Agalatiya3
1Anyiimwe Agalatiya mwakala asabobwa zene. Bwanji, yani wakulojhani? Nghani za kupachikidwa kwake Kilisito zidaikidwa padanga pachogolo panu.2Nikonda kujhiwa chindhu chimojhipe kuchoka kwanu. Bwanji, mdalandila Mzimu wa Mnungu ndande ya kuchita ngati umo lifunila thauko, kapina ndande ya kuuvela ni kuukhulupilila Uthenga wa Bwino?3Mwakhala asabobwa mtundu umeneo? Anyiimwe mdayamba kukhala moyo wa chipano kwa mthandizo wa Mzimu wa Mnungu. Bwanji, saino mfuna kumaliza kwa mbhavu zanu?4Bwanji, mavuto yaya yonjhe yadakupatani ndande ya Uthenga Wabwino yakhala yopande matepe? Zenedi siikhozeka!5Bwanji, Mnungu wakupachani Mzimu wochita vodabwicha ndande yogwila thauko, kapina ndande muuvela Uthenga Wabwino ni kuukhulupila?6Kumbukilani pa nghani za Ibulahimu, iye wadamkhulupilia Mnungu, ni kwa kukhulupilila kwake, Mnungu wadamvomela kuti iye ni wovomelezeka.7Chipano mjhiwe kuti wandhu yawo amkhulupilila Mnungu, achamenewo nde wana azene a Ibulahimu.8Malembo ya Mnungu yadatholangizilatu kuti Mnungu siwaachite wandhu kukhala wovomelezeka kwa kupitila khumkhulupilila Iye. Chimwecho malembo ya Mnungu yadachogholela kumkambila Ibulahimu Uthenga Wabwino uwo umakamba, “Kupitila iwe wandhu wonjhe sapachidwe mwawi.”9Chipano, wajha akhulupilila apachidwa mwawi pamojhi ni Ibulahimu uyo wadakhulupilila.10Nambho wonjhe yawo akhulupilila kuomboledwa pakuchita yawo yafununika kwa thauko la Musa, achamenewo alesedwa ni Mnungu. Pakuti, Malembo ya Mnungu yakamba, “Mundhu waliyonje uyo siwachata ni kuchita yonjhe yayo yalembedwa mchikalakala cha thauko la Musa, mundhu mmeneyo walesedwa ni Mnungu.”11Uzene ni kuti, thauko la Musa silikhoza kumchita mundhu wakhale wovomelezeka kwa Mnungu, pakuti malembo yakamba, “Mundhu wovomelezeka kwa Mnungu siwakhale kwa kumkhulupilila Mnungu.”12Nambho thauko la Musa silikhulupilila chikhulupi, nambho malembo yakamba kuti, “Uyo siwakwaniliche yayo yafunika ni thauko siwakhale wamoyo.”13Kilisito watiombola kuchokela mu chileso cha thauko la Musa, walesedwa ndande yathu, pakuti malembo yakamba chimwechi, “Walesedwa mundhu waliyonjhe uyo wapachikidwa pamtanda.”14Chindhu ichi chichitika ndande ujha mwawi wadapachidwa Ibulahimu uwachikile wandhu wonjhe Ayahudi ni yawo asati Ayahudi kwa kupitila Yesu Kilisito, ni kwa chikhulupililo, tilandile ujha Mzimu Amnungu adakamba kuti satipache.15Abale wanga, sinikupacheni chifani kuchokela kuukhalo wathu wa siku zonjhe. Ganizilani umo adavomelezana wandhu awili ni kuchikiza, palibe mundhu wakhoza waongezela chindhu.16Chipano Mnungu wadamkambila Ibulahimu pamojhi ni mbadwa wake. Malembo siyakamba, “Nimibadwa yake,” yani ambili, nambho yakamaba kuti, “Nimbadwa wake,” yani mmojhi naye nde Kilisito.17Icho nifuna kukamba nde ichi, Mnungu wadaika pangano chake, vyaka va mia nne ni selasini, zikali zosalembedwe thauko la Musa, ni kulichimikiza, chimwecho thauko limenelo silikhoza kuliwananga pangano limenelo, kapina kung'anamula pangano limenelo.18Ngati mbhaso ya Mnungu ikhulupilila thauko, basi siikozanjho kukhulupilila icho wakamba Mnungu. Nambho Mnungu wadampacha Ibulahimu yajha wadamkambila kuti siwampache.19Chipano thauko lachiyani? Lidachuluchidwa pamenepo ndande yolangiza machimo ya wandhu, mbaka yapo siwajhe yujha wali mbadwa wa Ibulahimu uyo Mnungu wadakamba kuti siwajhe, Mnungu wadampacha Musa thauko kupitila mtumiki wa kumwamba wa Mnungu, Musa nayo wadapacha wandhu.20Zenedi mthenga siwafunika, ikakhala chindhu chene cha nghani ya mundhu mmojhi, nambho Mnungu ni mmojhi, iye wadamkambila Ibulahimu popande mthenga.21Bwanji thauko lichuchana ni icho wadakamba Mnungu kuti siwatipache? Ata pang'ono! Pakuti ngati thauko ilo lidachochedwa lidakakhoza kwapacha wandhu umoyo, basi tidakavomelezedwa pachogolo pa Mnungu kwa kulivela thauko.22Nambho asati ndande malembo ya Mnungu yathokamba kuti, jhiko lonjhe lili panjhi pa ulamulilo wa machimo, chimwecho yawo amkhulupilila Yesu Kilisito apachidwe chijha wadakamba Mnungu kuti, siwapache kwa kumkhulupilia Yesu Kilisito.23Kukhulupilila yapo kudali sikudajhe, tidamangidwa ni kulondedwa ni thauko, timalindilila kukhulupilila kumeneko kuikidwe padanga.24Thauko limenelo lidatichogoza mbaka Kilisito yapo wadajha, dala kwa kupitila kukhulupilila tichitidwe ovemelezeka pachogholo pa Mnungu.25Chipano tikhoza kukhulupilila Kilisito, chimwecho ife sitichogozedwanjho ni Thauko.26Kwa njila ya kumkhulupilila Yesu anyiimwe mwaonjhe mwakala wana Amnungu kwa kulunjhana ni Kilisito Yesu.27Anyiimwe onjhe mwabatizidwa ni kulunjana ni Kilisito, chipano mwalingana ni Kilisito.28Chimwecho palibe kusiyana pakati pa Myahudi ni wandhu yawo asati Ayahudi, mbowa ni mundhu ni mundhu uyo asati mbowa, wammuna ni wamkazi. Wonjhe ni chindhu chimojhi kwa kulunjana ni Kilisito Yesu.29Ngati anyiimwe ni wandhu a Kilisito, basi anyiimwe ni mbadwa wa Ibulahimu, ni simlandile yajha Mnungu wadamkambila Ibulahimu kuti siwampache.
The Word for the World International