Agele Yone1
1Sulu miliyoluda labe amo, maugaiya kolebafia labe. Ninimo, sulu amo dofasia, nine si E bafasia, nine sone E gelune, gilifea waleba selesu.2Miliyolumo, maugaba Enaodai alolu. E inolo alefasia, helefealu iwi ulufa holobagasi, nini E abulu. Miliyolu miliyo nafulu ewene, ninihe gilifea ulufaba saaba dafelagosu.3Gili ninidai dafifia melesine, ninihe abulumoda, dubulumoda, gilifea ulufaba saaba dafelagosu. Gili ninidai auba dafifia labenaga, nini ua Nao Godedai, Ene Faibe Yesu Kelisodai, dafifia miliyobafe.4Nine henelo wasigamesi koleba, gilifea sulu ewe seleba mesu.5Yesu Kelisohe sulu selesi, nini dubulumone, gilifea iwi waleba selesu. Sulu amo eweguba. Gode E-mo, yane labe. Efea nigiligagaluda male koleba.6Ninimo, nigiligagalu mana moloba ligia, selesia, “Na Godedai dafifia loluba” selesenaga, sulu seale sodo mana ninifea male. Aubale. Ausenaga, nini masega gegelo.7Auluso, E yane usu labeguba, ninida yane usu daaba elenaga, amo ninimo, nine geleba damene ligia, ua dafifia miliyobafe. Auba elenaga, Godene Faibe Yesune ibihe, nine wolu sunia heeba dafelesi, nini galagololu gadefafe.8Nini selesia, “Na wolu maleba” selesenaga, ninihe nine meleba gegesia, seale sodo mana ninifea male.9Auluso, ninihe nine wolu mololu fogaba selesenaga, Godemo isoba sabelo ligia, Ene sulu saaba ufuluguba kuliba abia, nine wolu hamasia heesia galiyobafe. Aufia, mana isoluale ninifea dobumo, Ehe sunia heeba dafelesia, nini galagololu gadefafe.10Nini selesia, “Na wolu mololualeba” selesenaga, sulu auba solu amohe selesia, “Gode E masega sulu sodo inoloba” sodo labe. Nini auba ausenaga, Godene sulu mana nine asigine libo dobuale.
Wycliffe Bible Translators, Inc.