Read 1 TIMOTEO 1

1 TIMOTEO1

¹Re' hin i Pablo, hin raj tahqaneel i Jesucristo. Xirupab'aa' i Dios, i aj Ko'len qeh. Eh xirupab'aa' i QaJaaw Jesucristo, re' i ch'iklik wii' qak'ux.²Re' i hat Timoteo, i hat manlik wak'uun noq wilkaat ruuk' i nimanik. Neeta naq i ruyeew chaaweh i rotob'il, i suq kiil k'uxliis, i ketelenik wachiis i Ajaab'ees Dios, i QaJaaw Jesucristo. Q'ilooj chi riij i xachukuj q'orik

³Eh noq xin chalik ayu' i hin Macedonia, xnupahqaaj otob'il awee hat chi xatkahnik cho Éfeso, reh chi naa aq'ilim taqe i kik'uhtanik reh i xachukuj q'orik.⁴Eh chi re' taqe hermano maankib'iraj i k'utaaj xama' xta rub'ehel, eh je' wo' jar b'uhr wach i b'ihnaal tz'ihb'amaj cho chikiij qamaam qati't. Re' taqe re' xa memil laj wech'inik iib', eh ma' ruyeew ta rukowiil qak'ux, reh chi nee ruk'ul qak'ux i ruyejaam cho wach i Dios.

⁵Re' k'uhb'aal k'ahchi' nuq'orom iraaj chi naa qak'axam qiib' ruuk' i k'axooj inchalik pan ánima chi ma' xta ruch'uwa'iil wach, ruuk' holohik laj kapeew, ruuk' i korik laj nimanik.⁶Wilik taqe i xkikanaa' rub'aan taqe i re', xkiq'eb' kiib' ruum i xa memil laj wech'inik iib'.⁷Re' taqe re' inkaaj naq chi aj tijoom taqe chi riij i ruk'uhb'aal i Dios. Xanaah re', ni xata re' keh kireqwiik chi riij i xa nkiyeew chik kik'ux chuk'uhtjiik.

⁸Korik qeht'al chi re' najtir k'uhb'aal ma' xta reet chi nimjik, xa re' la' wi xb'aan chi korik aha' wilik taqe i ruq'or.⁹Eh chanab'eej taq chi re' k'uhb'aal ma' xye'arik taj chi ye'b'al keh panti' k'axik i korik wach kik'ux. Xye'arik la' chi ye'b'al keh panti' k'axik ma' nkinimaj taj i korik, taqe i yiib' wach kina'ojb'al, taqe i aj mahk, taqe i ma' imponik ta panaq'kiwach i Dios, taqe kansan kituut kajaaw, taqe i kansan kas kichaaq'.¹⁰Keh taqe i wilkeeb' pan k'oyomal, taqe inki a'n k'oyomal kuuk' i kuch winaq, taqe aj jileq' kiristianu', taqe i chukul q'orik, taqe i kiq'orik reh i rub'ihnaal i Dios chi xama' xta rub'ehel, taqe i ma' inkinimaj taj i korik laj tijinik.¹¹Re' korik laj tijinik wili re' inkan ruuk' i loq'laj ak' k'uhb'aal, ruye'em cho weh i loq'laj qaDios chi naa nuq'orom rib'iral. Re' rut'iosjiik i ketelinik wachiis

¹²Re' hin inut'iosej reh i QaJaaw Jesucristo, re' i xye'wik rukowiil nuk'ux, ruum xrilow chi korik chik wach nuk'ux, xirupab'aa' chub'anariik i rukamaj.¹³Eh re' hin ma' tiklik ta xinq'orik cho chi riij, xnub'an cho ti' k'axik keh i kinimanik reh, eh xnub'aj taqe chaloq. Eh re' Dios xuketelaaj nuwach, ruum komajaa' hin aj nimaneel xa ko hinsah cheel noq xnub'an chaloq taqe re'.¹⁴Re' QaJaaw Dios xiik' naah i rotob'il xub'an wuuk'. Xuk'uhtaaj weh i korik laj nimanik, i k'axooj naaqa'nam noq wilkooj chik pan jinaj wach k'uxliis ruuk' i Jesucristo.

¹⁵Re' wili xti korik eh ajwaal wach chi chu'nchel naakinimaniik reh chi re' Jesucristo xk'ulik ayu' wach ak'al chi kiko'ljiik taqe aj mahk. Eh re' naq i hin xti xiik' cho naah i numahk chikiwach i keh.¹⁶Re' wili i rub'ehel noq xuketelaaj cho nuwach i Dios reh chi peet xk'utinik wuuk' i hin xti ko aha' imponik i kuyuuj i rub'an i Jesucristo. Reh chi naa kitijem keh wuuk' i naakinimaniik reh koq'uun, reh chi neenkehchaaj i juneliik k'acharik.¹⁷Ruum aj re', eliik taq qayeew ruloq'il, je' wo' i runimaal wach i Reey chi juneliik, re' i jinaj chi qaDios, ma' nilarik ta wach, eh ma' jaruuj naa rukimiik Je' ta wo' naq re'.

¹⁸Timoteo, hat wak'uun noq wilkaat, xti cha chop ak'ux chi ko'ljiik riij i holohik laj na'ojb'al ruuk' i nimanik, ruuk' holohik laj kapeew. Cha a'n rub'aan i re', je' rukab' i kiq'orom cho chawiij taqe hermano parub'ihnaal i Dios.¹⁹Wilik taqe i xkiq'eb' chi riij kik'ux i holohik laj kapeew, eh ruuk' i re', xkikanaa' i korik laj nimanik.²⁰Je' re' i xub'an i winaq, Himeneo rub'ihnaal, ruch'ihil i Alejandro. Re' taqe re' xnuq'asaj taqe pan q'ab' i aj Yahm, k'ajresb'al kiwach, reh chi ma' nee ta chik inkib'aj i Dios. Ruch'ob'ariik rub'ehel chi naa rub'aan i tiij

¹Re' hin peet inwaaj nuq'orom chi pahqaljoq aha' wilik i ajwaal wach, b'anroq i tiij chu'nchel k'uxliis, t'iosjoq i rotob'il i Dios chikiij chu'nchel i tinamit.²Eh b'anaroq tiij chikiij taqe i reey, chikiij taqe i xa reh reh wach kajaawriik chi taaq'anik, reh chi neqoh k'acharik parukorkiil, pansuqkiil k'uxliis, ruuk' loch'ik.³Re' taqe re' ma' xta reet chi b'anarik, eh xti imponik chuwach i Dios, qaj Ko'loom.⁴Re' reh iraaj chi chu'nchel i tinamit neekiko'ljik eh neenkireq chi riij i xti korik,⁵ruum xa jinaj wo' hoq i Dios, xa jinaj wo' hoq inkojwik keh chu'nchel i tinamit panotob'il ruuk' i Dios, re' i Jesucristo, xk'ulik chi ruwii' winaq wach ak'al.⁶Re' Jesucristo xuyeew riib' pan ti'laj kimik chutojariik riij i kiko'lb'aal chu'nchel i tinamit. Re' wili xye'arik cho chi naab'jik xti manlik paruq'ijil.⁷Ruum i re', xirupab'aa' i Jesucristo chi hin raj tahqaneel, chi hin q'orol rib'iral i ak' k'uhb'aal, keh i ma' re' ta taqe aj judío. Eh re' nuq'or chi riij i Cristo korik, ruum re' hin ma' kinchukwik ta q'orik.

⁸Re' hin inwaaj chi re' taqe winaq kian kitiij xa aha' yuuq' kijosam i kiq'ab' chi ma' xta ruch'uwa'iil wach i kánima chi ma' xta josq'iil kuuk', chi ma' xta wech'inik iib'.⁹Eh re' taqe ixoq parub'ehel naakitiq'aam kiib', maaniik' naah inki a'n, paneb'a'il-oq la' kikoj i kiso'. Man ki k'olochb'isaj i rismaal kinaah. Mankixoyej kiib' ruuk' oro, ruuk' perla, eh ni xata ruuk' k'ih tz'aaq itz'ihy.¹⁰Kitiq'aa' la' kiib' ruuk' i rub'anariik i holohik laj na'ojb'al, je' rukab' i ruk'ul chi keh ixoq kinimanik ree Dios.¹¹Re' taqe ixoq inchol kib'iram i kik'uhb'aljiik imb'aan chi ma' xta choqik neenkian, eh kiq'asam-oq kiib' chi korik ree Dios.¹²Re' hin ma' nuyeew ta q'ab' reh ixoq chi neerub'an i k'uhb'alinik chikiwach i tinamit, eh ni xata neenjohtik naah chinaah i winaq. Inwaaj chi ma' xta choqik neerub'an ixoq.¹³Ruum re' Dios peet xuyejaa' chaloq i Adán, eh re' Eva koq'uun xuyejaa' chaloq.¹⁴Eh ma' re' ta wo' hoq i Adán xjot'arik ruum i aj Yahm, re' la' ixoq xjot'arik, ruum i re' xq'ehb'ik pamahk.¹⁵Xa re' la', re' ixoq nee wo' inko'ljik wila' xuk'isaj taqe i rak'uun rixq'uun parub'ehel, eh wila' korik wach i runa'ojb'al chi nimanik wila' xk'axwik, wila' xk'acharik pan santohiil. Re' nakianam i k'amal kib'eeh i rutinamiit i Dios

¹Re' wili xti korik: Awach i ruk'ax wach i k'amaj kib'eeh i kinimanik ree Dios, looq' i kamanik k'ahchi' rukapaam rub'aan.²Re' i wilik chi k'amaj b'eeh choloq k'acharik, reh chi ma' xta neench'ooljik wii. Xa jinaj-oq i rehk'een chuwach, k'acharoq parub'ehel, korik-oq wach i runa'ojb'al. Eh mo'-oq xa teheeh wach, chuyeew kipatal taqe rulaa', eh choloq k'uhb'alinik.³Mo'-oq xohk'reel laj winaq, mo'-oq sik'il peleto. Xa atoob'-oq la' wach ruk'ux wilik-oq i q'unil ruuk', mo'-oq k'axal wach tumiin re' ruuk' i ma' parub'ehel taj inkan.⁴Eh wilik-oq runa'ojb'al chi taaq'anik parupaat, eh chuk'uhtaaj keh i rak'uun rixq'uun nik' wach i loch'ik, i nimanik,⁵ruum awach i ma' nchol ta taaq'anik parupaat, ¿Nik' wach noq neerub'an kicha'jaljiik taqe i kinimanik ree Dios?⁶Re' k'amal b'eeh ma' nee ta rub'an chi ko ak' aj nimaneel, ruum nee-oq i runimb'isaj riib', nee-oq i ruq'eb' riib' pantojb'al mahk, je' rukab' i xuq'eb' wii' riib' i aj Yahm.⁷Koruman wo' hoq chi naa ruk'uhtaam i holohik laj na'ojb'al chi kixilak i ma' re' ta taqe aj nimaneel, reh chi ma' nee ta ruk'uhtaaj ruk'ixb'ilaal, eh ni xata neenq'ehb'ik paruxirob' i aj Yahm. Re' i nakianam taqe to'ool chi kixilak i kinimanik ree i Dios

⁸Je' wo' taqe i kitowik parukamaj i Dios, xa kiloch'ik-oq. Mo'-oq xa chib'ih jariik neekiq'ehb'ik wii' ruuk' i kiq'oral. Eh mo'-oq xohk'reel laj winaq taqe, mo'-oq k'axal taqe wach tumiin i ma' re' ta parub'ehel inkan.⁹Eh inchol kik'amam naah i korik xye'arik cho chi naab'jik, chi saq wach i kikapeb'aal.¹⁰Re' taqe re', peet wo' naakilariik ruuk' i kina'ojb'al. Eh wila' ma' chih kiq'ehb'ik wii', kora'j naakikojariik chi to'ooj re'.¹¹Je' wo' taqe i hermana ixoq, xa kiloch'ik-oq. Mo'-oq tz'aqal wach k'utaaj taqe. Holohik-oq i kik'achariik, eh korik-oq wach kik'ux ruuk' chu'nchel.¹²Re' taqe i to'ool, xa jinaj-oq i kehk'een chikiwach. Eh wilik-oq kina'ojb'al chi taaq'anik chikinaah i kak'uun kixq'uun, chikinaah chu'nchel i awach keh pankipaat.¹³Re' taqe to'ool inki a'n chi korik i rukamaj i Dios, nimaq chik wach i kikamaj inye'arik. Eh chu'nchel kik'ux neenkiq'or chi k'ahchi' kinimam i Jesucristo. Re' i ma' eht'alimaj ta naq chi riij i nimanik k'ahchi'kooj

¹⁴Re' hin inwaaj i ojik chi jumehq'iil cha wilariik i hat Timoteo. Xa re' la', peet inutz'ihb'aaj reje aweh panhuuj taqe i q'orik wili.¹⁵Wila' xinchahmik reje chi ojik, re' i holohik cha a'n chi kixilak rak'uun rixq'uun i Dios, re' taqe i kinimanik reh i k'achlik Dios, re' i kichopinik naah, re' kiko'linik riij i korik.¹⁶Eh xti, xiik' naah nimaal wach i ma' eht'alimaj ta naq chi riij i korik, je' wili noq wilik: Re' Jesucristo xk'ulik wach ak'al, chi ruwii' winaq. Xuq'or i Santolaj Uxlab'al chi korik wach ruk'ux. Eh x-ilarik wach kuum i ánjel. Xq'orarik rib'iral keh i ma' re' ta taqe aj Judío wilik i xinimanik reh sut i wach ak'al. Eh xk'amarik wo' chik johtoq pan taxaaj ruuk' i ruloq'il. Re' taqe i naa ruyojiik kik'ux chi nimanik

¹Re' Santolaj Uxlab'al i xuq'or i korik chi pan tz'apaab' ponoq wach reh i q'iij wilik i naa ruyojiik kik'ux chunimjiik i korik laj k'uhb'aal. Re' chik taqe i uxlab'al i kib'anik jot'ooj naakinimam, eh re' chik naakinimam i tijinik inchalik kuuk' i aj Yahm.²Eh re' chik naakinimam inkiq'or i xak'ul inki a'n kiwach, chukul q'orik taqe, k'ahtinaq i kikapeb'aal.³Re' taqe re' inkiq'or chi mahk i kaxárohiil, inkiq'or chi wilik i k'uxb'al wi'k mahk chi k'uxarik. Eh ma' nkikapaaj taj chi re' Dios xtz'uhkrisanik chaloq reh chi naa kik'uxum, eh chi naa kit'iosem ree Dios taqe aj nimaneel, i keht'al chik wach i korik.⁴Chu'nchel i rutz'uhkrisam chaloq i Dios q'e' looq'. Ma' ruk'ul ta chi neenqayub'uj naa la' ruponiik panaq' qawach eh naaqat'iosem ree Dios,⁵ruum re' ruq'oral i Dios, eh re' i tiij imb'aan inkuxisanik reh taqe k'uxumb'al re' re'. Jinaj raj kamanoom i Jesucristo korik wach ruk'ux

⁶Timoteo, wila' xak'uhtaaj keh i hermano taqe re', wila' k'ahchi' areqem rukowiil ak'ux i ruuk' korik laj nimanik, ruuk' i holohik laj tijinik k'ahchi' kaat, chi je' re' hat manlik raj kamanoom i Jesucristo.⁷Eh manimaj aweh i hat taqe i yiib' wach k'utaaj imb'aan, re' taqe i xa memil laj q'orik. Chachop la' ak'ux chub'anariik iraaj i Dios.⁸Re' rutijiik i xa chib'ih k'o'nikaal xa reh i ti'jolal inkamanik. Raaj i rub'anariik iraaj i Dios reh i ruyeew qeh i suq laj k'acharik ayu', eh je' wo' chupaam i junch'iht chik chi k'acharik.⁹Re' wili xti korik, eh ajwaal wach chi chu'nchel naakinimaniik reh.¹⁰Ruum taqe re', inqakuy ransil i ti' chub'anariik i rukamaj i Dios, ruum qeht'al chi re' hoj ruuk' i k'achlik Dios ch'iklik reje qak'ux re' i Ko'len keh chu'nchel i tinamit, eh Ko'len wo' keh chi manlik i kinimanik reh.

¹¹Re' taqe wili, ajwaal wach chi naa aq'orom, eh naa ak'uhtaam.¹²Mayeew q'ab' chi neenkiyeew chi re' chi ma' re' ak'ijolal. Chak'uhtaaj la' i holohik laj na'ojb'al chikiwach i aj nimaneel ruuk' aq'oral, ruuk' i na a'nam, ruuk' i k'axooj, ruuk' i nimanik, ruuk' i rusaqiil wach ak'achariik.¹³Noq komajaa'-oq kimponik i hin, re' hat chawilow paam i Santolaj huuj chi kixikin i taqe aj nimaneel. Chayeew rukowiil kik'ux, eh cha tijej taqe.¹⁴Eh maayeew chi re' chi ma' re' akooch ruye'em aweh i Dios noq xkiyeew i kiq'ab' cha naah parub'ihnaal i Dios taqe to'ool chi kixilak i komoon aj nimaneel.¹⁵Chachop ak'ux chub'anariik taqe re', reh chi chu'nchel naakikojwiik rehtaal chi k'ahchi' areqem ana'ojb'al chi manlik.¹⁶Chawik'raaj awiib' i hat cha wib'il awiib', je' wo' ruuk' i k'uhb'alinik naa a'nam, re' taqe re' naa a'nam. Wila' xa a'n taqe re', neetiko'ljik i hat, eh nee wo' kiko'ljik i neeki-ib'irinik reh i naa aq'orom. Re' ruk'uhtjiik i holohik laj na'ojb'al chikiwach i aj nimaneel

¹Re' mama' winaq chik maanaq, parukorkiil la' chak'uhb'alej, je'-oq awajaaw cha a'n reh. Je' wo' taqe k'ijolaq, parukorkiil taqe chak'uhb'alej je'-oq jinaj taq atuut awajaaw kuuk'.²Re' taqe ati't ixoq parukorkiil chak'uhb'alej taqe je'-oq atuut cha a'n keh. Eh re' taqe q'ahxoq, xa je'-oq kiq'orob'jik awanaab' cha a'n keh, korik-oq wach ak'ux kuuk'.

³Chatoob'eej taqe ixoq kamnaq kib'ahiil, re' taqe i xti korik chi ma' xta ilil keh.⁴Eh re' ixoq kamnaq rub'ahiil wilik taqe rak'uun rixq'uun oon riih rumaam, i ruk'ul chi re' keh i naakitoob'eem i awach keh pankipaat, reh chi neenkitoj riij reh i kituut kajaaw i kik'axariik b'anooj chaloq. Re' taqe re' ma' xta reet chi b'anarik, eh imponik chuwach i Dios.⁵Re' ixoq kamnaq rub'ahiil, eh xti korik chi ma' xta ilil reh, xa ruuk' tii Dios i ruch'ikaa' ruk'ux, eh ma' rukanaa' ta rub'aan i tiij chi q'iij chi aq'ab', reh chi re' Dios neentoob'inik reh.⁶Wila' re' ixoq kamnaq rub'ahiil i ruchop q'ab' iraaj ma' raaj b'anarik paruk'achariik, re' re' kamnaq parumahk.⁷Re' taqe na'ojb'al wili naa ak'uhb'alem taqe wii', reh chi ma' xta neekiq'ilarik wii'.⁸Ruum awach i ma' rukapaaj ta rutoob'jiik i awach reh, eh mo'-oq wo' rukapaaj rutoob'jiik taqe rak'uun rixq'uun, ma' imponik ta panaq'wach runimjiik i Jesucristo, q'e' wo' chik yiib' wach imb'anik chuwach i ma' re' ta aj nimaneel.

⁹Re' ixoq kamnaq rub'ahiil naa akojom paruman reh i rutoob'jiik, xa re' wo' hoq ik'inaq oxk'ahl haab' ruhab'ul, eh xa jinaj-oq wo' rub'ahiil ik'inaq.¹⁰Eh holohik-oq i runa'ojb'al: Ruk'isam-oq taqe i rak'uun rixq'uun parub'ehel, ruye'em-oq cho kipatal i rulaa', rutz'ajam-oq i kooq i santo laj aj nimaneel, rutoob'eem-oq taqe i wilkeeb' panti' k'axik, eh xa chib'ih-oq chik jariik i xtoob'inik cho wii'.¹¹Eh re' taqe i ko q'ahxoq kamnaq kib'ahiil, maakoj taqe paruman, ruum ko nee-oq inkik'ax wach rub'aan i ma' holohik taj, nee-oq inyoj kik'ux chunimjiik i Jesucristo, eh nee wo' chik inkootwaaj kaxáro ruka'peech,¹²inkikoj kimahk, ruum inkiq'eb' chi riij kik'ux i rukamaj i Dios i kiq'orom cho pampeet chi nakianam.¹³Eh xa kiooj chi' taq paat, inkichop q'ab' i sikilal. Eh ma' xata re' i re', molol la' wach k'utaaj taqe. Xa chib'ih jariik inkimin wii' kiib'. Eh xa chib'ih i yiib' wach q'orik i nelik cho pan kichii' re' i ma' ruk'ul ta chi q'orarik.¹⁴Ruum aj re', re' hin inwaaj chi neenkian kaxáro ruka'peech taqe ixoq kamnaq kib'ahiil, i ko q'ahxoq taqe. Wih-oq kak'uun kixq'uun kicholoq k'acharik pankipaat, eh ma' nkiyeew q'ab' chi neekich'ooljik ruum i aj ixowaal,¹⁵ruum wilik chik kamnaq kib'ahiil xkikanaa' runimjiik i Jesucristo, re' chik i aj Yahm k'ahchi' kinimam.¹⁶Wila' re' ixoq aj nimaneel wilik i awach reh kamnaq rub'ahiil, inchol taqe rutoob'eem, reh chi ma' chikinaah taj i aj nimaneel neenkahnik i ihq re' re'. Chi je' re', re' taqe aj nimaneel neenkian rutoob'jiik taqe ixoq kamnaq kib'ahiil, re' i xti korik wo' hoq chi ma' xta ilil keh.

¹⁷Re' taqe i to'ool inki a'n rukamaj i Dios chi korik, i ruk'ul chi neekik'axarik chi manlik. Eh xti ruk'ul wo' hoq chi je' re' neenb'aan keh i kiq'orik rib'iral i ruk'uhb'aal i Dios, eh inki a'n wo' i tijinik,¹⁸ruum pan Santolaj huuj i ruq'or chi je' wili: Maab'ak' i ju' b'ooyax k'ahchi' ruyeq'em parooq i trigo, inki. Eh i ruq'or wo' chi je' wili: Re' aj kamanoom rub'ehel chi nee ruk'ul i rutojb'aal, inki.¹⁹Manimaj i mahk neentz'aqarik wach aweh chi riij jino'q i to'ool wila' ma' chih ki'ib' oon ixib'-oq i neekiq'orik i korik chi wilik ru mahk.

²⁰Eh re' taqe i ma' kikanaa' ta rub'aan i mahk, inchol taqe aq'ilim chikiwach i ruk'ihaal, reh chi re' taqe junch'uq neekiyo'jik chub'aan i mahk.²¹Chuwach i Dios, chuwach i QaJaaw Jesucristo, eh chikiwach ánjel sik'ooj kiwach, i nuq'or aweh chi maakanaa' chik runimjiik taqe i nuq'or aweh wili. Eh mo'-oq awach i tokoom rilariik neena a'n, ma' awach atiq naah ru mahk.

²²Maayeew aaq'ab' chinaah jino'q, reh chi nenokik chi to'ooj chi ma' akapaam ta riij chi korik, reh chi ma' nee ta ti ehtrik i ru mahk i tokoom. Eh chaq'eb' chi riij ak'ux i yiib' wach na'ojb'al.

²³Re' hat xa kok' xilak tiyowab'jik ruum apaam. Ruum aj re', maawuk'ej chik rutkeel jot'ik ha' chaxilakeej la' k'isinoq vino ruuk' riq'omal apaam.

²⁴Wilik taqe i kipa'ab'jik chi to'ooj xanoq wo' ink'utinik wach i kimahk noq komajaa' ta nq'atarik q'orik chikinaah. Eh wilik wo' chik i koq'uun inooj k'utinoq wach i kimahk.²⁵Eh re' kib'anik i holohik laj na'ojb'al, xanoq wo' ink'utinik wach. Eh re' i ma' holohik ta laj na'ojb'al ma' noq ta nk'utinik wach, xa re' la' ma' nkahnik ta chi ke'lik chi jumpech.

¹Re' taqe i aj nimaneel k'ayimaj pankowlaj kamanik, inchol ruponiik panaq'kiwach i kipatroon, reh chi ma' nee ta nq'orarik chi re' chi ma' re' i rub'ihnaal i Dios, i k'uhb'aal k'ahchi' qaq'orom.²Eh wila' aj nimaneel taqe i kipatroon, ma' ruyee ta riib' chi xa k'isiin neemponik panaq'kiwach, ma' xata ruum chi kuch aj nimaneel kiib'. Inchol la' kianam chi korik i rukamaj, ruum re' i k'ahchi' kianam rukamaj atoob'laj hermano taqe. Re' korik laj b'ehomal

³Wila' awach jino'q i tokoom laj tijinik i ruk'uhtaaj, mo'-oq eliik wach ruuk' i korik laj tijinik inchalik ruuk' i QaJaaw Jesucristo, eh mo'-oq je' rukab' i ruk'uhtaaj qeh i korik laj nimanik.⁴Re' reh xa nim wach i rub'an riib', eh ma' reht'al taj wach korik yojinaq i runa'ojb'al, ruum xa re' i wech'inik riij k'utaaj imponik chuwach. Eh ruuk' i re', inchalik i kaqwachiil, ixowaal, b'ajooj, yojoj k'uxliis⁵xa peleto inkaaj chi juneliik chi kixilak tinamit, ma' xta rub'ehel i kikapeb'aal ma' keht'al ta wach i korik. Eh ruum aj re', inkikapaaj chi re' i korik laj nimanik reqb'al b'ehomal. Maa a'n jinaj awach kuuk' i re'.⁶Korik, re' runimjiik i Jesucristo jinaj b'ehomal xiik' naah loq'il chi reh awach i suq ruk'ux ruuk' i chib'ih jariik i wilik reh,⁷ruum ma' xta wilik qeh noq xoj-aasjik ayu' wach ak'al, eh je' wo' chik re' na' qoh kimoq, ma' xtaj i naa qak'amam reje.⁸Xa re' la', mi wilik qawa' qahaa', eh wilik-oq wo' tii qaso', suuqb'oq qak'ux ruuk' taqe re'.⁹Eh awach taqe inkaaj b'ehomrik ma' nkikuy taj i pajarik, inkiq'eb' kiib' ruum ruk'axariik wach iraaj ma' raaj b'anarik, re' injot'wik keh i tinamit. Eh re' wo' re' ink'amwik keh pa runimaal tojb'al mahk.¹⁰Re' ruk'axariik wach i tumiin raa' ri'sil chu'nchel i yiib' wach na'ojb'al. Eh wilik taqe i xkiyeew cho kik'ux chinaah i tumiin, xkiq'eb' chi riij kik'ux i nimanik. Eh ruum i re', xchalik i ma' k'isa ti' k'axik chikinaah. Chopoj k'uxliis chi nimanik

¹¹Eh re' hat Timoteo, i tinimanik ree Dios, maa a'n aweh taqe re'. Tik'acharoq la' parukorkiil chaloq'ej i Dios tinimanoq cha a'n i k'axooj cha a'n i kuyuuj, xa ch'ub'ik-oq wach awánima.¹²Eh xti chayeew ak'ux chuko'ljiik riij i korik laj nimanik. Chachop ak'ux chureqariik i juneliik k'acharik, ruum re' re' xraaj awuuk' i Dios noq xusik' chaawach. Ruum wo' re' aq'orom cho rib'iral i nimanik chikiwach i ruk'ihaal, re' i xi-ib'irinik chaaweh.¹³Eh chuwach i Dios, inye'wik kik'achariik chu'nchel i chib'ih i wilik, eh chuwach i Jesucristo, re' i ma' xyo'jik taj chuq'orariik i korik chuwach i Poncio Pilato, re' hin i nutaq'aaj ruq'orariik aweh,¹⁴chi chanimaj taqe i nuq'or reje aweh. Majal chik wach, reh chi ma' awach ta neenq'ilwik aweh. Je' re' cha a'n korehtaal i rureq ruq'ijil i ruk'uliik ruka'peech i QaJaaw Jesucristo.

¹⁵Eh noq naa ruponiik ruq'ijil chuwach i Dios, naa rub'anam i wili, ruum xa re' wo' reh i jinaj chi Dios xiik' naah loq'il, eh Reey chikinaah taqe reey, Ajaab'ees chikinaah ajaab'ees.¹⁶Xa re' wo' reh i ma' naa ta rukimiik chi jumpech. Pan saqum wilik, eh ma' awach ta jino'q inerujil i koq riib' ar. Ma' jino'q ilwinaq cho wach, ni xata wo' neeruyee riib' chi nilarik wach. Re' ta naq i reh ye'aroq ruloq'il, ye'aroq runimaal wach i rajaawriik chi juneliik. Je' ta wo' naq re'.

¹⁷Timoteo, awach taqe i wilik kib'ehomal ayu' wach ak'al, cha q'or keh chi mankinimb'isaj kiwach, mankiyeew kik'ux chinaah i b'ehomal, ruum re' re' xanaa wo' rusahchiik wach. Ruuk' la' Dios kiyeew kik'ux, re' inye'wik qeh chu'nchel i xa chib'ih jariik inqa a'n rusuqkiil.¹⁸Eh chi neen wihik kuuk' i otob'il reh chi nee kib'ehomrik ruuk' i rub'anariik i holohik laj na'ojb'al, eh reh wo' chi xa atoob'-oq wach kik'ux chuye'ariik i naakisihim.¹⁹Chi je' re', naa ruwihiik kib'ehomal, re' i naa ruye'wiik keh jinaj i ch'ikaab' kik'ux, re' i naa rukamaniik keh pan jinaj q'iij, eh naa kireqem i juneliik k'acharik. Tz'apaab' wach ruk'uhb'aljiik i Timoteo xkuxik wii' wach rutz'ihb'jiik i huuj wili

²⁰Re' hat Timoteo, chako'leej riij i ye'ooj cha naah ruum i Dios. Maab'iraj taqe i yeb'ee wach k'utaaj, i xama' xta rutiq wach, je' wo' hoq i wech'inik iib' chi riij i na'ojb'al, i xa je' tii chik korik laj na'ojb'al noq inq'orarik.²¹Wilik taqe i xkichop q'ab' i ma' korik ta laj na'ojb'al, ruum i re', xkiq'eb' i korik laj nimanik.
Re' ta naq i rotob'il i QaJaaw Dios nee ruyeew taq cho cha naah ar. Je' ta wo' naq re'.

Bible Society in Guatemala

https://app.library.bible/content/695aa4b9f902778f