Matthew3

1Dơlãp dơgrữq harơi nữn, Jãng Bãp-tit trôh pơto akhàt dơlãp blàc choah phũm Ju-đe,2làiq: “Iỡuq mơvai tlàq dlàiq, kơyua lơgar lơngĩq song jẽq trôh.”3Ung nĩ la mơnuĩh song hũ đơp hwơr E-sai đơp hlơu, làiq:“Hũ sãp mơnuĩh priãu tơgùq dơlãp blàc choah:‘Iỡuq wah lơĩh jơlàt Yàc hũ,Iỡuq ngãq ga tơpãq dơgrữq jơlàt bàq Pitrai.’”
4Jãng nĩ chồq ao mưng vlơu lac-đa, sì akãq kơ-iãng mưng talơi kalìq tòp dar kơ-iãng, dòq kaya bõc ung hũ la katòc sì ia chalơko kaĩh.5Vloh tũq nữn vual vơla palơi Je-ru-sa-lem, avih phũm Ju-đe sì avih phũm tòp dar kròc Jô-đãnh song trôh pãq ung.6Sì pơnõq nhũ hũ ung ngãq bãp-tem dơlãp kròc Jô-đãnh, tũq song mơvai tlàq dlàiq drơi.7Hadơi sì tũq ung iãq bôh lũ mơnuĩh Pha-ri-si sì mơnuĩh Sa-đu-se trôh kơyua pioh ngãq adãt bãp-tem nhũ hũ ung đơp sì pơnõq nhũ nữn: “Gah pơjẽh pơtiàt anàq ala mơsãc dih, asơi song akhàt ga pơnõq hã đuaĩq tlah kaya lơmùq mơvai prõc jẽq trôh?8Yơu nữn, iỡuq tơviãq voh chơtai đang mang mưng hatai mơvai tlàq dlàiq.9Sì pơnõq ung kung Juơi sơnơng yeh drơi đơp sigỡuq làiq: ‘Pơnõq drơi hũ A-bra-ham la ung kõq drơi.’ Mưng hlãq đơp sì pơnõq ung thơu làiq Yàc Pô Lơngĩq pơlih hũ ngãq pa-tơgùq anàq tơcho A-bra-ham mưng dơgrữq voh patơu nĩ.10Nữn jòc song hũ chẽq jẽq phuỗt kayơu vloh. Kơyua yơu nữn, avih dơgrữq kayơu halơi mơyah làiq ôh tơviãq voh siàp nữn kađòc koh pa-trỗt sì prah tơma apôi.11Hlãq ngãq bãp-tem mưng kaya mơvai tlàq dlàiq ga adơi sơai mưng ia. Nữn Pitao trôh hadơi hlãq la hũ gơnuar rlao hlãq, mưng Pitao nữn hlãq ôh đang mang apãt chơkhõq ga Pitrai hũ. Pitrai ròq ngãq bãp-tem ga adơi sơai mưng Yàc Vơngãq Sơđah sì mưng apôi.12Pitrai apãt chơngua dơlãp tơngãn Pitrai, vloh nữn pioh tapơi pơhồc làt juãq vơdai drơi, sì pơtõm vơdai Pitrai hũ tơma adũq pioh. Nữn Pitrai ròq chôh avih apồc anrãc mưng apôi ôh tũq halơi vơdãp jỡc.”
13Tũq nữn, Yàc Je-su nao mưng lơgar Ga-li-le trôh kròc Jô-đãnh, anĩh Jãng dòq, pioh hũ ga ung ngãq bãp-tem.14Nữn Jãng miẽt duah kaya chơkhãq pakỡuq Pitrai, ung đơp làiq: “Hlãq iỡuq chàc Pitrai ngãq bãp-tem ga hlãq, kơyua yơu nữn sì Pitrai vloh mai trôh sì hlãq yơh?”15Nữn Yàc Je-su hẽ wỡq sì ung làiq: “Tũq nĩ, iỡuq ngãq yơu nữn vẽq, kơyua vruãq nữn chàc iỡuq ngãq ga pơnõq drơi pioh ngãq wil tãl dơgrữq kaya tơpãq dãng.” Vloh nữn la Jãng ngãq bãp-tem ga Pitrai.16Hadơi sì tũq ngãq bãp-tem, nữn mư Yàc Je-su tơviãq mưng ia, sì dih, lơngĩq pơh tơviãq pãq anãq Pitrai. Pitrai iãq bôh Vơngãq Sơđah Yàc Pô Lơngĩq hũ trỗt drưh yơu chĩp katrơu đãp pãq dlòc Pitrai.17Sì dih, hũ sãp mưng dlòc lơngĩq đơp làiq: “Nĩ la Anàq anĩt duman kơu hũ. Kơu viãq siàp hatai mưng Anàq nữn.”

FAR EAST BROADCASTING COMPANY

https://app.library.bible/content/d703d3283f8af40e