John1
1Mững chơmrờp hũ Pitao Pơnuaĩq, Pitao Pơnuaĩq dòq sigỡuq sì Yàc Pô Lơngĩq, sì Pitao Pơnuaĩq la Yàc Pô Lơngĩq.2Pitrai song dòq sigỡuq mững tũq chơmrờp sì Yàc Pô-lơngĩq.3Avih dơgrữq kaya mưng Pitrai hũ chrơng pajỡc, sì mưng tũq ôh hũ chrơng pajỡc kơyua mưng Pitrai, nữn ôh hũ sa kaya halơi hũ chrơng pajỡc.4Dơlãp Pitrai la kaya hadiuq, sì kaya hadiuq la kaya sơdah anàq mơnuĩh hũ.5Kaya sơdah pơsàc dơlãp kaya sồp kơnãm, sì kaya sồp kơnãm ôh tũq halơi pha rlao di kaya sơdah jỡc.6Hũ sa aràc mơnuĩh ãt pơđar mưng Yàc Pô Lơngĩq, angãn ung la Jãng.7Ung song trôh dơlãp vruãq ngãq chưng pioh ung pơlih ngãq chưng mưng kaya sơdah, tồq ga gơnang mưng ung, nữn avih dơgrữq mơnuĩh pơlih pãc-tui.8Rùp phuỗt ung ôh iỡuq la kaya sơdah, nữn ung song trôh pioh ung ngãq chưng mưng kaya sơdah.9Kaya sơdah viãq, la kaya sơdah pơsàc sơdah ga avih tãl aràc, song trôh dơlãp dun kơyua.10Pitrai song dòq dơlãp dun kơyua, sì dun kơyua hũ chrơng pajỡc kơyua mưng Pitrai, nữn dun kơyua song ôh kơnãl thơu Pitrai.11Pitrai song nao trôh anĩh pơweh sì Pitrai, nữn vual vơla Pitrai ôh tồq ròq Pitrai.12Nữn avih dơgrữq mơnuĩh tồq ròq Pitrai, nữn Pitrai vrơi ga pơnõq nhũ hũ gơnuar ngãq jỡc anàq tơcho Yàc Pô Lơngĩq hũ, nữn la vrơi ga dơgrữq mơnuĩh halơi pãc-tui dơlãp angãn Pitrai.13Dơgrữq mơnuĩh nữn ôh iỡuq hũ đeh tơviãq kơyua mưng dơrãh, kung ôh iỡuq kơyua mưng hatai ham khiãng rơlo rùp, hẽla kơyua mưng hatai ưng anàq mơnuĩh, nữn la kơyua mưng Yàc Pô Lơngĩq.14Pitao Pơnuaĩq song tơviãq jỡc rơlo rùp sì hadiuq dòq di khrãh pơnõq drơi, sì pơnõq drơi ròq tơlàq iãq kaya gơhluh Pitrai hũ, drưh yơu kaya gơhluh Anàq Sa hũ trôh mưng Ama, vãq sơrè kaya anĩt gãm sì pơnuaĩq tơpãq.15Jãng ngãq chưng mưng Pitrai sì driãu prong đơp làiq: “Nĩ la Pitao nữn hlãq song đơp: ‘Pitao trôh hadơi hlãq song tơviãq jỡc prong mang rlao hlãq, kơyua Pitrai song gãm hũ hlơu hlãq.’”16Kơyua tơviãq mưng kaya vãq sơrè Pitrai hũ, avih dơgrữq tãl aràc pơnõq drơi hũ tồq mãq avih kaya anĩt nĩ trôh kaya anĩt tơmo.17Kơyua voh-va song vrơi mưng Môi-se. Kaya anĩt sì pơnuaĩq tơpãq song trôh mưng Yàc Dõc Pơ-tlah Je-su.18Ka-ôh hũ mơnuĩh halơi song iãq bôh Yàc Pô Lơngĩq. Mĩn Anàq Sa Yàc Pô Lơngĩq hũ, Pitao dòq dơlãp hatai Ama, rùp phuỗt Pitao nữn song akhàt pa-tơviãq Ama ga pơnõq drơi.19Nĩ la pơnuaĩq ngãq chưng Jãng hũ tũq vual vơla mơnuĩh Ju-đa pơyua pơđar dơgrữq mơnuĩh gơnuar pioh kaya duh talơvãt sì mơnuĩh Le-vi mưng Je-ru-sa-lem trôh pãp pioh tơnĩa ung: “Ung la asơi?”20Ung pa-thơu akhàt pa-tơviãq — ôh tũq halơi kơmlah nữn đơp tơviãq — làiq: “Hlãq ôh iỡuq la Yàc Dõc Pơ-tlah.”21Pơnõq nhũ vloh tơnĩa wỡq ung: “Yơu nữn la yơu hayơu? Iỡuq lơĩh ung la E-li?” Ung drơ làiq: “Ôh iỡuq hlãq.” “Iỡuq lơĩh ung la Mơnuĩh Gơnuar Hwơr?” Ung drơ: “Ôh iỡuq.”22Nữn vloh, pơnõq nhũ đơp sì ung: “Ung la asơi, pioh pơnõq hlãq pơlih hũ pơnuaĩq akhàt wỡq ga dơgrữq mơnuĩh song pơđar pơnõq hlãq trôh? Ung đơp hayơu mưng rùp phuỗt drơi?”23Ung drơ:“Hlãq la sãp driãu dơlãp blàc choah:‘Iỡuq ngãq pa-tơpãq jơlàt Yàc hũ,’yơu mơnuĩh gơnuar hwơr E-sai song đơp.”24Hũ tơkìq mơnuĩh ãt pơđar nữn la pơweh mưng mơnuĩh Pha-ri-si,25pơnõq nhũ vloh tơnĩa wỡq ung, nữn đơp sì ung: “Mơyah làiq ung ôh iỡuq la Yàc Dõc Pơ-tlah, kung ôh iỡuq E-li, hẽla Mơnuĩh Gơnuar Hwơr, yơu nữn vloh hayơu ung ngãq adãt bãp-tem?”26Jãng drơ sì pơnõq nhũ làiq: “Hlãq ãn ngãq adãt bãp-tem mưng ia. Nữn hũ sa Pitao song dòq di khrãh pơnõq ung nữn pơnõq ung ôh thơu,27la Pitao trôh hadơi hlãq, Pitao nữn hlãq ôh đang mang pioh tơleh talơi akãq chơkhõq Pitrai hũ.”28Dơgrữq vruãq nữn tơviãq jỡc pãq palơi Be-tha-ni gah dih kròc Jô-đãnh, la anĩh nữn Jãng ãn ngãq adãt bãp-tem.29Harơi hadơi, Jãng bôh Yàc Je-su mai trôh pãq anĩh drơi, nữn đơp làiq: “Iãq dih, Avo Anàq Yàc Pô Lơngĩq hũ, Pitao suãq tlàq dlàiq dơnũh dun kơyua hũ!30Kơyua la mưng Pitao nữn sì hlãq song đơp: ‘Mơnuĩh trôh hadơi hlãq la Pitao prong mang rlao hlãq, kơyua Pitrai song gãm hũ hlơu hlãq.’31Hlãq ôh thơu Pitrai, nữn pioh Pitrai hũ akhàt pa-tơviãq ga vual vơla Is-ra-el, yơu nữn hlãq song trôh ngãq adãt Bãp-tem mưng ia kơyua mưng sa kanõh nữn.”32Jãng song ngãq chưng, dơlãp tũq đơp làiq: “Hlãq song bôh Yàc Vơngãq Sơđah mưng lơngĩq pa-trỗt yơu chĩp katrơu, sì đãp pãq dlòc Pitrai.33Hlãq kung ôh kơnãl thơu Pitrai, nữn Pitao pơđar hlãq ngãq adãt bãp-tem mưng ia, Pitao nữn đơp sì hlãq: ‘Avih dơgrữq aràc asơi nữn anàq bôh Vơngãq Sơđah trỗt sì đãp pãq dlòc nhũ, nữn mơnuĩh nữn la Pitao ngãq bãp-tem mưng Yàc Vơngãq Sơđah.’34Vloh hlãq song iãq bôh sì ngãq chưng làiq nĩ la Anàq Yàc Pô Lơngĩq.”35Sa bãc tơra, dòq patui harơi nữn wỡq, Jãng ãn dòq dữc sì dua aràc dơlãp dơgrữq mơnuĩh mơgrũ nhũ hũ,36sì tũq pơnõq nhũ bôh Yàc Je-su nao gãt, ung đơp: “Dih, Avo Anàq Yàc Pô Lơngĩq hũ!”37Dua aràc mơnuĩh mơgrũ Jãng nữn hmỡq đơp yơu nữn vloh pơnõq nhũ nao tui Yàc Je-su.38Dơlãp tũq Yàc Je-su gơlàiq hadơi sì bôh pơnõq nhũ ãn nao tui drơi, Pitrai tơnĩa pơnõq nhũ: “Pơnõq sơai duah asơi?” Pơnõq nhũ drơ sì Pitrai: “Ra-bi (akhar nĩ pa-tơviãq gơtha la ‘Pôgrũ’), Pôgrũ ãn dòq pãq halơi?”39Pitrai đơp sì pơnõq nhũ: “Iỡuq mai trôh nữn adơi sơai ròq bôh.” Yơu nữn pơnõq nhũ trôh sì bôh anĩh Pitrai ãn dòq, sì pơnõq nhũ dòq wỡq sì Pitrai dơlãp harơi nữn. Tũq nữn la pơgãp tũq jơ bãc sa plôh.40Sa aràc dơlãp dua aràc pơnõq nhũ song hmỡq mưng Jãng đơp sì nao tui Yàc Je-su nữn la An-dre, adơi lakơi Si-môn Pier.41Hlơu viãq, ung duah pãp sơai nhũ la Si-môn vloh akhàt wỡq sì sơai, làiq: “Pơnõq adơi song pãp Pitao Hũ Pavuh Mơnhàq” (akhar nĩ pa-tơviãq gơtha la Yàc Dõc Pơ-tlah).42Ung va sơai nhũ trôh sì Yàc Je-su. Hadơi sì tũq iãq nhũ, Yàc Je-su đơp: “Sơai la Si-môn, anàq ung Jãng hũ. Sơai ròq hũ angãn la Se-pha” (angãn nữn pa-tơviãq gơtha la “Pier”).43Harơi hadơi, Yàc Je-su ưng tơviãq mưng anĩh nữn nao pãq Ga-li-le, sì Pitrai duah pãp Phi-lip vloh pơđar ung: “Iỡuq tui Pôgrũ.”44Phi-lip la mơnuĩh tơviãq mưng Bet-sai-đa, dòq sa palơi sigỡuq sì An-dre gãm sì Pier.45Phi-lip duah pãp Na-tha-na-en nữn đơp sì ung: “Pơnõq drơi song pãp Pitao nữn Môi-se song wãq dơlãp voh-va sì dơgrữq mơnuĩh gơnuar hwơr kung yơu nữn — la Je-su, anàq Jô-sep, mưng Na-sa-ret.”46Nữn Na-tha-na-en drơ wỡq sì ung: “Pơlih hũ kaya siàp hagĩq tơviãq mưng palơi Na-sa-ret jỡc yơh?” Phi-lip đơp sì ung: “Iỡuq trôh nữn iãq.”47Yàc Je-su bôh Na-tha-na-en ãn mai trôh sì Pitrai, nữn Pitrai đơp mưng ung: “Mưng nĩ, sa aràc mơnuĩh Is-ra-el tui tơpãq viãq, ôh hũ kaya vlữq lor dòq dơlãp mơnuĩh nĩ!”48Na-tha-na-en tơnĩa Pitrai: “Ngãq hayơu Pôgrũ thơu hlãq?” Yàc Je-su hẽ, Pitrai đơp sì ung làiq: “Hlơu sì tũq Phi-lip iơu sơai, dơlãp tũq sơai dòq pãq ala kayơu vãl, nữn Pôgrũ song bôh sơai.”49Na-tha-na-en drơ sì Pitrai: “Ra-bi, Pôgrũ la Anàq Yàc Pô Lơngĩq! Pôgrũ la Pitao Is-ra-el hũ!”50Yàc Je-su hẽ wỡq nữn đơp sì ung: “Iỡuq mĩn sơai pãc kơyua Pôgrũ song đơp sì sơai làiq: ‘Pôgrũ song bôh sơai dòq pãq ala kayơu vãl’? Sơai ròq bôh dơgrữq vruãq krơi tơmo prong rlao nĩ wỡq.”51Vloh Pitrai đơp wỡq sì ung: “Iỡuq viãq, iỡuq viãq, Pôgrũ đơp sì adơi sơai, adơi sơai ròq bôh lơgar dlòc lơngĩq pơh tơviãq, sì dơgrữq mơnuĩh gơnrơh Yàc Pô Lơngĩq hũ đìq trỗt mai pãq dlòc Anàq Mơnuĩh.”
FAR EAST BROADCASTING COMPANY