Acts17

1Hadơi sì tũq gãt tơpa palơi Am-phi-bô-lit sì A-bô-lô-ni, pơnõq nhũ trôh palơi Te-sa-lô-ni-ka, anĩh hũ sa voh sàc pơtõm mơnuĩh Ju-đa.2Tui yơu vruãq lơđãp ngãq, Pol trôh pơjũm sigỡuq sì pơnõq nhũ, sì dơlãp tlơu harơi Sa-bat, ung pơrjai sì pơnõq nhũ, gơnang mưng dơlãp Sơrãq Sơđah.3Ung pơh Srãq Sơđah tơviãq sì ràc pa-tơviãq làiq Yàc Dõc Pơ-tlah iỡuq ãt pơđìq pơđua sì hadiuq wỡq mưng kaya mơtai. Ung đơp: “Je-su nữn hlãq akhàt vrơi thơu ga pơnõq adơi sơai nữn la Yàc Dõc Pơ-tlah.”4Hũ tơkìq mơnuĩh Ju-đa iỡuq hatai ngãq tui pơnuaĩq, nao tui Pol sì Si-la, dơlãp nữn hũ lũ mơnuĩh Gơ-rec duh huaĩq gãm sì hũ lũ mơnuĩh kamơi mơda gơnãp mơ-àc mơyàc.5Nữn dơgrữq mơnuĩh Ju-đa ôh pãc-tui hũ hatai lơmùq mơvai; pơnõq nhũ mơrũp gỡuq jàq dơgrữq tơpuôl iãh mơsãc pãq lơniãu dơràq prõng sì iơu pơtõm sa tơpuôl lũ vual vơla wỡq, ngãq sơrỗh sơrãh avih palơi prõng. Pơnõq nhũ gơluh tơmã sàc Ja-sôn, sơga mãq Pol sì Si-la pa-tơviãq mơta pãq anãq vual vơla pơnõq nhũ.6Nữn tũq ôh duah bôh dua aràc ung, pơnõq nhũ katũc Ja-sôn sigỡuq sì hadùp aràc adơi sơai tơmo tơviãq pãq anãq dơgrữq mơnuĩh pô gơnuar apãt akõq dơlãp palơi prõng, vloh driãu tơgùq, làiq: “Dơgrữq mơnuĩh ngãq salũng sơlãng dun kơyua nĩ, pơnõq nhũ kung song trôh pãq đì vloh.7Dơgrữq mơnuĩh nữn Ja-sôn tồq ròq nĩ. Tơpuôl nhũ song jơdrãq wỡq sì dơgrữq gơnuar pơđar Se-sa, tơpuôl nhũ đơp hũ sa pitao tơmo — la Je-su.”8Tũq hmỡq dơgrữq pơnuaĩq nữn, tơpuôl vual vơla sì dơgrữq pô apãt akõq palơi prõng kung dòq ôh sũp.9Nữn hadơi sì tũq tồq mãq jĩn sơkãq dỡc ala mưng Ja-sôn sì dơgrữq mơnuĩh dòq wỡq, avih pô gơnuar apãt akõq luơi ga pơnõq nhũ nao.
10Yơu nữn, mư mơlãp nữn, pơnõq adơi sơai va Pol sì Si-la nao Be-re. Dơlãp tũq trôh anĩh, pơnõq nhũ tơmã sàc pơtõm mơnuĩh Ju-đa hũ.11Dơgrữq mơnuĩh nĩ chơrmãh chơrmai rlao sì mơnuĩh dòq Te-sa-lô-ni-ka, kơyua pơnõq nhũ viãq hũ hatai tồq mãq pơnuaĩq Yàc, dơgrữq harơi iãq Sơrãq Sơđah pioh thơu dơgrữq kaya nữn iỡuq yơu nữn lơĩh.12Yơu nữn, viãq, hũ lũ mơnuĩh dơlãp pơnõq nhũ ưng pãc-tui, gãm sì hũ tơkìq mơnuĩh kamơi Gơ-rec mơda gơnãp sì hũ lũ mơnuĩh lakơi.13Nữn tũq mơnuĩh Ju-đa dòq pãq Te-sa-lô-ni-ka thơu Pol kung ãn pơto akhàt pơnuaĩq Yàc Pô Lơngĩq pãq Be-re, nữn pơnõq nhũ trôh pachôh pasũl sì ngãq salũng sơlãng ga tơpuôl lũ.14Mư tũq nữn, pơnõq adơi sơai va pa-đuaĩq Pol tơviãq gah tơsìq, dòq Si-la sì Ti-mô-the dòq wỡq pãq đỡn.15Dơgrữq mơnuĩh va jơlàt Pol va ung trôh tãl palơi A-then. Hadơi sì tũq tồq pơnuaĩq ngãq gơnĩt Pol pơyua ga Si-la sì Ti-mô-the, hakơi dua aràc pơnõq nhũ iỡuq trôh anĩh ung sơmar dơrah nữn siàp rlao, nữn pơnõq nhũ gơlàiq mai wỡq.
16Dơlãp tũq dòq A-then chàc pơnõq nhũ trôh, vơngãq hatai Pol tơviãq jỡc nõng mơvai uãn dơlãp ung tũq ung bôh palơi vãq lũ rùp rãp.17Yơu nữn la ung pơrjai sì mơnuĩh Ju-đa sì dơgrữq mơnuĩh duh talơvãt Yàc Pô Lơngĩq tơmo dơlãp sàc pơtõm, kung yơu sigỡuq sì dơgrữq mơnuĩh ung pãp dơgrữq harơi lơniãu dơràq.18Nữn kung hũ dơgrữq mơnuĩh mơgrũ jãc rgơi gah E-pi-su-ri-en sì gah Stoc-sen pơrjai sì ung. Hũ tơkìq mơnuĩh đơp: “Mơnuĩh lũ pơnuaĩq nĩ ưng đơp hagĩq nữn?” Hũ tơkìq mơnuĩh tơmo đơp: “Iãq yơu ung nữn pơto akhàt dơgrữq yàc krơi tơmo,” Kơyua Pol akhàt vrơi pa-thơu Pơnuaĩq Siàp mưng Yàc Je-su sì kaya hadiuq wỡq.19Pơnõq nhũ mãq Pol va trôh pãq anĩh A-re-ô-ba, vloh tơnĩa: “Lakơu vrơi ga pơnõq hlãq thơu pơnuaĩq pơto pơđar vơhrơu nữn ung ãn pơto nữn la hayơu nữn?20Kơyua ung đơp hũ pơnuaĩq pơnõq hlãq hmỡq chrih tanĩa, yơu nữn pơnõq hlãq ưng thơu dơgrữq pơnuaĩq nữn hũ gơtha yơu halơi.”21(Kaya yơu nữn la vual vơla A-then sì dơgrữq thuãi chrih hadiuq pãq đỡn kung luơi lũ tũq jơ mĩn pioh ràc akhàt hẽla hmỡq vruãq vơhrơu.)
22Yơu nữn, Pol dòq dỡc di khrãh pãq anĩh A-re-ô-ba akhàt:
“Pa-thơu avih pơnõq adơi sơai la mơnuĩh A-then, hlãq bôh pơnõq adơi sơai pãc-tui duh lũ pơnẽq viãq.
23Kơyua tũq hlãq nao gãt sì iãq pơweh dơgrữq mơnuĩh duh talơvãt pơnõq adơi sơai hũ, hlãq bôh hũ sa voh ban talơvãt, wãq ơkhar: ‘Duh Talơvãt Yàc Ôh Thơu Angãn.’ Yơu nữn, yàc ôh thơu angãn nữn pơnõq adơi sơai duh talơvãt nữn la yàc hlãq ràc tơviãq ga pơnõq adơi sơai.24Yàc Pô Lơngĩq, la Yàc song chrơng pajỡc dun kơyua sì dơgrữq kaya dơlãp đỡn, kơyua la Yàc lơngĩq sì tơnãh hũ, yơu nữn Pitrai ôh hadiuq dơlãp dơgrữq kakôh talơvãt mưng tơngãn anàq mơnuĩh padỡc tơgùq.25Pitrai kung ôh chàc plàq tơngãn anàq mơnuĩh duh vruãq ngãq yơu Pitrai siẽuq sier kaya hagĩq, kơyua mĩn Pitrai vrơi ga dơgrữq mơnuĩh kaya hadiuq, yuà suãq sigỡuq sì dơgrữq kaya tơmo.26Kơyua mưng sa aràc mơnuĩh, Pitrai song pajỡc tơviãq dơgrữq pơjẽh pơtiàt mơnuĩh hadiuq pãq dlòc voh hlùq, hadơi sì tũq ngãq gơnĩt tũq lơwah pioh vrơi ga pơnõq nhũ sì kanon rơnuãi phũm pơnõq nhũ dòq hadiuq,27pioh pơnõq nhũ duah iãq Yàc Pô Lơngĩq sì thơu yơh pơnõq nhũ iãq pơweh jỡc kaya trôh jẽq sì duah pãp Pitrai. Nữn Pitrai ôh dòq atah di mơnuĩh halơi dơlãp pơnõq drơi ôh.28Kơyua dơlãp Pitrai, pơnõq drơi hadiuq, mơgơi, sì dòq gãm, kung yơu pơnuaĩq sa aràc mơnuĩh dơlãp dơgrữq mơnuĩh đơp pơđĩc pơnõq adơi sơai hũ đơp, làiq: ‘Pơnõq drơi kung la anàq tơcho Pitrai hũ.’29Yơu nữn, kơyua pơnõq drơi la anàq tơcho Yàc Pô Lơngĩq hũ, yơu nữn pơnõq drơi juơi sơnơng làiq Yàc Pô Lơngĩq dơgrữq kaya hũ drưh yơu mữh, priãq, hẽla patơu — dơgrữq rùp rãp hũ ngãq tơviãq kơyua mưng kaya khưh rgơi sì dlò sơnơng bôh anàq mơnuĩh hũ.30Kơyua yơu nữn, Yàc Pô Lơngĩq song tlàq luơi dơgrữq rài siẽuq kaya thơu pãc nữn, sì tũq nĩ Pitrai pơđar ga avih dơgrữq mơnuĩh dòq dơgrữq anĩh iỡuq mơvai tlàq dlàiq.31Nữn la kơyua Pitrai song ngãq gơnĩt harơi Pitrai ròq chahrơna dun kơyua dơlãp kaya tơpãq rĩng kơyua mưng Pitao nữn Pitrai song duỡt ruãh. Yàc Pô Lơngĩq song ngãq chưng mưng Pitao nữn sigỡuq sì dơgrữq mơnuĩh mưng sa kaya ngãq Pitrai hadiuq wỡq mưng kaya mơtai.”
32Tũq pơnõq nhũ hmỡq mưng kaya hadiuq wỡq mơnuĩh mơtai hũ, hũ tơkìq mơnuĩh siẽq siẽl Pol; nữn dơgrữq mơnuĩh tơmo nữn đơp: “Pơnõq hlãq ròq hmỡq ung đơp wỡq mưng vruãq nĩ.”33Hadơi nữn, Pol tơviãq nao tlah mưng pơnõq nhũ.34Nữn hũ hadùp aràc nao tui ung sì pãc-tui, dơlãp katih nữn, hũ Đi-ô-ni-si-ut,, la sa mơnuĩh dơlãp tơpuôl jơnũm A-re-ô-ba, sì sa aràc mơnuĩh kamơi angãn la Đa-ma-ri, sigỡuq sì dơgrữq mơnuĩh tơmo.

FAR EAST BROADCASTING COMPANY

https://app.library.bible/content/d703d3283f8af40e