लेवी5
1“जर एखो माहुंउं साक्शी ओत कोइत एहेलुहू पाप कोए के शप्पत खावाड़ीत फुसे, ‘तुमे याहा देखल्यो के,’ नेताहां, ‘तू याहा ओलखेहे के?’ तेबी तों गोठ कबुल ने कोए, ताहां तियाहा सोताआ गुनाआ डोंड भोगुहूं पोड़े.2नेताहां जर एखो माहुंउं एखा मोल्या तोड़ोहो सुकवात आथलीत लेय, मोन्ज्ये जोंगल्ये एठे जनवारे, नेताहां पाल्ल्ये एठे जनवारे, नेताहां होरतींडनारा एठा जिवतोरोहो आथले, ताहां तों एठो ओत कोइत दोशी ठोरे.3नेताहां जर एखु माहुंउं सुकवात एखी एठी वस्तुहू आथलीत लेय, ताहां तो दोशी ठोरे, ते एठी वस्तु कोड्ली बी काहा नाहां रोती, जिहीं वाअहीं माअहें एठे ओत जातेहे,4नेताहां जर एखु विण विसार कोअयेज बाक्तो नेत हाजो कोइलाआ शप्पत खाय, तों कोड्ली बी गोठ विण विसार कोअयेज कोये, ताहां तियाहा मुंदू जाय तेहेलाम तों दोशी ठोरे.5आन जाहां तों यीं गोठीमेर्यीइ कोड्ली बी गोठीम दोशी ओय, ताहां जियी बाप्तिमेहें तिये पाप कोअयुय, तों तियाहा मानित लेअहूं जोवे,6आन तों यहोवा देवोअ सामने तियाआ पापोअ कोअते गाराहा लेतावुहूं जोवे, मोन्ज्ये तिया पापोअ वाखरी तों एक मेडी नेत बोकड़ी पापोअ उस्ती गाराहा कोइलाआ काजे लेतावुहूं जोवे; ताहरुउ पुंजारु तिया पापोअ बाप्तिम तियाआ कोअते गाराहा आपुहूं जोवे.7“पोन जर तियाहा मेडी नेत बोकड़ी आपीइलोअ ने पुरवाअतो ओय, ताहां तियाआ पापोअ वाखरी बेन ओले नेत पेरवाआ बेन पिले दोशोअ काजे गाराहा इसीइलोअ कोअते यहोवा देवोअ जागे लेतावुहूं जोवे, तियांमेर्योअ एक ते पापोअ उस्ती गाराहा कोइलोअ कोअते आन एके आगीइ गाराहा कोइलोअ कोअते.8तो तियांहां पुंजाराआ जागे लेतावुहूं जोवे, आन पुंजारु पापोअ कोअते गाराहा पेल इसुहूं जोवे, आन तियाआ मुन्को पिल्ली देअहूं जोवे, पोन तोड़ीत आलाग ने कोअहूं जोवे,9आन तो पापोअ गाराहाआ जनवारोअ रक्तामेहें रोत थोड़ोक देवान्याआ एकी वोल साटारुहूं जोवे आन जों रक्त उगरे तों देवान्याआ थुड़ोमेहें ओली देअहूं जोवे; तों पापोअ कोअते गाराहा ठोरे.10ताहरुउ तो दुसरा सिड़ाहा नियमोअ परमाणे आगीइ गाराहा कोअहूं जोवे, आन पुंजारु तियाआ पापोअ गाराहा आपुहूं जोवे; ताहांजात तियाहा माफी जोड़े.11“पोन जर तों बेन ओले नेत पेरवाआ बेन पिले बी ने आपीत सेके, ताहां तो तियाआ पापोअ वाखरी एक किलो मोयदो लेतावुहूं जोवे; तियापोअ तेल ने टाकुहूं जोवे आन गुगलाआ सिक ने मिकुहूं जोवे; काहाके तों पापोअ कोअते गाराहा रोय.12तों तियाहा पुंजाराआ जागे लेत जाअहूं जोवे, आन पुंजारु तियामेहें रोत तियाआ मुठ पोइत ओर कोइत आपनारा भागोअ रुपोम यहोवा देवोअ देवान्यापोअ पेटाड़ुहूं जोवे; तों पापोअ वोतीइ गाराहा ठोरे.13आन यीं गोठीमेर्यीइ कोड्ली बी गोठीइ बाप्तिमेहें जों पाप कोए, तियाआ काजे पुंजारु गाराहा आपे, ताहांजात तियाहा माफी जोड़े. आन गाराहा कोइत उगरीइल्यो आन ओनोअ भेटेए उगरीइल्यो सामान पुंजाराआ ठोरे.”14फाश्योअ यहोवा देवे मोशेहे कोयो,15“जर एखु यहोवा देवोअ पवित्र कोअल्यी वस्तुउ बाप्तिम सुकवात विश्वास तोड़्यू आन पापी ठर्यो, ताहां तों यहोवा देवोअ जागे एक निर्दुस मेडो दोशोअ कोअते लेत जाअहूं जोवे; तियाआ किम्मत पवित्र जागाआ तोलाआ पुरमाणे जेतेहे तोले पुंजारु ठरवे, तेतेहेज तोले सांदी रोअहूं जोवे.16आन जिया पवित्र वस्तुउ बाप्तिम पाप कोअयुय, तियामेहें तो पासवू भाग फाशुउ वादाड़ीत कोइत पुंजाराहा आपुहूं जोवे; आन पुंजारु दोशोअ काजे मेडाहा इसीत कोइत तियाआ कोअते गाराहा आपुहूं जोवे, ताहांजात तियाआ पाप माफ ओवे.17“जर एखो एहेलुहू पाप कोए के तियां कामोमेर्याहा जियांहां यहोवा देवे मोन्या कोअयोहो एखा कामोहों कोए, ताहां तों सुकवात ओवयो ओय तेबी दोशी ठरे, आन तियाहा तियाआ गुनाआं डोंड भोगुहूं पोड़े.18तियाहा काजे तो एक निर्दुस मेडो दोशोअ काजे गाराहा कोइत पुंजाराआ जागे लेतावुहूं जोवे, तों पुंजारु ठरवे तेतीहीज किमतेए रोअहूं जोवे, आन पुंजारु तियाआ कोअते तिये विण विसारेज कोअल्यी सुकीइ गाराहा कोअहूं जोवे, ताहां तियाहा माफी जोड़े.19ओं दोशोअ वोतीइ गाराहा ठोरे; काहाके तों माहुंउं पाक्को यहोवा देवोअ सामने दोशी ठोरे.”
The Word for the World International