Agele Yone2
1Ne faibili, gili wolu mololosine, na sulu ewe gilifea seleba mesu. Doma. Nini aleba uleno wolu molosenaga, amo ninida sagoba ofolomo, Naodai lala olofa labe. Amo Yesu Keliso, Isolu koleba, amo E.2Nine wolu wagaba dafelesia heeyone, Ehe Ene miliyolu amo, seloaba ufiyone kegelegulu, Godefea ulu melu. Nine wolu heeyone amosuale. Aubale. Helefealu idele inolo suniane wolumo auba heeyosia, Ehe ili Godedai hilise ule melesi seloaba ufiyone, Ene miliyolu weaselu.3Eweguba eloba bamale. Ninihe Gode molomaleba solumo kuliba daaba elenaga, nini fadaba hilisesia, ninimo Gode asigibu.4Nini aleba uleno, “Na Gode fadaba asigibuba” selaba ligia, E molomaleba sulu saaba ufulumo kuliba aasalenaga, amo e masega sulu sodo inolo ligia, seale sodo mana efea male.5Auluso, nini aleba uleno, Godene sulu kuliba daaba elenaga, amo Ene hameselo mana efea seale koleba wasigafia ado. Eweguba eloba bamale. Ninihe hameselo mana molosenaga, nini Godedai kulilu loluba hilisebu.6Nini aleba uleno, “Na Godedai kulilu loluba” selesenaga, inolo amo ehe Yesu mololuguba moloba miliyo dobu.7Ne yagusodali koleba, molomaleba solumo, na gilifea seleba mesu ewe, hiliale. Aubale. Sulu ewe amakelelugulu, gili samini dofasia, ama asigiba dulu dobu.8Molomalelu sulu hamaganeso, aga hili hagaea bafasia, gilifea seleba mesu. Yesune mana alefasiada, gine mana alefasiada, nini bisigiamo, sulu amo seale koleba. Enebamo, nigiligagalu asigileyo hagoalesi, seale yane ama ulufa neefia labe.9Nini aleba ulenohe selesia, “Na yane loluba” selaba ligiaso, ene damene nofea gogoloba hilisesenaga, e aso nigiligagayia labe.10Inolo abehe, ene damene nofea hamesefia labemo, e yane usu daaba labi, kegele ulenohe e-mo gelebaiba ofolale.11Auluso, inolo abehe, ene damene nofea gogoloba hiliseba labe amo, e nigili gagaiya daaba ligia, ene asigine simo nigili gagaluhe kalaba dafulune, e eno amo aasuba hilisebale daaba labe.12Ne faibili, nahe sulu ewe gilifea seleba mesu. Yesune wi alefasia, Godehe gine wolu galiba dafulu.13Naodali, nahe sulu ewe gilifea seleba mesu. Gilihe, Inolo amo E maugaba adabia mulumoda, aga labemoda, fadaba asigibu. Fisamili, nahe sulu ewe gilifea seleba mesu. Gilihe henanene kiwigagalu dufa dafogofia, kaamo labe.14Ne faibili, nahe sulu ewe gilifea seleba mesu. Gilihe Nao fadaba asigibu. Naodali, nahe sulu ewe gilifea seleba mesu. Gilihe, Inolo amo E maugaba adabia mulumoda, aga labemoda, fadaba asigibu. Fisamili, nahe sulu ewe gilifea seleba mesu. Gili kiwida labe. Aufia, Godene sulu mana gine libo usu dobu. Aufia, gilihe henanene kiwigagalu dufa dafogofia, kaamo labe.15Gilihe helefealune mana mololo iwi dobumo hamesemabiyo. Inolo uleno helefealune mana mololo iwi dobumo hamesenaga, amo ehe Naofea hamesebuale koleba.16Enebamo, helefealune mana wolu mololo iwi dobu ewe, Naofea alefasia muluale. Aubale. Mana amo ewe, domalane asigi degeloda, si baafia mesegeloda, elelifia balaliloda, helefealu iwi alefasia mulu.17Helefealu eweda, mesegelo mana amoda, asigileyobafe. Auluso, inolo abehe Godene sulu mana kuliba daaba labemo, e alefalu miliyolu miliyobafe.18Ne faibili, aleba eloyo hilia holobagaeyo hagoale adefe. Samini gili dobelesiamo, andikeliso amo miyobafeba solu dubulugulu, aga andikeliso wedinale ama holobagagabu. Aulugulu, nini eloba bisigiamo, aleba eloyo hilia hagoalebuba hilisebu.19Samini ilimo ninifaba ua aloluso, aga sigidubulune mosomu seale koleba alolualene, ili noolo nini gadefia daalu. Ili seale koleba nine mosomu alolubiaga, amo aso ninidai alebaiyo. Ili nini gadefia daalumohe alefasia, ili nine mosomu alolualebuba walefe.20Auluso gilimo, Yesuhe gili enaosia iminiba ofelesia, Asubane Noekenemo gilifea melu. Aulune, gilihe seale sulu sodomo asigiba dulu alebaibu.21Aulugulu, nahe gilifea sowi ewe seleba mesiamo, gili seale sulu sodo mana asigiba dulualeba hilisesia, seleba mesuale. Aubale. Gilihe seale sulu sodo mana asigiba dulu alebaibuba hilisesia, gilifea seleba mesu. Seale sulu sodohe, masega sulu dofelelale koleba.22Masega sodo inolo, abe koleba? Sulu eweguba selefemo, amo e. “Yesu, E Kelisoale. Gode molobebelelu inolomo, E-ale.” Inolo auba selefemo, e koleba, Naodai, Ene Faibedai, waaselaba bisigia, andikeliso labe.23Uleno abehe Faibe waaselaba besabemo, Ene Enaofeada damene adale labe. Auluso, abehe Faibefea fogaba asigi ule ofelefemo, amo Enaofeada damene ado labe.24Sulu gili maugaiya amifia dubulu amo, fedoba semale. Ausenaga, gilihe Naofeada, Ene Faibefeada, kulifia miliyobafe.25Kelisohe ninifea oloba huliale sulu saaba ofelesia, Ehe ninifea miliyolu miliyo meyoba solu.26Gilida gegeba labe inolo amone mana, nahe gilifea lagi solu amone seleba mesu.27Auluso, Godene Asubane Kelisohe ninifea melu amo, ninidai kulifiasu labi, inolo nohe dawalolo ninifea waleyone dabalu male. Aubale. Godene Asubanehe masega sulu sodale ligia, seale sulu sodo amone kegele sunia gilifea walelo. Aulugulu, Asubane gilifea walefegulu, gili koleba, Kelisofea kulifia melale.28Ne faibili, gili koleba, Efea kulifia melale. Ausenaga, Yesu E ulufasi, ninimo, Ene si saabia yuabale ligia, Ene olegia kiwigaafia kalugaeyobasu.29Gili asigisia, Keliso E isolu koleba labeba hilisebu. Aulugulu, gili fadaba asigisia, idele inolo mana isolu moloba labe ili amo, Godefea alefasia dofelelu labeba asigimale.
Wycliffe Bible Translators, Inc.