Mark9
1วั๊วน๊อยกับเหร่ากระ ฮอยท๊อยเจี๊ยนจริงกับไทเจ้ากระ มีลางแอ้งที่ย๊องอยู่ลี๊ด๋าโบ๋พ้อกับเจี๊ยนปร๋ายจนกว๊วด๋าแล๊นเป๊นบั๊นห่องพระเจ้า2หกมื้อทร่อม๊าพระเยซูพาเปโตร ยากอบและยอห์นหึ๊นส๊างร๊อยกับวั๊ว ทรั๊วห๊องวั๊วกะเปลี่ยนไปทร่อหน้าเหร่า3โส้งเพี๊ยะห๊องวั๊วด๋าฮ้าวมันยิบๆ โบ๋มีซ้างฟอกเพี๊ยะฮุนเด๋อด๋าฮิดเห๊อฮ๊าวอย่างแน๊นได่4แล่วเอลียาห์ด๋าปรากฏแด่ลึ๊กศิษย์อ๊างแน๊น กึ๊งตร่าวกับวั๊ว5เปโตรจ๊อวั๊วกระ อาจารย์เอ้ย กึ๊งดีด๋อที่ฮอยได่ม๊าอยู่นี่เห๊อฮอยฮิดตุบหึ๊นสามหลัง เห๊อวั๊วหลังนึง เห๊อโมเสสหลังนึ๊งและเห๊อเอลียาห์หลังนึ๊ง6เปโตรโบ๋ล๊อกระด๋าน๊อยอะทา เย้อเหร่าด๋าหล๊าว7มีเวี๊ยะม๊าป๊อกฮุนเหร่ากรือและมีเยี๊ยไต๊หว๊านค๊อยเวี๊ยะแน๊นกระ ฮุนดอนี้พันลึ๊กห๊องฮอยเห๊อเยี๊ยแท๊นน๊า8แค๊นทรู่แน๊น ลึ๊กศิษย์แนมเปร๋าม๊าด่าโบ๋แล๊นผะเด๋อ แล๊นแด่พระเยซุกับเหร่า9ฮั๊กล๊องแต่ส๊างร๊อยวั๊วน๊อยลิ๊ลึ๊กศิษย์โบ๋เห๊อโหร่ท๊อยสิ่งที่แล๊นกับฮุนอื่นจนกวั๊วบุตรมนุษย์ด๋าพันหึ๊นค๊อยปร๋าย10แค๊นแน๊น ลึ๊กศิษย์จั่งกิ๊บเรื่องลี๊กรือแดกะจ๊อกิ๊นกระ เจี๊ยนพันหึ๊นค๊อยปร๋ายมีเจี๊ยนหมายอะทา11เหร่ากึ๊งจ๊อวั๊วกระ อะทาธรรมาจารย์จั่งโหร๊กระ เอลียาห์ด๋าหลบม๊า12วั๊วน๊อยลิทาจ๊อเหร่ากระ เอลียาห๊ด๋าต้องม๊าก่อนเย้อฮิดเห๊อทุกอย่างคืนม๊า อะทายื๊อมีเจี๊ยนเขียนกึ๊งบุตรมนุษย์กระ วั๊วด๋าต้องทนทุกข์และด๋าถึกถิ๊ม13แต่ฮอยจ๊อเจ้ากระ เอลียา์แน๊นได่ม๊าแ่ว และเหร่าฮิดทร่อท่านดออย่างนำจื๊อเหร่า กะพันไปนำเจี๊ยนที่เขียนกรือเกี่ยวกับท่าน14ฮั๊กยามหลบม๊าอ๊างปะฮุนกึ๊งห้อมล้อมเหร่าอยุ่แน๊นแลซุมฟาริสีเถียงกิ๊นกับเหร่า15แท๊นทีที่ปะฮุนแล๊นวั๊วด๋างึ๊ดจื๊อดออย่าง กึ๊งแซกเห๊าม๊าต้อนรับวั๊ว16วั๊วกึ๊งน๊อยจ๊อเหร่ากระ ไทเจ้าเถียงกิ๊นกับเหร่าอะทาหร๊าย17แอ้งนึ๊งเหน่อปะฮุนโหร๊ทอยวั๊วกระ อาจารเอ้ย ฮอยได้พาลึ๊กบ่าวมาส๊อวั๊วเย้อมีม๊างพันกืกเห๊าสิง18มื้อเหน๊อทีม๊างเห๊าสิงทรั๊วเหร่า มั๊นด๋าฮิดเห๊อเหร่าซัก น่ำน๊ายฟูมปาก กัดแห๊วแลทรั๊วแข็ง ฮอยถร๊อเห๊อลึ๊กศิษย์ห๊องท่านร๊างม๊างออก ฮั๊กเหร่าฮิดโบ๋ได่19วั๊วกึ๊งน๊อยกับเหร่ากระ นี่พันยุคที่ก๊าดเจี๊ยนเซื่อ ฮอยด๋าอยู่กับไทเจ้าทร่อเหน่อ ด๋าอดทนกับไทเจ้านานทร่อเห่อ เห๊อพาแด๊กแน๊นมาส๊อฮอย20เหร่ากึ๊งพาแด๊กแอ้งแน๊นมาส๊อวั๊ว แค๊นม๊างแล๊นวั๊ว ม๊างด๋าฮิดเห๊อแด๊กล๊อมชักแท๊นทีและล๊องไปกลิ้งเกือกที่บั๋นน่ำน๊ายฟูมปาก21วั๊วกึ๊งน๊อยจ๊อผู้พันพ๊อกระ เหร่าพันทรุ่แน๊นทร่อเหร๋อ พ๊อจ๊อกระ ตั้งแต่เหร่ายังอิ๊ด22ม๊างมั๊นด๋าฮิดเห๊เหร่าต๊อกเหน่อไฟเหน่อน่ำ เย้อด๋าก๊าเห๊อปร๋าย ถ้าท่านด๋าซ้อยเห๊อดะฮ๊ายฮอยแหน่เต๊รอะ23พระเยซูกึ๊งน๊อยกับฮุนพ๊อแน๊นกระ เห๊โซ๊ยได่ห๊า ผะเด๋อเซื่อด๋าฮิดได่ดอสิ่ง24พ๊อห๊องแด๊กกึ๊งไต๊จ๊อแท๊นทีกระ ฮอยเซื่อ ถร๊อโปรดโซ๊ยเหน่อสิ่งอิ๊ก๊าดเตร๊อะ25ฮั๊กพระเยซูแนมแล๊นปฮุนกึ๊งแซกเห๊าม๊า วั๊วน๊อยห่ามม๊างแน๊นกระ อะม๊างพันกืกหูหนวกฮอยสั่งเจ้าเท๊วค๊อยทรั๊วเหร่า และอย่าหลบคืนเห๊าม๊าสิงเหร่าอิ๊ก26ม๊างแน๊นกึ๊งไต๊เสียงดังแลฮิดเห๊อแด๊กแอ้งแน๊นล๊อมชักล๊องแล่งมั๊งละออก แด๊กแอ้งแน๊นกะนั๊มเดยเดยคือฮุนปร๋ายซุมเหร่าดอแอ้งจ๊อกระเหร่าปร๋ายแล่ว27ฮั๊กพระเยซุทรงจับมือแด๊กแน๊น เหร่ากะย๊องหึ๊น28แค๊นพระเยซูเสด็จเห๊าเหน่อร๊านแล่ว ล๊กศิษย์กะม๊าโหร๊ทอยวั๊วพันส่วนทรั๊วกระ อะทา ซุมฮอยกึ๊งร๊างม๊างโบ๋ได่29วั๊วน๊อยเหร่ากระ ม๊างลางม๊างด๋าร๊างออกได้เย้อการอธาฐานทร๊อแน๊น30วั๊วกับลึ๊กศิษย์เสด็จเท๊วค๊อยที่แน๊นและย๊างเลยเพียงกาลิลี วั๊วโบ๋ย๊าด๋าเห๊อผะเด๋อล๊อ31เย้อกระวั๊วกำลังสอนลึกศิษย์ห๊องวั๊วกระ บุตรมนุษย์ ด๋าถึ๊กมอบกรือเหม่อมือห๊องฮุนเทิ๊งหลายและเหร่าด๋าก๊าวั๊ว แล๋นค๊อยถึีกก๊าแล่วสามมื้อ วั๊วด๋าพันหึ๊นม๊าเหม๊อ32ฮั๊กลึ๊กศิษย์โบ๋เห๊าจื๊อเจี๊ยนนี้แลโบ๋กล้าโหร๊ทอยวั๊ว33วั๊วกึ๊งเสด็จม๊ายงเพียงคาเปอรนาอุม บัดเห๊าไปเหน่อร๊านแล่ว วั๊วน๊อยจ๊อเหร่ากระ หว่างทางไทเจ้าโหร๊ทอยกิ๊นเรื่องอะทา34ลึ๊กศิษย์กะอยู่เดยเดย เย้อเหน่อนำทางเหร่าน๊อยกิ๊นกระเด๋อด๋าพันบึ๊กหลื๊นกิ๊น35ฮั๊กวั๊วนั่งล๊องแล่ว ด๋าเร๊กลึ๊กศิษย์สิบสองแอ้งแน๊นม๊าแล่วน๊อยกับเหร่ากระ แค๊นผะเด๋อคึดด๋าพันฮุนตำอิ๊ดกะเห๊อฮุนแน๊นพันฮุนสุดท้ายแลพันฮุนปรนนิบัติฮุนดอแอ้ง36แล่ววั๊วกึ๊งเอาแด๊กอิ๊ดอิ๊ดฮุนหนึ่งมาย๊องตร๊างลึ๊กศิษย์แล่วด๋าอุ๊มแด๊กแอ้งแน๊นกรือ น๊อยกับเหร่าดอแอ้งกระ37ผะเด่อกะต๊ามที่ยอมรับแด๊กอิ๊ดอิ๊ดนี้แอ้งนึ๊งเหน่อนามห๊องฮอย แอ้งแน๊นด๋ายอมรับฮอย และเด๋อกะต๊ามที่ยอมรับฮอยแอ้งแน๊นด๋ายอมรับวั๊วผู้ใช้ฮอยม๊า38ยอห์นโหร๊วั๊วกระ ทานอาจารย์ ซุมฮอยแล๊นฮุนหนึ่งร๊างม๊างออกเย้อพระนามห๊องวั๊วแลซุมฮอยห๊ามเหร่า เย้อเหร่าโบ๋ได่นำซุมฮอยม๊า39พระเยซูกึ๊งน๊อยกระ อย่าห๊ามเหร่าเลย เย้อกระโบ๋มีเด๋อฮิดแนวอัศจรรย์เหน่อนามห๊องฮอยแล่วด๋าน๊อยแนวโบ๋ดีเห๊อฮอย40เด๋อกะต๊ามที่โบ๋ได่ทร๊อสู้ซุมฮอยเหร่าด๋าอยู่วั่งเดียวกับฮอย41เย้อฮอยน๊อยเจี๊ยนจริงกับดอแอ้งกระ เด๋อกะต๊ามที่เอาน่ำโถ๊ยหนึ่งเห๊อไทเจ้าได่กิ๋นเย้อไทเจ้าพันฝ่ายพระคริสต์ฮุนแน๊นด๋าโบ๋ก๊าดบำเหน็จแน๊นั๊ม42แค๊นเด๋อฮิดเห๊อผู้อิ๊ดอ๊างนี้ฮุนนึ๊งที่เซื่อจื๊อเหน่อฮอยหลงฮิดผิด เห๊อเอาขี้รี๊นก้อนบึ๊กผูกคอแอ้งแน๊นและโจ๊นเหร่าล๊องทะเลด๋าดีด่อ43แค๊นมือห๊งเจ้าฮิดเห๊อเจ้าหล๊งผิดเห๊อตัดทิ๊งเส๊ ที่ด๋าเห๊าสู่ซีวิตเย้อมือด้วน ด๋าดีกวั๊วมีมือสองมือต้องล๊องตีหม๊องนาร๊อกเหน่อไฟที่โบ๋มีดับ44แค๊นตีนห๊องเจ้าฮิดเห๊อหล๊งผิดเห๊อตัดเส๊ ที่ด๋าเห๊าสู่ซีวิตเย้อตีนด้วนด๋าดีกวั๊วมีตีนต้องล๊องตีหม๊องนาร๊อก454647แค๊นตร๊างห๊อเจ้าฮิดเห๊อเจ้าหล๊งฮิดผิด จั่งขวั๊ดทิ๊งเส๊ ที่ด๋าเห๊าเหน่อเป็นบันห๊องพระเจ้าเย้อตร๊างข้างเด๊วเย้อดีกวั๊วมีสองตร๊างฮั๊กต๊อกนาร๊อก48พันโบ๊ที่ทรั๊วหนอนโบ๋ปร๋ายแลไฟโบ๋ดับ49เย้อกระดอแอ้งด๋าต้องถึกเอื๊อบเย้อไฟคือเกลือ50เกลือพันสิ่งที่ดี แค๊นแม๊นเกลือย๊าเค็มแล่ว ด๋าฮิดเห๊อเค็มดอได่อิ๊กอะทา ไทเจ้าเห๊ออยู่นำกิ๊นอย่างมิ๊ดย๊า
Empower Asia Bible Translation Movement