Kesikpɛkpɛ32
Yakɔb Abalɛ tɛ Adɛtsyana Esawu
1Yakɔb tsyɛ atɔnɔ yɛidzo, kɛlɛ Owusoso Akaa yɛaxɔɛdɛ atsyana yɛ.2Gɛ Yakɔb amɔ̃ alɛɛ, aɖɔ asɛ "Owusoso Akaa oshogo ɔkɔ nɔlɛ!" Kliso akɔ ɛkɛlɛ nɛinye asɛ Mahanaim.3Yakɔb eputɔ asɛsɛ banɔkpɛkpɛ nɛ yɛadza Esawu ɔkɔ nɛ Seya kesiakpa nabha nɛ Edom esiakpa mɛ.4Akɔ balɛ ɔsha asɛ, "Kibuiɛ gɛ kɛlɛ ɔsɛ nɔɖɔ otseɖe mɛ apalete Esawu nɛlɛ: 'Wɔ axɔɛdɛ Yakɔb aaɖɔ asɛ, ɛzã Laban ɔkɔ bɔkpɛnɔ otsiɛ.5Banɛtsyɔɛ nɛ̀ badiku alɛ mɛahɔɛ, ibhoshi, beepigya, baanyɛ axɔɛdɛ nɛ̀ baadzɛ axɔɛdɛ. Otsinɔ ɛsɛsɛ mɛ apaleteɛ ɔklasɔ ɔlɛ, sɛ tɛ ɛmɔ kɛwɔ̃ kuku odenɔ wɔ anhũɔ mɛ.' "6Gɛ baxɔɛdɛ etsyina aba Yakɔb ɔkɔ, baɖɔ asɛ, "Bɔdɛ wɔadza Esawu ɔkɔ kɛlɛ otsiɛnɔ aaba abatsyana wɔ, kɛlɛ banyɛ akpã tãalɛ alɛ aplɛnii."7Nɛ kifu sisi nɛ̀ ɔwɔ̃nyɔnɔ̃ gbagbala mɛɛ, Yakɔb ebu banɔnɔ gɛ azã yɛɔbhà akpɛ kitsù tɔɔbhà mɛ, kanà tsyɛ yɛabhɛtɛ akɔ ibhoshi, nɛ̀ banɛntsyɔɛ nɛ̀ kipuasɔ.8Eɖi asɛ, "Onupɛ Esawu alɔadɔ kitsù tenikpo abhaa, kitsuɔ gɛbatɔɔ abablɛkɛ."9Kɛlɛ Yakɔb ekulu Akaa asɛ, "O mɛaka Abraham yɛ Owusoso Akaa, mɛaka Isak yɛ Owusoso Akaa, O Apalete, gɛ etseɖe mɛ asɛ, 'Tsyina ɔvɛ wɔ kesiakpa mɛ nɛ̀ wɔeshopo alɛ ɔkɔ, tɛ mɛkɔ yɛapɛ akɔ wɔ.'10Ɛgɛ shɔ̃ ɔsɛ tɛ ɛmɔ ɛyamɛ gbangbã nɛ̀ kibui abhà tɛbhɛbhɛtɛ petee gɛ ɔkasɛ wɔaxɔɛdɛ flogo. Mɛ osivuvũɔ yete ɔlɛ ɔzã mɛ ahɔɛ gɛ ɛtsakɛ Yɔɖaniɛ, pɔ otsinɔ ɛbadzì etsù taabha.11Ikulu wɔ Owusoso Akaa, yɛkɛ ɔkɔ mɛ, odenɔ mɛadza Esawu ahɔɛ mɛ, ɔmɔsɛ isifu sɛ ababa lɔdɔ mɛabha, nɛ̀ beelĩɛ nɛ̀ balɛ eyialɛ tsyɛ.12Pɔ ɔtɛɖɔ ɔsɛ, 'Ɛbakɔ yɛapɛ akɔ wɔ, kɛlɛ ɛbabhɛtɛ wɔɛhui nɔ asɛ kelikekpu shu ayisɛ, gɛ batɛ balà akalà.' "13Aza ɛkɛlɛ, kɛlɛ odenɔ kɛgɛ lɛ yɛahɔɛɛ, ebu kɛdɔ̃ kɔkɔ kɔ yɛadza Esawu.14Beepigya adzɛ akpã taabha nɛ̀ beepigyakɔlɛ afɛtaabha, ibhoshidzɛ akpã taabha nɛ̀ ibhoshinye afɛtaabha,15kipuasɔdzɛ afɛata nɛ̀ balɛ eyialɛ, banɛntsyɔɛdzɛ afɛtaalɛ nɛ̀ banɛtyɔɛnye lɔfɔ. Badikudzɛ afɛtaabha nɛ̀ badikunye lɔfɔ.16Alɔkɔ alɛ akpɛ ahɔɛ akɔ yɛaxɔɛdɛ, kɛza kanyiaka zã kɛlɛ ishu ahɔɛ mɛ, kɛlɛ etseɖe yɛaxɔɛdɛ asɛ, "Nɔoputɔ kɔmɛ, tɛ nɔkɔ kishì zã bagã nɛishi."17Akɔ anɔnɔ gɛ yɛalɛ otugba ɔsha asɛ: "Onupɛ mɛadza Esawu atsyana wɔ pɛ ebisi asɛ, 'Fakɔ anɛ nɔonù nɛ̀ faakɔ nɔɔvɛ, nɛ̀ afanà agã naalɛ nyɔ̃ɔ gɛ alɛ wɔnɔ otugbaa?'18kɛɛlɛ nɔbɔɖɔ ɔsɛ, benu wɔaxɔɛdɛ Yakɔb ayɛ. Benu kɛdɔ̃ kɔkɔ akɔ mɛapalete Esawu, kɛlɛ alɛ kideɛ aaba.' "19Akɔ ɔsha otugba anɔ bhalà, nɛ̀ ataɖamɛ, nɛ̀ banɔ bhlatɔ nyɔ̃ɔ gɛalɛ baagã kɛza niedeɛ tsyɛ ɔsɛ: "Nɔɖɔ kibui tinikpo ɛlɛ ɔkɔ Esawu gɛ nɔtsyana yɛ.20Kɛlɛ nɔoɖi ɛlɛ ɔkɔ ɛgbã ɔsɛ, 'Wɔaxɔɛdɛ Yakɔb alɛ bɔlɔ kideɛ aabà.' Ɔmɔsɛ eɖi asɛ, "Ɛbà yɔ yɛishumɛ nɛ̀ bɔdɔ̃ kɔkɔ ɔlɛ gɛ ɛsɛsɛ kpɛ otugbaa; kidegba ɛbamɔ yɛɛ, ogilu awɔ̃ɔ abayɛkɛ mɛ."21Kliso Yakɔb yɛɔdɔ̃ kɔkɔ vɛ otugba akɔ yɛ, pɔ yɛxɔnɔ aza oshogo ɔkɔ elishi alɛ.Yakɔb Awlãkɛ nɛ̀ Owusoso Akaa
22Elishi alɛ Yakɔb alɔ kɛlɛ agbanà yɛedzini alɛ taabha, yɛ baadzɛ axɔɛdɛ taabha nɛ̀ yɛeyianyɛ lɔfɔ nɛ̀ tooliɛ kɛlɛ batsakɛ Yabɔk kelĩɛ ɛkɛlɛ gɛ logidzuɔ̃.23Gɛ atsakɛ alɛ nɛ̀ keliɛ ebekeɛ, alɔkɔ yɛɔdɔ̃ tsyɛ petee atsakɛ.24Kliso atɔ̀ Yakɔb yete, kɛlɛ anyɛ teli aba wlãkɛ niyɛ ɔdɛkpɛnɔ kelizaza.25Gɛ anyɛ amɔ̃ asɛ atɛalà yɛabha ŋãa, ehunɔ Yakɔb kɛtsɛɖɛta kɛxɔa tsyɔakɔ mɛ sɛtɛ kɛtsɛɖɛ dua gɛ awlakɛ nɛ anyɛ.26Kɛlɛ anyɛ aɖɔ asɛ, "Kɔmɛ shɛ, ɔmɔsɛ kelì aza."Pɔ Yakɔb ebuiliulũ asɛ, "Ɛtɛ bakɔ wɔ shɛ ɔdɛkpɛnɔ ɔsɛ oyulà akɔmɛ."27Anyɛ ebisi yɛasɛ, "Kiɖe bekulu wɔ?"
Ebuliulũ asɛ, "Yakɔb."28Kɛlɛ anyɛ aɖɔ asɛ, "Bezekulu wɔ asɛ Yakɔb, pɔ Israɛl ɔmɔsɛ ɔwlãkɛ nɛ̀ Owusoso Akaa nɛ̀ banɔdzyrame pɛ ɔŋã kabha."29Yakɔb aɖɔ asɛ, "Ɛkɔ wɔɛtakpu kulu wɔɛinyeɛ kɔmɛ."
Pɔ ebuiliulũ asɛ, "Kiɖe sopɛ obisi mɛinye?" Kɛlɛ eyulà akɔɛ nɛ ɛkɛlɛ.30Kliso Yakɔb akɔ ɛkɛlɛ nɛinye asɛ Peniel, pɛ aaɖɔ asɛ, "Ɔmɔsɛ ɛmɔ̃ Owusoso Akaa bamɛ nɛ̀ amɛ, kɛlɛ ɛkalɛ nɛ ɛkpã pɔ."31Kiwuíɛ titú nɛ yɛadamɛ gɛ agãfalà nɛ Pɛniel kɛlɛ eze kplitsò nɛ yɛ kɛtsɛɖɛtà kɛxɔa shu.32Kliso bɔkpɛnɔ obuɔ Israelianɛ atɛŋã agã kɛdzaa gɛnyanã kɛtsɛɖɛta ɔtsyɔakɔ, ɔmɔsɛ ehunũ Yakɔb kɛtsɛɖɛta ɔtsyɔakɔ nɛ kɛdzyaa gɛnyanã kɛxɔa ɔbhà.
The Seed Company