मार्क1
1देवोअ बेटुह्हू ईसु ख्रिस्ताआ हाजी बातमीइं सुरुवात.2जेहलोहो यशया भविश्यवक्ताआ पुस्तकोम लेख्योहो के,“देवे कोयो, ‘आंय माआं खबर्याहा ताआ आगाड़ी मोकलिहीं,’तो ताआ काजे वाट तियार कोए;3रानोमेहें एका आअड़ीनाराआ आवाज होंबलाअहे के,‘प्रभुउ वाट तियार कोआ,तियाआ सड़क हुदी कोआ.’”4तियाहा काजे योहान नेवरी जागेहे बाप्तिस्मा आन हिकवोण आपतू जात माअहोंहों परसार कोअयू के, “तुमाआं गुनां रोत सेटे रोवा आन माफीइ कोअते मोन फिराविइलाआ बाप्तिस्मा ल्या, आन देव तुमाआं गुनाआं माफी कोए.”5आखा यहुदीया मुलखो मेर्येए आन येरुसालेम सेहरो मेहें रोनारे निहींत आखे तियाआ जागे गोये, आन सोताआ गुनाआं कबुली कोइत यारदेन खाडी मेहें तियाआ आथे बाप्तिस्मा लेदो.6योहान उटड़ाअ रुंगहाअ आंगड़े पेवित आन कंबरेमेहें सांबड़ाआ पोट्टू बांदीत रोतुतो आन टिड्ये आन मोद खातुतो,7आन एहेलुहू परसार कोअतुतो, “माआं फासाड़ी जो आवनारु होय, तो माआं रोत वादार सेक्तीवालू होय; आंय तोम टुंगू पोड़ीत तियाआ बुटोअ दोअड़ी सोडीइलोअ बी लायक कायनाहां.8आंय तोम तुमुहूं पाअयों वाअहीं बाप्तिस्मा आपोहो, पोन तो तुमुहूं पवित्र आत्मा वाअहीं बाप्तिस्मा आपे.”9तियां दिहोमेहें ईसु नासरेथ रोत गालील मुलखोमेहें आयू, आन यारदेन खाडीम योहानोअ आथे बाप्तिस्मा लेदो.10ईसु पांअयोंम रोत उसे आवत्लू, तेहेलाम होरगो उगड़ीइल्यो आन पवित्र आत्मा तिया पोअ पेरवाआ होस उतरीइत्लूज तियाहा देखाअयू.11आन होरगाम रोत एक आवाज आयू के, “तू माआं मेरालू बेटुह्हू होय, आंय ताआ वाखरी खुस होये.”12ताहां पवित्र आत्मा तुरतूज ईसुहू नेवरी जागेहे लेत गोयू,13रानोमेहें तियाहा सालिही दिही जाआं सैताने पारजाणीत पाल्यू; तिहीं रानोमेर्येए जनवारे बी ओते, पोन देवदुत तियाआ सेवा कोअताते.14योहान तोआयू तोयोंअ रोते ईसु गालील मुलखोमेहें आवित देवोअ राजोअ हाजी बातमीइं परसार कोउ वोल्यू.15आन कोयो, “खोरी वेल आवित लागीही, देवोअ राज आहने आवित लागोहो, पापोअहें रोत फिरा आन हाजी बातमी पोअ भरिवसू मिका!”16ईसु जेहेलाम गालीलोअ दोर्याअ मेरे जात्लू तेहेलाम तिये शिमोन आन तियाआ पाही आंद्रिया याहां दोर्यामेहें जाल टाकत्ला देख्या, काहाके ते मासारा ओता.17ईसु तियांहां कोयो, “माआं फासाड़ी आवा, आंय तुमुहूं माअहोंहों देवोअ राजोम लेतावनारा बोणाविहीं.”18तेताजमेहें ते जाल सोड़ीत तियाअरी गोया.19तो तिहीं रोत जारिक आगाड़ी गोयू, ताहां तियाहा बेन पाही देखाअया ते जब्दीइ बेटाह्हा याकोब आन योहान ओता. ते तियांआं नावड़ापोअ जाल हुदारताते.20तिये तियांहां लगेज हाद्या, आन तियांआं आब्हा जब्दीही आन तियाआ मोजर्याहां नावड़ाम सोड़ीत तियाआ फासाड़ी गोया.21ताहां ईसु आन तियाआ सेला कफर्णहुम होयरोम आया, आन आगल्याआ आरामोअ दिही यहुदीइ आराधनालयोमेहें जात कोइत सिकाडू वोल्यू.22आन तें माअहें तो जे हिकवोण आपतुतो तियीं हिकवोणो वाअहीं बोगलाइत गोये; काहाके तो तियांहां कायदाअ मास्तरहोंअ होस नाहां पोन आधिकार लेत कोइत जेहें सिकाड़तुतो.23तेहेलाजमेहें, तियांआं आराधनालयोमेहें एक माहुंउं ओतो, जिया मेहें एक खाराब आत्मा ओती.24तिये आअड़ीत कोइत कोयो, “ए ईसु नासरेथवाला, तू आमाआं विसमेहें काहा पोडेहे? तू आमुहूं आरवीत टाकू आवयुहू के? तू कोडू होय तो माहूं मुंदू होय, तूज तोम देवोअ पवित्र संदेश लेतावनारु होय!”25पोन ईसु तियाहा बावरात कोयो, “ठावको रो, आन या माट्योमेहें रोत निहीं!”26ताहरीइ ते खाराब आत्मा तियाहा पिल्लित कोइत आन जोरेज आअड़ीत कोइत तिया मेहें रोत निहींत गोयी.27आन तिहीं ओते तें आखे माअहें एकान बिहीराहा फुसे वोल्ये, “ओं एहेलोह कि होय? ए काविंहीं नविल हिकवोण होय के? या माअहूं पोअ खाराब आत्मा काडीइलोअ आधिकार होय, आन तें याअ गोठी मानतेहे!”28आन ईसुउ बाप्तिमेर्यीइ ए बातमी ताबुड़तुड़ गालील मुलखोअ आखा भागोमेहें पसरीत गोयी.29ईसु आन तियाआ सेला आराधनालयोअहीं रोत जाता रोया, आन लगेज तो योहान आन याकोबोअरी शिमोन आन आंद्रिया यांआं कोअ गोयू.30शिमोनोअ हावेह्हे जोरु सोडल्यू काजे खाटलाम लोटीत रोयीते. ताहां तियां ताबुड़तुड़ ईसुहू तियीइ बाप्तिम कोयो.31ताहां तिये आहने जात कोइत तियीही आथे तोइत उठाड़्यी, आन तियीइ जोरु उतरीत गोयू आन ते तियांआं सेवा कोइ वोल्यी.32दिही बुटताअरिही मोन्ज्ये हांजे पोअ माअहें आखी जातीइ मांदवाड़्या माअहोंहों आन पुतवाअलांहां ईसुउ जागे लेतावये.33होयरोअ आखे माअहें बाओअ हुंबर टोलू वोलीत उबे रोये.34तिये जे बातीवानीइं मांदवाड़्ये ओते तियांहां हुदार्ये आन खुब माअहूंमेहें रोत पुते काड्ये. पोन तिये पुतोहों ने गोगुहूं देदे, काहाके तें तियाहा ओलखीइतेते.35ताहां ईसु वेगर्यूउ सिंजिवड़ेए उठीत कोइत कोअमेहें रोत निहींत बारथे हुंद्ला जागामेहें गोयू आन तिहीं तिये प्रार्थना कोअयी.36पोन शिमोन आन तियाअरीइ हेंगात ईसुहू होदा निहींया,37आन जेहेलाम ते तियाहा मिल्या, ताहां तियाहा कोयो, “आखा ताहूं होद्या कोअताहा.”38पोन ईसु तियांहां कोयो, “साला, आपुहूं आहनेएं गांवोंम बी जावाअहूं जोवे, काहाके तिहीं बी आंय परसार कोइत सेको, आन आंय तियाहाज काजे आयुहू.”39ताहां तो पुरा गालील सेरोमेहें तियांआं आराधनालयो मेहें परसार कोअतू आन पुते काडतू फिर्यू.40एक वोडा दुखोअ माहुंउं ईसुउ जागे आवयो, आन तियाआ हुंबर मांड्या पोड़ीत वोंदतो जात रावण्या कोओ वोल्यो. तों ईसुहू कोनो वोल्यो, “जर ताआ इश्शा ओय ताहां तू माहूं सोकू कोइत सेकेहे.”41ईसुहू दया आयी, आन तिये आथ आगाड़ी कोइत तिया पोअ मेक्यू आन कोयो, “माआं इश्शा होय के तू सोकू ओव!”42आन तेताज मेहें तियाआ वोडो दुख तियाहा सोड़ीत जातो रोयो आन तों सोको ओत गोयो.43ताहरुउ ईसु तियाहा कड़क शब्दा मेहें सेतावणी आप्यी आन वेगुज जातु रोयतेहें कोयो,44आन एहें कोयो, “पाल, याअ बाप्तिम कोडाहा कीज मा कोही, पोन जात कोइत तापासेतेहें काजे पुंजाराहा देखाड़; तिहीं रोत सोको ओवीइलोअ पुरावाआ काजे मोशे कोयोहो तिया नियमोंअ पुरमाणे बाधा सुटजी.”45पोन तो तिहीं रोत गोयू, आन ते बातमी एतीही जाआं वेर्यी के ईसु खुल्लाम खुल्लू होयरोम जात ने सेक्यू. तियाहा कोत तो बारथे रानोंज मेहें रोयू आन शारी वोलेहे रोत माअहें तियाआ जागे आवयाज कोअतेते.
The Word for the World International