Lome6
1Aulugulu, nini amone eneba saeyobi? Godehe nini kanululomo bule wasigamesi, nini wolu mololabia daabasu miliyobile?2Auba auyobafale! Ninimo wolufealo olafia alebaibugulu, ninihe wolu mololabia abia, saabia no aselabia maiyale.3Ninimo Keliso Yesudai kulisia, hano gelu. Auba mololu amohe, nini Edai kulisia, olaluba walelu. Gili auba asigifia ligia, galilosi.4Nini hano gesia, Yesudai olasi, baliba ufulu. Ami ligiamo, Naone elalelu kiwigagaluda amofea alefasia, Keliso E daneba yaaiyafia, degeba ifolu amoguba, ninida aubasu miliyolu hili amo aselabia, dedalebasu melesi gadefalu. Idele inolo hano gefe.5Nini Kelisodai kulisia olalunaga, E degelugulu, ninida Efea kulifia alebaibune, degeyobafe.6Nini asigibu, nine libo amakelelumo Kelisodai imolane uluba ofelesia, olalu dobu. Amohe, nine domalane wolu mololo amone kiwi olaboba dafogolu. Ausi, woluhe, ninifea ene dibolo inologulu balu dabalu molomaba saabia no saeyodoluale.7Mau enebamo, olalu inolomo, molomaba selefemo dobolale ligia, sulu amo kuliba maiyodoluale. Aubale. E beega labe. Aulune, woluhe efea saabia no molomasia yasiyobafale.8Nini Kelisodai olalugulu, nini Edai bebea misiyoba hilisesia, amone asigi ule ufulu.9Maumo, ninihe eweguba asigibu, Kelisomo olafasia, daneba yaaiya amifia haiba degelugulu, E haiba saabia no olaeyobafale. Aubale. Olalone kiwigagaluhe, E haiba saabia no yasisia, E dufa dafogoyobafale.10Yesu olalumo, E fogo uluse olasia, wolune kiwigagalumo sunia bidifia, saidafulu. Aufia, E bebea labemo, E aga Godedai bebea saabe.11Eno amogubasu, gilida gine miliyolumo eweguba bamale. Wolufealomo, gili olalu dobu. Auluso, gili Keliso Yesudai kulifia alebaisia, Godedai bebea alebaibu.12Aulugulu gili, domalane wolu molobaiyesia, mesegelo amone kuliba anosi, woluhe gine olalone domala ogo aso molomasia yasifia melesi fogo memabiyo.13Gili olalu degeba ifofia, bebea alebaibugulu, gine meleba Godefea mefia melale. Gine domala haisi ulenomo, isoluale manane dabalu moloyone wolufea memabiyo. Aubale. Gine domala haisi haisiba sunia, isolu manane dabalu moloyone Godefea memale.14Enebamo, woluhe gili saabia no yasiyobafale. Maumo, gili muguli sisa alebaibuale. Aubale. Gilimo Godene kanululo sisa labe.15Aulugulu, nini amone eneba moloyobi? Nini aga muguli sisa ami saabia no alebaisiale, Godene kanululo sisa alebaibugulu, ninihe mana wolu waagi moloyobile? Auba moloyo hilisemabiyo!16Gili balu dabalu mololo amone mana asigima. Gilihe gine meleba, inolo ulenofea ene balu dabalu moloyone mefia elenaga, amo e gafea molomasi, gili ene sulu kuliba maiyo dobu. Inolo abehe molomaba solu suluda gili kuliba aafe amo, e gine yasilo labe. Aubasu, woluhe molomasi, gili amone balu dabalu moloba alebaisenaga, amohe gili olalofealo ami ulubia maiyobafe. Auluso, gilihe Godene balu dabalu mololo ligia, Ene sulu dofasia kuliba aasenaga, amohe, gili isolu moloba ufuluiya ami ulubia maiyobafe.17Saminimo, gili wolune balu dabalu mololo adesi, wolumo gine yasilo alolu. Auluso, aga Godefea wisoba henema. Enebamo, aga gili gine libo suniahe, Godene sulu mana gilifea walelumo, sigiba dobelesia, sulu amo kuliba dedaleba labe.18Godehe gili wolu dabalu mololofealofia sububa dafelagofia, aga gilimo isolu mana amone balu dabalu mololo melesi moloba ufulu.19Gine asigi abobofe amone bisigia, na sulu solu ewe helefealufea balu dabalu mololo mana amone dedeba selesu. Gili maa asigilosi. Saminimo, gili wolu nugumaluda, wolune wolu bule kolebada, amone balu dabalu moloyofia, gine domala haisi noolomo mana amofea melabiasu daaba alolu. Auluso, agamo amogubasu, isolu manane balu dabalu moloyofia, gine domala haisi haisiba ogo, isolu mana amofea melabiasu daaba melale. Ausia, gilimo Gode Ene idele inolo adesia, gili Edai muuba kalilu ligia, noekene miliyobafe.20Gili aso wolune balu dabalu mololo alebaibimo, isolu manahe gili yasifia aloluale.21Gili auba moloba labi, mana aga gili yuafe ogofeafia sebe halagulu suba yaalu? Olaeyone sebe amosu suba yaalu.22Auluso, agamo, gili Godene balu dabalu moloba ofolo faibe holobagafia labimo, wolu manahe, gili saabia no yasifia uluba labale. Aulugulu, gili aga sebe susiamo, Godedai muuba kalilu koleba ligia, miliyolu miliyone sebe suba yaafe.23Elebe, woluhe mefe amo, olaeyo. Ulu kegele Godehe mefe amo, miliyolu miliyo. Ausi, nini nine Saminilo Yesu Kelisofea kulifia ligia, miliyolu alefalu miliyobasu.
Wycliffe Bible Translators, Inc.