Nɔɔneŋ90
Mosesi Wurubuarɛ walaŋ ŋon kefane
1Degbeŋgyoo, nyaŋ yɛna da keyeu kagyoo,lee kalola kegyakaarese pou man.2Pɛ n ke yɛɛ bulase,yaa tɛɛle kei pou nɛ,na nyaŋ yɛna Wurubuarɛ kekpaakekpaa.3N ne yele balaŋ na bese tɛɛle,te n ne yako nyiaa, <Ɛmɛɛ denibalaŋ, ɛ bese gyoo tɛɛle man.>4N siaman na kulutooneŋ kakpoŋ,wɔɛ ŋgba dana wee keŋ be kaa lam nɛ,yaa ŋgba nelim kadeke debaŋ nɛ.5N ne yele balaŋ ne lam ŋgba dosɛɛ nɛ,be yɛɛ ŋgba ŋalese ŋan na potee nebo nɛ.6Nebo na ŋɛɛ potee wɔlɛɛ,balinɔɔ na, ŋɛɛ boto na ŋe te kpiisi.7N baŋ te munu daa,te n baŋ beiŋ te yele dee seree.8N ta lese de nombiakumɛɛ see n siaman,de nombiakumɛɛ ŋan weesɛɛ nɛ doo n siaman teŋteŋeleŋ.9Da weeya pou te lam lee n baŋ nedoŋ dɔɔ,kakeŋee dɔɔ da weeya pou te taŋ.10Da kulutooneŋ yaanɔɔle yɛɛ sɔŋotooro na kufu (70),nyi da kela mena na te dee nyiŋ kulutooneŋ sɔŋonaara (80),mɔna kaale na waraŋsa te wulu ŋe man,nawolo nyi ŋɛɛ lam bileŋbileŋ na de ta yem.11Ŋolo ba gyeŋ n baŋ keŋ doŋ ya.N dana baŋ nedoŋ keŋ kaboena nyi baa yee neŋ.12Wola daa na dɛɛ gyeŋ da weeya yaanɔɔle,na dee nyiŋ nyansa.13Degbeŋgyoo, nyiŋ konɔɔ! N baŋ gyae kedoo kelii woromɔ?Wii n tewulɛɛ.14Mo n kegyae keŋ taŋ ɔto ya nɛ, boele daa nebo,na dee nyiŋ nyaŋee kpee nɔɔneŋ na ke yɛɛ daa gyoŋ da kekyaabii man pou.15Yela dee di gyoŋ tɔ weeya burum ŋan n be naase daa diyem,na kulutooneŋ burum ŋan dɔɔ naa diyem nɛ kom.16Lese nya ayɛɛsa debɔɔ wola n tewulɛɛ,na be bia kena n gyoorobiiri doŋ keŋ.17Degbeŋgyoo de Wurubuarɛ waa mo ɔ bɛrɛɛ boele daa,yela de nyiŋmaa man tom ke de fa daa,ayi, yela de nyiŋmaa man tom ke de fa daa.The Seed Company