝𐴦𐴊𐴝 𐴒𐴡𐴙𐴅𐴧𐴠𐴥, ”𐴀𐴝𐴌𐴡𐴤 𐴀𐴠𐴑𐴁𐴝𐴌 𐴀𐴝𐴀𐴛 𐴏𐴞𐴌𐴞𐴥𐴉𐴢 𐴊𐴟𐴕𐴞𐴘𐴝𐴘𐴌𐴠 𐴃𐴡𐴥𐴃𐴧𐴡𐴌𐴝𐴘𐴧𐴟𐴔 𐴊𐴠 𐴕𐴡 𐴁𐴡𐴥𐴓𐴑𐴠 𐴀𐴝𐴏𐴔𐴝𐴕𐴡𐴌𐴠 𐴘𐴡𐴥.“ ²⁷”𐴀𐴝𐴌𐴡𐴤 𐴀𐴠𐴑𐴁𐴝𐴌“ 𐴓𐴡𐴉𐴎𐴡𐴥 𐴘𐴞𐴥𐴁𐴝𐴘𐴠 𐴎𐴝𐴇𐴠𐴥𐴌 𐴒𐴡𐴌𐴠𐴥 𐴊𐴠, 𐴎𐴠 𐴏𐴞𐴎𐴢 𐴀𐴡𐴥𐴑𐴧𐴡𐴓𐴢 𐴃𐴡𐴥𐴃𐴧𐴡𐴌𐴝, 𐴘𐴝𐴥𐴕𐴞 𐴎𐴞𐴀𐴕𐴡𐴌𐴠 𐴉𐴡𐴘𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠, 𐴇𐴞𐴥𐴀𐴕𐴡𐴌𐴠 𐴊𐴟𐴌 𐴒𐴡𐴌𐴞𐴥𐴉𐴠𐴓𐴝 𐴎𐴝𐴘𐴁𐴡, 𐴎𐴠𐴀𐴕𐴠 𐴎𐴞𐴀𐴕𐴡𐴌𐴠 𐴃𐴡𐴥𐴃𐴧𐴡𐴌𐴝𐴘 𐴕𐴡 𐴉𐴝𐴌𐴠 𐴇𐴞𐴥𐴀𐴕 𐴄𐴞𐴑𐴞 𐴃𐴝𐴥𐴑𐴠.²⁸𐴇𐴠𐴥𐴃𐴡𐴓𐴧𐴝, 𐴀𐴝𐴣𐴀𐴌𐴝 𐴎𐴠𐴃𐴧𐴡𐴥𐴃𐴢 𐴃𐴡𐴥𐴃𐴧𐴡𐴌𐴝𐴘 𐴕𐴡 𐴉𐴝𐴌𐴠 𐴊𐴠 𐴌𐴝𐴙𐴅𐴧𐴡 𐴉𐴝𐴙𐴌, 𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴐𐴟𐴥𐴑𐴟𐴌𐴞𐴘𐴝 𐴎𐴝𐴕𐴝𐴘, 𐴎𐴞𐴘𐴝𐴥𐴕𐴠 𐴀𐴝𐴣𐴀𐴌𐴝 𐴀𐴞𐴎𐴧𐴡𐴃𐴠 𐴀𐴠𐴊𐴧𐴠 𐴋𐴡𐴦𐴌𐴠 𐴀𐴝𐴓𐴧𐴝𐴌 𐴑𐴡𐴁𐴟𐴓𐴊𐴝𐴥𐴌 𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴞𐴥 𐴉𐴝𐴙𐴅𐴧𐴟𐴔.²⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝𐴌 𐴀𐴝𐴓𐴧𐴝 𐴃𐴡 𐴉𐴟𐴌𐴞𐴉𐴠𐴥𐴓𐴠 𐴊𐴠 𐴀𐴡𐴦𐴙𐴕𐴡𐴌 𐴋𐴡𐴥𐴙𐴓𐴧𐴝.

The Word for the World International

https://app.library.bible/content/87faca8b51c22590