Nɔɔneŋ69
Kewii fa kekyɔɔ69:1 Dawide nɔɔneŋ
1Ao Wurubuarɛ lɛɛ ma nyee,nawolo nyi loŋ keŋ te wuu kaa lii me wɔŋe man.2Ma te dɔɔ depate keŋ ke dana siiliŋ nɛ man,me nawɔɔ bɛɛ baŋ tɛɛle ya,ma te kaa lii lee keŋ man,boo te wuu kaa mo me dɔɔ.3ma te gbalase keŋ mɔɔ ne tale baake ŋolo kaa kyɔ maŋ ya,me lokotɛɛ ta wolome sia te laasemɛɛ kɛo me Wurubuarɛ.4Baŋ bɛɛ kɔla maŋ keŋ ma te yɛɛ wɔ kolo yaboe kela ma nyeenyɔɔseMe kɔlara ne di akɛrɛɛ tia maŋ,baŋ bɛɛ gyae maŋ baa ko nɛ boe.Bɛɛ ŋere maŋ nyi maa besena kpene keŋ ma te ŋmɛɛle ya nɛ kɔŋ.5Ao Wurubuarɛ n gyeŋ me diyiŋ nombia,me dukum ba weesɛɛ n siaman ya.6Degbeŋgyoo, Degbeŋgyoo Dekpataakperenaa yele desɛŋ kekyaŋ baŋ be loo gyakaa n dɔɔ lee maŋ dɔɔ yaIserae Wurubuarɛnaa yele desɛŋ ke kyaŋ baŋ bɛɛ kɛo neŋ lee maŋ dɔɔ ya.7Lee nyaŋ dɔɔ bee kulu maŋ,te desɛŋ te tekeri me wɔŋe,8Me ta bese ŋɔɔle maŋ gbagba ma loŋtona man,ŋɔɔle, maŋ gbagba me naa lolo bia man,9Nyɔ ɔsom deni dinaa keŋ te di ma nyee,tuubia ŋan bɛɛ tee neŋ nɛ, kaa wuraa maŋ bo.10Nyi me wii te me bake me nɔɔ nɛ,na bɛɛ boŋo maŋ bo.11nyi ma mo titire wuu ma wose na,balaŋ ne kulu maŋ bo.12Baŋ be kyaa donɔɔ keŋ denaanɔɔ man nɛ ne kulu maŋ,te soloŋ nyɔɔra ta mo maŋ kara nɔɔneŋ.13Mɔna Degbeŋgyoo, mɛɛ fane fa neŋ,debaŋ keŋ nyaŋ ka boele maŋ nɛ,Ao Wurubuarɛ, lee n kegyae dinaa keŋ dɔɔ,mo nya anokoare nyeekelɛɛ keŋ kpa maŋ.14Lɛɛ maŋ lee depate keŋ man,naa yele maa munu ya,lɛɛ maŋ lee baŋ bɛɛ kɔla maŋ nɛ nyiŋmaa man,lee loŋ keŋ ke dana siiliŋ nɛ man.15Naa yele loŋ ke wuu mo maŋ,yaa maa dɔɔ lee man,yaa yebɔɔ ke wuu maŋ ya.16Degbeŋgyoo, lee n wɔe na n kegyae dɔɔ kpa maŋ,lee n waraŋase kewii beiŋ dɔɔ besena n sia kɛɛ maŋ.17Na mo n sia weese n tobaale ya,me doo kayeyɛɛ man dɔɔ, kpa maŋ bileŋ.18Tuu benaa maŋ na n ke lɛɛ maŋ,lee me kɔlara dɔɔ lɛɛ maŋ.19N gyeŋ mena keŋ bee kulu maŋ, te bee fulu maŋ do maŋ desɛŋ,n gyeŋ me kɔlara pou.20Tuubia te yɔkɔse ma wose,keŋ mɔɔ dana loo degyakae ya,me gyae ŋolo kaa wii maŋ, mɔna me te nyim ya,me gyae ŋolo kaa yakodo maŋ, mɔna me te nyiŋ ŋolo ya.21Ba moo teekum do me weenɛɛ man,te be faa maŋ soloŋ denyaŋesa nyi maa nyɔɔ ko loŋboaneŋ.22Ba see wɔ weenɛɛ na ke dɛɛ bese kɔta,yela be siŋkiti kedi ka besena wɔ kɔtase.23Yela be sia ke yɛɛ wɔ fulaa na bɔɔ nyiŋ naa ya,ba teŋase dee gokii kekpaakekpaa,24Lese n baŋ wola wɔ,lese n baŋ nedoŋ keŋ wola wɔ.25Yela ba akyaese ka bese donɔɔ bene,ŋolo na kyaa be kanyaŋ denɛɛ man ya.26Nawolo nyi bɛɛ naase baŋ n be wɔŋ ba deŋele nɛ diyem,te bee kolosi lee baŋ n be gooli wɔ nɛ weeleŋ wose man.27Wɔŋ ba deŋele, na n ka bese wɔŋ ke bela,naa yele baa nyiŋ n nyeekelɛɛ keŋ ya.28Yela baa lese ba yela lee nyeedoŋ tɔne keŋ man.naa yele baa ŋmarase ba yela kpuna baŋ ba tenɛɛ nɛ ya.29Mɔ maŋ dɔɔ mɛɛ naa diyem te mee nyii weeleŋ,Ao Wurubuarɛ, yela n nyeekelɛɛ ke gyee maŋ.30Maa kpee nɔɔneŋ lese Wurubuarɛ yele,na maa mo karaŋ kefa lese ɔ gyoorobiiri debɔɔ.31Kei gyae ka gyoo Degbeŋgyoo sia kela nunkyue baale,kela nunkyue baale ŋon ɔ dana woo na awɔkatese.32Ayematena baa naa na ke yɛɛ wɔ gyoŋ,ɛmɛɛ baŋ ɛ ne kɛo Wurubuarɛ nɛ, ɛ konɔɔse dɛɛ fɛɛ ŋon.33Degbeŋgyoo ne nyii ayematena,te ɔ bee wolee ɔ balaŋ baŋ bɔɔ kyaŋ wɔ tɔ deni nɛ ya.34Adido na tɛɛle, ɛ lese ɔ yele,ɛpose na wonembia baŋ pou be doo ke man nɛ,35nawolo nyi Wurubuarɛ waa lɛɛ Siyɔn nyee,na waa bese baŋee Yuda donɔɔse dinaana ŋan.Kenaŋ na balaŋ baa kyaa botɔɔ, na baa mo ke bese be wui.36Ɔ somera duuluŋ man balaŋ baa kaa mo ke bese be dedii,na baŋ bɛɛ gyae ɔ yele nɛ ke kyaa botɔɔ.The Seed Company