Aganebo Kolidi5
1Enebamo, nini eweguba hilisebu. Nine domala ewemo, helefealu iwi seele molo dulu amogulu labe. Seele molo kiwidale ligia, fogo selale dulu adale. Aulugulu, idele inolo seele molo usu misiyone fogo abobodeno amosu ado. Amogubasu, nini helefealu iwi nine domala usu fogo abobo misiyobasu. Helefealune seele molo amo wosimo, ninimo molo no, Gode dulu labe amone diyobafe. Molo amomo, inolo sonehe duluale. Aubale. Domala hili amo hebene lagi dobumone, alefalu miliyobafe.2Aulugulu, helefealu iwi nini seele molo amo usu ligia, higinilu disia, nini eweguba sogooba lolu. “Ne molo hili hebene lagi labe ami usu asebaiye!” Domala hagaea diyo amomo, Godehe ninifea fagulo kaaba ofologuba, kaaba ufiyobafe.3Mau enebamo, nini amo saligaba ofelesimo, abagudoa alolumo babiyobafale.4Nini seele molo helefealu dulu iwi aso sigiamo, higinilu diaba ligiamo, sogooba lolu. Maumo, nini domala amakelelumo, fagulo huba dafologuba, huba dafiyo hamefe. Auluso, nini domalada male miliyo hamefale. Enebamo, domalada male ligia, nini abagudoagulu babiyobafe. Auba hamefale. Aubale. Ninihe domala hili amone saabia saligabaiyeba hamelo. Ausi, domala bebea miliyoluda amohe, olalo domala amo gasiaguba dafelesi asigileyobafe.5Nini auba domala hili dimesimo, Godehe nini iminifia ami madeneba ufulu. Ehe kegele nafulu amo seale ninifea moloyobafebuba asigimesimo, Ene Asubane ninifea ama melu.6Auba asigisia, nini hilia sunia, kiwigaaba kalugaafia lolu. Nini helefealu iwi, seele molo aseloguba, aso nine domala usu sigia, ninimo Saminilodai Ene helea aso sigialeso, Edai hago loluba asigibu. Auba asigisiamo, nini aso kiwigaaba kalugaafia lolu.7Enebamo, ninihe E auba aso si bisigiale, Efea asigi ule ofalabia daaba lolu.8Nini nine domala gadefia daafia, Saminilodai misiyo dabaiyeba hilisesiamo, nini aso helefealu iwi ligia, kiwigaaba kalugaafia lolu.9Nini nine domala usu aso iwi sigianagada, aufia helefealu domala ewe afasia, Saminilone helea sigianagada, hilia sunia, ninihe Saminilo hamefeguba heafuba moloba miliyoba. Amone miliyone, ninihe migagaba aasu.10Mau enebamo, nini hilisebu. Idele inolo suniamo, Keliso ene osolaeyone ailaiya yoba saabea olegia ami kalugaeyobafe. Aufia, nini domala usu iwi aso sigia, mana nafulu mololunagada, me mana wolu mololunagada, nini suniahe, elebi elebiba mana mololu amoguba elebe diyobafe.11Nini Saminilo baaba sagilisiamo, E sisa ado. Aulugulu, ninihe idele inolo ine asigi sigiba molaeyosia waleba ado. Godehe inolo nini ewegulubamo, fadaba asigifia labe. Aulugulu, na hamesiamo, gilihe ninimo aubada fadaba asigimesi hamefe.12Nini aga sulu selesu ewemo, gilihe ninimo isolu inoloba bamesi hahanosia, nine meleba kaiisia selesuale. Aubale. Auluso, gili ninimone kaiimesi selesu. Enebamo, inolo noolohe libo usu molofemo bolale ligia, bado saabiasu bisigia, no anogo osolaba bolo. Ilihe ine meleba osolasia kaiisia, ine wi digilo. Gilihe inolo ili amoguludai nini saaba sulu selaba ligia, ninimone heneba kaiiba sulu samesine, nini gilifea fogo mesu.13Nini Godene Asubane alefasia, kagoalugulu besabenaga, nini Godene dabalu moloba ligia, auba lolu. Auluso, nini dawalolu inologulu besabenaga, nini gine dabalu moloba ligia, auba lolu.14Enebamo, Yesu Kelisone hameselohe nini uluba dibia sife. Aulune, nini eweguba asigiba lolu. Suniane fogo disia, inolo ulenohe ili amone alibiasia olalu. Auba aulune, eweguba besabe, ili sunia olaba yaalu labe.15Ehe nini suniane alibiasia olasiamo, nini aso haiba no nineba melesifia olaluale. Aubale, ninimo Ene-ba melesifia, Ehe nine fogo disia olalu. Auba olasi, Godehe E haiba degeba ifolu.16Aulugulu, nini no anogo osolasiamo, helefealu idele inolo si bafasia osolaloguba, saabia no amoguba osolalale. Seale, saminimo, ninihe helefealu mana kuliba abia, Keliso osolaba bisigiamo, E balu helefealu inolo alolububa hiliselu. Auluso, aga aubada saabia no hilisebuale.17Aulugulu, idele inolo abehe, Kelisodai kulifia labenaga, amo hili moloba dafelagolu labe. Amakelelumo afelesi, hili holobagalu labe.18Gode Ene alefasia, kegele amo sunia holobagafe. Nini saminimo Ene gisa aloluso, Ehe Kelisofea alefasia, ninimo Enedai hilise ule melesi seloaba ufulu. Aufia, idele inolo nooloda Edai hilise ule melesine, Ehe seloaba ofolone dabalu amo ninifea molomesi melu.19Seloaba ufiyo sulumo ewe. Keliso dabalu mololu amofea alefasia, Godehe helefealu idele inolo Edai hilise ule melesi seloaba ufulu. Helefealu idele inolo wolu sunia ili mololumo, Ehe alegasia, ilifea sabe moloba obegelale. Aufia, seloaba ofelesia, idele inolo Edai hilise ule melesine, sulu amone saeyo dabalumo, Godehe ninifea melu.20Dabalu ninifea auba melumo alefasia, nini Kelisone mofeyo adesu. Gode Ene Ehe, nine mofeyo koleba alefasia, gilifea kiwigaaba selefeguba, nini gilifea Kelisone wi alefasia, eweguba susiba selesu. “Wae, gili koleba, Godehe gili Edai seloaba ufiyone, Efea waagi fogo memale!”Folo e Yesu Kelisone mofeyo ligia, sulu mana walefe.21Keliso Efea wolu ulenoda male koleba. Auluso, Godehe nini sagoba ufiyo hamesia, nine wolumo sunia E saabia diba ufulu. Ausi, Keliso E wolu koleba alolu. Godehe auba mololumo, nini Kelisofea kulifia ligia, Ene isolu idele inolo melesifia aulu.
Wycliffe Bible Translators, Inc.