उत्पत्ती26
1पेल अब्राहामोअ दिहोम पोड़्यु तेहलुहू काल तिया देसोमेहें पोड़्युतो, ओ तिया पेल्लाआ कालोअ रोत आलाग ओतू. तियाहा काजे इसाहाक गरारोम पलिश्तीइं राजा अबीमेलेकोअ जागे गोयु.2ताहां यहोवा देवे तियाहा दर्शन आपीत कोयो, “मिसरोम मा जाही; जो देस आंय ताहूं कोहीं तियाजमेहें रो.3तु याज देसोम रो, आन आंय ताअरी रोहीं, आन ताहूं आशिर्वाद आपिहीं; आन ओ आखु मुलख आंय ताहूं आन ताआ पारवाड़ीही आपिहीं; आन जे शप्पत आंय ताआ आब्हा अब्राहामोअरी खादीते, तियीही आंय पुरी कोअहीं.4आंय ताआ पारवाड़ीही जुगोमेर्याआ ताराआ होस बोणावीहीं; आन आंय ताआ पारवाड़ीही ओ आखु मुलख आपीहीं, आन धरतीपोर्याआ आक्खा देसोहो ताआ पारवाड़ी वाअहीं मापरोत आशिर्वाद जोड़े.5काहाके अब्राहाम माआ गोठ मान्यू, आन जो आंय तियाहा होप्योतो तियाहा आन माआ आदेशोहो, कायदा आन नियमोअ पालन कोअयो.”6तियाहा काजे इसाहाक गरारोमेहें रोयु.7जेहेलाम तिहींइं माअहें तियाआ लाडीइ बाप्तिमेहें फुश्यो, ताहां तिये ओं इतवीत कोइत बियुन ताहरुउ कोयो, “ए माआ बोअह्हीं होय कोत देदो.” काहाके, “ए माआ लाडी होय,” एहें कोअलोअ तियाहा बिक लागी, काहाके रिबीका जाअखी भारी ओती आन तियीइ वाखरी तियाहा तिहींइं माअहें माइत टाकी देय एहें लागोतो.8जेहेलाम तियाहा तिहीं रोअहूं वारुज दिही ओत गोया, ताहरुउ एक दिही पलिश्तीइं राजा अबीमेलेके खिड़कीमेहें उसावीत इसाहाक तियाआ लाडी रिबीकाअरी गिगलात रोमत्त्लाहा देख्ये.9ताहरुउ अबीमेलेके इसाहाकोहो हादाड़ीत कोइत कोयो, “ते तोम हुदाअलीज ताआ लाडी होय! ताहरुउ तुमे तियीही माआ बोअह्हीं काहा कोल्यो?” इसाहाके उत्तर आप्यो, “तियीइ वाखरी माहूं माइत-हाइत टाके कोत आंय विसार कोअतुतो.”10अबीमेलेके कोयो, “तुमे आमाअरी एहें काहा कोअयो? एहेंकोइत ते माआ माअहूं मेर्योअ कोडोज बी ताआ लाडीइरी बिन्दास सिनालो कोइत सेकतो, आन तु आमुहूं पापोमेहें फोसाड़तू.”11तियाहा काजे अबीमेलेके तियाआ पुरा माअहुंहूं आदेश आप्यू, “जो कोडो या माट्योहो नेत यी बोईंहीं आथ लागाड़े तियाहा माईं देअलो.”12इसाहाके तिया देसोम ओन पेएयो आन तियीज वोरही होव पोट पाको; काहाके यहोवा देवे तियाहा आशिर्वाद आप्यू;13आन तो मालदार ओत गोयु, आन तो जाअखू जाअखू पान्गीइतु गोयू, आन तो जास्ती वोडू माटी बोणीत गोयु.14जाहां तियाआ जाअखीलेहे नोकर-साकर, मेडेन, डोगरेन बोकड़े ओवे; ताहां पलिश्ती तियाअरी ठोटाय कोए वोल्ये.15ताहरेए जेत्ती वेई तियाआ आब्हा अब्राहामोअ साकऱ्यां अब्राहामोअ जिवताइज खुंउंयींते, तियींहीं पलिश्तीवाला कादुउ वाअहीं बुजी देदी.16ताहां अबीमेलेके इसाहाकोहो कोयो, “आमाआ जागे रोत जातु रो; काहाके तु आमाप रोत जाअखू मालदार बोणीत गोयुहू.”17ताहरुउ इसाहाक तिहीं रोत जातु रोयू, आन गरारोअ बारीमेहें तियाआ तोंबु उबू कोइत तिहीं रोनु वोल्यू.18ताहां जे वेई तियाआ आब्हा अब्राहामोअ दिहोम खुंउंयींते आन अब्राहामोअ मोइलाअ फासाड़ी पलिश्तीवाला बुजी देदीते, तियींहीं इसाहाके फाशीइ खुंआण्यी; आन तियींइं तेज नावे मिक्ये, जें तियाआ आब्हे पाड़्येते.19इसाहाकोअ सेवकोहों बारीमेहें वेए खुंउंता-खुंउंता वोहत्ला पाअयोंअ एक उकलू सापड़्यु.20ताहराआ गरारोअ सारवाली इसाहाकोअ सारवाल्योंअरी सुलाइत पोड़्या आन कोयो, “ओं पाईं आमाआं होय.” तियाहा काजे इसाहाके तियी वेईइ नाव एसेक मिक्यो; काहाके ते तियाअरी सुलाअयाते.21फाशीइ तियां बिहीरी वेए खुंउंयीं आन तियीइ कोअते बी ते सुलाअया; तियाहा काजे तिये तियीइ नाव सित्ना मिक्यो.22ताहरुउ इसाहाक तिहीं रोत निहीत कोइत फाशीइ एक वेए खुंआण्यी; आन तियीइ कोअते तियां भान्गड़ ने कोअयी; तियाहा काजे तिये तियीइ नाव ओं कोत कोइत रहोबोत मिक्यो, “ओमे ते यहोवा आपाआ काजे जाअखीलुहू जागु आप्युहू आन आपू या देसोमेहें पान्गीइतान वादता जाहूं.”23तिहीं रोत तो बेर्शेबामेहें गोयु.24आन तेदिहींज यहोवा देवे राती तियाहा दर्शन आपीत कोइत कोयो, “आंय ताआ आब्हा अब्राहामोअ देव होय; बिही मा, काहाके आंय ताअरी होय आन आंय माआ सेवक अब्राहामो वाखरी ताहूं आशिर्वाद आपिहीं आन ताआ पारवाड़ वादाड़ीहीं.”25ताहरुउ इसाहाके तिहीं एक देवान्यो बोणायो आन यहोवा देवोहो प्रार्थना कोअयी आन तियाआ तोंबु तिहींज उबू कोअयू; आन तिहीं इसाहाकोअ सेवकहों एक वेए खुंउंयीं.26ताहरुउ अबीमेलेक तियाआ मंत्री अहुज्जत आन तियाआ सेनापती पीकोलोह आरी लेत कोइत, गरारोम रोत तियाआ जागे गोयु.27इसाहाके तियांहां कोयो, “तुमू माआ आरी डांबराय कोइत तुमाआ विसमेहें रोत काडी देदू तो, ओमे माआ जागे काहा आयाहा?”28तियां कोयो, “आमू सोताहा देख्योहो के यहोवा देव ताअरी रोहे; तियाहा काजे आमू विसार कोअयू के तू यहोवाअहें रोत आशिर्वादीत होय, ताहां ताआन आमाआं विसमेहें शप्पत लेवाअहूं जोवे आन आमू ताअरी याआ बाप्तिमेहें आथवसन लेहूं,29के जेहेंकोइत आमू ताहूं नाहां आथ लागाड़्यु, पोन ताअरी निस्ता हाजलाज रोया आन ताहूं मामार होकेहे मोकली देदू, तेहेंज कोइत तू बी आमाअरी खाराब वेवारो मा कोअही, काहाके तू यहोवा देवोअ आशिर्वाद मेलवीइनारु माटी होय.”30ताहां तिये तियांआं कोअते रोटू तियार कोअयू आन तियां खादोन पिदो.31तियां वेगर्याआ हुजताअरीही उठीत कोइत एकमेकामेहें शप्पत खादी; ताहां इसाहाके तियांहां मोकली देदा आन ते मामार होकेहे तियाआ जागे रोत जाता रोया.32तेदिहींज इसाहाकोअ सेवकहों आवीत कोइत तियां खुंउल्यी वेईइ बाप्तिम कोताप्यो, “आमुहूं पाअयोंअ एक उकलू जोड़्युहू.”33ताहां तिये तियाआ नाव शिबा मिक्यो; तिहींज वाअहीं तिया होयरोअ नाव आज बी बेर्शेबा पोड़ीत रोयोहो.34जेहेलाम एसाव सालीही वोरह्योअ ओवू, ताहां तिये हित्ती बेरीइ पोर्यी यहुदीत, आन हित्ती एलोनोअ पोर्यी बासमतेएरी वेहेवाल कोइत लेदो;35आन यीं बोईंइ वाखरी इसाहाकोअ आन रिबीकाआ मोन दुखाअयो.
The Word for the World International