Colossians3
1Yơu nữn, mơyah làiq pơnõq adơi sơai song hũ ngãq ga hadiuq wỡq sì Yàc Dõc Pơ-tlah, nữn iỡuq duah iãq dơgrữq kaya dòq pãq dlòc lơngĩq, dơlãp Yàc Dõc Pơ-tlah ãn dòq guh gah hơnuãq Yàc Pô Lơngĩq.2Akõq dlò iỡuq iãq pơwih trôh dơgrữq kaya dòq pãq dlòc lơngĩq, ôh iỡuq dơgrữq kaya dòq pãq ala voh hlùq.3Kơyua pơnõq adơi sơai song mơtai, sì kaya hadiuq pơnõq adơi sơai song hũ padỡuq sigỡuq sì Yàc Dõc Pơ-tlah dơlãp Yàc Pô Lơngĩq.4Tũq Yàc Dõc Pơ-tlah, la kaya hadiuq pơnõq adơi sơai hũ, pa-tơviãq rùp, nữn pơnõq adơi sơai kung ròq pa-tơviãq rùp sì Pitrai dơlãp kaya gơhluh.5Yơu nữn, iỡuq ngãq pa-mơtai dơgrữq vơnah dòq pãq ala hlùq — yơu arĩh athãm, tasỡuq nrãc, ham khiãng, ham ưng iãh sàq, sì ham guam, nữn ham guam la kaya duh talơvãt rùp rãp,6kơyua mưng dơgrữq kaya nĩ nữn kaya anõc mơvai prõng Yàc Pô Lơngĩq hũ ãn trôh,7nữn halơu dih, pơnõq adơi sơai kung song yàp nao dơlãp dơgrữq kaya nữn, tũq pơnõq adơi sơai dòq hadiuq dơlãp pơnõq nhũ.8Nữn tũq nĩ pơnõq adơi sơai iỡuq suãq tlàq dơgrữq kaya nĩ — yơu kaya ơnõc mơvai prong, nong mơvai, kaya sơnơng iãh mơsãc, đơp siẽq, sigỡuq sì pơnuaĩq đơp tasỡuq nrãc tơviãq mưng mơvah drơi.9Juơi đơp lor ga gỡuq, kơyua pơnõq adơi sơai song wàq tlàq anàq mơnuĩh tlãq sigỡuq sì dơgrữq vruãq rơđãp ngãq rơđãp iãh nhũ hũ,10sì pơnõq adơi sơai song chồq tơma anàq mơnuĩh vơhrơu, nữn la mơnuĩh ãn hũ ngãq vơhrơu dơlãp kaya pãc thơu tui sẽq vlai Pitao pajỡc tơviãq nhũ hũ,11la anĩh nữn ôh hũ mơnuĩh Gơ-rec sì mơnuĩh Ju-đa, mơnuĩh sìq kalìq sì mơnuĩh ôh sìq kalìq, mơnuĩh ôh thơu pơnuaĩq gơtha, mơnuĩh Si-thê, mơnuĩh halỗt, hẽla mơnuĩh lơnang lơnai, nữn Yàc Dõc Pơ-tlah la dơgrữq kaya, sì dơlãp dơgrữq kaya.12Yơu nữn, yơu mơnuĩh hũ duỡt ruãh Yàc Pô Lơngĩq hũ, la mơnuĩh sơđah sì hũ khiãng duman, iỡuq chồq tơma hatai anĩt duman, hũ hatai siàp, vơviar rùp, lơnguh siàp, sì ãt-ỡl,13iỡuq ãt-ỡl di gỡuq sì wàq tơleh di gỡuq, mơyah làiq yơu mơnuĩh halơi nữn hũ kaya hagĩq đơp rơbòp sì mơnuĩh tơmo, nữn yơu Yàc song tơleh dlàiq pơnõq adơi sơai yơu halơi, pơnõq adơi sơai kung iỡuq tơleh dlàiq pơnõq nhũ yơu nữn.14Nữn pãq dlòc rlao avih dơgrữq kaya nữn, iỡuq chồq mãq kaya khiãng duman, nữn la akôh pơtlãp tơbuãq wil tãl.15Iỡuq luơi kaya dadu lơngai Yàc Dõc Pơ-tlah hũ apãt akõq dơlãp hatai pơnõq adơi sơai, nữn pơnõq adơi sơai kung iơu mai trôh pa kaya dadu lơngai nữn dơlãp sa rùp phàp sì iỡuq ràc tơviãq mưng hatai thơu ỡn ngai.16Iỡuq luơi ga Pơnuaĩq Yàc Dõc Pơ-tlah hadiuq prãn khãc dơlãp pơnõq adơi sơai savĩq dơlah dơlai, tũq pơto pơđar mưng avih dơgrữq kaya jãc sơdah, sì paluơ padờp gỡuq mưng dơgrữq sơrãq đơp chrih, dơgrữq rơgãm sơrãq đơp adoh sì dơgrữq diãng đơp adoh sơ-uỗt mơyòp, iỡuq đơp adoh mưng kaya ỡn ngai dơlãp hatai drơi pioh ga Yàc Pô Lơngĩq.17Dơgrữq vruãq nữn pơnõq adơi sơai ngãq, bôh làiq la mưng pơnuaĩq đơp hẽla mưng vruãq ngãq, iỡuq ngãq avih dơgrữq kaya dơlãp angãn Yàc, la Yàc Je-su, gơnang mưng Pitrai nữn ỡn ngai Yàc Pô Lơngĩq, la Ama.18Mơnuĩh ngãq sơdiuq, iỡuq duh huaĩq vơsàc drơi, tui drưh yơu nữn la kaya salơnuãq dơlãp Yàc.19Mơnuĩh ngãq vơsàc, iỡuq anĩt duman sơdiuq drơi, sì juơi ngãq gơmrữq sì sơdiuq drơi.20Mơnuĩh ngãq anàq, iỡuq pãc sãp ami ama drơi dơlãp dơgrữq vruãq, kơyua nĩ la kaya siàp hatai Yàc.21Mơnuĩh ngãq ama, juơi vơgeh ngãq ga anàq tơcho drơi nõng mơvai, pioh ga pơnõq nhũ ôh dơvlữq hatai.22Mơnuĩh ngãq halỗt, iỡuq pãc sãp pô drơi mưng gah vơnah rơlo rùp dơlãp dơgrữq vruãq, ôh iỡuq tũq hũ mơta pô iãq mưng yơu dơgrữq mơnuĩh pioh mãq hatai aràc, nữn la mưng hatai tơpãq viãq, gãm duh huaĩq sì Yàc.23Bôh làiq pơnõq adơi sơai ngãq sa kaya hagĩq nữn, kung iỡuq ngãq tơviãq mưng dơlãp lơ-ô hatai yơu ngãq ga Yàc nữn ôh iỡuq ngãq ga anàq mơnuĩh,24kơyua thơu làiq kơyua mưng Yàc drơi ròq hũ tồq mãq kaya ban ngãq apôh hama drơi. Pơnõq adơi sơai ãn ngãq halỗt mơnãq ga Yàc, nữn la Yàc Dõc Pơ-tlah.25Kơyua mơnuĩh halơi ngãq kaya ôh tơpãq ròq tồq mãq wỡq kaya nữn mơnuĩh nữn song ngãq savĩq ôh tơpãq, sì ôh hũ kaya gah vơnah.
FAR EAST BROADCASTING COMPANY