Hilibaisi Daalu12
1Fogo amo adesi, kini Helodohe sese inolo noolo naga meyofia seba yaalu.2Ehe inolo noolofea Yonene elewo Yemesemo helebesi dufa olamalesi, e dufa olalu.3Helodo e bisigia, Yuda ilihe e mololumo hamefebuba baafia, ehe Fida amoda sefasia dofalu. Amo mololumo, Boledi Yisida Ofale Subulumo Naiyone Sigilo Hilia adesi mololu.4Ausi, Helodo ehe Fidamo idele inolo si saabia godosia fadaayoba hiliselu. Auluso, e Isolaelene Sigilo Hilia amo samodomesi yasiba alolu. Auba yasifia ligia, ehe Fida dibolo molo usu yasiyone, ibolo selu inolo biniba binibaba gadefalu. Ili amo fogo ulenomo, ili amo alibiaba yasiba melesi gadefalu.5Aulune, Fidamo dibolo moloa labihe, ibolo selu inolo ilihe e yasiba alolu. Auluso, hilia sunia sese idele inolo ilihe Godedai sulu kiwigaaba selesia, e sagoba homesi selaba alolu.6Godoyo hiliamo adigi no labi, nigiliba amoyamo, Fida e ibolo selu inolo aida amo aleba dofafasia, hanefia alolu. Aufia labi, ibolo selu inolo aida nomo enogele adaaba alolu.7Fida auba hanefia ligia, hamagi bosolufalumo, Saminilone sulu dia ano uleno holobagasi, yane dibolo molosu neeba dowelu. Sulu dia anohe Fidane afafa dowesia, gilafia selesia, “Ga ogoba degemaba” selesi, seini aida ene sone dofalumo hodobailu.8Auba ausi, sulu dia ano efea selesia, “Digiasalo dofafia, samaga saligamaba” selesi, Fidahe auba mololu. Aufia, sulu dia ano selesia, “Ge fagulo selale ogo saligafia, na kuliba milalu.”9Aufia, Fida e sulu dia ano kuliba abia, molo hogolilu amo gadifia daalu. Auluso, ehe kegele sulu dia ano efea molofe amo sealebuba hilisebale, udiabileba hiliselu.10Aalu abia, ibolo selu aida eno kia yasiba alolumo suniafia abia, dibolo eno aeyene kaalumo sogofia, sidifealo maiyo daalu. Eno kaalu amo ene asiba sogosihe, aalumo baea aleba lagofia, eno ulenomo daaba ligia, hamagi bosolufalumo, sulu dia ano Fida afasia daalu. Godene sulu dia ano ulenohe Fida dibolo moloa alolumo sububa dafogofe.11Ausi, Fidane asigi sawasi, e ene meleba selesia, “Aga na koleba hilisefe, Saminilohe ene sulu dia ano na labea mebailuba hilisesu. Yuda mosomu ili suniahe kegele nafea moloyo daiyalumoda, Helodone sone saabia ufulumoda, Ehe amifia na obegeba gasiba dafelagoba dulubu.”12Ausi, e abia, Yone enae Malia amone moloa daalu. Yone amo ene wi nomo, Maga. Idele inolo wedinalemo moloa ami gagaiyofia, Godedai sulu selaba alolu.13Fidahe molo amone eno fafa faisa godogodosi, dabalu mololo ido uleno, ene wi Loda, ehe eno sogoyo mulu.14Auluso, ehe Fidane sulu eloba dobelesiamo, ene asigine libo henelu bule adesi, eno sogoluale. Aubale. E molo usu haiba naguba sugafia, idele inolo ili ami kakainabu amofea selesia, “Fida eno saliba yoba labeme!”15Auba selesi, ili efea selesia, “Ga kagoafela?” Auluso, e koleba selesia, “Aubale, seale e labe.” Aufia, ili selesia, “Gahe ene gesami abulu dagulo.”16Auluso, Fida eno aso godogodobasu labi, ili abia, eno sogosia, e labe baafia, ili wobasubale hidigilu koleba.17Ausi, Fidahe ili saumesi sone gaso olaboba melu. Aufia, e ilifea awasia, Saminilohe e dibolo moloafia baea sububa dafelagolu amone sadalu awalu. E ilifea selesia, “Gilihe Yemesefeada, nelewodalifeada, kegele ewe nafea mololumo saaba memale.” Auba safasia, e ili afasia, nolobalo daalu.18Adigi keafa hiliasi ami, ibolo selu inolo ilihe Fida male baafia, ili wobasubale koleba hidigifia, ine geleba doba bebelesia, “Fida wagi daalubi?”19Aufia, Fida male baafia, Helodo ehe inolo noolofea Fida isaeyo malaluso, ili e abuluale. Ausi, ehe ibolo selu Fidada yasilu amo godofia, ili amo dufa olamesiba solu. Aufia, Helodo e hele Yudia afasia sugafia, Sisalia sidi ami goafia alolu.20Kini Helodohe idele inolo Daila sididai, Saidono sididai, ami kakainabu ili amofea gadilu bule ufulu. Aulugulu, sidi aidane inolo ili gagaiyofia, Helodo babiyofia milibailu. Ilihe hele Helodo yasibia ami naiyo dilo. Amone ilihe edai sulu saeyo hamelu. Aufia, ilihe Balasadusu edaidale sulu solu. E-mo kini amone hanelo hogolilu amone yasilo alolugulu ili edaidale hilise ule ufiyo hiliselu. Aufia dufia, ili Helodo labea daafia, doba bisigia, ehe ili kanulufia gadilu dobumo aeaba homesi doba abulu.21Ausi, aeaba ufiyone iminilu hilia amo adesi, Helodohe kinine momadamo difasia, ene osolaeyone ailaiya yoba sigia, ami ilifea sulu bule solu.22E selaba labi, idele inolo ilihe koleba wuaaba selesia, “E selefemo, gode ulene mofebu, inolone mofealebuba” solu.23Helodohe ili selefe amo dobelesia, ehe Godene wi digiyo hamelualene, alebale hamagi, Saminilone sulu dia ano ulenohe e dufelesi, walefa wolu efea holobagasi, wafele deseinehe e naasi, e olalu.24Auluso, Godene sulumo kiwigaaba sobosia, hele sunia dedaleba samodolu.25Ausi, Banabasadai, Solodai, aaluhe aine dabalu Yelusalame ami moloba samodofia, Adiogo obegeba abia, Yone Magamo aaluhe ulubia daalu.
Wycliffe Bible Translators, Inc.