यहेज्केल46
1“यहोवा देव एहें कोहे: मायवाली खोलीमेऱ्योअ उगतामा वोल्योअ बाअणो कामोअ सोवू दिही बोंद रोअहूं जोवे; आरामोअ दिही तों उगड़ाअलो जोवे; आन नोवू देखाय तेदिहीं बी तों उगड़ाअलो मिकुहूं जोवे.2पुडारी बारथेए ओटाआ वोल्यीइ वाटे रोत आवुहूं जोवे; आन तो बाअणाआ खांबाअहीं आवित उबू रोअहूं जोवे. पुंजारु तियापोऱ्योअ गाराहा मोन्ज्ये होमबली आन शांती बली तियार कोअहूं जोवे. तिहीं रोत तो बाअणाआं जागऱ्याआ ओटाअहीं वोंदीत लेत बारथे जातू रोअहूं जोवे; ओं बाआ हांजेपोअ जाआं उगड़ाअलोज मिकुहूं जोवे.3इस्राएलवाले माहें आरामोअ दिही आन नोवू देखाय तेदिहीं तिया बाअणाअहीं बाआपुरेज रोत देवोहो वोंदुहूं जोवे.4आरामोअ दिहोअ दिही पुडारी देवोअ सामने गाराहा कोइलोअ तों ओं होय: सोव निर्दुस मेडाआ बासे आन एक निर्दुस मेडू जोवे.5एका मेडाआ फाटी एक एपो पोइत ओनोअ भेट कोअहूं जोवे आन एका एपाआ फाटी एक हिन तेल आपुहूं जोवे.6नोवू देखाय तेदिहीं एक निर्दुस वासड़ो, सोव निर्दुस मेडाआ बासे आन एक निर्दुस मेडू गाराहा कोअहूं जोवे.7एका वासड़ाआ फाटी आन एका मेडाआ फाटी एकेक एपो ओनोअ बली भेट कोअहूं जोवे; एका मेडाआ बासाआ फाटी तियाहा पुरवाय तेताहा एपो पोइत दाणा भेट कोअहूं जोवे आन एका एपाआ फाटी एक हिन पोइत तेल बी आपुहूं जोवे.8पुडारी माय फोहताम ओटाआ वोल्यीइ वाटे आवुहूं जोवे आन तियीज वाटे वापिस जाअहूं जोवे.9“तिवारोअ दिही जों देवोअ सामने वोंदो आवे तों पालामाआ वोल्याआ बाअणाआ वोल रोत आवे ताहां देहामाआ वोल्याआ बाअणाआ वोल बारथे निहुंहूं जोवे; आन देहामाआ वोल रोत माय फोहे तों पालामाआ वोल्याआ बाअणाअहें बारथे निहुंहूं जोवे; जिये बाअणे आयो तियेज बाअणे वापिस ने जाअहूं जोवे, पोन पाद्रोज निहींत जाअहूं जोवे.10तें माय फोहे तेहेलाम पुडारी बी तियांअरी पेलाइत माय फोहुंहूं जोवे; आन तें बारथे निहे तेहेलाम तो तियांअरीज बारथे जाअहूं जोवे.11तिवारोअ होमसे आन बाकी खास बोयठोकी रोय तेहेलाम एका वासड़ाआ फाटी एक एपो पोइत ओनोअ भेट आन एका मेडाआ फाटी बी एक एपो पोइत ओनोअ बली तिहीं रोत एका एपाआ फाटी एक हिन पोइत तेल आपुहूं जोवे.12“पुडारी सोताआ राजी वाअहीं देवोअ काजे गाराहा कोत आगीइ गाराहा आन शांतीइ गाराहा कोए तेहेलाम तियाआ काजे उगतामा वोल्योअ बाअणो उगाड़ुहूं जोवे, आन आरामोअ दिहोअ दिही ठोरवीइल्याआ पुरमाणे तो आगीइ गाराहा आन शांतीइ गाराहा आपुहूं जोवे; तो बारथे निहे तेहेलाम बाअणो वाली देअहूं जोवे.”13“देवोहो दाड़ख्योअ गाराहा आपीइलो काजे एक वोरह्योअ निर्दुस मेडाआ बासो तियार मिकुहूं जोवे. दाड़ख्योअ वेगीइ तों तियार मिकुहूं जोवे.14दाड़ख्योओज तियाअरी ओनोअ गाराहा तियार मिकुहूं जोवे; गोवोंअ लोट एपाआ साहावू भाग पोइत आन तियाहा मोहलू कोइलोअ काजे हिन पोइत तेलोअ तिसरु भाग ओनोअ भेट देवोअ काजे आपुहूं जोवे; ओ हादाफल्युउ नियम कायम सालनारु होय.15एहेंज कोइत दाड़ख्येए वेगीइ मेडाआ बासो आन ओनोअ भेट आन तेल कायम गाराहा कोत आपुहूं जोवे.”16प्रभु देव कोहे, “आधिकारी जर तियाआ पोऱ्यामेऱ्याआ एखाहा तियाआ जागू इलाम कोए, ताहां तो तियाआ पोऱ्याआज रोय; काहाके तो तियाआ वारस जागू तियाआ पोऱ्याहा जोड़े;17पोन तियाआ वारसोअ जागू जर तियाआ एखा नोवकरोहो आपे, ताहां सुटकाआ वोरिही आवे ताअहूं जाआं तियापोअ रोय, तिहीं रोत तो तियाआ आधिकाऱ्योअ जागे वापिस जाय; तियाआ जागू तियाआ पोऱ्याहाज जोड़े.18आधिकाऱ्ये एखाआ वादार जागू नेत कोड्ली बी वस्तु लेत कोइत तियांहां ओड़ीत ने काडुहूं जोवे; तिये तियाआ वावड़्यु जागू ओय तिहींम रोत तियाआ पोऱ्याहा वारस कोत आपुहूं जोवे.”19तिहीं रोत तो माहूं बाअणाअहीं रोत तिवोल लेत गोयू; पालामाआ वोग्यीइ पुंजाराआ सोकी खुलीइ वोल तो माहूं लेत गोयू. तिहीं बुडतामाअहें जागू ओतू तो माहूं देखाअयू.20तिये माहूं कोयो, “इंहीं पुंजारा दोशोअ काजे गाराहा आन पापोअ काजे गाराहा पेटाड़े, आन तियीज जागे ओनोअ भेट बी सुड़वे. तियाहा बारथे लेत जाय ताहां सादे माअहें बी सोके ठरे कोत तेहें कोअहूं जोवे.”21तिहींइं फासाडी तो माटी माहूं बारथेए खोलीइ जागे लेत आयू, आन खोलीइ शारी वोल फेरव्यू. शारु खुणाम एकेक खोली ओती.22मोन्ज्ये ते खोली सालीही आथ नांबी आन तिस आथ पोली ओती. शारु खुणा एकहारका मापोअ ओता.23मायते शारु शोवकड़ीइ मेरेमेरे पितड़ो बांदीत ओतो. तिया पितड़ाआ जागे रांदीइलोअ जागू कोअयुतो.24ताहां तिये माट्ये माहूं कोयो, “यी जागेहे मंदिरोअ सेवकोअ काजे गाराहा कोअल्यो रांदुहूं जोवे.”
The Word for the World International