Nɔɔneŋ89
Nɔɔneŋ debaŋ keŋ Iserae doo wose kekyaŋ man
1Maa kpee nɔɔneŋ lee Degbeŋgyoo kegyae dinaa keŋ wose man kekpaakekpaa,maa gyuusu me nɔɔ yako nya anokoare kedi.fa kalola kegyakaarese pou.2Maa toro yako nyi n kegyae seŋɛɛ keŋkeŋ,n ta see nya anokoare kedi mokɔɔ adido gbagba.3N yakowɔ nyiaa, <Daa na walaŋ ŋon mɔɔ lese nɛ te bakenɔɔsee.Ma te kaŋ ntam fa me tobaale Dawide.4Maa yela n duuluŋman balaŋ ke kyaa gbeli kekpaakekpaa,maa yela n duuluŋman balaŋ ke di gyoori kekpaakekpaa.5Degbeŋgyoo, adido na lese n yele lee n gyakoloŋ nombia dɔɔ,na nya anokoare kedi n balaŋ fereŋkyeŋ baŋ degyaŋee man.6Nawolo nyi amɔte kyaala ŋɔma man keŋ baa mo e maana Degbeŋgyoo?Amɔte wɔela ŋgba Degbeŋgyoo adidotena baŋ man?7Balaŋ fereŋkyeŋ baŋ degyaŋee man na, Wurubuarɛ te bɛɛ mo obuo fa nideli,ɔ wose man dana gyakoloŋ kela baŋ pou bɔɔ kilisi e nɛ.8Degbeŋgyoo Wurubuarɛ Dekpataakpere, amɔte yɛɛla ŋgba nyaŋ nɛ?Nyaŋ Degbeŋgyoo yɛna Dekpataakpere, te nya anokoare kedi te kilisi neŋ.9Nyaŋ ne diina doŋ ɛpo doŋse dɔɔ,akpaa ɛpo de gyɔɔ koro na, nyaŋ ne yɔkɔsena ke.10Nyaŋ yɛlɛɛna Rahabe bogobogo, ŋgba ŋon bɔɔ koo nɛ,n moo n doŋ keŋ yaasee n kɔlara.11Adido yɛɛ n wui, te tɛɛle keŋ mɔ yɛɛ n wui,nyaŋ seena tɛɛle na ŋan pou doo ke man nɛ mokɔɔ.12Nyaŋ yɛɛna ado yenaŋ na ata yenaŋ,Tabɔ na Hɛremon ne kpee nɔɔneŋ nyaŋee lee n yele dɔɔ.13Doŋ doo n baam man,n nyiŋmaa dana doŋ, n dunoluŋ nyiŋmaa te gyina adido.14Katenee na nombia kedi kegbɛɛ dɔɔ te n moowɔ see n gyoorogbeli mokɔɔ,kegyae na anokoare kedi dɔŋ n siaman.15Degbeŋgyoo, baŋ ba gyeŋ nyi kaboena baa lese n yele,te bɛɛ tɛɛ n keŋmaŋee keŋ man nɛ, baŋna nyeebam.16Wee dibiliŋ na bɛɛ nyaŋee lee n yele dɔɔ,na bɛɛ kɛlɛɛ n katenee.17Nawolo nyi nyaŋ yɛna be gyoorobiiri na be doŋ,n bɛrɛɛ dɔɔ te dee di de kɔlara dɔɔ.18Ampaŋ de yoo nyeele pampasaŋ yɛɛ Degbeŋgyoo wui,de gyoo yɛɛ Iserae fereŋkyeŋte ŋon wui.19Gyaŋgba n kolosiwɔ kalesewola man,fa n tewulɛɛ baŋ bee di anokoare nɛ nyiaa,<Me ta do yoonɔɔte ŋolo doŋ,me ta lese tobaale ŋolo lee balaŋ baŋ man.20Me ta lese me tobaale Dawide,me ta mo me nuŋ fereŋkyeŋ keŋ tiu e.21Me nyiŋmaa gyae ke gyakaa ɔ dɔɔ,ayi, me baam gyae ka do e doŋ.22Kɔlare be gyae waa di ɔ dɔɔ ya,akpanyanyaŋte be gyae waa ŋere e do ya.23Maa naŋ ɔ kɔlara ɔ siaman,na maa tuku baŋ bɛɛ kɔla e nɛ.24Ma anokoare kegyae gyae ke kyaana e,na maa yela waa di ɔ kɔlara dɔɔ lee ma yele man.25Maa mo ɔ nyiŋmaa gyakaa ɛpo dɔɔ,ɔ dunoluŋ nyiŋmaa gyakaa booneŋ dɔɔ.26Waa baake maŋ nyi, <<Nyaŋ yɛna me kya,me Wurubuarɛ, na ma nyeekelɛɛ kpanaŋ.>>27Maa lese e yɛɛ me bu gyaŋgbate,tɛɛle dɔɔ gyooneŋ pou nyee.28Maa gyae e kekpaakekpaa,nɔɔ keŋ daa na e be bake nɛ, gyae ke doo kekpaakekpaa.29Maa yela ɔ duuluŋ man balaŋ kekyaa gbeli kekpaakekpaa,ɔ gyoorogbeli gyae kekyaa ŋgba adido nɛ.30<<Akpaa ɔ bia de bɛɛ ma mmaraase,te be te sila me kawola dɔɔ ya,31akpaa be wɔlɛɛ me kawolase,te be te di ma mmaraase dɔɔ ya na,32kenaŋ na maa mo dambila wɔŋ ba deŋele,maa tuku wɔ lee be nombiakumɛɛ dɔɔ.33Mɔna mɔɔ gyae maa lese ma kegyae lee ɔ dɔɔ,yaa maa bɛɛ nyi mɔɔ di anokoare fa e ya.34Mɔɔ gyae maa lee me nɔɔkebakesee keŋ wɔle,yaa kyɛɛkee nombii keŋ mɔɔ gyuusu me nɔɔ yako nɛ ya.35Ma te kaŋ ma yele fereŋkyeŋ keŋ ntam dokoloŋ kooŋ,te mɔɔ gyae maa beo Dawide ya.36Ɔ duuluŋ man balaŋ baa di gyoori kekpaakekpaa,ɔ gyoorogbeli gyae ke kyaa me siaman ŋgba weese nɛ.37Ke gyae ke kyaa gbeli ŋgba gyaalaŋ,ŋon ɔ ne di adansɛɛ anokoare man adido nɛ.>>38Mɔna n te bɛɛ e te n gegi e,n ta gyeŋ baŋ nideli do n walaŋ ŋon bɔɔ tiu e Wurubuarɛ nuŋ nɛ.39N ta lee nɔɔkebakesee keŋ ɛmɛɛ na n tobaale be bakesee nɛ wɔle,n ta mo ayimɛɛ wuu ɔ gyooro kotɔtɔɔ keŋ aŋasa man.40N te yɛlɛɛ wa akyaŋse ŋan pou,te n tekerii akyaŋse ŋan ne gyee wɔ nɛ.41Baŋ bɛɛ lam botɔɔ nɛ pou kuu wa abɔɔ,ɔ tebia pou ne kulu e.42N te gyina ɔ kɔlara dunoluŋ nyiŋmaa adido,n te yele ɔ kɔlara pou ne nyaŋee.43Ke gbagba na, n te tulii ɔ yoosila,n te yele waa nyiŋ daseŋae yoo man ya.44N te yele ɔ gyoorobiiri te kɔŋ ɔto,te n tuŋa ɔ gyoorogbeli keŋ lɔ tɛɛle man.45N te kɔɔkee ɔ tobiiritɛɛ weeya,te n moo desɛŋ wuu e.46Degbeŋgyoo, kelii woromɔ? Nyaŋ ka weese n wose kekpaakekpaa?Kelii woromɔ yaa n baŋ gyae ke kpa ŋgba boalaŋ nɛ?47Tɔɔse nyi ma weeya ta boo ya.Tɔnɔɔ woŋti dɔɔ te n yɛɛ denibalaŋ!48Amɔte ne gyaela waa kyaa keŋ ɔ ba yem ya?Amɔte ne gyaela waa tale lɛɛ ɔ wose lee yebɔɔ doŋ keŋ man?49Degbeŋgyoo, n gyaŋgba kegyae keŋ,dɔɔ n ba sem kaŋ ntam fa Dawide anokoare man nɛ kyaa aleŋ?50Degbeŋgyoo, tɔɔse mena keŋ bee kulu n tobaale,mena keŋ mɔɔ mo tɛɛlese pou nombia gyakaa me konɔɔ dɔɔ.51Degbeŋgyoo, n kɔlara ne kulu maŋ,yenaŋ kamasɛ keŋ n tobaale ŋon n be tiu e nuŋ nɛ de kulu nae na bee kulu e.52Ɛ lese Degbeŋgyoo yele kekpaakekpaa,Dɛɛkɔŋ mena, Dɛɛkɔŋ mena.The Seed Company