मार्क2
1थोड़ाक दिहोअ फासाड़ी ईसु फाशुउ कफर्णहुम गांवोंम गोयू, आन तो कोअ होय एहेलिही खबर आखी जागे पसरीत गोयी.2ताहां एतेहे माअहें टोलू वोल्ये के बाओअ जागे बी जागू ने उगर्यू. आन ईसु तियांहां सिकाड़तुतो.3तेहेलाम शार माटी तिया लखवाअ मांदवाड़्याहा उसलीत ईसुउ जागे लेत आवया.4पोन गर्दी ओती तिहीं वाअहीं तिया मांदवाड़्याहा ने लेत जात सेक्या. ताहां ते तो ओतू तिहींइं कोओ पोर्येए नाल्ल्ये फेड़ी देदे आन जिया खाट्लापोअ तो ओतू तिया खाटलाहा ते कोओपोअ रोत निसे उतरीत सेके एहेलोह गालो कोअयो आन तिहीं तिया मादवाड़्याहा उतार्यो.5तियांआं विश्वास देखीत कोइत ईसु लखवाअ मांदवाड़्या माहुंहूं कोयो, “माआं सोआ, ताआ गुनाआं माफी ओवीही.”6तिहीं थोड़ाक कायदाअ मास्तरहों बोहीत रोयाते. ते तियांआं मोनोमेहें विसार कोआ वोल्या के,7“ये एहें कोअलोअ केहें कोइत हिम्मत कोअयी? ए निंदा होय! देवुज गुनाआं माफी आपित सेकेहे!”8पोन ईसु तेताजमेहें आत्मामेहें समजीत लेदो के, तें तियां-तियांज विसार कोअताहा, ताहां तिये तियांहां कोयो, “तुमू मोनोम एहेलाहा विसार काहा कोअताहा?9या लखवा लागला माहुंहूं ‘ताआ गुनाआं माफी ओवी’ एहें कोअलोअ सोपो के ‘ऊठ, ताआ आथरुउ विस आन सालु वोल’ एहें कोअलोअ सोपो?10पोन जिया वाअहीं तुमू जाईंत लेअहूं जोवे के, माहुंउं बेटाह्हाहा धरती पोअ गुनाआं माफी कोइलोअ आधिकार होय.” ताहां तो तिया लखवा लागला माहुंहूं कोयो,11“आंय ताहूं कोहो, उठ, ताआ खाट्लो विस आन कोअ जा!”12तियां आखा माअहोंअ देखताइज तो मांदवाड़्यु उठ्यू, तियाआ आथरुउ विसीत लेदो आन जानु वोल्यू. ओं देखीत आखे माअहें बोगलाइत गोये आन देवोअ स्तुती कोअते जात कोतेहे, “आमू एहेलोह केधिहींज नाहां देख्यो!”13ईसु निहीत कोइत गालीलोअ तालावोअ मेरे गोयू, आन एक गोवारु माअहें तियाआ जागे आये, आन तो तियांहां सिकाड़ु वोल्यू,14तिहीं रोत तो जात्लू तेहेलामेहें हल्फीइ बेटुह्हू लेवीही नाकापोअ बोहीत रोल्यू देख्यू. ताहां ईसु लेविही कोयो, “माआं फासाड़ी आव,” ताहरुउ तो उठ्यू आन ईसुउ फासाड़ी गोयू.15जेहेलाम ईसु लेविइ कोअ रोटू खानू बोठू. तिहीं वारुज जोओं फालू लेनारा आन पापी बी ईसु आन तियाआ सेलांअरी रोटू खाना बोठा; काहाके ते जाअखा जोओं ओता आन तियाआ फासाड़ी आवयाते.16तेहेलाम थोड़ाक कायदाअ मास्तरहों जे फरिसी होय, ईसुहू पापी आन फालू लेनाराअरी बोहीत कोइत रोटू खात्लू देख्यू. ते तियाआ सेलाहां कोयो, “ओ यां माअहोंअरी रोटू काहा बोहीत कोइत खाहे?”17एहेलोह उनाइत कोइत ईसु तियांहां कोयो, “नेरा माअहोंहों डाक्टरोअ गरज ने रोत्ली, पोन मांदवाड़्याहां रोत्ली. आंय धर्मी माअहोंअ काजे नाहां, पोन पाप्योंहों हादीइलोअ काजे आवयुहू.”18बाप्तिस्मा कोअनारा योहानोअ सेला आन कायदाअ मास्तरहों जे फरिसी उपास कोअताते; ताहां थोड़ाक जोओं ईसुउ जागे आवित कोइत तियाहा कोयो, “योहानोअ सेला आन फरिसी उपास कोअताहा, पोन ताआ सेला काहा उपास नाहां कोअता?”19ईसु तियांहां कोयो, “जाअहूं जाआं वर जानेएरी वेहेवालोअ मांडवोअ थुड़ी होय, ताअहूं जाआं तें उपास कोइत सेकतेहे के? ताहां जाअहूं जाआं वर आरी होय ताअहूं जाआं तें उपास ने कोइत सेकनारे.20पोन एहेलाहा दिही आवे के वर तियांअरी रोत उसे विसाइत जाय; ताहां तें उपास कोए.21“कोडो बी नोवा आंगड़ाआ सिवरो जुना आंगड़ाहा नाहां लागड़तो, जर तेहें कोअयो ताहां नोवो सिवरो जुना आंगड़ाहा फाडीत कोइत वोडू डुसू पाड़ीत टाके.22नोवू दाराक्शाआ रोह जुना सांबड़ाआ खोत्लामेहें कोडोज ने मेकत्लो, नेत तो दाराक्शाआ रोह तियाहा फाडीत टाकी देय आन दाराक्शाआ रोह आन सांबड़ाआ खोत्लू बेनू आरवात जाय; पोन नोवू दाराक्शाआ रोह नोवा सांबड़ाआ खोत्ला मेहें पोअत्ले.” दाराक्शाआ रोह मिकीइलोअ सांबड़ाआ खोत्लू23एहेलोह ओयो के ईसु आरामोअ दिही गोवोंअ खेतो मेहें ओवतुज जातुतो, आन तियाआ सेला सालता जात गोवोंअ सोंवें तोड़ा वोल्या.24ताहां कायदाआ मास्तरहों जे फरिसी ईसुहू कोना वोल्या, “पाल, आरामोअ दिही ताआ सेला कोअताहा ओं काम आपाअ कायदाआ विरुद्दाम होय!”25ईसु तियांहां कोयो, “जेहेलामेहें दाविद आन तियाआ हात्योहों गरज पोड्यी आन फुक लागी ताहां तिये कि कोअयो तों तुमू नाहां वाश्यो?26अबियाथार डायु पुंजारु ओतू ताहां तो देवोअ कोअमेहें केहें कोइत गोयू आन देवोहो होपल्यू रोटू कायदाआ इसाबो वाअहीं पुंजाराआ सिवाय कोडोज ने खाअहूं जोवे, तो रोटू तिये केहें कोइत खादू आन तियाआ हात्योहों बी आप्यू?”27ईसु तियांहां कोयो, “आरामोअ दिही माअहोंअ काजे बोणावयुहू, माहुंउं आरामोअ दिहोअ काजे नाहां.28तियाहा काजे माहुंउं बेटुह्हू आरामोअ दिहोअ बी प्रभु होय.”
The Word for the World International