Chakatondejelwa11
1Pakalepo ndakapiwa unzato wokwelesa unanga sondozo, akale ndikabujwa, “Nyamuka upime itempeli lyaMwali nedebulilo naabo banonamatila imo,2koga usupime lubazhe kuzhe kwetempeli, yolo ulusiye kuzhe, nokuti lulopilwa kunduji jokuzhe, akale banootoboka iguta ijena kwemyeji makumi mana anamibili.3Akale, Imi ndoopa isimba kubasumikiji bangu babili kuti bepolofite kwamazhuba chiulu namazana mabili anamakumi mashanu ana limwe, bakambala masaka.”4Yeyi ndiyo miti mibili yeoliva akale neezwi zwigajiko zwibili zwezwimuniko zwimile mbeli kwaTezi wenyika.5Akale kana pelino unoda kubalwajisa ibo, moto unobhuda mundomo mwabo upalaja babengi babo, kana pelino umuda kubalwajisa, yoyo ulomisilwa kubulayiwa.6Ibo banesimba lyokukonya idenga, kuti ivula isine nonshaji okupolofita kwabo, akale bana isimba pezhulu pevula kuyishandula iba ilopa, nokuzhaja inyika nemalajo, tunjinji sokuda kwabo.7Pabachapeja busumikiji bwabo, ibhukanana lichava mudizwa linomila kusinojiba linoomusa ihondo nabo akale linoobazunda likababulaya,8akale mitumbi yabo inolajikwa mungwagwa weguta igulwana linowhi mulungano Sodoma neIjipiti, kwakakahamililwa Tezi wabo panchinjikwa.9Banhu bose banova kunyika, kulushobo, indimi nenduji jose banolingisisa mitumbi yabo bakafa, kwamazhuba matatu ana chikamu banolamba kuti ijikwe mugumbu.10Yabo banogala penyika banooshanta pezhulu pabo akale banoosekelela bepana zwipo, nokuti yaba bapolofeti babili bakabeli bayabisi babagali bopenyika.11Koga kwapinda mazhuba matatu ane chikamu lufemo lobupenyu luva kunaMwali lwakangwina mwabali, bakamilika bakama namakumbo abo, akale lutyo lukulwana kasa lwakaswikila yabo bakababona.12Pakalepo bakawha iwhi lipezhulu liva kudenga liti kwabali, “Izhani yokuno!” Akale mumesho ababengi babo, bakenda kudenga belimugole.13Ne awa yakaleyo kwakabana kudengeda kwenyika kukulwana kasa, chibabi chegumi cheguta chakakolomoka, zwiulu zwishanu nezwibili zwabanhu bakabulayiwa nokudengeda kwenyika, akale bose bamwe bakatya bakapa lukujo kunaMwali wokudenga.14Isheto lyabili lyapinda, ilingani, isheto lyatatu likumuzha ngweno.15Pakalepo ingilozi yeshanhu inembili yakalija lukwembo lwayo, kukabana mawhi anoshomeja eva kudenga, eti, “Bushe bwenyika bwaba bushe bwaShe wedu, naKristo uwe, akale uchatonga kwemisi isinopela.”16Bakulwana makumi mabili ana mana bakabeligele pezwigalo zwobushe mbeli kwaMwali bakalala nechiso bakanamata Mwali,17beti,“Tomuboka Ishe Mwali Wamasimba, upo akale walubaipo,kuti mwatola isimba lyenu igulwanakasakasa akale watanga kutonga.18Inyika jakanyema,koga kunyema kuko kwakaswika,nonshaji wabakafa kuti betongwe,nokupa indipo kubashingi,bapolofeti nabachena akale naabo banotya izina lilyo,bose bakulwana naba tukutuku,akale nokupalaja bapalaji benyika.”19Pakalepo itempeli lyaMwali kudenga lyakazhulwa, negwati lyechivumilano chiche lyakaboneka mukati mwetempeli lilye, pakalepo pakaba nokumweka kolupenyo, kunguluma, kudilima, kudengeda kwenyika nechivula mabwe chikulwana.
The Word for the World International