यहेज्केल45
1तुमू सिट्टी टाकीत वाट्ल्या जागाम रोत एक भाग देवोअ काजे सोकू सोमजीत आलाग काड्जा. तो भाग पोसीही हाजार आथ नांबू आन विही हाजार पोलू जोवे. ओ पुरु भाग सोकू कोवाय. ओ जागू शारी सोमकीर सोकू मिकुहूं जोवे.2यामेहें रोत पास होव आथ नांबू आन पास होव आथ पोलू सोवकड़्यू जागु देवोअ सोकू भाग रोय. तियाआ मेरेमेरे पोन्नास आथ खुल्लू जागू सोड़ुहूं जोवे.3तिया मापल्या जागाम रोत तु पोसीही हाजार नांबू आन दाहा हाजार पोलू भाग मापीत लेजी आन तिहींम मंदिर बोणावजी, आन तो जागू जाअखू सोकू ठरुहूं जोवे.4यहोवा देवोअ काजे सेवा कोइलोअ काजे सोका जागाम जानारा पुंजाराआ काजे तो जागू जोवे; तिहींम तियांआं कोओअ काजे जागू आन मंदिरोअ काजे जागू जोवे.5पोसीही हाजार आथ नांबू आन दाहा हाजार आथ एतुहू पोलू जागू मंदिरोअ सेवा साकरी कोअनारा लेवीइ काजे रोअहूं जोवे; वोहती कोइत रोअलोअ काजे ओज तियांआं जागू रोय.6सोकू भाग कोत जो जागू नारु कोअयू आन होयरोहो आपल्यु भाग याहा लागाड़ीत पास हाजार आथ पोलू आन पोसीही हाजार आथ एतुहू नांबू जागु होयरोअ काजे वोहती कोए तेहें आपुहूं जोवे; तो जागु पुरा इस्राएल कुटूंबाआ काजे रोअहूं जोवे.7आंगे काड्ल्यू भाग आन होयरोअ काजे आपल्यू भाग यां बेनु वोल्याआ भागोहो मोन्ज्ये बुड्तामू आन उगतामू भाग आधिकाऱ्योहों आपुहूं जोवे. बुड्तामी हाद्दी रोत ते उगतामी हाद्दीइ जागे जाआं जेतू नांबू जागू ओय तो इस्राएलवालाहां वाटीत आप्युहू तेतुहू नांबू जोवे.8ओ जागु इस्राएलोम आधिकाऱ्योअ वावड़्यू जागु ओत जाअहूं जोवे, मोन्ज्ये मी ठरिवल्यू आधिकारी माआ माहुंहूं तारास ने देअहूं जोवे. पोन इस्राएलोअ पारवाड़ीही आपल्यू जागू जियाहा आप्युहू तियाजपोअ रोअहूं देअहूं जोवे.9प्रभु देव कोहे, “ए इस्राएलवाला पुडाऱ्यों, तुमाआ सुलाइलोअ आन भान्गड़्यी कोइलोअ खेल ओवू, ओमे बास कोआ! ओमे न्याय-निती वाअहीं साला, आन माआ माहुंहूं तियांआं जागाम रोत सेटे मा कोअहा,” एहें कोत प्रभु देव कोहे.10तुमाआ ताराजे, एपो आन बथ खोरे जोवे.11एपो आन बथ बेनू मापले एकाज मापोअ जोवे; एपो आन बथ बेनुम होमेरोअ दाहवू भाग होमाअहूं जोवे; बेनुउ मापले एकाज उमाणापोअ जोवे.12शेकेल विही गेराआ जोवे, आन मानेह विही शेकेलोअ, पोसीही शेकेलोअ, नेताहां पोनर शेकेलोअ जोवे.13तुमाआ भेट कोइलोअ वस्तु यी पद्दतीइ जोवे: गोवोंअ होमेरोम एपाआ साहावू भाग आन जुवारीइ होमेरोम रोत एपाआ साहावू भाग जोवे.14तेलोअ हमेशा आपिइलुउ भाग ओ जोवे: दाहा बथोअ कोर जोवे, मोन्ज्ये एका होमेरोअ दाहा बथ रोअहूं जोवे; दाहा बथोअ एक होमेर बोणत्लो.15इस्राएल देसोमेऱ्याआ हाजा सारामेऱ्येए बेन होव मेडाआ फाटी एक बासो आपुहूं जोवे; माहुंउं काजे गाराहा कोत आपीइलोअ काजे ओनोअ भेट, आगीइ गाराहा आन शांतीइ गाराहा आपुहूं जोवे, एहें कोत प्रभु देव कोहे.16इस्राएलोअ पुडाऱ्योंअ काजे आखे माहें एज गाराहा आपुहूं जोवे.17तिवार, नोवू देखाय तिया दिहोअ, आरामोअ दिहोअ आन इस्राएल कुटूंबाआ आखा ठरिवल्या दिहोअ काजे आगीइ गाराहा, ओनोअ भेट आन पियाआ गाराहा ओं आखो कोइलोअ काम पुडाऱ्योपोओज रोहे. इस्राएलवाले गाराहा कोअहूं जोवे कोत पापोअ गाराहा, ओनोअ भेट, होमबली आन शांतीइ गाराहा या आखाआ काजे तो गाराहा तियार मिकुहूं जोवे.18प्रभु देव कोहे, “पेहला मोयनाआ पेहला दिहोपोअ एक निर्दुस बासो सोका जागाम गाराहा कोइत जागू सोकालुहूं जोवे.19तियाआ पापबली गाराहा कोअल्यो रक्त लेत कोइत पुंजारु मंदिरोअ दरवाजाआ बारथेए सोवकोटीपोअ शारी वोल आन देवान्याआं कुर्सीइ शारी वोल आन मायवाला खोलीइ बाअणाआ सोवकोटीपोअ साटारुहूं जोवे.20तेहेंज कोइत तियाज मोयनाआं हांतवा दिहोम सुकवात गुनाम पोड़ल्या नेताहां विहीराइत गुनू कोअनाराआ काजे बी एहेंज कोअहूं जोवे. एहें कोइत तुमू मंदिरोहो सोकालुहूं जोवे.21“तेहेलोज पेहला मोयनाआं शोवदावा दिहोम रोत हांत दिही जाआं वल्हांडणोअ तिवार कोअहूं जोवे. या तिवारोम बिगर खमीरोअ रोटू खाअहूं जोवे.22तेदिहीं पुडारी आन देशोअ आखा माअहोंअ पापोअ काजे वासड़ो गाराहा तियार कोअहूं जोवे.23देवोअ काजे आगीइ गाराहा कोइलोअ हांत दिहोअ हांत वासड़े आन हांत मेडे तियार कोअहूं जोवे आन पाप गाराहाआ काजे दाड़ख्योअ एक बोकड़ो तियार मिकुहूं जोवे.24ओनोअ भेट कोत एका वासड़ाआ फाटी एपो पोइत ओन आन एका मेडाआ फाटी एपो पोइत ओन तियाअरी एक हिन पोइत तेल आपुहूं जोवे.25“हांतवा मोयनाआं पोंद्रावे दिही रोत ते तिवारोअ हांत दिही जाआं पापबली, होमबली, ओनोअ भेट आन तेल याज उमाणापोअ गाराहा कोअहूं जोवे.”
The Word for the World International