Read 2 REYES 1

2 REYES1

¹Noq kamnaq chik i reey Acab re' taqe i aj Moab kija'wachej i tinamit Israel.

²Eh re' reey Ocozías xq'ehb'ik cho pan ventana ko paruka'ch'iht i paat i rub'an wii' i taaq'anik ar Samaria. Eh ruum chi q'e' ti' i xiq'oj, wilik taqe i rutaqareel xutaq'aaj reje je' wili xuq'or: Hiy taq ruuk' i Baal-zebub re' ki dios i aj Ecrón, cha pahqaaj taq cho reh mi konaa nuk'aachjiik oon ma' naak ta chik, inki.³Eh jinaj i ruánjel i QaJaaw Dios xq'orinik cho reh i Elías jalal ruq'oral i Dios Tisbe i rutinamiit: Hiy chuk'ulariik i raj taqareel i reey wilik Samaria, je' wili i neenaq'or keh: ¿Chib'ih reet noq naa taq awojiik chi pahqanik ruuk' i Baal-zebub i ki dios i aj Ecrón? ¿Mi ma' xta re' i Dios ayu' Israel?⁴Eh cha q'or keh chi re' i Dios xuq'or chi ma' naa ta chik ruk'aachjiik i reey xti korik la' chi naa rukimiik tiko'q reh, inki ánjel.
Eh re' Elías xooj wo' rub'an i xq'orarik reh.

⁵Eh noq re' taqe i aj taqareel xi ponik wo' chik ruuk' i reey Ocozías xupahqaaj keh chi je' wili:
¿Chib'ih reet noq xat sutinik taq lom chaloq? inki.

⁶Re' keh je' wili i xkiq'or:
Xooj sutinik chaloq ruum jinaj i winaq xqak'ul ti sutinoq taq reje ruuk' i reey xtaaq'anik taq cha weh, je' taq wili i cha q'or reh: Re' QaJaaw Dios je' wili xuq'or: ¿Chib'ih reet noq i naataq'aaj reje awaj taqareel chupahqaljiik reh i Baal-zebub ki dios i aj Ecrón? ¿Mi ma' xta re' i Dios ayu' Israel? Ruum aj re' ma' naa ta chik ak'aachjiik xti korik la' chi naa akimiik, tiko'q taq reh, inki taqe.

⁷Eh re' reey Ocozías xupahqaaj keh chi je' wili:
¿Nik' wach ruwii' i winaq xq'orik taq aweh chi je' re'? inki.

⁸Re' taqe raj taqareel je' wili i xkiq'or: Re' ruso' re' ruuk' i rismaal riij chikop korjinaq wii' re' i b'ak'b'al paam re' ruuk' i tz'uhuum, inki taqe, re' reey je' wili xuq'or:
Re' re', re' Elías Tisbe i rutinamiit, inki.⁹Re' reey xutaq'aaj reje kajaaw i lajeeb' roxk'ahl chi soldado, eh ruch'ihil taqe i lajeeb' roxk'ahl chi soldado re' re', noq xooj chuk'amariik i Elías. Eh tzunlik nah yuuq' i Elías noq xponik rureq je' wili i xuq'or:
Hatjalal ruq'oral i Dios, re' reey xutaq'aaj cho ruq'orariik chi naa aqajiik qohoq chinaah i yuuq' wili, chi naa awojiik ruuk', inki.

¹⁰Re' Elías je' wili xuq'or:
Wila' korik chi hin manlik jalal ruq'oral i Dios neenqajik chaloq i q'aaq' pan taxaaj neetik'ahtik i hat, eh nee wo' kik'ahtik i lajeeb' roxk'ahl chi soldado awuch'ihil taqe, inki.
Eh xa chupaam i jumehq' re' re' xqajik chee q'aaq' pan taxaaj xk'ahtik i reh, eh xik'ahtik wo' taqe i soldado ruch'ihil.

¹¹Eh re' reey xutaq'aaj wo' chik reje i kajaaw i lajeeb' roxk'ahl chi soldado, eh ruch'ihil wo' taqe i lajeeb' roxk'ahl chi soldado Re' kajaaw i soldado re' re' xponik rureq i Elías je' wili xuq'or reh:
Hat jalal ruq'oral i Dios, re' reey xutaq'aaj cho ak'amariik, chi naa aqajiik qohoq chi jumehq'iil chinaah i yuuq' wili, inki.

¹²Eh re' Elías je' wili xuq'or:
Wila' korik chi hin jalal ruq'oral i Dios neenqajik chaloq i q'aaq' pan taxaaj neetik'ahtik i hat, eh nee wo' kik'ahtik i lajeeb' roxk'ahl chi soldado awuch'ihil, inki.
Eh xa chupaam i jumehq' re' re' xqajik chee q'aaq' pan taxaaj, xk'ahtik i reh xik'ahtik wo' taqe i soldado ruch'ihil.

¹³Eh paroxpeech re' reey xutaq'aaj wo' chik reje jinaj i kajaaw i lajeeb' roxk'aahl chi soldado, eh ruch'ihil wo' taqe i lajeeb' roxk'ahl chi soldado Re' i kajaaw i soldado xponik rureq i Elías chinaah i yuuq', xuxuk'aa' riib' chuwach je' wili i xuq'or reh:
Hat jalal ruq'oral i Dios cha kuy maa kinakansaj tii hin, eh maa kansaj wo' taqe i lajeeb' roxk'ahl chi soldado wuch'ihil, re' taqe i kikamanik aweh.¹⁴Eh re' taqe i kiib' chi kajaaw soldado xi k'ulik chi peet kuch'ihil i ki soldado xikimik ruum i q'aaq' xqajik cho pan taxaaj. Ruum aj re' i nupahqaaj otob'il aweh chi maa kinakansaj tii hin je' wo' taqe i nu soldado wuch'ihil, inki.

¹⁵Eh re' i ruánjel i QaJaaw Dios je' wili i xuq'or reh i Elías: Mat yo'jik ruum, hiy chi riij, inki.
Re' Elías xqajik cho naah yuuq' xooj chi riij i kajaaw i soldado ruuk' i reey Ocozías.¹⁶Re' Elías je' wili i xuq'or reh i reey:
Re' i QaJaaw Dios je' wili xuq'or: ¿Chib'ih reet noq xataq'aaj rupahq'aljiik ana'ojb'al reh i Baal-zebub ki dios i aj Ecrón? ¿Mi ma' xta re' Dios ayu' Israel reh chi nee napahqaaj ana'ojb'al reh? Ruum i xa a'n re' re' ma' naa ta k'aachjik, xti korik la' chi naa akimiik, inki.

¹⁷Eh re' reey Ocozías xkimik wo' reje, je' rukab' i xuq'or i QaJaaw Dios ruuk' chii' i Elías. Re' i Ocozías ma' xwihik ta jino'q rak'uun ruum aj re', re' Joram i ruchaaq' xkahnik chi reyil chi jilow Israel. Re' wili xk'ularik noq kiib' haab' chik rokiik chi reyil Judá Joram rak'uun i Josafat.

¹⁸Eh re' i ruk'uliil taqe i xub'an i reey Ocozías tz'ihb'amaj rehtaliil chupaam taqe i ruhuuj i Crónicas. Re' wo' tz'ihb'amaj wii' i xkian i xi wihik chi reyil Israel. Re' Elías jalal ruq'oral i Dios xk'amarik johtoq pan taxaaj

¹Xponik i q'iij noq re' Elías xk'amarik johtoq pan taxaaj ruum i QaJaaw Dios chupaam i kaq suut teew. Re' i Elías ruch'ihil Eliseo manlik elik inki a'n cho pan tinamit Gilgal.²Re' Elías je' wili i xuq'or reh i Eliseo:
Re' hat tikaan pee ayu' re' hin xirutaq'aaj reje Bet-el i QaJaaw Dios, inki.
Re' Eliseo je' wili xuq'or:
Re' hin parub'ihnaal i Dios, panab'ihnaal i hat i nuq'or i korik chi ma' jaruuj naa kaat nukanaam cha wutkeel, inki.
Eh kikab'cheel wo' xiooj Bet-el.³Re' taqe i jalal ruq'oral i Dios wilkeeb' Bet-el xi chalik chuk'ulariik i Eliseo je' wili xkiq'or reh:
¿Mi aweht'al i hat noq yu'naak i QaJaaw Dios naa resam chawach i Elías awaj tijoom? inki taqe.
Re' i Eliseo je' wili kichaq'weesjiik xub'an: Hoo' weht'al chik, xa re' la' re' taq i hat maawesaj taq ruq'orkiil, inki.

⁴Eh re' Elías je' wili i xuq'or reh i Eliseo:
Re' hat tikaan pee kahnoq ayu' ruum re' hin xirutaq'aaj Jericó i QaJaaw Dios, inki.
Re' i Eliseo je' wili xuq'or:
Re' hin parub'ihnaal i QaJaaw Dios panab'ihnaal i hat i nuq'or aweh i korik chi ma' jaruuj neetinuk'anaa' cha wutkeel, inki.
Eh kikab'cheel wo' xiooj Jericó.⁵Eh re' taqe i jalal ruq'oral i Dios wilkeeb' Jericó xi elik chaloq chuk'ulariik i Eliseo je' wili i xkiq'or reh:
¿Mi aweht'al i hat chi re' QaJaaw Dios yu'naak naa risam chawach i Elías awajtiijoom? inki taqe.
Re' Eliseo je' wili i xuq'or: Hoo' weht'al chik, xa re' la' re' taq i hat maa wesaj taq ruq'orkiil, inki.

⁶Eh re' i Elías je' wili i xuq'or reh i Eliseo:
Re' hat tikaan pee kahnoq ayu' ruum re' hin xirutaq'aaj chi chii' nim haa' Jordán i QaJaaw Dios, inki.
Re' Eliseo je' wili xuq'or: Re' hin parub'ihnaal i QaJaaw Dios, panab'ihnaal i hat i nuq'or aweh i korik chi ma' jaruuj nee tinukanaa' cha wutkeel, inki.
Eh kikab'cheel wo' xiooj chi chii' i nim ha' Jordán.⁷Eh lajeeb' roxk'ahl taqe i jalal ruq'oral i Dios xooj kipab'aa' kiib' chi najt reje chikiwach. Eh re' i Elías, ruch'ihil i Eliseo xkipab'aa' kiib' chi chii' i nim ha' Jordán.⁸Re' Elías xresaj chi riij i ruso' xarutak'aam chi riij xub'ak'ej wach ruuk' i re' xuq'oj paam i nim haa' Jordán, re' ha' k'ul xumol riib' pantaq kicheel. Eh panchiqiij xi-ik'ik kikab'cheel noq xkiq'at wach i nim ha'.⁹Eh noq ik'inaq chik chi juntar i nim ha', je' wili xuq'or i Elías reh i Eliseo:
Chaq'or weh. ¿Chib'ih inawaaj chi neenuyeew aweh noq komajaa' kiruk'am johtoq i QaJaaw chawach? inki.
Re' i Eliseo je' wili xuq'or:
Re' hin inwaaj chi nee nayeew weh k'ih-oq awajaawriik chuwach i naa aye'em keh, reh chi re' hin neekinkahnik chi ajilow chi k'amaj b'eeh, inki.

¹⁰Re' hat q'e' nim wach inapahqaaj, inki noq chaq'wik i Elías. Wila' xinawil noq nee kink'amarik johtoq chawach neenye'arik aweh i xapahqaaj, eh wila' ma' xakuy rilariik xama' nee ta wo' inye'arik aweh, inki.

¹¹Noq ojik inki a'n kikab'cheel k'utaaj inki a'n chikiwach. Eh xa chi jumehq'iil xk'uloq jinaj i kareta je' xaq q'aaq' kiib' i kawáyu inqerinik reh je' xaq q'aaq' xumin riib' pankiyejaal, eh xk'amarik johtoq pan taxaaj i Elías ruum i kaq suut teew.¹²Noq xrilow chi je' re' i Eliseo kow xuk'er chii' je' wili i xuq'or: Hat wajaaw, hat wajaaw, re' hat Elías je' hat qajaaw noq wilkaat i hoj, hoj aj Israel, inki.
Eh ma' kota chik xril wach i Elías. Ruum i ruti'kiil ruk'ux i Eliseo xuweq i ruso' chi riij kiib' xresaj. Re' chik i Eliseo xkahnik chi jilow i Elías

¹³Chi riij i re', re' Eliseo xumol reje i ruso' i Elías xuq'eb' kahnoq, xsutinik wo' chik chaloq chi chii' i nim ha' Jordán.¹⁴Eh xuq'oj paam i nim ha' Jordán ruuk' i ruso' i Elías, kow xuq'or chi je' wili: ¿Aha' wilik i rajaawriik i Dios xuyeew reh i Elías? inki.
Noq xuq'oj paam i ha' i Eliseo ruuk' i itz'ihy k'ul xumol riib' i ha' pantaq rucheel, eh panchiqiij xikik noq xuq'at wo' chik wach i nim ha' Jordán.¹⁵Noq xkilow chi je' re' taqe i jalal ruq'oral i Dios wilkeeb' chi juntar i nim ha' Jordán ar Jericó, je' wili i xkiq'or: Re' re' Eliseo re' i rajaawriik i Elías xye'arik reh inki taqe.
Eh xooj kik'ul xkixuk'aa' kiib' chuwach,¹⁶je' wili xkiq'or reh:
Re' hoj i hoj awaj kamanoom wilkeeb' chi qaxilak lajeeb' roxk'ahl i kow kiib' neerub'an chi nee kiooj chi rusik'ariik i Elías awaj tijoom, ruum re'-oq i Ruxlab'al i Dios x-uksanik johtoq reh aha'-oq xponik rukut pantaq raxchee', pantaq rooq yuuq', inki taqe. Re' Eliseo je' wili xuq'or:
Re' taq i hat maa awach taq ataq'aaj, inki.

¹⁷Ruum chi re' keh k'ih pech xkiq'or chi naa kitaq'aam reje, korehtaal wo' xuyeew q'ab' chi xiooj i lajeeb' roxk'ahl chi winaq.
Re' keh ixib' q'iij xponik kisik' i Elías xa re' la' xama' aha' ta wo' xkireq chaloq.¹⁸Chi riij i re' xi sutinik wo' chik cho Jericó re' i xkahnik kahnoq wii' i Eliseo. Eh je' wili xuq'or keh:
Re' hin xnuq'or naq chi ma' naa ta taq awojiik, inki.

¹⁹Re' taqe i patim ar Jericó je' wili i xkiq'or reh i Eliseo:
Hat jalal ruq'oral i Dios, re' hat inawilow i qatinamiit chi q'e' holohik, xa re' la' re' taqe i ha' inaasjik chupaam ma' holohik ta taqe, eh re' qak'aleel ma' rub'an taj i tik chuwach, inki taqe.

²⁰Noq xrib'iraj i Eliseo chi je' re' je' wili xuq'or keh:
Chak'am taq cho jino'q weh i nimlaj kulk ko ak' chayeew taq chaloq aatz'aam chupaam, inki.²¹Eh noq xkik'am cho reh i Eliseo xponik ruchihkaaj paraasb'al taqe i haa' aatz'aam je' wili xuq'or:
Re' QaJaaw Dios je' wili xuq'or. Re' hin xwik'saj chik i ruyab'ilaal i ha' wili, ma' awach ta chik i naa kikimiik kuum, eh naa chik rub'anam i tik chuwach ak'al, inki.

²²Je' aj re' noq xkahnik chi ma' xta chik ruyab'ilaal taqe i haa' re' re' je' rukab' i xuq'or i Eliseo.

²³Eh re' i Eliseo xelik reje Jericó xooj pan tinamit Bet-el. Noq ojik i rub'an wilik taqe i k'ijool xtohq'ik kikaqse'laam je' wili i xkiq'or reh: Hiy reje i hat johm wach anaah, hiy reje i hat johm wach anaah, inki taqe.

²⁴Eh re' i Eliseo xusutej riib' chi kilariik, xuyuq'eej i ti' chikinaah parub'ihnaal i QaJaaw Dios. Eh xa chi jumehq'iil xi elik cho panch'ahn i kiib' chi josq'laj oso, xuxereb'eej taqe i kiib' roxk'ahl keh i k'ijool re' re'.²⁵Chi riij i re' xelik reje ar i Eliseo jalal ruq'oral i Dios xooj chinaah i yuuq' Carmelo, chi riij i re' xooj chi k'acharik Samaria. Re' noq xokik chi reyil i Joram

¹Noq waxaqlaj haab' chik rokiik chi reyil i Josafat Judá, xokik chi reyil i Joram rak'uun i Acab chikinaah i aj Israel ar Samaria. Eh kab'laj haab' xwihik chi reyil.²Xa re' la' xub'an i yiib' wach na'ojb'al chuwach i QaJaaw Dios, xa re' la' ma' xrik'saj ta naah ma' xureq ta chi je' rukab' i xub'an i rutuut rajaaw. Re' Joram xresaj taqe i ab'aj inloq'jik wii' i Baal, re' i xuyejaa' kahnoq i rajaaw.³Xa re' la' re' Joram xub'an wo' hoq i mahk xub'an i Jeroboam rak'uun i Nabat ruuk' taqe re' xumin taqe pamahk i aj Israel. Re' Eliseo xuq'or chi naa ruq'atam wach i Moab

⁴Eh re' Mesa kireey i aj Moab, aj k'isan tentzun. Eh rajlaal haab' i ruq'asaj reh i reey ar Israel jinaj siento miil chi tentzun, eh jinaj siento miil chi imas tentzun chaam i rismaal kiij.⁵Xa re' la' noq xkimik reje i reey Acab re' i kireey i aj Moab xchalik ruk'aah chinaah i kireey i aj Israel.⁶Re' reey Joram, xelik cho Samaria. Eh xumol kiwach i ru soldado wilkeeb' Israel.⁷Eh je' wili i xutaq'aaj ruq'orariik reh i kireey i aj Judá:
Re' kireey i aj Moab xchalik ruk'aah awuuk' wila' naawaaj nee kinatoob'eej noq nee kinooj chi q'aq'inik ruuk', inki. Re' i kireey i aj Judá je' wili i xuq'or: Nee tinutob'eej chi q'aq'inik je' chi re' hin, je' chi re' taqe i nu soldado je' wo' taqe nukawayu wilkeeb' cha toob'jiik chi kitoob'jiik taqe a soldado.⁸Eh aha' wilik i b'eeh neenqak'am noq nee qohooj chi q'aq'inik ruuk', inki.
Re' Joram je' wili i xuq'or: re' neenqak'am i b'eeh i nik'ik ponoq panchiq yuuq' Edom, inki.

⁹Eh re' kireey i aj Israel, i kireey i aj Judá, i kireey i aj Edom xiooj chi q'aq'inik, xa re' la' konajt xponik kikotej wuquub' q'iij xib'ehik ruum i re' xk'uhlik i kihaa' i ki soldado, ruch'ihil i kichikoop.¹⁰Eh re' i Joram i kireey i aj Israel je' wili xuq'or:
Chawilow taq re' hoj, hoj ixib' chi reey xoj kuxik, xoj chalik ta b'ila' ruq'asaj i QaJaaw Dios pan kiq'ab' i aj Moab, inki.

¹¹Eh re' Josafat kireey i aj Judá je' wili i xuq'or:
¿Mi ma' chih jino'q jalal ruq'oral i Dios ayu' re', reh chi nee rupahqaaj reh i QaJaaw Dios i ruk'ul chi neen qa'an? inki.
Eh jinaj i nim wach rukamaj ruuk' i kireey i aj Israel je' wili xuq'or:
Ayu' wilik i Eliseo rak'uun i Safat i xkamanik ruuk' i Elías.

¹²Re' i reey Josafat je' wili xuq'or ru q'iij nee ruq'or qeh i neraaj i QaJaaw Dios chi neenqa'an, inki.
Eh re' i Joram kireey i aj Israel, i Josafat kireey i aj Judá, i kireey i aj Edom jumehq'iil xooj kiq'oreej i Eliseo.¹³Eh re' Eliseo je' wili i xuq'or reh i kireey i aj Israel:
¿Chib'ih reet noq inapahqaaj weh chi naa kaat nutob'eem? Hiy cha pahqaaj keh i jalal ruq'oral i Dios xi kamanik ruuk' awajaaw chi nee tikitob'eej, inki.
Re' kireey i aj Israel toq' toq' xub'an je' wili xuq'or:
Ma' chih taj ruum re' QaJaaw Dios molwik qawach i hoj, hoj ixib' chi reey, eh naakooj ruq'asam pan kiq'ab' i aj Moab, inki.

¹⁴Re' Eliseo je' wili xuq'or:
Re' hin parub'ihnaal i QaJaaw Dios nim rajaawriik i nukamaneej wach i nuq'or aweh i korik. Chi ma' ta naq i nuyeew rajaawriik i Josafat kireey i aj Judá ma' nee ta naq taq tinuq'o'reej, eh ma' nee ta naq taq tinutob'eej.¹⁵Yu'naak chak'am taq cho jino'q weh inq'ojinik arpa, inki.
Eh noq k'ahchi' chik chi q'ooj arpa i, re' QaJaaw Dios xuq'oreej chee Eliseo xuq'or reh chib'ih i naa kianam.¹⁶Eh re' i Eliseo je' wili xuq'or keh ixib' chi reey: Re' wili i xuq'or taq cha weh i QaJaaw: Chupaam i rooq yuuq' wili naa rub'eeh i ma' k'isa ha',¹⁷Atoob' ta ma' nee taq inawil wach i teew atoob' ta ma' nee taq inawil wach i jab' re' rooq yuuq' wili naa runujiik chi ha'. Eh naa taq awuk'em aweh i hat, naa kuk'em keh taq aachikoop.¹⁸Re' wili ma' k'axik ta chi b'anarik chuwach i QaJaaw Dios. Eh ma' xata re' re' naa rub'anam naa la' wo' ruq'asam taq panaq'ab' taqe i aj Moab.¹⁹Naa taq asacham kiwach i tinamit kotimaj kiij chi tz'aq, je' wo' taqe i holohaq tinamit. Eh naa taq rukuxiik ayok'om i chee' kiwachinik, naa taq atz'apam kipaam taqe i jul ha'. Eh naa taq ahamam ab'aj chupaam i ye'aab' kielik wii' i tik, inki.

²⁰Eh noq saq'ik chi junwaar chupaam i ru orahiil i ruq'ahteesjiik i mayiij, xqajik chee ha' paruyuq'ul i Edom, xnujik parooq yuuq'.²¹Re' taqe i aj Moab xkib'iraj rib'iral chi re' taqe i ixib' chi reey xiooj chi q'aq'inik kuuk'. Je' aj re' noq xkimol wach taqe i mama' winaq, je' wo' taqe i k'ijool manlik i kihab'ul reh ojik pankuartel, xooj kuy-eej i q'aq'inik pank'ula't reh i tinamit.²²Eh parusaq'iik chi junwaar noq xelik chee q'iij xsihq'inik i rusaqumaal chinaah i ha'. Noq xitz'ehtanik reje i aj Moab xa kik' chik i ha' noq xkilow.²³Eh je' wili xkiq'or chikiwach: Re' wulu' kik', noq inqaq'or i hoj chi re' taqe ixib' chi reey xkitoq'aa' peleto chikiwach, eh kikansaj kiib'. Je' re' noq hat aj Moab taq taq qachop naah i chib'ih keh xkikanaa', inki.

²⁴Xa re' la' noq xi okik i koq taqe i aj Moab chupaam i ye'aab' kimolom wii' kiib' i aj Israel. Re' keh xkitoq'aa' cho q'aq'inik kuuk' i aj Moab, eh xkimol chi elik. Re' taqe i aj Israel xkajimaj reje i aj Moab korehtaal xkikansaj.²⁵Eh xkisach wach taqe i tinamit, eh xkiham ab'aj chupaam i ye'aab' i nelik naq wii' i ti. Eh kiham wo' paam taqe i jul ha' xkuxik wo' kiyok'om taqe i chee' kiwachinik. Ach wo' re' i tinamit Qir-hareset xkahnik chi ma' xta xkian reh.

²⁶Eh noq xrilow i kireey i aj Moab chi re' q'aq'inik q'e' kow, ma' naa ta rukuyum ransil, xuk'am reje chi riij i wuquub' siento chi soldado wilik kiq'aslaj ch'ihch' kuuk' xkaaj naq kianam reh i kireey i aj Edom, xa re' la' xama' xta wo' kuchej.²⁷Eh re' i kireey i aj Moab xuchop i peet rak'uun, re' naq i naa rokiik chi reyil chi jilow xuq'asaj chi mayiij chinaah i tz'aq chuwach i ki dios i aj Moab. Ruum i xub'an re' re' yohb'aal wach noq xchalik kijosq'iil i aj Israel xiooj pan kitinamiit. Re' i ma' ilooj taj xb'aan ruuk' i aseite

¹Jinaj ixoq rehk'een naq jinaj keh i jalal ruq'oral i Dios je' wili ruq'or reh i Eliseo:
Re' nub'ahiil kamnaq chik, eh re' hat aweht'al chi xuyohleej wach i Dios. Eh wilik kahnoq ruk'aas, eh re' i winaq wilik wii' i ruk'aas iraaj ruq'uchum taqe i kiib' chi wak'uun reh chi naakikamaniik ruuk' tojb'al riij i k'aas, inki.

²Re' Eliseo je' wili xuq'or:
¿Chib'ih nee tinutob'eej wii'? ¿Chib'ih i wilik aweh panapaat? inki.
Re' ixoq je' wili i xuq'or:
Re' hin, hin awaj kamanoom ma' xta wilik weh, xa jinaj wo' tii xaro chi aseite i wilik panupaat, inki.

³Re' Eliseo je' wili xuq'or reh ixoq:
Yu'naak hiy kuuk' taqe aka'jaah cha pahqaaj keh chi kemeel i xaro ma' xta kipaam xajarub' pa' neenareq.⁴Eh nee ti okik i koq panapaat awuch'ihil i kiib' chi awak'uun neena tz'ap awiib' ar. Eh re' aseite wilik pan axaro nee naham chupaam taqe i xaro neenakemelej. Eh re' ahamam chik pareh taqe neenayeew, inki.

⁵Re' ixoq xooj wo' rutz'ap riib' parupaat ruch'ihil i kiib' chi rak'uun. Re' taqe i rak'uun xi-iksanik i koq reh taqe i xaro, eh re' reh xuham i aseite chupaam.⁶Eh noq xkuxik kinujisam chi aseite taqe i xaro je' wili i xuq'or reh jinaj keh i rak'uun:
Chak'am chik cho jino'q weh i xaro, inki.
Re' i rak'uun je' wili i xuq'or ma' xta chik jino'q i xaro, inki.
Eh xukanaa' wo' chee elik i aseite pank'isa xaro.⁷Eh re' ixoq xponik ruq'or reh i Eliseo jalal ruq'oral i Dios. Re' i Eliseo je' wili xuq'or reh ixoq:
Yu'naak chak'ayej i aseite ruuk' i re' neenatoj aak'aas, eh re' i ruq'ox i tumiin ruuk' i re' neenak'uxlaaj awiib' i hat, nee taqe nak'uxlaaj awak'uun, inki. Re' ma' ilooj taj xub'an i Eliseo ruuk' ixoq aj Sunem

⁸Pan jinaj q'iij i Eliseo xik'ik ponoq pan tinamit Sunem, ar patim jinaj ixoq nim rajaawriik. Eh toq' toq' xub'an reh i Eliseo chi xik'ik rub'an ruwa' parupaat, jarpech i nik'ik ar i Eliseo ar i nik'ik rub'an ruwa'.⁹Re' ixoq re' re' je' wili xuq'or reh i rub'ahiil:
Chab'iraj i naa nuq'orom aweh re' i winaq re' re' jarpech i nik'ik, qoh k'ulik rula'eej re' hin weht'al chi re' winaq re' re' santo laj jalal ruq'oral i Dios.¹⁰Je' re' noq i ruk'ul chi naaqayejaam jino'q i k'isa paat paruka'chiht i paat reh ruhi'lb'aal ar neenqayeew ruch'aht neenqayeew jino'q rumexa, neenqayeew jino'q ruxila, neenqayeew rusaquum. Noq nee qoh k'ulik rula'eej ar neenkahnik, inki.

¹¹Eh xponik wo' chik i ruq'ijil noq xik'ik ponoq ar i Eliseo, ar xkiwarsaj chupaam i k'isa paat re' re'.¹²Je' wili i xuq'or reh i Giezi i rumoso:
Chayuq'eej cho weh ixoq, inki.
Eh re' i rumoso xponik wo' ruyuq'eej ixoq, noq xponik ixoq ruuk' i Eliseo, je' wili i xuq'or reh i Giezi i rumoso:¹³Chapahqaaj reh ixoq q'e' atoob' quuk' iraaj oon chi neenqatoob'eej, iraaj oon chi nee qohq'orik chi riij ruuk' i reey, oon iraaj chi nee qohq'orik chi riij ruuk' i k'amal kib'eeh soldado, inki.
Re' ixoq je' wili i xuq'or: Re' hin ma' xta reet wilkiin ayu' chi kixilak i nutinamiit, inki.

¹⁴Eh re' i Eliseo je' wili i xuq'or reh i Giezi i rumoso.
¿Chib'ih neenqatoob'eej wii'? inki. Re' i Giezi je' wili i xuq'or:
Re' ixoq wili ma' xta ruha'lak'uun, eh re' rub'ahiil rijib' chik, inki.

¹⁵Chayuq'eej wo' chik cho weh, inki i Eliseo.
Re' rumoso xponik wo' ruyuq'eej xa re' la' re' ixoq xkahnik paa' chii' puerta.¹⁶Eh je' wili i xq'orarik reh ruum i Eliseo:
Je' yu' pan jinaj haab' aq'ahcheem chik jinaj i k'isa awak'uun, inki reh.
Re' ixoq je' wili xuq'or:
Ma' chih taj jaaw jalal ruq'oral i Dios maachuk i q'orik weh hin awaj kamanoom, inki.

¹⁷Eh re' ixoq kahnik wo' wach k'acharik je' rukab' i xq'orarik reh ruum i Eliseo. Eh chupaam chik i haab' jinaj x-aasjik jinaj k'isa rak'uun.

¹⁸Re' i k'isa k'un noq nim chik pan jinaj q'iij xooj chi rilariik i rajaaw chupaam i ye'aab' k'ahchi' wii' chusik'ariik i wach i trigo, ruch'ihil taqe i rumoso.¹⁹Eh je' wili i xuq'or reh i rajaaw:
Yohb'aal wach ti'kiil i nunaah, yohb'aal wach ti'kiil i nunaah, inki.
Re' rajaaw je' wili i xuq'or reh jinaj keh i rumoso:
Chak'am reje ruuk' i rutuut, inki.

²⁰Re' i moso xuq'ahcheej reje i k'isa k'un xuk'am wo' reje reh i rutuut. Eh re' rutuut xuq'ahcheej i k'isa rak'uun, xuyeew qohoq warutuuq, xa re' la' noq xponik kab'lajora i q'iij xkimik.²¹Re' i tuutb'ees xuq'ahcheej johtoq i k'isa k'un paruka'chiht i paat chupaam i ye'aab' xuyejaa' reh i Eliseo jalal ruq'oral i Dios, xuyok'aa' cho wach ch'aht xelik chee reh xutz'ap chee puerta.²²Eh xuyuq'eej reje i rub'ahiil je' wili xuq'or reh:
Chataq'aaj cho jino'q weh i moso chuk'am cho jino'q i b'uurux reh chi nee kinjohtik reje chi riij, reh chi nenooj nuq'oreej i Eliseo jalal ruq'oral i Dios, nee wo' chik kinsutinik chaloq chi jumehq'iil, inki.

²³Eh re' rub'ahiil je' wili xuq'or: ¿Chib'ih reet noq naa awojiik ruuk' yu'naak? Yu'naak ma' re' ta ak' poh, eh ma' re' ta hi'limb'al q'iij, inki. Re' i rehk'een je' wili i xuq'or:
Mat kapeb'inik chi riij i re', inki.

²⁴Re' ixoq xuq'or reh i moso chi xkojarik rij jinaj i b'uurux, je' wili xuq'or ree moso:
Yu'naak re' hat naa ak'amwiik rub'eeh i b'uurux ma' aha' ta nee ti pahik konee nuq'or aweh i hin noq neenapab'aa', inki reh.

²⁵Re' ixoq xooj wo' ruuk' i Eliseo jalal ruq'oral i Dios chinaah i yuuq' Carmelo. Eh kochinajt xi ilarik cho ruum i Eliseo: Re' i Eliseo je' wili xuq'or reh i Giezi re' rumoso:
Chawilow reje ixoq xk'uloq wulu' re' i aj Sunem.²⁶Hiy chak'ul chaloq cha pahqaaj reh mi suq ruk'ux i reh, mi suq ruk'ux i rub'ahiil, je' wo' hoq i k'isa kak'uun, inki.
Re' ixoq je' wili xuq'or reh i Giezi: suq qak'ux, inki.

²⁷Eh noq xponik chinaah i yuuq' wilik wii' i Eliseo xuxuk'aa' i koq riib' chuwach, xuchop i rooq: Eh re' i Giezi xtohq'ik naq resam reje. Xa re' la' re' Eliseo jalal ruq'oral i Dios je' wili xuq'or:
Chakanaa' re' ixoq wili q'e' ti' ruk'ux re' Dios komajaa' ta ruq'or weh chib'ih i ruti'kiil ruk'ux, inki.

²⁸Re' ixoq je' wili i xuq'or reh i Eliseo:
Qajaaw, re' hin ma' nik' ta xnupahqaaj wak'uun aweh ¿Mi ma' xnuq'or aweh re' chi maachuk weh i q'orik? inki.

²⁹Eh re' i Eliseo, je' wili i xuq'or reh i Giezi:
Chayejaa' awiib' chi jumehq'iil hiy parupaat ixoq wili nee nak'am i nukarote wila' awach i xak'ul maa pab'aa' awiib' ruuk', wila' awach i xutoq'aa' k'utaaj awuuk' maa toq'aa' k'utaaj ruuk'. Noq nee ti ponik neena t'anaa' qohoq i nukarote chuwach i k'isa k'un xkimik, inki.

³⁰Eh re' rutuut i k'isa k'un je' wili i xuq'or reh i Eliseo:
Re' hin xti korik i nuq'or aweh parub'ihnaal i Dios, panab'ihnaal i hat chi re' hin ma' nee ta nkinsutinik reje panupaat wila' ma' xooj awilow i k'isa wak'uun, inki.

³¹Eh re' i Eliseo xooj wo' chi riij ixoq, re' i Giezi chalinaq chik chi peet b'eeh, rut'anaam naq chik qohoq i rukarote i Eliseo chuwach i k'isa k'un, xa re' la' re' i k'isa k'un xama' xk'aach ta wo' chik xrilow chi je' re' xooj ruk'ul i Eliseo je' wili xuq'or reh: Re' hin xnut'anaa' qohoq aakarote chuwach i k'isa k'un, xa re' la' xama' xk'aach ta wo' chik, inki.

³²Noq xokik i koq i Eliseo pampaat i xrilow kamnaq chik i k'isa k'un yoklik wach ch'aht.³³Re' reh xokik i koq xutz'ap chaloq i puerta xa re' chik i keh kikab'cheel xi kahnik pampaat.³⁴Re' Eliseo xjohtik johtoq nah ch'aht xupach'aa' qohoq riib' chinaah i k'isa k'un xub'an k'ulchi' k'ul naq'wach ruuk' i k'isa k'un, xuchop chi q'ab', eh xub'an rutiij chuwach i QaJaaw Dios. Eh noq xupitz' i koq chi' ruk'ux i ruti'jolal i k'isa k'un xchalik ruq'iximb'iik i ruti'jolal.³⁵Re' Eliseo xwuktik johtoq xak'ul chik inooj chi b'ehik chupaam i paat, chi riij i re' xjohtik wo' chik chinaah i ch'aht xupitz' wo' chik i koq chi' ruk'ux i ruti'jolal i k'isa k'un. Eh re' k'isa k'un wuq'uub' pech xub'an i at'isrik, eh xteh kab'chel i naq'wach.³⁶Re' Eliseo xuyuq'eej reje i Giezi re' i rumoso je' wili i xuq'or reh: Chayuq'eej chee rutuut i k'isa k'un, inki reh.
Eh noq xponik je' wili i xq'orarik reh ruum i Eliseo:
Wili i k'isa awak'uun xk'aach wo' chik, i nuchjik.

³⁷Xrilow chi je' re' ixoq xuxuk'aa' i koq riib' chuwach i Eliseo: Chi riij i re' xuq'ahcheej chee k'isa rak'uun chi k'achlik chik xelik cho chupaam i k'isa paat re' re'. Re' i ma' ilooj taj xub'an i Eliseo ruuk' i wi'k

³⁸Eh re' Eliseo xooj wo' chik reje Gilgal, eh ma' k'isiin naq wi'jaleel ar. Eh noq kimolom kiib' taqe i jalal ruq'oral i Dios ruuk' i Eliseo. Eh re' reh je' wili i xuq'or reh i rumoso: Chakoj jino'q i nimlaj xun wach q'aaq', cha yejaa' i k'uxb'al wi'k reh chi neenkik'ux taqe ijalal ruq'oral i Dios, inki.

³⁹Eh jinaj keh i jalal ruq'oral i Dios xooj panch'ahn sik'il i chaaj, juniwal i ch'ahn xureq wilik wach je' inka'yik k'uum i wach. Eh xusik' chaloq xunujisaj chee itz'ihy xuk'am chaloq. Eh noq xk'uloq xuset' paam xukoj i koq chi xilak i k'uxb'al wi'k, eh ma' keht'al taj chib'ih jariik.⁴⁰Noq chaq'inaq chik i k'uxb'al wi'k xpuhkuljik reje keh i jalal ruq'oral i Dios.
Eh noq xkinik'eej i koq kow xkik'er kichii' je' wili i xkiq'or:
Re' hat quch jalal ruq'oral i Dios kojooj kanteesb'al ruuk' i k'uxb'al wili, inki taqe, ma' kota chik xkik'ux.⁴¹Eh re' i Eliseo je' wili xuq'or:
Chak'am taq chaloq i arina, inki.
Eh xuyeew qohoq pan xun, yu'naak chapuhkaaj reje keh i tinamit, inki.
Noq xkik'ux suq chik xkik'raaj i ma' xta chik reet.

⁴²Eh jinaj i winaq xponik ruuk' i Eliseo inchalik Baal-salisa xuk'am reje i juninaq chi tz'a' laj kaxlanwi'k re' ruuk' i sebada, xuk'am wo' reje paruchiim i ak' trigo xusiij reh i Eliseo. Eh re' reh je' wili i xuq'or reh i rumoso chapuhkaaj keh i tinamit reh chi neenkik'ux, inki.

⁴³Eh re' i rumoso je' wili xuq'or:
¿Nik' wach noq neenmanlojik keh i jinaj siento chi winaq taqe i kaxlanwi'k wili? inki.
Re' Eliseo je' wili xuq'or:
Chapuhkaaj keh ruum re' QaJaaw Dios je' wili xuq'or weh: Ruuk' i re' naa kianam kiwa' chi kunchelaal, eh ko wilik i naakiqohxaam, inki, inki.

⁴⁴Eh re' i rumoso xupuhkaaj wo' keh i kaxlanwi'k. Eh xkian kiwa' chi kunchelaal, eh ko wilik xqohxanik, je' rukab' i xuq'or i QaJaaw Dios. Re' Naamán xk'achjik ruuk' raxq'aah wilik chi riij

¹Jinaj i winaq xwihik chaloq Naamán rub'ihnaal kajaaw i k'amal kib'eeh i ru soldado i kireey i aj Siria, q'e' inajawjik wach ruum i ru reey. Eh re' Naamán xtoob'jik ruum i Dios reh chi xelik korik ruuk' i q'aq'inik xub'an chi kiko'ljiik i aj Siria. Re' winaq re' re' kow riib' chi q'aq'inik, xa re' la' tolin rax q'aah i riij.

²Eh pan jinaj q'iij noq xkian q'aq'inik i aj Israel kuuk' i aj Siria. Re' i aj Siria jinaj i k'isa xq'un xkichop reje xkik'am reje pan kitinamiit xkahnik chi raj pooh i rehk'een i Naamán.

³Pan jinaj q'iij i k'isa xq'un re' re' je' wili i xuq'or reh i rupatroon ixoq:
Wita neenooj i ab'ahiil ar Samaria ruuk' i jalal ruq'oral i Dios nee naq ink'aachjik ruuk' i raxq'aah wilik chi riij, inki.

⁴Re' i Naamán xooj ruuk' i ru reey xuk'utjaaj reh i xq'orarik reh ruum i rehk'een re' i xuq'or i k'isaxq'un xkichop cho Israel.⁵Eh re' kireey i aj Siria je' wili xuq'or reh i Naamán:
Ma' xta reet chi nee tiooj, re' hin neenutz'ihb'aaj reje jino'q ruhuuj i kireey i aj Israel.
Re' i Naamán xooj wo' hoq, xuk'am reje lajeeb' ru ka'winaq miil i tumiin re' ruuk' i plata, eh waqiib' miil i tumiin re' ruuk' i oro, eh xuk'am wo' reje lajeeb' k'uhl chi itz'ihy.⁶Eh xuk'am reje i huuj reh i kireey i aj Israel je' wili i xutz'ihb'aaj reje chupaam: Noq neemponik panaq'ab' i huuj wili neenanab'eej chi re' hin xintaq'anik reje awuuk' i Naamán q'e' nim rajaawriik inkamanik wuuk'. Eh inwaaj naq chi nee naa k'achrisaj, inki.

⁷Eh noq xrilow wach i huuj i kireey i aj Israel xuxih i ruso' chi riij, je' wili xuq'or: ¿Hin ta chi Dios i hin chi neenuyeew, chi neenwesaj i k'acharik? ¿Chib'ih reet noq i rutaq'aaj cho wuuk' i winaq wili i reey reh chi nee nuk'achrisaj ruuk' i raxq'aah wilik chi riij? Chakoj taq rehtaal chi re' reey re' re' xak'ahchi' rusik'im chi riij nik' wach noq naa ruchaliik chi q'aq'inik wuuk', inki.

⁸Eh re' i Eliseo jalal ruq'oral i Dios xrib'iraj chi re' reey xuweq i ruso' ruum i huuj xuk'ul je' wili i xutaq'aaj ruq'orariik reh: ¿Chib'ih reet noq xa xih aso' chawiij? re' winaq re' re' cha q'or reh chi nee kink'ulik ruq'oreej ayu' reh chi nee runab'eej chi ayu' Israel wilik jinaj i jalal ruq'oral i Dios, inki.

⁹Re' Naamán xooj wo' hoq, xuk'am reje i rukareta je' wo' taqe i rukawayu, eh xpa'lojik i koq chuwach i ru puertahiil i rupaat i Eliseo.¹⁰Eh re' i Eliseo xutaq'aaj jinaj i raj taqareel xuq'or reje reh chi je' wili i naa ruq'orom reh i Naamán: Re' hat koruman chi wuq'uub' pech narojiik aminim awiib' chupaam i nim ha' Jordán reh chi nee tik'aachjik ruuk' i raxq'aah wilik chawiij inki.

¹¹Re' i Naamán xkaqrik xsutinik reje je' wili i xuq'or: Panuk'ux i hin naa reliik cho chi nuk'ulariik i Eliseo re' reh naa rupahqaam i rotob'il i Dios chi nunaah noq xnukapaaj. Eh panuk'ux i hin naa ruye'em i q'ab' chinaah i nuyab'ilaal reh chi naa kiin ruk'achrisam, inki.¹²¿Mi ma' chih wo' naq re' i nim ha' Damasco? ¿Mi ma' q'e' chihooj re' i nim ha' Abana, i nim ha' Farfar, chikiwach i nim ha' wilkeeb' ayu' Israel? ¿Mi ma' xub'an wo' naq re' chi chupaam taqe i nim ha' re' re' xooj numin wiib', eh xink'achjik naq ruuk' i raxq'aah chi wiij? inki i Naamán, kaqrinaq noq xsutinik reje.¹³Eh re' taqe i rumoso i Naamán xkijil i koq kiib' ruuk' je' wili i xkiq'or reh:
Jaaw wita re' i jalal ruq'oral i Dios xat rutaq'aaj chub'anariik jino'q i q'e' k'axik wach. ¿Mi ma' nee naq inooj a'an, re' i ruq'or aweh ma' k'axik taj? ¿Chib'ih reet noq ma' nenooj amin awiib' wuquub'-oq pech chupaam i nim ha' Jordán reh chi nee tik'aachjik? inki taqe.

¹⁴Eh re' i Naamán wuquub' pech wo' xponik rumin riib' chupaam i nim ha' Jordán je' rukab' xq'orarik reh ruum i jalal ruq'oral i Dios, eh xanoq wo' k'aachjik i raxq'aah chi riij xkahnik chi je' chik ruti'jolal k'isa ha'lak'un i ruti'jolal.¹⁵Eh chi riij i re', re' i Naamán ruch'ihil taqe i rumoso xiooj wo' chik parupaat i Eliseo jalal ruq'oral i Dios je' wili xuq'or:
Yu'naak i hin xnunab'eej chi ma' xta chik Dios chinaah i wach ak'al chuwach i wilik ayu' Israel, je' re' noq chak'ul tii jino'q weh akooch naa nuye'em, inki.

¹⁶Re' hin parub'ihnaal i k'achlik Dios i nuq'or aweh chi ma' jaruuj neenuk'ul jino'q i kooch k'ahchi' aq'orom weh, inki.
Re' i Naamán k'ih pech xub'esaj reh i rukooch, xa re' la' re' i Eliseo xama' xraaj ta wo' ruk'ulum.¹⁷Xrilow chi je' re' i Naamán je' wili xuq'or reh:
Wila' je' re' i nupahqaaj otob'il chi chasiij ka'ihq-oq weh ak'al ayu' Israel, reh chi nee nuk'am reje rij kawáyu panutinamiit ruum re' hin ma' naa ta chik nuye'em i numayiij chikiwach i tiyoox, xa chuwach la' chik i k'achlik Dios naa nuye'em i numayiij.¹⁸Xa re' la' nee ta naq i rukuy i numahk i Dios noq nee kinooj chi riij i nureey noq nenooj chi loq'inik chupaam i rupaat dios Rimón. Eh wila' xnuxuk'aa' wiib' i hin chi toob'jiik i nureey nee ta naq i rukuy i numahk i QaJaaw Dios i hin, hin raj kamanoom, inki.

¹⁹Eh je' wili xq'orarik reh ruum i Eliseo neerub'an chi nee tiooj chi suq ak'ux, inki.
Re' Naamán xelik reje. Eh xakomajaa' wo' najt imb'ehik reje,²⁰noq re' Giezi i rumoso i Eliseo je' wili i xuq'or paruk'ux: Re' nupatroon xutaq'aaj reje i Naamán i aj Siria. Eh ma' xuk'ul ta jino'q chib'ih naq jariik i xsiijik kahnoq reh. Re' hin naa wojiik parub'ihnaal i QaJaaw Dios naa wojiik reje chi riij chi jumehq'iil reh chi nee rusiij kahnoq jino'q weh i hin, inki.

²¹Eh re' i Giezi xooj wo' rajimam riib' chi riij i Naamán. Noq xrilow i Naamán chi rajimam riib' i Giezi chi riij xqajik parukareta xooj ruk'ul xupahqaaj reh chi je' wili:
¿Mi ma' xtaj jino'q i ma' holohik taj k'ahchi' taq ak'ulum? inki.

²²Re' i Giezi je' wili xuq'or reh: Re' hin xirutaq'aaj chee nupatroon chi naa nuq'orom aweh chi kiib' taqe jalal ruq'oral i Dios ko ak'un xi ponik ruuk' xi chalik chinaah i yuuq' wilkeeb' wii' i riih rumaam Efraín, xuq'or chaloq chi chayeew keh ixib' miil chi tumiin re' ruuk' i plata, je' wo' hoq i ka'k'uhl chi itz'ihy, inki.

²³Eh re' Naamán je' wili xuq'or:
Chakuy chak'ul i waqiib' miil chi tumiin re' ruuk' i plata, ruch'ihil i ka'k'uhl chi itz'ihy q'e' holohik, inki.
Eh re' Naamán toq' toq' xub'an reh i Giezi chi naa ruk'ulum i tumiin itz'ihy, xumin reje pan koxtaal, eh kiib' i rumoso xutaq'aaj reje xooj kikanaa' xiooj chi peet b'eeh chuwach i Giezi.²⁴Eh xi ponik chinaah i yuuq' re' i Giezi xuk'am keh i koxtaal wilik wii' i tumiin, itz'ihy, reh i kiib' chi moso. Xuchaq taqe reje i rumoso i Naamán. Re' Giezi xuk'am reje parupaat i tumiin, ruch'ihil i ka'k'uhl chi holohaq itz'ihy.²⁵Chi riij i re' xooj wo' chik i Giezi ruuk' i Eliseo re' i rupatroon: Eh xpahqaljik reh ruum i rupatroon chi je' wili:
¿Aha' xat ponik i hat? inki.
Re' i Giezi je' wili i xuq'or: Re' hin amoso ma' aha' ta ximponik, inki.

²⁶Re' Eliseo je' wili xuq'or reh i Giezi:
¿Mi ma' weht'al re' hin noq xqajik chee Naamán chak'ulariik yu'naak ma' re' ta ruq'ijil ruk'ulariik i tumiin je' wo' hoq i holohaq itz'ihy? ¿Ma' ruq'ijil ta wo' ruk'ulariik i ye'aab' tikooj wii' uuva i olivo, je' wo' taqe i tentzun, je' wo' taqe i b'oyax je' wo' taqe i moso?²⁷Ruum chi xak'ul i xuyeew aweh i Naamán re' i rax q'aah wilik naq chi riij i reh, chawiij chik i hat nareliik chaloq. Eh naa wo' reliik cho chikiij taqe awiih aamaam, inki.
Eh noq xelik reje ruuk' i Eliseo i Giezi, tolin rax q'aah chik i riij xasaq reeq' chik riij, xa je' chik rukab' i saq suutz'. Re' i nawaal xub'an i Eliseo ruuk' ikej

¹Pan jinaj q'iij re' taqe i jalal ruq'oral i Dios je' wili xkiq'or reh i Eliseo:
Chawil i ye'aab' wilkooj wii' awuuk' q'e' k'isiin ma' qohruk'am taj.²Chayeew q'ab' qeh chi nee qohooj i wilik wii' i nim ha' Jordán neenqak'am reje ju'jun-oq qachee' eh nenqayejaa' qapaat ar, inki taqe. Eh Re' i Eliseo je' wili i xuq'or:
Neerub'an chi nee taq tiooj, inki.

³Eh jinaj keh i jalal ruq'oral i Dios re' re' je' wili xuq'or reh i Eliseo: Taq chi q'iij, inki.
Ma' xta reet nee taq kinooj chawiij, inki.

⁴Re' Eliseo kuch jalal ruq'oral i Dios xooj wo' chikiij i wilik wii' i nim ha' Jordán. Ar xkitoq'aa' yok'oj chee'.⁵Eh jinaj keh i re' noq k'ahchi' ruyok'om i chee' xelik i rikeej pan q'ab' manlik xponik q'ehb'oq panim ha', xuk'er chii' je' wili xuq'or:
Jaaw re' hin xelik reje panuq'ab' ikej xanaah re' xa nukemeel wo' naq, inki.

⁶Re' Eliseo jalal ruq'oral i Dios xupahqaaj reh chi je' wili: Chak'uhtaaj weh aha' xq'ehb'ik qohoq ikej, inki.
Re' winaq xuk'uhtaaj aha' xq'ehb'ik qohoq. Re' Eliseo xuyok' jinaj i q'ab' chee' xukut qohoq ar xwuktik cho naa ha' ikej.

⁷Re' re' aawikeej cha chop qohoq inki reh i winaq i Eliseo.
Re' winaq xuchop wo' qohoq i rikeej. Re' taqe i aj Israel xkian i q'aq'inik kuuk' i aj Siria

⁸Re' i kireey i aj Siria k'ahchi' chi q'aq'inik kuuk' i aj Israel. Eh xkimol kiib' i ki soldado, xq'orarik keh ruum i k'amal kib'eeh aha' naa kiyejaam i ki-itz'ihy naah paat.⁹Eh re' i Eliseo i jalal ruq'oral i Dios je' wili xutaq'aaj ruq'orariik reh i kireey i aj Israel: Chab'iraj re' hat mat ik'ik reje chupaam i ye'aab' re' re' ruum ar k'ahchi' kojiik k'oloq i ki soldado i aj Siria chi q'aq'inik, inki.¹⁰Re' i kireey i aj Israel xutaq'aaj wo' taqe reje i ru soldado chupaam i b'eeh xuq'or i jalal ruq'oral i Dios je' wili xuq'or keh: Chawik'raaj taq awiib', inki. K'ihpech xkiko'leej kiib' chi je' re' pan kiq'ab' i ki soldado i aj Siria.

¹¹Eh re' i kireey i aj Siria sahchik ruk'ux, xutaq'aaj rumolariik kiwach i kajaaw i ru soldado, je' wili xuq'or keh:
Chaq'or taq weh, ¿Awach taq aweh i hat i xukoj riib' ruuk' i kireey i aj Israel? inki.

¹²Eh jinaj chi kixilak re' je' wili xuq'or:
Qajaaw reey re' hoj ma' jino'q qeh i k'ahchi' rukojom riib' ruuk' i kireey i aj Israel, ar ruuk' wilik i Eliseo jalal ruq'oral i Dios re' reh inq'orik reh i kireey i aj Israel chib'ih inaq'or i hat reey, atoob' ta pan awarb'al neenaq'or, inki.

¹³Re' kireey i aj Siria je' wili i xuq'or keh:
Chapahqaaj taq chaloq aha' wilik i Eliseo taq inaq'or reh chi nee nutaq'aaj ruchopariik, inki.
Noq xq'orarik reh chi Dotán wilik.

¹⁴Re' kireey i aj Siria xutaq'aaj taqe i ruk'ihaal soldado rij kawáyu wilkeeb', je' wo' taqe pan kareta xiooj, je' wo' taqe i xa chi kooq' kiooj, xiooj chupaam aq'ab' re' re', eh xkikotej riij i tinamit Dotán.¹⁵Eh kowahq'eq xwuktik i rumoso i Eliseo jalal ruq'oral i Dios, xooj chi riij i paat. Eh xrilow chi kotimaj riij i tinamit kuum i ki soldado i aj Siria wilik i wilkeeb' rij kawáyu, pan kareta, xrilow chi je' re' xooj wo' chik i koq pampaat je' wili i xuq'or reh i Eliseo:
Jaaw, ¿Chib'ih i naaqa'nam? yu'naak xoj kuxik, inki.

¹⁶Re' jalal ruq'oral i Dios je' wili i xuq'or:
Maayohb'isaj awiib' ruum xiik' naah kik'ihaal i naa rutoob'iniik qeh i hoj chuwach i naa rutoob'iniik kekeh, inki.

¹⁷Eh re' i Eliseo xub'an rutiij je' wili i xuq'or: WaJaaw i nuDios chayeew q'ab' reh i numoso chi nee ril awajaawriik, inki. Eh x-ib'irjik i rutiij, noq xrilow reje i wataq yuuq' i rumoso xrilow chi kotimaj riij chi ruk'ihaal soldado i Eliseo, wilik i wilkeeb' chi riij kawáyu, wilik taqe i wilkeeb' pan kareta ruch'ihil q'aaq'.

¹⁸Noq xa ojik chik keh i chi q'aq'inik i aj Siria ar Dotán, re' Eliseo xub'an rutiij je' wili xuq'or:
Wajaaw nuDios chayeew q'ab' chi kikahnoq chi moywach taqe i aj Siria, inki. Eh re' i QaJaaw Dios xukanaa' wo' chi moywach taqe i aj Siria ma' kota chik xi ilwik.¹⁹Eh je' wili i xq'orarik keh:
Re' taq i hat ma' re' taj i b'eeh wili, ma' re' taj i tinamit wili taq inasik'. Re' hin nee taq ti nuk'am reje ruuk' i winaq k'ahchi' taq asik'im, inki, eh xuk'am wo' taqe reje Samaria.²⁰Noq xi ponik ruum Samaria xub'an rutiij je' wili xuq'or: Yu'naak Jaaw cha teh inaq'kiwach taqe i winaq wili, inki. Eh re' QaJaaw Dios xuteh wo' chik inaq'kiwach xi ilwik wo' chik. Ar xkikoj rehtaal chi pan tinamit Samaria chik wilkeeb'.²¹Eh re' i kireey i aj Israel noq xrilow kiwach i aj Siria xupahqaaj reh i Eliseo chi je' wili:
Hat wajaaw, ¿Mi naa nutaq'aam kikanteesjiik? inki.

²²Re' i Eliseo jalal ruq'oral i Dios je' wili i xuq'or:
¿Mi nataq'aaj kikanteesjiik re'? ¿Mi naakansaj taqe re' i naachop taqe chaloq noq kichalik q'aq'ineel ruuk' i kiq'aslaj ch'ihch' ruuk' i kiflecha? Chayeew la' kiwa' kihaa' nee wo' chik inataq'aaj taqe reje ruuk' i kireey, inki.

²³Eh re' i kireey i aj Israel xub'an jinaj nimlaj ninq'iij xutaq'aaj ruyejeb'jiik i suq laj k'uxb'al wi'k. Eh xkian kiwa' kihaa', eh xutaq'aaj wo' chik taqe ruuk' i kireey ar Siria. Re' reey re' re' ma' kota chik xutaq'aaj i ru soldado chi kijot'ariik i aj Israel chupaam i ye'aab'. Re' i xub'an i Eliseo noq kotjik riij i tinamit Samaria kuum i aj Siria

²⁴Eh koq'uun chik re' i Ben-adad kireey i aj Siria xumol kiwach chu'nchel i ru soldado xoj kikotej riij i tinamit Samaria.²⁵Eh ruum chi kikotem riij i tinamit re' re' xchalik i runimaal wi'jaleel ar ma' kireq ta chik k'uxumb'al keh yohb'aal wach xjohtik tz'aaq i chib'ih jariik xa re' i jinaj chinaah b'uurux xkitoj kajwinaq chi tumiin re' ruuk' i plata. Eh re' i yejaal i jinaj libra i rusaa' paloma, ho'oob' chi tumiin re' ruuk' i plata xkitoj.

²⁶Eh noq re' i kireey i aj Israel ik'ik i rub'an chinaah i tz'aaq' kotimaj wii' riij i tinamit jinaj ixoq xuk'er cho chii' chuq'orariik chi je' wili:
Hat qajaaw reey kinatoob'eej, inki.

²⁷Re' i reey je' wili i xuq'or:
Wila' ma' ti rutoob'eej i QaJaaw Dios ¿Nik' wach noq inakapaaj i hat chi nee tinutob'eej i hin? ¿Nee ta inche nuyeew atrigo ariis uuva i hin? inki.

²⁸¿Chib'ih jariik inak'ul? inki i reey.
Re' ixoq je' wili i xuq'or:
Re' ixoq wili je' wili xuq'or weh:
Qakansaj awak'uun i hat yu'naak neenqak'ux, eh i iqal re' chik i weh neenqachaq'saj nenqak'ux, inki.²⁹Eh chi junwaar chik je' wili i xnuq'or reh: Yu'naak re' chik awak'uun i hat naa qachaq'sam, naa qak'uxum, kinki reh. Eh re' reh xukeb'aa' i rak'uun ma' xuyeew ta chi k'uxarik, inki.

³⁰Noq rib'iraj i kireey i aj Israel i xuq'or ixoq xkaqrik xuweq i ruso' chi riij noq b'ehik i rub'an chinaah i tz'aq. Eh re' taqe i tinamit wilkeeb' ma' najt ta ruuk' xkilow chi rukojom i q'as wach itz'ihy wach ruti'jolal chupaam i runim rooq so'.³¹Re' reey je' wili xuq'or: Xti korik chi ruk'ul chi nee kiruyeew panti' k'axik i QaJaaw Dios wila' ma' xnutaq'aaj ru set'ariik i ralaq i Eliseo rak'uun i Safat, inki.

³²Re' reey xutaq'aaj wo' reje ruk'amariik i Eliseo. Eh re' i Eliseo tzunlik parupaat kuuk' taqe i k'amal b'eeh, xakomajaa' ta wo' imponik i rutaqareel i reey noq re' Eliseo je' wili xuq'or keh i k'amal b'eeh wilik ruuk':
Re' i aj kansoom laj reey xutaq'aaj chee raj taqareel chi naa ruyok'om i walaq, noq neenk'uloq nee taq inatz'ap reje i puerta ma' nee ta taq inakoj chaloq, ruum re' reh xam wo' cho chi riij i ru reey, inki.

³³Eh re' i Eliseo xa kok'utaaj wo' rub'an kuuk' i k'amal b'eeh noq xponik i aj taqareel je' wili i xuq'or reh i Eliseo:
Re' ti' k'axik k'ahchi' qak'ulum wili re' QaJaaw Dios xye'wik cho chi qanaah. Eh, ¿Nik' chik wach noq neenquy-eej chi nee qohrutoob'eej? inki.

¹Eh re' i Eliseo je' wili xuq'or:
Re' hat chab'iraj i ruq'or i QaJaaw Dios chi je' wili: Iqal je' yu' ora panookb'al reh i Samaria re' i wuquub' nimaq lemeta chi arina naa aloq'om ruuk' i jinaj chi tumiin re' ruuk' i plata. Eh re' i ho'lajuuj nimaq lemeta chi sebada naa aloq'om ruuk' i jinaj chi tumiin re' ruuk' i plata, inki.

²Eh re' winaq intowik reh i kireey i aj Israel je' wili xuq'or reh i Eliseo:
Atoob' ta re' i QaJaaw Dios neeruqasaj chee ma' k'isa sebada pan taxaaj ma' nee tan k'ulariik je' rukab' inaq'or, inki.
Re' Eliseo je' wili i xuq'or:
Re' hat naa awilom ruuk' naq'awach i xnuq'or, xa re' la' ma' naa ta ak'uxum aweh, inki.

³Eh kijib' taqe i winaq wilkeeb' panookb'al reh i tinamit tolin rax q'aah i kiij je' wilik xkiq'or chikiwach:
¿Chib'ih reet noq k'ahchi' quy-eem qakimiik ayu'?⁴Wila' xqachop qak'ux chi okik chupaam i tinamit nee qoh kimik ruum i ma' k'isa wi'jaleel wilik ar. Eh wixooj kahnik ayu' xanaa wo' qakimiik. Ruum aj re' i ruk'ul chi neenqachop qak'ux chi okik, taq taq i koq i wilik wii' i ki-itz'ihy naah paat i aj Siria, wila' xkikuy qamahk nee qoh kahnik chi k'achalkooj, wila' ma' xkikuy qamahk nee qoh kikansaj, inki taqe.

⁵Eh noq xokik aq'ab' xiooj wo' hoq i wilik wii' i ki-itz'ihy naah paat i aj Siria. Noq xiooj k'oloq ar, re' taqe aj Siria ma' wilkeeb' ta chik chupaam i ki-itz'ihy naah paat.⁶Re' QaJaaw Dios xuyeew keh i aj Siria chi ib'irjik chupaam i ki-itz'ihy naah paat i choqik inki a'n i ruk'ihaal kareta i ruk'ihaal kawáyu reh q'aq'inik, eh ruk'ihaal soldado. Re' taqe i aj Siria xkikapaaj chi re' i kireey i aj Israel xkian jinaj wach kik'ux kuuk' i kireey i aj heteo i kireey i aj Egipto reh chi xi chalik chi q'aq'inik kuuk'.⁷Ruum i re' xkimol chi elik i aj Siria chupaam aq'ab' re' re', xkiq'eb' kahnoq i ki-itz'ihy naah paat chi korjinaq, je' wo' i kikawayu ruch'ihil i kib'uruux. Xkimol chi elik i keh reh chi xkiko'leej riij i kik'achariik.⁸Eh noq xi ponik i ki-ib' chi aj rax q'aah i wilik wii' i ki-itz'ihy naah paat i aj Siria, xi okik i koq chupaam i jinaj keh itz'ihy naah paat xkik'ux i wi'k ha' xkireq ar. Eh xkik'am i plata, i oro itz'ihy xkireq ar. Xkik'am reje xooj kikehb'aa', eh xi sutinik wo' chik chaloq, xi okik wo' chik i koq chupaam i jinaj itz'ihy naah paat. Eh xkik'am wo' chik chu'nchel ixkireq' ar, xooj wo' chik kikeb'aa'.⁹Eh xkiq'or chikiwach chi je' wili:
Ma' holohik taj i k'ahchi'kooj re' i suq rib'irjiik wili ma' k'ahchi' ta qaq'orom rib'iral keh i qatinamiit, wila' koxquy-eej chi neensaq'ik mahk i neen qa'an. Taq yu'naak qaq'or cho rib'iral chupaam i rupaat i reey, inki taqe.

¹⁰Eh xiooj wo' hoq xi ponik xkik'er reje kichii' chi kiq'orob'jiik taqe i aj cha'joom xkich'ob' rub'ehel je' wili xkiq'or:
Re' hoj, xoj ponik aha' kiyejaam wii' i ki-itz'ihy naah paat i aj Siria, eh ma' awach ta chik jino'q i wilik ar, ma' jino'q chik i nib'irjik ruq'oral. Xa re' chik taqe i kawáyu, i b'uurux, xi kahnik chi b'ak'alkeeb', re' taqe i itz'ihy naah paat xkikanaa' chi korjinaq, inki taqe.

¹¹Eh re' taqe i aj cha'joom wilkeeb' panookb'al reh i tinamit, xkik'er reje kichii' chuq'orariik rib'iral keh i wilkeeb' chupaam i paat i rub'an wii' taaq'anik i reey.¹²Eh re' reey xwuktik chaq'ab' je' wili xuq'or keh i kitoob'inik reh:
Re' hin naa taq nuq'orom aweh chib'ih inkaaj kianam qeh i aj Siria. Re' keh keht'al chi kuyuj qawa' qahaa' inqa'an ruum i re' xi elik reje chupaam i ki-itz'ihy naah paat xooj kikeb'aa' kiib' xama' najt taj, reh chi noq nee qoh elik reje i hoj pan tinamit nee qoh kichop chi k'achlik qawach eh neekiokik cho panqatinamiit, inki.

¹³Eh jinaj keh intoob'inik reh i reey je' wili xuq'or reh i reey:
Neerub'an chi neenqataq'aaj ho'oob'-oq i winaq chikiij i ho'oob' chi kawayu wilkeeb' ayu' panqatinamiit reh chi nenooj kilow chib'ih i k'ahchi' keeb' i aj Siria. Wila' xi kanteesjik wo' chaloq xama' xta wo' chik neenquchej, xanaa wo' kooj rukuxiik kikansam i hoj ayu' panqatinamiit, inki.

¹⁴Eh xkisik' wach i kiib' chi kawayu, i kiib' chi kareta. Re' reey je' wili i xuq'or reje keh: Hiy taq chawilow nik' wach noq wilik i ki-itz'ihy naah paat i aj Siria, inki.¹⁵Re' taqe i aj taqareel xiooj wo' hoq korehtaal xi ponik chi chii' i nim ha' Jordán. Eh Noq ojik inki a'n xkilow chi jinaj b'eeh kutulkeeb' i kiso' i chib'ih keh xkiq'eb' noq xkimol chi elik. Re' taqe i raj taqareel i reey xi sutinik wo' chik chaloq xk'ulik kik'utjaaj reh i reey i xponik kilow.¹⁶Re' i tinamit xi okik chupaam i ki-itz'ihy naah paat i aj Siria chuq'uchariik i xkikanaa' kahnoq. Xooj wo' eloq wach i xuq'or chee QaJaaw: Re' i wuquub' nimaq lemeta chi arina xkiloq' wo' ruuk' i xa jinaj chi tumiin re' ruuk' i plata, eh re' i ho'lajuuj i nimaq lemeta chi sebada xkiloq' wo' ruuk' i jinaj chi tumiin re' ruuk' i plata.

¹⁷Re' i kireey i aj Israel xuq'or reh i winaq intowik reh chi naa rokiik chi cha'jinik panookb'al reh i tinamit, xa re' la' xch'eyarik paam kuum i tinamit, eh ar xkimik, xk'ularik wo' hoq je' wo' rukab' i xuq'or i QaJaaw ruuk' chii' i Eliseo jalal ruq'oral noq xponik i reey ruuk'.

¹⁸Eh xk'ularik wo' hoq i xuq'or i jalal ruq'oral i Dios reh i reey, re' noq xuq'or chi je' wili: Je' yu' i iqal panookb'al reh i Samaria re' wuquub' nimaq lemeta chi arina naa taq aloq'om ruuk' i jinaj chi tumiin re' ruuk' i plata. Eh re' i ho'lajuuj nimaq lemeta chi sebada naa taq aloq'om ruuk' i jinaj chi tumiin re' ruuk' i plata, inki.¹⁹Re' noq xuq'or intowik reh i reey, chi je' wili: Nee ta ruqasaj chee ma' k'isa sebada i Dios pan taxaaj xama' nee ta wo' naq imb'aan inaq'or, inki. Eh re' Eliseo je' wili i xuq'or reh: Re' hin korik i nuq'or aweh chi naa awilom ruuk' naq'awach chi naa rub'aan i xnuq'or, xa re' la' re' hat ma' naa ta ak'uxum aweh, i nuchjik.²⁰Re' winaq re' re' ma' xuk'ux ta wo' reh, ruum xpitz'arik paam kuum i tinamit panookb'al reh i tinamit, eh ar xkimik. Re' ixoq aj Sunem xrehchaaj wo' chik i chib'ih reh

¹Re' i Eliseo jalal ruq'oral i Dios je' wili i xuq'or reh ixoq re' i xuk'achaa' wo' chik i rak'uun: Re' hat awuch'ihil taqe awach aweh neerub'an chi nee tiooj k'achareel, xa aha' pa' nawaaj, ruum re' i QaJaaw Dios xuq'or chi naa ruye'em chee wi'jaleel chinaah i qatinamiit chuwach i wuquub' haab', inki.²Eh re' ixoq xub'an wo' hoq i xq'orarik reh ruum i jalal ruq'oral i Dios xuyejaa' riib' ruch'ihil i rak'uun noq xooj pan kitinamiit i aj filisteo, ar xponik k'acharoq chuwach i wuquub' haab'.³Eh noq xik'ik i wuquub' haab' re' ixoq xsutinik wo' chik chaloq Israel. Xooj ruq'oreej i reey xponik ru pahq'aaj reh chi naa wo' chik ruye'ariik reh i rupaat ruch'ihil i rak'aal.⁴Re' reey k'utaaj i rub'an ruuk' i Giezi rumoso i Eliseo jalal ruq'oral i Dios. Re' reey je' wili i xuq'or reh i Giezi: Cha a'n otob'il chak'utjaaj weh chu'nchel i ma' ilooj taj xub'an i Eliseo, inki.⁵Re' Giezi manlik k'ahchi' ruk'utjaam reh i reey nik' wach noq xuk'achaa' wo' chik i rak'uun ixoq i Eliseo noq xponik ixoq re' re' chupahqaljiik reh i reey chi naa wo' chik ruye'ariik reh i rupaat, i rak'aal. Eh re' i Giezi je' wili xuq'or: Qajaaw reey re' ixoq wili i nuq'or aweh, re' i rak'uun ruch'ihil i xye'arik wo' chik ruk'achariik ruum i Eliseo, inki.

⁶Eh re' reey xupahqaaj reh ixoq mi korik, re' reh xuk'utjaaj reh i reey i xuk'ul. Re' i reey je' wili i xuq'or reh jinaj intowik reh: Re' i hat naa rojiik aq'asam reh ixoq wili chu'nchel i chib'ih reh rukanaam kahnoq. Naa wo' aq'asam reh i tz'aaq' i wach i rutik xelik chuwach i wuq'uub' haab' noq ma' xwihik ta ayu', inki. Re' i Hazael xokik chi reey ar Siria

⁷Eh chi riij i re', re' Eliseo jalal ruq'oral i Dios xooj pan tinamit Damasco, eh yowaab' i Ben-adad kireey i aj Siria. Eh xkiq'or reh i kireey chi re' i Eliseo wilik ar Damasco.⁸Re' reey je' wili i xuq'or reh i Hazael: Re' hat naa awojiik ruuk' i jalal ruq'oral i Dios, neenak'am reje jino'q rukooch, neenaq'or reh chi nee rupahqaaj reh i Dios mi konee kink'achjik ruuk' i nuyab'ilaal, inki.

⁹Eh re' i Hazael xuk'am reje i kooch re' ruuk' i q'e' holohaq kielik ar Damasco, ka'winaq chi cameyo xi ihqanik reje reh xooj wo' ruuk' i Eliseo. Eh noq xponik ruuk' xupab'aa' riib' chuwach je' wili i xuq'or reh:
Re' Ben-adad awak'uun noq wilik i kireey i aj Siria xirutaq'aaj cha wuuk' reh chi neenaq'or weh mi konaa ruk'aachjiik ruuk' i yab'ilaal wilik wii', inki.

¹⁰Re' i Eliseo jalal ruq'oral i Dios je' wili i xuq'or:
Chaq'or reh chi naa ruk'aachjiik ruuk' i ruyab'ilaal, xa re' la' xuk'uhtaaj chik weh i QaJaaw Dios, chi xanaa wo' rukimiik, inki.

¹¹Eh re' i Eliseo kow xrilow panaq'wach i Hazael, najt xub'an reh chi je' re', re' Hazael ma' suq ta xub'an reh, eh re' Eliseo xokik chi oq'ik.¹²Re' Hazael xupahqaaj reh chi je' wili:
¿Chib'ih reet noq oq'ik i na a'n jaaw? inki.
Re' i Eliseo je' wili i xuq'or:
Ruum re' hin weht'al chik i ti' k'axik naa a'nam keh i wuch aj Israel. Re' hat naa ak'atam i kipaat inkiko'leej wii' kiib', eh naa akansam taqe kik'ijolaq, ruuk' i q'aslaj ch'ihch', naa aq'ojom taqe wataq ab'aj kiha'lak'uun. Eh naa aset'em i kipaam taqe i yowaab' ixoq, inki.

¹³Re' i Hazael je' wili i xuq'or: ¿Chib'ih reet noq neenub'an i je' re'?
Re' hin ma' xta wajaawriik xa je' nukab' jino'q i tz'i', inki.
Re' Eliseo je' wili i xuq'or:
Re' i QaJaaw Dios xuk'uhtaaj weh chi re' hat naa awokiik chi kireey i aj Siria, inki.

¹⁴Eh re' i Hazael xukanaa' kahnoq i Eliseo xooj wo' chik ruuk' i Ben-adad i ru reey. Eh xpahqaljik reh chi je' wili:
¿Chib'ih jariik i xuq'or aweh i Eliseo chi riij i nuyab'ilaal? i nuchjik.
Re' Hazael je' wili i xuq'or:
Re' Eliseo xuq'or weh chi naa ak'aachjiik ruuk' ayab'ilaal, inki.

¹⁵Eh chi junwaar chik re' Hazael xuk'am chaloq jinaj i piim laj itz'ihy xumuhaa' panha', eh xub'ur i wach i ru reey korehtaal xjihq'ik, eh xkimik. Eh re' chik i Hazael xokik chi reyil chi jilow. Re' kireey i aj Judá (2 Cron 21.1-20)

¹⁶Eh hoob'-oq chik haab' rokiik chi reyil i Joram ar Israel re' i rak'uun i Acab, noq xokik chi reyil Judá i Joram rak'uun i Josafat.¹⁷Re' Joram kab'laj ru ka'winaq haab' i wilik reh noq xokik chi reyil. Eh waxiqiib' haab' xwihik chi reyil Jerusaleem.¹⁸Re' Joram xub'an i yiib' wach na'ojb'al, je' rukab' i xkian taqe i xi wihik chi reyil Israel. Eh xub'an kaxáro ruuk' i rixq'uun i Acab, xub'an i yiib' wach na'ojb'al chuwach i QaJaaw Dios.¹⁹Eh re' QaJaaw Dios xama' xusach ta wo' kiwach i riih rumaam Judá, ruum xuketelaaj wach i David i raj kamanoom. Ruum ruq'orom chi jinaj keh i riih rumaam naa rukahniik chi saqum chi juneliik.

²⁰Eh noq xwihik chi reyil i Joram Judá. Re' taqe i aj Edom xkitoq'aa' peleto kuuk' i aj Judá. Eh xkesaj kiib' chi ri'sil i rajaawriik xkipab'aa' kireey pankeh.²¹Re' i reey Joram xooj Zair, ruch'ihil chu'nchel i rukareta. Eh xi wuktik reje chaq'ab' xooj naq kian reh i aj Edom re' i xsutinik riij i tinamit. Xa re' la' chupaam aq'ab' re' re' i Joram ruch'ihil i kib'esanik reh i rukareta xkimol chi elik. Re' taqe i ru soldado xooj kikeb'aa' kiib' chupaam i ki-itz'ihy naah paat.²²Je' re' noq re' taqe i aj Edom xkesaj kiib' chi ri'sil i kajaawriik i aj Judá, xa chupaam wo' q'iij re' re' xub'an i peleto i tinamit Libna, xresaj riib' chi ri'sil i rajaawriik i Judá.

²³Re' taqe i ruk'uliil i xub'an i reey Joram tz'ihb'amaj rehtaliil chupaam taqe i huuj reh i Crónicas. Re' wo' tz'ihb'amaj wii' i rehtaliil i xkian i xi wihik chi reyil Judá.²⁴Eh re' reey Joram xkimik reje ar xkimuq'aa' i muhqinaq wii' taqe i rumaam rati't chupaam i rutinamiit i reey David. Eh re' chik i Ocozías i rak'uun xkahnik chi reyil chi jilow.

²⁵Eh noq kab'laj chik haab' rokiik chi reyil Israel i Joram rak'uun i Acab, re' i Ocozías rak'uun i Joram xokik chi reyil Judá. Re' noq xokik chi reyil Judá i Ocazías (2 Cron 22.1-6)

²⁶Re' Ocazías kiib' ru ka'winaq haab' i wilik reh noq xokik chi reyil. Eh xakiib' wo' haab' xwihik chi kireey i aj Judá ar Jerusaleem. Re' i rutuut Atalía i rub'ihnaal riih rumaam Omri, xwihik chi kireey i aj Israel.²⁷Re' Ocozías xub'an i yiib' wach na'ojb'al chuwach i QaJaaw Dios. Je' rukab' i xkian i riih rumaam i Acab, ruum re' i reey Joram rujii' wo' hoq i Acab.

²⁸Re' Ocozías i kireey i aj Judá, ruch'ihil i Joram rak'uun i Acab kireey i aj Israel xiooj chi q'aq'inik Ramot wilik ar Galaad ruuk' i Hazael i kireey i aj Siria. Xa re' la' re' taqe i aj Siria xkiq'oj i Joram.²⁹Re' Joram xsutinik reje Jezreel reh chi xooj riq'omaaj aha' wilik ixq'ojarik kuum i aj Siria noq xponik chi q'aq'inik Ramot ruuk' i Hazael kireey i aj Siria. Ruum chi ti' wilik i Joram re' i Ocozías xooj rilow ar Jezreel. Re' Jehú xpa'ab'jik chi kireey i aj Israel

¹Re' Eliseo jalal ruq'oral i Dios xuyuq'eej jinaj i k'ijool re' ruuk' taqe i jalal ruq'oral i Dios je' wili xuq'or reh: Chayejaa' awiib' reh chi nee tiooj Ramot wilik ar Galaad, neenak'am reje i jinaj lemeta chi aseite wili.²Eh noq nee ti ponik ar neenasik' i Jehú rak'uun i Josafat riih i Nimsi, nee ti okik i koq wilik wii'. Neenawesaj cho chi kixilak i ruch'ihil neenak'am reje pan tokoom paat.³Eh neenachop chaloq i jinaj lemeta chi aseite neenajalk'iij wach naah je' wili i neenaq'or reh: Je' wili i xuq'or i QaJaaw Dios chi naa kaat nupab'aam chi kireey i aj Israel, tiko'q reh. Eh neenateh i puerta nee ti elik cho chi jumehq'iil ma' nee ta nacham chaa wiib', inki.

⁴Re' k'ijool i jalal ruq'oral i Dios xooj wo' hoq Ramot wilik ar Galaad.⁵Eh noq xponik chupaam i tinamit re' re', xponik taqe rureq i kajaaw i soldado chi kimolom kiib', je' wili i xuq'or keh:
Jaaw kinakuy taq jinaj inwaaj nuq'oreem taq chaxilak, inki.
Re' Jehú je' wili xuq'or: ¿Awach qeh i hoj inawaaj aq'oreem? inki.
Re' i hat kajaaw i soldado tiwaaj kaat nuq'oreem inki i k'ijool.

⁶Eh re' Jehú xooj chupaam jinaj i tokoom paat. Eh re' i k'ijool jalal ruq'oral i Dios xujalk'iij aseite wach naah i Jehú je' wili xuq'or reh:
Re' QaJaaw Dios inqanimaj i hoj, hoj aj Israel xuq'or weh chi naa kaat nupab'aam chi kireey i nutinamiit Israel.⁷Eh xuq'or chi hat naa asachwiik kiwach taqe i riih rumaam i Acab re' i wilik chi taaq'anik cha naah. Re' hat naa aq'ajwiik wach reh i Jezabel i kikanteesjiik ijalal nuq'oral ruch'ihil chu'nchel i numoso xutaq'aaj kikantesjiik.⁸Re' hin naa nusacham kiwach i rak'uun rixq'uun i Acab. Naa rukuxiik nusacham kiwach i winaq wilkeeb' Israel, ma' jino'q chik i naa nukanaam chi k'achalkeeb'.⁹Re' hin naa nusacham kiwach i rak'uun rixq'uun i Acab, je' rukab' noq nusach wach i rak'uun rixq'uun i Jeroboam rak'uun i Nabat. Eh je' wo' rukab' noq nusach kiwach i rak'uun rixq'uun i Baasa rak'uun i Ahías.¹⁰Eh noq naa rukimiik ixoq Jezabel ma' awach ta naa rumuq'aniik reh, re' taqe tz'i' naa kik'uxwiik reh chupaam i ye'aab' Jezreel, inki Dios, inki.
Eh chi riij i re', re' i k'ijool jalal ruq'oral i Dios xuteh chee puerta xooj chi jumehq'iil.¹¹Eh noq xooj wo' chik k'oloq i Jehu kuuk' i ruch'ihil, xkipahqaaj reh chi je' wili:
¿Chib'ih jariik i k'ahchi' ruk'ulariik? ¿Chib'ih iraaj awuuk' i je' ahqaal re' re'? inki taqe.
Re' Jehú je' wili i xuq'or: Re' taq i hat aweht'al taq wach i winaq re' re', eh aweht'al taq nik' wach inq'orik, inki.

¹²Re' taqe ruch'ihil i Jehú je' wili xkiq'or reh: Maa chuk i q'orik chak'utjaaj qeh chu'nchel, inki taqe.
Re' Jehú je' wili xuq'or keh:
Re' i k'ijool re' re' je' wili xuq'or weh: Re' QaJaaw Dios xuq'or weh chi yu'naak naa kaat nupab'aam chi kireey i aj Israel, inki weh.

¹³Re' taqe ruch'ihil i Jehú chi jumehq'iil xkichop chee i ruka'taah i kiso' xkihe' wach ixkaleria tz'aq reh chi xpahik chinaah i Jehú. Eh xkixulej reje paam i kituun, kow xkik'er reje kichii' chuq'orariik chi je' wili: Yu'naak re' chik i Jehú i qareey, inki taqe. Re' i Jehú xukansaj i Joram kireey i aj Israel

¹⁴Re' i Jehú rak'uun i Josafat riih i Nimsi je' wili noq xuyejaa' wach rukanteesjiik i reey Joram. Re' noq re' Joram ruch'ihil taqe ponoq i ru soldado chi q'aq'inik ruuk' Hazael kireey i aj Siria, chi ko'ljiik rij irutinamiit Israel chupaam i tinamit Ramot wili ar Galaad.¹⁵Re' i Joram xooj pan tinamit Jezreel chi riq'oomjiik ixq'ojarik reje reh kuum i aj Siria noq xub'an i q'aq'inik. Eh re' Jehú je' wili i xuq'or keh i ru soldado: Wila' korik chi naawaaj chi re' hin nee kinkahnik taq chi aareey, ma' awach ta taq aweh i nelik reje pan tinamit ayu' Ramot, reh chi ma' awach ta jino'q neenooj q'oroq rib'iral ar Jezreel, inki.¹⁶Eh re' i Jehú jumehq'iil xjohtik reje chi riij i rukawayu xooj pan tinamit Jezreel, ar yoklik pan yokaab' i reey Joram ruum i ruti'kiil. Eh re' i Ocozías i kireey i aj Judá wilik wo' ponoq chi rula'jiik i Joram.¹⁷Eh re' winaq i wilik chinaah najt naah paat incha'jinik i tinamit xrilow reje kiwach i ru soldado i Jehú chi k'ulik inki a'n iloq, je' wili xuq'or reh i reey Joram:
Re' hin k'ahchi' wilom chi xik'uloq taqe i soldado, inki.
Re' i Joram je' wili i xuq'or:
Chataq'aaj reje jino'q ilil reh chi riij i kawáyu neerupahq'aaj keh, mi suq kiil k'uxliis inkik'am chaloq, inki.

¹⁸Re' i aj taqareel xooj wo' rilow chi riij i kawáyu je' wili xuq'or keh:
Re' reey xutaq'aaj cho rupahqaljiik ¿Mi rusuqkiil k'uxliis taq i nak'am chaloq? inki.
Re' Jehú je' wili i xuq'or:
¿Chib'ih inawaaj ree hat mi suq kiil k'uxliis inqak'am chaloq kim chi wiij? inki reh.
Eh re' incha'jinik reh i tinamit je' wili i xuq'or reh i Joram:
Re' winaq i xnutaq'aaj reje, ma' xsutinik ta chik chaloq, inki.

¹⁹Chi riij i re' jinaj wo' chik i xutaq'aaj reje rij kawáyu chi rilariik, noq xponik kuuk' je' wili i xuq'or keh:
Re' reey Joram xutaq'aaj cho rupahqaljiik ¿Mi suq kiil k'uxliis taq i nak'am chaloq? inki.
Eh re' i Jehú je' wili i xuq'or:
¿Chib'ih inawaaj reh i hat mi suq kiil k'uxliis inqak'am chaloq? Kim chi wiij, inki reh.

²⁰Re' incha'jinik reh i tinamit je' wili i ruq'or reh i Joram:
Re' i winaq xnutaq'aaj ruka'peech, ma' xk'ulik ta wo' chik iloq. Re' imb'esanik cho reh i kareta re' ta b'ila' i Jehú re' riih i Nimsi ruum kow chalik i rub'an, ruum xa re' wo' reh kow imb'esanik, inki.

²¹Re' i Joram i kireey i aj Israel je' wili xuq'or: Chayejaa' taq weh i nukareeta, inki.
Eh xkiyejaa' wo' reh i rukareta xooj reje chupaam, re' i Ocazías kireey i aj Judá xooj wo' reje i reh parukareta.
Eh noq xkik'ul i Jehú xiqajik pan kikareta chi kiju'junaal, ar xkik'ul i Jehú chupaam i ruye'aab' i Nabot aj Jezreel.²²Eh noq re' i reey Joram xrilow wach i Jehú xupahqaaj reh chi je' wili:
¿Mi suq kiil k'uxliis i nak'am chaloq? inki.
Re' i Jehú je' wili xuq'or:
¿Nik' wach noq inawaaj chi nee qoh wihik pansuqkiil k'uxliis ruum noq re' i Jezabel atuut k'ahchi' chulooq'jiik taqe i tiyoox re' i k'oyomal, eh kok'ahchi' chi warinik? inki.

²³Xrib'iraj chi je' re' i reey Joram xusutej reje i rukareta xumol naq chi elik, xuk'er reje chii' chuq'orariik reh i Ocazías chi je' wili:
Qajot'ariik iraaj, inki.

²⁴Xa re' la' re' Jehú xutz'ehtaaj reje i Joram ruuk' i ru flecha. Eh noq xuk'ut chi kow manlik xokik chi jurub' i Joram xik'ik rureq i ránima, eh xq'ehb'ik chupaam i rukareta chi kamnaq chik.²⁵Eh re' i Jehú je' wili i xuq'or reh i Bidkar i kajaaw i ru soldado: Chawesaj reje ayu' i kamnaq ar hiy chakut chupaam i ruye'aab' i Nabot aj Jezreel. K'oloq panak'ux noq re' hat re' hin k'ahchi' naq qab'esam i rukareta i Acab re' i rajaaw i Joram. Xuq'or i QaJaaw Dios chi naa ruye'em i ti' k'axik wili chinaah i Acab.²⁶Eh je' wili xuq'or: Re' hin xwilow chi xkikansaj i Nabot, ruch'ihil taqe i rak'uun. Eh re' hin naa kaat nuye'em chutojariik amahk chupaam i ye'aab' wili, re' wili korik ruum re' hin i Dios kinq'orik reh, inki. Eh chak'am reje i ruti'jolal i Joram ar chayeew chupaam i ruye'aab' i Nabot je' rukab' i xuq'or i QaJaaw Dios, inki. Re' Jehú xukansaj i Ocazías kireey i aj Judá (2 Cron 22.7-9)

²⁷Eh noq xrilow chi je' re' i Ocozías kireey i aj Judá xyo'jik xumol chi elik, xooj ar Bet-hagan. Re' i Jehú xtohq'ik rusik'im, je' wili i xuq'or keh i ru soldado: I ruk'ul wo' chi naa taq akansam i Ocozías reh, inki.
Eh xkikut wo' chi flecha wach yuuq' Gur wilik chucheel Ibleam, xa re' la' re' i Ocozías kox b'ehik reje ko ar xponik kimoq Meguido.

²⁸Chi riij i re', re' taqe i kikamanik ruuk' i Ocozías xi k'amwik reje reh i ruti'jolal pan kareta ar Jerusaleem, ar xkimuq'aa' parutinamiit i David re' i muhqinaq naq wii' i rumaam rati't.

²⁹Noq junlaj haab' chik rokiik chi reyil Israel i Joram, rak'uun i Acab xokik chi reyil Judá i Ocozías. Re' rukimiik ixoq Jezabel

³⁰Re' Jehú xooj Jezreel. Eh noq xrib'iraj chi je' re' i Jezabel xriq'omaaj riij inaq'wach xukoj xoyb'al wach naah, eh xuk'uhtaaj cho riib' pan ventana.³¹Noq xokik i koq pan tinamit i Jehú je' wili i xq'orarik reh ruum i Jezabel.
¿Chib'ih i na a'n i hat Zimri kansan reh i ehchan aweh? inki.

³²Re' Jehú xtz'ehtanik johtoq pan ventana je' wili xuq'or:
¿Jarub' taqe wilkeeb' chi wiij?
Xakiib' ixib' taqe i winaq xab'anooj keh chi kapuun taqe xsahchik kik'ux chi rilariik.³³Re' Jehú je' wili xuq'or keh:
Chakut taq cho wach ak'al i Jezabel re' re', inki.
Eh xkikut chaloq ixoq, xkihranik i rukik'eel wach tz'aq, je' wo' chikiij taqe i kawáyu, eh xkiyeq'eb'eej paam ixoq re' re'.³⁴Re' Jehú xokik i koq chub'anariik ruwa' ruhaa'.
Eh koq'uun chik je' wili i xuq'or:
Yu'naak hiy taq chamuq'aa' i yiib' wach ixoq re' re'. Neerub'an chi nee taq i namuq'aa' xa ruum chi rixq'uun jinaj i reey, inki.

³⁵Eh noq xiooj k'oloq chi rumuq'ub'jiik ma' manlik ta chik wach noq xponik kireq ach wo' re' i rub'aqil i naah, i rooq, i q'ab', xponik kireq.³⁶Eh noq xi sutinik reje i winaq xponik kiq'or reh i Jehú. Re' Jehún je' wili i xuq'or:
Re' xk'ularik wili re' wo' ruq'orom chee QaJaaw Dios ruuk' chii' i jalal ruq'oral Elías rub'ihnaal aj ar Tisbe, noq xuq'or chi je' wili: Re' i Jezabel re' taqe i tz'i' naa ruk'uxwiik reh i ruti'jolal chupaam i ye'aab' Jezreel.³⁷Re' i ruti'jolal i Jezabel naa rukahniik chi xa je' chik rusaa' chikop chinaah i wach ak'al chupaam i ye'aab' Jezreel. Korehtaal ma' naa ta chik runaab'jiik wach reh chi ma' awach ta neenq'orik reh chi je' wili: Re' wili i ruti'jolal Jezabel, ma' ko'q taj, inki. Re' Jehú xkuxik rukansam i rak'uun i Acab

¹Re' Acab lajeeb' ru kajwinaq i rak'uun xwihik Samaria. Re' Jehú xutz'ihb'aaj reje kihuuj taqe i aj taaq'oom chupaam i tinamit, je' wo' taqe i k'amal b'eeh, je' wo' taqe i q'atal q'orik, wilkeeb' ar, re' taqe i rak'uun i Acab, je' wili xuq'or reje keh:²Re' taq i hat titaaq'anik chikinaah taqe i rak'uun i Acab, je' wo' chikinaah taqe rukawayu, je' wo' chikinaah taqe i rukareta i rutz'a'amb'aal reh q'aq'inik, je' wo' chikinaah i paat i ruko'leej wii' riib'. Eh noq nee imponik taq panaq'ab' huuj wili.³Chasik' taq chaxilak i korik wach ruk'ux, holohik runa'ojb'al, reh chi nee inakoj taq chi jilow i aawajaaw, reh chi nee rub'an i q'aq'inik taq chako'ljiik, inki.

⁴Eh re' keh ma' k'isiin ta xiyo'jik, je' wili xkiq'or chikiwach: ¿Nik' wach noq neenqakuy i q'aq'inik ruuk' i Jehú? ni xata re' reey Joram, ni xata re' i reey Ocozías xkikuy i q'aq'inik ruuk', inki taqe.

⁵Re' inilwik reh i paat imb'aan wii' taaq'anik, re' inilwik reh i tinamit, re' taqe i k'amal b'eeh re' taqe i ki ilwik reh taqe i rak'uun i Acab, je' wili i xkitaq'aaj ruq'orariik reh i Jehú: Re' hoj, hoj awaj kamanoom ma' nee ta nqapab'aa' jino'q chi qareey, eh xa nee wo' inqa an i neenaq'or qeh. Eh cha a'n quuk' i ruk'ul cha weh, inki taqe.

⁶Re' i Jehú xutz'ihb'aaj wo' chik reje kihuuj, je' wili i xuq'or reje keh: Wila' korik chi, chi wiij taq wilkaat, eh i kinawaaj taq kiin animam, chayok' taq i kalaq taqe i rak'uun taq aareey Acab, eh je' yu' i iqal nee taq i nak'am cho weh i kinaah ayu' Jezreel, inki.
Eh re' taqe i lajeeb' ru kajwinaq chi rak'uun i Acab ar naq wilkeeb' Samaria kuuk' i nimaq wach kikamaj xk'isanik keh.⁷Eh noq xkik'ul i huuj re' re' taqe i k'amal b'eeh ar Samaria xkichop taqe i lajeeb' ru kajwinaq chi rak'uun i Acab xkuxik kiyok'om i ralaq. Eh xkiham pantaq chakach i kinaah, xkitaq'aaj reje reh i Jehú ar Jezreel.⁸Eh jinaj i aj taqareel xooj k'oloq ruuk' i Jehú je' wili xuq'or reh:
Xik'uloq i xi k'amwik cho reh i kinaah taqe i rak'uun i reey Acab, inki.
Re' Jehú je' wili xuq'or:
Ka'tuhb' taq chawesaj nee taq i nayeew panookb'al reh i tinamit, ar taq nee nakanaa' reh iqal, inki.

⁹Eh chi junwaar xooj i Jehú panookb'al, je' wili i xuq'or keh i tinamit: Re' taqe wili xikimik, xa re' la' ma' re' ta taq amahk i hat. Re' la' hin xinyej-anik wach rukanteesjiik i nureey Joram. ¿Awach xkansanik keh taqe i wili noq inaq'or taq i hat?¹⁰Chanab'eej taq chi korik chi chu'nchel i xuq'or i QaJaaw Dios chi naakik'ulum taqe i awach reh i reey Acab xk'ularik chik, ma' xik'ik ta wach ruum re' i QaJaaw Dios xq'orik chaloq ruuk' chii' i jalal ruq'oral Elías rub'ihnaal, inki.

¹¹Eh re' Jehú xutaq'aaj rukanteesjiik taqe i awach reh i Acab wilkeeb' Jezreel. Xutaq'aaj wo' kikanteesjiik chu'nchel i kitaaq'anik ruuk' je' wo' taqe i naah ramigo i Acab, je' wo' taqe i wilkeeb' chi k'amal b'eeh aj tiij, ma' jino'q chik keh i re' xukanaa'.

¹²Re' Jehú xelik reje Jezreel xooj Samaria. Eh xponik Bet-equed re' wilkeeb' wii' cha'jen chikop.¹³Ar xureq taqe i ras ruchaaq' i Ocozías i xwihik cho chi kireey i aj Judá, re' Jehú xupahqaaj keh chi je' wili:
¿Awach taq i hat? inki.
Re' keh je' wili i xkiq'or:
Hoj ras ruchaaq' i Ocozías, ojik inqa'an chi ruye'ariik rusuqkiil kik'ux i rak'uun rixq'uun i reey, je' wo' hoq i rak'uun rixq'uun ixoq reey Jezabel, inki taqe.

¹⁴Re' Jehú je' wili i xuq'or:
Chachop taqe chi k'achlik kiwach, inki.
Eh xkichop wo' chi k'achlik kiwach, ar xkikansaj taqe chi q'aslaj ch'ihch' chucheel i chaam laj jul wilik inset'arik wii' i rismaal kiij i tentzun. Kiib' roxk'ahl chi winaq i xkikansaj ar, ma' jino'q chik keh i xkikanaa'.

¹⁵Eh re' Jehú noq xelik reje ar xuk'ul pamb'eeh i Jonadab rak'uun i Recab. Xuyeew rusuqkiil ruk'ux, je' wili i xuq'or reh:
¿Mi korik wach ak'ux i hat wuuk' i hin, je' rukab' rukorkiil wach i nuk'ux i hin awuuk' i hat? inki.
Re' hin korik wach nuk'ux awuuk', inki i Jonadab.
Wila' je' re' chayeew weh aq'ab' inki i Jehú.
Eh xuyeew wo' hoq i q'ab', eh re' Jehú xuchop chi q'ab' xujosaj parukareta.¹⁶Eh je' wili xuq'or reh:
Taq chi wiij neenawilow noq q'e' ti' inwik'raaj chi ma' nimjik ta chi korik i QaJaaw Dios.
Je' aj re' noq xuk'am reje parukareta ar Samaria.¹⁷Eh noq xi ponik Samaria re' Jehú xukansaj taqe chu'nchel i riih rumaam i Acab, re' taqe i koxikahnik naq chi k'achalkeeb'. Xkuxik taqe rukansam chu'nchel, je' wo' rukab' i ruq'orom chee QaJaaw Dios ruuk' chii' i Elías. Re' Jehú xusach wach i rulooq'jiik i tiyoox Baal

¹⁸Re' Jehú xutaq'aaj rumolariik kiwach chu'nchel i tinamit je' wili xuq'or keh: Re' reey Acab xa kisiin xuloq'ej i tiyoox Baal. Eh re' hin naa nuye'em ruloq'il chi korik, inki.¹⁹Eh cha taq'aaj taq rumolariik kiwach i kajaaw i k'amal kib'eeh aj tiij chuwach i Baal. Ma' jino'q nee rukanaa' cho riib' ruum awach i neenkahnik chaloq neenkanteesjik. Re' hin jinaj i nimlaj mayiij naa nuye'em chuwach i Baal, inki.
Xanaah re' Jehú xa b'amb'al i rub'an keh, xa re' xraaj chi xukansaj taqe chu'nchel i kiloq'inik reh i Baal.²⁰Ruum i re' xuq'or chi naa rub'aan jinaj i nimlaj ninq'iij ye'b'al ruloq'il i Baal, eh xb'aan wo' hoq.²¹Re' Jehú xutaq'aaj i rutaq'areel chupaam i ye'aab' Israel reh i rumolariik kiwach. Eh chu'nchel i kiloq'inik reh i Baal xiooj wo' k'oloq chupaam i rupaat i kitiyoox. Ma' jino'q chik i ma' xooj taj, je' re' noq re' i paat inkiloq'ej wii' i Baal xnujik chi korik xama' aha' ta chik kiokik.²²Re' Jehú je' wili i xuq'or reh i molwik reh i kiso': Chawesaj chee kiso' reh chi neenkikoj noq inki a'n kamanik chuwach i Baal, inki.
Re' i molwik reh itz'ihy, xresaj wo' chaloq.²³Eh xokik i koq i Jehú parupaat i tiyoox Baal i ruch'ihil i Nadab. Re' Jahú je' wili i xuq'or keh i kiloq'inik reh i Baal: Re' taq i hat chawik'raaj taq awiib' mo'-oq awach taq chaxilak ayu' inloq'inik reh i k'achlik Dios, xa re' wo' taq i hat i tiloq'inik reh i Baal naa taq awihiik ayu', inki.

²⁴Eh re' taqe i kiloq'inik reh i Baal xi okik i koq parupaat i kitiyoox chi ruq'ahteesjiik i kik'atoj mayiij, re' Jehú xupab'aa' taqe i kajwinaq chi winaq rij paat i koq je' wili i xuq'or keh: Wila' awach jino'q taq aweh i hat nee rukanaa' chi k'achlik jino'q keh i winaq re' re', re' taqe i xnuyeew taq panaq'ab' re' reh naa rukanteesjiik chi jilow, inki.

²⁵Eh noq xkikohlaaj ruq'ahteesjiik i kimayiij re' Jehú je' wili i xuq'or keh i kajwinaq chi kajaaw soldado: Okeen taq i koq kuxoq taq akansam taqe i winaq re' re' ma' jino'q taq chik nee nakanaa' chi k'achlik, inki.
Re' taqe winaq re' re' xkian wo' hoq i xuq'or i Jehú, xi okik i koq parupaat i tiyoox Baal xkuxik kikansam ruuk' i q'aslaj ch'ihch' korehtaal xi ponik chi kansanik chupaam i ye'aab' q'e' looq' chi keh.²⁶Eh xkesaj chaloq taqe i tz'aqoj tiyoox, eh xkik'at.²⁷Xkiyojib'eej i artaal xkiyojib'eej i rupaat i tiyoox Baal, re' ye'aab' re' re' xkikanaa' chi ye'aab' sa'rb'al je' re' xkahnik chi jumpech.

²⁸Re' Jehú je' wili noq xusach wach i tz'aqoj tiyoox Baal ar Israel.²⁹Atoob' ta je' re' i xub'an i Jehú re' reh xama' xukanaa' ta wo' rub'aan taqe i mahk xub'an i reey Jeroboam rak'uun i Nabat. Re' i xk'amwik kib'eeh i aj Israel chub'anariik i mahk. Re' Jehú xama' xresaj ta wo' hoq i k'isa wakax tiyoox oro inkiloq'ej ar Bet-el, ar Dan.

³⁰Eh re' i QaJaaw Dios je' wili i xuq'or cho reh i Jehú: Re' hat xa a'n i holohik chi nuwach xasach kiwach i rak'uun i riih rumaam i Acab, je' rukab' inwaaj i hin. Ruum chi je' re' xa a'n re' hin i nuq'or aweh chi re' ju'jun keh awak'uun ju'jun keh awiih i xikin awiih naa kokiik chi reyil Israel korehtaal kiponik parukaaj ch'iht taqe awiih aamaam.

³¹Xa re' la' re' Jehú xama' xub'an ta wo' chi korik i ruq'or i ruk'uhb'aal i Dios re' i qaDios i hoj, hoj aj Israel, xama' xukanaa' ta wo' rub'aan i mahk xub'an i Joram re' i xk'amwik keh pamahk i aj Israel.

³²Eh chupaam taqe i q'iij re' re', re' i QaJaaw Dios xtohq'ik ruch'aqam wach i kiye'aab' i aj Israel. Re' i Hazael xtohq'ik cho rub'anam keh i aj Israel pantaq k'ula't cho reh i ruyuq'ul i kitinamiit.³³Ar xtohq'ik pareelb'aal q'iij reh i nim haa' Jordán, je' wo' i kiye'aab' i riih rumaam Galaad, je' wo' kiye'aab' i riih rumaam Gad, je' wo' kiye'aab' i riih rumaam Rubén, je' wo' kiye'aab' i riih rumaam Manasés. Ar xtohq'ik cho chupaam i tinamit Aroer, i wilik wii' i nim ha' Arnón xponik Galaad, ko ar Basán.

³⁴Eh re' taqe i ruk'uliil i xub'an i reey Jehú ruuk' i rukowiil ruk'ux tz'ihb'amaj rehtaliil chupaam taqe i huuj reh i Crónicas re' wo' tz'ihb'amaj wii' rehtaliil i xkian i xi wihik cho chi reyil Israel.³⁵Eh noq xkimik i Jehú ar xkimuq'aa' Samaria. Eh re' chik i Joacaz i rak'uun xkahnik chi reyil chi jilow.³⁶Re' Jehú waxiqiib' ru ka'winaq haab' xwihik chi reyil chikinaah i aj Israel ar pan tinamit Samaria. Re' Atalía xuq'uch i reyil (2 Cron 22.10—23.21)

¹Noq re' i Atalía i rutuut i reey Ocazías xrib'iraj rib'iral chi xkimik i Ocozías xutaq'aaj rukanteesjiik chu'nchel i rak'uun i reey Ocozías.²Re' i Josaba rixq'uun i reey Joram ranaab' i Ocozías xresaj i Joás re' chaq'b'ees rak'uun i Ocazías chi kixilak i rak'uun i Ocazías i k'ahchi' kikanteesjiik, xukeb'aa' chuwach i Atalía pan warb'al ruch'ihil inq'uninik reh, xa je' chik re' noq ma' xkanteesjik taj i Joás ruum i Atalía.³Re' i Josaba xukeb'aa' i Joás chupaam i rupaat i Dios chuwach i waqiib' haab' nik' najtiil xwihik chi reyil i Atalía chinaah i tinamit.

⁴Eh paruwuuq haab' chik, re' i Joiada i k'amal kib'eeh aj tiij xutaq'aaj kik'amariik i kajaaw soldado, taqe i soldado, i aj cha'joom. Eh noq xi ponik xukoj taqe i koq chupaam i rupaat i Dios. Eh ar xkiyejaa' wach chib'ih i naa kianam, eh xkiq'or i xti korik parub'ihnaal i QaJaaw Dios. Chi riij i re', re' i Joiada xuk'uhtaaj keh i Joás rak'uun i Ocazías.⁵Eh je' wili i xuq'or keh: Re' taq i hat oxch'uq taq naa awesam i soldado re' kib'anik i cha'jinik pan hi'limb'al q'iij, junch'uq taq i naa akojom chi cha'jinik chupaam i paat i rub'an wii' i taaq'anik i reey.⁶Eh junch'uq taq i nee nakoj chi cha'jinik panookb'al reh Shur. Eh re' i junch'uq chik nee taq inakoj chi cha'jinik chi junsuut i kiye'aab' i soldado, chi je' re' nee taq i naa a'n rucha'jaljiik i paat imb'aan wii' i taaq'anik.⁷Eh re' taqe i ka'ch'uq chi soldado ma' naa ta kianam i cha'jinik pan hi'limb'al q'iij naa taq akojom chi cha'jinik reh i rupaat i Dios chucheel i reey Joás.⁸Eh naa taq akojom chi cha'jinik chi junsuut i reey. Eh kichopom kiq'aslaj ch'ihch' chi kiju'junaal. Eh xa awach pa' i naa ruminim i koq riib' chi kixilak naa kikansam. Re' taqe soldado re' re' xa aha' pa' naa rojiik i reey Joás naa kojiik chi riij, inki.

⁹Re' taqe kajaaw soldado xkian wo' hoq i xq'orarik keh ruum i Joiada k'amal kib'eeh aj tiij. Chi kiju'junaal xkichop i kitaaq'anik chinaah taqe i ki soldado. Chi je' taqe kiokik chi cha'jinik chupaam i hi'limb'al q'iij chi je' taqe i kielik chi cha'jinik chupaam i q'iij re' re' xiooj ruuk' i Joiada k'amal kib'eeh aj tiij.¹⁰Eh re' i k'amal kib'eeh aj tiij xuq'asaj keh i kajaaw soldado taqe q'aslaj ch'ihch' nimaq pulato ch'ihch' ko'lb'al iib' re' taqe i molooj parupaat i Dios, re' taqe i xkamanik cho reh i reey David.¹¹Re' taqe i soldado xi kojarik chi cha'jinik parumuuj reje reh i rusak'aaj i rupaat i Dios, eh parumuuj reje reh i rutz'eet i rupaat i Dios. Xikojarik wo' chi cha'jinik chi junsuut i artaal parupaat i Dios. Eh kichopom kiq'aslaj ch'ihch' chi kiju'junaal chi rucha'jaljiik i reey Joás.¹²Eh re' i Joiada xresaj chee Joás rak'uun i reey Ocazías, xukoj i corona wach naah, xkijalk'iij i aseite wach naah xkipab'aa' chi reey xkiyeew pan q'ab' i huuj reh i k'uhb'aal. Eh xkipoq'poteej paam i kiq'ab' xkik'er kichii' chi q'orariik chi je' wili: Najt ta naq neenk'acharik i qareey, inki taqe.

¹³Eh re' i Atalía noq xrib'iraj chi k'erik kichii' i soldado ruch'ihil i tinamit xooj parupaat i Dios i wilkeeb' wii' chu'nchel i re'.¹⁴Re' i Atalía xrilow chi pa'lik i reey wach rooq i paat, je' rukab' i okrinaq taqe wii' i kiokik chi reyil. Eh re' reey Joás wilkeeb' i koq chi junsuut i kajaaw i soldado, je' wo' taqe i kixulinik reh i tuun. K'ahchi' kixulem i kituun, chu'nchel i tinamit xasuq chik kik'ux. Noq xrilow chi je' re' i Atalía xuxih i ruso' xuk'er chii' chuq'orariik chi je' wili: Xinajot' taq, xinajot' taq, inki.

¹⁵Eh re' Joiada k'amal kib'eeh i aj tiij je' wili i xuq'or keh i kajaaw i soldado: Chawesaj taq reje i Atalía chi muuj i rupaat i Dios, eh awach neentahqinik reje reh nee taq inakansaj, inki.
Je' re' xuq'or i Joiada k'amal kib'eeh aj tiij ruum ma' xraaj taj chi xkikansaj i Atalía chupaam i rupaat i Dios.¹⁶Re' taqe i soldado xkichop i Atalía ixoq reey xkiteh reje rub'eeh i ki-ik'ik wii' taqe i wilkeeb' chi riij i kawáyu noq kiokik chupaam i paat imb'aan wii' taaq'anik, eh ar xkikansaj.

¹⁷Eh re' i Joiada wilik i xuyejaa' wach ruuk' i Dios, eh je' wo' ruuk' i reey Joás, je' wo' kuuk' i tinamit. Eh je' wo' hoq i reey wilik wo' xuyejaa' wach kuuk' i tinamit, xuq'or keh chi naa kikahniik chi rutinamiit i Dios.¹⁸Eh chu'nchel i tinamit xi okik i koq chupaam i rupaat i tiyoox Baal xkikut wach ak'al. Eh xkixereb'eej wo' chu'nchel i artaal, xkixereb'eej wo' wach ak'al i chu'nchel i xatz'aqoj tiyoox. Eh xkikansaj chuwach i artaal i Matán re' k'amal b'eeh aj tiij chuwach i Baal. Re' i Joiada i k'amal kib'eeh aj tiij xukoj taqe i soldado chi cha'jaljiik i rupaat i Dios.¹⁹Eh re' i Joiada ruch'ihil taqe i k'amal b'eeh ruch'ihil taqe i kajaaw i soldado ruch'ihil chu'nchel i tinamit xkesaj reje reey Joás parupaat i Dios ar ki-ik'ik reje i kiokik wii' i soldado noq xkik'am i koq chupaam i paat i rub'an wii' i taaq'anik i reey ar xkitzunaa' i reey Joás paruye'aab'.²⁰Eh chu'nchel i tinamit xsuuqb'ik kik'ux, xi wihik pansuqkiil k'uxliis ruum xkikansaj i Atalía ma' najt ta ruuk' i paat i rub'an wii' i taaq'anik i reey.

²¹Eh re' i Joás wuquub' haab' i wilik reh noq xokik chi reyil ar Judá. Re' noq xokik chi reyil i Judá i Joás (2 Cron 24.1-27)

¹Noq wuq'uub' chik haab' rokiik chi reyil i Jehú Israel. Re' Joás xokik chi reyil Judá. Eh ka'winaq haab' xwihik chi reyil Jerusaleem. Re' rutuut i Joás Sibia i rub'ihnaal aj pan tinamit Beerseba.²Re' reey Joás, re' i holohik laj na'ojb'al xub'an chuwach i QaJaaw Dios, ruum re' i Joiada k'amal kib'eeh aj tiij kojwik runa'ojb'al.³Xa re' la' re' Joás xama' xresaj ta wo' taqe i artaal wilkeeb' chikinaah inajt kinaah yuuq' re' taqe i tinamit xama' xkikanaa' ta wo' ruk'atariik i kimayiij, i ruk'atariik i insensia chinaah taqe i artaal wilkeeb' ar.

⁴Eh pan jinaj q'iij re' Joás je' wili i xuq'or keh i k'amal kib'eeh aj tiij: Re' taq i hat naa taq amolom weh chu'nchel i tumiin ink'amarik cho parupaat i Dios, re' i tumiin inkitoj chi kimayiij i ju'jun, je' wo' hoq i tumiin xan chalik pankik'ux ruye'ariik.⁵Re' taq i hat naa taq ak'ulum i tumiin re' re' cha ju'junaal, eh naa taq rukamaniik aweh chi yejemb'al reh chi korik i rupaat i Dios aha' wilik i yojinaq reh.

⁶Xa re' la' noq ixib' chik ru ka'winaq haab' rokiik chi reyil i Joás, re' taqe i k'amal kib'eeh aj tiij xakomajaa' wo' kiyejaa' i rupaat i Dios aha' naq wilik i korjik iraaj⁷Eh re' reey Joás xutaq'aaj ruk'amariik i Joiada i kajaaw i k'amal kib'eeh aj tiij, je' wo' chu'nchel i k'amal kib'eeh aj tiij, je' wili i xuq'or keh: ¿Chib'ih reet noq xakomajaa' wo' taq inayejaa' i rupaat i Dios aha' wilik i korjik iraaj? Yu'naak ma' re' ta taq chik i hat i naa ak'ulwiik reh i tumiin inkik'am chee tinamit naa la' rukamaniik chi yejemb'al reh chi korik i rupaat i Dios, inki.

⁸Re' taqe i k'amal kib'eeh aj tiij xuk'ul kik'ux chi ma' re' ta chik i keh xik'ulwik reh i tumiin. Eh xuk'ul wo' kik'ux chi ma' re' ta chik i keh xi k'amwik rub'eeh i kamanik reh i ruyejeb'jiik chi korik i rupaat i Dios.

⁹Eh re' i kajaaw i k'amal kib'eeh aj tiij xutaq'aaj ruyejeb'jiik jinaj i kaxoon wilik ruhopil i tz'ab'al naah xuyeew pansak'aaj reh i artaal, re' imb'aan i koq wii' okik parupaat i Dios. Re' taqe i k'amal kib'eeh aj tiij kicha'jinik reh i ookb'al reh i rupaat i Dios inkik'ul i tumiin inkik'am chee tinamit, eh tiklik kiye'em pan kaxoon.¹⁰Eh noq k'ih chik i tumiin wilik chupaam i kaxoon wilik parupaat i Dios inooj i aj tz'ihb' inkamanik ruuk' i reey, ruch'ihil i kajaaw i k'amal kib'eeh aj tiij. Re' keh ki ajlanik reh i tumiin, eh inkimol.¹¹Noq kitz'ihb'aam chik jarub' i tumiin inkimol wach inkiq'asaj reh taqe i k'amal kib'eeh i kamanoom k'ahchi' kiyej-aniik reh chi korik i rupaat i Dios. Eh re' chik i keh kitojwik keh i aj kamanoom, je' wo' taqe i aj sehk.¹²Eh re' wo' keh kitoj wik keh i aj tz'aqool, je' wo' taqe i kisehkanik wach ab'aj. Re' wo' keh kiye'wik i tz'aaq i chee', je' wo' tz'aaq ab'aj xkorjik wii' chi korik i rupaat i Dios.¹³Re' tumiin ink'amarik cho parupaat i Dios ma' inkikoj ta chi yejemb'al reh taqe kulk re' ruuk' i plata ni xata chi yejemb'al xun, ni xata yejemb'al reh i tuun, ni xata yejemb'al jino'q chik i xa chib'ih jariik re' ruuk' i plata i oro.¹⁴Re' tumiin re' re' inkiq'asaj reh taqe ink'amwik kib'eeh i kamanoom xiyej-anik reh chi korik i rupaat i Dios.¹⁵Eh ma' kota inkib'ir riij i tumiin inkisach, ruum korik wach kik'ux taqe i winaq kik'ulwik reh i tumiin i yejemb'al reh chi korik i rupaat i Dios.¹⁶Eh re' i tumiin inkik'am chaloq chi kimayiij i tinamit chi pahqb'al kuyb'al kimahk inkahnik ar, ma' xkiyeew ta pan kaxoon ruum keh i k'amal kib'eeh aj tiij inkamanik.

¹⁷Chupaam taqe i q'iij re' re', re' Hazael kireey i aj Siria xooj chi q'aq'inik pan tinamit Gat, eh xuchop naah, chi riij i re' xooj wo' chi q'aq'inik pan tinamit Jerusaleem.¹⁸Eh re' Joás kireey i aj Judá xumol wach i xkikoj chi loq'oomb'al reh i Dios taqe i reey, re' Josafat, i Joram, i Ocozías, re' rajaaw taqe i rumaam rati't i xi wihik cho chi reyil Judá. Eh re' Joás xumol wo' reje kiwach chu'nchel i oro, i xa chib'ih jariik molooj chupaam i rupaat i Dios, eh parupaat i reey. Chu'nchel i re' xutaq'aaj reje reh i Hazael kireey i aj Siria. Eh re' i Hazael xukanaa' q'aq'inik kuuk' i aj Jerusaleem.

¹⁹Eh re' i ruk'uliil i xub'an i reey Joás tz'ihb'amaj rehtaliil chupaam taqe i huuj reh i Crónicas, re' wo' tz'ihb'amaj wii' rehtaliil i xkian chu'nchel i xi wihik cho chi reyil Judá.²⁰Eh re' taqe i kikamanik ruuk' i reey Joás xkiyejaa' wach nik' wach noq naa kikansam. Eh xkikansaj wo' hoq i reey Joás chupaam i paat wilik Milo re' noq ojik naq i rub'an Sila.²¹Eh re' i Josakar i rak'uun i Simeat, re' Jozabad rak'uun i Somer i nimaq wach kikamaj ruuk' xikansanik reh i reey Joás. Eh ar xkimuq'aa' i muhqinaq taqe cho wii' i rumaam rati't parutinamiit i David. Eh re' chik i Amasías i rak'uun xkahnik chi reyil chi jilow. Re' noq xokik i Joacaz chi reyil ar Israel

¹Noq ixib' chik ru ka'winaq haab' rokiik chi reyil Judá i Joás i rak'uun i Ocazías. Re' i Joacaz i rak'uun i Jehú xokik chi reyil chikinaah i aj Israel ar Samaria. Eh wuqlaj haab' xwihik chi reyil.²Xa re' la' re' i Joacaz xub'an i yiib' wach na'ojb'al chuwach i QaJaaw Dios, je' rukab' i xub'an i Jeroboam i rak'uun i Nabat re' i xminwik keh chub'anariik i mahk i aj Israel. Re' i Joacaz xama' xukanaa' ta wo' rub'anariik i yiib' wach na'ojb'al.³Eh ruum taqe i re' xchalik rujosq'iil i QaJaaw Dios chikinaah i aj Israel. Najt taqe xuyeew chi ri'sil i rajaawriik i Hazael re' kireey i aj Siria, je' wo' chi ri'sil i rajaawriik i Ben-adad i rak'uun.

⁴Re' i reey Joacaz xub'an rutiij chuwach i QaJaaw Dios, eh x-ib'irjik wo' hoq i rutiij ruum xrilow chee Dios i ruti'kiil kik'ux i aj Israel xye'arik ruum i Hazael i kireey i aj Siria.⁵Re' QaJaaw Dios xupab'aa' jinaj i winaq x-esanik keh i aj Israel chi ri'sil i rajaawriik i kireey i aj Siria, reh chi xik'acharik wo' chik pan ki-itz'ihy naah paat chi suq kik'ux, je' rukab' noq xi k'acharik cho pampeet.⁶Atoob' ta suq wo' naq xi wihik, xama' xkikanaa' ta wo' rub'aan i mahk xk'uhtjik kahnoq keh kuum taqe i riih rumaam i Jeroboam, xkian la' i yiib' wach na'ohjb'al chuwach i QaJaaw Dios xama' xkesaj ta wo' hoq i tz'aqoj tiyoox Asera wilik Samaria.

⁷Eh re' i reey Joacaz xama' k'ih ta chik i ru soldado xkahnik xalajeeb' roxk'ahl chik i ru soldado kiooj chi riij i kawáyu, eh ach lajeeb' i rukareta, eh ach lajeeb' miil i ru soldado kiooj chi kooq. Ruum re' taqe i kik'uliil i ru soldado xsacharik kiwach ruum i kireey i aj Siria, xa je' chik rukab' noq inyeq'arik paam i pooq noq xusach kiwach.

⁸Eh re' i ruk'uliil i xub'an, je' wo' hoq i rukowiil reey Joacaz tz'ihb'amaj rehtaliil chupaam taqe i huuj reh i Crónicas, re' wo' tz'ihb'amaj wii' i rehtaliil i xkian chu'nchel i xi wihik cho chi reyil Israel.⁹Re' i reey Joacaz xkimik reje ar xkimuq'aa' Samaria re' i muhqinaq taqe wii' i rumaam rati't. Eh re' chik i Joás rak'uun xokik chi reyil chi jilow. Re' noq xokik i Joás chi reyil Israel

¹⁰Noq wuqlaj ru ka'winaq haab' chik rokiik chi reyil Judá i Joás rak'uun i Ocozías re' Joás jinaj chik rak'uun i Joacaz xokik chi reyil chikinaah i aj Israel ar Samaria. Eh waqlaj haab' xwihik chi reyil.¹¹Eh re' i reey Joás i rak'uun i Joacaz xub'an i yiib' wach na'ojb'al chuwach i QaJaaw Dios je' rukab' i xub'an i Jeroboam rak'uun i Nabat, re' i xminwik keh i pamahk i aj Israel. Re' Joás ma' xukanaa' ta rub'aan i yiib' wach na'ojb'al.

¹²Re' taqe i ruk'uliil i xub'an i reey Joás, eh nik' wach i rukowiil noq xichop ruk'ux chi q'aq'inik ruuk' i Amasías tz'ihb'amaj rehtaliil chupaam taqe i huuj reh i Crónicas, re' wo' tz'ihb'amaj wii' rehtaliil i xkian chu'nchel i xi wihik chi reyil Israel.¹³Re' reey Joás xkimik reje xooj rureq taqe i rumaam rati't. Ar xkimuq'aa' Samaria re' wo' i muhqinaq taqe wii' i xi wihik cho chi reyil Israel, re' chik i Jeroboam xkahnik chi reyil chi jilow. Re' i tz'apaab' wach xuq'or rib'iral i Eliseo, eh re' i rukimiik

¹⁴Re' Eliseo jalal ruq'oral i Dios wilik pa runimaal yab'ilaal xakimik chik reh. Eh re' i Joás i kireey i aj Israel xooj k'oloq chi rilariik, noq xrilow wach xoq'ik je' wili xuq'or reh:
Hat wajaaw, hat wajaaw noq wilkaat, ¿Chib'ih inak'ul? re' hat xat ko'linik reh i qatinamiit Israel, inki.

¹⁵Re' Eliseo je' wili i xuq'or reh i Joás:
Chachop jino'q i kutb'al, eh xachop kiib' ixib'-oq flecha, inki.
Re' i reey ruchop wo' hoq i xq'orarik reh.

¹⁶Eh je' wo' chik wili i xuq'or i Eliseo reh i kireey i aj Israel:
Chachop i flecha, inki, re' reh chuchop wo' hoq i flecha. Eh re' Eliseo xuyeew i q'ab' chinaah i q'ab' i reey.¹⁷Eh je' wili i xuq'or reh:
Chateh reje i ventana wilik reje pareelb'aal q'iij inki.
Noq xuteh i ventana i reey je' wili i xuq'or i Eliseo:
Chakut reje aaflecha, inki.
Noq xukut reje i reey je' wili i xuq'or i Eliseo:
Re' flecha wili rehtaliil chi re' i QaJaaw Dios naa riko'liniik taq aweh. Eh chi naa taq asacham kiwach i aj Siria, ar Afec, inki.

¹⁸Re' Eliseo jalal ruq'oral i Dios, je' wo' chik wili i xuq'or reh i reey Joás:
Chaq'oj paam aak'al ruuk' aaflecha, inki.
Eh re' i reey oxpech xuq'oj paam ak'al ruuk' i flecha, eh xukanaa' wo' chik.¹⁹Re' Eliseo jalal ruq'oral i Dios xkaqrik je' wili xuq'or reh i reey:
Wita xaq'oj paam ak'al ho'pech oon waq pech-oq, naa naq ruk'uxiik asacham kiwach i aj Siria. Raaj i wili xa oxpech xaq'oj paam aak'al xa oxpech naa a'nam keh i aj Siria, inki.

²⁰Re' Eliseo jalal ruq'oral i Dios xkimik reje, eh xkimuq'aa'. Eh chupaam taqe i q'iij re' re' rajlaal haab' kichalik taqe i aj Moab chi i leq' chupaam i kiye'aab' i aj Israel.²¹Eh re' taqe aj Israel xooj kimuq'aa' jinaj i winaq, eh inkilow xk'uloq taqe i aj Moab wilik cho kich'ihch' pan kiq'ab' xkilow chi je' re' i aj Israel xkikut qohoq i kamnaq re' re' chupaam i jul muqlik wii' i Eliseo. Eh noq xqajik i kamnaq chinaah irub'aqil i Eliseo, re' kamnaq xk'aach wo' chik chaloq ruka'peech, eh xpa'lojik johtoq.

²²Re' i Hazael i kireey i aj Siria xub'an ti' k'axik keh i aj Israel nik' najtiil xwihik i Joacaz chi kireey i aj Israel.²³Xa re' la' re' QaJaaw Dios ti' taqe xrik' raaj i aj Israel xuketelaaj kiwach. Ruum i re' ma' xuyeew ta q'ab' chi xsacharik kiwach ruum wilik ruyejaam cho wach chikiij ruuk' i Abraham, ruuk' i Isaac, ruuk' i Jacob. Ma' xukanaa' ta taqe chi kutkeel chi jumpech.

²⁴Eh noq xkimik reje i Hazael i kireey i aj Siria re' chik i Ben-adad i rak'uun xkahnik chi reyil chi jilow.²⁵Eh re' i reey Joás rak'uun i Joacaz xuq'uch wo' chik taqe i k'ih seht chi tinamit reh i reey Ben-adad i rak'uun i Hazael, re' naq ruq'uchum reh panq'aq'inik i Joacaz re' i rajaaw. Re' Joás oxpech xub'an reh i Ben-adad xuq'uch wo' chik taqe i tinamit Israel ruq'uchum naq. Re' noq xokik i Amasías chi reyil Judá (2 Cron 25.1-28)

¹Noq kiib' chik haab' rokiik chi reyil chikinaah i aj Israel i Joás rak'uun i Joacaz. Re' Amasías rak'uun i Joás xokik chi reyil Judá.²Re' Amasías hoob' ru ka'winaq haab' i wilik reh noq xokik chi reyil. Eh b'elejeeb' ru ka'winaq haab' xwihik chi reyil Jerusaleem, re' rutuut Joadán i rub'ihnaal aj Jerusaleem.³Re' Amasías xub'an i holohik laj na'ojb'al chuwach i QaJaaw Dios, xa re' la' ma' xureq ta chi je' rukab' i xub'an i reey David re' i xikin rumaam, xub'an la' wo' hoq i je' rukab' i xub'an i Joás i rajaaw.⁴Xa re' la' re' Amasías xama' xresaj ta wo' taqe i artaal wilkeeb' chikinaah inajt kinaah yuuq'. Re' taqe tinamit xama' xkikanaa' ta wo' ruk'atariik i kimayiij, ruk'atariik i insensia chikinaah taqe i artaal wilkeeb' ar.

⁵Eh noq xokik chi reyil i Amasías, xukansaj taqe i nimaq wach kikamaj re' taqe i xikansanik reh i rajaaw noq xwihik chi reyil.⁶Xa re' la' ma' xukansaj ta taqe i kak'uun i xikansanik reh i rajaaw, xub'an i ruq'or i k'uhb'aal ye'ooj reh i Moisés, re' i xuq'or i QaJaaw Dios chi je' wili: Re' tuutb'ees i ajaab'ees ma' ruk'ul ta chi naa rukanteesjiik ruum i ru mahk i rak'uun. Eh re' ak'uunb'ees ixq'uunb'ees ma' ruk'ul ta chi naa rukanteesjiik ruum i ru mahk i rutuut rajaaw, re' ju'jun ruum wo' i ru mahk naa rukanteesjiik, inki.

⁷Eh re' i Amasías xukansaj taqe i lajeeb' miil chi soldado aj Edom panq'aq'inik wach k'ixkaab' wilik wii' i aatz'aam. Eh xuchop naah i tinamit Sela, Jocteel i rub'ih xukoj, eh je' re' i rub'ihnaal xkahnik chi jumpech.

⁸Re' reey Amasías xutaq'aaj ruq'orariik reh i Joás kireey i aj Israel, chi naa ruchaliik chi q'aq'inik ruuk'. Re' Joás re' re' rak'uun i Joacaz, eh riih i Jehú.⁹Eh re' i Joás i kireey i aj Israel je' wili i xuchaq'weej reje wii' i Amasías kireey i aj Judá: Pan jinaj q'iij juniwal i k'iix wilik ar Líbano, je' wili i xutaq'aaj reje ruq'orariik reh i juniwal chi chee' chakaltee': Chayeew awixq'uun chi rehk'een i wak'uun, inki. Xa re' la' jinaj i josq'laj chikop xik'ik ar xuyeq' parooq i juniwal chi k'iix re' re'.¹⁰Re' hat reey Amasías korik chi xakansaj taqe i aj Edom, ruuk' i re' q'e' nim awach i na a'n awiib'. Re' hin i nuq'or aweh chi tikaan panatinamiit ma' ruk'ul taj chi neenchalik asik' aak'axkiil i hat, eh chi neenchalik asik' ruk'axkiil aatinamiit Judá, inki.

¹¹Xa re' la' re' i Amasías ma' xunimaj taj i xq'orarik reh. Ruum aj re', re' i Joás i kireey i aj Israel xooj chi q'aq'inik ruuk' i Amasías kireey i aj Judá ar Bet-semes wilik ar Judá.¹²Eh re' taqe i aj Judá xb'aan keh kuum i aj Israel, chi kiju'junaal xkimol chi elik chupaam i ki-itz'ihy naah paat.¹³Eh re' Joás kireey i aj Israel xuchop i Amasías i kireey i aj Judá ar Bet-semes, chi riij i re' i Joás ruch'ihil taqe i ru soldado xooj ar Jerusaleem xuk'er i tz'aq kotimaj wii' riij i tinamit ar xutoq'aa' reje i wilik wii' puerta Efraín i b'ih koxponik ruuk' i puerta i wilik pan tz'uk, kiib' siento b'ara chu'nchel i xuk'er.¹⁴Re' i reey Joás xuk'am chu'nchel i oro, i plata, chu'nchel i kulk wilik parupaat i Dios. Eh xuk'am wo' chu'nchel i xa chib'ih jariik chi k'ih taq tz'aaq wilkeeb' chupaam i paat rub'an wii' i taaq'anik i reey. Eh ruk'ihaal i tinamit xuchop taqe reje noq xooj wo' chik pan tinamit Samaria.

¹⁵Eh re' taqe i ruk'uliil i xub'an i reey Joás re' i rukowiil ruuk' q'aq'inik xub'an ruuk' i Amasías kireey i aj Judá tz'ihb'amaj rehtaliil chupaam taqe i huuj reh i Crónicas. Re' wo' tz'ihb'amaj wii' rehtalil chib'ih i xkian i xi wihik cho chi reyil Israel.¹⁶Eh re' i Joás i kireey i aj Israel xkimik reje xooj rureq taqe i rumaam rati't ar xkimuq'aa' Samaria re' wo' xi muhqik wii' i kireey i aj Israel. Eh re' chik i Jeroboam i rak'uun xkahnik chi reyil chi jilow.

¹⁷Re' i Amasías i kireey i aj Judá i rak'uun i Joás, ko ho'lajuuj chik haab' xk'aach noq xkimik i Joás rak'uun i Joacaz. Re' Joás re' re' kireey i aj Israel.¹⁸Re' ruk'uliil i xub'an i Amasías tz'ihb'amaj rehtaliil chupaam taqe huuj reh i Crónicas. Re' wo' tz'ihb'amaj wii' rehtaliil i xkian i xi wihik chi reyil Judá.¹⁹Re' taqe i tinamit xkiyejaa' wach chi naa kikansam i Amasías Jerusaleem. Xrib'iraj chi je' re' i Amasías xumol chi elik chikiwach, eh re' keh xkitaq'eej reje kopan tinamit Laquis, ar xponik kikansaj.²⁰Chi riij i re' xkik'am cho rij kawáyu ar xkimuq'aa' i muqlik taqe wii' i rumaam rati't Jerusaleem parutinamiit i reey David.²¹Eh chu'nchel i tinamit Judá xkipab'aa' chi kireey i Azarías chi jilow i rajaaw i Amasías. Eh waqlaj haab' i wilik reh i Azarías noq xkipab'aa' chi reyil.²²Noq kamnaq chik i rajaaw i Azarías xuyejaa' wo' chik ruka'peech i tinamit Elat xuq'asaj wo' chik keh i aj Judá. Re' noq xokik chi reyil Israel i rukab' Jeroboam

²³Eh ho'lajuuj chik haab' rokiik chi reyil Judá i Amasías rak'uun i Joás, noq re' Jeroboam xokik chi reyil Israel chi jilow i Joás i rajaaw. Eh jinaj i roxk'ahl haab' xwihik chi reyil chikinaah i aj Israel ar Samaria.²⁴Re' i Jeroboam re' re' xub'an taqe i yiib' wach na'ojb'al chuwach i QaJaaw Dios, ma' xukanaa' ta rub'aan i yiib' wach na'ojb'al xub'an i Jeroboam xwihik peet rak'uun i Nabat re' i xminwik keh pamahk i aj Israel.

²⁵Re' i Jeroboam xuyejaa' wo' chik taqe i ruk'ula'tiil i tinamit Israel je' rukab' noq wilik cho pampeet. Ar xutoq'aa' reje Hamat, eh koxponik chi chii' i palaw i wilik ar Arabá, xub'an wo' hoq je' rukab' i xuq'or i qaDios i hoj, hoj aj Israel ruuk' chii' i raj kamanoom Jonás rak'uun i Amitai jalal ruq'oral wilik ar Gat-hefer.²⁶Re' QaJaaw Dios xukoj rehtaal i runimaal ti' k'axik wilkeeb' wii' i aj Israel ma' jino'q chik i xuko'leej riib' chuwach, eh xama' awach ta chik intoob'inik keh.²⁷Re' QaJaaw Dios ma' xuq'or taj chi naa rusacham kiwach chi jumpech i aj Israel. Ruum aj re' xutaq'aaj i Jeroboam rak'uun i Joás chi kiko'ljiik.

²⁸Eh re' taqe iruk'uliil i xub'an i rukab' Jeroboam, je' wo' q'aq'inik xub'an ruuk' i rukowiil i tz'ihb'amaj rehtaliil chupaam taqe i huuj reh i Crónicas. Re' wo' tz'ihb'amaj wii' rehtalil chib'ih i xkian i xi wihik cho chi reyil Israel. Eh tz'ihb'amaj wo' rehtaliil nik' wach noq xkehchaaj wo' chik i tinamit Damasco i aj Israel ruch'ihil i Hamat re' i xkehchaaj naq i aj Judá.²⁹Re' i reey Jeroboam xkimik reje xooj taqe rureq i rumaam rati't. Ar xkimuq'aa' i muq'amaj taqe wii' i kireey i aj Israel. Eh re' chik i Zacarías i rak'uun xokik chi reyil chi jilow. Re' noq xokik i Azarías chi reyil Judá (2 Cron 26.1-3,16-23)

¹Eh wuq'uub' chik ru ka'winaq haab' rokiik chi reyil Israel i Jeroboam noq xokik chi reyil Judá i Azarías rak'uun i Amasías.²Eh re' i Azarías waqlaj haab' i wilik reh noq xokik chi reyil. Eh kab'laj roxk'ahl haab' xwihik chi reyil. Re' i rutuut Jecolías i rub'ihnaal aj pan tinamit Jerusaleem.

³Re' i Azarías re' i holohik laj na'ojb'al xub'an chuwach i QaJaaw Dios, je' rukab' i xub'an i Amasías i rajaaw.⁴Xa re' la' xama' xresaj ta wo' taqe i artaal kilooqjiik wii' i tiyoox chikinaah taqe inajt kinaah yuuq'. Re' taqe i tinamit xama' xkikanaa' ta wo' ruk'atariik i kimayiij, ruk'atariik i insensia ar.⁵Eh re' QaJaaw Dios xuyeew i yab'ilaal chinaah i reey Azarías xnujik chi rax q'aah i riij. Ruum i re' xkesaj pareh parupaat korehtaal xkimik reje. Re' chik i Jotam rak'uun xkahnik chi taaq'anik chinaah i tinamit chi jilow, chupaam i paat i rub'an wii' i taaq'anik.

⁶Re' taqe i ruk'uliil i xub'an i reey Azarías tz'ihb'amaj rehtalil chupaam taqe i huuj reh i Crónicas, re' wo' tz'ihb'amaj wii' rehtalil i xkian taqe i xi wihik cho chi reyil Judá.⁷Re' reey Azarías xkimik reje xooj taqe rureq i rumaam rati't. Eh ar xkimuq'aa' chupaam i rutinamiit i David. Eh re' chik i Jotam i rak'uun xkahnik chi reyil chi jilow. Re' noq xokik i Zacarías chi reyil Israel

⁸Eh waxiqiib' ru ka'winaq haab'rokiik chi reyil Judá i Azarías noq xokik chi reyil Israel i Zacarías rak'uun i Jeroboam. Eh xawaq'iib' wo' poh xwihik chi reyil chikinaah i aj Israel ar Samaria.⁹Re' i reey Zacarías, re' taqe i yiib' wach na'ojb'al xub'an chuwach i QaJaaw Dios, je' rukab' i xkian i rumaam rati't. Eh xama' xukanaa' ta wo' rub'aan taqe i yiib' wach na'ojb'al xub'an i Jeroboam i rak'uun i Nabat re' i xminwik keh panmahk i aj Israel.

¹⁰Eh re' Salum rak'uun i Jabes xuyejaa' wach nik' wach noq naa rukansam i reey Zacarías. Eh ar Ibleam xukansaj chikiwach i rutinamiit re' chik i reh xokik chi reyil chi jilow.

¹¹Re' taqe i ruk'uliil i xub'an i reey Zacarías tz'ihb'amaj rehtalil chupaam taqe i huuj reh i Crónicas, re' wo' tz'ihb'amaj wii' i rehtalil i xkian taqe i xi wihik cho chi reyil Israel.¹²Je' aj wili noq xooj eloq wach i xuq'or chaloq i QaJaaw Dios reh i Jehú, noq xuq'or reh chi je' wili: Re' hat ju'jun keh awak'uun, awiih aamaam naa rokiik chi reyil Israel, korehtaal imponik parukaaj ch'iht i k'acharik, inki. Re' noq xokik i Salum chi reyil Israel

¹³Eh b'elejlaj ru ka'winaq haab' rokiik chi reyil Judá i Uzías, noq xokik chi reyil Israel i Salum. Eh xa jinaj wo' poh xwihik chi reyil chikinaah i aj Israel ar Samaria.¹⁴Re' i Manahem rak'uun i Gadi xelik chaloq Tirsa xooj ar Samaria chi rukanteesjiik i Salum rak'uun i Jabes. Eh noq rukansam chik, re' chik i reh xkahnik chi reyil chi jilow.¹⁵Re' taqe i ruk'uliil i xub'an i reey Salum, eh nik' wach noq xuyejaa' wach rukanteesjiik i reey Zacarías tz'ihb'amaj rehtalil chupaam taqe huuj reh i Crónicas. Re' wo' tz'ihb'amaj wii' rehtalil i xkian i xi wihik cho chi reyil Israel.¹⁶Noq re' Manahem xusach kiwach i wilkeeb' pan tinamit Tifsa xub'an wo' keh i wilkeeb' chi junsuut xponik ko chupaam i tinamit Tirsa. Eh xuyok' kipaam chu'nchel i yowaab' ixoq wilkeeb' ar. Je' re' i xub'an keh ruum ma' xkaaj ta kik'ulum chi kireey. Re' noq xokik i Manahem chi reyil Israel

¹⁷Eh b'elejlaj ru ka'winaq haab' rokiik chi reyil Judá i Azarías noq xokik chi reyil Israel i Manahem, rak'uun i Gadi. Eh lajeeb' haab' xwihik chi reyil chikinaah i aj Israel ar Samaria.¹⁸Eh re' taqe i yiib' wach na'ojb'al xub'an chuwach i QaJaaw Dios. Ma' xukanaa' ta rub'aan i mahk xub'an i Jeroboam rak'uun i Nabat, re' i xminwik keh pamahk i aj Israel.

¹⁹Eh re' Pul kireey i aj Asiria xchalik chi q'aq'inik kuuk' i aj Israel. Re' i reey Manahem xuyeew reh i waq'iib' siento kintaal ruuk' oxk'ahl kintaal chi plata reh chi naa ruye'ariik ruman i rajaawriik chi reyil.²⁰Re' i reey Manahem xumin taqe chupaam i wilik kitumiin ar Israel chi xkiyeew ik'inaq jinaj libra chi plata chi kiju'junaal. Eh chi xkiyeew reh i Pul kireey aj Asiria. Ruum aj re', re' Pul xooj wo' chik parutinamiit ma' xkahnik ta ar Israel.

²¹Re' ruk'uliil i xub'an, eh chu'nchel i xub'an i reey Manahem tz'ihb'amaj rehtalil chupaam taqe i huuj reh i Crónicas. Re' wo' tz'ihb'amaj wii' rehtalil i xkian i xi wihik cho chi reyil Israel.²²Eh noq xkimik reje i reey Manahem re' chik Pekaía i rak'uun xkahnik chi reyil chi jilow. Re' noq xokik i Pekaía chi reyil Israel

²³Eh lajeeb' roxk'ahl haab' chik rokiik chi reyil Judá i Azarías noq xokik chi reyil Israel i Pekaía rak'uun i Manahem. Eh kiib' haab' xwihik chi reyil chikinaah i aj Israel ar Samaria.²⁴Eh xa re' taqe i yiib' wach na'ojb'al xub'an chuwach i QaJaaw Dios. Ma' xukanaa' ta rub'aan taqe i mahk xub'an i Jeroboam rak'uun i Nabat. Re' xminwik keh pamahk i aj Israel.

²⁵Eh re' reey Pekaía jinaj i k'amal kib'eeh i ru soldado Peka rub'ihnaal rak'uun i Remalías xuyejaa' wach rukanteesjiik ruch'ihil i Arie, i Argob, ruch'ihil taqe i lajeeb' roxk'ahl chi winaq aj Galaad. Eh re' Peka ar Samaria xukansaj i reey Pekaía chupaam i paat imb'aan wii' i taaq'anik. Re' chik i reh xkahnik chi reyil Israel chi jilow.

²⁶Re' taqe i ruk'uliil i xub'an i reey Pekaía tz'ihb'amaj rehtalil chupaam taqe i huuj reh i Crónicas. Re' wo' tz'ihb'amaj wii' rehtalil i xkian taqe i xi wihik chi reyil Israel. Re' noq xokik i Peka chi reyil Israel

²⁷Eh kab'laj chik roxk'ahl haab' rokiik chi reyil Judá i Azarías, noq xokik chi reyil Israel i Peka rak'uun i Remalías. Eh juninaq haab' xwihik chi reyil chikinaah i aj Israel ar Samaria.²⁸Xa re' la' re' taqe i yiib' wach na'ojb'al xub'an chuwach i QaJaaw Dios. Xa ma' xukanaa' ta wo' rub'aan taqe i mahk xub'an i Jeroboam rak'uun i Nabat. Re' xminwik keh pamahk i aj Israel.

²⁹Eh noq wilik chi reyil i Peka Israel, re' i Tiglat-pileser kireey i aj Asiria xchalik chi q'aq'inik kuuk' i aj Israel. Eh xub'an keh i tinamit Ijom, Abel-bet-maaca, Janoa, Cedes, Hazor, Galaad, Galilea, eh chu'nchel i ye'aab' kichopom naah taqe riih rumaam Neftalí. Eh re' i tinamit wilkeeb' ar xuk'am taqe reje parutinamiit Asiria.³⁰Eh noq juninaq chik haab' rokiik chi reyil Judá i Jotam rak'uun i Uzías, re' i Oseas rak'uun i Ela xuyejaa' wach rukanteesjiik i reey Peka rak'uun i Remalías. Eh noq rukansam chik re' chik i reh xkahnik chi reyil Israel chi jilow.

³¹Re' taqe i ruk'uliil i xub'an i reey Peka je' wo' chu'nchel i xub'an tz'ihb'amaj rehtalil chupaam taqe i huuj reh i Crónicas. Re' wo' tz'ihb'amaj wii' rehtalil taqe i xkian i xi wihik chi reyil Israel. Re' noq xokik i Jotam chi reyil Judá (2 Cron 27.1-9)

³²Eh kiib' chik haab' rokiik chi reyil Israel i Peka rak'uun i Remalías, noq xokik chi reyil Judá i Jotam rak'uun i Uzías.³³Eh re' i Jotam hoob' ru ka'winaq haab' i wilik reh noq xokik chi reyil, eh waqlaj haab' xwihik chi reyil Jerusaleem. Re' i rutuut i Jotam Jerusa i rub'ih rixq'uun i Sadoc.

³⁴Re' i reey Jotam re' taqe i holohik laj na'ojb'al xub'an chuwach i QaJaaw Dios je' wo' rukab' i xub'an i Uzías i rajaaw.³⁵Xuyejaa' i ru nimlaj puertahiil i rupaat i QaJaaw Dios. Xa re' la' xama' xresaj ta wo' taqe i artaal kilooqjiik wii' i tiyoox chikinaah inajt kinaah yuuq'. Re' taqe tinamit ma' xkikanaa' ta ruk'atariik i mayiij, ruk'atariik i insensia ar.

³⁶Re' taqe i ruk'uliil i xub'an i reey Jotam je' wo' chu'nchel i xub'an tz'ihb'amaj rehtalil chupaam taqe i huuj reh i Crónicas. Re' wo' tz'ihb'amaj wii' i rehtalil taqe i xkian i xi wihik chi reyil Judá.

³⁷Eh noq ko wilik chi reyil i Jotam, re' i QaJaaw Dios xuyeew q'ab' reh i Rezín kireey i aj Siria, ruch'ihil i Peka rak'uun i Remalías kireey i aj Israel chi xi chalik chi q'aq'inik kuuk' i aj Judá.³⁸Eh re' i reey Jotam xkimik reje xooj taqe rureq i rumaam rati't. Ar xkimuq'aa' chupaam i rutinamiit i David xikin cho rumaam. Eh re' chik i Acaz xkahnik chi reyil chi jilow. Re' noq xokik i Acaz chi reyil Judá (2 Cron 28.1-27)

¹Eh wuqlaj chik haab' rokiik chi reyil Israel i Peka rak'uun i Remalías, noq xokik chi reyil ar Judá i Acaz rak'uun i Jotam.²Eh re' i Acaz juninaq haab' i wilik reh noq xokik chi reyil. Eh waqlaj haab' xwihik chi reyil Jerusaleem, xa re' taqe i yiib' wach na'ojb'al xub'an chuwach i QaJaaw Dios, ma' xub'an taj i holohik je' rukab' i xub'an David i xikin cho rumaam.³Re' Acaz xub'an reh i yiib' wach na'ojb'al je' rukab' i xkian i ruch reey xi wihik Israel. Korehtaal xumin taqe i tinamit chi xkik'at chi mayiij i kiha'lak'uun. Je' rukab' i yiib' wach na'ojb'al inki a'n i tinamit xresaj taqe reje i QaJaaw Dios chupaam i ye'aab' xi okik wii' i aj Israel.⁴Eh xkik'at i kimayiij xkik'at i insensia chinaah taqe inajt kinaah yuuq' je' wo' chupaam taqe i rujuleel yuuq', je' wo' chi ri'sil taqe i chee' nimaq rumuuj.⁵Eh re' Rezín kireey i aj Asiria ruch'ihil i Peka i kireey i aj Israel rak'uun i Remalías xi chalik Jerusaleem chi q'aq'inik ruuk' i Acaz, xa re' la' xama' xkian ta wo' reh⁶Eh chupaam i q'iij re' re', re' i kireey i aj Edom, rehchaaj i tinamit Elat xkahnik wo' chik paruyuq'ul i Edom. Eh xresaj taqe reje i aj Judá ar. Re' chik taqe i aj Edom xi chalik chi patinik Elat, eh ar xi kahnik chi jumpech.

⁷Re' i Acaz i kireey i aj Judá xutaq'aaj taqe reje i raj taqareel ruuk' i Tiglat-pileser kireey i aj Asiria je' wili i xuq'or reje reh: Re' hin, hin awaj kamanoom, hin awak'uun noq wilkiin i nupahqaaj otob'il aweh chi kink'oloq ako'leej pan q'ab' i kireey i aj Siria, pan q'ab' i kireey i aj Israel k'ahchi' keeb' chi q'aq'inik wuuk' inki.

⁸Eh re' reey Acaz xuchop reje i plata, i oro wilik parupaat i Dios, je' wo' taqe i k'ih taq tz'aaq wilkeeb' chupaam i paat i rub'an wii' taaq'anik xutaq'aaj rusijiik reh i kireey i aj Asiria.⁹Eh re' i kireey i aj Asiria xub'an wo' ixpahq'aljik reh ruum i reey Acaz. Xub'an wo' hoq i q'aq'inik kuuk' i aj Siria xukansaj i reey Rezín xuchop naah i tinamit Damasco. Eh re' tinamit wilkeeb' ar xuk'am taqe reje pan tinamit Qir.

¹⁰Chi riij i re', re' reey Acaz xooj pan tinamit Damasco chi rilariik i Tiglat-pileser kireey i aj Asiria. Eh noq wilik chik ar Damasco xukoj rehtaal i artaal wilik ar, xuyejaa' jinaj i rehtaliil, eh xutaq'aaj reje reh i Urías k'amal kib'eeh aj tiij reh chi naa ruyejaam jino'q i artaal xti je' re' ruwii'.¹¹Eh re' i Urías xuyejaa' wo' jinaj i artaal xti je' ruwii' i xutaq'aaj rehtaliil i reey Acaz noq wilik ar Damasco. Eh ruyejaam chik i artaal noq xponik wo' chik ar i reey Acaz.

¹²Eh noq ponik parutinamiit Judá i reey Acaz xrilow reje wach i artaal xujil i koq riib' ruuk', eh xuk'at i rumayiij chinaah.¹³Xuk'at i rumayiij, xuyeew wo' chi rumayiij xa chi naq'wach, je' wo' hoq i riis uuva. Eh xujalk'iij wo' chinaah i artaal i rukik'eel i chikop xuq'asaj chi rumayiij k'amb'al riib' panotob'il ruuk' i Dios.

¹⁴Re' reey Acaz xresaj paruye'aab' i artaal q'an ch'ihch' korjinaq wii' wilik reje chuwach i rupaat i QaJaaw Dios, ar chik xuyeew pantz'eet reh i reelb'aal q'iij chucheel i artaal kore' xkorjik. Ar chik xkahnik panyejaal i ak' artaal ruuk' i rupaat i QaJaaw Dios.¹⁵Eh re' reey Acaz je' wili i xuq'or reh i Urías k'amal kib'eeh aj tiij: Re' hat chinaah i nimlaj ak' artaal naa ak'atam i mayiij reh wahq'eq, je' wo' hoq i mayiij xa chi naq'wach reh ixq'eq. Eh ar wo' naa ak'atam i numayiij i hin, je' wo' hoq i numayiij xa chi naq'wach, je' wo' hoq i kik'atoj mayiij i tinamit, je' wo' hoq i kimayiij xa chi naq'wach, naa aye'em chinaah i riis uuva. Naa wo' ajalk'iim chinaah i kikik'eel i chikop ink'atarik chi mayiij. Eh re' artaal korjinaq ruuk' q'an ch'ihch' xa weh i hin pahqb'al reh chib'ih inwaaj i hin, inki.

¹⁶Eh re' i Urías i k'amal kib'eeh aj tiij xub'an wo' chu'nchel i xq'orarik reh ruum i reey Acaz.¹⁷Eh re' reey Acaz xresaj naah mexa taqe i wilkeeb' wii' i kok' ye'aab' ha', je' wo' hoq nimlaj ye'aab' ha', eh xresaj wo' hoq i nimlaj ye'aab' ha' chikinaah taqe i kab'laj chi je' kiwii' b'oyax q'an ch'ihch' taqe korjinaq wii', xa chinaah chik taqe i tusuj ab'aj xuch'ikaa'.¹⁸Eh xresaj wo' hoq i ye'aab' inkamanik naq chi hi'lb'al pan hi'limb'al q'iij. Xutz'ap ookb'al reh i rupaat i Dios inokik naq wii' i reey. Re' reey Acaz je' taqe re' i xub'an reh chi xsuuqb'ik ruk'ux i kireey i aj Asiria.

¹⁹Re' taqe i ruk'u'liil i xub'an i reey Acaz je' wo' chu'nchel i xub'an tz'ihb'amaj rehtaliil chupaam taqe huuj reh i Crónicas. Re' wo' tz'ihb'amaj wii' rehtalil taqe i xkian i xi wihik chi reyil Judá.²⁰Eh re' reey Acaz xkimik reje xooj taqe rureq i rumaam rati't. Ar xkimuq'aa' pan rutinamiit i David. Eh re' chik i Ezequías i rak'uun xkahnik chi reyil chi jilow. Re' ruchopariik naah i tinamit Samaria, re' kichopariik reje i aj Israel

¹Eh kab'laj chik haab' rokiik chi reyil Judá i Acaz noq xokik chi reyil Israel i Oseas rak'uun i Ela. Eh b'elejeeb' haab' xwihik chi reyil chikinaah i aj Israel Samaria.²Xa re' la' re' taqe i yiib' wach na'ojb'al xub'an chuwach i QaJaaw Dios. Atoob' ta ma' q'e' yiib' wach xb'anik i reh ma' xponik ta chi je' rukab' i xkian i xi wihik cho chi reyil Israel pampeet.

³Eh re' Salmanasar i kireey i aj Asiria xooj chi q'aq'inik ruuk' i reey Oseas, xuchop naah i Oseas, eh kahnik chi rumoso chi tojb'al riij i xub'an.⁴Eh pan jinaj q'iij i Salmanasar kireey i aj Asiria xukoj rehtaal chi k'ahchi' rujot'ariik ruum i Oseas chi wilik taqe i raj taqareel xutaq'aaj reje ruuk' i So kireey i aj Egipto. Eh ma' rub'an ta chik i tooj i rub'an naq rajlaal haab'. Ruum aj re', re' Salmanasar xutaq'aaj ruchopariik i Oseas xuyeew pantz'ilom.⁵Chi riij i re', re' i kireey i aj Asiria xooj wo' chik chi q'aq'inik kuuk' i aj Israel. Eh ixib' haab' xub'an i q'aq'inik kuuk' ar Samaria.⁶Eh noq b'elejeeb' chik haab' rokiik chi reyil Israel i Oseas, re' i kireey i aj Asiria xuchop naah i Samaria. Eh xuk'am taqe reje i aj Israel Asiria. Wilik taqe i xuyeew ar Halah, ar Habor, wilik ma' najt ta ruuk' i nim ha' Gozán. Wilik taqe i xuyeew pan kitinamiit i aj Media.

⁷Je' re' i xkik'ul i aj Israel ruum xkian i mahk chuwach i QaJaaw i kiDios re' x-esanik cho keh Egipto, re' wo' x-esanik cho keh chi ri'sil i rajaawriik i reey ar Egipto. Eh xkiyeew ruloq'il taqe i tiyoox.⁸Eh re' taqe i aj Israel xkian i yiib' wach na'ojb'al inki a'n i tokoom tinamit, re' i xresaj taqe reje i QaJaaw Dios chupaam i ye'aab' xi okik wii' i keeh, xkian keh i yiib' wach na'ojb'al je' rukab' xitijik kahnoq wii' kuum i xi wihik cho chi reyil pampeet.

⁹Re' taqe i aj Israel xkian panke'lik i yiib' wach na'ojb'al ma' imponik ta chuwach i QaJaaw Dios. Eh xkiyejaa' i kiye'aab' loq'oomb'al keh taqe i tiyoox chupaam chu'nchel i tinamit, xkiyejaa' chupaam i kok' paat imb'aan wii' i cha'jinik, je' wo' chupaam taqe i tinamit wilik ko'lb'al kiib' chi korik.¹⁰Eh xkiyejaa' kitiyoox rujalwaach i tiyoox Asera, xkiyeew chinaah taqe inajt kinaah yuuq'. Eh xkiyeew wo' chi ri'sil taqe i chee' nimaq rumuuj.¹¹Eh xkik'at i insensia chinaah taqe inajt kinaah yuuq' re' i xkiyejaa' wii' i ye'aab'. Xkian keh je' rukab' i xkian i tinamit xresaj reje i QaJaaw Dios chupaam i ye'aab' xi okik wii' keh, xkian i xiik' naah yib'kiil wach na'ojb'al ruuk' i re' xkijosaj wach i rujosq'iil i QaJaaw Dios.¹²Je' re' noq xkiloq'ej taqe i tiyoox, re' naq i q'orooj keh ruum i QaJaaw Dios chi ma' naa ta kiloq'em.

¹³Re' QaJaaw Dios xuq'il taqe i aj Israel, je' wo' taqe i aj Judá ruuk' kichii' chu'nchel i raj kamanoom i jalal ruq'oral noq xkiq'or chi je' wili: Chakanaa' taq chu'nchel ayiib' wach na'ojb'al, cha a'n taq i ruq'or i ruk'uhb'aal i Dios chak'am wo' taq naah i xat rutijej taq wii'. Cha a'n taq chu'nchel i ruq'or i ruk'uhb'aal, je' rukab' i xutijej taqe cho wii' aamaam awati't, inki taqe.¹⁴Eh re' taqe i aj Israel xama' xkib'iraj ta wo' hoq xq'orarik keh xkikowb'isaj i kinaah, je' wo' rukab' i xkian i kimaam kati't, xama' xkiyeew ta wo' kik'ux ruuk' i QaJaaw Dios.¹⁵Ma' xponik ta panaq' kiwach i ruk'uhb'aal i Dios je' wo' hoq i xuyejaa' cho wach kuuk' i kimaam kati't. Ma' xponik ta panaq'kiwach i ruq'oral i Dios, xkitahqeej taqe i tiyoox xama' xta kiokik wii'. Re' taqe i aj Israel xi kahnik chi xama' xta kiokik wii' xkitijej keh i yiib' wach na'ojb'al inki a'n i tinamit wilkeeb' chi kijunsuut. Re' naq i q'orooj keh ruum i QaJaaw Dios chi ma' naa ta kianam.¹⁶Eh xkiq'eb' chi riij kik'ux i ruk'uhb'aal i QaJaaw i Dios. Eh xkiyejaa' i kiib' i kok' wakax tiyoox, eh xkiyejaa' wo' taqe i tiyoox rujalwaach i tiyoox Asera, xkiloq'ej i tiyoox Baal, je' wo' hoq i q'iij, i poh, taqe i ch'umiil wilkeeb' pan taxaaj.¹⁷Eh xkik'at chi kimayiij i kak'uun kixq'uun xooj kipahqaaj kina'ojb'al kuuk' i aj q'iij, kuuk' i aj war. Re' chik i yiib' wach na'ojb'al xkian chuwach i QaJaaw Dios ruum taqe re' xkijosaj cho wach i rujosq'iil i QaJaaw Dios.

¹⁸Je' aj re' noq re' i QaJaaw Dios ruum i rujosq'iil xresaj taqe reje i aj Israel chupaam i kiye'aab', ach wo' re' i junch'uq chi riih rumaam Judá xkahnik ar.¹⁹Xa re' la' re' taqe i riih rumaam Judá xama' xkian ta wo' hoq i ruq'or i ruk'uhb'aal i QaJaaw i Dios. Xkik'am la' naah i yiib' wach na'ojb'al xkian i kuch aj Israel.²⁰Eh re' i QaJaaw Dios ma' xponik ta panaq'wach i xkian chu'nchel i aj Israel ruum i re' xutaq'aaj chee ti' k'axik chikinaah korehtaal xuq'asaj taqe pan kiq'ab' i nixowanik kiwach, eh xresaj taqe reje pan kiye'aab'.²¹Noq re' i QaJaaw Dios xresaj taqe i aj Israel chi kixilak i riih rumaam David. Re' taqe i aj Israel xkipab'aa' chi kireey i Jeroboam rak'uun i Nabat. Eh re' i Jeroboam xminwik keh chi xkiq'eb' chi riij kik'ux i QaJaaw Dios, eh nimlaj mahk i xkian re' re'.²²Je' re' noq re' taqe i aj Israel xkian keh i yiib' wach na'ojb'al xub'an i reey Jeroboam ma' xkikanaa' ta chik rub'aan i mahk chuwach i QaJaaw Dios.²³Eh noq xooj kuxoq re' i QaJaaw Dios xresaj taqe reje pan kiye'aab' i aj Israel xub'an wo' hoq aha' wilik i ruq'orom cho rib'iral ruuk' kichii' chu'nchel i jalal ruq'oral re' taqe i raj kamanoom. Je' aj re' noq re' taqe i aj Israel xichoparik, xi k'amarik reje Asiria, eh ar xi kahnik chi jumpech. Re' i kireey i aj Asiria xuk'ihaaxb'isaj i tinamit Samaria

²⁴Re' i kireey i aj Asiria xuk'am taqe chaloq ar Israel i aj Babilonia, taqe i aj Cuta, taqe i aj Ava, taqe i aj Hamat, taqe i aj Sefarvaim. Eh ar taqe xuyeew chi patinik chupaam taqe i tinamit wilkeeb' paruyuq'ul i Samaria pan kiye'aab' i aj Israel je' re' noq xi okik chi patinik ar Samaria.²⁵Eh noq xkitoq'aa' patinik ar taqe i tinamit re' re' ma' inkiloq'ej taj i k'achlik Dios. Je' re' noq re' i QaJaaw Dios xutaq'aaj taqe chaloq i kaq b'ahlam kik'ulik kanteesjoq.²⁶Eh je' wili i xponik kiq'or reh i kireey i aj Asiria: Re' i tinamit xak'am taqe reje chi patinik chupaam i tinamit wilkeeb' paruyuq'ul i Samaria ma' keht'al taj nik' wach rulooq'jiik i Dios inki a'n i aj Israel ar. Eh ruum chi ma' nkian taj aha' wilik iraaj i Dios, re' reh k'ahchi' cho rutaq'aam i kaq b'ahlam kik'ulik kanteesjoq, inki taqe.

²⁷Eh re' i kireey i aj Asiria je' wili i xuq'or: Wilik taqe i k'amal kib'eeh aj tiij qak'amam cha yu' neerub'an chi nee taq i nak'am taqe reje ar reh chi nee kik'uhtaaj keh i tinamit re' re' nik' wach rulooq'jiik i Dios imb'aanar, inki.

²⁸Je' aj re' noq jinaj keh i k'amal kib'eeh aj tiij kesam reje Samaria xkitaq'aaj wo' chik cho ar. Eh xokik chi patinik Bet-el. Reh chi xuk'uhtaaj keh i tinamit nik' wach rulooq'jiik i Dios naa kianam.²⁹Xa re' la' re' taqe i ju'jun ch'uq xi chalik pan tokoom tinamit xkiyejaa' kitiyoox chi kiju'junaal aha' xi patinik wii'. Eh ponik kiyeew chupaam i ye'aab' kiyejaam i aj Samaria chikinaah taqe inajt kinaah yuuq'.³⁰Re' i xi chalik Babilonia xkiyejaa' rujalwaach i Sucot-benot, eh re' i xi chalik Cuta xkiyejaa' rujalwaach i Nergal, re' i xi chalik Hamat xkiyejaa' rujalwaach i Asima.³¹Eh re' xi chalik Ava xkiyejaa' i rujalwaach i Nibhaz, je' wo' hoq i Tartac, eh re' taqe i xi chalik Sefarvaim xkik'at i kak'uun kixq'uun chi kimayiij chuwach i Adramelec, eh chuwach i Anamelec re' taqe i kitiyoox.³²Korik inkiloq'ej wo' naq i QaJaaw Dios xa re' la' xa awach inkipab'aa' chi k'amal kib'eeh aj tiij chi kixilak chuk'atariik i kimayiij chupaam i rupaat i kitiyoox, eh chinaah taqe inajt kinaah yuuq'.³³Je' re' noq atoob' ta nkiloq'ej wo' naq i QaJaaw Dios xama' xkikanaa' ta wo' rulooq'jiik i kitiyoox. Ma' xkikanaa' ta rub'aan i okrinaq taqe cho wii' pan kitinamiit xi ehtesjik cho wii'.

³⁴Re' taqe i tinamit re' re' ma' xkikanaa' ta rub'an inki a'n cho najtir. Eh xama' inkiloq'ej ta wo' hoq i QaJaaw Dios. Xa ma' inki a'n ta wo' hoq i ruq'or taqe i ruk'uhb'aal, je' wo' hoq i kitaq'ab'jiik imb'aan. Re' taqe i ruq'or i QaJaaw Dios chi naa kianam i riih rumaam Jacob re' xukoj chi Israel i kib'ihnaal.³⁵Re' noq xuyejaa' cho wach i QaJaaw Dios kuuk' i aj Israel je' wili xuq'or keh: Re' taq i hat ma' naa ta taq aloq'em taqe i tiyoox, ma' naa ta taq aye'em runimaal kiwach. Eh ma' naa ta taq ak'atam amayiij chikiwach.³⁶Re' la' hin naa kiin taq aloq'em ruum re' hin taq aaWaJaaw aaDios xineesanik taq chaaweh Egipto ruuk' i runimaal i wajaawriik, xa re' hin i ruk'ul chi naa taq aye'em runimaal nuwach, chi naa taq aye'em aamayiij chi nuwach.³⁷Eh cha a'n wo' taq juneliik i tinutaq'aaj taq wii', i tinutijeej taq wii', cha a'n taq i ruq'or i nuk'uhb'aal. Eh naa taq a'nam chu'nchel inwaaj i hin je' rukab' i tz'ihb'amaj panhuuj, eh maa loq'ej taq i tiyoox.³⁸Maa nsahchik taq panak'ux i xnuyejaa' taq wach awuuk', maaloq'ej taq i tiyoox.³⁹Xa re' wo' i hin, naa taq ayohleem nuwach ruum hin taq aaWaJaaw aaDios, nee kinko'linik taq aweh pan kiq'ab' i ki-ixowanik taq awach, inki i Dios.

⁴⁰Xa re' la' re' taqe i tinamit re' re' xama' xkian ta wo' hoq i xuq'or i QaJaaw Dios keh i aj Israel, xakok'ahchi' wo' keeb' i kinajtir na'ojb'al.⁴¹Korik noq re' taqe i tinamit re' re' xkiloq'ej wo' naq i QaJaaw Dios, xa re' la' xama' xkikanaa' ta wo' rulooq'jiik i tiyoox. Je' wo' re' i xkian i kak'uun kixq'uun i kiih kimaam, eh xama' xkikanaa' ta wo' rub'aan i xkian chee kimaam kati't. Re' noq xokik i Ezequías chi reyil Judá (2 Cron 29.1-2)

¹Eh ixib' chik haab' rokiik chi reyil Israel i Oseas rak'uun i Ela, noq xokik chi reyil Judá i Ezequías rak'uun i Acaz.²Eh ho'oob' ru ka'winaq haab' i wilik reh noq xokik chi reyil, eh b'elejeeb' ru ka'winaq haab' xwihik chi reyil Jerusaleem. Re' i rutuut i Ezequías Abi i rub'ihnaal rixq'uun i Zacarías.³Eh re' reey Ezequías re' taqe i holohik na'ojb'al xub'an chuwach i QaJaaw Dios. Je' rukab' i xub'an i reey David i xikin rumaam.⁴Re' reey Ezequías xresaj taqe i artaal wilkeeb' chinaah taqe inajt kinaah yuuq' xkuxik rupaxem taqe i tiyoox, resaj wo' i rujalwaach i tiyoox Asera, xuxereb'eej i aaq' ruyejaam chee Moisés ruuk' q'an ch'ihch'. Ruum re' taqe i aj Israel konkik'at naq i insensia chuwach, eh Nehustán i b'ih kikojom i aaq' re' re'.

⁵Re' reey Ezequías xuyeew ruk'ux ruuk' i qaDios i hoj, hoj aj Israel. Eh xa re' wo' hoq i Ezequías korik wach ruk'ux ma' jino'q i kireey i aj Judá wihinaq chaloq, eh ma' jino'q chik i xwihik koq'uun chi je' rukab' i reh.⁶Eh xuchop ruk'ux chunimjiik i QaJaaw Dios ma' nik' ta xukanaa' riib' chi riij, xub'an la' chu'nchel i ruq'or i ruk'uhb'aal, je' rukab' i xukanaa' i QaJaaw Dios reh i Moisés.⁷Ruum aj re' ma' k'isiin ta xtoob'jik ruum i QaJaaw Dios, eh chib'ih rutoq'aa' rub'aan i nelik korik chuwach.
Re' i reey Ezequías ma' xunimaj taj i kireey i aj Asiria, ma' xraaj ta ruye'em riib' chi ri'sil i rajaawriik.⁸Eh xub'an keh i aj filisteo, ar xutoq'aa' reje Gaza, koxponik pank'ula't ruuk' i Judá, xponik i wilkeeb' wii' i kok' paat imb'aan wii' cha'jinik, xponik chupaam i tinamit wilik ko'lb'al riib' chi korik. Re' noq xchoparik nah tinamit Samaria

⁹Eh noq kijib' chik haab' rokiik chi reyil Judá i Ezequías, noq wuq'uub' chik haab' rokiik chi reyil Israel i Oseas rak'uun i Ela. Re' i Salmanasar i kireey i aj Asiria xukotej riij i Samaria, eh xutoq'aa' q'aq'inik ruuk'.¹⁰Eh ixib' haab' xkian i q'aq'inik, waq'iib' haab' chik rokiik chi reyil Judá i Ezequías, b'elejeeb' haab' chik rokiik chi reyil Israel i Oseas, noq choparik naah i Samaria.¹¹Re' kireey i aj Asiria xuchop taqe reje i aj Israel, xuk'am taqe reje parutinamiit, wilik taqe i xuyeew chupaam i ruyuq'ul i Halah i wilik wii' i nim ha' Gozán, wilik taqe i xuyeew chupaam taqe i kitinamiit i aj Media.¹²Je' re' xkik'ul i aj Israel wilkeeb' Samaria ruum ma' xkinimaj taj i QaJaaw Dios i ma' xkian taj i ruyejaam cho wach kuuk'. Eh ma' xkian taj aha' wilik i rukanaam kahnoq ruq'orariik i Moisés raj kamanoom i Dios. Re' i reey Senaquerib xuchop naah i Judá (2 Cron 32.1-19; Isa 36.1-22)

¹³Eh kajlaj haab' chik rokiik chi reyil Judá i Ezequías noq re' i Senaquerib kireey i aj Asiria xutoq'aa' q'aq'inik kuuk' tinamit wilik ko'lb'al kiib' chi korik wilkeeb' ar i Judá, eh xuchop kinaah.¹⁴Eh re' Ezequías i kireey i aj Judá je' wili i xutaq'aaj ruq'orariik reh i kireey i aj Asiria wilik Laquis: Re' hin ma' holohik ta ximb'anik chawach, xa re' la' i nuq'or aweh chi nee ti elik panutinamiit, nee wo' nutoj aweh jarub' i tumiin neenapahqaaj weh, inki.
Eh re' i kireey i aj Asiria xupahqaaj reh i Ezequías chi naa rutaq'aam i kiib' siento kintaal i plata, eh juninaq kintaal i oro.¹⁵Eh re' i reey Ezequías xutaq'aaj wo' reh i kireey i aj Asiria i plata nik' k'ihaal i xureq chupaam i rupaat i QaJaaw, je' wo' hoq i xureq chupaam i paat i rub'an wii' taaq'anik.¹⁶Re' Ezequías xresaj wo' taqe oro rulechaam i koq chuwach taqe i ru puertahiil i rupaat i QaJaaw Dios, xresaj wo' taqe i oro rulechaam i koq chuwach i chopolkeeb' wii' i puerta, xutaq'aaj reh i kireey i aj Asiria.

¹⁷Eh re' i kireey i aj Asiria xutaq'aaj taqe reje Jerusaleem i ixib' chi winaq kajaaw i soldado chi q'aq'inik ruuk' i Ezequías je' wili kib'ihnaal: Tartán, Rebsaris, Rabsaces, eh xutaq'aaj wo' chikiij i k'amal kib'eeh taqe i winaq kapuun. Eh noq xi ponik Jerusaleem ar xi kahnik chupaam i b'eeh kikamanik wii' aj tz'ajool. Re' i ye'aab' re' re' ar inkahnik chi chii' i rooq ha' i nelik cho ruuk' i nimlaj molb'al ha' wilik johtoq ko taxaaj.¹⁸Eh noq xi ponik i xkitaq'aaj naq ruk'amariik i reey Ezequías, ixib' taqe i winaq xi chalik chi q'orob'jiik je' wili i kib'ihnaal: Eliaquim rak'uun i Hilcías incha'jinik reh i paat imb'aan wii' taaq'anik, re' i Sebna i aj tz'ihb', re' i Joa rak'uun i Asaf, k'amal kib'eeh i kimolwik reh i huuj.¹⁹Re' i Rabsaces je' wili i xuq'or keh:
Re' taq i hat je' wili i naa aq'orom reh i reey Ezequías: Je' taqe wili i xutaq'aaj cho ruq'orariik aweh i kireey i aj Asiria ixtinim rajaawriik: ¿Awach uuk' ch'iklik ak'ux?²⁰Re' hat inakapaaj naak, chi ruuk' taqe i holohaq q'orik naa ako'leem awiib' chi nuwach. ¿Mi re' re' inye'wik rukowiil ak'ux noq inakapaaj? ¿Awach inye'wik rukowiil ak'ux chi ma' tiyo'jik ta wuum?²¹Re' hin weht'al chi nayeew ak'ux chi neetirutob'eej i tinamit Egipto. Xa re' la' re' i tinamit Egipto xa je' rukab' jino'q i kaxlanhaaj xa toqik chik reh wila' xakoj chi akarote, wi xayeew awahlil chinaah nentoq neeruhop aq'ab'. Je' re' noq awach i ruyeew ruk'ux ruuk' i kireey i aj Egipto ti' inaruk'ulum.²²Re' taq i hat neena taq inaq'or weh chi nayeew taq ak'ux ruuk' i QaJaaw Dios. ¿Mi ma' aweht'al taq re' hat chi re' i reey Ezequías xkuxik resam taqe i artaal chinaah taqe inajt kinaah yuuq', eh chi xuq'or chi re' taqe i aj Judá i aj Jerusaleem ar naa kiloq'em i Dios chuwach i artaal wilik Jerusaleem?²³Re' hin i kireey i aj Asiria nupahqaaj otob'il aweh chi wilik i naaqayejaam wach awuuk', re' hin neenuyeew aweh kiib'-oq miil i kawáyu, mi nee pa' inareq taqe i hat i neekijohtik chi riij.²⁴Re' hat ma' nee ta nakuy i q'aq'inik ruuk' i rajaaw soldado aj Asiria atoob' ta ma' q'e' ta nim wach. ¿Mi nakapaaj re' hat chi neen kiyeew aweh i aj Egipto aakareta, aakawayu, je' wo' hoq i neekijohtik chi riij i kawáyu?²⁵¿Mi nakapaaj re' hat chi xa panuk'ux xchalik chi xin chalik chi q'aq'inik awuuk' chusachariik wach aatinamiit? Re' hin re' i QaJaaw xq'orik cho weh chi xin chalik chi q'aq'inik awuuk' chi rusachariik wach aatinamiit, inki, tiko'q reh.

²⁶Re' Laquim, re' i Sebna, re' i Joa je' wili ruchaq'weesjiik xkian i Rabsaces aj Asiria:
Inqapahqaaj otob'il aweh chi qoh aq'oreej pan arameo ruum re' hoj inqareq chi riij i q'orik re' re'. Maa qoh aq'oreej pan kiq'oral i aj Judá ruum chu'nchel i tinamit i wilkeeb' cho nah tz'aq k'ahchi' ki-ib'iriniik reh i k'ahchi' aq'orom, inki taqe.

²⁷Eh re' i Robsaces je' wili i xuq'or:
Re' hin ma' xata ruuk' taq aareey, ma' xata awuuk' taq i hat xintaq'ab'jik cho chi k'utaaj. Xintaq'ab'jik la' wo' cho chi k'utaaj kuuk' i tinamit wilkeeb' cho naah tz'aq. Eh naa ruponiik i q'iij chi re' keh, eh chi re' taq i hat naa taq ak'uxum aasaa', eh naa taq awuk'em aawaab' chinaah, inki.

²⁸Eh xpa'lojik johtoq xuk'er chii' chuq'orariik keh i aj Judá pan kiq'oral i aj hebreo chi je' wili: Chab'iraj taq i ruq'or cho chawiij i qareey i hoj aj Asiria re' i reey xti nim rajaawriik.²⁹Je' wili xuq'or chaloq: Mayeew taq awiib' chi jot'arik reh i reey Ezequías re' reh xa ruchuk chi nee taq i rub'an ako'ljiik panuq'ab'.³⁰Wila' re' Ezequías xuq'or taq aweh chi chach'ikaa' taq ak'ux ruuk' i QaJaaw, wixuq'or taq aweh chi je' wili: Xti korik chi re' QaJaaw naa ruko'liniik taq aweh re' reh ma' naa ta ruye'em q'ab' chi re' qatinamiit nee ruchop naah i kireey i aj Asiria, inkoq taq aweh.³¹Maa nimaj taq reh. Re' i qareey i hoj, hoj aj Asiria xutaq'aaj cho ruq'orariik chi wiij chi chaq'asaj taq awiib' reh chak'am taq awiib' panotob'il ruuk', reh nee taq i na a'n rusuqkiil i wach taqe i ru-uuva, i wach taqe i ru higo. Eh nee wo' taq i na a'n ahaa' chupaam taqe i rujulhaa'.³²Eh naa taq kaat nuk'amam reje chupaam i ye'aab' q'e' holohik chuwach aa ye'aab' taq i hat. Re' i nelik wii' i uuva, i trigo, re' i korjik wii' i kaxlanwi'k, i wilik wii' riis uuva. Eh re' i nelik wii' i aseite i nelik wii' i riis kaab', suq taq naa awihiik, ma' naa ta taq akimiik. Xa re' la' ma' nimaj taq reh aajot'ariik neerub'an i reey Ezequías noq nee ruq'or taq aweh chi netaq tiruko'leej i Dios.³³¿Mi wilik jino'q i dios xuko'leej i rutinamiit pan q'ab' i kireey i aj Asiria noq inaq'or taq i hat?³⁴¿Mi wilik kajaawriik i ki dios i aj Hamat, i Arfad? ¿Mi wilik rajaawriik re' i ki dios i aj Serfarvaim, Hena, i aj Iva? ¿Mi xkian ruko'ljiik i tinamit Samaria panuq'ab' i hin?³⁵¿Mi wilik jino'q keh re' dios re' re' xub'an ruko'ljiik i rutinamiit panuq'ab' i hin? ¿Nik' wach noq inakapaaj taq i hat chi re' taq aaWaJaaw aaDios neenko'linik reh i tinamit Jerusaleem panuq'ab' i hin inki i qareey? inki.

³⁶Eh re' taqe i tinamit Judá ma' jino'q chi q'orik xichaq'wik ruum i q'orooj keh ruum i reey Ezequías chi ma' naa ta kichaq'wik.³⁷Eh re' i Eliaquim rak'uun i Hilcías incha'jinik reh i paat imb'aan wii' taaq'anik, ruch'ihil i Sebna i aj tz'ihb' ruch'ihil i Joa rak'uun i Asaf re' i k'amal kib'eeh i kimolwik reh taqe i huuj, xkiweq i kiso' chikiij ruum xtib'ik kik'ux. Eh xiooj ruuk' i reey Ezequías xponik kiq'or reh chib'ih i xuq'or i Rabsaces nim wach winaq aj Asiria. Re' taqe aj Judá xiko'ljik pan q'ab' i Senaquerib (2 Cron 32.20-23; Isa 37.1-38)

¹Eh noq xrib'iraj i xq'orarik reh i reey Ezequías xtib'ik ruk'ux xuweq i ruso' chi riij, eh xukoj i ruq'as wach so'. Eh xooj chupaam i rupaat i Dios.²Eh xutaq'aaj reje i Eliaquim incha'jinik reh i paat imb'aan wii' i taaq'anik, ruch'ihil i Sebna i aj tz'ihb' kuch'ihil taqe k'amal b'eeh i k'amal kib'eeh aj tiij xkikoj reje kiq'as wach so' noq xiooj ruuk' i Isaías jalal ruq'oral i Dios rak'uun i Amoz.³Reh chi xooj kiq'or reh i Isaías chi je' wili: Re' i reey Ezequías je' wili xuq'or: Yu'naak i hoj q'e' ti' qak'ux intz'irik qawach ruum k'ahchi' kitib'isam qak'ux i ki-ixowanik qawach xama' inqakuy ta chik xa je' chik qakab' ixoq noq ach k'isiin ma' ink'ulik ruk'ux ma' xta chik raansil.⁴Re' i kireey i aj Asiria xutaq'aaj chaloq i Rabsaces nim rajaawriik chi rub'ajariik i k'achlik Dios, xrib'iraj wo' naak i QaJaaw re' wo' aaDios i hat, eh nee ta naq i ruyeew cho chi tojariik i ru mahk imb'ajwik reh. Re' hat cha a'n atiij chikiij i qatinamiit nik' chik k'ihaal koxikahnik.

⁵Eh ponik wo' kiq'or reh i Isaías taqe i xuq'or i reey Ezequías.⁶Re' i Isaías je' wili i xuq'or cho keh i raj taqareel i reey Ezequías: Re' taq i hat je' taq wili i cha q'or ponoq reh aareey: Chi re' i QaJaaw Dios je' wili i xuq'or: Maa ruyohb'isaj riib' ruuk' taqe i xkiq'or i raj kamanoom i kireey i aj Asiria.⁷Re' hin naa nuye'em paránima i kireey i aj Asiria chi wilik i naa rib'iram rib'iral ruum i re' naa wo' chik rusutiniik reje parutinamiit. Eh naa nuye'em q'ab' chi ar naa rukanteesjiik ruuk' q'aslaj ch'ihch' inki Dios, inki.

⁸Eh noq xsutinik reje parutinamiit i Asiria i Rabsaces i kajaaw i soldado xub'iraj rib'iral chi ma' xta chik Laquis i ru reey ko ar chik xponik rureq chi q'aq'inik i rub'an kuuk' i aj Libna.⁹Eh re' i Senaquerib i kireey aj Asiria xrib'iraj chi re' i Tirhaca kireey i aj Etiopía xuk'am chaloq, taqe i ru soldado xi chalik chi q'aq'inik ruuk'. Eh xutaq'aaj wo' chik taqe i raj taqareel ruuk' i reey Ezequías je' wili i xuq'or reje keh:¹⁰Re' taq i hat je' taq wili i neenaq'or reh i Ezequías kireey i aj Judá: Re' aaDios i ch'iklik wii' ak'ux xuq'or chi ma' naa ta q'ehb'iik panuq'ab', xa re' la' maa yeew awiib' chi jot'arik ruuk' i ruq'or aweh.¹¹Re' hat aweht'al chik nik' wach i kianam taqe kireey i aj Asiria, aha' i tinamit kiponiik chi q'aq'inik xkuxik kisacham wach. Eh, ¿Nik' wach noq naa ako'leem, awiib' i hat panuq'ab' i hin?¹²Re' taqe i numaam wati't xkisach taqe wach i tinamit Gozán, Harán, Resef, je' wo' taqe i tinamit Edén i xi wihik cho Telasar. ¿Mi xiko'ljik ruum re' i ki dios taqe i tinamit re' re'?¹³¿Mi xwihik kajaawriik chi kiko'ljiik i kireey i aj Hamat. Kireey i aj Arfad, i kireey i aj Sefarvaim, i kireey i aj Hena, kireey i aj Iva? inki reje i Senaquerib.

¹⁴Eh noq xik'ul i huuj keh i raj taqareel i kireey i aj Asiria i reey Ezequías xrilow wach. Chi riij i re' xooj chupaam i rupaat i QaJaaw Dios xuhe' wach i huuj chuwach i QaJaaw.¹⁵Xub'an rutiij je' wili i xuq'or: QaJaaw Dios, qaDios i hoj aj Israel, wilkaat cho chi kixilak i k'achaach i wilik kixiik'. Xa re' wo' hat i Dios wilik awajaawriik chikinaah i nimaq tinamit wilkeeb' sut i wach ak'al. Eh hat xat yej-anik reh i taxaaj ruch'ihil i wach ak'al.¹⁶Chab'iraj i hat QaJaaw Dios, chawil chaloq inki a'n Chab'iraj taqe i q'orik xutaq'aaj cho ruq'orariik weh i Senaquerib. Chu'nchel i q'orik re' re' ab'ajariik i hat QaJaaw Dios k'achalkaat.¹⁷QaJaaw Dios korik wo' hoq noq re' taqe i kireey i aj Asiria, xusach cho kiwach i tinamit, je' wo' hoq i kiye'aab'.¹⁸Eh xk'atarik wo' wach q'aaq' i ki dios, ruum ma' re' ta wo' taqe dios, xachee', xa ab'aj wo' taqe korjinaq wii' xa ruyej-aniik wo' winaq taqe, ruum aj re' xkisach wach.¹⁹Ruum aj re' QaJaaw Dios yu'naak i nupahqaaj aweh chi qoh ako'leej chuwach i rajaawriik i kireey i aj Asiria. Reh chi chu'nchel i tinamit sut i wach ak'al neenkikoj rehtaal chi xa re' wo' hat i jinaj i k'achlik Dios, inki.

²⁰Eh re' i Isaías jalal ruq'oral i Dios rak'uun i Amoz je' wili i xutaq'aaj ruq'orariik reh i reey Ezequías: Re' i QaJaaw qaDios i hoj, hoj aj Israel je' wili i xuq'or: Re' i xapahqaaj weh panatiij chi riij i Senaquerib i kireey i aj Asiria xb'iraj chik.²¹Re' taqe i q'orik wili xuq'or i QaJaaw Dios chi riij i kireey i aj Asiria:
Re' tinamit Jerusaleem je' rukab' i k'isa q'ahxoq, k'achi' kaat kise'laam i hat Senaquerib. Re' tinamit Jerusaleem k'ahchi' kik'uyu'sam i kinaah k'ahchi' kaat kikaqse'laam noq xat elik chikiwach.²²¿Awach i xab'aj i xaq'ehtaaj? ¿Awach aj chinaah xchalik ak'aah? ¿Awach i xakow chik xawil? ¿Awach aj chinaah xajosaj aq'oral noq inaq'or? ¿Mi ma' chi nunaah re' i hin, kiSantolaj Dios i aj Israel?²³Re' hat xataq'aaj taqe reje awaj taqareel chi nub'ajariik je' wili xaq'or: Re' taqe i nuk'ih laj kareta reh q'aq'inik xin johtik chikinaah i nimaq yuuq' korehtaal ximponik chinaah ixtinajt naah yuuq' Líbano. Eh xnuyok' taqe i runajt rooq chee' chakaltee', eh xnuyok' wo' taqe i sohchaj q'e' holohik. Ximponik chikinaah i yuuq', chupaam i ch'ahn wilkeeb' ar q'e' holohik.²⁴Eh chupaam i tokoom tinamit xnuk'ot i jul ha' ar xnub'an nuhaa' xnuyeq'eb'eej taqe pan rooq' i nim ha' wilkeeb' Egipto reh chi xichiqik, tiki.²⁵¿Mi ma' aweht'al re' hat chi re' hin i Dios chi hin kinkapeb'inik cho reh ink'ularik? xa najtir wo' i nuyejaa' cho wach i ink'ularik ruum aj re' yu'naak xnub'an chik. Eh yu'naak i hat xuyeew q'ab' aweh chi xasach kiwach i tinamit kow kiib' xakanaa' chi ma' xta chik wilik pan kitinamiit.²⁶Re' taqe i tinamit wilkeeb' ar ma' xta kikowiil q'e' kiyo'jik, q'e' kik'ixiik. Xa je' kikab' taqe ch'ahn wilkeeb' panab'iix, xa je' kikab' i rax ch'ahn, xa je' kikab' i ch'ahn kipoq' cho chinaah i xoht naah paat inchiqik noq komajaa' inchuqarik.²⁷Re' hin weht'al nik' wach noq wilkaat, weht'al chu'nchel i chib'ih ina' a'n. Eh weht'al chi yohb'aal wach aajosq'iil chi nunaah.²⁸Ruum chi yohb'aal wach aajosq'iil chi nunaah re' hin naa nutz'apam aab'eeh naa nukojom jino'q i kotkot laj ch'ihch' cha ju', naa nukojom i karena ch'ihch' panachii'. Eh ruuk' i re' naa wo' chik kaat nusutem reje chupaam i b'eeh xat chalik wii', inki Dios.²⁹Eh re' i Isaías je' wili i xuq'or reh i reey Ezequías: Re' wili i rehtaliil chib'ih i naa ruk'ulariik chupaam i haab' wili, chupaam i haab' jinaj re' taq chik naa ak'uxum i wach i trigo xampoq' cho chi rutkeel, xa re' la' paroox haab' naa taq chik atikim aweh naa taq asik'im i wach re' taq chik i naa ak'uxum. Eh naa wo' taq atikim i uuva naa wo' taq ak'uxum i wach.³⁰Re' taqe i re' ruuk' riih rumaam i Judá koxikahnik chi k'achalkeeb' nee wo' chik kik'ihaaxb'iik, je' rukab' i tik i ruk'am raa', eh inwachinik.³¹Ruum wilkeeb' taqe i riih rumaam Judá naa kikahniik chi k'achalkeeb' Jerusaleem chinaah yuuq' Sión. Re' wili re' i QaJaaw Dios naa rub'aniik ruuk' i runimaal i ruk'axb'al.

³²Eh re' i QaJaaw Dios je' wili i xuq'or chi riij i kireey i aj Asiria: Re' reey re' re' ma' naa ta rub'anam ookik Jerusaleem, chi q'aq'inik ruuk' i ru flecha, ruuk' taqe rupulato ch'ihch'. Eh ma' naa ta wo' ruk'otom i koq rookb'aal chi junsuut i tinamit.³³Ar wo' chik chupaam i b'eeh xk'uloq wii' naa rusutiniik reje, ma' naa ta rub'anam okik chupaam i tinamit. Re' wili korik ruum re' hin i Dios kinq'orik reh.³⁴Re' hin naa nucha'jiniik reh i tinamit re' re', eh re' wo' hin naa nuko'liniik reh. Re' wili naa nub'anam k'axb'al reh i nub'ihnaal i hin, eh k'axb'al reh i rub'ihnaal i David re' i waj kamanoom, inki Dios, inki.

³⁵Eh chupaam aq'ab' re' re' jinaj ruánjel i QaJaaw Dios xooj k'oloq chupaam i kiye'aab' i ki soldado i aj Asiria. Eh xukansaj taqe i jinaj siento miil ruuk' kajwinaq ruuk' i ho'oob' miil chi soldado chi aj Asiria. Eh noq xsaq'ik chi junwaar xkireq chi kamnaq chik taqe chu'nchel i re'.³⁶Noq xrilow chi je' re' i Senaquerib kireey i aj Asiria, xresaj taqe reje ar i ru soldado xi sutinik wo' chik reje paruye'aab' Nínive, ar xkahnik.³⁷Eh re' i Senaquerib noq k'ahchi' chi looq'jiik i rutiyoox Nisroc rub'ihnaal xi ponik i Adramelec, i Sarezer re' taqe i kiib' chi rak'uun xkikansaj ruuk' q'aslaj ch'ihch' i Senaquerib xkimol chi elik xiooj ar Ararat. Eh re' chik i Esar-hadón i rak'uun xkahnik chi reyil chi jilow. Re' ruyab'ilaal, re' ruk'achjiik i reey Ezequías (2 Cron 32.24-26; Isa 38.1-22)

¹Chupaam taqe i q'iij re' re' xchoparik ruum i runimaal yab'ilaal i reey Ezequías. Eh xooj k'oloq ruuk' i Isaías jalal ruq'oral i Dios rak'uun i Amoz, je' wili i xuq'or reh:
Re' QaJaaw Dios je' wili xuq'or aweh: Chayejaa' kahnoq chib'ih jariik i naa ayejaam wach panapaat ruum naa akimiik ma' naa ta chik ak'aachjiik, inki.

²Eh noq xrib'iraj chi je' re' i reey Ezequías xusutej i koq i wach, wach tz'aq xub'an rutiij je' wili i xuq'or.³QaJaaw Dios re' hin i nupahqaaj otob'il aweh chi k'oloq cho panak'ux chi xatnunimaj ruuk' i rukorkiil wach nuk'ux, eh xnub'an wo' chu'nchel i wánima taqe i xaq'or weh, inki, eh xasuq suq chik inoq'ik.

⁴Eh re' i Isaías noq xakomajaa' wo' i nelik cho chi chii' i paat i rub'an wii' i taaq'anik i reey xq'orob'jik cho ruum i QaJaaw Dios, je' wili i xq'orarik reh:⁵Tisutinoq wo' chik reje ruuk' i Ezequías i k'amal rub'eeh i nutinamiit, je' wili i cha q'or reh: Re' i QaJaaw i qaDios, i ruDios i David i xikin cho aamaam je' wili ruq'or: Re' hin xb'iraj chik atiij xwilow chik i riis naq'awach. Re' hin naa kaat nuk'achrisam, paroox q'iij naa ajohtiik chupaam i nupaat.⁶Re' hin ko ho'lajuuj chik haab' naa nutiqim rooq ak'achariik, naa kaat nuko'leem i hat, naa nuko'leem i tinamit Jerusaleem pan q'ab' i kireey i aj Asiria. Re' hin naa nuko'leem i tinamit re' re' k'axb'al reh i nub'ihnaal i hin, eh k'axb'al reh i rub'ihnaal i David waj kamanoom, inki Dios.

⁷Re' i Isaías je' wili i xuq'or:
Chake'j taq k'isinoq wach i higo netaq inakoj chuwach i ruyab'ilaal reh chi neenk'aachjik.⁸Re' reey Ezequías rupahqaam naq chik reh i Isaías chi je' wili:
¿Chib'ih jariik i rehtaliil neenwil chi re' QaJaaw naa ruk'achrisaniik weh, eh chi paroox q'iij naa nub'anam ojik parupaat i Dios? inki.

⁹Re' i Isaías je' wili xuq'or:
Re' i wili i rehtaliil naa ruk'uhtaam aweh i QaJaaw, neenaq'or aha' wilik inawaaj. ¿Mi re' chi nenooj chi jumehq'iil i q'iij chuwach i ho'oob'-oq ora, oon re' chi neensutinik chi riij ho'oob'-oq ora? inki.

¹⁰Re' reey Ezequías je' wili xuq'or:
Chi nee nooj chi jumehq'iil q'iij chuwach ho'oob'-oq ora ma' k'axik taj. Chi neensutinik chi riij ho'oob'-oq ora ra'j k'axik re', inki.

¹¹Eh re' i Isaías jalal ruq'oral i Dios xupahqaaj reh i QaJaaw Dios chi naa ruk'uhtaam rehtaliil. Eh re' i Dios xub'an wo' hoq chi xsutinik chi riij i q'iij ho'oob' ora, je' rukab' i ruk'uhtaaj i rilow wii' ru ora i Acaz. Re' reey Ezequías xuk'ul taqe i taqareel xi chalik Babilonia (2 Cron 32.27-31; Isa 39.1-8)

¹²Chupaam taqe i q'iij re' re', re' kireey i aj Babilonia Merodac-baladán rak'uun i Baladán xrib'iraj chi yowab'jik i reey Ezequías xutaq'aaj taqe i raj taqareel re' chi xkik'am reje ruhuuj, eh xkik'am wo' reje rukooch.¹³Re' reey Ezequías xuk'ul taqe i aj taqareel, eh xuk'uhtaaj keh i rub'ehomal, xuk'uhtaaj keh i oro i plata, ink'ohnik laj iq'oom i aseite k'ih tz'aaq. Eh xuk'uhtaaj keh i tz'a'amb'al reh q'aq'inik je' wo' chu'nchel i rumolom panye'aab' reh. Eh chu'nchel xuk'uhtaaj keh i wilik parupaat i rub'an wii' i taaq'anik, je' wo' hoq i wilkeeb' chupaam i tinamit ruchopom naah.¹⁴Eh re' i Isaías jalal ruq'oral i Dios xooj ruuk' i reey Ezequías xupahqaaj reh chi je' wili:
¿Aha' xi chalik taqe i winaq wili?
¿Chib'ih i xkiq'or aweh? inki.
Re' i Ezequías je' wili xuq'or:
Re' taqe winaq wili chi najt yuuq' xi chalik kopan tinamit Babilonia, inki.

¹⁵Re' Isaías xupahqaaj wo' chik reh i Ezequías chi je' wili:
¿Chib'ih jariik i xkilow wach chupaam apaat? inki.
Re' i Ezequías je' wili xuq'or:
Re' hin xnuk'uhtaaj keh chu'nchel i nub'ehomal wilkeeb' ar ma' xtaj i xkahnik chi ma' ta xkilow wach, inki.

¹⁶Re' i Isaías je' wili i xuq'or reh i Ezequías:
Chab'iraj i xuq'or weh i QaJaaw Dios chi je' wili:¹⁷Naa ruponiik i q'iij chi chu'nchel i kimolom cho wach aamaam awati't wilik yu'naak chupaam i aapaat i na a'n wii' i taaq'anik naa ruk'amariik reje Babilonia ma' xta chik i naa rukahniik ayu'.¹⁸Eh naa wo' kik'amariik reje Babilonia taqe awak'uun awixq'uun. Re' keh naakikanab'jiik chi kapuun taqe, ar naa kiwihiik chupaam i paat i rub'an wii' i taaq'anik i kireey i aj Babilonia, inki i Dios.

¹⁹Re' i reey Ezequías xupahqaaj reh i Isaías chi je' wili:
¿Mi holohik i ruk'am chaloq i ruq'oral i QaJaaw Dios xaq'or weh? inki.
Ruum re' reh xraaj chi konaa ruwihiik i rusuqkiil k'uxliis, suq laj wihik nik' chik najtiil naa ruk'achariik i reh. Re' i rukimiik i Ezequías (2 Cron 32.32-33)

²⁰Eh re' taqe ruk'uliil i xub'an i reey Ezequías, eh nik' wach noq xuyejaa' i nimlaj molb'al ha', eh noq xuyejaa' i rooq ha' xokik pan tinamit, tz'ihb'amaj rehtalil chupaam taqe huuj reh i Crónicas, re' wo' tz'ihb'amaj wii' rehtaliil i xkian taqe i xi wihik chi reyil Judá.²¹Re' i reey Ezequías xkimik reje xooj taqe rureq i rumaam rati't. Eh re' chik i Manasés i rak'uun xkahnik chi reyil chi jilow. Re' noq xokik i Manasés chi reyil Judá (2 Cron 33.1-20)

¹Re' i Manasés kab'laj haab' i wilik reh noq xokik chi reyil Judá. Eh ho'lajuuj roxk'ahl haab' xwihik chi reyil Jerusaleem. Eh re' rutuut i Manasés Hepsiba i rub'ihnaal.²Re' Manasés xa re' i yiib' wach na'ojb'al xub'an chuwach i QaJaaw Dios. Xub'an reh i yiib' wach na'ojb'al xkian i tinamit xresaj taqe reje i QaJaaw Dios chupaam i ye'aab' xi okik wii' i aj Israel.³Re' reh xuyejaa' wo' chik taqe i artaal chikinaah taqe inajt kinaah yuuq' re' inlooq'jik wii' i Baal, re' naq taqe i xuyoj i Ezequías i rajaaw. Eh xuyejaa' wo' hoq jinaj i rujalwaach i Asera, je' rukab' i xuyejaa' i Acab i xwihik chi reyil Israel. Xuloq'ej wo' taqe i ch'umiil, i poh, i q'iij wilkeeb' pan taxaaj.⁴Eh parupaat i Dios xuyejaa' wo' hoq i artaal aha' kiloq'jik wii' i tiyoox, xanaah re' ruq'orom naq i QaJaaw Dios chi xa re' wo' reh i naa rulooq'jiik ar Jerusaleem.⁵Eh chupaam i kiib' chi rumuuj i rupaat i Dios, re' Manasés xuyejaa' taqe i artaal kilooq'jiik wii' i ch'umiil, i poh, i q'iij.

⁶Eh xuk'at wo' taqe i rak'uun chi mayiij chikiwach i tiyoox, inooj kuuk' i aj q'iij, inooj kuuk' i aj war, je' wo' kuuk' i kiq'orinik reh taqe i ma' tob'laj uxlab'al chi rupahq'aljiik runa'ojb'al. Ruuk' taqe i yiib' wach na'ojb'al xub'an re' re' xujosaj wach i rujosq'iil i QaJaaw Dios.⁷Eh xuyeew wo' hoq i rujalwaach i tiyoox Asera chupaam i rupaat i QaJaaw Dios. Xanaah re' je' wili i ruq'orom chee QaJaaw Dios reh i David je' wo' reh i Salomón i rak'uun: Re' nupaat wilik ayu' Jerusaleem i nusik'im wach chi kixilak i ruch'uhqaal i tinamit Israel xa re' i hin naa nulooq'jiik chi juneliik.⁸Re' hin ma' naa ta chik taqe wesam reje i aj Israel chupaam i ye'aab' nuye'em cho keh i kimaam kati't, wila' xkian chu'nchel i xnuq'or keh, je' wo' chu'nchel i nuk'uhb'aal xq'orarik keh ruum i Moisés i waj kamanoom, inki.

⁹Xa re' la' re' keh xama' xkian ta wo' hoq, xk'amarik la' kib'eeh ruum i Manasés chi rub'anariik i yiib' wach na'ojb'al xiik' naah yib'kiil wach xib'anik i keh chuwach i xkian i tinamit xresaj reje i QaJaaw Dios chupaam i ye'aab' xi okik wii' i aj Israel.¹⁰Je' re' noq re' i QaJaaw Dios je' wili i xuq'or cho ruuk' kichii' taqe i jalal ruq'oral:¹¹Ruum chi re' i Manasés kireey i aj Judá xub'an taqe i xiik' naah yib'kiil wach na'ojb'al, ma' xata je' rukab' i xkian taqe i aj amorreo re' taqe i xi wihik cho chupaam i ye'aab' re' re' chi peet. Eh re' wo' reh k'amwik kib'eeh pamahk taqe i aj Judá ruuk' i kilooqjiik taqe i tiyoox.¹²Re' hin i ki Dios i aj Israel i nuq'or chi naa nuye'em i runimaal ti' k'axik chinaah i tinamit Jerusaleem, chinaah i Judá. Eh awach i naakib'iriniik rib'iral i ti' k'axik naakik'ulum naa rutib'iik i kixikin kab'chel.¹³Re' hin naa nuye'em chutojariik i kimahk i aj Jerusaleem, je' rukab' i xinub'an keh i aj Samaria, je' rukab' i xnub'an kuuk' i riih rumaam i Acab. Eh naa nukanaam chi ma' xta chik i wilik ar Jerusaleem, naa nukanaam chi je' rukab' i pulato noq intz'ajarik paam, eh intak'ab'jik.¹⁴Eh re' taqe ruqox i nutinamiit ma' naa ta rusachariik kiwach naa taqe nuq'eb'em chi riij nuk'ux naa nuq'asam taqe pan kiq'ab' inixowanik kiwach naa ruchopariik naah i kiye'aab', i chib'ih keh.¹⁵Eh ruum, chi xa re' wo' yiib' wach na'ojb'al inki a'n chi nuwach xkijosaj chee nujosq'iil. Xa kok'ahchi' wo' kianam i keh je' rukab' i xkian i kimaam kati't noq xi elik cho Egipto, inki Dios.

¹⁶Re' reey Manasés xumin taqe pamahk i aj Judá chuwach i Dios. Eh ma' xata re' re' xub'an xukansaj la' wo' taqe i ma' xta kimahk xunujisaj paam i Jerusaleem ruuk' i kikik'eel.¹⁷Eh re' taqe i ruk'uliil i xub'an i reey Manasés, taqe chu'nchel i xub'an, taqe i mahk xub'an tz'ihb'amaj rehtalil chupaam taqe i huuj reh i Crónicas. Re' wo' tz'ihb'amaj wii' i rehtalil i xkian i xi wihik chi reyil Judá.¹⁸Eh noq xkimik reje i reey Manasés ar xkimuq'aa' chupaam i ye'aab' uhtz'ub' ma' najt ta ruuk' i paat imb'aan wii' taaq'anik. Eh re' chik i Amón i rak'uun xkahnik chi reyil chi jilow Judá. Re' noq xokik i Amón chi reyil Judá (2 Cron 33.21-25)

¹⁹Re' Amón kiib' ru ka'winaq haab' i wilik reh noq xokik chi reyil. Eh kiib' haab' xwihik chi reyil Jerusaleem. Re' i rutuut Masulémet i rub'ihnaal, rixq'uun Haruz, Jotba i rutinamiit.²⁰Re' i Amón xa re' i yiib' wach na'ojb'al xub'an chuwach i QaJaaw Dios, je' rukab' i xub'an i Manasés i rajaaw.²¹Xub'an wo' chik i reh i yiib' wach na'ojb'al i reh je' rukab' i xub'an i rajaaw, xuyeew ruloq'il taqe i tiyoox xuloq'ej rajaaw.²²Xuq'eb' chi riij ruk'ux i Dios, re' i QaJaaw ki Dios taqe i qamaam qati't. Ma' xub'an taj aha' wilik iraaj i Dios.

²³Re' taqe i raj kamanoom i reey Amón xkiyejaa' wach rukanteesjiik i reey Amón. Eh ar xkikansaj chupaam i paat i rub'an wii' taaq'anik.²⁴Chi riij i re', re' taqe i aj Judá xkikansaj wo' chik taqe i xiyej-anik wach rukanteesjiik i reey Amón. Eh re' chik i Josías i rak'uun xkipab'aa' chi reyil chi jilow.

²⁵Re' taqe i ruk'uliil, je' wo' chu'nchel i xub'an i reey Amón tz'ihb'amaj rehtalil chupaam taqe i huuj reh i Crónicas. Re' wo' tz'ihb'amaj wii' i rehtalil i xkian i xi wihik chi reyil Judá.²⁶Re' i reey Amón xkimik reje, ar xkimuq'aa' paruye'aab' uhtz'ub' reh i Uza. Eh re' chik i Josías i rak'uun xkahnik chi reyil chi jilow. Re' noq xokik i Josías chi reyil Judá (2 Cron 34.1-2)

¹Re' Josías waxiqiib' haab' i wilik reh noq xokik chi reyil. Eh junlaj ru ka'winaq haab' xwihik chi reyil Jerusaleem. Re' i rutuut Jedida i rub'ihnaal rixq'uun i Adaía aj pan tinamit Boscat.²Re' Josías, re' i holohik laj na'ojb'al xub'an chuwach i QaJaaw Dios. Re' reh xub'an chu'nchel i holohik laj na'ojb'al, je' rukab' i xub'an chee David i xikin rumaam, eh ma' xukanaa' ta rub'aan. Re' noq xreqarik i huuj tz'ihb'amaj wii' k'uhb'aal (2 Cron 34.8-33)

³Eh noq waxaqlaj chik haab' rokiik chi reyil i Josías xutaq'aaj reje parupaat i Dios i Safán i aj tz'ihb' rak'uun i Azalía riih i Mesulam je' wili xuq'or reje reh:⁴Hiy ruuk' i Hilcías kajaaw i k'amal kib'eeh aj tiij cha q'or reh chi chumol wach chu'nchel i tumiin inkik'am chee tinamit parupaat i Dios. Re' i tumiin inkik'ul i kikamanik panookb'al reh i rupaat i Dios.⁵Chaq'or reh i Hilcías chi re' i tumiin re' re' neeruq'asaj keh i k'amal kib'eeh i k'ahchi' kiyej-aniik reh chi korik i rupaat i Dios. Eh re' chik i keh neekitojwik keh taqe i k'ahchi' keeb' chi kamanik.⁶Reh chi neenkitoj i k'ahchi' kilwiik reh i kamanik, je' wo' taqe i aj sehk, i aj tz'aqool. Eh ruuk' wo' i tumiin re' re' neenkiloq' i chee', ab'aj yejemb'al reh i rupaat i Dios.⁷Nee wo' naq'or reh i Hilcías chi ma' rub'ir riij i tumiin neeruq'asaj keh i k'amal kib'eeh kamanoom, ruum re' keh korik wach kik'ux, inki Josías.

⁸Eh re' i Hilcías kajaaw i k'amal kib'eeh aj tiij je' wili i xuq'or reh i Safán i aj tz'ihb':
Re' hin xnureq parupaat i Dios i huuj tz'ihb'amaj wii' i k'uhb'aal, inki. Re' i Safán xrilow wach i huuj re' re'.⁹Chi riij i re', re' Safán i aj tz'ihb' xuk'am reje i huuj xooj ruuk' i reey Josías je' wili xuq'or reh:
Re' taqe awaj kamanoom xkimol chik wach i tumiin wilik chupaam i rupaat i Dios xkiq'asaj keh i k'amal kib'eeh i kamanoom i k'ahchi' kiyej-aniik reh i rupaat i QaJaaw Dios, inki.

¹⁰Eh re' Safán je' wili i xuq'or reh i reey Hicías: Re' i Hilcías i kajaaw i k'amal kib'eeh aj tiij xuq'asaj weh jinaj i huuj, inki.
Eh rilow wach i huuj chuwach i reey.¹¹Eh noq xrib'iraj i reey Josías, chib'ih i ruq'or i k'uhb'aal tz'ihb'amaj chupaam i huuj xuweq i ruso' chi riij.¹²Eh xuyuq'eej ruuk' i Hilcías i kajaaw i k'amal kib'eeh aj tiij, i Ahicam rak'uun i Safán, i Acbor rak'uun i Micaías, i Safán i aj tz'iihb', i Asaías re' nim wach rukamaj ruuk' i reey, je' wili i xuq'or reje keh:¹³Yu'naak taq i hat, hiy taq chapahq'aaj reh i QaJaaw chi wiij i hin, chikiij i tinamit, chikiij chu'nchel i aj Judá. Eh cha pahqaaj taq chib'ih jariik i naaqanam ruuk' i k'uhb'aal tz'ihb'amaj chupaam i huuj wili i xkan. Re' QaJaaw Dios xiik' naah i rujosq'iil chi qanaah ruum re' taqe qamaam qati't ma' xkinimaj taj i k'uhb'aal tz'ihb'amaj chupaam i huuj wili, eh ma' xkian taj, inki.

¹⁴Eh re' Hilcías i kajaaw i k'amal kib'eeh i aj tiij re' i Ahicam, i Acbor, i Safán, i Asaías, xiooj chi pahqanik ruuk' ixoq Hulda rub'ihnaal jalal ruq'oral i Dios. Re' ixoq re' re' rehk'een i Salum. Eh re' Salum rak'uun i Ticva riih i Harhas, eh re' reh inilwik reh i molarik wii' itz'ihy inkamanik chupaam i rupaat i Dios. Eh re' i Hulda re' re' ar patim paruka'q'aat reh i Jerusaleem.¹⁵Re' Hulda je' wili i xuq'or keh i winaq re' re': Re' QaJaaw Dios i hoj, hoj aj Israel je' wili i xuq'or: Chaq'or taq reh i awach xtaaq'anik taq cha weh chi wilik taq i xchalik apahqaaj weh.¹⁶Re' i QaJaaw Dios je' wili i xuq'or: Re' hin naa nutaqaam i runimaal ti' k'axik chikinaah i aj Jerusaleem. Je' rukab' i ti' k'axik tz'ihb'amaj rehtaliil chupaam i huuj xrilow wach i kireey i aj Judá.¹⁷Je' re' naakik'ulum ruum xin kiq'eb' chi riij kik'ux, xkik'at i insensia chikiwach i tiyoox. Ruuk' inki a'n re' re' xkijosaj cho wach i nujosq'iil chinaah i kitinamiit, eh ma' jaruuj naa rik'iik i nujosq'iil chikinaah xa chi je' wili, inki.¹⁸Eh cha q'or taq ponoq reh i kireey i aj Judá xtaaq'anik taq cha weh chi wilik taq i naa apahqaam reh i QaJaaw Dios. Re' i QaJaaw, i qaDios i hoj, hoj aj Israel je' wili i xuq'or chawiij: Ruum chi xab'iraj i xuq'or i k'uhb'aal.¹⁹Eh ruum chi xayot' awánima, chi xaloch' awiib' chi nuwach i hin, i Dios noq xab'iraj rib'iral i ti' k'axik naa naq nuye'em cho chikinaah i aj Jerusaleem. Eh chi naa nusacham wach chi ma' xta chik naa nukanaam chupaam. Eh ruum chi xa xih aso' chawiij ruum i ruti'kiil ak'ux, eh xat oq'ik chi nuwach re' hin xat b'iraj chik, ruum i re' ma' naa ta nuye'em ti' k'axik chikinaah i tinamit re' re' noq kok'achalkaat i hat.²⁰Eh ruum aj re', re' hin naa nuye'em q'ab' aweh i hat chi pansuqkiil naa akimiik reje noq naa rojiik areqem taqe aamaam awati't, inki i Dios.
Eh re' taqe i raj taqareel i reey Josías xiooj wo' kiq'or i xq'orarik keh.

¹Re' i reey Josías xumol kiwach taqe i k'amal kib'eeh i aj Judá, je' wo' taqe i k'amal kib'eeh i aj Jerusaleem.²Re' reey Josías xooj parupaat i Dios ruch'ihil taqe i k'amal kib'eeh i aj Judá, taqe i k'amal kib'eeh i aj Jerusaleem. Eh xiooj wo' haa' taqe i k'amal kib'eeh aj tiij, je' wo' taqe i jalal ruq'oral i Dios, eh chu'nchel i tinamit chi nimaq chi kok' taq. Eh noq wilkeeb' chik parupaat i Dios re' i reey Josías kow xrilow wach chi kixikin i k'uhb'aal tz'ihb'amaj chupaam i huuj xreqarik chupaam i rupaat i Dios.³Eh re' reey Josías xupab'aa' i koq riib' chuwach i rooq i rupaat i Dios xuk'ulaa' reh i Dios chi naa runimam i Dios chu'nchel ruk'ux, eh chi naa runimam chu'nchel i ruk'uhb'aal, je' wo' hoq i xuq'or. Eh xuq'or wo' hoq chi naa rub'anam chu'nchel i ruq'or i k'uhb'aal tz'ihb'amaj chupaam i huuj. Eh chu'nchel wo' tinamit xkiq'or chi naa kinimam chu'nchel i k'uhb'aal re' re'. Re' reey Josías xujal wach i runa'ojb'al (2 Cron 34.3-7)

⁴Re' i reey Josías xuq'or reh i Hilcías kajaaw i k'amal kib'eeh aj tiij, keh i rukab' k'amal kib'eeh aj tiij, keh i kikamanik panookb'al reh i rupaat i Dios, chi naa kesam cho parupaat i Dios chu'nchel i kikamanik reh i tiyoox Baal, i Asera je' wo' chu'nchel i kikamanik chi ye'b'al ruloq'il i q'iij, i poh, i ch'umiil wilkeeb' pan taxaaj. Eh re' Josías ar xuk'at taqe reje chu'nchel i re' chi riij i Jerusaleem, chupaam i ye'aab' Cedrón, re' i ruchajil xuk'am reje Bet-el.⁵Chi riij i re', re' i Josías xresaj taqe k'amal kib'eeh aj tiij kipab'aam taqe i xi wihik chi reyil Judá, re' i kik'atwik naq reh i insensia chikiwach i tiyoox chikinaah taqe inajt kinaah yuuq' wilkeeb' Judá, i wilkeeb' chi junsuut i Jerusaleem. Eh resaj wo' taqe i k'amal kib'eeh aj tiij i kik'atwik reh i insensia chuwach i Baal, chuwach i q'iij, i poh, ch'umiil chikiwach chu'nchel i wilkeeb' pan taxaaj.⁶Eh resaj wo' reje chi riij i tinamit Jerusaleem i rujalwaach i tiyoox Asera i wilik naq chupaam i rupaat i QaJaaw Dios. Eh xuk'am reje wach k'ixkaab' Cedrón ar xuk'at, korehtaal xichaajrik, re' ruchajil xupukej reje chikinaah i jul kimuhqik wii' i tinamit.⁷Re' i reey Josías xuyoj wo' hoq i kiye'aab' taqe i kib'anik reh i k'oyomal, chi loq'oomb'al reh i tiyoox, re' i ye'aab' inkikem wii' taqe itz'ihy inkamanik chi loq'oomb'al reh i tiyoox Asera.

⁸Eh xutaq'aaj wo' kik'amariik taqe i k'amal kib'eeh aj tiij wilkeeb' parutinamitaal i Judá. Eh xuyoj taqe i ye'aab' wilkeeb' chikinaah inajt kinaah yuuq' re' inkik'at wii' i insensia taqe i k'amal kib'eeh aj tiij, ar xutaq'aaj reje ruyojariik Geba koxponik Beerseba. Xuyoj wo' taqe i artaal inkiloq'ej wii' i ma' tob'laj uxlab'al re' wilik panookb'al inokik wii' i Josué ajaab'ees chupaam i tinamit re' re' wilik reje pantz'eet reh i tinamit.⁹Re' taqe i k'amal kib'eeh aj tiij re' re' ma' inki a'n taj i kamanik chupaam i rupaat i Dios Jerusaleem, xa kuuk' la' i kuch k'amal kib'eeh aj tiij inkik'ux keh i kaxlanwi'k ma' kojooj ta ch'amb'esb'al reh.

¹⁰Re' i reey Josías xuyoj i k'amb'al q'aaq' Tofet wilik wach k'ixkaab' paruye'aab' i Ben-hinóm. Reh chi re' taqe i tinamit ma' xkik'at ta chik i kak'uun kixq'uun chuwach i tiyoox Moloc.¹¹Eh xresaj taqe i kawáyu i xkiq'asaj i xi wihik cho chi reyil Judá ye'b'al ruloq'il i q'iij. Re' taqe kawáyu re' re' ar wilkeeb' chi muuj i rupaat i Dios ma' najt ta ruuk' i ookb'al, ma' najt ta ruuk' i ruye'aab' i Natán-melec nim rajaawriik, re' i kapuun. Eh xuk'at wo' taqe wach q'aaq' i kareta inkamanik chi ye'b'al ruloq'il i q'iij.¹²Eh xuyoj wo' taqe i artaal xkiyejaa' chinaah i rupaat i Acaz taqe i xi wihik chi reyil Judá. Eh xutaq'aaj wo' kiyojariik i kiib' chi artaal xuyejaa' i Manasés wilkeeb' chinaah i kiib' chi rumuuj i rupaat i Dios. Xresaj reje ar xukut taqe wach ak'al re' taqe i kixeer xukut taqe chupaam i nim ha' Cedrón.

¹³Re' i reey xuyoj taqe i artaal wilkeeb' chikinaah inajt kinaah yuuq' wilkeeb' reje parelb'aal q'iij reh i Jerusaleem, eh pantz'eet reje reh i yuuq' olivo. Re' taqe i artaal re' re', re' i Salomón i wihik chi reyil Israel xye'janik reh chi loq'oomb'al keh taqe i tiyoox xiik' naah yib'kiil kiwach. Re' Astoret ki dios i aj Sidónio, re' Quemos ki dios i aj Moab, re' Milcom ki dios i riih rumaam Amón.¹⁴Eh xupaxej wo' taqe ab'aj, taqe i chee' inkamanik chi loq'oomb'al reh i tz'aqoj tiyoox Asera. Eh xukut taqe i rub'aqil kamnaq chupaam i ye'aab' re' re'.¹⁵Re' i reey Josías xuyoj i artaal wilik Bet-el chinaah inajt naah yuuq'. Re' artaal re' re', re' i Jeroboam rak'uun i Nabat xyej-anik reh. Re' i Jeroboam re' re', re' i xminwik keh pamahk i aj Israel. Re' i reey Josías xuk'at wo' hoq i artaal wilik chinaah i yuuq' najt naah, xuk'at wo' hoq i rujalwaach i tiyoox Asera.

¹⁶Re' reey Josías tz'ehtanik reje chi junsuut xrilow taqe reje wach i muqulkeeb' wii' i kamnaq, eh xutaq'aaj rehtesjiik i kib'aqil i kamnaq wilkeeb' panjul xuk'at chinaah i artaal, eh xuyoj. Je' aj re' noq xooj eloq wach i ruq'orom chaloq i Dios ruuk' i chii' i jalal ruq'oral.¹⁷Eh re' i reey Josías xupahqaaj chi je' wili:
¿Awach aj eh i muq'umb'al k'ahchi' reje wilom wach wulu'? inki.
Re' taqe i winaq wilkeeb' chupaam i tinamit je' wili i xkiq'or:
Re' i muq'umb'al inawil reje wach re' i muqlik wii' i xchalik Judá re' i jalal ruq'oral i Dios, re' ixq'orik rib'iral chib'ih i xa a'n reh i artaal wilik naq Bet-el, inki taqe.

¹⁸Noq xrib'iraj chi je' re' je' wili xuq'or:
Chakanaa' taq chi je' re', maa awach intz'a'inik reh taqe rub'aqil, inki.
Eh ma' awach ta xtz'a'inik reh irub'aqil ijalal i ruq'oral i Dios xchalik Samaria.

¹⁹Eh nik' wach i xub'an i Bet-el, je' wo' chik re' i xub'an chupaam taqe i tinamit wilkeeb' Samaria, xkuxik rusacham kiwach taqe i ye'aab' loq'oomb'al tiyoox wilkeeb' chikinaah inajt kinaah yuuq'. Re' i xkiyejaa' i xi wihik chi reyil Israel ruuk' i re' xkijosaj cho wach i rujosq'iil i QaJaaw Dios.²⁰Eh xukansaj chinaah taqe i artaal chu'nchel i k'amal kib'eeh aj tiij kikamanik chupaam i ye'aab' kiloq'ijiik wii' tiyoox. Eh xuk'at i kib'aqil i kamnaq chikinaah taqe i artaal, eh xsutinik wo' chik reje Jerusaleem i reey Josías. Re' i reey Josías xuninq'ijeej i elik chaloq Egipto (2 Cron 35.1-19)

²¹Re' i reey Josías je' wili i xuq'or keh i tinamit: Re' taq i hat naa taq aninq'ijeem i elik chaloq Egipto chi ye'b'al ruloq'il i QaJaaw Dios, je' rukab' i tz'ihb'amaj rehtalil chupaam i huuj reh i k'uhb'aal, inki.²²Eh ma' jank'al ta naq chik i ninq'ijik i ninq'iij re' re' ni xata re' noq xi wihik chaloq taqe i peet q'atal q'orik Israel, ni xata re' noq xi wihik chaloq taqe i peet reey Judá, ni xata re' noq xi wihik chaloq taqe i peet reey Israel.²³Re' i ninq'iij re' re' kore' chik xninq'ijik chi loq'oomb'al reh i QaJaaw Dios ar Jerusaleem noq waxaqlaj chik haab' rokiik chi reyil i Josías.

²⁴Re' i reey Josías xresaj taqe reje i aj war, aj q'iij, wilkeeb' Jerusaleem, je' wo' taqe i wilkeeb' Judá. Eh xresaj wo' taqe i tiyoox wilkeeb' chupaam i ju'jun chi paat, xresaj taqe i xa chib'ih jariik inkamanik chi loq'oomb'al reh i tiyoox. Reh chi xooj eloq wach i ruq'or i k'uhb'aal tz'ihb'amaj chupaam i huuj xureq chupaam i rupaat i QaJaaw Dios i Hilcías k'amal kib'eeh aj tiij.²⁵Re' i reey Josías xtixujal wach i runa'ojb'al chi korik xuq'asaj riib' reh i QaJaaw Dios chu'nchel ruk'ux, chu'nchel i ránima, chu'nchel i ransil, je' rukab' i ruq'or i k'uhb'aal ye'ooj ree Moisés, Ma' jino'q i reey wihinaq cho pampeet, eh xwihik koq'uun chi je' rukab' i Josías.

²⁶Atoob' ta je' re', re' i QaJaaw Dios xama' xik'ik ta wo' rujosq'iil chinaah i tinamit Judá, ruum taqe i yiib' wach na'ojb'al xub'an i reey Manasés re' i xjosanik cho wach i rujosq'iil i QaJaaw Dios.²⁷Eh re' i QaJaaw Dios, je' wili i xuq'or: Re' i hin naa nusacham kiwach i aj Judá, je' rukab' noq xnusach kiwach i aj Israel. Eh naa nuq'eb'em chi riij nuk'ux i tinamit Jerusaleem i nusik'im naq cho wach. Atoob' ta nuq'orom wo' naq chi ar naa rulooq'jiik i nub'ihnaal chi juneliik, inki. Re' i rukimiik i reey Josías (2 Cron 35.20-27)

²⁸Re' taqe i ruk'uliil xub'an i reey Josías je' wo' chu'nchel i xub'an, tz'ihb'amaj rehtalil chupaam taqe i huuj reh i Crónicas. Re' wo' i tz'ihb'amaj wii' i rehtalil i xkian taqe i xi wihik chi reyil Judá.²⁹Eh noq re' i Josías ko wilik chi reyil Judá re' i Necao i kireey i aj Egipto xooj i wilik wii' i nim ha' Éufrates chi q'aq'inik chi rutoob'jiik i kireey i aj Asiria. Re' i reey Josías xelik chaloq chi q'aq'inik chi k'ulb'eejiik i Necao. Eh noq re' i Necao xrilow wach i Josías xanoq wo' xukansaj ar Meguido.³⁰Eh re' i ruti'jolal i reey Josías re' taqe i raj kamanoom ximolwik cho reh xkiyeew cho chupaam jinaj i kareta xkik'am cho Jerusaleem, ar xkimuq'aa'. Eh re' taqe i tinamit re' chik i Joacaz i rak'uun wo' hoq i Josías xkipab'aa' chi kireey chi jilow. Re' noq xokik i Joacaz chi reyil Judá (2 Cron 36.1-4)

³¹Re' i Joacaz ixib' ru ka'winaq haab' i wilik reh noq xokik chi reyil, eh xa ixib' wo' poh xwihik chi reyil Jerusaleem. Re' rutuut Hamutal i rub'ihnaal rixq'uun i Jeremías aj pan tinamit Libna.³²Eh re' reey Joacaz xa re' i yiib' wach na'ojb'al xub'an chuwach i QaJaaw Dios, je' wo' rukab' xkian rumaam rati't xi wihik chi reyil pampeet.³³Re' i reey Joacaz xk'amarik reje prexo ruum i reey Necao ar Ribla wilik ar i Hamat reh chi ma' najt ta xwihik chi reyil Jerusaleem. Re' i Necao xumin taqe chupaam i aj Judá chi naa kitojom ik'inaq kab'laj ru kajwinaq kintaal chi plata, eh k'isiin ma' ixib' aroba i oro.³⁴Eh re' i reey Necao xupab'aa' chi kireey i aj Judá i Eliaquim chi jilow i Josías re' i rajaaw. Re' Necao xujal wach i rub'ihnaal i Eliaquim Joecim chik i rub'ihnaal xukoj. Eh re' i Joacaz xuk'am reje Egipto, ar xkimik.

³⁵Re' Joacim xutoj reh i reey Necao i plata, i oro xupahqaaj. Re' Joacim xumin taqe chupaam i tinamit chi naa kitojom i tumiin re' re'. Eh chi kiju'junaal xkitoj ruuk' plata, ruuk' oro, aha' wilik i xupahqaaj keh reh chi xuyeew reh i Necao kireey i aj Egipto. Re' noq xokik i Joacim chi reyil Judá (2 Cron 36.5-8)

³⁶Re' i Joacim ho'oob' ru ka'winaq haab' i wilik reh noq xokik chi reyil, eh junlaj haab' xwihik chi reyil Jerusaleem. Re' i rutuut Zebuda i rub'ihnaal rixq'uun i Pedaías aj pan tinamit Ruma.³⁷Re' i reey Joacim xa re' i yiib' wach na'ojb'al xub'an chuwach i QaJaaw Dios, je' rukab' i xkian rumaam rati't xi wihik chi reyil pampeet.

¹Eh noq wilik chi reyil i Joacim Judá, re' i Nabucodonosor kireey i aj Babilonia, xchalik chi q'aq'inik ar Judá. Eh re' i Joacim ixib' haab' xwihik chi ri'sil i rajaawriik i reey re' re', chi riij i re' ma' xunimaj ta chik.²Xa re' la', re' i QaJaaw Dios xutaq'aaj taqe chaloq i aj Babilonia, i aj Siria, i aj Moab, i aj Amón chi q'aq'inik kuuk' i aj Judá reh chi xsacharik kiwach je' rukab' i xq'orarik keh ruum i QaJaaw Dios ruuk' kichii' taqe i raj kamanoom, re' taqe jalal ruq'oral.³Xti korik noq re' i ti' k'axik wili re' i QaJaaw Dios xye'wik cho chikinaah i aj Judá, ruum chu'nchel i yiib' wach na'ojb'al xub'an i reey Manasés.⁴Ruum chi re' i Manasés ma' kisiin taqe i ma' xta kimahk xukansaj chupaam i tinamit Jerusaleem ruum i re' ma' xkuyarik ta chik i kimahk ruum i Dios.

⁵Re' taqe i ruk'uliil i xub'an i reey Joacim, je' wo' chu'nchel i xub'an tz'ihb'amaj rehtalil chupaam taqe i huuj reh i Crónicas. Re' wo' tz'ihb'amaj wii' i rehtalil i xkian taqe i xi wihik chi reyil Judá.⁶Eh noq xkimik reje i reey Joacim xooj rureq taqe i rumaam rati't, re' chik i Joaquín i rak'uun xokik chi reyil chi jilow.

⁷Re' i kireey i aj Egipto ma' kota chik xelik chi q'aq'inik ruum re' i kireey i aj Babilonia xrehchaaj chik chu'nchel i ye'aab' k'ahchi' naq chi q'aq'inik chi riij. Ar xtohq'ik reje chi chii' i nim ha' i nelik cho Egipto, korehtaal xponik chi chii' i nim ha' Éufrates. Re' i reey Joaquín ruch'ihil taqe i raj kamanoom xi k'amarik reje Babilonia (2 Cron 36.9-10)

⁸Re' i Joaquín waxaqlaj haab' i wilik reh noq xokik chi reyil, eh xa ixib' wo' poh xwihik chi reyil Jerusaleem. Re' i rutuut Nehusta i rub'ihnaal rixq'uun i Elnatán aj Jerusaleem.⁹Re' i reey Joaquín xa re' i ma' holohik ta laj na'ojb'al xub'an chuwach i QaJaaw Dios, je' rukab' i xub'an i rajaaw.

¹⁰Eh chupaam taqe i q'iij re' re' xi chalik q'aq'ineel Jerusaleem i raj kamanoom i Nabucodonosor kireey i aj Babilonia. Eh xkikotej riij i tinamit.¹¹Eh noq kikotem chik riij i tinamit Jerusaleem taqe i raj kamanoom i Nabucodonosor xchalik wo' chi q'aq'inik i reey Nabucodonosor.¹²Re' i Joaquín i kireey i aj Judá, ruch'ihil i rutuut, ruch'ihil taqe i k'amal kib'eeh, ruch'ihil taqe i nimaq wach kikamaj ruuk', ruch'ihil taqe i xti reht'al kiwach xichoparik reje ruum i Nabucodonosor kireey i aj Babilonia. Re' noq waxiqiib' haab' rokiik chi reyil i Nabucodonosor.

¹³Re' reh xresaj taqe cho parupaat i QaJaaw Dios chu'nchel i k'ih taq tz'aq, je' wo' taqe i wilkeeb' chupaam i rupaat i reey i rub'an wii' taaq'anik, je' rukab' i ruq'orom i QaJaaw Dios. Eh xkuxik rupaxem taqe i kulk, je' wo' chu'nchel i kikamanik parupaat i Dios. Re' taqe i ruyejaam ruuk' oro i Salomón kireey i aj Israel.¹⁴Re' Nabucodonosor xuk'am taqe reje Babilonia chu'nchel i aj Jerusaleem xuk'am taqe reje i k'amal kib'eeh, je' wo' taqe i soldado, je' wo' taqe i kichol i xa chib'ih jariik kamanikaal. Je' wo' taqe i ch'eyel ch'ihch'. Korehtaal xi ponik lajeeb' miil, chu'nchel i xuk'am reje, ma' xta chik i xi kahnik Jerusaleem. Ach wo' re' taqe i q'e' neb'aa' xi kahnik.

¹⁵Re' Nabucodonosor xuk'am reje Babilonia i reey Joaquín je' wo' hoq i rehk'een, je' wo' hoq i rutuut, je' wo' taqe i nimaq wach kikamaj ruuk' i reey, je' wo' hoq i nimaq kiwach winaq wilkeeb' Jerusaleem, xkuxik ruk'amam taqe reje.¹⁶Eh chu'nchel i xuk'am reje Babilonia wuquub' miil, eh jinaj miil taqe i wilik kina'ojb'al chub'anariik i xa chib'ih jariik kamanikaal ruch'ihil taqe i ch'eyel ch'ihch', taqe i soldado kow kiib' chi q'aq'inik.¹⁷Re' i reey Nabucodonosor, re' chik i Matanías rikaan i Joaquín xupab'aa' chi reyil Judá chi jilow i Joaquín. Eh xujal wach i rub'ihnaal i Matanías, Sedequías chik i rub'ihnaal xukoj. Re' noq xokik i Sedequías chi reyil (2 Cron 36.11-16; Jer 52.1-5)

¹⁸Re' Sedequías jinaj ru ka'winaq haab' i wilik reh noq xokik chi reyil, eh junlaj haab' xwihik chi reyil Jerusaleem. Re' rutuut Hamutal i rub'ihnaal rixq'uun i Jeremías aj pan tinamit Libna.¹⁹Re' i reey Sedequías xa re' i yiib' wach na'ojb'al i xub'an chuwach i QaJaaw Dios, je' rukab' i xub'an i reey Joacim.²⁰Ruum i re' xchalik rujosq'iil i QaJaaw Dios chikinaah i aj Jerusaleem chikinaah i aj Judá. Korehtaal xuk'am taqe reje pan tokoom tinamit chi kunchelaal. Eh re' i Sedequías xub'an i q'aq'inik ruuk' i kireey i aj Babilonia. Re' noq xchoparik naah i tinamit Jerusaleem (Jer 39.1-7; 52.3-11)

¹Noq b'elejeeb' chik haab' rokiik chi reyil Judá i Sedequías chupaam i lajeeb' rub'eeh i ru lajeeb' poh reh i haab' re' re' noq re' i reey Nabucodonosor, ruch'ihil chu'nchel i ru soldado xchalik chi q'aq'inik ar Jerusaleem. Eh xkikotej riij, xkiyejaa' i ki-itz'ihy naah paat chuwach reje, eh xkiyejaa' ko'lemb'al kiib' chi junsuut.²Re' tinamit Jerusaleem najt xkikotej riij xa ko kikotem wo' riij noq junlaj chik haab' rokiik chi reyil i Sedequías.³Eh noq b'elejeeb' chik q'iij ruk'amam rub'eeh i ru kaajpoh x-uhtik wach i wi'jaleel ar Jerusaleem korehtaal xponik chi ma' aha' ta chik inkireq kiwa' i wilkeeb' ar.⁴Re' taqe i aj Jerusaleem xkihop i tz'aq kotimaj wii' riij i tinamit, eh chaq'ab' xi elik reje chupaam i hoop taqe i soldado kow kiib' chi q'aq'inik ruch'ihil i kireey. Ar xi elik reje chi chii' i ookb'al wilik panyejaal i kiib' chi tz'aq wilik chucheel i tikooj wii' i rutz'ub' i reey, ar xiooj reje chupaam i b'eeh inooj Arabá. Eh kotimaj wo' naq riij i kitinamiit kuum i ki soldado i aj Babilonia.⁵Eh re' taqe i ki soldado i aj Babilonia xkitahqeej reje i reey Sedequías korehtaal xponik kireq wach k'ixkaab' Jericó. Eh xkanab'jik kuum chu'nchel i ru soldado k'ul xkich'aqib'eej kiib'.⁶Eh xkichop reje i reey Sedequías, eh xkik'am reje chuwach i kireey i aj Babilonia wilik ar Ribla reh chi xq'atarik i q'orik chinaah.⁷Eh chuwach wo' i Sedequías xuyok' i ralaq taqe i rak'uun. Chi riij i re' xresaj kab'chel inaq'wach i Sedequías xub'ak' wach chi karena, eh xuk'am reje Babilonia. Re' rusachariik wach i rupaat i Dios (2 Cron 36.17-21; Jer 39.8-10; 52.12-30)

⁸Eh wuquub' chik q'iij ruk'amam rub'eeh i roo' poh reh i rub'elejlaj haab' rokiik chi reyil i Nabucodonosor. Re' i Nabuzaradán i nim wach rukamaj ruuk' i reey, eh k'amal kib'eeh soldado kicha'jinik reh i reey i xponik Jerusaleem.⁹Xuqop ruq'aq'al i rupaat i Dios je' wo' paat i rub'an wii' i taaq'anik i reey. Eh xuqop wo' ruq'aq'al chu'nchel i paat wilkeeb' chupaam i tinamit re' re', eh xti xuqop wo' ruq'aq'al i kipaat i nimaq wach kajaawriik.¹⁰Eh re' taqe ru soldado aj Babilonia ruch'ihil i Nabuzaradán xkikut wach ak'al i koraal tz'aq kotimaj wii' riij i tinamit Jerusaleem.¹¹Re' i Nabuzaradán k'amal kib'eeh soldado xuchop taqe i tinamit nik' chik k'ihaal i koxikahnik, eh xuk'am reje Babilonia, je' wo' taqe i wilik kina'ojb'al chub'aan taqe i xa chib'ih kamanikaal, je' wo' taqe i xkiq'asaj kiib' ruuk' i kireey aj Babilonia xkuxik ruk'amam taqe reje Babilonia.¹²Eh ach wo' re' taqe i q'e' neb'aa' xukanaa' ar reh chi xkab'ixeej wach aak'al, eh chi xkiq'ireej i uuva.

¹³Re' taqe i aj Babilonia xkipaxej taqe i ch'iit je' wo' taqe i xa chib'ih jariik korjinaq ruuk' q'an ch'ihch' xkipaxej wo' hoq i nimlaj ye'aab' haa', je' wo' hoq i ch'ikaab' reh i wilkeeb' parupaat i QaJaaw Dios. Eh xkuxik kik'amam reje Babilonia i q'an ch'ihch'.¹⁴Eh xkik'am wo' reje Babilonia i nimaq xun, taqe i molb'al chaaj, taqe i likb'al, taqe i chu'nchel i kamamb'al, taqe i nimaq cucharo, je' wo' chu'nchel i xa chib'ih jariik ruuk' q'an ch'ihch' korjinaq inkamanik parupaat i Dios.¹⁵Re' i Nabuzaradán k'amal kib'eeh soldado xuk'am wo' taqe reje i sansario, je' wo' taqe i ye'aab' nah wach q'aaq', je' wo' taqe i xa chib'ih jariik korjinaq taqe ruuk' oro, ruuk' plata.¹⁶Xuk'am reje i kiib' chi pilalix, je' wo' i nimlaj molb'al haa', ruch'ihil taqe i ch'ikaab' reh i re' i kikamanik parupaat i Dios ruyejaam ruuk' q'an ch'ihch' i Salomón. Re' kahliil taqe i re' ma' xuyeew ta riib' chi pajarik.¹⁷Re' i kiib' chi pilalix b'elejeeb' b'ara kooq, eh jinaj b'ara ruuk' yejaal i kiju' b'otooj chi q'an ch'ihch' xoyimaj i kiju' chi tolotaq q'an ch'ihch', je' wach granado. Eh eliik wach b'anooj keh i kiib' chi pilalix.

¹⁸Re' Nabuzaradán i k'amal kib'eeh i soldado xuk'am wo' reje i Serarías, i peet k'amal kib'eeh aj tiij, je' wo' hoq i Sofonías i rukab' i k'amal kib'eeh aj tiij, xuk'am wo' taqe reje ixib' chi soldado i kib'anik i cha'jinik panookb'al reh i rupaat i Dios.¹⁹Eh xuk'am wo' reje Babilonia taqe i ho'oob' kikojwik runa'ojb'al i kireey i aj Judá. Eh xuk'am wo' taqe reje intaaq'anik keh i ki soldado i aj Israel, ruch'ihil i winaq intz'ihb'anik reh i kib'ihnaal i tinamit wilkeeb' ar. Eh xuk'am wo' taqe reje oxk'ahl chi winaq ko wilkeeb' pan tinamit.²⁰Eh re' i Nabuzaradán xuk'am taqe reje chuwach i kireey i aj Babilonia ar Ribla.²¹Re' i kireey i aj Babilonia ar xutaq'aaj kikanteesjiik, chupaam i tinamit Ribla.
Je' aj re' noq xi k'amarik reje tokoom tinamit i aj Judá. Re' taqe i koxikahnik Judá xiooj Egipto

²²Re' Nabucodonosor kireey i aj Babilonia xupab'aa' chi ajaab'esil ar Judá i Geladías, rak'uun i Ahicam riih i Safán. Reh chi naa rucha'jeem taqe i tinamit xukanaa' Judá.²³Eh noq xkib'iraj taqe i k'amal kib'eeh i ki soldado i aj Judá ruch'ihil i kitinamiit chi re' chik i Ahicam xkahnik chi ajaab'esil chikinaah, xiooj ar Mizpa chi kiq'orob'jiik i Gedalías. Re' i xiooj je' wili i kib'ihnaal: Re' i Ismael rak'uun i Netanías, re' i Johanán rak'uun i Carea, re' Seraías rak'uun i Tanhumet, aj pan tinamit Netofa, eh re' i Jaazanías rak'uun jinaj i winaq aj pan tinamit Maaca, xiooj wo' haa' i winaq wilkeeb' ruuk'.²⁴Re' i Gedalías xuq'or korik keh i xi ponik q'orinoq reh, je' wili i xuq'or keh: Matyo'jik taq chi nee taq ti kahnik chi hat taq kimoso i aj Babilonia, ti patinoq taq chupaam i ye'aab' wili, tikahnoq chi hat rumoso i kireey i aj Babilonia reh chi ma' xta taq neenak'ul, inki.

²⁵Eh re' i Ismael rak'uun i Netanías riih i Elisama, ma' tokoom ta ruuk' i kireey i aj Judá, chupaam i ruwuuq poh reh i haab' re' re', xooj ar Mizpa ruch'ihil taqe i lajeeb' chi winaq. Eh pankomonil xkikansaj i Gedalías, eh xkikansaj wo' taqe i aj Judá je' wo' taqe i aj Babilonia ruch'ihil ar i Gedalías.²⁶Noq xkilow chi je' re' i aj Judá, ma' k'isiin ta xchalik kiyo'jiik kuum i aj Babilonia xkimol chi elik xiooj Egipto chi nimaq chi kok' taq, je' wo' taqe i k'amal kib'eeh soldado. Re' Joaquín xehteesjik chi prexohjik Babilonia, eh xye'arik ruloq'il (Jer 52.31-34)

²⁷Eh noq wuquub' ru ka'winaq rub'eeh i rukab'laaj poh reh i ruwuqlaaj ru ka'winaq haab' ruk'amariik reje prexo i Joaquín ar Babilonia, re' i wihinaq cho chi reyil Judá. Chupaam i haab' re' re' xokik chi reyil ar Babilonia i Evil-merodac, eh xuketelaaj wach i Joaquín xresaj chi prexohjik.²⁸Eh xuq'oreej panotob'il, xa re' wo' reh q'e' xuk'ax chuwach taqe i reey wilkeeb' ruuk' i ar Babilonia.²⁹Je' re' noq xresaj i ruso' prexo chi riij i Joaquín, eh jinaj xkian wii' kiwa' nah mexa ruuk' i reey nik' chik najtiil xk'acharik.³⁰Eh eqal eqal inye'arik reh ruum i kireey i aj Babilonia i xuk'uxlaaj wii' riib'. Je' re' i xb'aan reh korehtaal chik xkimik.

Bible Society in Guatemala

https://app.library.bible/content/695aa4b9f902778f