लेवी6
1फाश्योअ यहोवा देवे मोशेहे कोयो,2“जर एखु यहोवा देवोअ विश्वास तोड़ीत कोइत पापी ठोरे, जेहेलोहो के घाणताबे, नेताहां वेवाराआ बाप्तिमेहें तियाआ पायहोहो दोगु देय, नेताहां तियाहा तारास देय,3नेताहां पोड़ीत रोल्यी वस्तुहू विसीत कोइत तियीइ बाप्तिम ठोगे आन ठोगोअ शप्पत बी खाय; एहेलिही कोड्ली बी गोठ काहा नाहां रोती जियीही कोइत माहुंउं पापी ठरेहे,4ताहां जेहेलाम तो एहेलोहो काम कोइत दोशी ओत जाय, ताहां जे बी वस्तु तिये लुट्यी, नेताहां दादागिरी कोइत, नेताहां घाणताबे, नेताहां टाकाअली वस्तु जोड़ीत गोयी ओय;5कोड्ली बी वस्तु काहा नाहां रोती जियीइ बाप्तिमेहें तिये ठोगोअ शप्पत खादी ओय; ताहां तों ते वस्तु पुरीन पुरी वापिस वाली देअहूं जोवे, आन पासवू भाग बी वादाड़ीत आपुहूं जोवे; जेदिहीं ओ मुंदू जाय के तो दोशी होय, तेदिहींज ते वस्तु जियाआ ओय तियाहा तो वापिस आपी देअहूं जोवे.6आन तो यहोवा देवोअ सामने तियाआ दोशोअ गाराहा लेतावुहूं जोवे, मोन्ज्ये एक निर्दुस मेडो दोशोअ गाराहा कोअते पुंजाराआ जागे लेतावुहूं जोवे, तों जेतीही पुंजारु ठरवे तेतीहीज किमतेए रोअहूं जोवे.7एहेंकोइत पुंजारु तियाआ कोअते यहोवा देवोअ सामने गाराहा आपुहूं जोवे आन जों काम कोइत तो दोशी ओवुहू तियाआ माफी तियाहा जोड़े.”8फाश्योअ यहोवा देवे मोशेहे कोयो,9“आरोनोहो आन तियाआ पोर्याहां आदेश आपीत कोइत ओं को के आगीइ गाराहा कोइलोअ नियम ए होय: आगीइ गाराहा आगीपोअ रात पोइत वेगीइ जाआं देवान्यापोअ पोड़ीत रोअहूं जोवे, आन देवान्याआ आग देवान्यापोअ पेटाअती रोअहूं जोवे.10आन पुंजारु तियाआ मोवो साअको नेताहां तियाआ डिलोपोअ हुत्रावू खोस्टू पोवित कोइत गाराहा पेटाड़ल्यू खाआं, जो देवान्यापोअ रोत जाये, तियाहा हाडीत कोइत देवान्याआ जागे मिकुहूं जोवे.11ताहरुउ तो एं आंगड़े काडीत कोइत बिहीरे आंगड़े पेवीत कोइत खाओंहों पोड़ावाआ बारथे एखा सोत्राला जागामेहें लेत जाअहूं जोवे.12देवान्यापोअ आग पेटाअती रोअहूं जोवे, आन जोलोम ने उलाअहूं जोवे; आन पुंजारु दाड़ीइ वेगर्युउ तियापोअ लाकड़े हेसीत कोइत आगीइ गाराहाआ तुकड़ा तियापोअ हेसीत मिकुहूं जोवे, आन तियापोअ होमजोणोअ सरबीही पेटाड़्या कोअहूं जोवे.13देवान्यापोअ आग कायम पेटाअती रोअहूं जोवे; ते जोलोम उलाअहूं ने जोवे.14“ओनोअ भेटेए नियम एहें कोइत होय: आरोनोअ पोर्या तियाहा देवान्याआ आगाड़ी यहोवा देवोअ जागे लेतावुहूं जोवे.15आन तो ओनोअ भेटेए तेलोम सान्बीइल्या मोयदामेहें रोते मुठ पोइत आन तियापोअ मिकल्यू आखू गुगलाआ सिक काडीत कोइत ओनोअ भेटेए ओर कोइत आपनारा या भागोहो यहोवा देवोअ सामने हाजो गुंदाय तेहें कोत देवान्यापोअ पेटाड़ुहूं जोवे.16आन तियामेर्योअ जो उगरीत जाय तियाहा आरोन आन तियाआ पोर्या खाअहूं जोवे; तियाहा विण खमीरोअ पवित्र जागामेहें खाअहूं जोवे, मोन्ज्ये ते मिलापवाला तोंबाआ खोलीमेहें तियाहा खाअहूं जोवे.17तो खमीरोअरी रांदुहूं ने जोवे; काहाके आंय तियाहा माआ गाराहामेहें रोत तियांआं सोताआ ओवे तेहें तियांहां आप्योहो; तियाहा काजे जेहेलोहो पापोअ वोतीइ गाराहा आन दोशोअ वोतीइ गाराहा जाअखो सोको होय, तेहेलोज तो बी होय.18आरोनोअ पारवाड़ीइ आखा माटी तियामेहें रोत खात सेकताहा, तुमाआ पिड़ीन पिड़ीमेहें यहोवा देवोअ गाराहामेहें रोत ओ तियांआं भाग सादाज रोये; जो कोडो तियां गाराहा आथले तों सोको ठोरे.”19फाशुउ यहोवा देवे मोशेहे कोयो,20“जेदिहीं आरोनोअ अभिशेक ओवे, तेदिहीं तो तियाआ बेटाह्हाअरी यहोवा देवोअ ओ गाराहा इसुहूं जोवे; मोन्ज्ये एक किलो मोयदो कायम ओनोअ भेट इसुहूं जोवे, तियामेहें रोत आरदो वेगीइ आन आरदो हांजेए वेले इसे.21तो तोवापोअ तेलोवाअहीं रांदुहूं जोवे; जाहां तो तेलोमेहें रांदाइत जाय, ताहां तियाहा लेत आवजा. यां ओनोअ भेटेए रांदल्या रोटाआ तुकड़ाहा यहोवा देवोअ काजे हाजो गुंदायतेहें कोअते भेट सोड़वीइजा.22आरोनोअ पोर्यामेर्युउ जो बी तिया पुंजाराअ पदोअ अभिशिक्त ओवे, तो बी एहेलुहूज गाराहा आप्या कोअहूं जोवे; ए नियम कायम कोअते होय, काहाके यहोवा देवोअ सामने तो पुरु गाराहा पेटाड़ाअहूं जोवे.23पुंजाराआ ओनोअ भेट बी आक्खी पेटाड़ाअहूं जोवे; ते कोयोंज ने खावाअहूं जोवे.”24फाशुउ यहोवा देव मोशेहे कोयो,25“आरोन आन तियाआ बेटाह्हाहां ओं को के पापोअ वोतीइ गाराहा कोइलोअ नियम ए होय: जिया जागामेहें आगीम गाराहा कोइलोअ जनवारे माआतेहे तियाजमेहें पापोअ कोअते गाराहा कोइलो जनवार बी यहोवा देवोअ सामने गाराहा कोअहूं जोवे; तों जाअखो सोको होय.26जो पुंजारु पापोअ कोअते गाराहा इसे, तो तियाहा खाय; तो पवित्र जागाम, मोन्ज्ये मिलापवाला तोंबाआ खोलीमेहें खावाअहूं जोवे.27जों कोडो तियाआ माहां आथले, तों सोको ओत जाय; आन जर तियाआ रक्ताआ सितड़ा एखा आंगड़ापोअ पोड़े, ताहां तियाहा एखा सोका जागामेहें तुवीत लेजा.28आन तों कादुउ बासन जिहींमेहें तों माहां रांद्योय, तियाहा फोड़ी देअहूं जोवे; जर इसत्लेए बासनोम बाफ्योय, ताहां तों उजालीत पाअयों वाअहीं तुवुहूं जोवे.29पुंजारक्यामेर्याआ आक्खा माटी तियाहा खात सेकताहा; ते जाअखी सोकी वस्तु होय.30पोन जिया पापोअ कोअते गाराहा कोइलोअ जनवारोअ रक्तामेहें रोत केतोहो बी थोड़ोक रक्त मिलापवाला तोंबाआ मायते सोका जागामेहें गाराहा कोइलाआ कोअते पोताड़्यो, तियाआ माहां ने खाअहूं जोवे; तों आगीमेहें पेटाड़ी देअहूं जोवे.
The Word for the World International