Kesikpɛkpɛ31
Yakɔb Ebu Tɛtsɛɖɛ Mɛ Ashɛ Nɛ Laban Ɔkɔ
1Yakɔb elũ asɛ Laban yɛeyianyɛ alɛ baaɖɔ asɛ, "Yakɔb ayɛkɛ kɛkanyiaka gɛ lɛ bɔlɔ aka ahɔɛ, kɛlɛ amɔ̃ ehoeyi bɔdɔ̃ ɔlɛ petee odenɔ kɛgɛ inu bɔlɔ akaa ayɛ mɛ."2Kɛlɛ Yakɔb elu anhũ esi amɔ asɛ Laban ɛkpã gɛ tsyina nɛ yɛishu.3Kɛlɛ Apaleteɛ etseɖe Yakɔb asɛ, tsyina ɔvɛ wɔaka alɛ kesiakpa nabha nɛ̀ wɔeshopo alɛ ɔkɔ, kɛlɛ ɛbazã aplɛnɔ wɔ."4Kliso Yakɔb asɛsɛ Ratsɛl nɛ̀ Leya ɔklasɔ̃ asɛ bekoeyi aba ayakpa mɛ nɛ ɛkɛlɛ gɛ yɛ baagã azãa.5Etseɖe balɛ asɛ, "Ɛmɔsɛ wɔnɔ akaa ɛkpã gɛ edzi mana mɛishuɔ abhama asɛ kana gɛ lɛzãa, pɔ mɛakaa yɛ Owusoso Akaa azã aplɛnɔ mɛ.6Nɔonyi ɔsɛ ɛlɔkɔ mɛ ohumi nɔ petee wɔa axɔ̃ɛ akɔ wɔnɔ akaa,7pɔ wɔnɔ akaa edzyinì mɛakpɛ gɛ atsaɖakɛ mɛxɔɛ wɔwɔa kɛbhɛ babuia kibenyiabe. Pɔ, Owusoso Akaa egibu kidzo akɔɛ asɛ tɛ ezĩ mɛ.8Onupɛ aɖɔ asɛ, 'Baagã gɛedzi wlãwlã bedzi wɔ kɛbhɛ babuia nɔ,' kɛɛlɛ baagãa petee abamɔ̃ eyi gɛedzi wlãwlã; kɛlɛ onupɛ aɖɔ asɛ, 'Bagɛ batsà odiɛ balɛenu wɔ kɛbhɛ babuia nɔ,' kɛɛlɛ baagãa petee abamɔ́ eyi gɛ batsà odi.9Kliso Owusoso Akaa ayɛkɛ bagãa petee nɛ wɔaka ahɔɛ akɔ mɛ.10"Nɛ baagã tɛmɔmɔ ibeɛ, ɛza bɔlalà kiwui tenikpo, nɛ bɔl mɛ ibu bamɛ wunɔ kabha pɛ ɛmɔsɛ bagãnyɛe gɛ beewu baadzɛɛ nabhaa ishuɔ tsà odi, bedzì wlãwlã pɛnɔsɛ bakpɛ ebi.11Owusoso Akaa yɛaxɔɛdɛ etseɖe mɛ nɛ bɔlaláa mɛ asɛ, 'Yakɔb.' Ɛdɛmɛ ɔsɛ, 'Mɛ naalɛ.'12Kɛlɛ aɖɔ asɛ, 'Bu bamɛ wunɔ kabha tɛ ɔmɔ ɔsɛ baagãnyeɛ gɛ beewu baadzɛ nabha balɛ ishuɔ tsà odì, wlãwlã pɛnɔsɛ bakpɛ ebì, pɔ ɛmɔ ebuiɛ petee gɛ Laban aabhɛtɛ amanà wɔ shu.13Mɛinu Bɛtɛl yɛ Owusoso Akaa, nɛ ɛkɛlɛ gɛ ɔbàlɛ bɔbɔ nɛ kɛklagbu osi nabha nɛ ɛkɛlɛ gɛ ɔɖɔ kibui olu akɔ mɛ. Otsiɛ nɔ, shɛ nɛ kesiakpa alɛ nabha tsiɔ̃ɔ tɛ otsyina ɔvɛ kesiakpa gɛ ode nabha.' "14Kɛlɛ Ratsɛl nɛ̀ Leah ebuiliulũ asɛ, "Ɔŋãkɔ teli ɔkɔ lɛ bɔlɔ ahɔɛ nɛ bɔlɔ akaa yɛɔdɔ̃ mɛ dza?15Atia lɔkɔ ɔlɔ asɛ beefù bunuɔ dza? Gɛnɛ gɛ adɛ̀ bɔlɔ yete, pɔ awɔà kɛgɛ babuià nɛ bɔlɔ ɛtakpu tsyɛ ishu axɔ̃ɛ ebeke.16Kɛgbã ehoeyi bɔdɔ̃ɔ petee gɛ Owusoso Akaa ayɛkɛ nɛ bɔlɔ akaa ahɔɛ nu bɔlɔ nɛ̀ bɔlɔ eyialɛ ɔyɛ. Kliso bhɛtɛ tɔɖɔ kɛkanyiaka gɛ Owusoso Akaa etseɖe wɔ nabha."17Kɛlɛ Yakɔb alɔkɔ yɛeyialɛ nɛ̀ yɛedzinì alɛ atɔɖɔ kipuasɔ nabha,18kɛlɛ akakà yɛ kepi baagã petee akpɛ yɛotugbà, aplɛnɔ bɔdɔ̃ petee gɛ amɔ̃ nɛ Paɖan Aram, tɛ avɛ yɛaka Isak ɔkɔ nɛ Kana kesiakpa nabha.19Gɛ Laban avɛ adɛtsɛ̀ tɛkã nɛ ibhoshiɛ shuɔ, Ratsɛl ezuɖu yɛaka yɛɔpã ibudiɛ.20Ɔplɛnɔ kɛlɛ́ɛ, Yakɔb awɔɛ Laban gɛenu Arameaeyiɛ gɛ egitseɖe yɛ asɛ ebu tɛtsɛɖɛ mɛ ashɛ.21Ebu tɛtsɛɖɛ mɛ ashɛ nɛ̀ bɔdɔ̃ petee gɛ amɔ̃ɔ, kɛlɛ nɛ kelĩ tsatsakɛ niedeɛ, ebu bamɛ asɛsɛ ketukpɔ kesiakpa Giliad nabha.Laban Akpà Tɔnɔ Yakɔb
22Nɛ kiwui tɛɖamɛ nabhaa, betseɖe Laban asɛ Yakɔb ebu tɛtsɛɖɛ mɛ ashɛ.23Gɛ agbana yɛeshopo alɛ aplɛnɔ yɛishuɔɔ, akpà tɔnɔ Yakɔb nɛ ewui tegegene mɛ kɛlɛ adɛ tɔnɔ yɛ nɛ Giliad ketukpɔ kesiakpa mɛ.24Kɛlɛ Owusoso Akaa ebu yɛishu akasɛ Laban Aramaeyiɛ nɛ bɔlalà mɛ elishi teli pɛ etseɖe yɛasɛ, "Ɖi piapi tɛ ɔtɛɖɔ kibui nanà otseɖe Yakɔb, kibui piapii pɛnɔsɛ kɛkpá."25Yakɔb etidzu kɛpɔtɛ kagba nɛ Giliad ketukpɔ kesiakpa mɛ flogo pɛ Laban nɛ̀ yɛeshopo alɛ adɛtɔnɔ yɛ. Kɛlɛ Laban nɛ̀ yɛeshopo alɛ tsyɛ eshogo nɛ ɛkɛlɛ.26Kɛlɛ Laban etseɖe Yakɔb asɛ, "Kiɖe wɔbhɛtɛ ana? Ɔwɔɛ mɛ, kɛlɛ ɔgbana mɛeyiadzɛ alɛ ɔshɛnɔ asɛ bagɛ bevũ nɛ keyù mɛ.27Kiɖe so pɛ obu tɛtsɛɖɛ mɛ ɔshɛ nɛ tikpukpũ mɛ pɛ ɔwɔɛ mɛ? Kiɖe so pɛ ogitseɖe mɛ, sɛ tɛ mɛkpɛ wɔɛdzo nɛ same mɔmɔ̃ mɛ nɛ̀ ɛdzɛ zhãzhã atɔɖɔ ɛdzɛ bhobho bɔdɔ̃ abha dza?28Ɔgɛ kɔ mɛkpɛ ɔhɔɛ yete tsyɛ nɛ mɛeshui alɛ nɛ̀ mɛeyiadzɛ alɛ oli pɛ ɛɖɔ ɔsɛ basɛnɛ alɛ. Ɔbhɛtɛ bɔwɔaga ibui.29Ohumi ɔlɛ mɛahɔɛ ɔsɛ tɛ ɛwɔà ɔfɔ̃ nɛ̀ wɔ; pɔ elishiɛ gɛ abafalaa, wɔaka yɛ Owusoso Akaa etseɖe mɛasɛ. 'Ɖi piapi ɔsɛ ɔgɛ ɖɔ kibui nanà ɔkpɛ Yakɔb ɔkɔ, kɛpiapi pɛnɔsɛ kɛkpà.'30Otsinɔ ɔtɛ shɛ ɔmɔsɛ ɔpɛ ɔsɛ tɛ otsyina ɔvɛ wɔakaa ɔpãmɛ. Pɔ kiɖe sopɛ ozuɖu mɛ ibudiɛ?"31Yakɔb ebuiliulũ ɔkɔ Laban asɛ, "Kifù ziyí mɛ, ɔmɔsɛ abhɛtɛ mɛ asɛ ɔbɔ yɛkɛ wɔeyiadzɛ alɛ nɛ mɛahɔɛ nɛ tɛgagalĩ mɛ.32Pɔ onupɛ ɔmɔ̃ anɔteli gɛ yɛahɔɛ wɔ ibudiɛ lɛɛ, atɛbà zanà nɛkpã. Nɛ bɔlɔ eshopo alɛ namɛɛ, ɖikɔ wɔshu sɛpɔ wɔɛdɔ̃ teli ana lɛ ɛkɛlɛ nɛ mɛɔbha; kɛlɛ onu anaa, lɔkɔ ɛlɛ." Otsinɔ Yakɔb etinyi asɛ Ratsɛl yɛezuɖu ibudiɛ.33Kliso Laban avɛ Yakɔb kɛpɔtɛ kagbaa mɛ nɛ̀ Leya kɛpɔtɛ kagbaa mɛ nɛ̀ badzɛ axɔɛdɛ kɛpɔtɛ kagbaa mɛ, pɔ agɛmɔ̃ kɛdɔ̃ nanà. Gɛ ekoeyi nɛ Leya kɛpɔtɛ kagbaa mɛ ebekeɛ, etsoku Ratsɛl kɛpɔtɛ kagbaa mɛ.34Otsiɛ nɔ Ratsɛl alɔkɔ bɔpãmɛ ibudiɛ anyà akpɛ kɛpɔtɛ nabha gɛ baazã nɛ kipusɔ nabha mɛ kɛlɛ azã kɛlɛ abha. Laban apɔ̃ɛ kɛdɔ kanyiaka mɛ nɛ kɛpɔtɛ kagbaa mɛ pɔ agɛmɔ kɛdɔ̃ nanà.35Ratsɛl etseɖe yɛaka asɛ, "Tɛkpɛ ɔmɔpɔɛ, mɛ apalete, sɛ ɛtɛ balà lɔzã kitití nɛ wɔamɛ, iiku kevude." Klisoɔ anyɔ̃ pɔ agɛmɔ bɔpãmɛ ibudiɛɛ.36Yakɔb akpɛ ɔmɔpɔɛ kɛlɛ alɔkɔ kibui nɛ Laban ishu. Ebisi yɛasɛ, "Ɔfɔ̃ ɖuwoe mɛwɔa? Kibui kpa ɖuwoe mɛbhɛtɛ so pɛ ɔkpatɔ̃nɔ mɛ?37Otsi nɔ gɛ ɔnyɔ̃ mɛ bɔdɔ̃ nyɔɔ mɛɛ, kiɖe wɔmɔ̃ gɛinu wɔ bɔpãmɛ bɔdɔ̃? Lɔkɔ ɛlɛ olù ɛkɛlɛ nɛ wɔeshopo alɛ nɛ̀ mɛayɛ namɛ, tɛ bebhui kibui mɛ nɛ bɔlɔ taabha nɛishi.38"Ɛzã wɔbhà agɔ afɛtaabha naalɛ. Wɔ ibhoshiɛ nɛ beepigyaa nɛyá gɛiyi ɖi, pɛnɔsɛ ɛtã obhoshi nyè odenɔ wɔ baagã mɛ.39Ɛgɛ manà wɔ agã nanà gɛ bagãhoe atsyɔ̃ɛ yɛmɛ eɖi; ɛlɔkɔ kɛbhɛ ɛlɛ kɔ mɛishu. Kɛlɛ obisi kɛbhɛ babuià odenɔ mɛahɔɛ nɛ kɛkanyiaka gɛ bezuɖu keliza pɛnɔsɛ elishi.40Mɛ tɛzãzãa mɛ naalɛ: kɛkpɛkpɛ tãmɛ nɛ kelizaza mɛ, kɛlɛ bɔbɔlɔ nɛ elishiɛ, kɛlɛ taɖa ebu tɛtsɛɖɛ odenɔ mɛanhũ mɛ.41Kana kɛzã nɛ agɔ afɛtaabha mɛ gɛ ɛzã wɔ bɔpãamɛ. Ɛwɔà axɔɛ akɔwɔ agɔ lɔfɔ nɛ̀ taalɛ nɛ wɔ beyiadzɛ nɛtakpu nɛ̀ agɔ teehlo nɛ wɔ baagã nɛtakpu pɔ otsyina mɛ kɛbhɛ babuia kibenyiabe.42Onupɛ mɛaka yɛ Owusoso Akaa nɛ̀ Abraham yɛ Owusoso Akaa, nɛ̀ kifu sisí ɔkɔ Isak yɛ Owusoso Akaa gɛzã plɛnɔ mɛɛ, ɔtɔ kpɛ mɛidzo ahɔɛ kpakpa kɛgbã. Pɔ Owusoso Akaa amɔ̃ mɛɔtɔ mɛ bɔtɔɔ mɛ, kɛlɛ kivu elishiɛ, etseɖenɛ wɔ."43Laban ebuiliulũ akɔ Yakɔb asɛ, "Baadzɛ benu mɛeyiadzɛ, bunuvɔɛ nɔ benu mɛeyialɛ, kɛlɛ baagã enu mɛ baagã. Kɛkanyiaka gɛ ɔmɔ̃ɔ nu mɛayɛ. Pɔ kiɖe mɛba bhɛtɛ obuɔ nɛ̀ mɛ beyiadzɛ alɛ shu, pɛnɔsɛ nɛ̀ bunuvɔɛ nɔ gɛ bamɔ̃?44Ba otsialɛ tɛ bɔbhɛtɛ olugbùnyanyã, wɔ nɛ mɛ, tɛ kidzi kibuiamɔmɔ̃ nɛ mɛ nɛ̀ wɔɛshi."45Kliso Yakɔb alɔkɔ kɛklagbu pɛ edzu kɛlɛ kititi asɛ kɛklagbu osi.46Etseɖe yɛeshopo alɛ asɛ, "Noshogo aklagbu teli." Kliso balɔkɔ aklagbuɔ pɛ belu alɛ akpɛ kitsù kɛlɛ baŋãdɔ̃ nɛ ɛkɛlɛ nɛ kitsuɔ shu.47Laban ekulu ɛlɛ asɛ Yega Sahaduta, kɛlɛ Yakɔb ekulu alɛ ɔsɛ Galid.48Laban aɖɔ asɛ, "Kitsù ɛlɛ kinu kibuiamɔmɔlu nɛ wɔ nɛ̀ mɛishi obuɔ." Kliso pɛ bekulu ɛkɛlɛ asɛ Galiɖ.49Bekulu ɛlɛ tsyɛ ɔsɛ, Mizpa ɔmɔsɛ aɖɔ asɛ, "Tɛ Apaleteɛ awuhũ azã mɛ nɛ wɔɛshi gɛ onupɛ bɔshɛ nɛ bagɔlɔ ɔbhà.50Ɔwa ɔfɔ̃ mɛeyiadzɛɛ pɛnɔsɛ ɔdɛ lɔkɔ baadzɛ bhlatɔ ɔplɛnɔ naalɛ, pɔ anɔ nanà ama bɔlɔ ɔbhà tsyɛelo, baka ɔsɛ Owusoso Akaa yɛenu kibuiamɔmɔ nɛ wɔ nɛ mɛishi."51Laban ezetseɖe Yakɔb asɛ, "Kitsùɔ nɛɛlɛ, kɛlɛ kɛklagbu osiɛ nɔɔlɛ gɛ idzu nɛ mɛ nɛ wɔɛshi.52Kitsù ɛlɛ kɛlɛinu kibuiamɔmɔ, kɛlɛ kɛklagbu osi ɔlɛ kinu kibuiamɔmɔ sɛ, ɛtɛbà dɔfalà kitsù ɛlɛ ba wɔkɔ tɛba bhɛtɛ kibui kpa nɛ̀ wɔ. Kɛlɛ wɔtsyɛ ɔtɛ bɔdɔ falà kitsù ɛlɛ nɛ̀ kɛklagbu osi ɔlɛ ɔba mɛɔkɔ pɛ ɔbɔbhɛtɛ kibui kpa nɛ mɛ.53Tɛ Abraham yɛ Owososo Akaa nɛ̀ Nahɔ yɛ Owusoso Akaa, balɛ akaa yɛ Owusoso Akaa ebhui kibui mɛ nɛ bɔlɔɛshi."Kliso Yakɔb atanà bɔdɔ̃ nɛ Isak yɛ Owusoso Akaa yɛinye mɛ.54Abhɛtɛ bɔdɔ̃ pɔpɔɛ nɛ ɛkɛlɛ nɛ ketukpɔ kesiakpa mɛ kɛlɛ ekulu yɛeshopo alɛ amanà bɔdɔ̃ ɔŋãkɔ. Gɛ baŋã bɔdɔ̃ɔ ebekeɛ, baza ɛkɛlɛ.55Kelizaza ɛvɔlɔ plii nɔ, Laban akpɛ ahɔɛ nɛ yɛeshuialɛ nɛ̀ yɛeyiadzɛ alɛ oli pɛ eyulà akɔ alɛ. Kɛlɛ etsyina avɛ bɔpãmɛ.
The Seed Company