Nɔɔneŋ59
Kefane fa wosefɛɛreŋ
1Ao Wurubuarɛ, lɛɛ maŋ lee me kɔlara nyiŋmaa man,yɛɛ ma dekagya tia baŋ bɛɛ koro seŋ tia maŋ nɛ.2Lɛɛ maŋ lee balaŋ kumɛɛ nyiŋmaa man,na n ke lɛɛ ma nyee lee baŋ bɛɛ gyae maŋ baa ko nɛ nyiŋmaa man.3Degbeŋgyoo kɛɛ, bɛɛ deke maŋ baa ko,balaŋ kumɛɛ ne bake ma nyeeman,lee keŋ ma te yɛɛ dukum yaa kolokum daale ya.4Ma te yɛɛ dukum ya, mɔna ba te desina ba wose baa yoo maŋ,Koro kaa kyɔ maŋ, kɛɛ me kaale.5Nyaŋ Degbeŋgyoo Wurubuarɛ Dekpataakpere,nyaŋ yɛna Iserae Wurubuarɛ,koro na n ke wɔŋ tɛɛlese pou deŋele,naa wii akpanyanyaŋtena waraŋase ya.6Bɛɛ kɔŋ balinɔɔ kamasɛ,bee gbesi ŋgba babaase nɛ,na bee kila donɔɔ dinaa keŋ.7Kɛɛ tuubia ŋan na lee be nɔɔse man,be nɔɔse man nombia na bee ŋgba yoosilase nɛ,na bɛɛ yako nyiaa, <Amɔte ne nyiila?>8Mɔna nyaŋ Degbeŋgyoo na boŋo wɔ bo,n ne kulu tɛɛlese pou.9Nyaŋ yɛna me doŋ, mɛɛ kɛɛ n gbɛɛ,nyaŋ yɛna Wurubuarɛ me keyeu kagyoo.10Nyaŋ yɛna Wurubuarɛ ŋon maa tale mo ma wose lɔ n dɔɔ.Wurubuarɛ waa ta me siaman,na waa yela maa naa mena keŋ waa di me kɔlara dɔɔ.11Mɔna Degbeŋgyoo de yoo nyeele pampasaŋ, naa ko wɔ ya,na mena ya na me balaŋ baa wolee.Mo n doŋ yaasee wɔ,na n ke yɔkɔse wɔ.12Lee be nɔɔse man nombiakumɛɛ dɔɔ,lee nombia ŋan na lee be nɔɔsebia man dɔɔ,yela baa kyaŋ wɔ ba wose kegate man.Lee kefaala na akɛrɛɛ ŋan bee dii dɔɔ,13mo n baŋ nedoŋ wɔlɛɛ wɔ,wɔlɛɛ wɔ kaboena baa munu pou.Kenaŋ na balaŋ baa nyii ke kelii tɛɛle ɔto nyiaa,Wurubuarɛ ne diina gyoori Yakɔbe dɔɔ.14Bɛɛ bese kɔŋ balinɔɔ,bee gbesi ŋgba babaase nɛ,na bee kila donɔɔ dinaa keŋ.15Bee kili gyae weenɛɛ,akpaa ba te baa ya na bɛɛ fae yeesa.16Mɔna maŋ maa kpee n doŋ keŋ nɔɔneŋ,maa kpee n kegyae keŋ nɔɔneŋ nebo,nawolo nyi nyaŋ yɛna ma dekagya,na ma keyeu kagyoo wose ke kyaŋ man.17Nyaŋ yɛna me doŋ, maa kpee nɔɔneŋ lese n yele,nyaŋ Wurubuarɛ yɛna me gyeere,me Wurubuarɛ ŋon maa tale mo ma wose lɔ ɔ dɔɔ.The Seed Company