Acts16
1Pol kung trôh pãq Đet-bơ sì Lit-trơ; sì dih, pãq đỡn hũ sa aràc mơnuĩh mơgrũ angãn la Ti-mô-the, anàq lakơi sa aràc mơnuĩh kamơi pãc-tui jơlàt duh talơvãt Ju-đa hũ, nữn ama la mơnuĩh Gơ-rec.2Adơi sơai dòq pãq Lit-trơ sì Y-kô-ni kung sơ-uỗt mơyòp nhũ.3Pol ưng Ti-mô-the nao sigỡuq sì drơi; kơyua nữn, ung ngãq adãt sìq kalìq ga nhũ kơyua mơnuĩh Ju-đa dòq dơgrữq anĩh nữn kung thơu ama Ti-mô-the hũ la mơnuĩh Gơ-rec.4Tũq pơnõq nhũ nao gãt dơgrữq palơi, pơnõq nhũ pơjao hakơi ga dơgrữq Sàc Pơjũm Sơđah dơgrữq pơnuaĩq ngãq gơnĩt iỡuq rơmiãq pioh nữn dơgrữq mơnuĩh gơnuar pơđar sì dơgrữq pô tơha pãq Je-ru-sa-lem song ngãq gơnĩt.5Yơu nữn, dơgrữq Sàc Pơjũm Sơđah hũ prãn khãc dơlãp voh tui sì dơgrữq harơi kung pơtãl tơgùq lũ mơnuĩh pãc-tui.6Pol sigỡuq sì tơpuôl mơyơu nao gãt tơpa dơgrữq phũm pơweh pãq gah Phi-ri-gi sì Ga-la-ti, kơyua Yàc Vơngãq Sơđah song pakỡuq pơnõq nhũ akhàt vrơi pa-thơu pơnuaĩq Yàc dơlãp lơgar char A-si.7Dơlãp tũq trôh jẽq lơgar Mi-si-a, pơnõq nhũ sơga nao tơmã Bi-thi-ni, nữn Vơngãq Sơđah Yàc Je-su hũ ôh vrơi gơnuar ga pơnõq nhũ.8Kơyua yơu nữn, tlàq luơi Mi-si-a, pơnõq nhũ trỗt pãq palơi Trô-ãt.9Dơlãp mơlãp, Pol pìq lapơi bôh kaya pabôh: Hũ sa aràc mơnuĩh Ma-se-đoan dòq dỡc pãq đỡn, iơu ung, làiq: “Lakơu iỡuq trôh Ma-se-đoan dõc pơnõq hlãq.”10Yơu nữn, hadơi sì tũq Pol bôh kaya pabôh nữn, mư tũq nữn pơnõq hlãq tơgùq nao pãq Ma-se-đoan, kơyua pơnõq hlãq pãc làiq Yàc Pô Lơngĩq song duỡt ruãh pơnõq hlãq pơto akhàt Pơnuaĩq Siàp ga pơnõq nhũ.11Kơyua yơu nữn, mưng Trô-ãt, pơnõq hlãq đìq ahòq nao trôh tơpãq Sa-mô-tra-sơ, sì harơi hadơi, pơnõq hlãq trôh pãq Ne-a-bô-li.12Mưng đỡn, pơnõq hlãq nao trôh pãq Phi-lip, pãq palơi prõng rlao avih dơlãp phũm Ma-se-đoan, sa palơi pơweh gah mơnuĩh Rô-ma hũ, sì pơnõq hlãq dòq wỡq pãq palơi prõng nĩ tơkìq harơi.13Dơlãp harơi Sa-bat, pơnõq hlãq tơviãq pãq gah lơniãu sơvòq bãc palơi, jẽq gah kròc, la anĩh pơnõq hlãq sơnơng làiq ròq hũ anĩh pioh iơu lakơu. Vloh pơnõq hlãq dòq guh wỡq đơp dlài sì dơgrữq mơnuĩh kamơi ãn pơjũm pơtõm pãq đỡn.14Hũ sa aràc mơnuĩh kamơi dih angãn Li-đi, ngãq vruãq kãq pa-vlơi pơchà lơngãt mưng palơi Thi-a-ti-rơ trôh, la mơnuĩh duh huaĩq sì duh talơvãt Yàc Pô Lơngĩq, ãt pa-hmỡq pơnõq hlãq. Yàc pơh hatai nhũ, ngãq ga nhũ hmỡq gơnĩt trôh dơgrữq pơnuaĩq Pol đơp.15Dơlãp tũq nhũ sì gãm avih sàc anĩh ãt ngãq adãt Bãp-tem, nhũ aneh athar jàq pơnõq hlãq: “Mơyah làiq pơnõq ung iãq bôh hlãq la mơnuĩh tui tơpãq sì Yàc, nữn lakơu jàq tơmã sàc hlãq sì dòq.” Nhũ ơnẽh athar iỡuq hatai pơnõq hlãq yơu nữn.16Sa harơi dih, ãn nao jơlàt trôh pãq anĩh iơu lakơu, pơnõq hlãq pãp sa aràc mơnuĩh kamơi ngãq halỗt kađòc grũ pajơu iãq rơsãq rơsi ãp nhũ. Nhũ song ngãq tơviãq hajũc hlàq ga pô drơi viãq lũ ngãq mưng kaya pơnẽq iãq rơsãq rơsi.17Mơnuĩh kamơi nĩ nao tui gah hadơi Pol sì pơnõq hlãq, driãu tơgùq: “Dơgrữq mơnuĩh nĩ la halỗt mơnãq Yàc Pô Lơngĩq Dlòc Dloòng hũ. Pơnõq nhũ akhàt vrơi pa-thơu ga pơnõq ung jơlàt dõc pơ-tlah.”18Mơnuĩh kamơi nữn ngãq yơu nữn dơlãp lũ harơi. Iãq kãn dơmãn uãn mưng nhũ, nữn Pol gơlàiq wỡq đơp sì kamlai nữn, làiq: “Mãq Angãn Yàc Dõc Pơ-tlah Je-su, kơu pơđar ga hã iỡuq tơviãq tlah mưng kamơi nữn.” Mư tũq nữn nhũ tơviãq.19Nữn tũq dơgrữq mơnuĩh pô kamơi nữn hũ iãq tũq lơwah duah jĩn tũq nĩ ôh dòq tơra, nữn pơnõq nhũ mãq Pol sì Si-la, vloh katũc dua aràc trôh pãq dràq kãq pa-vlơi pioh pãp mơnuĩh pô hũ gơnuar apãt akõq pãq đỡn.20Tũq song va dua aràc nao trôh pãq anãq dơgrữq pô apãt akõq, pơnõq nhũ yãq: “Dơgrữq mơnuĩh nĩ ngãq pa mơgơi hatai pãq palơi prõng pơnõq drơi. Pơnõq nhũ la vual vơla Ju-đa.21Pơnõq nhũ pơto akhàt dơgrữq adãt adia nữn vual vơla Rô-ma pơnõq drơi ôh hũ gơnuar tồq mãq hẽla ngãq tui.”22Vloh tơpuôl vual vơla tơgùq nao jơdrãq Pol sì Si-la, yơu nữn dơgrữq pô apãt akõq hẽt ao pơnõq nhũ tơviãq sì pơđar poh pơnõq nhũ mưng gai hơwai.23Tũq song atòc poh dua aràc nhũ lũ vloh, pơnõq nhũ va dua aràc nhũ tơmã sàc jam sì pơđar ga mơnuĩh apãt akõq sàc jam iỡuq iãq jàc nhũ gơjãp.24Hadơi sì tũq tồq mãq pơnuaĩq pơđar, mơnuĩh apãt akõq sàc jam krỡq pơnõq nhũ pa-tơmã dơlãp adũq kơnãm sì vuh kũm tơkai pơnõq nhũ wỡq.25Pơgãp khrãh mơlãp, Pol sì Si-la ãn iơu lakơu sì đơp adoh sơ-uỗt mơyòp Yàc Pô Lơngĩq, dòq dơgrữq mơnuĩh krỡq tơmo nữn pa-hmỡq.26Dơvruh dơvrah, hũ sa kaya sơđô mơgơi tơnãh prõng viãq, tơviãq jỡc rơnỡq sàc jam sơđô mơgơi; mư tũq nữn, avih dơgrữq mơvah bãc hũ tarơpơh tơviãq, sì talơi sơrẽng akãq dơgrữq mơnuĩh wàq tarơsuãq tơviãq.27Mơnuĩh apãt akõq sàc jam kơtuãq phuah mơdưh tơgùq, bôh dơgrữq mơvah bãc sàc jam tarơpơh avih; ung nữn suãq đao, pioh sơga pa-mơtai rùp kơyua sơnơng mơnuĩh kađòc krỡq song đuaĩq dỡuq avih vloh.28Nữn Pol driãu prong sãp, làiq: “Juơi ngãq pa-mơtai rùp drơi, kơyua avih pơnõq hlãq mĩn dòq pãq nĩ.”29Yơu nữn, mơnuĩh apãt akõq sàc jam pơđar mãq apôi đeng, sì đuaĩq sơmar tơmã dơlãp, tatơh huaĩq viãq. Ung pơviar rùp pãq anãq Pol sì Si-la,30vloh va pơnõq nhũ tơviãq pãq lơniãu, tơnĩa: “Ơ pơnõq ung, hlãq iỡuq ngãq hagĩq pioh hũ dõc tlah?”31Pơnõq nhũ drơ: “Iỡuq pãc-tui vẽq Yàc Je-su, nữn ung sì sàc anĩh ung ròq hũ dõc pơ-tlah.”32Dua aràc pơnõq nhũ akhàt pơnuaĩq Yàc ga ung, sigỡuq sì avih dơgrữq mơnuĩh dơlãp sàc.33Dơlãp mơlãp tũq jơ nữn, mơnuĩh apãt akõq sàc jam va pơnõq nhũ nao rao kaya dơgrẽh hlôh — vloh ung sì dơgrữq mơnuĩh dơlãp sàc mư tũq nữn ãt ngãq bãp-tem.34Hadơi nữn ung va Pol sì Si-la nao pãq sàc drơi, sì pồ kaya bõc ga pơnõq nhũ. Ung sigỡuq sì dơgrữq mơnuĩh dơlãp sàc drơi uỗt sơh viãq kơyua drơi song pãc-tui Yàc Pô Lơngĩq.35Trôh mư-ờp, dơgrữq mơnuĩh pô apãt akõq pơđar ga lĩng iãq jãc, làiq: “Iỡuq luơi ga dơgrữq mơnuĩh nữn nao.”36Mơnuĩh apãt akõq sàc jam akhàt wỡq dơgrữq pơnuaĩq nữn ga Pol, làiq: “Dơgrữq mơnuĩh pô apãt akõq pơđar hlãq pơrlao pơnõq ung nao. Yơu nữn, tũq nĩ, lakơu pơnõq ung tơviãq sì nao jơlàt dadu lơngai.”37Nữn Pol đơp sì pơnõq nhũ: “Pơnõq nhũ song poh atòc pơnõq hlãq pãq anãq vual vơla nữn ôh chahrơna, pơnõq nhũ thơu pơnõq hlãq la vual vơla Rô-ma, vloh mãq pơnõq hlãq krỡq tơmã sàc jam. Tũq nĩ pơnõq nhũ vloh ưng ngãq dađỡuq pơlao pơnõq hlãq nao yơh? Ôh hũ vruãq nữn. Rùp phuỗt pơnõq nhũ iỡuq trôh va pơnõq hlãq tơviãq.”38Dơgrữq mơnuĩh lĩng iãq jàc akhàt wỡq dơgrữq pơnuaĩq nữn ga pô apãt akõq; tũq hmỡq thơu Pol sì Si-la la mơnuĩh Rô-ma, pơnõq nhũ kung tơtơh huaĩq.39Yơu nữn la dơgrữq pô apãt akõq trôh lakơu drơi pơnõq nhũ sì va pơnõq nhũ tơviãq, vloh lakơu pơnõq nhũ nao tơviãq tlah mưng palơi drơi.40Pol sì Si-la tơviãq tlah mưng sàc jam sì trôh pãq sàc Li-đi. Dơlãp tũq pãp wỡq adơi sơai, Pol sì Si-la paluơ padờp pơnõq nhũ, vloh pơnõq nhũ tơviãq nao tlah mưng palơi prõng.
FAR EAST BROADCASTING COMPANY