OSEAS1
1Re' i tz'ihb'amaj chupaam i huuj wili, re' i xuq'or i QaJaaw Dios, reh i Oseas rak'uun i Beeri, noq xi wihik chi reyil Judá i Uzías, i Jotam, i Acaz, i Ezequías. Re' noq xwihik chi reyil Israel i Jeroboam rak'uun i Joás.2Eh noq xutoq'aa' q'orik i QaJaaw Dios ruuk' i Oseas, je' wili i xuq'or:
Re' taqe i aj Israel je' pan k'oyomal wilkeeb', ruum xkikanaa' nunimjiik. Ruum aj re', re' hat Oseas chak'am chi awehk'een jino'q i k'oyoom laj ixoq, eh naa ruwihiik taqe awak'uun ruuk', naa kikahniik chi rak'uun k'oyoom laj ixoq taqe, inki.3Eh re' i Oseas xuk'am wo' chi rehk'een jinaj i k'oyoom laj ixoq Gomer rub'ihnaal, rixq'uun i Diblaim, eh x-aasjik jinaj i rak'uun ruuk'.4Eh re' i QaJaaw Dios je' wili i xuq'or reh i Oseas:
Re' hat Jezreel i rub'ihnaal i k'isa k'un chakoj, ruum re' hin ilook' i nuyeew chi tojariik i kimahk taqe i riih rumaam Jehú, re' i wihinaq chi reyil. Eh ruum taqe ikaansanik xub'an ar i Jezreel, re' hin naawisam chi taaq'anik ar Israel, inki.5Eh chupaam taqe i q'iij re' re', wach k'ixkaab' Jezreel naawisam i kajaawriik taqe i soldado kichalik Israel, inki.6Re' i Gomer x-aasjik wo' chik ruha'lak'uun, k'isaxq'un chik, re' i QaJaaw Dios je' wili i xuq'or reh i Oseas:
Re' hat Lo-ruhama i rub'ihnaal chakoj i k'isa xq'un, ruum re' b'ihnaal re' re' iraaj ruq'orom chi re' i hin ma' naa ta nuketelaam kiwach i aj Israel, ma' naa ta nukuyum i kimahk.7Eh re' taqe i aj Judá keh konaa nuketelaam kiwach, eh re' hin i kaJaaw i ki Dios naa nuko'liniik keh. Xa re' la' ma' ruuk' ta q'aq'inik, ni xata ruuk' flecha, ni xata ruuk' i q'aslaj ch'ihch', ni xata ruuk' taqe aj q'aq'ineel kichalik rij kawáyu.8Eh noq re' Gomer xuq'uch reh i ch'uuch' i k'isa rixq'uun, x-aasjik wo' chik jinaj i k'isa rak'uun.9Re' i QaJaaw je' wili i xuq'or reh i Oseas:
Lo-ami i rub'ihnaal i k'isa k'un chakoj, ruum re' b'ihnaal re' re' iraaj ruq'orom, re' taq i hat ma' hat ta taq chik nutinamiit, re' hin ma' hin ta wo' chik taq aaDios, inki.10Xa re' la', re' taqe i aj Israel naa kik'ihaaxb'iik, naakiponiik chi je' kik'ihaal i saniib' chi chii' i palaw, ma' naa ta rukuyjiik kajaljiik. Eh ma' naa ta chik ruq'orariik keh ruum i Dios chi ma' hat ta taq nutinamiit. Je' la' wili i naa ruq'orariik keh: Re' taq i hat, hat taq nutinamiit i hat, hin k'achlik Dios, inko'q.11Eh naa wo' chik kimolom kiib' i aj Judá kuuk' i aj Israel, naakipab'aam jinaj k'amal kib'eeh. Ruum naa wo' chik kehteesjiik cho pantaq tokoom tinamit, ruum re' taqe q'iij re' re' xiik' naah nimaal wach ar Jezreel.1Re' Dios je' wili i xuq'or: Re' taq i hat naa taq aq'orom keh awuch aj Israel chi nutinamiit chik taqe, chi re' taqe ixoq nu ketelaam chik kiwach, inki. Re' i je' k'oyomal ixki a'n i aj Israel2Re' i QaJaaw Dios je' wili i xuq'or: Chaq'il taq i je' atuut noq wilik chi chukanaa' i yiib' wach na'ojb'al. Eh re' reh ma' je' ta chik wehk'een noq wilik, ma' hin ta chik rub'ahiil noq wilkiin. Eh chi maa rub'an chik i je' k'oyomal, eh maa ruk'ax chik reje wach tokoom winaq.3Eh wila' ma' xukanaa' rub'aan taqe re', re' hin naa nukanaam chi ma' xta chik i wilik reh, eh chi t'uslik, naa nukanaam chi je' rukab' noq xutoq'aa' cho k'acharik. Eh naa nukanaam chi je' rukab' i chiq yuuq', naa rukimiik ruum i ruchiqkaal chii'.4Eh ma' naa ta nuketelaam kiwach taqe i rak'uun rixq'uun, ruum re' reh xuk'am taqe pan je' k'oyomal.5Re' i je' kituut noq wilik, xuq'eb' i ruloq'il noq xuq'or chi je' wili: Naa wojiik chi kisik'ariik i winaq kik'axwik weh i kiye'wik nuwa' nuhaa', nu holohaq itz'ihy re' ruuk' i riij chikop, re' kiye'wik weh i xela itz'ihy, re' kiye'wik waseite.6Ruum aj re', re' hin je' k'iix i naa nukojom chi tz'apb'al paam i rub'eeh, je' naa nukojom kotimaj koraal chi riij, reh chi ma' nee ta rureq i rub'eeh.7Re' reh naa wo' naq chik rusik'im taqe i winaq ink'axwik reh, eh ma' naa ta chik rureqem, ruum i re' je' wili i naa ruq'orom: Re' hin naa wo' chik wojiik ruuk' i peet nub'ahiil noq wilik, ruum ruuk' i reh ma' xta naq reet wilkiin, ma' je' ta rukab' i yu'naak, inko'q, chi wiij.8Xa re' la' re' reh, ma' xukoj ta rehtaal chi re' wo' naq i hin xin ye'wik reh i rutrigo, i ruvino, i raseite, eh chi re' hin xin k'ihaaxb'isanik reh i ru oro, i ru plata i ruyeew chi rumayiij chuwach i tiyoox Baal.9Eh re' i hin paruq'ijil i rumolariik i wach taqe i rutik i ma' naa ta chik nuye'em reh i wach i trigo, i vino. Eh naa wo' chik nuq'uchum reh i itz'ihy re' ruuk' riij chikop, je' wo' i xela itz'ihy nuye'em naq reh chi rub'urb'aal.10Eh re' hin panaq'kiwach i je' winaq i q'e' k'axwik reh naa nuq'uchum i chib'ih reh, naa nukanaam chi t'uslik, ma' jino'q naa ruko'liniik reh panuq'ab'.11Eh ma' naa ta chik nuye'em q'ab' chi naa rub'anam i ru ninq'iij inye'wik rusuqkiil ruk'ux, je' wo' taqe i runinq'ijiik i ak' poh, i hi'limb'al q'iij. Je' wo' chu'nchel i ru ninq'iij.12Re' hin naa nusacham kiwach i ru-uuva, i ruhigo, re' i je' wili i ruq'or chikiij: Re' taqe wili xkiyeew weh i je' i winaq q'e' kik'axwik weh, inki. Eh re' i hin naa nukanaam chi xa je' chik ch'ahn taqe i rutik, naa ruk'uxariik kuum taqe i josq'laj chikop.13Re' hin naa nuye'em chutojariik i ru mahk i je' ehk'eenb'ees re' re', ruum taqe i k'ataj i insensia xub'an chikiwach i Baal. Re' noq i rukoj lopq'aaq', i karena chutahqaljiik taqe i je' ruwinaqiil q'e' k'axwik reh. Eh re' hin xiruq'eb' chi riij ruk'ux, inki i QaJaaw Dios. Re' i QaJaaw Dios xuketelaaj wo' chik wach i rutinamiit Israel14Re' i QaJaaw Dios je' wili i xuq'or: Re' hin naa nuk'amam reje panchiq yuuq' Sinaí i je' ehk'eenb'ees re' re', ar naa nuq'orom reh chi q'e' naa nu k'axam.15Eh naa wo' chik nuye'em q'ab' chi naa ruwachiniik taqe i ru-uuva, naa nuye'em chi ruye'aab' i wach k'ixkaab' Acor rub'ihnaal, reh chi nee wo' chik i rureq i rusuqkiil ruk'ux. Eh ar neerub'an chi je' rukab' i nimanik xub'an cho pampeet, noq xwesaj chaloq Egipto.16Ma' naa ta chik ruq'orom chi je' wili: Hat dios Baal ma' ko'q ta chik weh. Je' la' wili i naa nuq'orom weh: Re' hat, i hat manlik nub'ahiil noq wilkaat, inko'q weh, inki Dios.17Eh ma' naa ta chik nuye'em q'ab' chi naa ruq'orom i kib'ihnaal taqe i xa tiyoox Baal. Ma' naa ta chik ruq'orom rib'iral chi jumpech taqe re'.18Chupaam taqe q'iij re' re' wilik i naa nuyejaam wach kuuk' i josq'laj chikop, kuuk' i chikop kirupinik pan taxaaj, kuuk' taqe aaq', reh chi ma' xta naa kuuchjiik i aj Israel. Eh ma' naa ta chik nuye'em q'ab' chi naa rub'aan i q'aq'inik, ikaansanik ruuk' flecha, ruuk' i q'aslaj ch'ihch', reh chi nee kik'acharik pansuqkiil k'uxliis.19Re' taq i hat aj Israel je' nanaakaat taq nuk'amam wuuk' chi wehk'een chi jumpech, ruum q'e' taq ti nuk'ax, naa awihiik taq wuuk' panotob'il, pansuqkiil k'uxliis, naa taq nuketelaam awach.20Re' hin naa kaat taq nuk'amam chi manlik wehk'een, parukorkiil wach k'uxliis, eh naa taq anab'eem chi hin taq aaWaJaaw.21Re' hin xti korik taq i nuq'or aweh chi chupaam taqe ponoq i q'iij re' re' kopan taxaaj naa nuye'em chaloq i wotob'il, naa nuqaasam chaloq jab' chinaah i wach ak'al.22Eh chinaah i wach ak'al naa chik rub'anam wach i trigo, riis i uuva, aseite. Re' taq i hat je' wili taq i naa aq'orom: Jezreel, tiko'q taq.23Eh naa taq kaat nuye'em chupaam i ye'aab' re' re' chi hat taq nutinamiit, naa nuketelaam wach i Lo-ruhama. Eh re' i Lo-ami je' wili i naa nuq'orom reh: Re' hat, hat chik nutinamiit, kinko'q reh re' reh naa kiin ruq'orom chi hin ruDios. Re' Oseas xukuy ru mahk i k'oyoom laj ixoq, rujalwaach chi re' Dios xukuy kimahk i aj Israel1Re' i QaJaaw Dios je' wili i xuq'or weh: Yu'naak cha k'ax wo' chik ixoq re' re', atoob' ta wilik pan k'oyomal ruuk' i tokoom winaq. Re' hin i Dios je' wo' re' kik'axariik i aj Israel i nub'an. Atoob' ta inkiloq'ej taqe i tiyoox, atoob' ta inkik'ux i kaxlanwi'k mayijimaj chikiwach i tiyoox, inki.2Eh re' hin ho'lajuuj chi tumiin re' ruuk' i plata xnutoj chi riij i wehk'een, eh wuquub' nimaq chakach chi sebada i xnuyeew chi riij xnuk'am wo' chik chi wehk'een.3Eh je' wili i xnuq'or reh: Re' hat najt naa akahniik chi wehk'een, ma' awach ta chik i tokoom winaq naa atahqeem reje, je' wo' hoq i hin ma' awach ta wo' chik tokoom ixoq naa nuq'oreem, kinki reh.4Re' re' k'uhtb'al reh chikiwach i aj Israel chi najt naa kikahniik chi ma' xta kireey, chi ma' xta k'amal kib'eeh. Eh chi ma' xta chik i kimayiij, ma' naa ta chik kiloq'em i tiyoox ab'aj. Ma' naa ta chik ruwihiik i k'amal b'eeh aj tiij, ma' naa ta chik ruwihiik tiyoox.5Eh chi riij i re', re' taqe i aj Israel naa wo' chik kisik'im i kaJaaw i ki Dios, je' wo' hoq i kireey naa ruwihiik re' ruuk' i riih rumaam i reey David. Re' keh naa ruponiik i q'iij noq ruuk' yo'jik naa kiloch'om kiib' chuwach i QaJaaw Dios, naa wo' chik kisik'im i rotob'il. Re' i QaJaaw Dios xuq'or keh i aj Israel chi ma' k'isiin i mahk i xkian1Hat taq aj Israel chab'iraj taq i ruq'or i QaJaaw Dios. Re' reh xchalik ruk'aah, je' wili i xuq'or: Re' taqe i tinamit wili ma' jino'q i korik wach ruk'ux, ma' xta ketelinik wachiis kuuk'. Eh ma' awach ta inye'wik wajaawriik chi re' hin, i Dios.2Eh xa re' i ma' holohik taj, xa re' i chukuj q'orik, xa re' i leq', xa re' i ch'uwarisanik wach kikaxaro inki a'n Eh xa re' rub'anariik i ti' k'axik, xa re' ikaansanik inki a'n rajlaal i q'iij.3Re' i wach ak'al panti' wilik, re' taqe i k'achareel chuwach ma' xta chik kikowiil. Eh re' taqe josq'laj chikop, taqe i chikop kirupinik pan taxaaj, taqe i kar wilkeeb' pan palaw, k'ahchi' kikimiik, inki.4Re' taq i hat k'amal b'eeh aj tiij ma' xaq'il ta taq i tinamit wili, ma' xakoj ta taq kina'ojb'al, ruum eliik taq wach tib'anik kuuk'. Re' i nuk'aah wach anaah taq i hat naa wik'sam.5Re' taq i hat xanik' neenuyeew taq i ti' k'axik cha naah pan q'ij, oon chaq'ab' awuch'ihil ijalal naq nuq'oral i hin. Eh naa nusacham taq wach aatinamiit Israel.6Re' taqe i nutinamiit naa nusach kiwach, ruum i kimahk, ruum ma' xakoj ta taq kina'ojb'al. Re' taq i hat ruum chi xaq'eb' taq chi riij ak'ux i nuk'uhb'aal, re' hin, naa taq kaat wisam chi k'amal kib'eeh aj tiij. Je' wo' taq aawiih aamaam ma' naa ta nukojom taqe chi k'amal kib'eeh aj tiij.7Eh nik' wach i k'ihaaxb'ik taq i na a'n je' wo' re' i k'ihaaxb'ik i rub'an taq amahk. Je' re' noq re' hin naa nusutem taq i runimaal awach chi k'uhtb'al taq ak'ixb'ilaal.8Re' taq i hat xasuq taq chik aweh noq inki a'n i mahk i nutinamiit, ruum re' i kimayiij inak'uxlaaj taq wii' awiib'.9Re' hin chi je' taqe i tinamit, chi je' taqe k'amal kib'eeh aj tiij naa nuye'em taqe chutojariik i kimahk, ruum i kiyiib' wach na'ojb'al inki a'n10Eh naa wo' naq kianam kiwa', xama' naa ta wo' kinujiik, eh naa wo' naq kiwiriik ruuk' i kixooq, eh xama' naa ta wo' ruwihiik kak'uun kixq'uun, inki Dios. Re' i loq'inik tiyoox xkian i aj Israel11Re' i nutinamiit k'ahchi' rusahchiik i kina'ojb'al ruum i ruuk'jiik i k'ahlaj ha' inxohk'risanik, eh ruum i je' k'oyomal inki a'n12Eh inkipahqaaj kina'ojb'al reh i tiyoox re' ruuk' i chee', eh xama' kich'aq'weesjik ta wo' ruum. Eh xsahchik kina'ojb'al ruum i je' k'oyomal inki a'n xin kiq'eb' chi riij kik'ux i hin, hin k'achlik Dios.13Re' keh kiooj nah taq yuuq' chuk'atariik i kimayiij, chuk'atariik i insensia wataq yuuq' k'ixkaab', je' chi muuj taqe i tz'inuj, chi muuj taqe tuhq, chi ri'sil i rumuuj i saq chee' álamo rub'ihnaal. Eh inkik'uhtaaj reh i kak'uun kixq'uun, i loq'inik tiyoox. Re' i kixq'uun nakiwihiik pan k'oyomal, re' taqe i kil-iib' na kich'uwa'risam wach i kikaxaro.14Re' hin ma' naa ta nuye'em taqe chutojariik i kimahk taq awixq'uun chi riij i k'oyomal nakianam. Ma' naa ta nuye'em taqe chi tojariik i kimahk taq awil-iib' chi riij i ch'uwa'risanik wach kikaxaro nakianam. Eh hat wo' taq xatk'amwik kib'eeh chi xkiyeew i kimayiij chuwach i tiyoox, je' aj re' noq i ruq'eb' riib' i tinamit ma' xta runa'ojb'al.15Re' taqe i aj Israel atoob' ta wilkeeb' pan k'oyomal. Re' taq i hat aj Judá ma' a'n taq aweh i k'oyomal re' re', mat'ooj taq chikiij kiooj Gilgal, i kijohtik Bet-aven. Eh maaq'or taq i nub'ihnaal chi xama' xta rub'ehel.16Re' taq i hat aj Israel, je' taq akab' i simaroon laj q'ahxoq wakax xina q'eb' taq, chi riij ak'ux. ¿Mi konawaaj taq re' chi nee taq tinuchajeej chi je' taq hat kok' rak'uun tentzun?17Re' taqe i aj Efraín, aj looq'en tiyoox taqe, cha kanaa' taq kian peet inkaaj rub'aan.18Re' keh xa re' i xohk'rik, xa re' i k'oyomal, xa re' taqe i k'ixb'ilaal laj na'ojb'al inki a'n re' i holohik laj na'ojb'al xkiq'eb' chi riij kik'ux.19Eh xa je' kikutarik reje ruum kowlaj teew naa rub'aan keh eh naakik'uhtaam kik'ixb'ilaal, ruum irulooq'jiik taqe i tiyoox, inki i QaJaaw Dios. Re' i QaJaaw Dios xuyeew taqe panti' k'axik i aj Israel ruum i kimahk1Re' i QaJaaw Dios je' wili i xuq'or: Re' taq i hat k'amal b'eeh aj tiij, re' taq i hat aj Israel, re' taq i hat raj kamanoom i reey, chab'iraj taq: Cha naah taq i hat naa nuq'atam i q'orik, ruum i xakoj taq kixirob'aal i wilkeeb' Mizpa, xaq'at taq pan kib'eeh naah yuuq' Tabor.2Eh je' naa chaam laj jul i xak'ot taq reh chi xkiq'eb' kiib' i wilkeeb' wach k'ixkaab' Sitim, ruum aj re' naa kaat nuye'em chutojariik taq amahk.3Re' hin weht'al i kina'ojb'al, chu'nchel i aj Israel. Je' wo' taqe i aj Efraín xkian i je' k'oyomal, eh xuch'uwa'risaj kiwach chu'nchel i aj Israel.4Eh ruum i kiyiib' wach na'ojb'al ma' kinkinimaj ta chik. Re' chik kow i rumin riib' chikiwach i je' k'oyomal, eh ma' kiyeew ta chik wajaawriik i hin, hin k'achlik Dios.5Re' taqe i aj Israel ruum chi q'e' inkinimb'isaj kiib' ink'utinik chi wilkeeb' pankimahk. Eh re' taqe i aj Efraín, re' i kimahk naa ruq'eb'wiik keh, eh naa wo' kiq'ehb'iik pamahk i aj Judá keh.6Re' taqe i aj Israel naa naq chik kik'amam chaloq i kiwakax, i kitentzuun chi kimayiij chi nusik'ariik. Xa ma' naa ta wo' chik kiin kireqem, ruum xnukanaa' chik taqe.7Re' keh ma' korik ta wach kik'ux wuuk'. Re' i kak'uun kixq'uun tokoom chik inkikoj chi kajaaw, ruum i re' xa chi jumehq'iil naa nusacham kiwach i keh, je' wo' hoq i kitik, inki i Dios. Re' i ti' k'axik xye'arik chikinaah i aj Israel chikinaah i aj Judá8Chaxulej taq i tuun ar Gabaa rehtalil i q'aq'inik. Eh chaxulej taq i tuun ar Ramá. Chaq'or taq ar Bet-aven chi wilik yohb'aal, je' wo' ar Benjamín.9Re' taqe i aj Efraín xti korik chi naa kikahniik chi ma' xta wilik keh paruq'ijil i ti' k'axik. Eh chu'nchel i aj Israel naa kinab'eem chi korik chi je' re' i naa ruk'ulariik.10Re' taqe i k'amal kib'eeh aj Judá je' kikab' taqe i kijilwik paam taqe i k'ula't, re' hin naa nuye'em i nujosq'iil chikinaah.11Re' taqe i aj Efrín k'achi' kik'iik chi ti' k'axik, xi kahnik chi ma' xta chik i wilik keh ruum re' chik taqe i tiyoox xkinimaj.12Re' hin naa nusacham kiwach i aj Efraín, i aj Judá, je' rukab' i rub'an i mooh noq i rumohrisaj taqe i xa chib'ih jariik.13Eh noq naakilom taqe i aj Efraín, taqe i aj Judá, chi xiik' naah ti' kiil wilkeeb'. Re' taqe i aj Efraín naa kojiik ruuk' i runimaal wach reey ar Asiria, reh naq chi naa kik'aachjiik, xa re' la' xama' naa ta wo' kik'achjik.14Re' hin ruum nujosq'iil naa nuye'em taqe panti' k'axik i aj Efraín, je' wo' taqe i aj Judá. Je' rukab' i rub'an i kaq b'ahlam noq i ruxereb'eej i rutiib', ma' awach ta naa ruko'liniik keh panuq'ab'.15Re' hin naa nukanaam taqe chi kutkeel, korehtaal inkiyot' i kik'ux chi riij, i kimahk, eh naa wo' chik kinkinimam. Eh naa kiin kisik'im noq wilkeeb' pan ti'kiil k'uxliis, inki i Dios. Re' taqe i aj Israel xkiq'or chi naa wo' chik kinimam i Dios1Re' i tinamit je' wili i xkiq'or: Qoh sutinoq wo' chik ruuk' i QaJaaw Dios. Atoob' ta xoj ruyeew panti' k'axik, naa wo' chik kooj risam chupaam. Atoob' ta xoj ruyeew panti' naa wo' chik kooj ruk'achrisam.2Re' reh xa ruuk' wo' chik i ki'ib' ixib' q'iij naa ruye'em qak'achariik. Reh chi naa qak'achariik chuwach i reh.3Eh qachop taq qak'ux chunimjiik i QaJaaw Dios. Re' reh korik chi nee qoh rutoob'eem, je' rukab' noq i nelik chaloq i rusaq'umaal i q'iij. Eh je' rukab' noq i ruyeew chaloq i peet jab', je' wo' jab' koq'uun noq i rut'aqsaj i tik, inki taqe.4Re' i QaJaaw Dios je' wili xuq'or: ¿Chib'ih taq inawaaj chi neenub'an awuuk' i hat taq aj Efraín, je' wo' taq i hat aj Judá? Re' i nuk'axariik taq i na a'n xa je' rukab' noq inik'ik i suutz', je' rukab' i mus jab' pantaq wahq'eq jumehq'iil insahchik wach.5Re' hin xnutaq'aaj taqe ijalal nuq'oral, chuq'orariik taq aweh i ti' k'axik naa nuye'em taq cha naah. Eh nuq'or ruuk' nuchii' chi naa taq kaat nuye'em pankimik, re' i nuq'oral, je' rukab' i rub'an i saqum.6Re' i nupahqaaj taq aweh i hin, re' chi kinak'ax taq chu'nchel ak'ux, chi kinakoj taq chi hin aaDios. Re' taqe i xa chib'ih jariik chi mayiijal ma' inwaaj ta chik, inki.7Eh je' wili i xuq'or: Re' taqe i nutinamiit wili, ma' korik ta wach kik'ux wuuk', xkiq'etwachej i nuk'uhb'aal, je' rukab' i xub'an i Adán pampeet.8Chupaam i tinamiit Galaad, ma' k'isiin i yiib' wach na'ojb'al imb'aan, xa re' ikaansanik kas kichaaq' inki a'n9Re' taqe i k'amal kib'eeh aj tiij je' kikab' i juntuhb' chi ajileq' ruum inooj kikeb'aa' kiib' chi' taq b'eeh inooj Siquem, ar inkiq'at i tinamit, inki a'n ti' k'axik reh, inkikansaj.10Eh re' taqe i aj Israel, inwilow chi q'e' yiib' wach kib'anik. Re' taqe i aj Efraín xkimin kiib' chub'aan i je' k'oyomal, eh re' taqe i aj Israel xkich'uwa'risaj kiib' ruuk' i re'.11Eh re' taq i hat aj Judá nuyejaam chik wach q'iij chi naa taq kaat nuye'em panti' k'axik. Re' noq naa wo' chik wisam taqe chaloq panti' k'axik i nutinamiit Israel, inki. Re' kiyiib' wach na'ojb'al i aj Israel1Re' i QaJaaw Dios je' wili i xuq'or: Noq xwaaj naq taqe wisam panti' k'axik i aj Israel, re' taqe i aj Efraín xa chayeew chik i mahk inki a'n je' wo' taqe i aj Samaria. Eh xa re' i chukuj q'orik, xa re' i leq' inkaaj pantaq paat, pantaq b'eeh.2Re' keh ma' nkikapaaj taj chi re' hin k'ahchi' wilom i ma' holohik ta laj na'ojb'al inki a'n Xanaah re' k'ahchi' wilom chi k'ahchi'rik'iik chikinaah i kimahk inki a'n.3Re' keh ruuk' i kiyiib' wach na'ojb'al, ruuk' i chukuj q'orik inki a'n inkiyeew rusuqkiil ruk'ux i reey, je' wo' taqe i k'amal kib'eeh.4Eh re' taqe re' xa re' i ch'uwarisanik wach kikaxaro inkaaj. Eh je' kikab' i horna qoplik ruq'aq'al, ma' nluk'ariik taj noq inyuq'arik paam i ruq'oril kaxlanwi'k, korehtaal inkojarik ch'amb'esb'al reh.5Eh noq i runinq'iijeej i ruhab'ul i reey, re' taqe i k'amal b'eeh inkixohk'risaj i reey. Eh ruum i re', re' i reey inokik chub'anariik i re' ma' re' chi kixilak i yiib' wach kina'ojb'al.6Re' keh xan qop chik i kánima chub'anariik i yiib' wach na'ojb'al, xa je' chik rukab' i horna ma' inkanab'jik ta ruluk'ariik i ruq'aq'al. Eh atoob' ta woroq inkojwik ruq'aq'al, xa koqoplik wo' chi junwaar.7Eh re' taqe re' xa je' chik kiqop horna, inkikansaj taqe i wilkeeb' chi ajaab'esil, xkiq'eb' kiib' chu'nchel i kireey. Ma' jino'q chik inkipahqaaj kikuyb'al weh.8Eh re' taqe i aj Efraín xkian jinaj wach kina'ojb'al kuuk' i tokoom tinamit. Re' taqe i aj Efraín je' kikab' i kaxlanwi'k ma' xsuutjik taj, xa juntar xchaq'.9Re' keh xehteesjik i kajaawriik kuum i tokoom tinamit, xa re' la' ma' nkikoj ta rehtaal. Eh saq chik i rismaal kinaah, xama' nkikoj ta wo' rehtaal i k'ahchi' kik'ulum.10Re' taqe i aj Israel q'e' nimaq kiwach inki a'n kiib', ruum i re' k'ahchi' kik'ulum i ti' k'axik. Eh ni xata ruum taqe re', kinkaaj wo' chik kinkinimam, ni xata kinkaaj kisik'im hin, hin ki Dios.11Re' taqe i aj Efraín ma' xta kina'ojb'al, xa je' kikab' i paloma ma' xta runa'ojb'al, ruum xooj kipahqaaj kitoob'jiik keh i aj Egipto, keh i aj Asiria.12Eh noq naa kojiik ar, re' hin naa nuq'atam pankib'eeh, naa nuchopom taqe, je' rukab' noq kichoparik pan xirob' i tz'ikin. Eh naa taqe nuye'em chutojariik i kimahk, ruum i kiyiib' wach na'ojb'al.13Re' keh q'e' ti' i naakik'ulum ruum xkiq'eb' chi riij kik'ux nunimjiik. Eh naa ruchaliik i ti' k'axik chikinaah, ruum xinkiq'et wachej. Re' hin xwaaj naq taqe nuko'leem, xa re' la' inkichuk i q'orik chi wiij.14Eh ma' chu'nchel ta kik'ux xinkiq'oreej noq ti' wilkeeb' pankiyokaab'. Eh noq xkik'er kichii' chupahqaljiik i ki trigo, chupahqaljiik i riis uuva inkuk'ej xinkiq'et wachej la'.15Re' hin xnutijej wo' naq taqe, eh xnuyeew wo' naq rukowiil kik'ux. Xa re' la' re' keh re' chik i ma' holohik taj i xkikapaaj chi wiij.16Eh re' chik taqe i tiyoox xkinimaj, xa je' kikab' i flecha ma' tz'eht tankutwik. Eh ruum chi ma' kinimanik taj naa kikanteesjiik ruuk' q'aslaj ch'ihch' taqe k'amal b'eeh ruum i re' naakikaqse'ljiik kuum i aj Egipto, inki i Dios. Re' taqe aj Israel xiye'arik panti' k'axik ruum i loq'inik tiyoox1Re' QaJaaw Dios je' wili i xuq'or: Chaxulej taq i tuun ruum re' taqe i aj q'aq'ineel xa je' chik kik'uloq xihk chinaah i nutinamiit. Ruum re' keh xkiq'eb' chi riij kik'ux ixqayejaa' wach kuuk', eh xkiq'etwachej i nuk'uhb'aal.2Eh noq ti' chik wilkeeb' i aj Israel je' wili i naa kiq'orom weh: Re' hoj inqanimaj chi re' hat i qaDios, inko'q taqe.3Re' taqe i aj Israel ruum chi xkiq'eb' chi riij kik'ux i holohik laj na'ojb'al, korehtaal imb'aan keh kuum taqe i aj ixowaal.4Re' keh xankikoj i koq taqe i kireey chi ma' hin ta kinsik'wik wach, eh xan kikoj i koq taqe i k'amal kib'eeh chi ma' weht'al. Eh xkiyejaa' kitiyoox ruuk' oro, ruuk' plata, ruum i re' naa nusacham kiwach.5Re' taqe i aj Samaria ti' i nunaah i rub'an i ki imas wakax tiyoox. Eh ma' k'isiin taj i nujosq'iil xchalik chikinaah. Eh ¿Kojaruuj inkimay i ch'uwa' wach na'ojb'al re' re'?6Re' i ki imas wakax tiyoox xa ruyej-aniik aj Israel re' ruuk' inchol ch'eyel ch'ihch'. Eh naa ruxerib'iik noq naa rusachariik kiwach i kitiyoox taqe i aj Samaria.7Re' keh xa je' teew inkitik, eh xa je' kaq suut teew i naakijacham. Re' i ki trigo ma' naa ta chik rub'anam paam, eh wila' xub'an paam re' chik taqe i tokoom tinamit naa kib'aniik rusuqkiil.8Eh naa rusachariik kiwach i aj Israel, eh xama' xta chik naa kokiik wii' chikiwach i tokoom tinamit.9Re' taqe i aj Efraín je' kikab' i b'uurux ma' kinimanik taj. Ruum xooj kitoj i aj Asiria chi naa kiko'ljiik.10Atoob' ta naq neen kikemelej k'ih-oq toob'en keh pantaq tinamit, re' hin naa numolom kiwach atoob' ta naa taqe nuye'em panti' k'axik chuwach i ma' k'ih ta laj q'iij, pan kiq'ab' i reey, pan kiq'ab' taqe i k'amal b'eeh.11Re' taqe i aj Efraín ma' k'isiin taqe i artaal inkiyejaa' k'atb'al kimayiij re' i xa kojb'al kimahk inkamanik wii' keh.12Eh re' hin xnutz'ibaaj wo' naq keh i nuk'uhb'aal, xa re' la' re' keh xama' xkiyeew ta wo' rajaawriik.13Re' keh inkik'at taqe i chikop chi kimayiij chi nuwach, eh inkik'ux i rutib'kaal. Eh re' hin i Dios ma' ponik ta chi nuwach inki a'n re' re'. Re' hin ink'ulik cho panuk'ux i yiib' wach inki a'n naa taqe nuye'em chutojariik i kimahk, naa wo' chik kisutiniik reje Egipto.14Re' taqe i aj Israel xsahchik pankik'ux chi re' hin xin tz'uhkrisanik keh, re' chik ruyejeb'jiik i rupaat kitiyoox xkian. Eh re' taqe i aj Judá re' chik i nimaq taq tinamit xkiyejaa' ko'lb'al kiib'. Re' hin naa nuk'atam i nimaq paat je' wo' hoq i tinamit xkiyejaa', inki i Dios. Re' Oseas xuq'or chi naa ruchaliik i ti' k'axik chikinaah i aj Israel1Re' Oseas je' wili i xuq'or: Re' taq i hat wuch aj Israel, mat pisk'anik taq panawooq ruum i rusuqkiil taq ak'ux, je' rukab' inki a'n i tokoom tinamit. Re' taq i hat xkitoj taq aweh je' k'oyomal taq xa a'n ruum xakanaa' taq aaDios, xakapaaj taq i chi ruum i re' naa ruwachiniik taq atik.2Naa la' ruponiik i q'iij chi ma' naa ta chik ruwachiniik i trigo, i uuva, ma' naa ta chik ruwihiik taq awa' ahaa'.3Re' taq i hat aj Efraín, ma' naa ta chik taq awihiik ayu' parutinamiit i QaJaaw Dios. Naa la' wo' chik asutiniik taq reje Egipto, eh Asiria, ar taq naa ak'uxum i ch'uwa' wach.4Eh ar ma' naa ta chik taq aye'em i riis uuva chi mayiij, i ak'atoj mayiij chuwach i QaJaaw Dios, re' taq awa' naa ak'uxum reh ti'kiil k'uxliis. Eh chu'nchel taq i naa ak'uxwiik reh i re', naa ruch'uwa'risam taq awach. Eh ma' naa ta taq aye'em chi mayiij chuwach i QaJaaw Dios.5Eh wila' je' re' ¿Chib'ih taq i naa a'nam na' chureq i ruq'ijil i ninq'iij ye'b'al ruloq'il i QaJaaw Dios?6Re' taq i hat naa aweliik reje ayu' ruum i ti' k'axik, naa taq kimolom reje awach i aj Egipto, je' naa naa kaat taq kimuq'aam ar Menfis. Re' taqe i chib'ih aweh re' ruuk' i plata naa ruq'uuxriik kiwach, naa ruchaamb'iik i ch'ahn, i k'iix chupaam taq aa ye'aab'.7Eh xponik chik i ruq'ijil chi naa taq ak'ulum i ti' k'axik, eh chi naa taq atojom riij taq amahk, je' rukab' i ruk'ul taq cha weh. Eh je' taq wili inaq'or: Re' i jalal ruq'oral i Dios re' re' q'e' min min ruuk' taqe i ruq'or, je' cho ahqaal, tiki taq, ruum q'e' taq i yiib' wach ana'ojb'al, ma' k'isiin taq ti ixowanik.8Re' hin xirupab'aa' i Dios chi jalal ruq'oral taq chaxilak, i hat taq aj Efraín, eh re' taq i hat inaq'at taq panub'eeh. Eh noq kinwihik chupaam i rupaat i QaJaaw Dios, ma' k'isiin taq i nawixow nuwach.9Re' taq i hat ma' k'isiin i yiib' wach na'ojb'al taq i na a'n, je' rukab' i xb'aan Gabaa. Re' i QaJaaw Dios naa ruk'uliik paruk'ux taq ayiib' wach na'ojb'al, eh naa taq kaat ruye'em chutojariik taq amahk, inki i Oseas. Re' taqe i aj Israel naakik'ulum i ti' k'axik ruum i kimahk inki a'n10Re' i QaJaaw Dios je' wili xuq'or: Noq xnusik' cho kiwach i aj Israel xsuuqb'ik nuk'ux, je' rukab' noq insuuqb'ik ruk'ux inreqwik reh i uuva panchiq yuuq'. Re' i kimaam kati't xsuuqb'ik wo' cho nuk'ux kuuk', je' kikab' i peet wach i higo, re' chik i tiyoox Baal-peor xkiloq'ej, xin kiq'eb' i hin, xkik'uhtaaj kik'ixb'ilaal. Eh xkich'uwa'risaj kiib' je' kikab' inkiloq'ej.11Re' i runimaal kiwach i aj Efraín naa rusahchiik wach xa je' inrupinik reje tz'ikin. Re' kehk'een, ma' naa ta chik kikahniik wach k'achariik, eh ma' naa ta chik raasjiik kak'uun kixq'uun.12Eh atoob' ta neenkik'isaj kak'uun kixq'uun, re' hin naawisam chikiwach, ma' jino'q chik i naa nukanaam. Eh q'e' ti' i naakik'ulum, ruum naa nukanaam taqe chi kutkeel, inki.13Re' i Oseas je' wili i xuq'or: Re' hin xwilow taqe i aj Efraín je' kikab' i aj Tiro chi q'e' naq suq wilkeeb', xa re' la' re' taqe i aj Efraín pankimik k'ahchi' kikanaam taqe i kak'uun kixq'uun.14QaJaaw Dios, re' hat cha a'n kuuk' inakapaaj. Chakanaa' taqe ixoq chi ma' nee ta chik ki ak'unaniik', eh chi ma' nee ta chik kich'uch'isanik, inki.15Re' i QaJaaw Dios je' wili i xuq'or: Re' taqe i aj Efraín Gilgal i xkian kiyiib' wach na'ojb'al, xchalik nujosq'iil kuuk'. Eh ruum i kiyiib' wach na'ojb'al, ma' naa ta chik nukojom taqe panupaat. Eh ma' naa ta chik nuk'axam taqe, ruum re' taqe i k'amal kib'eeh ma' kinkinimaj ta chik.16Re' taqe i aj Efraín q'e' ti' naa kiwihiik, je' kikab' i chee' chiqinaq chik i raa', ma' wachinik ta chik. Re' keh naa wo' naq ruwihiik kak'uun kixq'uun, eh re' hin naa nusachwiik kiwach, inki.17Re' i tinamit wili ma' xkinimaj taj inq'orarik keh ruum i nuDios, ruum aj re' naakiq'eb'ariik ruum, re' keh xanaa chik kojiik chi b'ehik naah taq tinamit, inki i Oseas.1Re' taqe i aj Israel je' naq kiholwochiil i ruche'el i uuva q'e' wachinik. Nik' wach noq xk'ihaaxb'ik i chib'ih keh, je' wo' re' noq ink'ihaaxb'ik i kiartaal inkiyejaa'. Eh noq xa holohik chik i kitik i nelik, ma' k'isiin i tiyoox xkiyejaa' ruuk' holohaq ab'aj.2Re' taqe i aj Israel xak'ul inki a'n kiwach, ruum aj re' naa kitojom riij i kimahk. Re' i QaJaaw Dios naa ruyojwiik i kiartaal, eh naa rusacham kiwach taqe i kitiyoox.3Eh re' i tinamit wili, je' wili naa kiq'orom: Yu'naak aj re' ma' xta chik qareey, ruum ma' xqayohleej ta wach i Dios. Eh ¿Wilik ta wo' naq qareey mi nee ta wo' naq qohrutoob'eej?4Eh xa kichoqik chi q'orik, inkiq'or i korik chi wilik i naa kianam, xama' inki a'n ta wo' hoq. Eh re' i q'ataj q'orik inki a'n xakaansanik i ruk'am chaloq, xa je' rukab' i ch'ahn inkansanik reh i tik, inko'q taqe.5Re' taqe i aj Samaria xakib'arb'otik chik, xasuq chik kioq'ik, noq xkib'iraj chi naa rusahchiik wach imas wakax tiyoox wilik Bet-aven. Ruum i re' q'e' ti' kik'ux taqe i tinamit, taqe k'amal kib'eeh aj tiij, re' i runimaal kiwach naa rojiik sahchoq wach.6Eh re' i ki imas wakax tiyoox, naa ruk'amariik reje Asiria naa ruye'ariik chi rukooch i runimaal wach reey. Ruuk' i re' naakik'ixiik i aj Efraín. Eh re' aj Israel naa wo' kik'ixiik ruum i kitiyoox.7Re' taqe i aj Samaria naa rehtesjiik i rajaawriik, i kireey naa rukahniik chi xa je' chik rukab' i ma' ahl ta laj sohk' k'ul inooj naa ha'.8Eh naakiyojib'iik i rupaat i kitiyoox chinaah taqe i yuuq', re' kimahkunik wii' i aj Israel chulooq'jiik i tiyoox. Eh chinaah taqe i kiartaal naa rupoq'iik i k'iix taqe i yiib' wach ch'ahn, je' wili naa kiq'orom i tinamit reh taqe i nimaq taq yuuq': Tiq'ehb'oq cho chi qanaah, chatz'ap qanaah, inko'q taqe, inki Oseas.9Re' i QaJaaw Dios je' wili i xuq'or: Re' taqe i aj Israel xama' kikanaam ta wo' i mahk chi nuwach kitoq'aam cho Gabaa, ruum aj re' na' b'anroq i q'aq'inik naa rusachariik kiwach i aj Gabaa yiib' wach kina'ojb'al.10Re' hin naa nuye'em taqe i chutojariik i kimahk i tinamit re' re', xanik' pa' nwaaj i hin. Eh noq naa nuye'em taqe panti' k'axik i hin naa wo' ruchaliik b'anoq keh kuum i tokoom tinamit.11Re' taqe i aj Efraín inki a'n reh i tinamit je' rukab' i rub'an i b'ooyax noq i ruyeq' paam i trigo reh i rupotz'ariik. Ruum aj re', re' hin xnuyeew ahl laj ihq chikinaah. Re' i aj Judá je' naa nukojom taqe chi b'anaj arado, eh re' taqe i riih rumaam i Jacob je' naa naa nukojom taqe chi rulak'ariik wach aak'al.12Re' korik taq cha tik, re' i k'axooj taq neenajach ruum re' i rutik ju'jun re' wo' re' naa rujacham, cha yejaa' taq awiib' je' rukab' noq inab'ixjik wach aak'al reh i tik. Ruum ruq'ijil chik i rusik'ariik i QaJaaw Dios, korehtaal i ruyeew chi manlik i ko'lemb'al taq awiib'.13Re' taq i hat re' i yiib' wach na'ojb'al taq i xatik re' i ti' k'axik taq k'ahchi' ajacham re' chik xak'am taq naah taqe i chukuj q'orik. Eh ruum chi xayeew taq ak'ux chikinaah taqe i kareta reh q'aq'inik, je' wo' chikinaah taqe i soldado.14Eh naa ruwihiik tukinik iib' taq chaxilak, naa rusacham kiwach chu'nchel inako'leej naq taq wii' awiib', je' rukab' noq xusach wach i tinamit Bet-arbel i reey Salma rub'ihnaal re' noq xub'an i q'aq'inik, noq xukansaj taqe i tuutb'ees taqe i kak'uun kixq'uun.15Re' taq i hat aj Israel i wilkaat taq ar Bet-el je' re' taq i naa ak'ulum ruum taq ayiib' wach ana'ojb'al, eh re' taq aareey xa chi jumehq'iil naa rusachariik wach, xa je' rukab' noq inchalik rusaq'iik, inki i QaJaaw Dios. Re' Dios i ruk'ax taqe i rutinamiit atoob' ta ma' kinimanik ta chuwach1Re' i QaJaaw Dios je' wili i xuq'or: Noq xkitoq'aa' cho nimanik i aj Israel xnuk'ax taqe. Eh xnukoj taqe chi wak'uun wixq'uun xwesaj taqe chaloq i Egipto.2Eh noq q'e' naq nuk'ax taqe, xkesaj iloq kiib' chi wiij. Eh chikiwach chik i ma' re' ta taqe i dios inkik'at i kimayiij, inkik'at i insensia chikiwach taqe i tiyoox.3Atoob' ta je' re' inki a'n re' hin xnuk'am kib'eeh i aj Efraín eh xnuchop chi kiq'ab', eh xnuk'uhtaaj cho keh i nimanik. Re' keh xama' xkireq ta wo' chi riij chi re' hin xincha'jinik cho keh.4Re' hin ruuk' q'unil, ruuk' k'axooj xnuk'am taqe cho wuuk', eh xwisaj i ahl laj ihq wilik naq chikinaah, xnuyeew wo' kiwa' kihaa' parub'ehel.5Xa re' la' re' keh ma' xinkaaj ta chik kiin kinimam, ruum i re', re' chik taqe i aj Asiria naa rub'aniik i kowlaj taaq'anik chikinaah, je' rukab' i xkik'ul chaloq Egipto.6Eh naa rub'aan ikaansanik ruuk' i q'aslaj ch'ihch' pan kitinamiit, eh naa rusachariik kiwach aha' naq inkiko'leej kiib', ruum xa chi kutkeel inkiyejaa' wach chib'ih inki a'n7Re' i nutinamiit xama' kinkaaj ta wo' kinimam yu'naak, inkik'er wo' naq kichii' chi re' hin i Dios, xa re' la' ma' jino'q inye'wik runimaal nuwach.8¿Chib'ih reet noq nee taq tinukanaa' i hat aj Efraín? ¿Chib'ih reet noq nee taq tinukanaa' pan kiq'ab' i ki-ixowanik taq awach i hat taq aj Israel? ¿Mi ruk'ul re' chi nee taq i nusach awach i hat, je' rukab' noq xnusach kiwach i aj Adma, i aj Zeeboim? Re' wánima xan yot'ik chik, ruum i nuketelaaj taq awach.9Eh ma' naa ta nuye'em i nujosq'iil taq cha naah, ma' naa ta nusacham taq awach hat aj Efraín, ruum re' hin, hin Dios ma' hin ta xa winaq. Re' hin i Dios wilik nu Sahtohiil wilkiin taq panaxilak, ma' xin chalik ta chi rusachariik taq awach.10Re' hin naa nuk'erem nuchii' je' rukab' i rub'an i kaq b'ahlam chi kiyohb'eesjiik i ki-ixowanik wach i nutinamiit. Eh re' keh xakib'arb'otik chik ruum i kiyo'jiik noq naa kichaliik chi korkiil i rookb'aal q'iij,11Re' keh naakeliik chaloq Egipto chi jumehq'iil je' kirupinik chaloq i tz'ikin. Eh je' kirupinik chaloq paloma noq naakeliik chaloq Asiria. Re' hin naa wo' chik nuye'em taqe chi patinik pan kiye'aab'.12Eh re' taqe i aj Efraín xa re' i chukuj q'orik inki a'n chi nuwach. Eh re' taqe i aj Israel xa re' i nujot'ariik inki a'n Re' taqe i aj Judá xin kiq'eb' chi riij kik'ux i hin, re' chik taqe i xa tiyoox xkini imaj, inki i Dios. Re' i yiib' wach na'ojb'al xkian i rutinamiit i Dios1Re' taqe i aj Efraín re' teew inchalik pareelb'aal q'iij inye'wik kikowiil rajlaal i q'iij. Eh inkitiq naah i chukuj q'orik, i ti' k'axik inki a'n reh i kas kichaaq, wilik inkiyejaa' wach kuuk' i aj Asiria, eh inkisiij reje ink'ohnik laj aseite keh i aj Egipto, inki.2Re' i QaJaaw Dios xchalik ruk'aah chikinaah i aj Judá, naa ruye'em taqe chutojariik i kimahk i riih rumaam Jacob, eh naa rutojom keh re' q'oreel chib'ih xkian i xkiq'or.3Eh noq x-aasjik i Jacob, ruchopom i ralaq rooq i ras Esaú noq x-aasjik. Eh noq xwinaaqb'ik i Jacob xupaj ransil ruuk' i ruánjel i Dios.4Eh xupaj ransil ruuk' i ánjel, eh xuq'at wach i ransil i ánjel, xupahqaaj reh i Dios ruuk' oq'ik chi naa rukuxeesjiik. Ar Bet-el xuk'uhtaaj riib' i Dios chuwach, xkuxeesjik wo' hoq, reh chi xooj rukuxisaj i hoj.5Re' i QaJaaw nim rajaawriik xkuxisanik reh i Jacob QaJaaw Dios i rub'ihnaal.6Re' taq i hat, hat taq riih rumaam i Jacob cha nimaj wo' taq chik aaDios, re' i holohik laj na'ojb'al taq cha a'n, eh chayeew taq ak'ux ruuk' aaDios.7Re' i QaJaaw Dios je' wili i xuq'or: Re' taqe i aj Canaán ma' manlik ta kipajwik ruuk' i kipex ruum q'e' suq keh i leq'.8Eh re' taqe i aj Efraín je' wili inkiq'or: Re' hoj xoj b'ehomrik ruum xqareq ruraxiil qaq'iij. Ma' awach ta neen q'orik qeh chi ma' holohik taj inqa a'n, ma' nee ta nq'orarik chi ruuk' i leq' xqareq tz'aaq' i chib'ih qeh, inki taqe.9Re' hin i Dios, hin xineesanik taq cha weh Egipto, eh naa wo' chik taq kaat nuye'em chi patinik chupaam taqe itz'ihy naah paat. Je' rukab' noq i na a'n taq chaloq aninq'iij.10Eh re' hin xin sik'wik cho kiwach taqe ijalal nuq'oral nutaq'aaj taq cho chaxilak, eh ma' k'isiin taqe i xnuk'uhtaaj keh pan kisaq wiriik. Eh kuum keh xinq'orik panjalwaach q'orik.11Eh ar Galaad ma' k'isiin taqe i tiyoox, xa re' la' ma' re' ta wo' taqe i Dios. Eh ar Gilgal inkik'at chi kimayiij taqe imas wakax, re' taqe i ki altaar xa je' juntuhb' chi ab'aj chupaam taqe i tik mu'uun, inki i Dios.12Re' i Jacob i xikin taq cho aamaam xumol chi elik chupaam i ye'aab' Aram ar xooj chusik'ariik i rehk'een. Eh ar xkamanik chi cha'jinik tentzun.13Re' QaJaaw Dios, ruuk' jinaj i jalal ruq'oral xrisaj taqe chaloq i aj Israel ar Egipto. Eh ruuk' wo' hoq i jalal ruq'oral xucha'jeej taqe i aj Israel.14Re' taqe i aj Efraín ma' k'isiin taj i rujosq'iil i Dios xkuksaj chaloq. Re' i QaJaaw Dios naa ruye'em chutojariik taqe ikaansanik kianam, naa kitojom wach i kiyiib' wach na'ojb'al kianam. Re' QaJaaw Dios xusach kiwach i aj Israel1Eh noq kiq'orik naq i aj Efraín kiyo'jik naq taqe aj Israel, eh inkiyeew naq rajaawriik, xa re' la' taqe i aj Efraín xsacharik kiwach, ruum re' chik i tiyoox Baal xkinimaj.2Re' taqe i aj Efraín xama' xkikanaa' ta wo' rub'aan i mahk xa konkiyej-aa' wo' kitiyoox chi plata, re' inkik'ax wach taqe i ye'jan reh, eh je' wili inkiq'or: Chak'at taq i mayiij chikiwach, inki taqe. Eh inkitz'ub' taqe i tiyoox je' kiwii' k'isa imas wakax.3Je' re' noq ilook' insacharik kiwach xa je' ki-ik'ik suutz' pantaq wahq'eq, je' kikab' i mus jab' parusaq'iik, jumehq'iil insahchik wach. Eh je' kikab' i ma' ahl ta laj sohk', ink'amarik reje ruum i teew, xa je' kikab' i sib' i nelik chaloq pan ehteesb'al reh.4Re' i QaJaaw Dios je' wili i xuq'or: Re' hin taq aaDios noq xat wihik taq cho Egipto, eh ma' awach ta chik taq i xakoj chi aaDios, xa re' wo' hin taq awaj ko'loom.5Eh re' hin xincha'jinik taq aweh chupaam i ye'aab' chiq yuuq' ma' xta i nelik chupaam.6Noq wilkaat taq chik chupaam i holohik ye'aab' suq taq chik awa' ahaa' xa nimb'isaj taq awiib' xsahchik taq panak'ux i nunimjiik.7Re' hin naa taq nusacham awach, je' rukab' i rub'an i kaq b'ahlam noq i ruchop i rutiib'. Eh je' rukab' i rub'an i qamaam b'ahlam noq i ruchop i rutiib' chii' b'eeh.8Re' hin naa ruchaliik nujosq'iil, je' rukab' i rujosq'iil ixoq oso xq'ucharik i rak'uun. Ar naa nub'anam taq aweh, je' rukab' noq i ruk'ux i rutiib' i kaq b'ahlam. Naa nusacham taq awach je' rukab' i rub'an reh i rutiib' i josq'laj chikop wilik pantaq ch'ahn.9Re' hin naa nusacham taq awach i hat taq aj Israel, eh ma' awach ta naa ruko'liniik taq aweh.10Eh ¿Aha' wilik taq aareey apahqaam taq weh, i kiko'linik naq taq aweh panatinamiit? ¿Aha' wilik taqe i q'atal q'orik xiye'arik taq aweh noq xapahqaaj taq aareey ruch'ihil taq i k'amal ab'eeh?11Re' hin ruuk' josq'iil xnuyeew taq aweh aareey eh ruuk' wo' chik nujosq'iil xwesaj taqe.12Eh re' taqe i kimahk i aj Efraín wilik panuk'ux, re' taqe i kiyiib' wach na'ojb'al ma' naa ta reliik panuk'ux.13Re' ti' k'axik chalik reh chikinaah, je' rukab' i ruti'kiil ixoq noq ink'ulik ruk'ux. Eh je' kikab' xa aasjik chik reh, ma' nasjik ta wo' chi korik, ma' xta runa'ojb'al, ni xata ruyeew riib' chi korik reh chi neenasjiik.14¿Mi neerub'an re' chi nee taqe inuko'leej ruuk' inki a'n? ¿Mi neerub'an re' chi nee taqe inuko'leej chuwach i rutojariik taqe amahk? Re' i rajaawriik i kimik nuye'em chik chikinaah. Ma' naa ta chik nuketelaam kiwach.15Atoob' ta naq nee kik'ihaaxb'iik, je' rukab' noq intoxlinik i chee', nee inwihik chib'ih keh. Re' hin naa nuye'em i kowlaj teew inchalik panchiq yuuq', sachb'al wach i chib'ih keh. Naa ruchiqiik i raasb'al kihaa' naa relq'jiik kib'ehomal kuum ixowan kiwach.16Eh naa nuye'em taqe panti' k'axik i aj Samaria, ruum xin kiq'eb' chi riij kik'ux. Eh naa kikanteesjiik ruuk' q'aslaj ch'ihch', naakiq'ojariik wataq ab'aj i kiha'lak'uun. Re' taqe i yowaab' ixoq naakipoch'ariik, inki i Dios. Re' Oseas xupahqaaj otob'il keh i aj Israel chi kinimaj wo' chik i Dios1Re' Oseas je' wili i xuq'or: Hat taq aj Israel cha sik' wo' taq chik aaDios, ruum xaq'eb' taq awiib', ruum taq amahk.2Chapahqaaj wo' taq chik kuyb'al amahk reh, je' taq wili i cha q'or: QaJaaw Dios cha kuy ta tii qamahk ruuk' i yiib' wach na'ojb'al inqa a'n. Eh chak'ul ta tii qeh panotob'il i qatiij, je' wo' hoq aloq'oonjiik inqa a'n3Qohako'leej i hat ruum re' taqe i aj Asiria ma' nkian ta qako'ljiik. Eh ma' nee ta wo' inqako'leej qiib' chi nee qohooj chi q'aq'inik rij kawáyu, eh ma' nee ta chik inqakoj chi qadios taqe i tiyoox xa hoj qohyej-aanik keh, ruum xa re' wo' hat tiketelinik kiwach i ma' xta kituut kajaaw, tiko'q taq, inki.4Re' i QaJaaw Dios je' wili i xuq'or: Re' hin naa wesam i q'etwachiil pankanima i aj Israel. Eh naa wo' chik nuketelaam kiwach naa wesam i nujosq'iil chikinaah.5Re' hin naa nukamaniik, chi je' hin i jab' chi keh i aj Israel. Re' keh naa kikahniik chi je' rukab' noq ink'er i saq uhtz'ub', naa rukowjiik kik'ux je' rukab' noq i ruk'am raa' i chee' chakaltee' ar Líbano.6Eh re' keh naa kik'ihaaxb'iik je' rukab' noq ink'ihaaxb'ik i q'ab' chee', je' holwochiil i q'ab' i chee' olivo. Eh re' i kik'ohnkiil, je' kik'ohnkiil i chee' chakaltee' ar Líbano.7Re' taqe i aj Israel, re' wo' chik i hin naa nucha'jiniik keh. Eh naa kik'ihaaxb'iik, je' rukab' i trigo, je' rukab' noq kiwachinik i uuva, naa reliik kib'iral, je' rukab' i riis uuva i nelik ar Líbano.8Re' taqe i aj Efraín je' wili i naa kiq'orom: ¿Mi koneenqakoj chi qadios re' i tiyoox? inko'q taqe. Je' wili i naa nuq'orom keh: Re' hin naa nucha'jiniik taq aweh, naa nuye'em taq aweh chib'ih taq inawaaj i hat, hat taq nutinamiit. Re' hin, je' hin jinaj chee' xa eliik rax wach reh chi naa kiwachiniik, kinko'q keh, inki i Dios.9Wila' wilik jino'q i wilik runa'ojb'al taq chaxilak chureq chi riij taqe i k'uhb'aal wili. Re' i rub'eeh i QaJaaw Dios korik wach, eh re' re' inkik'am i korik wach kik'ux. Eh re' taqe i yiib' wach kina'ojb'al ma' nkik'am taj ruum i re' inkiq'eb' kiib'.
Re' taqe i aj Israel je' pan k'oyomal wilkeeb', ruum xkikanaa' nunimjiik. Ruum aj re', re' hat Oseas chak'am chi awehk'een jino'q i k'oyoom laj ixoq, eh naa ruwihiik taqe awak'uun ruuk', naa kikahniik chi rak'uun k'oyoom laj ixoq taqe, inki.3Eh re' i Oseas xuk'am wo' chi rehk'een jinaj i k'oyoom laj ixoq Gomer rub'ihnaal, rixq'uun i Diblaim, eh x-aasjik jinaj i rak'uun ruuk'.4Eh re' i QaJaaw Dios je' wili i xuq'or reh i Oseas:
Re' hat Jezreel i rub'ihnaal i k'isa k'un chakoj, ruum re' hin ilook' i nuyeew chi tojariik i kimahk taqe i riih rumaam Jehú, re' i wihinaq chi reyil. Eh ruum taqe ikaansanik xub'an ar i Jezreel, re' hin naawisam chi taaq'anik ar Israel, inki.5Eh chupaam taqe i q'iij re' re', wach k'ixkaab' Jezreel naawisam i kajaawriik taqe i soldado kichalik Israel, inki.6Re' i Gomer x-aasjik wo' chik ruha'lak'uun, k'isaxq'un chik, re' i QaJaaw Dios je' wili i xuq'or reh i Oseas:
Re' hat Lo-ruhama i rub'ihnaal chakoj i k'isa xq'un, ruum re' b'ihnaal re' re' iraaj ruq'orom chi re' i hin ma' naa ta nuketelaam kiwach i aj Israel, ma' naa ta nukuyum i kimahk.7Eh re' taqe i aj Judá keh konaa nuketelaam kiwach, eh re' hin i kaJaaw i ki Dios naa nuko'liniik keh. Xa re' la' ma' ruuk' ta q'aq'inik, ni xata ruuk' flecha, ni xata ruuk' i q'aslaj ch'ihch', ni xata ruuk' taqe aj q'aq'ineel kichalik rij kawáyu.8Eh noq re' Gomer xuq'uch reh i ch'uuch' i k'isa rixq'uun, x-aasjik wo' chik jinaj i k'isa rak'uun.9Re' i QaJaaw je' wili i xuq'or reh i Oseas:
Lo-ami i rub'ihnaal i k'isa k'un chakoj, ruum re' b'ihnaal re' re' iraaj ruq'orom, re' taq i hat ma' hat ta taq chik nutinamiit, re' hin ma' hin ta wo' chik taq aaDios, inki.10Xa re' la', re' taqe i aj Israel naa kik'ihaaxb'iik, naakiponiik chi je' kik'ihaal i saniib' chi chii' i palaw, ma' naa ta rukuyjiik kajaljiik. Eh ma' naa ta chik ruq'orariik keh ruum i Dios chi ma' hat ta taq nutinamiit. Je' la' wili i naa ruq'orariik keh: Re' taq i hat, hat taq nutinamiit i hat, hin k'achlik Dios, inko'q.11Eh naa wo' chik kimolom kiib' i aj Judá kuuk' i aj Israel, naakipab'aam jinaj k'amal kib'eeh. Ruum naa wo' chik kehteesjiik cho pantaq tokoom tinamit, ruum re' taqe q'iij re' re' xiik' naah nimaal wach ar Jezreel.1Re' Dios je' wili i xuq'or: Re' taq i hat naa taq aq'orom keh awuch aj Israel chi nutinamiit chik taqe, chi re' taqe ixoq nu ketelaam chik kiwach, inki. Re' i je' k'oyomal ixki a'n i aj Israel2Re' i QaJaaw Dios je' wili i xuq'or: Chaq'il taq i je' atuut noq wilik chi chukanaa' i yiib' wach na'ojb'al. Eh re' reh ma' je' ta chik wehk'een noq wilik, ma' hin ta chik rub'ahiil noq wilkiin. Eh chi maa rub'an chik i je' k'oyomal, eh maa ruk'ax chik reje wach tokoom winaq.3Eh wila' ma' xukanaa' rub'aan taqe re', re' hin naa nukanaam chi ma' xta chik i wilik reh, eh chi t'uslik, naa nukanaam chi je' rukab' noq xutoq'aa' cho k'acharik. Eh naa nukanaam chi je' rukab' i chiq yuuq', naa rukimiik ruum i ruchiqkaal chii'.4Eh ma' naa ta nuketelaam kiwach taqe i rak'uun rixq'uun, ruum re' reh xuk'am taqe pan je' k'oyomal.5Re' i je' kituut noq wilik, xuq'eb' i ruloq'il noq xuq'or chi je' wili: Naa wojiik chi kisik'ariik i winaq kik'axwik weh i kiye'wik nuwa' nuhaa', nu holohaq itz'ihy re' ruuk' i riij chikop, re' kiye'wik weh i xela itz'ihy, re' kiye'wik waseite.6Ruum aj re', re' hin je' k'iix i naa nukojom chi tz'apb'al paam i rub'eeh, je' naa nukojom kotimaj koraal chi riij, reh chi ma' nee ta rureq i rub'eeh.7Re' reh naa wo' naq chik rusik'im taqe i winaq ink'axwik reh, eh ma' naa ta chik rureqem, ruum i re' je' wili i naa ruq'orom: Re' hin naa wo' chik wojiik ruuk' i peet nub'ahiil noq wilik, ruum ruuk' i reh ma' xta naq reet wilkiin, ma' je' ta rukab' i yu'naak, inko'q, chi wiij.8Xa re' la' re' reh, ma' xukoj ta rehtaal chi re' wo' naq i hin xin ye'wik reh i rutrigo, i ruvino, i raseite, eh chi re' hin xin k'ihaaxb'isanik reh i ru oro, i ru plata i ruyeew chi rumayiij chuwach i tiyoox Baal.9Eh re' i hin paruq'ijil i rumolariik i wach taqe i rutik i ma' naa ta chik nuye'em reh i wach i trigo, i vino. Eh naa wo' chik nuq'uchum reh i itz'ihy re' ruuk' riij chikop, je' wo' i xela itz'ihy nuye'em naq reh chi rub'urb'aal.10Eh re' hin panaq'kiwach i je' winaq i q'e' k'axwik reh naa nuq'uchum i chib'ih reh, naa nukanaam chi t'uslik, ma' jino'q naa ruko'liniik reh panuq'ab'.11Eh ma' naa ta chik nuye'em q'ab' chi naa rub'anam i ru ninq'iij inye'wik rusuqkiil ruk'ux, je' wo' taqe i runinq'ijiik i ak' poh, i hi'limb'al q'iij. Je' wo' chu'nchel i ru ninq'iij.12Re' hin naa nusacham kiwach i ru-uuva, i ruhigo, re' i je' wili i ruq'or chikiij: Re' taqe wili xkiyeew weh i je' i winaq q'e' kik'axwik weh, inki. Eh re' i hin naa nukanaam chi xa je' chik ch'ahn taqe i rutik, naa ruk'uxariik kuum taqe i josq'laj chikop.13Re' hin naa nuye'em chutojariik i ru mahk i je' ehk'eenb'ees re' re', ruum taqe i k'ataj i insensia xub'an chikiwach i Baal. Re' noq i rukoj lopq'aaq', i karena chutahqaljiik taqe i je' ruwinaqiil q'e' k'axwik reh. Eh re' hin xiruq'eb' chi riij ruk'ux, inki i QaJaaw Dios. Re' i QaJaaw Dios xuketelaaj wo' chik wach i rutinamiit Israel14Re' i QaJaaw Dios je' wili i xuq'or: Re' hin naa nuk'amam reje panchiq yuuq' Sinaí i je' ehk'eenb'ees re' re', ar naa nuq'orom reh chi q'e' naa nu k'axam.15Eh naa wo' chik nuye'em q'ab' chi naa ruwachiniik taqe i ru-uuva, naa nuye'em chi ruye'aab' i wach k'ixkaab' Acor rub'ihnaal, reh chi nee wo' chik i rureq i rusuqkiil ruk'ux. Eh ar neerub'an chi je' rukab' i nimanik xub'an cho pampeet, noq xwesaj chaloq Egipto.16Ma' naa ta chik ruq'orom chi je' wili: Hat dios Baal ma' ko'q ta chik weh. Je' la' wili i naa nuq'orom weh: Re' hat, i hat manlik nub'ahiil noq wilkaat, inko'q weh, inki Dios.17Eh ma' naa ta chik nuye'em q'ab' chi naa ruq'orom i kib'ihnaal taqe i xa tiyoox Baal. Ma' naa ta chik ruq'orom rib'iral chi jumpech taqe re'.18Chupaam taqe q'iij re' re' wilik i naa nuyejaam wach kuuk' i josq'laj chikop, kuuk' i chikop kirupinik pan taxaaj, kuuk' taqe aaq', reh chi ma' xta naa kuuchjiik i aj Israel. Eh ma' naa ta chik nuye'em q'ab' chi naa rub'aan i q'aq'inik, ikaansanik ruuk' flecha, ruuk' i q'aslaj ch'ihch', reh chi nee kik'acharik pansuqkiil k'uxliis.19Re' taq i hat aj Israel je' nanaakaat taq nuk'amam wuuk' chi wehk'een chi jumpech, ruum q'e' taq ti nuk'ax, naa awihiik taq wuuk' panotob'il, pansuqkiil k'uxliis, naa taq nuketelaam awach.20Re' hin naa kaat taq nuk'amam chi manlik wehk'een, parukorkiil wach k'uxliis, eh naa taq anab'eem chi hin taq aaWaJaaw.21Re' hin xti korik taq i nuq'or aweh chi chupaam taqe ponoq i q'iij re' re' kopan taxaaj naa nuye'em chaloq i wotob'il, naa nuqaasam chaloq jab' chinaah i wach ak'al.22Eh chinaah i wach ak'al naa chik rub'anam wach i trigo, riis i uuva, aseite. Re' taq i hat je' wili taq i naa aq'orom: Jezreel, tiko'q taq.23Eh naa taq kaat nuye'em chupaam i ye'aab' re' re' chi hat taq nutinamiit, naa nuketelaam wach i Lo-ruhama. Eh re' i Lo-ami je' wili i naa nuq'orom reh: Re' hat, hat chik nutinamiit, kinko'q reh re' reh naa kiin ruq'orom chi hin ruDios. Re' Oseas xukuy ru mahk i k'oyoom laj ixoq, rujalwaach chi re' Dios xukuy kimahk i aj Israel1Re' i QaJaaw Dios je' wili i xuq'or weh: Yu'naak cha k'ax wo' chik ixoq re' re', atoob' ta wilik pan k'oyomal ruuk' i tokoom winaq. Re' hin i Dios je' wo' re' kik'axariik i aj Israel i nub'an. Atoob' ta inkiloq'ej taqe i tiyoox, atoob' ta inkik'ux i kaxlanwi'k mayijimaj chikiwach i tiyoox, inki.2Eh re' hin ho'lajuuj chi tumiin re' ruuk' i plata xnutoj chi riij i wehk'een, eh wuquub' nimaq chakach chi sebada i xnuyeew chi riij xnuk'am wo' chik chi wehk'een.3Eh je' wili i xnuq'or reh: Re' hat najt naa akahniik chi wehk'een, ma' awach ta chik i tokoom winaq naa atahqeem reje, je' wo' hoq i hin ma' awach ta wo' chik tokoom ixoq naa nuq'oreem, kinki reh.4Re' re' k'uhtb'al reh chikiwach i aj Israel chi najt naa kikahniik chi ma' xta kireey, chi ma' xta k'amal kib'eeh. Eh chi ma' xta chik i kimayiij, ma' naa ta chik kiloq'em i tiyoox ab'aj. Ma' naa ta chik ruwihiik i k'amal b'eeh aj tiij, ma' naa ta chik ruwihiik tiyoox.5Eh chi riij i re', re' taqe i aj Israel naa wo' chik kisik'im i kaJaaw i ki Dios, je' wo' hoq i kireey naa ruwihiik re' ruuk' i riih rumaam i reey David. Re' keh naa ruponiik i q'iij noq ruuk' yo'jik naa kiloch'om kiib' chuwach i QaJaaw Dios, naa wo' chik kisik'im i rotob'il. Re' i QaJaaw Dios xuq'or keh i aj Israel chi ma' k'isiin i mahk i xkian1Hat taq aj Israel chab'iraj taq i ruq'or i QaJaaw Dios. Re' reh xchalik ruk'aah, je' wili i xuq'or: Re' taqe i tinamit wili ma' jino'q i korik wach ruk'ux, ma' xta ketelinik wachiis kuuk'. Eh ma' awach ta inye'wik wajaawriik chi re' hin, i Dios.2Eh xa re' i ma' holohik taj, xa re' i chukuj q'orik, xa re' i leq', xa re' i ch'uwarisanik wach kikaxaro inki a'n Eh xa re' rub'anariik i ti' k'axik, xa re' ikaansanik inki a'n rajlaal i q'iij.3Re' i wach ak'al panti' wilik, re' taqe i k'achareel chuwach ma' xta chik kikowiil. Eh re' taqe josq'laj chikop, taqe i chikop kirupinik pan taxaaj, taqe i kar wilkeeb' pan palaw, k'ahchi' kikimiik, inki.4Re' taq i hat k'amal b'eeh aj tiij ma' xaq'il ta taq i tinamit wili, ma' xakoj ta taq kina'ojb'al, ruum eliik taq wach tib'anik kuuk'. Re' i nuk'aah wach anaah taq i hat naa wik'sam.5Re' taq i hat xanik' neenuyeew taq i ti' k'axik cha naah pan q'ij, oon chaq'ab' awuch'ihil ijalal naq nuq'oral i hin. Eh naa nusacham taq wach aatinamiit Israel.6Re' taqe i nutinamiit naa nusach kiwach, ruum i kimahk, ruum ma' xakoj ta taq kina'ojb'al. Re' taq i hat ruum chi xaq'eb' taq chi riij ak'ux i nuk'uhb'aal, re' hin, naa taq kaat wisam chi k'amal kib'eeh aj tiij. Je' wo' taq aawiih aamaam ma' naa ta nukojom taqe chi k'amal kib'eeh aj tiij.7Eh nik' wach i k'ihaaxb'ik taq i na a'n je' wo' re' i k'ihaaxb'ik i rub'an taq amahk. Je' re' noq re' hin naa nusutem taq i runimaal awach chi k'uhtb'al taq ak'ixb'ilaal.8Re' taq i hat xasuq taq chik aweh noq inki a'n i mahk i nutinamiit, ruum re' i kimayiij inak'uxlaaj taq wii' awiib'.9Re' hin chi je' taqe i tinamit, chi je' taqe k'amal kib'eeh aj tiij naa nuye'em taqe chutojariik i kimahk, ruum i kiyiib' wach na'ojb'al inki a'n10Eh naa wo' naq kianam kiwa', xama' naa ta wo' kinujiik, eh naa wo' naq kiwiriik ruuk' i kixooq, eh xama' naa ta wo' ruwihiik kak'uun kixq'uun, inki Dios. Re' i loq'inik tiyoox xkian i aj Israel11Re' i nutinamiit k'ahchi' rusahchiik i kina'ojb'al ruum i ruuk'jiik i k'ahlaj ha' inxohk'risanik, eh ruum i je' k'oyomal inki a'n12Eh inkipahqaaj kina'ojb'al reh i tiyoox re' ruuk' i chee', eh xama' kich'aq'weesjik ta wo' ruum. Eh xsahchik kina'ojb'al ruum i je' k'oyomal inki a'n xin kiq'eb' chi riij kik'ux i hin, hin k'achlik Dios.13Re' keh kiooj nah taq yuuq' chuk'atariik i kimayiij, chuk'atariik i insensia wataq yuuq' k'ixkaab', je' chi muuj taqe i tz'inuj, chi muuj taqe tuhq, chi ri'sil i rumuuj i saq chee' álamo rub'ihnaal. Eh inkik'uhtaaj reh i kak'uun kixq'uun, i loq'inik tiyoox. Re' i kixq'uun nakiwihiik pan k'oyomal, re' taqe i kil-iib' na kich'uwa'risam wach i kikaxaro.14Re' hin ma' naa ta nuye'em taqe chutojariik i kimahk taq awixq'uun chi riij i k'oyomal nakianam. Ma' naa ta nuye'em taqe chi tojariik i kimahk taq awil-iib' chi riij i ch'uwa'risanik wach kikaxaro nakianam. Eh hat wo' taq xatk'amwik kib'eeh chi xkiyeew i kimayiij chuwach i tiyoox, je' aj re' noq i ruq'eb' riib' i tinamit ma' xta runa'ojb'al.15Re' taqe i aj Israel atoob' ta wilkeeb' pan k'oyomal. Re' taq i hat aj Judá ma' a'n taq aweh i k'oyomal re' re', mat'ooj taq chikiij kiooj Gilgal, i kijohtik Bet-aven. Eh maaq'or taq i nub'ihnaal chi xama' xta rub'ehel.16Re' taq i hat aj Israel, je' taq akab' i simaroon laj q'ahxoq wakax xina q'eb' taq, chi riij ak'ux. ¿Mi konawaaj taq re' chi nee taq tinuchajeej chi je' taq hat kok' rak'uun tentzun?17Re' taqe i aj Efraín, aj looq'en tiyoox taqe, cha kanaa' taq kian peet inkaaj rub'aan.18Re' keh xa re' i xohk'rik, xa re' i k'oyomal, xa re' taqe i k'ixb'ilaal laj na'ojb'al inki a'n re' i holohik laj na'ojb'al xkiq'eb' chi riij kik'ux.19Eh xa je' kikutarik reje ruum kowlaj teew naa rub'aan keh eh naakik'uhtaam kik'ixb'ilaal, ruum irulooq'jiik taqe i tiyoox, inki i QaJaaw Dios. Re' i QaJaaw Dios xuyeew taqe panti' k'axik i aj Israel ruum i kimahk1Re' i QaJaaw Dios je' wili i xuq'or: Re' taq i hat k'amal b'eeh aj tiij, re' taq i hat aj Israel, re' taq i hat raj kamanoom i reey, chab'iraj taq: Cha naah taq i hat naa nuq'atam i q'orik, ruum i xakoj taq kixirob'aal i wilkeeb' Mizpa, xaq'at taq pan kib'eeh naah yuuq' Tabor.2Eh je' naa chaam laj jul i xak'ot taq reh chi xkiq'eb' kiib' i wilkeeb' wach k'ixkaab' Sitim, ruum aj re' naa kaat nuye'em chutojariik taq amahk.3Re' hin weht'al i kina'ojb'al, chu'nchel i aj Israel. Je' wo' taqe i aj Efraín xkian i je' k'oyomal, eh xuch'uwa'risaj kiwach chu'nchel i aj Israel.4Eh ruum i kiyiib' wach na'ojb'al ma' kinkinimaj ta chik. Re' chik kow i rumin riib' chikiwach i je' k'oyomal, eh ma' kiyeew ta chik wajaawriik i hin, hin k'achlik Dios.5Re' taqe i aj Israel ruum chi q'e' inkinimb'isaj kiib' ink'utinik chi wilkeeb' pankimahk. Eh re' taqe i aj Efraín, re' i kimahk naa ruq'eb'wiik keh, eh naa wo' kiq'ehb'iik pamahk i aj Judá keh.6Re' taqe i aj Israel naa naq chik kik'amam chaloq i kiwakax, i kitentzuun chi kimayiij chi nusik'ariik. Xa ma' naa ta wo' chik kiin kireqem, ruum xnukanaa' chik taqe.7Re' keh ma' korik ta wach kik'ux wuuk'. Re' i kak'uun kixq'uun tokoom chik inkikoj chi kajaaw, ruum i re' xa chi jumehq'iil naa nusacham kiwach i keh, je' wo' hoq i kitik, inki i Dios. Re' i ti' k'axik xye'arik chikinaah i aj Israel chikinaah i aj Judá8Chaxulej taq i tuun ar Gabaa rehtalil i q'aq'inik. Eh chaxulej taq i tuun ar Ramá. Chaq'or taq ar Bet-aven chi wilik yohb'aal, je' wo' ar Benjamín.9Re' taqe i aj Efraín xti korik chi naa kikahniik chi ma' xta wilik keh paruq'ijil i ti' k'axik. Eh chu'nchel i aj Israel naa kinab'eem chi korik chi je' re' i naa ruk'ulariik.10Re' taqe i k'amal kib'eeh aj Judá je' kikab' taqe i kijilwik paam taqe i k'ula't, re' hin naa nuye'em i nujosq'iil chikinaah.11Re' taqe i aj Efrín k'achi' kik'iik chi ti' k'axik, xi kahnik chi ma' xta chik i wilik keh ruum re' chik taqe i tiyoox xkinimaj.12Re' hin naa nusacham kiwach i aj Efraín, i aj Judá, je' rukab' i rub'an i mooh noq i rumohrisaj taqe i xa chib'ih jariik.13Eh noq naakilom taqe i aj Efraín, taqe i aj Judá, chi xiik' naah ti' kiil wilkeeb'. Re' taqe i aj Efraín naa kojiik ruuk' i runimaal wach reey ar Asiria, reh naq chi naa kik'aachjiik, xa re' la' xama' naa ta wo' kik'achjik.14Re' hin ruum nujosq'iil naa nuye'em taqe panti' k'axik i aj Efraín, je' wo' taqe i aj Judá. Je' rukab' i rub'an i kaq b'ahlam noq i ruxereb'eej i rutiib', ma' awach ta naa ruko'liniik keh panuq'ab'.15Re' hin naa nukanaam taqe chi kutkeel, korehtaal inkiyot' i kik'ux chi riij, i kimahk, eh naa wo' chik kinkinimam. Eh naa kiin kisik'im noq wilkeeb' pan ti'kiil k'uxliis, inki i Dios. Re' taqe i aj Israel xkiq'or chi naa wo' chik kinimam i Dios1Re' i tinamit je' wili i xkiq'or: Qoh sutinoq wo' chik ruuk' i QaJaaw Dios. Atoob' ta xoj ruyeew panti' k'axik, naa wo' chik kooj risam chupaam. Atoob' ta xoj ruyeew panti' naa wo' chik kooj ruk'achrisam.2Re' reh xa ruuk' wo' chik i ki'ib' ixib' q'iij naa ruye'em qak'achariik. Reh chi naa qak'achariik chuwach i reh.3Eh qachop taq qak'ux chunimjiik i QaJaaw Dios. Re' reh korik chi nee qoh rutoob'eem, je' rukab' noq i nelik chaloq i rusaq'umaal i q'iij. Eh je' rukab' noq i ruyeew chaloq i peet jab', je' wo' jab' koq'uun noq i rut'aqsaj i tik, inki taqe.4Re' i QaJaaw Dios je' wili xuq'or: ¿Chib'ih taq inawaaj chi neenub'an awuuk' i hat taq aj Efraín, je' wo' taq i hat aj Judá? Re' i nuk'axariik taq i na a'n xa je' rukab' noq inik'ik i suutz', je' rukab' i mus jab' pantaq wahq'eq jumehq'iil insahchik wach.5Re' hin xnutaq'aaj taqe ijalal nuq'oral, chuq'orariik taq aweh i ti' k'axik naa nuye'em taq cha naah. Eh nuq'or ruuk' nuchii' chi naa taq kaat nuye'em pankimik, re' i nuq'oral, je' rukab' i rub'an i saqum.6Re' i nupahqaaj taq aweh i hin, re' chi kinak'ax taq chu'nchel ak'ux, chi kinakoj taq chi hin aaDios. Re' taqe i xa chib'ih jariik chi mayiijal ma' inwaaj ta chik, inki.7Eh je' wili i xuq'or: Re' taqe i nutinamiit wili, ma' korik ta wach kik'ux wuuk', xkiq'etwachej i nuk'uhb'aal, je' rukab' i xub'an i Adán pampeet.8Chupaam i tinamiit Galaad, ma' k'isiin i yiib' wach na'ojb'al imb'aan, xa re' ikaansanik kas kichaaq' inki a'n9Re' taqe i k'amal kib'eeh aj tiij je' kikab' i juntuhb' chi ajileq' ruum inooj kikeb'aa' kiib' chi' taq b'eeh inooj Siquem, ar inkiq'at i tinamit, inki a'n ti' k'axik reh, inkikansaj.10Eh re' taqe i aj Israel, inwilow chi q'e' yiib' wach kib'anik. Re' taqe i aj Efraín xkimin kiib' chub'aan i je' k'oyomal, eh re' taqe i aj Israel xkich'uwa'risaj kiib' ruuk' i re'.11Eh re' taq i hat aj Judá nuyejaam chik wach q'iij chi naa taq kaat nuye'em panti' k'axik. Re' noq naa wo' chik wisam taqe chaloq panti' k'axik i nutinamiit Israel, inki. Re' kiyiib' wach na'ojb'al i aj Israel1Re' i QaJaaw Dios je' wili i xuq'or: Noq xwaaj naq taqe wisam panti' k'axik i aj Israel, re' taqe i aj Efraín xa chayeew chik i mahk inki a'n je' wo' taqe i aj Samaria. Eh xa re' i chukuj q'orik, xa re' i leq' inkaaj pantaq paat, pantaq b'eeh.2Re' keh ma' nkikapaaj taj chi re' hin k'ahchi' wilom i ma' holohik ta laj na'ojb'al inki a'n Xanaah re' k'ahchi' wilom chi k'ahchi'rik'iik chikinaah i kimahk inki a'n.3Re' keh ruuk' i kiyiib' wach na'ojb'al, ruuk' i chukuj q'orik inki a'n inkiyeew rusuqkiil ruk'ux i reey, je' wo' taqe i k'amal kib'eeh.4Eh re' taqe re' xa re' i ch'uwarisanik wach kikaxaro inkaaj. Eh je' kikab' i horna qoplik ruq'aq'al, ma' nluk'ariik taj noq inyuq'arik paam i ruq'oril kaxlanwi'k, korehtaal inkojarik ch'amb'esb'al reh.5Eh noq i runinq'iijeej i ruhab'ul i reey, re' taqe i k'amal b'eeh inkixohk'risaj i reey. Eh ruum i re', re' i reey inokik chub'anariik i re' ma' re' chi kixilak i yiib' wach kina'ojb'al.6Re' keh xan qop chik i kánima chub'anariik i yiib' wach na'ojb'al, xa je' chik rukab' i horna ma' inkanab'jik ta ruluk'ariik i ruq'aq'al. Eh atoob' ta woroq inkojwik ruq'aq'al, xa koqoplik wo' chi junwaar.7Eh re' taqe re' xa je' chik kiqop horna, inkikansaj taqe i wilkeeb' chi ajaab'esil, xkiq'eb' kiib' chu'nchel i kireey. Ma' jino'q chik inkipahqaaj kikuyb'al weh.8Eh re' taqe i aj Efraín xkian jinaj wach kina'ojb'al kuuk' i tokoom tinamit. Re' taqe i aj Efraín je' kikab' i kaxlanwi'k ma' xsuutjik taj, xa juntar xchaq'.9Re' keh xehteesjik i kajaawriik kuum i tokoom tinamit, xa re' la' ma' nkikoj ta rehtaal. Eh saq chik i rismaal kinaah, xama' nkikoj ta wo' rehtaal i k'ahchi' kik'ulum.10Re' taqe i aj Israel q'e' nimaq kiwach inki a'n kiib', ruum i re' k'ahchi' kik'ulum i ti' k'axik. Eh ni xata ruum taqe re', kinkaaj wo' chik kinkinimam, ni xata kinkaaj kisik'im hin, hin ki Dios.11Re' taqe i aj Efraín ma' xta kina'ojb'al, xa je' kikab' i paloma ma' xta runa'ojb'al, ruum xooj kipahqaaj kitoob'jiik keh i aj Egipto, keh i aj Asiria.12Eh noq naa kojiik ar, re' hin naa nuq'atam pankib'eeh, naa nuchopom taqe, je' rukab' noq kichoparik pan xirob' i tz'ikin. Eh naa taqe nuye'em chutojariik i kimahk, ruum i kiyiib' wach na'ojb'al.13Re' keh q'e' ti' i naakik'ulum ruum xkiq'eb' chi riij kik'ux nunimjiik. Eh naa ruchaliik i ti' k'axik chikinaah, ruum xinkiq'et wachej. Re' hin xwaaj naq taqe nuko'leem, xa re' la' inkichuk i q'orik chi wiij.14Eh ma' chu'nchel ta kik'ux xinkiq'oreej noq ti' wilkeeb' pankiyokaab'. Eh noq xkik'er kichii' chupahqaljiik i ki trigo, chupahqaljiik i riis uuva inkuk'ej xinkiq'et wachej la'.15Re' hin xnutijej wo' naq taqe, eh xnuyeew wo' naq rukowiil kik'ux. Xa re' la' re' keh re' chik i ma' holohik taj i xkikapaaj chi wiij.16Eh re' chik taqe i tiyoox xkinimaj, xa je' kikab' i flecha ma' tz'eht tankutwik. Eh ruum chi ma' kinimanik taj naa kikanteesjiik ruuk' q'aslaj ch'ihch' taqe k'amal b'eeh ruum i re' naakikaqse'ljiik kuum i aj Egipto, inki i Dios. Re' taqe aj Israel xiye'arik panti' k'axik ruum i loq'inik tiyoox1Re' QaJaaw Dios je' wili i xuq'or: Chaxulej taq i tuun ruum re' taqe i aj q'aq'ineel xa je' chik kik'uloq xihk chinaah i nutinamiit. Ruum re' keh xkiq'eb' chi riij kik'ux ixqayejaa' wach kuuk', eh xkiq'etwachej i nuk'uhb'aal.2Eh noq ti' chik wilkeeb' i aj Israel je' wili i naa kiq'orom weh: Re' hoj inqanimaj chi re' hat i qaDios, inko'q taqe.3Re' taqe i aj Israel ruum chi xkiq'eb' chi riij kik'ux i holohik laj na'ojb'al, korehtaal imb'aan keh kuum taqe i aj ixowaal.4Re' keh xankikoj i koq taqe i kireey chi ma' hin ta kinsik'wik wach, eh xan kikoj i koq taqe i k'amal kib'eeh chi ma' weht'al. Eh xkiyejaa' kitiyoox ruuk' oro, ruuk' plata, ruum i re' naa nusacham kiwach.5Re' taqe i aj Samaria ti' i nunaah i rub'an i ki imas wakax tiyoox. Eh ma' k'isiin taj i nujosq'iil xchalik chikinaah. Eh ¿Kojaruuj inkimay i ch'uwa' wach na'ojb'al re' re'?6Re' i ki imas wakax tiyoox xa ruyej-aniik aj Israel re' ruuk' inchol ch'eyel ch'ihch'. Eh naa ruxerib'iik noq naa rusachariik kiwach i kitiyoox taqe i aj Samaria.7Re' keh xa je' teew inkitik, eh xa je' kaq suut teew i naakijacham. Re' i ki trigo ma' naa ta chik rub'anam paam, eh wila' xub'an paam re' chik taqe i tokoom tinamit naa kib'aniik rusuqkiil.8Eh naa rusachariik kiwach i aj Israel, eh xama' xta chik naa kokiik wii' chikiwach i tokoom tinamit.9Re' taqe i aj Efraín je' kikab' i b'uurux ma' kinimanik taj. Ruum xooj kitoj i aj Asiria chi naa kiko'ljiik.10Atoob' ta naq neen kikemelej k'ih-oq toob'en keh pantaq tinamit, re' hin naa numolom kiwach atoob' ta naa taqe nuye'em panti' k'axik chuwach i ma' k'ih ta laj q'iij, pan kiq'ab' i reey, pan kiq'ab' taqe i k'amal b'eeh.11Re' taqe i aj Efraín ma' k'isiin taqe i artaal inkiyejaa' k'atb'al kimayiij re' i xa kojb'al kimahk inkamanik wii' keh.12Eh re' hin xnutz'ibaaj wo' naq keh i nuk'uhb'aal, xa re' la' re' keh xama' xkiyeew ta wo' rajaawriik.13Re' keh inkik'at taqe i chikop chi kimayiij chi nuwach, eh inkik'ux i rutib'kaal. Eh re' hin i Dios ma' ponik ta chi nuwach inki a'n re' re'. Re' hin ink'ulik cho panuk'ux i yiib' wach inki a'n naa taqe nuye'em chutojariik i kimahk, naa wo' chik kisutiniik reje Egipto.14Re' taqe i aj Israel xsahchik pankik'ux chi re' hin xin tz'uhkrisanik keh, re' chik ruyejeb'jiik i rupaat kitiyoox xkian. Eh re' taqe i aj Judá re' chik i nimaq taq tinamit xkiyejaa' ko'lb'al kiib'. Re' hin naa nuk'atam i nimaq paat je' wo' hoq i tinamit xkiyejaa', inki i Dios. Re' Oseas xuq'or chi naa ruchaliik i ti' k'axik chikinaah i aj Israel1Re' Oseas je' wili i xuq'or: Re' taq i hat wuch aj Israel, mat pisk'anik taq panawooq ruum i rusuqkiil taq ak'ux, je' rukab' inki a'n i tokoom tinamit. Re' taq i hat xkitoj taq aweh je' k'oyomal taq xa a'n ruum xakanaa' taq aaDios, xakapaaj taq i chi ruum i re' naa ruwachiniik taq atik.2Naa la' ruponiik i q'iij chi ma' naa ta chik ruwachiniik i trigo, i uuva, ma' naa ta chik ruwihiik taq awa' ahaa'.3Re' taq i hat aj Efraín, ma' naa ta chik taq awihiik ayu' parutinamiit i QaJaaw Dios. Naa la' wo' chik asutiniik taq reje Egipto, eh Asiria, ar taq naa ak'uxum i ch'uwa' wach.4Eh ar ma' naa ta chik taq aye'em i riis uuva chi mayiij, i ak'atoj mayiij chuwach i QaJaaw Dios, re' taq awa' naa ak'uxum reh ti'kiil k'uxliis. Eh chu'nchel taq i naa ak'uxwiik reh i re', naa ruch'uwa'risam taq awach. Eh ma' naa ta taq aye'em chi mayiij chuwach i QaJaaw Dios.5Eh wila' je' re' ¿Chib'ih taq i naa a'nam na' chureq i ruq'ijil i ninq'iij ye'b'al ruloq'il i QaJaaw Dios?6Re' taq i hat naa aweliik reje ayu' ruum i ti' k'axik, naa taq kimolom reje awach i aj Egipto, je' naa naa kaat taq kimuq'aam ar Menfis. Re' taqe i chib'ih aweh re' ruuk' i plata naa ruq'uuxriik kiwach, naa ruchaamb'iik i ch'ahn, i k'iix chupaam taq aa ye'aab'.7Eh xponik chik i ruq'ijil chi naa taq ak'ulum i ti' k'axik, eh chi naa taq atojom riij taq amahk, je' rukab' i ruk'ul taq cha weh. Eh je' taq wili inaq'or: Re' i jalal ruq'oral i Dios re' re' q'e' min min ruuk' taqe i ruq'or, je' cho ahqaal, tiki taq, ruum q'e' taq i yiib' wach ana'ojb'al, ma' k'isiin taq ti ixowanik.8Re' hin xirupab'aa' i Dios chi jalal ruq'oral taq chaxilak, i hat taq aj Efraín, eh re' taq i hat inaq'at taq panub'eeh. Eh noq kinwihik chupaam i rupaat i QaJaaw Dios, ma' k'isiin taq i nawixow nuwach.9Re' taq i hat ma' k'isiin i yiib' wach na'ojb'al taq i na a'n, je' rukab' i xb'aan Gabaa. Re' i QaJaaw Dios naa ruk'uliik paruk'ux taq ayiib' wach na'ojb'al, eh naa taq kaat ruye'em chutojariik taq amahk, inki i Oseas. Re' taqe i aj Israel naakik'ulum i ti' k'axik ruum i kimahk inki a'n10Re' i QaJaaw Dios je' wili xuq'or: Noq xnusik' cho kiwach i aj Israel xsuuqb'ik nuk'ux, je' rukab' noq insuuqb'ik ruk'ux inreqwik reh i uuva panchiq yuuq'. Re' i kimaam kati't xsuuqb'ik wo' cho nuk'ux kuuk', je' kikab' i peet wach i higo, re' chik i tiyoox Baal-peor xkiloq'ej, xin kiq'eb' i hin, xkik'uhtaaj kik'ixb'ilaal. Eh xkich'uwa'risaj kiib' je' kikab' inkiloq'ej.11Re' i runimaal kiwach i aj Efraín naa rusahchiik wach xa je' inrupinik reje tz'ikin. Re' kehk'een, ma' naa ta chik kikahniik wach k'achariik, eh ma' naa ta chik raasjiik kak'uun kixq'uun.12Eh atoob' ta neenkik'isaj kak'uun kixq'uun, re' hin naawisam chikiwach, ma' jino'q chik i naa nukanaam. Eh q'e' ti' i naakik'ulum, ruum naa nukanaam taqe chi kutkeel, inki.13Re' i Oseas je' wili i xuq'or: Re' hin xwilow taqe i aj Efraín je' kikab' i aj Tiro chi q'e' naq suq wilkeeb', xa re' la' re' taqe i aj Efraín pankimik k'ahchi' kikanaam taqe i kak'uun kixq'uun.14QaJaaw Dios, re' hat cha a'n kuuk' inakapaaj. Chakanaa' taqe ixoq chi ma' nee ta chik ki ak'unaniik', eh chi ma' nee ta chik kich'uch'isanik, inki.15Re' i QaJaaw Dios je' wili i xuq'or: Re' taqe i aj Efraín Gilgal i xkian kiyiib' wach na'ojb'al, xchalik nujosq'iil kuuk'. Eh ruum i kiyiib' wach na'ojb'al, ma' naa ta chik nukojom taqe panupaat. Eh ma' naa ta chik nuk'axam taqe, ruum re' taqe i k'amal kib'eeh ma' kinkinimaj ta chik.16Re' taqe i aj Efraín q'e' ti' naa kiwihiik, je' kikab' i chee' chiqinaq chik i raa', ma' wachinik ta chik. Re' keh naa wo' naq ruwihiik kak'uun kixq'uun, eh re' hin naa nusachwiik kiwach, inki.17Re' i tinamit wili ma' xkinimaj taj inq'orarik keh ruum i nuDios, ruum aj re' naakiq'eb'ariik ruum, re' keh xanaa chik kojiik chi b'ehik naah taq tinamit, inki i Oseas.1Re' taqe i aj Israel je' naq kiholwochiil i ruche'el i uuva q'e' wachinik. Nik' wach noq xk'ihaaxb'ik i chib'ih keh, je' wo' re' noq ink'ihaaxb'ik i kiartaal inkiyejaa'. Eh noq xa holohik chik i kitik i nelik, ma' k'isiin i tiyoox xkiyejaa' ruuk' holohaq ab'aj.2Re' taqe i aj Israel xak'ul inki a'n kiwach, ruum aj re' naa kitojom riij i kimahk. Re' i QaJaaw Dios naa ruyojwiik i kiartaal, eh naa rusacham kiwach taqe i kitiyoox.3Eh re' i tinamit wili, je' wili naa kiq'orom: Yu'naak aj re' ma' xta chik qareey, ruum ma' xqayohleej ta wach i Dios. Eh ¿Wilik ta wo' naq qareey mi nee ta wo' naq qohrutoob'eej?4Eh xa kichoqik chi q'orik, inkiq'or i korik chi wilik i naa kianam, xama' inki a'n ta wo' hoq. Eh re' i q'ataj q'orik inki a'n xakaansanik i ruk'am chaloq, xa je' rukab' i ch'ahn inkansanik reh i tik, inko'q taqe.5Re' taqe i aj Samaria xakib'arb'otik chik, xasuq chik kioq'ik, noq xkib'iraj chi naa rusahchiik wach imas wakax tiyoox wilik Bet-aven. Ruum i re' q'e' ti' kik'ux taqe i tinamit, taqe k'amal kib'eeh aj tiij, re' i runimaal kiwach naa rojiik sahchoq wach.6Eh re' i ki imas wakax tiyoox, naa ruk'amariik reje Asiria naa ruye'ariik chi rukooch i runimaal wach reey. Ruuk' i re' naakik'ixiik i aj Efraín. Eh re' aj Israel naa wo' kik'ixiik ruum i kitiyoox.7Re' taqe i aj Samaria naa rehtesjiik i rajaawriik, i kireey naa rukahniik chi xa je' chik rukab' i ma' ahl ta laj sohk' k'ul inooj naa ha'.8Eh naakiyojib'iik i rupaat i kitiyoox chinaah taqe i yuuq', re' kimahkunik wii' i aj Israel chulooq'jiik i tiyoox. Eh chinaah taqe i kiartaal naa rupoq'iik i k'iix taqe i yiib' wach ch'ahn, je' wili naa kiq'orom i tinamit reh taqe i nimaq taq yuuq': Tiq'ehb'oq cho chi qanaah, chatz'ap qanaah, inko'q taqe, inki Oseas.9Re' i QaJaaw Dios je' wili i xuq'or: Re' taqe i aj Israel xama' kikanaam ta wo' i mahk chi nuwach kitoq'aam cho Gabaa, ruum aj re' na' b'anroq i q'aq'inik naa rusachariik kiwach i aj Gabaa yiib' wach kina'ojb'al.10Re' hin naa nuye'em taqe i chutojariik i kimahk i tinamit re' re', xanik' pa' nwaaj i hin. Eh noq naa nuye'em taqe panti' k'axik i hin naa wo' ruchaliik b'anoq keh kuum i tokoom tinamit.11Re' taqe i aj Efraín inki a'n reh i tinamit je' rukab' i rub'an i b'ooyax noq i ruyeq' paam i trigo reh i rupotz'ariik. Ruum aj re', re' hin xnuyeew ahl laj ihq chikinaah. Re' i aj Judá je' naa nukojom taqe chi b'anaj arado, eh re' taqe i riih rumaam i Jacob je' naa naa nukojom taqe chi rulak'ariik wach aak'al.12Re' korik taq cha tik, re' i k'axooj taq neenajach ruum re' i rutik ju'jun re' wo' re' naa rujacham, cha yejaa' taq awiib' je' rukab' noq inab'ixjik wach aak'al reh i tik. Ruum ruq'ijil chik i rusik'ariik i QaJaaw Dios, korehtaal i ruyeew chi manlik i ko'lemb'al taq awiib'.13Re' taq i hat re' i yiib' wach na'ojb'al taq i xatik re' i ti' k'axik taq k'ahchi' ajacham re' chik xak'am taq naah taqe i chukuj q'orik. Eh ruum chi xayeew taq ak'ux chikinaah taqe i kareta reh q'aq'inik, je' wo' chikinaah taqe i soldado.14Eh naa ruwihiik tukinik iib' taq chaxilak, naa rusacham kiwach chu'nchel inako'leej naq taq wii' awiib', je' rukab' noq xusach wach i tinamit Bet-arbel i reey Salma rub'ihnaal re' noq xub'an i q'aq'inik, noq xukansaj taqe i tuutb'ees taqe i kak'uun kixq'uun.15Re' taq i hat aj Israel i wilkaat taq ar Bet-el je' re' taq i naa ak'ulum ruum taq ayiib' wach ana'ojb'al, eh re' taq aareey xa chi jumehq'iil naa rusachariik wach, xa je' rukab' noq inchalik rusaq'iik, inki i QaJaaw Dios. Re' Dios i ruk'ax taqe i rutinamiit atoob' ta ma' kinimanik ta chuwach1Re' i QaJaaw Dios je' wili i xuq'or: Noq xkitoq'aa' cho nimanik i aj Israel xnuk'ax taqe. Eh xnukoj taqe chi wak'uun wixq'uun xwesaj taqe chaloq i Egipto.2Eh noq q'e' naq nuk'ax taqe, xkesaj iloq kiib' chi wiij. Eh chikiwach chik i ma' re' ta taqe i dios inkik'at i kimayiij, inkik'at i insensia chikiwach taqe i tiyoox.3Atoob' ta je' re' inki a'n re' hin xnuk'am kib'eeh i aj Efraín eh xnuchop chi kiq'ab', eh xnuk'uhtaaj cho keh i nimanik. Re' keh xama' xkireq ta wo' chi riij chi re' hin xincha'jinik cho keh.4Re' hin ruuk' q'unil, ruuk' k'axooj xnuk'am taqe cho wuuk', eh xwisaj i ahl laj ihq wilik naq chikinaah, xnuyeew wo' kiwa' kihaa' parub'ehel.5Xa re' la' re' keh ma' xinkaaj ta chik kiin kinimam, ruum i re', re' chik taqe i aj Asiria naa rub'aniik i kowlaj taaq'anik chikinaah, je' rukab' i xkik'ul chaloq Egipto.6Eh naa rub'aan ikaansanik ruuk' i q'aslaj ch'ihch' pan kitinamiit, eh naa rusachariik kiwach aha' naq inkiko'leej kiib', ruum xa chi kutkeel inkiyejaa' wach chib'ih inki a'n7Re' i nutinamiit xama' kinkaaj ta wo' kinimam yu'naak, inkik'er wo' naq kichii' chi re' hin i Dios, xa re' la' ma' jino'q inye'wik runimaal nuwach.8¿Chib'ih reet noq nee taq tinukanaa' i hat aj Efraín? ¿Chib'ih reet noq nee taq tinukanaa' pan kiq'ab' i ki-ixowanik taq awach i hat taq aj Israel? ¿Mi ruk'ul re' chi nee taq i nusach awach i hat, je' rukab' noq xnusach kiwach i aj Adma, i aj Zeeboim? Re' wánima xan yot'ik chik, ruum i nuketelaaj taq awach.9Eh ma' naa ta nuye'em i nujosq'iil taq cha naah, ma' naa ta nusacham taq awach hat aj Efraín, ruum re' hin, hin Dios ma' hin ta xa winaq. Re' hin i Dios wilik nu Sahtohiil wilkiin taq panaxilak, ma' xin chalik ta chi rusachariik taq awach.10Re' hin naa nuk'erem nuchii' je' rukab' i rub'an i kaq b'ahlam chi kiyohb'eesjiik i ki-ixowanik wach i nutinamiit. Eh re' keh xakib'arb'otik chik ruum i kiyo'jiik noq naa kichaliik chi korkiil i rookb'aal q'iij,11Re' keh naakeliik chaloq Egipto chi jumehq'iil je' kirupinik chaloq i tz'ikin. Eh je' kirupinik chaloq paloma noq naakeliik chaloq Asiria. Re' hin naa wo' chik nuye'em taqe chi patinik pan kiye'aab'.12Eh re' taqe i aj Efraín xa re' i chukuj q'orik inki a'n chi nuwach. Eh re' taqe i aj Israel xa re' i nujot'ariik inki a'n Re' taqe i aj Judá xin kiq'eb' chi riij kik'ux i hin, re' chik taqe i xa tiyoox xkini imaj, inki i Dios. Re' i yiib' wach na'ojb'al xkian i rutinamiit i Dios1Re' taqe i aj Efraín re' teew inchalik pareelb'aal q'iij inye'wik kikowiil rajlaal i q'iij. Eh inkitiq naah i chukuj q'orik, i ti' k'axik inki a'n reh i kas kichaaq, wilik inkiyejaa' wach kuuk' i aj Asiria, eh inkisiij reje ink'ohnik laj aseite keh i aj Egipto, inki.2Re' i QaJaaw Dios xchalik ruk'aah chikinaah i aj Judá, naa ruye'em taqe chutojariik i kimahk i riih rumaam Jacob, eh naa rutojom keh re' q'oreel chib'ih xkian i xkiq'or.3Eh noq x-aasjik i Jacob, ruchopom i ralaq rooq i ras Esaú noq x-aasjik. Eh noq xwinaaqb'ik i Jacob xupaj ransil ruuk' i ruánjel i Dios.4Eh xupaj ransil ruuk' i ánjel, eh xuq'at wach i ransil i ánjel, xupahqaaj reh i Dios ruuk' oq'ik chi naa rukuxeesjiik. Ar Bet-el xuk'uhtaaj riib' i Dios chuwach, xkuxeesjik wo' hoq, reh chi xooj rukuxisaj i hoj.5Re' i QaJaaw nim rajaawriik xkuxisanik reh i Jacob QaJaaw Dios i rub'ihnaal.6Re' taq i hat, hat taq riih rumaam i Jacob cha nimaj wo' taq chik aaDios, re' i holohik laj na'ojb'al taq cha a'n, eh chayeew taq ak'ux ruuk' aaDios.7Re' i QaJaaw Dios je' wili i xuq'or: Re' taqe i aj Canaán ma' manlik ta kipajwik ruuk' i kipex ruum q'e' suq keh i leq'.8Eh re' taqe i aj Efraín je' wili inkiq'or: Re' hoj xoj b'ehomrik ruum xqareq ruraxiil qaq'iij. Ma' awach ta neen q'orik qeh chi ma' holohik taj inqa a'n, ma' nee ta nq'orarik chi ruuk' i leq' xqareq tz'aaq' i chib'ih qeh, inki taqe.9Re' hin i Dios, hin xineesanik taq cha weh Egipto, eh naa wo' chik taq kaat nuye'em chi patinik chupaam taqe itz'ihy naah paat. Je' rukab' noq i na a'n taq chaloq aninq'iij.10Eh re' hin xin sik'wik cho kiwach taqe ijalal nuq'oral nutaq'aaj taq cho chaxilak, eh ma' k'isiin taqe i xnuk'uhtaaj keh pan kisaq wiriik. Eh kuum keh xinq'orik panjalwaach q'orik.11Eh ar Galaad ma' k'isiin taqe i tiyoox, xa re' la' ma' re' ta wo' taqe i Dios. Eh ar Gilgal inkik'at chi kimayiij taqe imas wakax, re' taqe i ki altaar xa je' juntuhb' chi ab'aj chupaam taqe i tik mu'uun, inki i Dios.12Re' i Jacob i xikin taq cho aamaam xumol chi elik chupaam i ye'aab' Aram ar xooj chusik'ariik i rehk'een. Eh ar xkamanik chi cha'jinik tentzun.13Re' QaJaaw Dios, ruuk' jinaj i jalal ruq'oral xrisaj taqe chaloq i aj Israel ar Egipto. Eh ruuk' wo' hoq i jalal ruq'oral xucha'jeej taqe i aj Israel.14Re' taqe i aj Efraín ma' k'isiin taj i rujosq'iil i Dios xkuksaj chaloq. Re' i QaJaaw Dios naa ruye'em chutojariik taqe ikaansanik kianam, naa kitojom wach i kiyiib' wach na'ojb'al kianam. Re' QaJaaw Dios xusach kiwach i aj Israel1Eh noq kiq'orik naq i aj Efraín kiyo'jik naq taqe aj Israel, eh inkiyeew naq rajaawriik, xa re' la' taqe i aj Efraín xsacharik kiwach, ruum re' chik i tiyoox Baal xkinimaj.2Re' taqe i aj Efraín xama' xkikanaa' ta wo' rub'aan i mahk xa konkiyej-aa' wo' kitiyoox chi plata, re' inkik'ax wach taqe i ye'jan reh, eh je' wili inkiq'or: Chak'at taq i mayiij chikiwach, inki taqe. Eh inkitz'ub' taqe i tiyoox je' kiwii' k'isa imas wakax.3Je' re' noq ilook' insacharik kiwach xa je' ki-ik'ik suutz' pantaq wahq'eq, je' kikab' i mus jab' parusaq'iik, jumehq'iil insahchik wach. Eh je' kikab' i ma' ahl ta laj sohk', ink'amarik reje ruum i teew, xa je' kikab' i sib' i nelik chaloq pan ehteesb'al reh.4Re' i QaJaaw Dios je' wili i xuq'or: Re' hin taq aaDios noq xat wihik taq cho Egipto, eh ma' awach ta chik taq i xakoj chi aaDios, xa re' wo' hin taq awaj ko'loom.5Eh re' hin xincha'jinik taq aweh chupaam i ye'aab' chiq yuuq' ma' xta i nelik chupaam.6Noq wilkaat taq chik chupaam i holohik ye'aab' suq taq chik awa' ahaa' xa nimb'isaj taq awiib' xsahchik taq panak'ux i nunimjiik.7Re' hin naa taq nusacham awach, je' rukab' i rub'an i kaq b'ahlam noq i ruchop i rutiib'. Eh je' rukab' i rub'an i qamaam b'ahlam noq i ruchop i rutiib' chii' b'eeh.8Re' hin naa ruchaliik nujosq'iil, je' rukab' i rujosq'iil ixoq oso xq'ucharik i rak'uun. Ar naa nub'anam taq aweh, je' rukab' noq i ruk'ux i rutiib' i kaq b'ahlam. Naa nusacham taq awach je' rukab' i rub'an reh i rutiib' i josq'laj chikop wilik pantaq ch'ahn.9Re' hin naa nusacham taq awach i hat taq aj Israel, eh ma' awach ta naa ruko'liniik taq aweh.10Eh ¿Aha' wilik taq aareey apahqaam taq weh, i kiko'linik naq taq aweh panatinamiit? ¿Aha' wilik taqe i q'atal q'orik xiye'arik taq aweh noq xapahqaaj taq aareey ruch'ihil taq i k'amal ab'eeh?11Re' hin ruuk' josq'iil xnuyeew taq aweh aareey eh ruuk' wo' chik nujosq'iil xwesaj taqe.12Eh re' taqe i kimahk i aj Efraín wilik panuk'ux, re' taqe i kiyiib' wach na'ojb'al ma' naa ta reliik panuk'ux.13Re' ti' k'axik chalik reh chikinaah, je' rukab' i ruti'kiil ixoq noq ink'ulik ruk'ux. Eh je' kikab' xa aasjik chik reh, ma' nasjik ta wo' chi korik, ma' xta runa'ojb'al, ni xata ruyeew riib' chi korik reh chi neenasjiik.14¿Mi neerub'an re' chi nee taqe inuko'leej ruuk' inki a'n? ¿Mi neerub'an re' chi nee taqe inuko'leej chuwach i rutojariik taqe amahk? Re' i rajaawriik i kimik nuye'em chik chikinaah. Ma' naa ta chik nuketelaam kiwach.15Atoob' ta naq nee kik'ihaaxb'iik, je' rukab' noq intoxlinik i chee', nee inwihik chib'ih keh. Re' hin naa nuye'em i kowlaj teew inchalik panchiq yuuq', sachb'al wach i chib'ih keh. Naa ruchiqiik i raasb'al kihaa' naa relq'jiik kib'ehomal kuum ixowan kiwach.16Eh naa nuye'em taqe panti' k'axik i aj Samaria, ruum xin kiq'eb' chi riij kik'ux. Eh naa kikanteesjiik ruuk' q'aslaj ch'ihch', naakiq'ojariik wataq ab'aj i kiha'lak'uun. Re' taqe i yowaab' ixoq naakipoch'ariik, inki i Dios. Re' Oseas xupahqaaj otob'il keh i aj Israel chi kinimaj wo' chik i Dios1Re' Oseas je' wili i xuq'or: Hat taq aj Israel cha sik' wo' taq chik aaDios, ruum xaq'eb' taq awiib', ruum taq amahk.2Chapahqaaj wo' taq chik kuyb'al amahk reh, je' taq wili i cha q'or: QaJaaw Dios cha kuy ta tii qamahk ruuk' i yiib' wach na'ojb'al inqa a'n. Eh chak'ul ta tii qeh panotob'il i qatiij, je' wo' hoq aloq'oonjiik inqa a'n3Qohako'leej i hat ruum re' taqe i aj Asiria ma' nkian ta qako'ljiik. Eh ma' nee ta wo' inqako'leej qiib' chi nee qohooj chi q'aq'inik rij kawáyu, eh ma' nee ta chik inqakoj chi qadios taqe i tiyoox xa hoj qohyej-aanik keh, ruum xa re' wo' hat tiketelinik kiwach i ma' xta kituut kajaaw, tiko'q taq, inki.4Re' i QaJaaw Dios je' wili i xuq'or: Re' hin naa wesam i q'etwachiil pankanima i aj Israel. Eh naa wo' chik nuketelaam kiwach naa wesam i nujosq'iil chikinaah.5Re' hin naa nukamaniik, chi je' hin i jab' chi keh i aj Israel. Re' keh naa kikahniik chi je' rukab' noq ink'er i saq uhtz'ub', naa rukowjiik kik'ux je' rukab' noq i ruk'am raa' i chee' chakaltee' ar Líbano.6Eh re' keh naa kik'ihaaxb'iik je' rukab' noq ink'ihaaxb'ik i q'ab' chee', je' holwochiil i q'ab' i chee' olivo. Eh re' i kik'ohnkiil, je' kik'ohnkiil i chee' chakaltee' ar Líbano.7Re' taqe i aj Israel, re' wo' chik i hin naa nucha'jiniik keh. Eh naa kik'ihaaxb'iik, je' rukab' i trigo, je' rukab' noq kiwachinik i uuva, naa reliik kib'iral, je' rukab' i riis uuva i nelik ar Líbano.8Re' taqe i aj Efraín je' wili i naa kiq'orom: ¿Mi koneenqakoj chi qadios re' i tiyoox? inko'q taqe. Je' wili i naa nuq'orom keh: Re' hin naa nucha'jiniik taq aweh, naa nuye'em taq aweh chib'ih taq inawaaj i hat, hat taq nutinamiit. Re' hin, je' hin jinaj chee' xa eliik rax wach reh chi naa kiwachiniik, kinko'q keh, inki i Dios.9Wila' wilik jino'q i wilik runa'ojb'al taq chaxilak chureq chi riij taqe i k'uhb'aal wili. Re' i rub'eeh i QaJaaw Dios korik wach, eh re' re' inkik'am i korik wach kik'ux. Eh re' taqe i yiib' wach kina'ojb'al ma' nkik'am taj ruum i re' inkiq'eb' kiib'.
Bible Society in Guatemala