2 करिन्थ9
1ओमे देवोअ माअहोंअ सेवा कोइलोअ बाप्तिम तुमुहूं लेखीइलोअ गरज कायनाहां.2काहाके आंय तुमाआं मोनोअ तियारीही ओलखोहो, आन मकिदुनियाअ माअहोंअ सामने वोडाय कोअतुज कोतूतो के, गोयोहो तिये वोरह्ये रोत अखायामेर्येए तुमू आपिइलोअ काजे तियार होय तिहीं वाअहीं जाअखीलेहे जोएं मदत आपिइलोअ कोअते खुसी वाअहीं आगाड़ी आयेहे.3पोन आमू जे वोडाय देखाड़्यी, ते यी गोठीमेहें वाया ने जाअहूं जोवे कोत आंय यां पायहोहों मोकलोहो, आन जेहें कोइत मी कोयोहो तेहेंज कोइत तुमू तियारीम रोजा.4एहेलोहो ने ओवुहूं जोवे के, जर एखु मकिदुनियावालू माअरी आवे आन तुमुहूं तियार ने देखे, ताहां ओत सेकेहे तुमू नाहां, पोन आमू लाजवात जाहूं.5तियाहा काजे माहूं एहेलोह लागो के तियां पेलुज रोत तुमाआं जागे आवित पायहोहों विनंती कोअहूं जोवे के, तुमू कबुल कोअल्यी भेट पेलुज तियार मिके, मोन्ज्ये लोभ कोत नाहां पोन दान कोत तियार जोवे.6ओं जाईंत लेजा के, जों थोड़ो पेए तों थोड़ोज वाडे आन वादार पेए तों वादार वाडे.7हारेक जोओं जिवज्योअ मोनोम जेहें कोइत ठरव्योय तेहेंज कोइत भेट आपुहूं जोवे; मोनोम खुरकीइतोज नेताहां आपिइलो आवत्लो कोत ने आपहूं जोवे, काहाके खुसी वाअहीं आपनारो माहुंउं देवोहो गोमत्लो.8तुमुहूं लागनारी आखी गोठी तुमापोअ कायम रोअहूं जोवे; आन आखा हाजा कामोअ कोअते तुमापोअ भारपुर रोअहूं जोवे कोत देव तुमुहूं आखी जातीइ मेरवानी आपित सेकेहे.9वसनोम एहें कोइत लेख्योहो के,“तो गोरब्योहों खुल्ला मोनोवाअहीं आपेहे;तियाआ सतीपण कायम रोहे.”10ताहां जो पेएनाराहां बियारु आन खाअलोअ कोअते रोटू आपेहे, तो तुमुहूं बियारु आपे आन तियाहा जाअखु वादाड़े; आन तुमाआं सतीपणोअ फल वादाड़े.11एहें कोइत तुमू आखी गोठीम मालदार बोणित जाहा, ताहां तुमाआं मोन खुल्लो कोआ, मोन्ज्ये तुमाआं भेट आमाआं आथोवाअहीं वाटाय तेहेलाम देवोअ धन्यवाद ओवे.12काहाके ए सेवा पुरी कोइलो वाअहीं देवोअ माअहोंअ गरज एतीज नाहां पुरी ओवती, पोन माअहें देवोहो जाअखीलेहे धन्यवाद कोअतेहे.13यी सेवाआ परिक्शामेहें ख्रिस्ताआ हाजी बातमी मान्य कोइलोअ वाखरी तुमाआं आदेश पालनो वाअहीं, आन तियांआं आन बाकी आखाआ काजे तुमू आपल्या खुल्ला मोनोअ भेटेए वाखरी तें देवोअ धन्यवाद कोअतेहे.14आन तें तुमाआं काजे प्रार्थना कोअतेहे; देवोअ वोडी मेरवानी जे तुमापोअ ओवीही तिहीं वाअहीं तें तुमुहूं मिलीइलोअ जास्ती इश्शा कोअतेहे.15देवोअ ने गोणाय एहेलाहा दानोअ काजे तियाआ आभार माना!
The Word for the World International