ECLESIASTES1
1Re' i Salomón xti wilik runa'ojb'al, rak'uun i David xwihik cho chi reyil Jerusaleem je' wili i xuq'or:2Chib'ih imb'aan, chib'ih i wilik wach ak'al xama' xta ruk'am chaloq, eh xti korik noq chu'nchel i re' ma' xta ruk'am chaloq.3¿Chib'ih neeruk'ax i winaq chi rajlaal i q'iij neeruk'at riib' chi kamanik chuwach i rutz'ahiil i q'iij?4Re' taqe i k'achareel kikimik, eh wilik wo' chik i ki-aasjik. Eh kikimik wo' chik reje, eh re' wach ak'al xama' njaljik ta wo' wach.5Re' i q'iij i nelik chaloq re' q'iij inokik qohoq, eh inenelik wo' chik chaloq chi junwaar.6Re' i teew inooj hupinoq pansak'aaj reh i rookb'aal i q'iij, pantz'eet reh i rookb'aal i q'iij. Eh xa aha' ta chik ma' nooj hupinoq eh insutinik wo' chik chaloq.7Eh re' taqe i rooq ha' pam palaw kiooj qohoq, eh re' taqe palaw xama' kinujik ta wo' hoq, eh aha' ki-ik'ik eqal eqal xa ar wo' chik ki-ik'ik.8Eh chu'nchel i xa chib'ih jariik, xaneenb'aan q'uhtik reh, ma' nee ta inkan i q'orik reh i ruq'orariik, atoob' ta nee rilow inaq'qawach, neerib'iraj i qaxikin, xama' nee ta wo' inch'iklojik k'uxliis.9Re' taqe i wilkeeb' cho najtir xa re' wo' re' i wilkeeb' yu'naak. Re' i korjinaq cho najtir xa re' wo' inkorjik yu'naak, ma' xta chik jino'q i ak' inkorjik, chinaah i wach ak'al.10Eh ma' awach ta nee nq'orik reh, re' wili ko ak' chik, ruum chu'nchel i chib'ih jariik wilkeeb' xama' yu'naak wo' q'iij saqum rukorjiik chaloq.11Chu'nchel i b'anooj cho najtir xsahchik pank'uxliis, eh chu'nchel i k'ahchi' yu'naak, chu'nchel i naa rub'aan na' chub'an naa wo' rusahchiik, pank'uxliis. Re' i rusik'ariik ruman i na'ojb'al xama' xta ruk'am chaloq12Re' hin i xti wilik nuna'ojb'al xinwihik cho chi kireey i aj Israel ar Jerusaleem.13Re' hin xnuyeew nuk'ux chi rusik'ariik chi riij ruuk' i na'ojb'al nik' wach noq wilik chu'nchel imb'aan chinaah i wach ak'al wili. Eh xwilow chi re' i Dios yohb'aal wach kowiil i kamanik xuyeew cho chi qanaah.14Eh re' hin xnukoj rehtaal chi chu'nchel imb'aan ayu' wach ak'al xama' xta ruk'am chaloq, xa je' rukab' noq neenajawjik ruchopariik i teew.15Re' yok yok noq wilik ma' nee ta chik i rub'an chi nee nayub' wach. Eh jino'q i ma' manlik taj, ma' nee ta rub'an chi neenqamanaa' rajaljiik.16Re' hin xnuq'or pan wánima chi je' wili: Re' hin ayu' wilkiin xiik' naah nimaal nuwach, xiik' naah i nuna'ojb'al chikiwach i wihinaq taqe chaloq chi reyil ar Jerusaleem peet chi nuwach i hin. Eh ma' k'isiin i nuna'ojb'al xnureq kinki.17Re' hin xnuchop nuk'ux chureqariik ruman i nuna'ojb'al, eh xwaaj naq nureqem chi riij i memil, i sah cheel laj na'ojb'al. Xa re' la' re' taqe i re' xama' xta ruk'am chaloq xaruti'kiil k'uxliis inki yeew.18Ruum awach i,
ma' k'isiin runa'ojb'al ma' k'isiin wo' ruk'axkiil inchalik. Eh wila' ma' k'isiin reht'al ma' k'isiin wo' i ti' inchalik chinaah. Re' i rusik'ariik i suq kiil k'uxliis wach ak'al xama' xta ruk'am chaloq1Re' hin je' wili xnuq'or panuk'ux: Naa nunik'eem rusik'ariik i suq laj k'achariik, kinki. Eh re' taqe i re' xwilow chi xama' xta ruk'am chaloq.2Re' se'eel i ruyeew i wach ak'al xasah cheel laj na'ojb'al, eh xama' xta ruk'am chaloq.3Eh re' hin sik'ij naq nuna'ojb'al i nub'an xnukapaaj naq chi naa nureqem rusuqkiil nuk'ux ruuk' i xohk'rik, xnuyeew reh i k'ahlaj ha' i nuti'jolal, i ib'al reh mi re' re' i ruk'ul chi neerub'an i winaq nik' najtiil i ruk'achariik ayu' wach ak'al.4Yohb'aal wach i nimaq kamanik xnub'an ma' k'isiin taqe i nupaat xnuyejaa', eh runimaal i nu uuva xnutik.5Eh nuyejaa' wo' nuye'aab' xnutik taqe i chee' ar re' ruuk' i suq inkiwachuj, eh xnutik taqe i uhtz'ub' ar.6Xnuyejaa' wo' taqe i nimaq tz'aq ye'aab' ha' tz'aqtesb'al reh taqe i chee' kiwachinik.7Eh re' hin xnuloq' taqe i numoso winaq, eh ixoq, xi wihik taqe i numoso pan nupaat xi-aasjik. Eh k'ih i nuwakax, i nutentzuun xi wihik, chikiwach i xwihik cho chi reyil Jerusaleem peet taqe chi nuwach i hin.8Eh ma' k'isiin taqe i oro, i plata xnumol wach, je' wo' taqe i xa chib'ih jariik k'ih taq tz'aaq xkik'am cho weh i reey tokoom tinamit kichalik ma' k'isiin wo' taqe waj tz'uuy xiye'wik rusuqkiil nuk'ux chi winaq chi ixoq. Ma' k'isiin taqe i wixoqil xi wihik.9Xti xiik' wo' naq naah runimaal nuwach, eh xa re' wo' naq i hin ma' k'isiin i chib'ih weh xwihik chikiwach taqe i xi wihik cho chi reyil Jerusaleem peet chi nuwach i hin. Eh ma' k'isiin wo' i nuna'ojb'al wilik.10Eh aha' wilik ixnuk'ax wach xnub'an wo' hoq, aha' wilik ixwaaj xnuyeew wo' reh i nuti'jolal. Re' taqe i re' xuyeew weh i kowlaj kamanik xnub'an.11Eh re' hin xnukapaaj riij taqe i nub'an, je' wo' chu'nchel i kowlaj kamanik xnub'an. Ar xnukoj rehtaal chi xama' xta ruk'am chaloq, xama' xtaj ixnuk'ax ruuk' chinaah i wach ak'al wili, xaruti'kiil k'uxliis i ruyeew.12Eh chi riij i re' xtohq'ik nukapaam chi riij i holohik laj na'ojb'al, je' wo' i memil laj na'ojb'al. Eh ¿chib'ih jariik i naa rub'anam i naa rokiik chi reyil noq ma' wilkiin ta chik i hin? ma' xta chik jino'q tokoom naa rub'anam xa re' wo' hoq i xnub'an i hin.13Re' hin xwilow chi re' i holohik laj na'ojb'al q'e' holohik chuwach i na'ojb'al xanik' wach, je' rukab' i saqum q'e' holohik chuwach i q'equm.14Re' wilik runa'ojb'al saqum paam i rukapeb'aal, re' i ma' nimanik taj q'equm paam i rukapeb'aal xa re' la' jinaj wach inaruk'ulum i wilik runa'ojb'al ruuk' i ma' xta runa'ojb'al.15Re' hin je' wili i xnuq'or panuk'ux: Re' hin wilik nuna'ojb'al wila' naa nuk'ulum weh je' rukab' inaruk'ulum i ma' xta runa'ojb'al, xama' xta inki chi ma' k'isiin i nuna'ojb'al. Eh xnuq'or chi chu'nchel inqa a'n xama' xta ruk'am chaloq.16Ruum ma' naa ta chik ruk'uliik pank'uxliis chi jumpech i wilik runa'ojb'al, i ma' xta runa'ojb'al. Ruum naa rukimiik i wilik runa'ojb'al, je' wo' hoq i ma' xta runa'ojb'al, kinki.17Re' hin xponik i q'iij noq xwixow wach i nuk'achariik, ruum chu'nchel imb'aan ayu' wach ak'al, xati' k'axik i ruyeew chi qanaah xama' xta ruk'am chaloq, xaruti'kiil k'uxliis i ruyeew.18Eh wixow wo' wach chu'nchel i kamanik xnub'an, chinaah i wach ak'al wili. Ruum weht'al chi chu'nchel i chib'ih weh naa nukanaam kahnoq reh i tokoom.19Eh re' hin ma' weht'al taj mi wilik runa'ojb'al oon ma' xta runa'ojb'al i naa rehchaniik reh i xnumol wach ruuk' i kowlaj kamanik xnub'an wach ak'al. Eh re' i nunim wach na'ojb'al xama' xta ruk'am chaloq.20Noq xwilow chu'nchel i chib'ih weh xnureq ruuk' kowlaj kamanik xnub'an xaruti'kiil nuk'ux i ruyeew.21Eh re' winaq wilik runa'ojb'al ruuk' rukorkiil wach ruk'ux i rub'an i kowlaj kamanik noq i rureq tz'aaq i chib'ih reh. Eh ma' reht'al taj chi re' chib'ih reh, reh i ma' rukamaneem ta wach naa rukanaam. Ar ink'utinik chi re' kamanik i rub'an xama' xta ruk'am chaloq.22Ruuk' i wili ink'utinik chi xama' xta rutiq reh i winaq chi nee rukansaj riib' chi kamanik ayu' wach ak'al.23Eh chu'nchel i ruk'achariik xati' k'axik wilik, xaruq'uhtisaj riib' chi kamanik ni xata re' chaq'ab' inhi'lik i rukapeb'aal, eh chu'nchel i re' xama' xta ruk'am chaloq.24Re' ruk'ul chi naa rub'anam i winaq, re' chi chub'an ruwa' ruhaa', chub'an rusuqkiil i chib'ih reh i rureq ruuk' i rukamaj. Re' hin xnukoj rehtaal chi chu'nchel i chib'ih qeh re' i Dios inye'wik cho reh.25Ruum ma' awach taj i neerub'an rusuqkiil chib'ih reh wila' ma' xuyeew i Dios.26Awach imponik chuwach i Dios i rub'an, inye'arik runa'ojb'al, rukapeb'aal, rusuqkiil ruk'ux. Eh re' imb'anik reh i mahk inye'arik pankowlaj kamanik ruum i Dios reh chi rumol wach i chib'ih reh, reh i tokoom i ruyeew. Re' taqe i re' xama' xta i ruk'am chaloq, xaruti'kiil k'uxliis i ruyeew. Chu'nchel imb'aan ayu' wach ak'al wilik ruq'ijil eh wilik ru orahiil1Chu'nchel imb'aan ayu' wach ak'al wilik ruq'ijil, wilik ru orahiil je' wili noq wilik:2Wilik ru orahiil noq imb'aan aasjik, wilik ru orahiil noq imb'aan kimik, wilik ruq'ijil noq imb'aan tik, wilik ruq'ijil noq inchuqarik i tik.3Wilik ru orahiil ikaansanik, wilik ru orahiil iq'omanik, wilik ruq'ijil i yojoj paat, wilik ruq'ijil i yej-anik paat.4Wilik ru orahiil oq'ik, wilik ru orahiil i se'eel, wilik ru orahiil i ti'kiil k'uxliis, wilik ru orahiil i ninq'ijinik.5Wilik ruq'ijil noq imb'aan i kutuj ab'aj, wilik ruq'ijil i moloj wach ab'aj, wilik ru orahiil noq imb'aan q'ahchinik iib', wilik ru orahiil noq inkanab'jik i q'ahchinik iib'.6Wilik ruq'ijil rusik'ariik, wilik ru orahiil i rusachariik, wilik ru orahiil i rumolariik, wilik ru orahiil reh ruq'eb'ariik.7Wilik ru orahiil i xihij itz'ihy, wilik ru orahiil i rub'ojariik i xiheel, wilik ru orahiil chi neemb'aan i q'orik, wilik ru orahiil chi ma' nee tamb'aan i q'orik.8Wilik ru orahiil i k'axaj iib', wilik ru orahiil i ixowanik iib', wilik ruq'ijil i q'aq'inik, wilik ruq'ijil i wihik pansuqkiil k'uxliis.9Eh ¿Mi wilik ta wo' hoq i ruk'ax i winaq noq i rukansaj riib' chi kamanik ayu' wach ak'al?10Re' hin xnukoj rehtaal chi re' Dios yohb'aal wach i kamanik i ruyeew chikinaah taqe i winaq reh chi naa kianam.11Eh re' Dios paruq'ijil xuyejaa' taqe i chib'ih jariik chi q'e' holohaq, eh xuyeew pankikapeb'aal i winaq, i k'uluuj, i naa ruk'ulariik Eh xama' inkireq ta wo' chi riij i rub'anam chaloq Dios pampeet, i naa rub'anam na' chub'an.12Re' hin i nukoj rehtaal chi re' i ruk'ul chi neerub'an i winaq, re' chi neensuuqb'ik ruk'ux, eh chi neerub'an rusuqkiil i ruk'achariik.13Ruum wila' xqa a'n qawa' qahaa' chi manlik, i wixqa a'n rusuqkiil i qakamaj, re' wo' QaJaaw Dios inye'wik cho qeh.14Re' hin weht'al chi chu'nchel i ruyejaam i QaJaaw Dios manlik wach,
ma' ruman ta chik chi neentiqarik naah, chi neenehteesjik ruuk'. Ruum re' i QaJaaw Dios je' taqe re' ruyejeb'jiik rub'anam, reh chi naa ruyohljiik wach i reh.15Eh ma' xtaj i wilik chi ma' ta wihinaq chaloq ma' xtaj i naa ruk'ulariik chi ma' ta nk'ularik yu'naak. Re' i QaJaaw Dios imb'anik chi nk'ularik wo' chik i k'uluuj chaloq. Ayu' wach ak'al ma' xtaj imb'aan parub'ehel16Eh xnukoj rehtaal chi ayu' wach ak'al wilik i leq', wilik i yiib' wach na'ojb'al, xanaah re' i ruk'ul naq chi neemb'aan i rub'ehel chi naa ruwihiik rukorkiil wach k'uxliis.17Re' hin i nuq'or chi re' i QaJaaw Dios naa ruq'atwiik i q'orik chinaah i korik wach ruk'ux, chinaah i yiib' wach runa'ojb'al. Ruum wilik ru orahiil chib'ih imb'aan, eh wilik ru orahiil chib'ih taqe ink'ularik.18Eh i nuq'or panuk'ux chi re' Dios k'ahchi' ruye'em taqe chi pajarik i winaq reh chi neenkireq chi riij chi re' i kina'ojb'al je' rukab' i kina'ojb'al taqe i chikop.19Korik wo' hoq chi je' winaq, chi je' chikop eliik wach inkik'ul noq inooj kuxoq. Re' chikop kikimik wo' reje, re' winaq kikimik wo' reje, xa eliik wach chi ma' xta ruk'am chaloq.20Xa jinaj naa kojiik kuxoq wii', pooq xikorb'eesjik wii', eh pooq wo' chik naakisutiniik wii'.21¿Mi wilik nee nq'orik reh chi korik chi re' ruxlab'al inye'wik ruk'achariik i winaq injohtik taxaaj. Eh chi re' ruxlab'al inye'wik ruk'achariik i chikop inooj qohoq ri'si ak'al?22Ruuk' taqe re' xnukoj rehtaal chi re' i ruk'ul chi naa rub'anam i winaq re' chi naa rub'anam rusuqkiil i rureq ruuk' i rukamaj. Ruum xaruq'iij chi je' re' i k'acharik xub'an. Eh ma' awach ta neenk'uhtanik reh chib'ih i naa ruk'ulum chi riij chik i rukimiik.1Chi riij i re' xwilow wo' hoq i ti' k'axik imb'aan ayu' wach ak'al. Re' imb'aan ti' k'axik keh xasuq chik kioq'ik, ma' awach ta jino'q inye'wik rusuqkiil kik'ux. Eh re' taqe i kib'anik ti k'axik xa chayeew chik inki a'n eh re' imb'aan ti' k'axik keh ma' awach taj jino'q intoob'inik keh.2Ruum i re' xnuq'or i hin chi suq wilkeeb' i kamnaq chik taqe reje chuwach taqe i kok'achalkeeb'.3Eh chikiwach taqe i re' xti q'e' wo' chik suq wilkeeb' i komajaa' ki-aasjik, ruum komajaa' inkilow i yiib' wach na'ojb'al imb'aan chinaah i wach ak'al wili.4Eh nukoj wo' rehtaal chi awach i rumol chib'ih reh ruuk' i kowlaj kamanik i rub'an, i rutoq'aa' kaqwachiil ruuk' i ras ruchaaq', chu'nchel i re' ma' xta ruk'am chaloq, xaruti'kiil k'uxliis i ruyeew.5Re' i ma' nimanik taj i ruq'ahcheej i q'ab' chi' rik'ux, ma' rusik' ta tz'aaq i k'uxumb'al reh.6Re' hin i nuq'or chi ma' xta reet chi nee ruq'ahcheej i q'ab' chi' ruk'ux jino'q i winaq, chuwach chi nee rukansaj riib' chi kamanik, eh xaruti'kiil ruk'ux i neenye'arik.7Eh re' hin xnukoj wo' rehtaal chi wilik imb'aan ayu' wach ak'al xama' xta ruk'am chaloq.8Re' jino'q i winaq ma' xta wilik reh, ma' xta wo' ramigo, ma' xta rak'uun rixq'uun, ma' xta ras oon ruchaaq'. Eh ma' hi'lik ta chi kamanik, ma' hi'lik ta wo' chi kapeb'jiik riij i rub'ehomal. Eh ma' rukapaaj taj awach aj eh naa rukahniik taqe i rureq ruuk' i kowlaj kamanik i rub'an, re' taqe i re' xama' xta ruk'am chaloq.9Ma' xta reet chi pankib'al neenb'aan i kamanik, chuwach chi xa jinaj neemb'anik reh, ruum pankib'al k'ihtz'aaq kikamaj.10Ruum wila' xq'ehb'ik i jinaj, re' chik i jinaj neen nuksanik reh. Eh re' rutkeel riib' q'e' ti' i neeruk'ul ruum wixq'ehb'ik ma' awach ta nenuksanik reh.11Eh je' wo' noq pankib'al neemb'aan wirik k'ul neenkiq'ixineej kiib'. Eh re' i rutkeel inwirik ma' awach ta neen q'ixinb'isanik reh.12Awach i rutkeel riib' neerutik'aa' peleto neemb'aan reh, eh wila' pankib'al xkik'ulb'ilej ma' nee tamb'aan reh, je' rukab' i k'ahaam ixib' wach ma' nk'up ta chi jumehq'iil.13Q'e' chihooj i k'ijool ak'un atoob' ta xa neb'aa' tiih, chuwach jino'q i reey xa rijib' chik, ma' nimanik taj, eh ma' raaj ta chinkojarik runa'ojb'al.14Ruum re' i k'ijool ak'un atoob' ta pantz'ilom nee nelik chaloq, neerub'an chi neenokik chi reyil, atoob' ta xa neb'aa' tii.15Eh wila' chu'nchel neekiokik chi riij i k'ijool ak'un chi neenokik chi jilow i reey.16Eh ma' k'isiin i tinamit neekiokik chi riij reh chi nee nokik chi reyil. Xa re' la' re' tinamit naa kiwihiik koq'uun ma' naa ta chik ruwihiik rusuqkiil kik'ux ruuk'. Chu'nchel i re' xama' xta i ruk'am chaloq, xaruti'kiil k'uxliis i ruyeew. Ajwaal wach chi naa rub'aan aha' wilik inq'orarik1Noq nee tiooj panrupaat i Dios, mo'-oq teheeh awach. Chajil i koq awiib' chi-ib'iriniik, maa nooj aq'asaj amayiij, je' rukab' noq ink'iq'asaj i kik'atoj mayiij i ma' kinimanik taj, ma' inkikoj ta rehtaal chi ma' holohik taj inki a'n.2Eh maa a'n teheeh awach chi q'orik, ma' chih aq'or reh i Dios chi naa a'nam eh mo'-oq wo' neena a'n rub'aan. Eh xakiib' ixib' aq'oral cha q'or ree Dios, ruum re' i Dios pan taxaaj wilik, eh re' hat ayu' wilkaat wach ak'al.3Ruum wi q'e' xat qajik kapeew, wilik neeruk'uhtaaj riib' aweh panasaq wiriik. Eh wila' ma' k'isiin i q'orik xa a'n neenaq'or aweh i xa memil laj q'orik.4Eh wila' wilik i xaq'or ree Dios chi naa a'nam cha a'n wo' hoq, ruum re' Dios ma' mponik ta chuwach taqe i chukul q'orik.5Eh ma' xta reet chi ma' nee ta naq'or reh chi neena a'n chuwach chi nee naq'or reh chi neena a'n, eh ma' nee ta wo' na a'n rub'aan.6Mayeew q'ab' reh aachii' chi nee tiruq'eb' pamahk, eh koq'uun chik neenaq'or chuwach iraaj taqareel i Dios chi xa asahchik xaq'or wii'. Wila' xaq'or i je' re' neenajosaj wach i rujosq'iil i Dios neerusach wach aha' wilik i xa a'n.7Re' hat,
wila' ma' k'isiin i ruk'uhtaaj riib' aweh pansaq wiriik, eh wila' xama' k'isiin i q'orik i na a'n, re' taqe i re' xama' xta ruk'am chaloq.
Re' hat chayohleej wach i Dios. Re' imb'aan chupaam i k'acharik xama' xta ruk'am chaloq8Re' hat maa nsahchik ak'ux wila' wilik i tinamit xawil chi rub'aan i ti' k'axik keh i neb'aa', eh chi ma' imb'aan taj i q'ataj q'orik parub'ehel, ruum re' i q'atal q'orik xa taaq'amaj wo' ruum i nim wach chuwach i reh, eh re' reh jinaj wo' chik i nim wach intaaq'anik reh.9Eh re' tik i nelik chupaam taqe i ye'aab' inkamanik reh i reey, re' wo' reh inilwik reh.10Awach i ruyeew i ruk'ux chinaah i tumiin koruman iraaj. Awach i ruyeew ruk'ux chinaah i b'ehomal ma' manlojik ta reh nik' nimaal i chib'ih reh wilik.
Eh re' taqe i re' xama' xta ruk'am chaloq.11Awach i k'ih i chib'ih reh k'ih wo' hoq i rusach, iraaj ruq'orom chi xama' xta wo' ruk'ax chi k'ih i chib'ih reh xa nee wo' nooj k'uhloq chuwach.12Awach inkamanik atoob' ta neerub'an ruwa' chi korik atoob' ta ma' neerub'an ruwa' chi korik xasuq wo' inwirik. Eh re' i b'ehoom reh ma' nqajik tee ruwiriik chukapeb'jiik i chib'ih wilik reh.13Re' hin jinaj i q'e' ti' xwilow ink'ularik chinaah i wach ak'al wili, re' rumolariik wach i ma' k'isa b'ehomal, eh xati' k'axik i ruk'am chaloq, noq inooj kuxoq.14Ruum wila' ma' xchol rilariik i rub'ehomal neensahchik wach. Eh ma' xta k'isinoq nee rukanaa' reh i rak'uun rixq'uun.15Eh nik' wach noq x-aasjik je' wo' chik re' noq naa ruk'ohlaam reje i ruk'achariik t'uslik noq x-aasjik, t'uslik wo' chik noq naa rukimiik, ma' xtaj i naa ruk'amam reje.16Re' wili q'e' ti' rilariik ruum nik' wach noq xk'uloq chinaah i wach ak'al wili, je' wo' chik re' noq naa reliik reje, inqakoj rehtaal chi xama' xta nki chi xukansaj riib' chi kamanik.17Eh xa panq'equm wo' xk'acharik, eh xa eliik tib'ik ruk'ux, xa elik panti' pan yab'ilaal xwihik.18Re' i ruk'ul chi naa rub'anam i winaq re' chi naa rub'anam rusuqkiil i chib'ih reh xureq ruuk' i ma' k'isa kamanik xub'an. Paruk'achariik xama' najt ta rooq ayu' wach ak'al xye'arik reh ruum i Dios, i ruk'ul chi je' re' i naa rub'anam ruum je' re' xkanab'jik chinaah.19Eh awach i ma' k'isiin rub'ehomal xye'arik cho reh ruum i Dios i ruyeew wo' q'ab' reh chi rub'an rusuqkiil aha' wilik i ree reh, noq i rub'an rusuqkiil i rureqem ruuk' i rukamaj re' Dios inye'wik reh.20Ruum chi re' i Dios inye'wik rusuqkiil i ránima ma' nqaaj ta kapeew chi riij i chib'ih taqe i ruk'ul paruk'achariik ayu' wach ak'al.1Re' hin xnukoj rehtaal chi wilik wo' chik i k'axik xak'ahchi' ruk'ulariik ayu' wach ak'al, re' wili:2Wilik inye'arik rub'ehomal ruum i Dios, inye'arik reh chu'nchel i ajwaal wach chi reh, inye'arik ruloq'il. Xa re' la' ma' inye'arik ta q'ab' reh ruum i Dios chi rub'an rusuqkiil, tokoom chik imb'anik rusuqkiil. Re' re' xama' xta ruk'am chaloq, xaruti'kiil k'uxliis i ruyeew.3Re' winaq neerub'an chi neen wihik jino'q siento rak'uun rixq'uun, chi k'ih laj haab' neenk'acharik, eh wila' ma' xub'an, rusuqkiil i chib'ih reh, eh wila' ma' xukanaa' rutumiin muq'umb'al reh. Re' ti' nee ruk'ul saqb'ih chi neenik'ik jino'q i k'isa ha'lak'un.4Ruum re' k'isa ha'lak'un xaxik'ik xa ma' x-ilarik ta wo' wach xa panq'equm xkahnik,
eh xama' xkojarik ta wo' rub'ihnaal.5Eh ma' xrilow ta wo' wach i q'iij saqum, eh ma' xuk'ul ta reh i ti' k'axik i xuk'ul i winaq kore' xqaq'or.6Ruum re' winaq re' re' atoob' ta neenk'acharik kib'-oq miil haab', eh ma' nee ta rub'an rusuqkiil i chib'ih reh. ¿Mi ma' jinaj kiooj wii' ruuk' re' k'isa ha'lak'un?7Re' winaq i rukansaj riib' chi kamanik chusik'ariik tz'aaq i k'uxunb'al reh, xa re' la' xama' inch'iklojik ta wo' ruk'ux ruuk' i rureq.8¿Mi suq wilik re' i wilik runa'ojb'al chuwach i ma' xta runa'ojb'al? ¿Mi q'e' suq wilik re' i neb'aa' xchol k'acharik ayu' chi kixilak taqe i k'achareel?9Eh ma' xta reet chi nee rilow ruuk' naq'awach i chib'ih reh jino'q, chuwach chi xa neerukapaaj. Xa re' la' xama' xta wo' ruk'am chaloq xaruti'kiil k'uxliis i ruyeew.10Aha' wilik ink'ularik yu'naak, ink'ularik wo' cho najtir, eht'alimaj chi xa je' wo' re' ink'ularik. Je' re' noq ma' ruk'ul taj chi awach neenwech'inik riij i ruyejaam wach i Dios nim rajaawriik.11Awach imponik chuwach i wech'inik iib' xama' xta ruk'am chaloq i rub'an, xama' xta wo' i neeruk'ax ruuk' i re'.12Xti korik chi ma' awach taj i neehtalinik reh aha' wilik i holohik chi reh i winaq noq kok'acharik i rub'an wach ak'al chuwach i xama' k'ih ta laj q'iij. Re' i k'achariik xama' xta ruk'am chaloq, xa je' nik'ik jinaj muuj. Eh ¿Mi wilik jino'q i nee nq'orik reh i chib'ih i naa ruk'ulrariik noq kamnaq chik reje? Ma' eliik ta wach i wilik runa'ojb'al ruuk' i ma' xta runa'ojb'al1Noq holohik rib'iral jino'q xiik' naah chihojal chuwach ink'ohnik laj iq'oom Eh q'e' wo' chihooj i kimik, chuwach i aasjik.2Eh q'e' wo' chihooj ojik chupaam i paat wilik wii' i kamnaq, chuwach ojik chupaam i paat k'ahchi' wii' i ninq'ijinik. Ruum re' i kimik k'ahchi' ruye'em i k'achareel, awach i kok'achlik inchol rukapaam riij.3Eh q'e' wo' chihoojoq'ik chuwach i se'eel ruum ruuk' i ruti'kiil k'uxliis i ruyeew ruman i rukowiil qak'ux.4Re' wilik runa'ojb'al ar wilik reje i rukapeew chupaam i paat wilik wii' kamnaq. Eh re' i ma' xta runa'ojb'al ar wilik reje i rukapeew chupaam i paat wilik wii' i ninq'ijinik.5Q'e' chihooj chi neenib'irjik i q'ilooj i rub'an i wilik runa'ojb'al, chuwach chi neenqayeew ruloq'il inki a'n i ma' xta kina'ojb'al.6Re' rusuqkiil ruk'ux i ma' nimanik taj xa junik'iik, xa je' rukab' noq ink'ahtik i chiq k'ix chi ri'sil jino'q i xun. Re' taqe re' xama' xta ruk'am chaloq.7Re' wilik runa'ojb'al, re' rub'anariik i ti' k'axik, re' ruk'ulariik i tumiin chi riij i ma' korik taj inyojwik reh i runa'ojb'al.8Q'e' chihooj i rukuxeesjiik jino'q i chib'ih jariik chuwach i rutik'ib'jiik. Eh q'e' chihooj chi xa hat kuyuul chuwach chi q'e' hat kow neena a'n awiib'.9Maa nchalik ak'aah chi jumehq'iil ruum xa re' wo' taqe i ma' xta kina'ojb'al inchalik kik'aah chi jumehq'iil.10Re' hat ma' naa ta q'orom chi je' wili: ¿Chib'ih reet noq re' taqe i q'iij ik'inaq chaloq q'e' chihooj chuwach taqe i q'iij yu'naak? mat ko'q. Ruum xa re' taqe i ma' xta kina'ojb'al kiq'orik reh i je' re'.11Re' i holohik laj na'ojb'al q'e' chihooj chi keh i k'achareel ayu' wach ak'al, jinaj kooch chi keh.12Re' holohik laj na'ojb'al inkamanik chi toob'al reh i ju'jun, je' wo' hoq i tumiin. Xa re' la' re' wilik runa'ojb'al i ruko'leej riij i ruk'achariik.13Chakoj rehtaal i ruyejaam chaloq i Dios, ¿Mi wilik jino'q i neen ye'wik chi korik i yok yok noq xukanaa'?14Nik' ma' xta reet wilkaat cha a'n rusuqkiil. Eh nik' ti' wilkaat xa chak'ulaa', cha kapaaj riij chi re' suq laj wihik, i ti' laj wihik re' wo' i Dios inye'wik reh. Re' ju'jun ma' reht'al taj i naa ruchaliik chinaah.15Re' i kiib' chi na'ojb'al wili wilom panuk'achariik xama' xta ruk'am chaloq: Re' chi re' taqe i korik wach kik'ux kikimik reje chi jumehq'iil, eh chi re' taqe i ma' holohik ta kina'ojb'al inajtb'ik rooq i kik'achariik.16Korik-oq wach ak'ux, xa re' la' ma' wik'saj naah. Eh wilik-oq ana'ojb'al, xa re' la' maawik'saj naah, ¿Chib'ih neerutiq aweh chi xa nee nakansaj awiib'?17Mo'-oq i nik'ik naah i yiib' wach na'ojb'al i na a'n. Eh maa wik'saj naah amemil. ¿Chib'ih neerutiq aweh chi nee tikimik noq komajaa' i rureq i ruq'ijil?18ma' xta reet chi neena a'n i wili, eh ma' nee ta wo' inakanaa' rub'an i jinaj. Awach i ruyohleej i Dios naa reliik korik chuwach i naa rub'anam.19Re' holohik laj na'ojb'al i ruyeew rukowiil ruk'ux i wilik runa'ojb'al, ma' xata je' rukab' i neen kiyeew i lajeeb' chi ajaab'ees wilkeeb' chupaam i jino'q i tinamit.20Xti korik wo' hoq chi ma' xta jino'q i winaq xti korik wach ruk'ux, eh chi ma' ta nee rutz'a'j ruuk' i mahk chi jumpech.21Maa nimaj chu'nchel i neenkiq'or aweh i tinamit, reh chi ma' nee ta nab'iraj amoso wixuq'or i ma' holohik taj chawiij.22Ruum re' hat xti aweht'al wo' hoq chi k'ihpech xaq'or i ma' holohik taj chi riij i tokoom.23Chu'nchel i wili xtohq'ik nusik'im chi riij ruuk' na'ojb'al, xa re' la' chik imb'anik reh xama' xta wo' nuna'ojb'al.24Re' taqe wili xiik' nah k'ayewal chi reqarik chi riij, ma' awach ta neenreqwik chi riij.25Re' hin xnusik' chi riij chi naa nureqem i nuna'ojb'al reh chi naa nureqem chi riij i wili. Eh xwilow chi ma' holohik taj chi q'e' neenamin awiib' chub'aan inawaaj rub'aan, je' wo' rub'aan memil laj na'ojb'al.26Eh re' hin jinaj i q'e' ti' xnureq ma' xata je' ti'kiil noq ink'ularik kimik. Re' ixoq ma' holohik ta runa'ojb'al noq i ruq'unej i winaq korehtaal i nq'ehb'ik pan q'ab' i rukoj xirob' parub'eeh xa re' i ruloq'ej i Dios neeruko'leej riib' pan q'ab', eh re' i aj mahk neenq'ehb'ik pan q'ab'.27Noq xnusik' chi riij nik' wach noq wilkeeb' i chib'ih jariik. Re' hin i weht'al q'orik chi korik, xnureq chi riij taqe i na'ojb'al wili:28Re' chi xakomajaa' wo' nureq i k'ahchi' nusik'im, chi kixilak i jinaj miil chi winaq jinaj ti holohik runa'ojb'al xnureq.
Eh chi kixilak taqe i jinaj miil chi ixoq ma' jino'q i holohik runa'ojb'al xnureq.29Re' hin re' wili i xwilow: Re' chi re' Dios xuyejaa' taqe winaq chi naa kianam i korik, xa re' la' re' chik i keh xkisik' i ma' holohik ta laj b'eeh.1¿Mi wilik jino'q i je' rukab' i wilik runa'ojb'al? ¿Mi wilik chik jino'q i neench'obwik rub'ehel i chib'ih taqe jariik? Eh re' reh re' runa'ojb'al inye'wik rusuqkiil ruk'ux xan chalik chik ruse'eel i wach ruum.2Re' hin i nuq'or aweh chi chanimaj taqe i ruq'or i reey. Eh cha nimaj wila' xuq'or aweh chi cha q'or i xti korik parub'ihnaal i Dios.3Eh mat elik chaloq pan ajiim b'eeh chuwach i reey, matokik haa' chub'anariik i yiib' wach na'ojb'al ruum re' reh neerub'an awuuk' aha' wilik iraaj.4Re' i ruq'oral i reey wilik rajaawriik, eh ma' awach ta nee nq'orik reh chi ma' re' taj i rub'an.5Awach i rub'an inq'orarik reh ma' xtaj i ti' neeruk'ul. Re' i wilik runa'ojb'al i rureq chi riij, reht'al jaruuj, eh nik' wach runimjiik naa rub'anam.6Ruum wilik wo' ru orahiil chu'nchel chib'ih jariik iraaj b'anarik. Xa re' la' re' ruk'axkiil i winaq,7re' chi ma' reht'al taj chib'ih jariik i naa ruchaliik chinaah. Eh ma' awach ta nee nq'orik reh chib'ih i naa ruchaliik chinaah i ju'jun.8Ma' awach ta jino'q i wilik rajaawriik chinaah i k'achariik, chi nee ta ruyeew nik'-oq najtiil. Eh chi wilik ta rajaawriik chinaah kimik. Re' yiib' wach runa'ojb'al ma' naa ta ruko'leem riib' chuwach ruuk' taqe i rub'an.9Eh chu'nchel i wili xnukoj rehtaal i hin noq xnusik' chi riij chi korik chib'ih imb'aan ayu' wach ak'al. Wilik taqe i wilik kajaawriik xa re' la' inkikoj chi jot'b'al keh i kas kichaaq'. Wilik taqe imb'aan xama' xta rub'ehel10Eh xwilow wo' hoq chi wilik i yiib' wach kina'ojb'al, inye'arik runimaal kiwach noq kimuhq'ik. Eh re' taqe i eliik wo' naq kiooj chupaam i rusantolaj paat i Dios, jumehq'iil xisahchik pank'uxliis chupaam i tinamit xkian wii' i korik. Re' taqe i re' xama' xta i ruk'am chaloq.11Eh wila' ma' xiye'arik chutojariik i kimahk chi jumehq'iil taqe yiib' wach kina'ojb'al xasuq chik keh i tinamit xa re' chik i yiib' wach na'ojb'al inki a'n12Eh atoob' ta re' aj mahk neerub'an jarpech-oq i mahk xa nee wo' k'acharik k'ih-oq haab'. Xa re' la' re' hin weht'al chi re' taqe inkiyeew ruloq'il, eh inkiyohleej wach i Dios holohik kielik.13Re' taqe yiib' wach kina'ojb'al keh ma' holohik ta kielik xa je' nik'ik jinaj muuj i kik'achariik ruum ma' kiyeew ta ruloq'il i Dios.14Wilik taqe imb'aan wach ak'al ma' nureq ta chi riij. Ruum re' taqe i holohik kina'ojb'al inkik'ul i ti' je' ruk'ab' inkik'ul i yiib' wach kina'ojb'al. Eh re' taqe i yiib' wach kina'ojb'al suq kiwihik je' rukab' kiwihik holohik i kina'ojb'al. Re' taqe re' xama' xta ruk'am chaloq.15Re' hin i nuq'or chi re' winaq neerub'an chi nee rusik' rusuqkiil ruk'ux ayu'. Re' chi neerub'an ruwa' ruhaa', reh chi neen wihik rusuqkiil ruk'ux, eh neerub'an rusuqkiil i rukamaj chupaam i ruk'achariik wach ak'al inye'arik reh ruum i Dios.16Re' hin xnuyeew nuk'ux chusik'ariik i nuna'ojb'al nik' wach noq naa nureqem chi riij imb'aan wach ak'al. Ruum wilik taqe i chi q'iij chi aq'ab' inkikuy kiwiriik, ruum chib'ih inki a'n.17Re' hin xwilow chi re' taqe i rukamaj i Dios ruch'ihil taqe imb'aan wach ak'al, ma' jaruuj nee rureq chi riij i winaq, atoob' ta nee ruchop i ruk'ux chusik'ariik. Atoob' ta re' i wilik runa'ojb'al nee ruq'or chi chu'nchel reht'al, xama' nee ta wo' rureq chi riij. Chiquncheel naaqakimiik1Re' hin xnuchop nuk'ux chusik'ariik chi riij nik' wach noq wilik taqe i wili: Eh xwilow chi re' inki a'n i holohik kina'ojb'al inki a'n i wilik kina'ojb'al pan q'ab' i Dios wilik. Ma' reht'al ta wo' hoq i winaq mi nk'axarik oon inixowjik wach atoob' ta k'ahchi' wo' naq rilom.2Eh eliik wach inkik'ul chi kunchelaal, chi korik wach ruk'ux, chi ma' korik ta wach rik'ux, chi saq wach i ránima, chi ma' saq ta wach i ránima. Eh chi ruk'at i rumayiij, chi ma' ruk'at ta rumayiij, chi ma' re' ta aj mahk, chi aj mahk, chi ruq'or i b'ih i Dios noq i ruq'or i korik, chi ma' ruq'or taj i b'ih i Dios ruuk' inkiq'or.3Re' i wili i ma' holohik taj imb'aan wach ak'al chi eliik wach inkik'ul chikuncheel. Eh re' i kikapeew taqe i winaq nujinaq chi yiib' wach na'ojb'al, reh i teh wachiil injot'wik keh nik' najtiil i kik'achariik ayu', eh noq inooj kuxoq naah kamnaq kiooj q'ehb'oq.4Eh re' i koneenkahnik chi k'achlik ko wilik neeruch'ikaa' wii' ruk'ux. Ruum ko wilik neen kamanik wii' i tz'i' kok'achlik, chuwach jino'q i kaq b'ahlam kamnaq chik.5Re' taqe i k'achalkeeb' keht'al chi naakikimiik. Eh re' taqe kamnaq ma' xta chik i keht'al, ma' xta chik i kitojb'aal naakik'ulum ruum xisahchik chik pank'uxliis.6Ar wo' sahchik wach i k'axooj, ixowaal, kaqwachiil, inki a'n Eh ma' jaruuj chik naa kianam keh imb'aan ayu' chinaah i wach ak'al.7Eh cha a'n awa' chi suq ak'ux chawuk'ej i riis i uuva chi suq awánima. Re' holohik cha a'n reh chi neemponik chuwach i Dios.8Eliik-oq saq aso' chakoj chawiij, elik wo' chakoj ink'ohnik laj iq'oom wach anaah.9Cha a'n rusuqkiil ak'achariik ruuk' awehk'een q'e' nak'ax, cha a'n rusuqkiil aak'achariik xa ik'ik reh chinaah i wach ak'al wili xama' xta ruk'am chaloq, ruum xa re' wo' re' i suq i ruk'am cha weh i kowlaj kamanik i na a'n chinaah i wach ak'al wili.10Chu'nchel i neeruyee riib', i nee nakuy rub'aan, cha a'n. Ruum noq wilkaat chik panjul i ojik i na a'n wii', ma' xta chik i kamanik, ma' xta chik naa rukapeb'jiik, eh ma' xta chik i na'ojb'al naa rub'aan.11Re' hin jinaj wo' chik i xwilow wach ak'al. Re' chi ma' re' taj i kow kiajiminik kielik korik. Eh ma' re' taj i kow kiib' i kielik korik ruuk' i peleto. Ma' re' taj i wilik kina'ojb'al wilik kiwa' kihaa'. Eh ma' xta kib'ehomal i wilik kina'ojb'al, ni xata re' taqe i tijimaj suq kik'ulariik imb'aan, ma' keht'al taj jaruuj inchalik i ti' k'axik chikinaah.12Ruum re' taqe i winaq ma' keht'al taj jaruuj inkik'ul i ti',
je' rukab' inkik'ul i kar ma' keht'al taj noq kichopariik panya'al. Eh je' rukab' inkik'ul i tz'ikin noq kichoparik pan xirob'. Je' wo' re' inkik'ul i winaq ma' k'ahchi' ta kikapaam noq ink'uloq i ti' k'axik chikinaah.13Re' hin jinaj wo' chik i na'ojb'al nim wach xwilow, wilik i ruk'uhtaaj qeh re' wili:14Jinaj i k'isa tinamit xama' k'ih ta taqe i patineel chupaam, eh neenchalik pletojoq ruum jino'q i reey neerukotej riij ruuk' i ma' k'isa tz'a'amb'al reh q'aq'inik.15Eh chupaam k'isa tinamit re' re' patim jinaj i winaq k'isa neb'aa', xa re' la' wilik runa'ojb'al. Ruuk' i runa'ojb'al i ruko'leej i tinamit, xanaah re' ma' awach ta nkapeb'inik reh.16Re' hin je' wili i xnuq'or panuk'ux: Q'e' ma' xta reet chi wilik na'ojb'al chuwach i kow i rub'an riib'. Atoob' ta re' i runa'ojb'al i neb'aa' ma' ajwaal ta wach, eh ma' i nib'irjik taj chib'ih i ruq'or.17Re' i ruq'oral i wilik runa'ojb'al atoob' ta q'uun i ruq'or i nib'irjik chuwach noq i ruk'er chii' jino'q i reey chi kiq'orob'jiik i ma' kinimanik taj.18Eh q'e' chihooj i wilik runa'ojb'al chuwach i tz'a'amb'al reh q'aq'inik. Xa re' la' re' jinaj chi aj mahk neerusach wach chu'nchel i holohik.1Re' taqe i kamnaq nimaq utz' neeruchuhb'isaj i jinaj lemeta chi nk'ohnik laj iq'oom Je' wo' re' i memil laj na'ojb'al imb'aan chi jumehq'iil nee ruyoj wach i holohik laj na'ojb'al looq' chi ib'irjik.2Re' i holohik runa'ojb'al xa re' i holohik i rukapaaj rub'aan. Eh re' i ma' nimanik taj xa re' yiib' wach i rukapaaj rub'aan.3Re' i ma' nimanik taj, i ruk'uhtaaj chi ma' xta runa'ojb'al ruuk' chu'nchel i rukapaaj, atoob' ta ruq'or chi re' taqe i tokoom ma' kinimanik taj.4Eh re' hat wila' xkaqrik i reey awuuk' maa chaq'weej xa cha kuy. Ruum ruuk' q'unil neena yejaa' i nimlaj aak'axkiil ruuk'.5Re' hin jinaj wo' chik i ma' holohik taj xwilow imb'aan chinaah i wach ak'al. Re' i reey imb'anik reh re' wili:6Re' chik i ma' kinimanik taj ruyeew chupaam i nim wach kamanik. Eh re' i nimaq kiwach chupaam i ma' nimaq ta wach kamanik taqe ruyeew.7Eh wilik wo' pech inwilow chi re' taqe i minooj pankowlaj kamanik riij kawáyu kib'ehik. Eh re' taqe i reey chi kooq kib'ehik, je' taqe xa moso.8Awach ink'otwik reh i jul xa re' wo' reh inq'ehb'ik chupaam. Eh awach impaxinik reh i tz'aq ink'uxarik ruum i aaq'.9Awach impaxinik reh ab'aj i ruq'oj riib' ruuk'. Awach impaxinik reh i sii' panyohb'aal wilik ruum nee-oq i ruyok' riib'.10Eh wila' xik'ik i ruq'asiil ikej, eh wila' ma' xjuk'arik chik q'e' chik ansil iraaj noq inkojarik. Ma' xta reet chi noq neensik'arik na'ojb'al reh chib'ih i naa rub'aan.11Re' i reht'al ruq'unjik wach i aaq' xama' xta neerutiq reh wila' xti'arik ruum i aaq' noq komajaa' ruq'unej wach.12Re' ruq'oral i holohik runa'ojb'al holohik ink'amarik cho chinaah ruum. Eh re' i ruq'oral i ma' nimanik taj ti k'axik inchalik chinaah ruum.13Re' reh i rutoqaa' ruq'orariik i memil laj q'orik, eh noq inooj kuxoq xiik' chik naah yib'kiil wach taqe i ruq'or.14Re' i ma' nimanik taj ma' k'isiin ta imponik chuwach i q'orik, xa re' la' xama' reht'al ta wo' hoq chib'ih i naa ruk'ulariik na' chub'an.15Re' taqe i ma' kinimanik taj inkikansaj kiib' chi kamanik, eh ma' keht'al taj aha' ojik inki a'n.16Eh q'e' ketel wach i tinamit ko k'isa k'un rukojom chi ru reey. Re' taqe i k'amal kib'eeh ki-ik'ik aq'ab' pantaq ninq'ijinik.17Eh atoob' reh i tinamit i rukoj chi ru reey i wilik ruloq'il. Re' taqe i k'amal kib'eeh paru orahiil inki a'n kiwa' kihaa' reh chi neen k'ulik i kaansil, ma' re' ta xohk'rik inkikapaaj.18Re' i sikiil laj winaq ma' rutz'ap taj i kojweel reh i rupaat ruum i re' inq'ahik taqe i ruche'el, eh inq'ehb'ik chinaah noq inooj kuxoq.19Eh re' i ninq'ijinik i ruyeew rusuqkiil k'uxliis re' i ruuk'jiik i riis uuva i ruyeew rusuqkiil k'uxliis. Eh ruuk' tumiin kiloq'arik.20Re' hat maa b'aj i reey ni xata naq panawánima neenab'aj. Maa q'or wo' hoq i ma' holohik ta laj q'orik chi riij i b'ehoom ni xata re' noq wilkaat cha wutkeel. Ruum wilik taqe i je' kikab' i kok' tz'ikin nenooj kiq'or reh.1Maa pixpuuj wach i chib'ih aweh, wilik la' i chasiij neenak'ul jilow pan jinaj q'iij.2Eliik chawunej taqe i chib'ih aweh i tokoom, ruum ma' aweht'al taj chib'ih i ti' k'axik naa ruchaliik chinaah aatinamiit.3Eh re' i suutz' noq i ruk'am chaloq i jab' chinaah i wach ak'al i ruyeew chaloq. Re' k'acharik xa je' rukab' i chee' inq'ehb'ik pansak'aaj, inq'ehb'ik pantz'eet reh i rookb'aal q'iij xa ar kahnik.4Eh awach i rilow chi xk'uloq i teew ma' rub'an taj i tik. Awach i rilow chi xk'uloq i suutz' ma' rumol taj wach i rutik.5Nik' wach noq ma' aweht'al taj i rub'an i teew, ma' aweht'al taj nik' wach noq i rutoq'aa' cho tz'uk'rik i ha'lak'uun ruuk' i rutuut. Je' wo' re' noq ma' aweht'al taj chib'ih taqe jariik i rub'an i Dios xtz'uhkrisanik chu'nchel i chib'ih i wilik.6Re' hat cha tik awijaa' wahq'eq, eh nee wo' chik i naa tik xq'eq, ruum ma' aweht'al taj aha' wilik i nee nelik korik mi re' i neena tik peet oon re' i neenatik koq'uun oon nee wo' nelik korik chu'nchel.7Korik wo' hoq chi q'e' holohik i k'acharik ayu' wach ak'al, eh q'e' holohik rilariik i q'iij saqum.8Xa re' la' chik, atoob' ta re' i winaq neenk'acharik k'ih-oq haab', eh neerub'an rusuqkiil chu'nchel i chib'ih jariik, inchol runab'eem chi re' noq naa rub'aan kimik xama' xta ruk'am chaloq. Rukojariik kina'ojb'al i k'ijool, i q'ahxoq9K'ijool, neerub'an chi nee nach'ikaa' ak'ux panak'achariik ruuk' taqe i chib'ih inak'ax wach pan ak'ijolal. Eh re' q'oreel xa chib'ih paruq'or ak'ux i hat, eh chib'ih inak'ax wach rub'aan. Xa re' la' chanab'eej chi ruum taqe i naa a'nam re' re', naa ruq'atam q'orik cha naah i Dios.10Je' re' noq chawisaj panawánima ik'aah, je' wo' rukapeb'jiik i xa chib'ih jariik, maayeew chi ti' k'axik ati'jolal ruum re' i k'ijolal xama' naj taj, eh xama' xta ruk'am chaloq.1Noq kowilkaat parusuqkiil ak'ijolal, k'oloq panak'ux aaDios xtz'uhkrisanik cha weh, noq komajaa' inchalik i ti' k'axik cha naah, noq komajaa' imponik i haab' noq neenaq'or chi je' wili: Ma' xta rusuqkiil i nuk'achariik, tiko'q.2K'oloq panak'ux aaDios noq konawil i rusaqumaal i q'iij i rusaqumaal i poh, i rusaqumaal i ch'umiil, noq komajaa' ink'uloq i suutz' ink'amwik cho reh i jab'.3Eh naa ruponiik i q'iij chi re' taqe aq'ab' inko'linik aweh xakib'arb'otik chik, eh naa rulokom riib' taqe i panawaa' i q'e' naq kow kiib'. Re' aweeh inkamanik chi k'ookb'al wach i wi'k xakiib' ixib' chik i naa rukahniik. Re' taqe naq'awach i naa rumooyriik paam.4Re' taqe i axikin ma' naa ta chik rib'iram i choq'ik naa rub'anam i keeb'al, ma' naa ta chik ab'iram noq naakitz'uyiniik i kok' chikop pantaq wahq'eq. Eh ma' naa ta chik ab'iram i kitz'uuy taqe i aj tz'uuy.5Eh naa chik ayo'jiik ruum i johtik yuuq', xa yo'jik chik ruuk' i b'ehik naa a'nam re' rismaal anaah naa rusaaqb'iik, re' i xama' ahl ta wo' naq ma' naa ta chik akuyum, xama' xta chik i naa awaajwaam. Ruum xailook' chik tiooj panjul chi jumpech, re' i naa rutib'iik kik'ux chawiij naa rib'irjiik i koqiim pantaq b'eeh.6K'oloq panak'ux aaDios, noq komajaa' inak'ul aweh je' rukab' noq ink'up i karena plata, je' rukab' noq impaxik i xun re' ruuk' i oro, je' rukab' noq impaxik ikom chii' ha', eh noq kosuq ak'ux.7Eh re' aati'jolal naa wo' chik rusutiniik chi pooq ak'al re' xkorjik cho wii'. Re' aawuxlaab'al naa wo' chik rusutiniik ruuk' i Dios re' xye'wik cho reh.8Re' hin i kinq'orik i k'uhb'aal, i nuq'or chi chu'nchel imb'aan, inq'orarik wach ak'al, xama' xta ruk'am chaloq. Re' ruq'orariik chib'ih i rub'an i winaq9Noq re' hin xnureq nuna'ojb'al chi korik q'e' chik xnukoj kina'ojb'al i tinamit xinkib'iraj, eh xnusik' chi riij i na'ojb'al. Eh ma' k'isiin taqe i jalwaach q'orik xnuyejaa' wach.10Eh xnusik' chi riij i q'orik i ruk'ul chi q'orarik. Xnusik' chi riij nik' wach rutz'ihb'jiik naa nub'anam i ju'jun chi q'orik, chi re' ruq'orariik naa nub'anam.11Re' kiq'oral i holohik kina'ojb'al je' rukab' noq neench'aplojik i q'as ju' ch'ihch', oon je' rukab' noq inch'aplojik i kalawux i na'ojb'al inkiyeew i kiib' chi aj tijoom, i ruq'or i k'amal b'eeh.12Hat wak'uun noq wilkaat chab'iraj i naa nuq'orom aweh re' rutz'ihb'jiik i ma' k'isa huuj ruch'ihil i ma' k'isa tijinik ma' xta ruk'am chaloq xa ruq'uhtiik i ti'jolal i ruyeew.13Yu'naak kuxik chik rib'irjiik i ruq'or i huuj wili. Re' naa a'nam i hat, re' chi naa ayohleem wach i Dios chi naa animam taqe i ruk'uhb'aal ruum re' re' ruk'ul chi na a'nam.14Ruum re' i Dios naa ruq'atam i q'orik chi qanaah ruuk' i chib'ih ixqa a'n, i xqaq'or atoob' ta holohik, atoob' ta ma' holohik, eh atoob' ta xa chi ma' eht'alimaj xqa a'n.
ma' k'isiin runa'ojb'al ma' k'isiin wo' ruk'axkiil inchalik. Eh wila' ma' k'isiin reht'al ma' k'isiin wo' i ti' inchalik chinaah. Re' i rusik'ariik i suq kiil k'uxliis wach ak'al xama' xta ruk'am chaloq1Re' hin je' wili xnuq'or panuk'ux: Naa nunik'eem rusik'ariik i suq laj k'achariik, kinki. Eh re' taqe i re' xwilow chi xama' xta ruk'am chaloq.2Re' se'eel i ruyeew i wach ak'al xasah cheel laj na'ojb'al, eh xama' xta ruk'am chaloq.3Eh re' hin sik'ij naq nuna'ojb'al i nub'an xnukapaaj naq chi naa nureqem rusuqkiil nuk'ux ruuk' i xohk'rik, xnuyeew reh i k'ahlaj ha' i nuti'jolal, i ib'al reh mi re' re' i ruk'ul chi neerub'an i winaq nik' najtiil i ruk'achariik ayu' wach ak'al.4Yohb'aal wach i nimaq kamanik xnub'an ma' k'isiin taqe i nupaat xnuyejaa', eh runimaal i nu uuva xnutik.5Eh nuyejaa' wo' nuye'aab' xnutik taqe i chee' ar re' ruuk' i suq inkiwachuj, eh xnutik taqe i uhtz'ub' ar.6Xnuyejaa' wo' taqe i nimaq tz'aq ye'aab' ha' tz'aqtesb'al reh taqe i chee' kiwachinik.7Eh re' hin xnuloq' taqe i numoso winaq, eh ixoq, xi wihik taqe i numoso pan nupaat xi-aasjik. Eh k'ih i nuwakax, i nutentzuun xi wihik, chikiwach i xwihik cho chi reyil Jerusaleem peet taqe chi nuwach i hin.8Eh ma' k'isiin taqe i oro, i plata xnumol wach, je' wo' taqe i xa chib'ih jariik k'ih taq tz'aaq xkik'am cho weh i reey tokoom tinamit kichalik ma' k'isiin wo' taqe waj tz'uuy xiye'wik rusuqkiil nuk'ux chi winaq chi ixoq. Ma' k'isiin taqe i wixoqil xi wihik.9Xti xiik' wo' naq naah runimaal nuwach, eh xa re' wo' naq i hin ma' k'isiin i chib'ih weh xwihik chikiwach taqe i xi wihik cho chi reyil Jerusaleem peet chi nuwach i hin. Eh ma' k'isiin wo' i nuna'ojb'al wilik.10Eh aha' wilik ixnuk'ax wach xnub'an wo' hoq, aha' wilik ixwaaj xnuyeew wo' reh i nuti'jolal. Re' taqe i re' xuyeew weh i kowlaj kamanik xnub'an.11Eh re' hin xnukapaaj riij taqe i nub'an, je' wo' chu'nchel i kowlaj kamanik xnub'an. Ar xnukoj rehtaal chi xama' xta ruk'am chaloq, xama' xtaj ixnuk'ax ruuk' chinaah i wach ak'al wili, xaruti'kiil k'uxliis i ruyeew.12Eh chi riij i re' xtohq'ik nukapaam chi riij i holohik laj na'ojb'al, je' wo' i memil laj na'ojb'al. Eh ¿chib'ih jariik i naa rub'anam i naa rokiik chi reyil noq ma' wilkiin ta chik i hin? ma' xta chik jino'q tokoom naa rub'anam xa re' wo' hoq i xnub'an i hin.13Re' hin xwilow chi re' i holohik laj na'ojb'al q'e' holohik chuwach i na'ojb'al xanik' wach, je' rukab' i saqum q'e' holohik chuwach i q'equm.14Re' wilik runa'ojb'al saqum paam i rukapeb'aal, re' i ma' nimanik taj q'equm paam i rukapeb'aal xa re' la' jinaj wach inaruk'ulum i wilik runa'ojb'al ruuk' i ma' xta runa'ojb'al.15Re' hin je' wili i xnuq'or panuk'ux: Re' hin wilik nuna'ojb'al wila' naa nuk'ulum weh je' rukab' inaruk'ulum i ma' xta runa'ojb'al, xama' xta inki chi ma' k'isiin i nuna'ojb'al. Eh xnuq'or chi chu'nchel inqa a'n xama' xta ruk'am chaloq.16Ruum ma' naa ta chik ruk'uliik pank'uxliis chi jumpech i wilik runa'ojb'al, i ma' xta runa'ojb'al. Ruum naa rukimiik i wilik runa'ojb'al, je' wo' hoq i ma' xta runa'ojb'al, kinki.17Re' hin xponik i q'iij noq xwixow wach i nuk'achariik, ruum chu'nchel imb'aan ayu' wach ak'al, xati' k'axik i ruyeew chi qanaah xama' xta ruk'am chaloq, xaruti'kiil k'uxliis i ruyeew.18Eh wixow wo' wach chu'nchel i kamanik xnub'an, chinaah i wach ak'al wili. Ruum weht'al chi chu'nchel i chib'ih weh naa nukanaam kahnoq reh i tokoom.19Eh re' hin ma' weht'al taj mi wilik runa'ojb'al oon ma' xta runa'ojb'al i naa rehchaniik reh i xnumol wach ruuk' i kowlaj kamanik xnub'an wach ak'al. Eh re' i nunim wach na'ojb'al xama' xta ruk'am chaloq.20Noq xwilow chu'nchel i chib'ih weh xnureq ruuk' kowlaj kamanik xnub'an xaruti'kiil nuk'ux i ruyeew.21Eh re' winaq wilik runa'ojb'al ruuk' rukorkiil wach ruk'ux i rub'an i kowlaj kamanik noq i rureq tz'aaq i chib'ih reh. Eh ma' reht'al taj chi re' chib'ih reh, reh i ma' rukamaneem ta wach naa rukanaam. Ar ink'utinik chi re' kamanik i rub'an xama' xta ruk'am chaloq.22Ruuk' i wili ink'utinik chi xama' xta rutiq reh i winaq chi nee rukansaj riib' chi kamanik ayu' wach ak'al.23Eh chu'nchel i ruk'achariik xati' k'axik wilik, xaruq'uhtisaj riib' chi kamanik ni xata re' chaq'ab' inhi'lik i rukapeb'aal, eh chu'nchel i re' xama' xta ruk'am chaloq.24Re' ruk'ul chi naa rub'anam i winaq, re' chi chub'an ruwa' ruhaa', chub'an rusuqkiil i chib'ih reh i rureq ruuk' i rukamaj. Re' hin xnukoj rehtaal chi chu'nchel i chib'ih qeh re' i Dios inye'wik cho reh.25Ruum ma' awach taj i neerub'an rusuqkiil chib'ih reh wila' ma' xuyeew i Dios.26Awach imponik chuwach i Dios i rub'an, inye'arik runa'ojb'al, rukapeb'aal, rusuqkiil ruk'ux. Eh re' imb'anik reh i mahk inye'arik pankowlaj kamanik ruum i Dios reh chi rumol wach i chib'ih reh, reh i tokoom i ruyeew. Re' taqe i re' xama' xta i ruk'am chaloq, xaruti'kiil k'uxliis i ruyeew. Chu'nchel imb'aan ayu' wach ak'al wilik ruq'ijil eh wilik ru orahiil1Chu'nchel imb'aan ayu' wach ak'al wilik ruq'ijil, wilik ru orahiil je' wili noq wilik:2Wilik ru orahiil noq imb'aan aasjik, wilik ru orahiil noq imb'aan kimik, wilik ruq'ijil noq imb'aan tik, wilik ruq'ijil noq inchuqarik i tik.3Wilik ru orahiil ikaansanik, wilik ru orahiil iq'omanik, wilik ruq'ijil i yojoj paat, wilik ruq'ijil i yej-anik paat.4Wilik ru orahiil oq'ik, wilik ru orahiil i se'eel, wilik ru orahiil i ti'kiil k'uxliis, wilik ru orahiil i ninq'ijinik.5Wilik ruq'ijil noq imb'aan i kutuj ab'aj, wilik ruq'ijil i moloj wach ab'aj, wilik ru orahiil noq imb'aan q'ahchinik iib', wilik ru orahiil noq inkanab'jik i q'ahchinik iib'.6Wilik ruq'ijil rusik'ariik, wilik ru orahiil i rusachariik, wilik ru orahiil i rumolariik, wilik ru orahiil reh ruq'eb'ariik.7Wilik ru orahiil i xihij itz'ihy, wilik ru orahiil i rub'ojariik i xiheel, wilik ru orahiil chi neemb'aan i q'orik, wilik ru orahiil chi ma' nee tamb'aan i q'orik.8Wilik ru orahiil i k'axaj iib', wilik ru orahiil i ixowanik iib', wilik ruq'ijil i q'aq'inik, wilik ruq'ijil i wihik pansuqkiil k'uxliis.9Eh ¿Mi wilik ta wo' hoq i ruk'ax i winaq noq i rukansaj riib' chi kamanik ayu' wach ak'al?10Re' hin xnukoj rehtaal chi re' Dios yohb'aal wach i kamanik i ruyeew chikinaah taqe i winaq reh chi naa kianam.11Eh re' Dios paruq'ijil xuyejaa' taqe i chib'ih jariik chi q'e' holohaq, eh xuyeew pankikapeb'aal i winaq, i k'uluuj, i naa ruk'ulariik Eh xama' inkireq ta wo' chi riij i rub'anam chaloq Dios pampeet, i naa rub'anam na' chub'an.12Re' hin i nukoj rehtaal chi re' i ruk'ul chi neerub'an i winaq, re' chi neensuuqb'ik ruk'ux, eh chi neerub'an rusuqkiil i ruk'achariik.13Ruum wila' xqa a'n qawa' qahaa' chi manlik, i wixqa a'n rusuqkiil i qakamaj, re' wo' QaJaaw Dios inye'wik cho qeh.14Re' hin weht'al chi chu'nchel i ruyejaam i QaJaaw Dios manlik wach,
ma' ruman ta chik chi neentiqarik naah, chi neenehteesjik ruuk'. Ruum re' i QaJaaw Dios je' taqe re' ruyejeb'jiik rub'anam, reh chi naa ruyohljiik wach i reh.15Eh ma' xtaj i wilik chi ma' ta wihinaq chaloq ma' xtaj i naa ruk'ulariik chi ma' ta nk'ularik yu'naak. Re' i QaJaaw Dios imb'anik chi nk'ularik wo' chik i k'uluuj chaloq. Ayu' wach ak'al ma' xtaj imb'aan parub'ehel16Eh xnukoj rehtaal chi ayu' wach ak'al wilik i leq', wilik i yiib' wach na'ojb'al, xanaah re' i ruk'ul naq chi neemb'aan i rub'ehel chi naa ruwihiik rukorkiil wach k'uxliis.17Re' hin i nuq'or chi re' i QaJaaw Dios naa ruq'atwiik i q'orik chinaah i korik wach ruk'ux, chinaah i yiib' wach runa'ojb'al. Ruum wilik ru orahiil chib'ih imb'aan, eh wilik ru orahiil chib'ih taqe ink'ularik.18Eh i nuq'or panuk'ux chi re' Dios k'ahchi' ruye'em taqe chi pajarik i winaq reh chi neenkireq chi riij chi re' i kina'ojb'al je' rukab' i kina'ojb'al taqe i chikop.19Korik wo' hoq chi je' winaq, chi je' chikop eliik wach inkik'ul noq inooj kuxoq. Re' chikop kikimik wo' reje, re' winaq kikimik wo' reje, xa eliik wach chi ma' xta ruk'am chaloq.20Xa jinaj naa kojiik kuxoq wii', pooq xikorb'eesjik wii', eh pooq wo' chik naakisutiniik wii'.21¿Mi wilik nee nq'orik reh chi korik chi re' ruxlab'al inye'wik ruk'achariik i winaq injohtik taxaaj. Eh chi re' ruxlab'al inye'wik ruk'achariik i chikop inooj qohoq ri'si ak'al?22Ruuk' taqe re' xnukoj rehtaal chi re' i ruk'ul chi naa rub'anam i winaq re' chi naa rub'anam rusuqkiil i rureq ruuk' i rukamaj. Ruum xaruq'iij chi je' re' i k'acharik xub'an. Eh ma' awach ta neenk'uhtanik reh chib'ih i naa ruk'ulum chi riij chik i rukimiik.1Chi riij i re' xwilow wo' hoq i ti' k'axik imb'aan ayu' wach ak'al. Re' imb'aan ti' k'axik keh xasuq chik kioq'ik, ma' awach ta jino'q inye'wik rusuqkiil kik'ux. Eh re' taqe i kib'anik ti k'axik xa chayeew chik inki a'n eh re' imb'aan ti' k'axik keh ma' awach taj jino'q intoob'inik keh.2Ruum i re' xnuq'or i hin chi suq wilkeeb' i kamnaq chik taqe reje chuwach taqe i kok'achalkeeb'.3Eh chikiwach taqe i re' xti q'e' wo' chik suq wilkeeb' i komajaa' ki-aasjik, ruum komajaa' inkilow i yiib' wach na'ojb'al imb'aan chinaah i wach ak'al wili.4Eh nukoj wo' rehtaal chi awach i rumol chib'ih reh ruuk' i kowlaj kamanik i rub'an, i rutoq'aa' kaqwachiil ruuk' i ras ruchaaq', chu'nchel i re' ma' xta ruk'am chaloq, xaruti'kiil k'uxliis i ruyeew.5Re' i ma' nimanik taj i ruq'ahcheej i q'ab' chi' rik'ux, ma' rusik' ta tz'aaq i k'uxumb'al reh.6Re' hin i nuq'or chi ma' xta reet chi nee ruq'ahcheej i q'ab' chi' ruk'ux jino'q i winaq, chuwach chi nee rukansaj riib' chi kamanik, eh xaruti'kiil ruk'ux i neenye'arik.7Eh re' hin xnukoj wo' rehtaal chi wilik imb'aan ayu' wach ak'al xama' xta ruk'am chaloq.8Re' jino'q i winaq ma' xta wilik reh, ma' xta wo' ramigo, ma' xta rak'uun rixq'uun, ma' xta ras oon ruchaaq'. Eh ma' hi'lik ta chi kamanik, ma' hi'lik ta wo' chi kapeb'jiik riij i rub'ehomal. Eh ma' rukapaaj taj awach aj eh naa rukahniik taqe i rureq ruuk' i kowlaj kamanik i rub'an, re' taqe i re' xama' xta ruk'am chaloq.9Ma' xta reet chi pankib'al neenb'aan i kamanik, chuwach chi xa jinaj neemb'anik reh, ruum pankib'al k'ihtz'aaq kikamaj.10Ruum wila' xq'ehb'ik i jinaj, re' chik i jinaj neen nuksanik reh. Eh re' rutkeel riib' q'e' ti' i neeruk'ul ruum wixq'ehb'ik ma' awach ta nenuksanik reh.11Eh je' wo' noq pankib'al neemb'aan wirik k'ul neenkiq'ixineej kiib'. Eh re' i rutkeel inwirik ma' awach ta neen q'ixinb'isanik reh.12Awach i rutkeel riib' neerutik'aa' peleto neemb'aan reh, eh wila' pankib'al xkik'ulb'ilej ma' nee tamb'aan reh, je' rukab' i k'ahaam ixib' wach ma' nk'up ta chi jumehq'iil.13Q'e' chihooj i k'ijool ak'un atoob' ta xa neb'aa' tiih, chuwach jino'q i reey xa rijib' chik, ma' nimanik taj, eh ma' raaj ta chinkojarik runa'ojb'al.14Ruum re' i k'ijool ak'un atoob' ta pantz'ilom nee nelik chaloq, neerub'an chi neenokik chi reyil, atoob' ta xa neb'aa' tii.15Eh wila' chu'nchel neekiokik chi riij i k'ijool ak'un chi neenokik chi jilow i reey.16Eh ma' k'isiin i tinamit neekiokik chi riij reh chi nee nokik chi reyil. Xa re' la' re' tinamit naa kiwihiik koq'uun ma' naa ta chik ruwihiik rusuqkiil kik'ux ruuk'. Chu'nchel i re' xama' xta i ruk'am chaloq, xaruti'kiil k'uxliis i ruyeew. Ajwaal wach chi naa rub'aan aha' wilik inq'orarik1Noq nee tiooj panrupaat i Dios, mo'-oq teheeh awach. Chajil i koq awiib' chi-ib'iriniik, maa nooj aq'asaj amayiij, je' rukab' noq ink'iq'asaj i kik'atoj mayiij i ma' kinimanik taj, ma' inkikoj ta rehtaal chi ma' holohik taj inki a'n.2Eh maa a'n teheeh awach chi q'orik, ma' chih aq'or reh i Dios chi naa a'nam eh mo'-oq wo' neena a'n rub'aan. Eh xakiib' ixib' aq'oral cha q'or ree Dios, ruum re' i Dios pan taxaaj wilik, eh re' hat ayu' wilkaat wach ak'al.3Ruum wi q'e' xat qajik kapeew, wilik neeruk'uhtaaj riib' aweh panasaq wiriik. Eh wila' ma' k'isiin i q'orik xa a'n neenaq'or aweh i xa memil laj q'orik.4Eh wila' wilik i xaq'or ree Dios chi naa a'nam cha a'n wo' hoq, ruum re' Dios ma' mponik ta chuwach taqe i chukul q'orik.5Eh ma' xta reet chi ma' nee ta naq'or reh chi neena a'n chuwach chi nee naq'or reh chi neena a'n, eh ma' nee ta wo' na a'n rub'aan.6Mayeew q'ab' reh aachii' chi nee tiruq'eb' pamahk, eh koq'uun chik neenaq'or chuwach iraaj taqareel i Dios chi xa asahchik xaq'or wii'. Wila' xaq'or i je' re' neenajosaj wach i rujosq'iil i Dios neerusach wach aha' wilik i xa a'n.7Re' hat,
wila' ma' k'isiin i ruk'uhtaaj riib' aweh pansaq wiriik, eh wila' xama' k'isiin i q'orik i na a'n, re' taqe i re' xama' xta ruk'am chaloq.
Re' hat chayohleej wach i Dios. Re' imb'aan chupaam i k'acharik xama' xta ruk'am chaloq8Re' hat maa nsahchik ak'ux wila' wilik i tinamit xawil chi rub'aan i ti' k'axik keh i neb'aa', eh chi ma' imb'aan taj i q'ataj q'orik parub'ehel, ruum re' i q'atal q'orik xa taaq'amaj wo' ruum i nim wach chuwach i reh, eh re' reh jinaj wo' chik i nim wach intaaq'anik reh.9Eh re' tik i nelik chupaam taqe i ye'aab' inkamanik reh i reey, re' wo' reh inilwik reh.10Awach i ruyeew i ruk'ux chinaah i tumiin koruman iraaj. Awach i ruyeew ruk'ux chinaah i b'ehomal ma' manlojik ta reh nik' nimaal i chib'ih reh wilik.
Eh re' taqe i re' xama' xta ruk'am chaloq.11Awach i k'ih i chib'ih reh k'ih wo' hoq i rusach, iraaj ruq'orom chi xama' xta wo' ruk'ax chi k'ih i chib'ih reh xa nee wo' nooj k'uhloq chuwach.12Awach inkamanik atoob' ta neerub'an ruwa' chi korik atoob' ta ma' neerub'an ruwa' chi korik xasuq wo' inwirik. Eh re' i b'ehoom reh ma' nqajik tee ruwiriik chukapeb'jiik i chib'ih wilik reh.13Re' hin jinaj i q'e' ti' xwilow ink'ularik chinaah i wach ak'al wili, re' rumolariik wach i ma' k'isa b'ehomal, eh xati' k'axik i ruk'am chaloq, noq inooj kuxoq.14Ruum wila' ma' xchol rilariik i rub'ehomal neensahchik wach. Eh ma' xta k'isinoq nee rukanaa' reh i rak'uun rixq'uun.15Eh nik' wach noq x-aasjik je' wo' chik re' noq naa ruk'ohlaam reje i ruk'achariik t'uslik noq x-aasjik, t'uslik wo' chik noq naa rukimiik, ma' xtaj i naa ruk'amam reje.16Re' wili q'e' ti' rilariik ruum nik' wach noq xk'uloq chinaah i wach ak'al wili, je' wo' chik re' noq naa reliik reje, inqakoj rehtaal chi xama' xta nki chi xukansaj riib' chi kamanik.17Eh xa panq'equm wo' xk'acharik, eh xa eliik tib'ik ruk'ux, xa elik panti' pan yab'ilaal xwihik.18Re' i ruk'ul chi naa rub'anam i winaq re' chi naa rub'anam rusuqkiil i chib'ih reh xureq ruuk' i ma' k'isa kamanik xub'an. Paruk'achariik xama' najt ta rooq ayu' wach ak'al xye'arik reh ruum i Dios, i ruk'ul chi je' re' i naa rub'anam ruum je' re' xkanab'jik chinaah.19Eh awach i ma' k'isiin rub'ehomal xye'arik cho reh ruum i Dios i ruyeew wo' q'ab' reh chi rub'an rusuqkiil aha' wilik i ree reh, noq i rub'an rusuqkiil i rureqem ruuk' i rukamaj re' Dios inye'wik reh.20Ruum chi re' i Dios inye'wik rusuqkiil i ránima ma' nqaaj ta kapeew chi riij i chib'ih taqe i ruk'ul paruk'achariik ayu' wach ak'al.1Re' hin xnukoj rehtaal chi wilik wo' chik i k'axik xak'ahchi' ruk'ulariik ayu' wach ak'al, re' wili:2Wilik inye'arik rub'ehomal ruum i Dios, inye'arik reh chu'nchel i ajwaal wach chi reh, inye'arik ruloq'il. Xa re' la' ma' inye'arik ta q'ab' reh ruum i Dios chi rub'an rusuqkiil, tokoom chik imb'anik rusuqkiil. Re' re' xama' xta ruk'am chaloq, xaruti'kiil k'uxliis i ruyeew.3Re' winaq neerub'an chi neen wihik jino'q siento rak'uun rixq'uun, chi k'ih laj haab' neenk'acharik, eh wila' ma' xub'an, rusuqkiil i chib'ih reh, eh wila' ma' xukanaa' rutumiin muq'umb'al reh. Re' ti' nee ruk'ul saqb'ih chi neenik'ik jino'q i k'isa ha'lak'un.4Ruum re' k'isa ha'lak'un xaxik'ik xa ma' x-ilarik ta wo' wach xa panq'equm xkahnik,
eh xama' xkojarik ta wo' rub'ihnaal.5Eh ma' xrilow ta wo' wach i q'iij saqum, eh ma' xuk'ul ta reh i ti' k'axik i xuk'ul i winaq kore' xqaq'or.6Ruum re' winaq re' re' atoob' ta neenk'acharik kib'-oq miil haab', eh ma' nee ta rub'an rusuqkiil i chib'ih reh. ¿Mi ma' jinaj kiooj wii' ruuk' re' k'isa ha'lak'un?7Re' winaq i rukansaj riib' chi kamanik chusik'ariik tz'aaq i k'uxunb'al reh, xa re' la' xama' inch'iklojik ta wo' ruk'ux ruuk' i rureq.8¿Mi suq wilik re' i wilik runa'ojb'al chuwach i ma' xta runa'ojb'al? ¿Mi q'e' suq wilik re' i neb'aa' xchol k'acharik ayu' chi kixilak taqe i k'achareel?9Eh ma' xta reet chi nee rilow ruuk' naq'awach i chib'ih reh jino'q, chuwach chi xa neerukapaaj. Xa re' la' xama' xta wo' ruk'am chaloq xaruti'kiil k'uxliis i ruyeew.10Aha' wilik ink'ularik yu'naak, ink'ularik wo' cho najtir, eht'alimaj chi xa je' wo' re' ink'ularik. Je' re' noq ma' ruk'ul taj chi awach neenwech'inik riij i ruyejaam wach i Dios nim rajaawriik.11Awach imponik chuwach i wech'inik iib' xama' xta ruk'am chaloq i rub'an, xama' xta wo' i neeruk'ax ruuk' i re'.12Xti korik chi ma' awach taj i neehtalinik reh aha' wilik i holohik chi reh i winaq noq kok'acharik i rub'an wach ak'al chuwach i xama' k'ih ta laj q'iij. Re' i k'achariik xama' xta ruk'am chaloq, xa je' nik'ik jinaj muuj. Eh ¿Mi wilik jino'q i nee nq'orik reh i chib'ih i naa ruk'ulrariik noq kamnaq chik reje? Ma' eliik ta wach i wilik runa'ojb'al ruuk' i ma' xta runa'ojb'al1Noq holohik rib'iral jino'q xiik' naah chihojal chuwach ink'ohnik laj iq'oom Eh q'e' wo' chihooj i kimik, chuwach i aasjik.2Eh q'e' wo' chihooj ojik chupaam i paat wilik wii' i kamnaq, chuwach ojik chupaam i paat k'ahchi' wii' i ninq'ijinik. Ruum re' i kimik k'ahchi' ruye'em i k'achareel, awach i kok'achlik inchol rukapaam riij.3Eh q'e' wo' chihoojoq'ik chuwach i se'eel ruum ruuk' i ruti'kiil k'uxliis i ruyeew ruman i rukowiil qak'ux.4Re' wilik runa'ojb'al ar wilik reje i rukapeew chupaam i paat wilik wii' kamnaq. Eh re' i ma' xta runa'ojb'al ar wilik reje i rukapeew chupaam i paat wilik wii' i ninq'ijinik.5Q'e' chihooj chi neenib'irjik i q'ilooj i rub'an i wilik runa'ojb'al, chuwach chi neenqayeew ruloq'il inki a'n i ma' xta kina'ojb'al.6Re' rusuqkiil ruk'ux i ma' nimanik taj xa junik'iik, xa je' rukab' noq ink'ahtik i chiq k'ix chi ri'sil jino'q i xun. Re' taqe re' xama' xta ruk'am chaloq.7Re' wilik runa'ojb'al, re' rub'anariik i ti' k'axik, re' ruk'ulariik i tumiin chi riij i ma' korik taj inyojwik reh i runa'ojb'al.8Q'e' chihooj i rukuxeesjiik jino'q i chib'ih jariik chuwach i rutik'ib'jiik. Eh q'e' chihooj chi xa hat kuyuul chuwach chi q'e' hat kow neena a'n awiib'.9Maa nchalik ak'aah chi jumehq'iil ruum xa re' wo' taqe i ma' xta kina'ojb'al inchalik kik'aah chi jumehq'iil.10Re' hat ma' naa ta q'orom chi je' wili: ¿Chib'ih reet noq re' taqe i q'iij ik'inaq chaloq q'e' chihooj chuwach taqe i q'iij yu'naak? mat ko'q. Ruum xa re' taqe i ma' xta kina'ojb'al kiq'orik reh i je' re'.11Re' i holohik laj na'ojb'al q'e' chihooj chi keh i k'achareel ayu' wach ak'al, jinaj kooch chi keh.12Re' holohik laj na'ojb'al inkamanik chi toob'al reh i ju'jun, je' wo' hoq i tumiin. Xa re' la' re' wilik runa'ojb'al i ruko'leej riij i ruk'achariik.13Chakoj rehtaal i ruyejaam chaloq i Dios, ¿Mi wilik jino'q i neen ye'wik chi korik i yok yok noq xukanaa'?14Nik' ma' xta reet wilkaat cha a'n rusuqkiil. Eh nik' ti' wilkaat xa chak'ulaa', cha kapaaj riij chi re' suq laj wihik, i ti' laj wihik re' wo' i Dios inye'wik reh. Re' ju'jun ma' reht'al taj i naa ruchaliik chinaah.15Re' i kiib' chi na'ojb'al wili wilom panuk'achariik xama' xta ruk'am chaloq: Re' chi re' taqe i korik wach kik'ux kikimik reje chi jumehq'iil, eh chi re' taqe i ma' holohik ta kina'ojb'al inajtb'ik rooq i kik'achariik.16Korik-oq wach ak'ux, xa re' la' ma' wik'saj naah. Eh wilik-oq ana'ojb'al, xa re' la' maawik'saj naah, ¿Chib'ih neerutiq aweh chi xa nee nakansaj awiib'?17Mo'-oq i nik'ik naah i yiib' wach na'ojb'al i na a'n. Eh maa wik'saj naah amemil. ¿Chib'ih neerutiq aweh chi nee tikimik noq komajaa' i rureq i ruq'ijil?18ma' xta reet chi neena a'n i wili, eh ma' nee ta wo' inakanaa' rub'an i jinaj. Awach i ruyohleej i Dios naa reliik korik chuwach i naa rub'anam.19Re' holohik laj na'ojb'al i ruyeew rukowiil ruk'ux i wilik runa'ojb'al, ma' xata je' rukab' i neen kiyeew i lajeeb' chi ajaab'ees wilkeeb' chupaam i jino'q i tinamit.20Xti korik wo' hoq chi ma' xta jino'q i winaq xti korik wach ruk'ux, eh chi ma' ta nee rutz'a'j ruuk' i mahk chi jumpech.21Maa nimaj chu'nchel i neenkiq'or aweh i tinamit, reh chi ma' nee ta nab'iraj amoso wixuq'or i ma' holohik taj chawiij.22Ruum re' hat xti aweht'al wo' hoq chi k'ihpech xaq'or i ma' holohik taj chi riij i tokoom.23Chu'nchel i wili xtohq'ik nusik'im chi riij ruuk' na'ojb'al, xa re' la' chik imb'anik reh xama' xta wo' nuna'ojb'al.24Re' taqe wili xiik' nah k'ayewal chi reqarik chi riij, ma' awach ta neenreqwik chi riij.25Re' hin xnusik' chi riij chi naa nureqem i nuna'ojb'al reh chi naa nureqem chi riij i wili. Eh xwilow chi ma' holohik taj chi q'e' neenamin awiib' chub'aan inawaaj rub'aan, je' wo' rub'aan memil laj na'ojb'al.26Eh re' hin jinaj i q'e' ti' xnureq ma' xata je' ti'kiil noq ink'ularik kimik. Re' ixoq ma' holohik ta runa'ojb'al noq i ruq'unej i winaq korehtaal i nq'ehb'ik pan q'ab' i rukoj xirob' parub'eeh xa re' i ruloq'ej i Dios neeruko'leej riib' pan q'ab', eh re' i aj mahk neenq'ehb'ik pan q'ab'.27Noq xnusik' chi riij nik' wach noq wilkeeb' i chib'ih jariik. Re' hin i weht'al q'orik chi korik, xnureq chi riij taqe i na'ojb'al wili:28Re' chi xakomajaa' wo' nureq i k'ahchi' nusik'im, chi kixilak i jinaj miil chi winaq jinaj ti holohik runa'ojb'al xnureq.
Eh chi kixilak taqe i jinaj miil chi ixoq ma' jino'q i holohik runa'ojb'al xnureq.29Re' hin re' wili i xwilow: Re' chi re' Dios xuyejaa' taqe winaq chi naa kianam i korik, xa re' la' re' chik i keh xkisik' i ma' holohik ta laj b'eeh.1¿Mi wilik jino'q i je' rukab' i wilik runa'ojb'al? ¿Mi wilik chik jino'q i neench'obwik rub'ehel i chib'ih taqe jariik? Eh re' reh re' runa'ojb'al inye'wik rusuqkiil ruk'ux xan chalik chik ruse'eel i wach ruum.2Re' hin i nuq'or aweh chi chanimaj taqe i ruq'or i reey. Eh cha nimaj wila' xuq'or aweh chi cha q'or i xti korik parub'ihnaal i Dios.3Eh mat elik chaloq pan ajiim b'eeh chuwach i reey, matokik haa' chub'anariik i yiib' wach na'ojb'al ruum re' reh neerub'an awuuk' aha' wilik iraaj.4Re' i ruq'oral i reey wilik rajaawriik, eh ma' awach ta nee nq'orik reh chi ma' re' taj i rub'an.5Awach i rub'an inq'orarik reh ma' xtaj i ti' neeruk'ul. Re' i wilik runa'ojb'al i rureq chi riij, reht'al jaruuj, eh nik' wach runimjiik naa rub'anam.6Ruum wilik wo' ru orahiil chu'nchel chib'ih jariik iraaj b'anarik. Xa re' la' re' ruk'axkiil i winaq,7re' chi ma' reht'al taj chib'ih jariik i naa ruchaliik chinaah. Eh ma' awach ta nee nq'orik reh chib'ih i naa ruchaliik chinaah i ju'jun.8Ma' awach ta jino'q i wilik rajaawriik chinaah i k'achariik, chi nee ta ruyeew nik'-oq najtiil. Eh chi wilik ta rajaawriik chinaah kimik. Re' yiib' wach runa'ojb'al ma' naa ta ruko'leem riib' chuwach ruuk' taqe i rub'an.9Eh chu'nchel i wili xnukoj rehtaal i hin noq xnusik' chi riij chi korik chib'ih imb'aan ayu' wach ak'al. Wilik taqe i wilik kajaawriik xa re' la' inkikoj chi jot'b'al keh i kas kichaaq'. Wilik taqe imb'aan xama' xta rub'ehel10Eh xwilow wo' hoq chi wilik i yiib' wach kina'ojb'al, inye'arik runimaal kiwach noq kimuhq'ik. Eh re' taqe i eliik wo' naq kiooj chupaam i rusantolaj paat i Dios, jumehq'iil xisahchik pank'uxliis chupaam i tinamit xkian wii' i korik. Re' taqe i re' xama' xta i ruk'am chaloq.11Eh wila' ma' xiye'arik chutojariik i kimahk chi jumehq'iil taqe yiib' wach kina'ojb'al xasuq chik keh i tinamit xa re' chik i yiib' wach na'ojb'al inki a'n12Eh atoob' ta re' aj mahk neerub'an jarpech-oq i mahk xa nee wo' k'acharik k'ih-oq haab'. Xa re' la' re' hin weht'al chi re' taqe inkiyeew ruloq'il, eh inkiyohleej wach i Dios holohik kielik.13Re' taqe yiib' wach kina'ojb'al keh ma' holohik ta kielik xa je' nik'ik jinaj muuj i kik'achariik ruum ma' kiyeew ta ruloq'il i Dios.14Wilik taqe imb'aan wach ak'al ma' nureq ta chi riij. Ruum re' taqe i holohik kina'ojb'al inkik'ul i ti' je' ruk'ab' inkik'ul i yiib' wach kina'ojb'al. Eh re' taqe i yiib' wach kina'ojb'al suq kiwihik je' rukab' kiwihik holohik i kina'ojb'al. Re' taqe re' xama' xta ruk'am chaloq.15Re' hin i nuq'or chi re' winaq neerub'an chi nee rusik' rusuqkiil ruk'ux ayu'. Re' chi neerub'an ruwa' ruhaa', reh chi neen wihik rusuqkiil ruk'ux, eh neerub'an rusuqkiil i rukamaj chupaam i ruk'achariik wach ak'al inye'arik reh ruum i Dios.16Re' hin xnuyeew nuk'ux chusik'ariik i nuna'ojb'al nik' wach noq naa nureqem chi riij imb'aan wach ak'al. Ruum wilik taqe i chi q'iij chi aq'ab' inkikuy kiwiriik, ruum chib'ih inki a'n.17Re' hin xwilow chi re' taqe i rukamaj i Dios ruch'ihil taqe imb'aan wach ak'al, ma' jaruuj nee rureq chi riij i winaq, atoob' ta nee ruchop i ruk'ux chusik'ariik. Atoob' ta re' i wilik runa'ojb'al nee ruq'or chi chu'nchel reht'al, xama' nee ta wo' rureq chi riij. Chiquncheel naaqakimiik1Re' hin xnuchop nuk'ux chusik'ariik chi riij nik' wach noq wilik taqe i wili: Eh xwilow chi re' inki a'n i holohik kina'ojb'al inki a'n i wilik kina'ojb'al pan q'ab' i Dios wilik. Ma' reht'al ta wo' hoq i winaq mi nk'axarik oon inixowjik wach atoob' ta k'ahchi' wo' naq rilom.2Eh eliik wach inkik'ul chi kunchelaal, chi korik wach ruk'ux, chi ma' korik ta wach rik'ux, chi saq wach i ránima, chi ma' saq ta wach i ránima. Eh chi ruk'at i rumayiij, chi ma' ruk'at ta rumayiij, chi ma' re' ta aj mahk, chi aj mahk, chi ruq'or i b'ih i Dios noq i ruq'or i korik, chi ma' ruq'or taj i b'ih i Dios ruuk' inkiq'or.3Re' i wili i ma' holohik taj imb'aan wach ak'al chi eliik wach inkik'ul chikuncheel. Eh re' i kikapeew taqe i winaq nujinaq chi yiib' wach na'ojb'al, reh i teh wachiil injot'wik keh nik' najtiil i kik'achariik ayu', eh noq inooj kuxoq naah kamnaq kiooj q'ehb'oq.4Eh re' i koneenkahnik chi k'achlik ko wilik neeruch'ikaa' wii' ruk'ux. Ruum ko wilik neen kamanik wii' i tz'i' kok'achlik, chuwach jino'q i kaq b'ahlam kamnaq chik.5Re' taqe i k'achalkeeb' keht'al chi naakikimiik. Eh re' taqe kamnaq ma' xta chik i keht'al, ma' xta chik i kitojb'aal naakik'ulum ruum xisahchik chik pank'uxliis.6Ar wo' sahchik wach i k'axooj, ixowaal, kaqwachiil, inki a'n Eh ma' jaruuj chik naa kianam keh imb'aan ayu' chinaah i wach ak'al.7Eh cha a'n awa' chi suq ak'ux chawuk'ej i riis i uuva chi suq awánima. Re' holohik cha a'n reh chi neemponik chuwach i Dios.8Eliik-oq saq aso' chakoj chawiij, elik wo' chakoj ink'ohnik laj iq'oom wach anaah.9Cha a'n rusuqkiil ak'achariik ruuk' awehk'een q'e' nak'ax, cha a'n rusuqkiil aak'achariik xa ik'ik reh chinaah i wach ak'al wili xama' xta ruk'am chaloq, ruum xa re' wo' re' i suq i ruk'am cha weh i kowlaj kamanik i na a'n chinaah i wach ak'al wili.10Chu'nchel i neeruyee riib', i nee nakuy rub'aan, cha a'n. Ruum noq wilkaat chik panjul i ojik i na a'n wii', ma' xta chik i kamanik, ma' xta chik naa rukapeb'jiik, eh ma' xta chik i na'ojb'al naa rub'aan.11Re' hin jinaj wo' chik i xwilow wach ak'al. Re' chi ma' re' taj i kow kiajiminik kielik korik. Eh ma' re' taj i kow kiib' i kielik korik ruuk' i peleto. Ma' re' taj i wilik kina'ojb'al wilik kiwa' kihaa'. Eh ma' xta kib'ehomal i wilik kina'ojb'al, ni xata re' taqe i tijimaj suq kik'ulariik imb'aan, ma' keht'al taj jaruuj inchalik i ti' k'axik chikinaah.12Ruum re' taqe i winaq ma' keht'al taj jaruuj inkik'ul i ti',
je' rukab' inkik'ul i kar ma' keht'al taj noq kichopariik panya'al. Eh je' rukab' inkik'ul i tz'ikin noq kichoparik pan xirob'. Je' wo' re' inkik'ul i winaq ma' k'ahchi' ta kikapaam noq ink'uloq i ti' k'axik chikinaah.13Re' hin jinaj wo' chik i na'ojb'al nim wach xwilow, wilik i ruk'uhtaaj qeh re' wili:14Jinaj i k'isa tinamit xama' k'ih ta taqe i patineel chupaam, eh neenchalik pletojoq ruum jino'q i reey neerukotej riij ruuk' i ma' k'isa tz'a'amb'al reh q'aq'inik.15Eh chupaam k'isa tinamit re' re' patim jinaj i winaq k'isa neb'aa', xa re' la' wilik runa'ojb'al. Ruuk' i runa'ojb'al i ruko'leej i tinamit, xanaah re' ma' awach ta nkapeb'inik reh.16Re' hin je' wili i xnuq'or panuk'ux: Q'e' ma' xta reet chi wilik na'ojb'al chuwach i kow i rub'an riib'. Atoob' ta re' i runa'ojb'al i neb'aa' ma' ajwaal ta wach, eh ma' i nib'irjik taj chib'ih i ruq'or.17Re' i ruq'oral i wilik runa'ojb'al atoob' ta q'uun i ruq'or i nib'irjik chuwach noq i ruk'er chii' jino'q i reey chi kiq'orob'jiik i ma' kinimanik taj.18Eh q'e' chihooj i wilik runa'ojb'al chuwach i tz'a'amb'al reh q'aq'inik. Xa re' la' re' jinaj chi aj mahk neerusach wach chu'nchel i holohik.1Re' taqe i kamnaq nimaq utz' neeruchuhb'isaj i jinaj lemeta chi nk'ohnik laj iq'oom Je' wo' re' i memil laj na'ojb'al imb'aan chi jumehq'iil nee ruyoj wach i holohik laj na'ojb'al looq' chi ib'irjik.2Re' i holohik runa'ojb'al xa re' i holohik i rukapaaj rub'aan. Eh re' i ma' nimanik taj xa re' yiib' wach i rukapaaj rub'aan.3Re' i ma' nimanik taj, i ruk'uhtaaj chi ma' xta runa'ojb'al ruuk' chu'nchel i rukapaaj, atoob' ta ruq'or chi re' taqe i tokoom ma' kinimanik taj.4Eh re' hat wila' xkaqrik i reey awuuk' maa chaq'weej xa cha kuy. Ruum ruuk' q'unil neena yejaa' i nimlaj aak'axkiil ruuk'.5Re' hin jinaj wo' chik i ma' holohik taj xwilow imb'aan chinaah i wach ak'al. Re' i reey imb'anik reh re' wili:6Re' chik i ma' kinimanik taj ruyeew chupaam i nim wach kamanik. Eh re' i nimaq kiwach chupaam i ma' nimaq ta wach kamanik taqe ruyeew.7Eh wilik wo' pech inwilow chi re' taqe i minooj pankowlaj kamanik riij kawáyu kib'ehik. Eh re' taqe i reey chi kooq kib'ehik, je' taqe xa moso.8Awach ink'otwik reh i jul xa re' wo' reh inq'ehb'ik chupaam. Eh awach impaxinik reh i tz'aq ink'uxarik ruum i aaq'.9Awach impaxinik reh ab'aj i ruq'oj riib' ruuk'. Awach impaxinik reh i sii' panyohb'aal wilik ruum nee-oq i ruyok' riib'.10Eh wila' xik'ik i ruq'asiil ikej, eh wila' ma' xjuk'arik chik q'e' chik ansil iraaj noq inkojarik. Ma' xta reet chi noq neensik'arik na'ojb'al reh chib'ih i naa rub'aan.11Re' i reht'al ruq'unjik wach i aaq' xama' xta neerutiq reh wila' xti'arik ruum i aaq' noq komajaa' ruq'unej wach.12Re' ruq'oral i holohik runa'ojb'al holohik ink'amarik cho chinaah ruum. Eh re' i ruq'oral i ma' nimanik taj ti k'axik inchalik chinaah ruum.13Re' reh i rutoqaa' ruq'orariik i memil laj q'orik, eh noq inooj kuxoq xiik' chik naah yib'kiil wach taqe i ruq'or.14Re' i ma' nimanik taj ma' k'isiin ta imponik chuwach i q'orik, xa re' la' xama' reht'al ta wo' hoq chib'ih i naa ruk'ulariik na' chub'an.15Re' taqe i ma' kinimanik taj inkikansaj kiib' chi kamanik, eh ma' keht'al taj aha' ojik inki a'n.16Eh q'e' ketel wach i tinamit ko k'isa k'un rukojom chi ru reey. Re' taqe i k'amal kib'eeh ki-ik'ik aq'ab' pantaq ninq'ijinik.17Eh atoob' reh i tinamit i rukoj chi ru reey i wilik ruloq'il. Re' taqe i k'amal kib'eeh paru orahiil inki a'n kiwa' kihaa' reh chi neen k'ulik i kaansil, ma' re' ta xohk'rik inkikapaaj.18Re' i sikiil laj winaq ma' rutz'ap taj i kojweel reh i rupaat ruum i re' inq'ahik taqe i ruche'el, eh inq'ehb'ik chinaah noq inooj kuxoq.19Eh re' i ninq'ijinik i ruyeew rusuqkiil k'uxliis re' i ruuk'jiik i riis uuva i ruyeew rusuqkiil k'uxliis. Eh ruuk' tumiin kiloq'arik.20Re' hat maa b'aj i reey ni xata naq panawánima neenab'aj. Maa q'or wo' hoq i ma' holohik ta laj q'orik chi riij i b'ehoom ni xata re' noq wilkaat cha wutkeel. Ruum wilik taqe i je' kikab' i kok' tz'ikin nenooj kiq'or reh.1Maa pixpuuj wach i chib'ih aweh, wilik la' i chasiij neenak'ul jilow pan jinaj q'iij.2Eliik chawunej taqe i chib'ih aweh i tokoom, ruum ma' aweht'al taj chib'ih i ti' k'axik naa ruchaliik chinaah aatinamiit.3Eh re' i suutz' noq i ruk'am chaloq i jab' chinaah i wach ak'al i ruyeew chaloq. Re' k'acharik xa je' rukab' i chee' inq'ehb'ik pansak'aaj, inq'ehb'ik pantz'eet reh i rookb'aal q'iij xa ar kahnik.4Eh awach i rilow chi xk'uloq i teew ma' rub'an taj i tik. Awach i rilow chi xk'uloq i suutz' ma' rumol taj wach i rutik.5Nik' wach noq ma' aweht'al taj i rub'an i teew, ma' aweht'al taj nik' wach noq i rutoq'aa' cho tz'uk'rik i ha'lak'uun ruuk' i rutuut. Je' wo' re' noq ma' aweht'al taj chib'ih taqe jariik i rub'an i Dios xtz'uhkrisanik chu'nchel i chib'ih i wilik.6Re' hat cha tik awijaa' wahq'eq, eh nee wo' chik i naa tik xq'eq, ruum ma' aweht'al taj aha' wilik i nee nelik korik mi re' i neena tik peet oon re' i neenatik koq'uun oon nee wo' nelik korik chu'nchel.7Korik wo' hoq chi q'e' holohik i k'acharik ayu' wach ak'al, eh q'e' holohik rilariik i q'iij saqum.8Xa re' la' chik, atoob' ta re' i winaq neenk'acharik k'ih-oq haab', eh neerub'an rusuqkiil chu'nchel i chib'ih jariik, inchol runab'eem chi re' noq naa rub'aan kimik xama' xta ruk'am chaloq. Rukojariik kina'ojb'al i k'ijool, i q'ahxoq9K'ijool, neerub'an chi nee nach'ikaa' ak'ux panak'achariik ruuk' taqe i chib'ih inak'ax wach pan ak'ijolal. Eh re' q'oreel xa chib'ih paruq'or ak'ux i hat, eh chib'ih inak'ax wach rub'aan. Xa re' la' chanab'eej chi ruum taqe i naa a'nam re' re', naa ruq'atam q'orik cha naah i Dios.10Je' re' noq chawisaj panawánima ik'aah, je' wo' rukapeb'jiik i xa chib'ih jariik, maayeew chi ti' k'axik ati'jolal ruum re' i k'ijolal xama' naj taj, eh xama' xta ruk'am chaloq.1Noq kowilkaat parusuqkiil ak'ijolal, k'oloq panak'ux aaDios xtz'uhkrisanik cha weh, noq komajaa' inchalik i ti' k'axik cha naah, noq komajaa' imponik i haab' noq neenaq'or chi je' wili: Ma' xta rusuqkiil i nuk'achariik, tiko'q.2K'oloq panak'ux aaDios noq konawil i rusaqumaal i q'iij i rusaqumaal i poh, i rusaqumaal i ch'umiil, noq komajaa' ink'uloq i suutz' ink'amwik cho reh i jab'.3Eh naa ruponiik i q'iij chi re' taqe aq'ab' inko'linik aweh xakib'arb'otik chik, eh naa rulokom riib' taqe i panawaa' i q'e' naq kow kiib'. Re' aweeh inkamanik chi k'ookb'al wach i wi'k xakiib' ixib' chik i naa rukahniik. Re' taqe naq'awach i naa rumooyriik paam.4Re' taqe i axikin ma' naa ta chik rib'iram i choq'ik naa rub'anam i keeb'al, ma' naa ta chik ab'iram noq naakitz'uyiniik i kok' chikop pantaq wahq'eq. Eh ma' naa ta chik ab'iram i kitz'uuy taqe i aj tz'uuy.5Eh naa chik ayo'jiik ruum i johtik yuuq', xa yo'jik chik ruuk' i b'ehik naa a'nam re' rismaal anaah naa rusaaqb'iik, re' i xama' ahl ta wo' naq ma' naa ta chik akuyum, xama' xta chik i naa awaajwaam. Ruum xailook' chik tiooj panjul chi jumpech, re' i naa rutib'iik kik'ux chawiij naa rib'irjiik i koqiim pantaq b'eeh.6K'oloq panak'ux aaDios, noq komajaa' inak'ul aweh je' rukab' noq ink'up i karena plata, je' rukab' noq impaxik i xun re' ruuk' i oro, je' rukab' noq impaxik ikom chii' ha', eh noq kosuq ak'ux.7Eh re' aati'jolal naa wo' chik rusutiniik chi pooq ak'al re' xkorjik cho wii'. Re' aawuxlaab'al naa wo' chik rusutiniik ruuk' i Dios re' xye'wik cho reh.8Re' hin i kinq'orik i k'uhb'aal, i nuq'or chi chu'nchel imb'aan, inq'orarik wach ak'al, xama' xta ruk'am chaloq. Re' ruq'orariik chib'ih i rub'an i winaq9Noq re' hin xnureq nuna'ojb'al chi korik q'e' chik xnukoj kina'ojb'al i tinamit xinkib'iraj, eh xnusik' chi riij i na'ojb'al. Eh ma' k'isiin taqe i jalwaach q'orik xnuyejaa' wach.10Eh xnusik' chi riij i q'orik i ruk'ul chi q'orarik. Xnusik' chi riij nik' wach rutz'ihb'jiik naa nub'anam i ju'jun chi q'orik, chi re' ruq'orariik naa nub'anam.11Re' kiq'oral i holohik kina'ojb'al je' rukab' noq neench'aplojik i q'as ju' ch'ihch', oon je' rukab' noq inch'aplojik i kalawux i na'ojb'al inkiyeew i kiib' chi aj tijoom, i ruq'or i k'amal b'eeh.12Hat wak'uun noq wilkaat chab'iraj i naa nuq'orom aweh re' rutz'ihb'jiik i ma' k'isa huuj ruch'ihil i ma' k'isa tijinik ma' xta ruk'am chaloq xa ruq'uhtiik i ti'jolal i ruyeew.13Yu'naak kuxik chik rib'irjiik i ruq'or i huuj wili. Re' naa a'nam i hat, re' chi naa ayohleem wach i Dios chi naa animam taqe i ruk'uhb'aal ruum re' re' ruk'ul chi na a'nam.14Ruum re' i Dios naa ruq'atam i q'orik chi qanaah ruuk' i chib'ih ixqa a'n, i xqaq'or atoob' ta holohik, atoob' ta ma' holohik, eh atoob' ta xa chi ma' eht'alimaj xqa a'n.
Bible Society in Guatemala