Nɔɔneŋ68
Iserae keyoodi nɔɔneŋ
1Wurubuarɛ koro bileŋ, na n kɔlara ke yaasee,yela n kɔlara ke yeu lee n siaman,2Feefu wɔ leki ŋgba nyɔɔse nɛ,ŋgba mena keŋ keeni ne yalakee boalaŋ gyaŋ nɛ.akpanyanyaŋtena baa munu Wurubuarɛ siaman.3Mɔna baŋ ba tenɛɛ nɛ baa di gyoŋ,na baa nyaŋee Wurubuarɛ siaman,dɛɛ yɛɛ wɔ gyoŋ na baa nyaŋee.4Ɛ kpee nɔɔneŋ fa Wurubuarɛ, ɛ kpee nɔɔneŋ lese ɔ yele,Ɛ gate ŋon ɔ dɔŋ ŋɔma man nɛ ,ɛ nyaŋee fa e, ɔ yele yɛna Degbeŋgyoo.5Wurubuarɛ, ŋon ɔ kyaa ɔ dekyae fereŋkyeŋ man nɛ,yɛna yoyolobiise be kya, na ŋon ɔ ne gyee liala.6Wurubuarɛ na moona baŋ bɔɔ dana walaŋ ya nɛ do balaŋ man,te ɔ na lese baŋ bɔɔ kyaŋ wɔ tɔ deni nɛ gyoŋ man,mɔna baŋ bɛɛ yɛɛ deŋeledoŋ nɛ, baa kyaa tɛɛle keŋ weese be gyɔ ke kpakparakpaa nɛ dɔɔ.7Ao Wurubuarɛ, debaŋ keŋ n be tɛɛ n balaŋ siaman,te n ba mo wɔ ta depampaa man nɛ,8tɛɛle wosiwɔ te ŋɔma yelaa ɔga ŋɛɛwɔ,Sinai Wurubuarɛ ŋon siaman,Iserae Wurubuarɛ ŋon siaman.9Ao Wurubuarɛ, n yelaa ɔga dinaa ŋɛɛwɔ,n kaa besewɔ fa n dedii keŋ be yɔkɔse nɛ doŋ.10N balaŋ kaa kyaawɔ ke man,Wurubuarɛ, n deeli dɔɔ n yelaa ayematena nyiŋa burum.11Degbeŋgyoo kolosi ɔ nombia,ala baŋ bɛɛ gyɔ ka dekpeŋkpeŋ nɛ boe.12<<Gyooneŋ na be yoonɔɔtena ne yekii,ala baŋ be kyaa dɛɛ nɛ kpala yoo man abɔɔ.13doo nyi be doo wonembia dedoi man koraŋ nɛ,ke yɛɛ ŋgba duwuluŋ beŋkelɛɛ ŋan bɔɔ mo kɔba wolom yɛɛ nɛ,te ɔ wona yɛɛ ŋgba kɔba yayam keŋ kɛɛ ŋalakee nɛ.14Debaŋ keŋ Dekpataakpere ŋon be yaasee gyooneŋ tɛɛle keŋ dɔɔ nɛ,ke yɛɛ ŋgba debuŋta ne yalala Salemɔn bula dɔɔ nɛ.15Basan bula, bula dinaaBasan bula, bulase ŋan ŋe dana kekpasese burum,16nyaŋ bula keŋ n dana kekpasese burum,weera n sia ne yɛɛ bula keŋ Wurubuarɛ ba lese nyi ɔ dekyae,botɔɔ keŋ Degbeŋgyoo gbagba waa kyaa kekpaakekpaa nɛ?17Wurubuarɛ yookɔtase yɛɛ kakpoŋse burum,kakpoŋ kakpoŋse,te Degbeŋgyoo moowɔ lee sinai kaa gyoo ɔ dekyae fereŋkyeŋ man.18N kɛɛ gyem n ne gyu adido nɛ,n moo baŋ bɔɔ yoo kyaŋ wɔ nɛ burum,n nyiŋa abɔɔ kefa burum lee baŋ koraŋ bɔɔ yoo tia neŋ nɛ gyaŋ.na Degbeŋgyoo Wurubuarɛ ke kyaa botɔɔ.19Ɛ lese Degbeŋgyoo yele, Wurubuarɛ da nyeelɛɛre ŋon,wee kamasɛ na ŋon na seelena de kaalese,20De Wurubuarɛ yɛɛ Wurubuarɛ ŋon ɔ ne lɛɛ da nyee,Degbeŋgyoo Doŋ Pou Nyee ne lɛɛna daa lee yeŋ man.21Ampaŋ, Wurubuarɛ waa yɛlɛɛ ɔ kɔlara nyeeya,baŋ ba nyeenyɔɔse boe te be gyakaa be dukum keyɛɛ man nɛ.22Degbeŋgyoo kpa, <<Maa mo wɔ lee Basan,maa mo wɔ lee ɛpo siiliŋ man,23na n kenyiŋ ta baŋ bɛɛ kɔla neŋ nɛ fatabo man,na n babaase laakemse ke nyiŋ deŋee.>>24Ao Wurubuarɛ, bɛɛ naa mena keŋ n ne gyina n baameŋse gaŋtee,me Wurubuarɛ, me gyoo n ne lɔ baameŋse gyoo n deni fereŋkyeŋ keŋ man.25Nɔɔneŋ kpeera dɔŋ siaman, baŋ wɔle yɛna suyagyɔɔra,baŋ be kpuɛna wɔ yɛna alebia baŋ bee wosi akyakaase.26Ɛ lese Degbeŋgyoo yele balaŋ burum baŋ man,ɛ lese Degbeŋgyoo yele Iseraetena degyaŋee man.27Bɛneyamen dekpaŋalaŋ peperee keŋ dɔŋɛɛla be siaman,na Yuda gyoorobia burum baŋ gyakaa,na Sebulɔn na Nafitali gyoorobia gyakaa.28Ao Wurubuarɛ, wola n doŋn doŋ keŋ n ba mo seŋ de wɔle nyaŋ ŋon n be yɛɛ abɔɔ pou fa daa.29Lee nyɔ ɔsom deni keŋ kyaa Yerusalɛm dɔɔ,gyooneŋ baa mo abɔɔ kefa kɔna neŋ.30Kalana ŋale man wonembu ŋon ɔ doo morose man nɛ,nunkyue baala na nunkyue bia baŋ be yɛɛ tɛɛlese wui nɛ.Yɔkɔse wonembukum ŋon kelii debaŋ keŋ waa mo kɔba wolom kɔna neŋ.Yaasee tɛɛlese baŋ bɛɛ gyae yoo nɛ.31Baŋ ba seŋɛɛ Igyipite gyoo nawɔɔ man nɛ yɛna Kusitena,baa kaa yɔkɔse ba wose Wurubuarɛ siaman.32Ɛmɛɛ tɛɛle kei dɔɔ gyoori dediise, ɛ kpee nɔɔneŋ fa Wurubuarɛ,ɛ kpee nɔɔneŋ lese Degbeŋgyoo yele,33ŋon kyaala adido adido, beneŋ beneŋ adido,ŋon na moona woya beeneŋ fae.34Ɛ gyɔ Wurubuarɛ doŋ keŋ dekpeŋkpeŋ,ɔ gyoorobiiri doŋ gyakaa Iserae dɔɔ,ɔ doŋ doo adido.35Wurubuarɛ, n wose dana gyakoloŋ n fereŋkyeŋ keŋ man,Iserae Wurubuarɛ ne fa ɔ balaŋ doŋ, te ɔ na do wɔ kakyeŋ.Ɛ lese Wurubuarɛ yele.The Seed Company