1करिन्थ12
1माआं पाव्हीइला, आत्माआं दानोअ बाप्तिम तुमू ओजाण्ये रोअहूं जोवे, ए माआं इश्शा कायनाहां.2तुमू जेहेलाम पारके ओते, ताहां मुकी मुर्तीइ फासाड़ी जेहें कोइत सालाड़े तेहेंज सालतेते, ओं तुमुहूं मुंदू होय.3तिहीं वाअहीं आंय तुमुहूं कोहो के, देवोअ आत्मा वाअहीं गोगनारो कोडो बी माहुंउं एहें नाहां कोतो के, “ईसु हारापवालू होय!” आन पवित्र आत्मा सिवाय कोडो बी एहें नाहां कोत सेकतो के “ईसु प्रभु होय.”4आत्माआं दाने तोम जाती जातीइ होय, पोन आत्मा एकुज होय.5तेहलोज सेवा कोइलोअ आलांग आलांग मार्ग होय, पोन प्रभु एकुज होय.6सेक्तीइ कामे बाती बातीइ होय, पोन आखे कामें कोअनारु देव एकुज होय.7आन आत्माआं उजालो आखाआ हाजाआ कोअते एकेकाहा आप्योहो.8काहाके एकाहा आत्मावाअहीं बुद्दीइ गोठी जोड़तीही, आन बिहीराहा तियाज आत्मावाअहीं विद्याआ गोठी.9बिहीरा एखाहा तियाज आत्मावाअहीं विश्वास, आन बिहीरा एखाहा तियाज एका आत्मावाअहीं नेराय आपिइलोअ दान जोड़ेहे.10फाशोअ एखाहा समत्कार कोइलोअ सेक्ती, एखाहा देवोअ संदेश आपिइलोअ सेक्ती, एखाहा आत्मे फारकीइलोअ दान, आन एखाहा ओजाण्यी बाशा गोगीइलोअ, फाशोअ एखाहा बाशाआ अर्थ कोत आपिइलाआ सेक्ती जोड़्यीही.11पोन एं आखे तो एकुज आत्मा कोआड़ेहे. तो तियाआ इश्शा वाअहीं एकेकाहा आलांग आलांग दान वाटीत आपेहे.12काहाके जेहें कोइत डिल एक होय आन तियाआ भाग जाअखीलाहा होय, आन तिया डिलोअ जाअखिलाहा भाग होय तेबी आखा भाग मिलीत एक डिल होय, तेहेंज कोइत ख्रिस्त बी होय.13काहाके आपू यहुदी नेत ग्रीक ओते, गुलाम नेत सुटले ओते, तेबी एकाज आत्मा वाअहीं एक डिल ओवीइलोअ काजे बाप्तिस्मा लेदो, आन आपू आखाहा एकुज आत्मा पिवाड़्युहू.14काहाके डिल एक भाग नाहां, पोन जाअखीलाहा भाग मिलीत एक डिल होय.15जर गुडू कोय, “आंय आथ नाहां, तियाहा काजे आंय डिलोअ भाग कायनाहां,” इंहीं वाअहीं तो डिलोअ भाग कायनाहां के?16आन जर कान कोये, “आंय डोऊ नाहां, तिहीं वाअहीं डिलोअ भाग कायनाहां,” ताहां इंहीं वाअहीं डिलोअ भाग कायनाहां के?17जर पुरो डिल डोऊज रोतो, ताहां उनाइलोअ का रोतो? जर पुरो डिल कानुज रोतो, ताहां हुंगाविइलोअ का रोतो?18पोन खोरीज देवे हारेक भागोहो तियाआ मोर्जी वाअहीं जिहीं जोवे तिहीं मिक्युहू.19जर आखो एकुज भाग रोतू, ताहां डिल का रोतो?20पोन भाग जाअखिलाहा होय, तेबी डिल एकुज होय.21डोऊ आथोहो नाहां कोत सेकतु, “माहूं ताआ गरज कायने,” आन तेहलोज मुन्को गुडाहा ने कोत सेकतो के, “माहूं तुमाआं गरज कायने,”22पोन उलटो, डिलोअ जे भाग जाअखा लुला देखाअताहा, ते गाठ्याआ कामोअ होय.23आन डिलोअ जियां भागोहों आपू कमी समजीइतेहें, ते गाठ्याआ जाअखा हाजा गोणाअताहा; आन आपाआ विण होबाअता भाग जाअखा हाजा होबाअता ओत जाताहा.24तेबी आपाआ होबनारा भागोहो याआ गरज कायने. पोन देवे डिलोहो एहेलोहो जुड़व्योहो के, जिया भागोहो आपू कमी मानतेहे, तियाहा वादार मान जोड़ीत सेके.25मोन्ज्ये डिलोमेहें फाटाफुट ने पोड़ुहूं जोवे, पोन आखा भाग एकमेकाआ हारकीज कालजी लेअहूं जोवे.26तियाहा काजे एक भाग दुखतुय, ताहां तियाअरी आखा भागोहोज तारास ओवेहे, आन एका भागोहो हाजो नाव निहींतोय, ताहां आखा भागोहोज खुसी ओवेहे.27तेहलोज, तुमू आखे मिलीत ख्रिस्ताआ डिल होय, आन हर एक जोओं तियाआ आलांग आलांग भाग होय.28आन देवे मंडड़ीमेहें एहेलेहे आलांग आलांग माअहें ठरवीत मिक्येहे: पेल्लाअठीज प्रेशितोहों, दुसरा भविश्यवक्ताहां, तिसरा मास्तरहों, तिहीं रोत समत्कार कोअनारा, तिहीं रोत हुदारनारा, मदत कोअनारा, उपाय कोअनारा, जाती जातीइ बाशा गोगनारा.29केहें आखा प्रेशित होय के? केहें आखा भविश्यवक्ता होय? आखा मास्तर होय के? आखा समत्कार कोअनारा होय के?30केहें आखाहा मांदवाड़्ये हुदारीइलोअ दान जोड़्योहो के? केहें आखाज ओजाण्यी बाशा गोगताहा के?31केहें आखाहा बाशाआ अर्थ कोता आवड़ेहे के? तुमू वोडाम वोडा दानोअ इश्शा कोआ, आन आंय तुमुहूं एक हाजाम हाजी वाट देखाड़ोहो.
The Word for the World International