Lome7
1Ne damenedali, muguli mana amoda nafuluba hilisebu gilifea selesu. Gili hilisebu, inolo aso bebea aselabia aasimo, muguli suluhe e sefia uluba adabiasu abia, e olasi elolo.2Nahe sulu ewe dedeba saeyobasu. Ido aino aso bebea saabimo, e muguli suluhe ainodai godaiba ufia labe. Auluso, aino olasenaga, e ainodai godaiba ufulu muguli amohe, e saabia no sebualegulu, e beega labe.3Auluso, idomo aino aso bebea saabi, ehe inolo nodai adesenaga, amo ilihe ido amomo susugu idoba saeyobafe. Auluso, ene aino amo olasenaga, muguli amohe e saabia no sebualene, e beega labe. Aulugulu, aino olafia labi, e inolo nofea aasenaga, amo e susugu molofale.4Aulugulu, ne damenedali, ido ainoda amone sadalu amohe gilifea iminiba selefe. Keliso olalu amo alefasia, mugulifealomo gili olalu dobu. Aulugulu, gilimo inolo nofea maiyone, aga beega alebaibu. Inolo No amomo, olaiyafia haiba degelu amo, E labe. Efea daafia ligia, gilihe Godefea meyone sebe nafulu heleyo dobu.5Samini, ninihe helefealune huune hame sisa aso kuliba daaba alebaibimo, mugulihe nine domalafea mana wolu molobaiyeba mesegelo amo degeba ifosi, nini molofe amone sebe helesiamo, olalone sebe amosu helelo.6Auluso, samini ninimo mugulidai godaifia ufulu aloluso, agamo nini olalugulu, mugulifealomo, nini beega alebaibu. Aulugulu, agamo, nini muguline dabalu saabia no molobale ligia, aga ninimo, Asubanene eno hili amone kuliba abia, Ene dabalu molosu.7Auba aulugulu, ninihe eneba saeyobi? Mosesene muguli sulu amo, kegele wolubile? Seale aubale koleba. Muguli ufulualebiaga, wolu mana amogulu dobubamo, na eloba babaiyale. Muguli amo selesia, “Mesegemabiyoba” saaba ufulualebiaga, mesegelo mana amo amogulububa, nini asigibaiyale.8Auluso, woluhe mugulifea alefasia, eno isafia, ne asigine libo usu iwimo, mesegelo mana nokene nokeneba molomesi degeba ifolu. Auluso, mugulida malebiaga, wolu amo kiwida male adesia, olalugulu alebaiye.9Samini, na aso muguli manada asigibale asulu. Auluso, muguline molomalelu sulu na labea holobagasi, wolumo nafea bebea aselesia degeba ofelesi, na olaeyofealo daaba alolu.10Molomalelu sulu amohe nafeamo miliyolu meyobafeba hiliseluso, olalo amone mefe.11Mau enebamo, woluhe molomalelu sulu saaba ufulu amo difasia, na wolu molomesi gegelu. Mana amo alefasia, woluhe na dufa olalu.12Auluso, muguli sulu amo ene-mo, muuba kalilu noekene koleba dobu. Aufia, molomalelu sulu saaba ufulu amoda, muuba kalilu noekene, isolu seale nafulu dobu.13Ausenaga, eneba labe? Kegele nafulu amohe, aga nada dufa olaeyone kegele holobagalu dobula? Aubale koleba. Nada dufa olaeyone kegele amo kolebamo, wolu mana. Wolu manahe, kegele nafulu amo difasia, na dufa olamesi mololu. Auba mololumo alefasia, muguline molomalelu sulu saaba ufulu amo ulufa ofelesia, Godehe wolumo sesenelu kolebaba eloba bamesi ulufaba ufulu.14Nini hilisesiamo, muguli sulumo, Godene Asubanefea alefasia mulu. Auluso, nene na-mo, helefealune huu lolu. Auba kiwidale ligiamo, na wolu mana amone balu dabalu molomesi gadefasi, lolubu.15Na nene molosumo, amo molosuba nafuluba fadaba asigibale ligia, molosu. Mana na molobaiyeba asigilu amo, na mololale. Aubale. Mana na haboba bolomo, na mololo.16Aulugulu, nahe mana na moloyo hameluale amone moloba ligia, na mana amo nafulualebuba hilisesenaga, amohe walesia, na Godedai eesia, Ene muguli sulu amo nafulu dobuba hilisesububa walefe.17Aulugulu, na auba auyaleba eefia, mana na hamelualemo aso moloba elenaga, amo, auba molofe amo, nene naalebu. Aubale. Wolu nafea usu iwi yoba saabe ewe, e molofe.18Ausi, na eloba bisigiamo, kegele nafulu uleno ne libo usu iwi male koleba. Na auba selesumo, ne helefealune huu amone iminiba selesu. Maumo, na mana nafulu molobaiyeba hamelo. Auluso, mana nafulu moloba yaeyomo, na moloyodoluale ado.19Maumo, mana nafulu na molobaiyeba hamelomo, na mololale. Aubale. Mana wolu na moloyo hameluale ewemo, na molobasu ado.20Nahe mana na moloyo hameluale amo molosenaga, amo nene na molosuale. Aubale. Wolu nafea usu iwi yoba saabe amo, e mololo.21Aulugulu, moloba holobagaba ado mana ewehe sigiba molosi, na amo eloba bosolu. Moloba holobagaba ado mana ewe. Nahe nafulu molobaiyeba hilisesimo, wolu na galiba labe ewe moloba dafelagolo.22Seale, ne asigine libo usumo, Godene sulu muguli amo na hamesia, heafuba molobaiyeba ado.23Auluso, moloba holobagaba ado mana ewehe sigiba molosi, na eloba bosolu. Mana amohe, Godene sulu muguli ne asigine libo usu dobu ewedai belagusia, sigi sigisia diba bobolefe. Ausi, wolu na domalafea labe amohe na dofaba ofelesi, na amone dibolo lolu.24Yeele, na woba dafulu inolo! Abehe na olalone domala ewefeafia sububa dafelagoyobafebi?25Nine Saminilo Yesu Keliso Ehe, na sububa dafelagoyobafe koleba! Aulugulu, Godefea na wisoba selesu!
Auba sulu saaba samodosiamo, na eweguba selesu. Ne asigine libofealomo, nene na Godene sulu muguli sisa ligia, amo kuliba daaba ado. Auluso, ne helefealune huufealomo, na wolune molomalelu sulu sisa ligia, amo kuliba daaba moloba ado.
Auba sulu saaba samodosiamo, na eweguba selesu. Ne asigine libofealomo, nene na Godene sulu muguli sisa ligia, amo kuliba daaba ado. Auluso, ne helefealune huufealomo, na wolune molomalelu sulu sisa ligia, amo kuliba daaba moloba ado.
Wycliffe Bible Translators, Inc.