प्रेशित11
1ताहराअ प्रेशितहों आन विश्वासी पाही जे यहुदीयामेहें रोताते तियां उनाअयो के बिगर यहुद्यां बी देवोअ वसन मानित लेदोहो,2तियाहा काजे जेहेलाम पेत्र येरुसालेम सेहरोम आयू, तेहेलामेहें खतना ओवले माहें तियाअरी भान्गड़ कोए वोल्ये.3“तुमे विण खतना ओवला माअहोंअहीं जात कोइत तियांअरी खादोन-पिदो.”4ताहरुउ पेत्रे तियांहां सुरवाती रोत लाइनशीर आखी गोठी कोताप्यी:5“आंय याफा सेहरोमेहें प्रार्थना कोअया कोअतुतो, आन दर्शन देख्यो के एक बासन वोड्डाहा साअका होस शारु खुणा बांदीत कोइत, जुगोम रोत उतरीत कोइत माआं जागे आवित रुकाअयो.6जेहेलाम आंय तियाहा पाल्यो, ताहां तियामेहें धरती पोर्येए शार गुडावाले जनवारे आन होरतींडनारे जनवारे आन जंगलोमेर्येए जनवारे आन जुगोमेर्येए सिड़े देख्ये;7आन ओ आवाज बी उनाअयू, ‘ए पेत्रा, उठ, आन माईंत खा.’8मी कोयो, ‘नाहां प्रभु, नाहां! काहाके आंय कोड्लो एठो नेत खाराब खाणो सोबिम नाहां टाक्यो.’9याआज उत्तर मेहें जुगोम रोत बिहीरी वारी आवाज आयू, ‘जो किबी देवे सोको ठरव्योहो, तियाहा एठो मा कोही.’10तीन वारी जाआं एहेंज कोइत ओवो; ताहरोअ आखोज फाशोअ जुगोमेहें जातो रोयो.11आन पाला, ताअहांज तीन माअहें जें केसरिया सेहरोम रोत माआं जागे आये, जिया कोअमेहें आंय रोतुतो तिहीं आवित उबे रोये.12तेहेलाम पवित्र आत्मे माहूं ठावकुज तियांअरी जाय तेहें कोयो, आन ते सोव विश्वासी पाही बी माअरीज आया; आन आमू तिया कुरनेलियुसोअ कोअ गोया.13तिये आमुहूं कोयो, के आंय एका देवदुतोहो माआं कोअमेहें देख्यू, जिये माहूं कोल्यो, ‘याफा सेहरोमेहें माअहें मोकलीत कोइत शिमोनोहो जियाहा पेत्र कोतेहे, तियाहा हादीत लेताव.14तो तुमुहूं एहेलिही गोठी कोतापे, जियीं वाअहीं ताहूं आन ताआ पुरा कुटूंबाहा सुटका जोड़े.’15जेहेलाम आंय गोठी कोउ वोल्यू, ताहां पवित्र आत्मा जेहेंकोइत सुरुवातीमेहें आपापोअ आयू, तेहेंज कोइत तियांपोअ बी आयू.16ताहरोअ माहूं प्रभुउ तोओं वसन ओर आवयो; जों तिये कोयोतो, ‘योहाने ताम पाअयों वाअहीं बाप्तिस्मा आप्यो, पोन तुमू पवित्र आत्मा वाअहीं बाप्तिस्मा लेहा.’17तियाहा काजे जेहेलाम देवे तियांहां बी तोज वरदान आप्यो, जो आपुहूं प्रभु ईसु ख्रिस्तापोअ विश्वास मिकीइला वाअहीं जोड़्यो; ताहां आंय कोडू होय जो देवोहो रुकीत सेको?”18ओं उनाइत कोइत तें ठावकाज ओत गोये, आन देवोअ स्तुती कोइत कोने वोल्ये, “ताहरोअ ते देवे बिगर यहुदीही बी जिवनोअ काजे मोन फिराविइलाआ दान आप्योहो.”19स्तिफन माआंयू तियी होमसे जें माअहें विरोद ओवू तिहीं वाखरी वेरासेर ओत गोयेते, तें दुर दुर फिनीके, सायपरस आन अंताकियामेहें पोते; पोन तें यहुदी माअहुंहूं सोड़ीत बिहीरा कोडाहाज वसन ने कोत आपतेते.20पोन तियांमेर्येए थोड़ेक सायपरसवाले आन कुरेनीवाले ओते, जें अंताकियामेहें आवित कोइत ग्रीक बाशाआ माहुंहूं बी प्रभु ईसुउ हाजी बातमी कोतापे वोल्ये.21प्रभुउ सेक्ती तियांपोअ ओती, आन डाहटे माअहें विश्वास मिकीत कोइत प्रभुउ वोगेहे मोन फिरावयो.22जेहेलाम तियांआं सर्सा येरुसालेमोअ मंडड़ी उनाअयी, ताहां तियां बरनबासोहो अंताकिया मोकल्यू.23तो तिहीं पोतीत कोइत आन देवोअ मेरवानी पालीत कोइत खुस ओवू, आन आखाहा सिकाड़्ये के मोन लागाड़ीत कोइत प्रभुउरी इमानदार आन खोरे रोजा.24तों एक हाजो माहुंउं ओतो, तो पवित्र आत्माआं आन विश्वासोम पाक्को ओतो; आन वारुज माअहें प्रभुमेहें आवित जुडाअये.25ताहरुउ बरनबास शाऊलोहो होदीइलाअ काजे तारसुसोहो जातू रोयू.26जेहेलाम तो शाऊलोहो मिल्यू, ताहां तियाहा अंताकिया हादीत लेतायू; आन एहेलोह ओवो के ते एक साल जाआं मंडड़ीइरी मिलीत आन डाहटा माअहुंहूं सिकाड़तु रोयु; आन आखा रोत पेल अंताकियाजमेहें विश्वासी माअहोंहों “ख्रिस्ती” ओं नाव जोड़्यो.27तियांज दिहोमेहें थोड़ाक भविश्यवक्ता येरुसालेमोम रोत अंताकिया आया.28तियांमेर्युउ अगबुस नावोअ एके जोएं उबू रोत कोइत आत्माआं सेक्ती वाअहीं ओं कोयो के, आखी दुन्याम वोडु काल पोड़े, आन तो काल क्लौदियुसोअ दिहोमेहें पोड़्यू.29ताहराआ सेलहां ठरव्यो के यहुदीयाम रोनारा विश्वासी पाव्हीइलाहां मदत कोइलोअ काजे तियांमेएं हारेक जोओं जिव जिवोअ पुरवाअतोज की तेबी मोकलुहूं जोवे.30तियां पोशा गोड़ा कोइत बरनबास आन शाऊलोअ आथे डायहांअ जागे लेत मोकली देदो.
The Word for the World International