Hilibaisi Daalu14
1Aufia, Aikoniama dauno ami, Folodai, Banabasadai, aalu anoguba, Yudane gulugululo molo usu huga daafia, aaluhe Godene sulu mana walelu. Aaluhe sulu amo nafuluba sigiba domesiba solumone, Yuda idele inoloda, Giligi idele inoloda, ili wedinale asigi ule ufulu.2Auluso, sigidubuluale Yuda inolo noolo ili amohe, yau idele inolo noolone asigi degeba ofelesi, ilihe sigidubulu ili amofea haboba abulu.3Ausi, Folodai, Banabasadai, Aikoniama ami fogo selale ligia, aaluhe Saminilofea anifia ligia, sagilibale koleba selaba alolu. Auba ausi, Saminilohe aalufea kiwi mefemo alefasia, aaluhe momolelu kegele nokene nokeneba mololu. Mana amo mololumo alefasia, Saminilohe idele inolofea walesia, sulu aalu solu amo seale koleba.4Auluso, idele inolo dauno ami kakainalu ili amo, aidaba osolaba dafulu. Noolohe Yuda inolo amo ilidai hilise ule adesi, ausi noolomo hilibailu inolo aaludai hilise ule alolu.5Aufia, Yuda inolo amo ilida, yau inolo nooloda, ine guni inolo galibafia, nenesia, ilihe Folodai Banabasadai woba ofelesia, aalumo abane odesia dufa olaeyoba daiyalu.6Folodai, Banabasadai, aaluhe inolo ili amo moloyo daiyaluba selefe sulu gi dofasia, aalu fisaba abia, disiligi Likonia ami, Lisidola daunodai, Debi daunodai, ami daafia ligia, dauno aida amone anibamo siba alolu.7Aalu ami siba ligia, Awalu Sulu Nafulu amo selabiasu, siba alolu.8Lisidola dauno ami, inolo uleno asulu amo, ene emo kiwida male asulu. Enae seba duluiya hamagifia, e emo wofia ligia, aubada wedinoda silale alolu.9Inolo amohe Folo sulu selefemo dobolaba labi, Folohe inolo amo si galiba bisigia, e-mo waiba homesine asigi ule dobi abulu.10Auba dobi baafia, Folohe koleba wuaasia selesia, “Ga koleba, ge emo isofia, kalugamaba” selesi, e suba aleba lagofia, maugaba degefia siba alolu.11Idele inolo wamili amohe, Folo mololumo bafasia, ine Likonia suluba wuaaba selesia, “Wae, gode aidamo inolo dofelefasia, nini labea suga mulubu.”12Auba hilisesia, ilihe Banabasa, e-mo gode Susi labebuba solu. Ausi, Folomo sulu dibia ano labe baafia, ilihe e-mo gode Hemese labebuba solu. 13Ili auba saafia, gode Susi amone soba melo inolo amohe, maamo efolo sogofasia, dofene keao dofolomo lubia inigia, aalufea soba meyone hilisesia, dauno amone eno saliba ami lubia mulu.14Auluso, Banabasadai, Folodai, kegele aalufea moloyoba sulu selefe amo dofasia, aaluhe wobasubale hidigifia, aine fagulo gagalafia, idele inolo wamili labefealo naguba abia, wuaaba selesia,15“Idele inolo, doma! Gili mana auba molofe ogo, enebane molose? Anida balu inolo ligia, gili waagulu lolu. Anihe gilifea awalu sulu nafulu eweguba selesu. Gilihe kegele masega gulugululo mana ogo afasia, besifia, Gode miliyoluda labefealo nolofia milale. Gode amohe anakiwida, helefealuda, salu hanoda, aufia kegele ami waalebumoda, sunia E moloba yaalu.16Seale, amakele Ehe yau idele inolo suniane enauwadalimo mana ine hamefeguba waagi mololabia malesi gadefalu.17Auluso, Ehe yau idele inolo E bamesifia, ilifea mana nafulu walelubiyo. Enebamo, Ehe ana lagifia hele hugaba molosia, geiya ami edo sobomesi moloba ofolo. Aubasu, Ehe gilifea naiyoda wedinale madeneba ofelesia, gine libo henelo wasigaaba ofolo.”18Folodai Banabasadai idele inolofea auba solu. Auluso, ilihe aalufea soba meyo molofe amo, aalu ili kaeyo kolelu koleba alolu.19Aufia ami, Yuda inolo noolo Adiogofiada, Aikoniamafiada, milibaifia, ili Lisidola dauno ami goasia, idele inolo noolone asigi sigiba molafasia, Folodai gisa melesi moloba ufulu. Ausi, ilihe Folo abane ololu. Aufasia, e olalubufasia, ene domala sigiba dibia daafia, dauno amone yala faisalo saidafulu.20Auba molosi, Yesufea asigi ule ufulu ili amo milibaifia, e aniba amaleba galisi, Folo e degelu. Degefia, e yala usu ami obegeba suga daalu. Adigi keafa, edai, Banabasadai, aalu Debi dauno ami maiyone daalu.21Aufia, aaluhe awalu sulu nafulu Debi ami walesihe, idele inolo wedinalemo walelu faibili holobagagalu. Aufasia, aalu Debi afasia, Lisidola ami inigia, Aikoniama amida goafia, inigia Adiogo obegeba mulu.22Dauno osoloa ami selabia sisia, aaluhe sigidubulu ami alebaibumofea kiwigaaba ofa selesia, “Gili seale asigi ule ufulu mau ogofea kiwigaafia melale. Nini Godehe Yasifia Luba Ligia Saminilo Ada ami aso sugaeyo ligiamo, nini higinilu eno wedinale dobia amidale maiyobasuba” solu.23Folodai, Banabasadai, aaluhe sese ule uleba guni inolo molobebeleba yaafia, aalu naiyo aiyaba ligia, Godedai sulu selesia, guni inolo ili amo Saminilone sone saabia ufulu. Saminilo amofea ili asigi ule ufulumo, Ene sone saabia ufulu.24Aufia, Banabasadai, Solodai, aalumo disiligi Fisidia auba selabia siba labeofia inigia, disiligi Famifilia ami goalu.25Aufia, aalu Godene sulu mana Fega dauno ami safasia inigia, aalumo Adalia dauno ami suga mulu.26Adalia amifia, aalu hano sibihe sefia inigia, Adiogo ami obegeba mulu. Saminimo, sidi amimo, kelisone inolo ilihe aalumo Godene sone saabia ofelesia, Godehe aalu sagoba homesi, Godedai sulu solu. Agamo aalu, dabalu amo molomaleba soiya hamagi obegeba mulu.27Aalu ami goasia, sese idele inolo sunia gagaiyomafia, Godehe aalufea alefasia mololumoneda, Godehe yau idele inolofea eno sogoba ofelesi, ili asigi besilu amoneda, ilifea awaba melu.28Aufasia, aalumo sigidubulu idele inolo Adiogo ami alebailumo galiba fogo selale alolu.
Wycliffe Bible Translators, Inc.