2 करिन्थ8
1आमाआं पाव्हीइला, मकिदुनियाअ मंडड़ी पोअ जे देवोअ मेरवानी ओवी, तियीइ बाप्तिम आंय तुमुहूं कोत आपोहो;2ते एहेलिही के, वोडी परिक्शाम तियांआं खुसी आन वोडी गरीबी मेहें तियांआं दान कोइलोअ मोन खुल्लो ओत गोयो.3तियांआं बाप्तिम आंय ए साक्शी आपोहो के, तियां जेतीही जाआं पुरवत ओती तेतीही नाहां, पोन तिया रोत बी वादार दान तियां सोताहा राजीखुसी वाअहीं आप्यो.4आन या दानोहों आपिइलोअ काजे आन देवोअ माअहुंउं सेवा कोइलोअ मेरवानी जोड़ुहूं जोवे कोत आमुहूं ताल ताल रावणी कोअयी.5आमू जेहेलीही आशा कोअयी तेतोज नाहां, पोन पेल तें सोताहा देवोअ आथोम होपात गोये आन देवोअ इश्शा वाअहीं तें सोताहा आमाआं आथोम बी होपाइत गोये.6तियाहा काजे आमू तितुसोहो समजाड़्यो के जेहें कोइत पेल सुरुवात कोअयीते, तेहेंज कोइत तुमाआं विसमेहें या दानोअ कामोहों पुरो कोइत लेअहूं जोवे.7तियाहा काजे जेहें कोइत तुमू आखी गोठीमेहें मोन्ज्ये विश्वास, वसन, ज्ञान, आन आखी जातीइ मेहेंनतीमेहें, आन आमापोअ कोअतेहे तियी मेरेमेहें वादते जातेहे, तेहेंज कोइत या दानोअ कामोमेहें बी वादते जावा.8ओं आंय आदेश कोत नाहां, पोन बिहीराआ उरी वाअहीं तुमाआं मेर केतीही खोरी तों फारकीइलो कोअते कोहो.9तुमू प्रभुउ ईसु ख्रिस्ताआ मेरवानी ओलखीइतेहे, के तो मालदार ओतू, तेबी कांगाल बोणीत गोयू, तो याआ काजे के तियाआ कांगाली वाअहीं आपू मालदार बोणुहूं जोवे.10यी गोठीम माआं एहेलोहो कोअलोअ होय के, ओं तुमाआं काजे हाजो होय; जों काम तुमू एका वोरह्योअ पेलुज सुरुवात कोअयी, तेतोज नाहां, पोन तुमू तों कोइलोअ इश्शाम बी आगाड़ीज होय.11तियाहा काजे ओमें ओं काम पुरो कोआ, जेहें कोइत इश्शा कोइलोम तियार ओते, तेहेंज कोइत जिवजिवोअ पुरवाअतोज पुरो कोआ.12काहाके जर मोन तियार ओय, ताहां तियापोअ जे भेट ओय ते देवोहो मान्य ओवेहे, पोन जर तियापोअ ने ओय तेबी आहरु कायनाहां.13आंय तुमापोअ वोजू टाकीत बिहीराहां ओल्के कोइलोअ कोशित नाहां कोअतू, पोन जर ओमे तुमापोअ जाअखो होय ताहां जियांहां गरज होय, तियांहां मदत कोअहूं जोवे. तिहीं रोत जाहां तुमुहूं गरज पोड़े, ताहां तियांपोअ जाअखो ओवे, ताहां तें तुमुहूं मदत कोए. एहें कोइत आखाअरी हारकोज वेवारो रोअहूं जोवे.14हारका इसाबोवाअहीं या गालाहा तुमाआं वादार होय तों तियांआं कमीमेहें काम आवे, मोन्ज्ये तियांआं वादार रोय, तेहेलाम तुमाआं कमीमेहें काम आवे, एहें कोइत बोराबर ओत जाय.15जेहें कोइत वसन कोहे, “जियां वादार टोलू कोअयो, तियांआं वादार ने निहींयो, आन जियां थोड़ो टोलू कोअयो, तियांआं कमी ने निहींयो.”16देवोअ आभार मानोहों, के तिये तुमाआं मदत कोइलोअ काजे तितुसोअ मोनोमेहें जे आमामेहें होय तेज उरी टाकी देदीही.17काहाके तिये आमाआं गोठ मानित लेदी तेतोज नाहां, पोन वोडी रोडे वाअहीं तो सोताहा इश्शा कोइत तुमाआं जागे आवेहे.18आमू तियाअरी एका पायहोहो बी मोकल्युहू, जियाआ हाजी बातमीइं सेवाआ बद्दल आखी मंडड़ीमेहें हाजो नाव निहींयोहो.19तेतोज नाहां, पोन तो ओं दान लेतुज आमाअरी आवे तेहें काजे मंडड़ीज याहा निवड़्युहू. ए सेवा आमू देवोअ महिमाआ काजे कोअताहा, आन मदत कोइलोअ आमाआं मोनोअ तियारी देखाअहूं जोवे.20आमू यी गोठीम जाबालीत रोताहा, काहाके जे हाजी सेवा आमू कोअताहा इंहींम कोडो आमापोअ आरोप ने लागाडुहूं जोवे.21काहाके जों देवोहो मान्य होय तेतोज नाहां, पोन माहुंउं नजरेम बी मान्य होय, एहेले कामे आमू जाबालीत कोअताहा.22तियांअरी आमू बिहीरा एका पायहोहो बी मोकल्युहू, तियाहा जाअखीली गोठीमेहें वारुज वाआ फारकीत पाल्यू, पोन रोडेजमेहें देख्यू. आन ओमे तुमापोअ तियाआ जास्ती भरिवसू होय तिहींवाअहीं तो जास्ती रोडेम होय.23जर एखु तितुसोअ बाप्तिम फुसे, ताहां तो माआं हाती होय आन तुमाआं काजे मदत कोअनारु माआं हाती होय; आन जर आमाआं पायहोंअ बाप्तिम फुसे, ताहां ते मंडड़ीइ मोकलीइल्या आन ख्रिस्ताआ महिमा होय.24ताहां तुमाआं मेर आन आमाआं ते वोडाय जे तुमाआं बाप्तिम होय, ते मंडड़ीइ सामने पुरावा वाअहीं तियांहां देखाड़ा.
The Word for the World International