John2
1Tlơu harơi hadơi, hũ sa kaya bõc pơhuãq kamơi lakơi pãq palơi Ka-na dơlãp phũm Ga-li-le, sì hũ ami Yàc Je-su dòq pãq đỡn.2Yàc Je-su sì dơgrữq mơnuĩh mơgrũ Pitrai kung hũ jàq trôh bõc pơhuãq.3Tũq alãc avih, ami Yàc Je-su đơp sì Pitrai: “Pơnõq nhũ ôh dòq alãc.”4Nữn Yàc Je-su đơp sì mòq: “Ơ ami, vruãq nữn ôh trôh tãl anàq sì ami? Tũq jơ anàq ôh-ka trôh.”5Ami Pitrai đơp sì dơgrữq mơnuĩh dõc vruãq làiq: “Iỡuq ngãq tui dơgrữq vruãq halơi nữn nhũ pơđar pơnõq sơai ngãq.”6Pãq đỡn hũ nãm voh jrò mưng patơu pioh angui chẽq krơi ga vruãq rao sơchih tui kaya rơđãp ngãq mơnuĩh Ju-đa hũ, dơgrữq voh jrò pioh hũ pơgãp dua trôh tlơu plôh lĩt ia.7Yàc Je-su pơđar pơnõq nhũ: “Iỡuq tôh ia tơma vãq jrò nữn vẽq.” Yơu nữn, pơnõq nhũ tôh ia tơma vãq tãl mơvah jrò.8Vloh Pitrai đơp sì dơgrữq mơnuĩh dõc vruãq: “Tũq nĩ iỡuq sõq tơviãq sa sĩt sì va trôh ga mơnuĩh iãq ban.” Yơu nữn, pơnõq nhũ va nao.9Tũq nữn mơnuĩh iãq ban tawơr ia song tơviãq jỡc alãc (nữn nhũ ôh thơu mưng halơi nữn hũ, dòq dơgrữq mơnuĩh dõc vruãq — la mơnuĩh song sõq ia nĩ — nữn thơu), nữn mơnuĩh iãq ban iơu mơtơu lakơi10nữn đơp sì nhũ: “Asơi kung rơđãp pơyãq alãc vơngĩ hlơu, sì dơlãp tũq mơnuĩh thuãi ròq mơnhũm mơvũq, nữn pơyãq alãc siẽt jĩn rlao. Nữn sơai dòq pioh wỡq alãc vơngĩ trôh tãl tũq nĩ.”11Nĩ la kaya krơi tơmo bãc chơmrờp Yàc Je-su song ngãq pãq Ka-na, dơlãp lơgar Ga-li-le, Pitrai ràc pa-tơviãq kaya gơhluh Pitrai hũ, sì dơgrữq mơnuĩh mơgrũ Pitrai song pãc-tui dơlãp Pitrai.12Hadơi vruãq nữn, Yàc Je-su, ami Pitrai sì gãm dơgrữq adơi sơai lakơi, sigỡuq sì dơgrữq mơnuĩh mơgrũ Pitrai trỗt nao pãq palơi Ka-be-na-um, nữn pơnõq nhũ dòq wỡq anĩh nữn ôh hũ hadùp harơi.13Adãt Pơjũm Bõc Nao Gãt mơnuĩh Ju-đa hũ song jẽq trôh, nữn Yàc Je-su tơgùq nao pãq Je-ru-sa-lem.14Pitrai bôh dơlãp sàc talơvãt hũ dơgrữq mơnuĩh kãq palơi lơmo, avo sì katrơu, sigỡuq sì mơnuĩh sơdua jĩn ãn dòq guh pãq đỡn.15Hadơi sì tũq pơpãq sa bẽq gai mưng talơi, Pitrai pơtiãuq avih tơpuôl nhũ tơviãq tlah mưng sàc talơvãt, gãm avo sì lơmo, Pitrai kung sũc prah jĩn tơpuôl sơdua jĩn hũ sì wơh ban pơnõq nhũ.16Pitrai đơp sì dơgrữq mơnuĩh kãq pa-vlơi chĩp katrơu: “Iỡuq va dơgrữq kaya nữn tơviãq tlah mưng anĩh nĩ. Juơi ngãq ga sàc Ama Kơu tơviãq jỡc anĩh kãq pa-vlơi.”17Dơgrữq mơnuĩh mơgrũ Pitrai sơdor wỡq pơnuaĩq song wãq, làiq: “Hatai tluỡiq gơhuar mưng sàc Pitrai ròq chôh pơkãp anàq.”18Kơyua mưng nữn, mơnuĩh gơnuar apãt akõq Ju-đa song đơp jơdrãq wỡq sì Pitrai: “Ung ràc tơviãq ga pơnõq hlãq bôh kaya nỡm hagĩq dơlãp tũq ung ngãq dơgrữq vruãq nĩ?”19Yàc Je-su hẽ wỡq, Pitrai đơp sì pơnõq nhũ: “Iỡuq yah tơyah sàc talơvãt nĩ vẽq, vloh dơlãp tlơu harơi Kơu ròq padỡc nhũ wỡq.”20Yơu nữn, mơnuĩh gơnuar apãt akõq Ju-đa đơp: “Sàc talơvãt nĩ hũ vỡq padỡc dơlãp pàq plôh nãm thũt, yơu nữn ung ròq padỡc nhũ wỡq dơlãp tlơu harơi yơh?”21Bôh làiq yơu nữn, sàc nữn Pitrai ãn đơp nữn la mưng sàc talơvãt rùp phuỗt Pitrai hũ.22Yơu nữn, hadơi sì tũq Pitrai song mưng kaya mơtai hadiuq wỡq, dơgrữq mơnuĩh mơgrũ Pitrai hũ sơdor wỡq làiq Pitrai kung đơp yơu pơnuaĩq nĩ, nữn pơnõq nhũ pãc-tui pơnuaĩq Sơrãq Sơđah sì pơnuaĩq nữn Yàc Je-su song đơp.23Vơnah tơmo, dơlãp tũq Pitrai dòq pãq palơi Je-ru-sa-lem dơlãp sa lơwah harơi Pơjũm Bõc Nao Gãt, dơlãp harơi adãt, hũ lũ dơgrữq mơnuĩh pãc-tui mưng angãn Pitrai dơlãp tũq bôh dơgrữq kaya nỡm krơi tơmo nữn Pitrai song ngãq.24Bôh làiq yơu nữn, rùp phuỗt Yàc Je-su ôh pơjao hatai pãc-tui drơi ga pơnõq nhũ, kơyua Pitrai thơu avih tãl aràc anàq mơnuĩh,25sì nữn la kơyua Pitrai ôh chàc trôh asơi ngãq chưng mưng anàq mơnuĩh, kơyua Pitrai thơu krơi dơgrữq kaya hagĩq dòq dơlãp hatai dơgrữq anàq mơnuĩh.
FAR EAST BROADCASTING COMPANY