BaHebhelu6
1Nokudalo ngatilekeni zwilayijo zwamabambo aKristo, akale tinde mukukubuka, tisinobiga kabili chimisikilo chokushanduka kuva kumishingo inobuzilija lufu, akale neyokudimbwa kunaMwali,2nendayilo yemibhabhatizo, kubiga maboko, kumuka kubafi, akale nezwokutongwa kusinopela.3Akale yezwi tichata kana Mwali evuma.4Nokuti azwitotubulika kubwiliza akale kushandula yabo bakabamunikilwa, bakabalabila chipo chokudenga akale bakashanganyila kuMpepo Nchena,5akale bakalabila bubuya bwewhi lyaMwali nesimba lyonshaji ukumuzha,6kana yaba bangowa mukuvumila, nokuti banonkahamila kabili Mwananhulumyana waMwali nokwabo, boonshampula.7Nokuti inyika yanwa ivula inogala iyinila, imejeka zwimela zwilokosha kunaabo banoyilimilwa, inowana makombolelo kunaMwali.8Koga inyika inomela miwha nedihwa ilobhaya aina nshingo akale yabapelyo nokufizhwa, kupela kwayo kupiswa.9Banakwaina banodikana, kojoba tileba alo, koga kunamwi tinalubimbo pezhulu penu nezwinhu zwibuya zwoluchijo.10Nokuti Mwali aatoba usakalulama, kuti angaleka kulangalila mishingo yenu, akale noludo lumwakatondejela pezhulu pape mukushingila bachena, sobwamuchinota.11Akale tinachido chokuti umwe nomwe wenu etondejele kusungwala kumwempela mukuba nechimiso chizhele cholubimbo kuswikila kumapejelejo.12Kuti musibe nobusimbe koga mube bakwekwejeli baabo bakafumiswa, nezwabakabimbiswa pezhulu pokudimbwa nokunangatila.13Nezwo Mwali paakata chibimbiso kunaAbhulahamu, nokuti akujakabelina umwe unkulugulu kuti oonkowe, wakazwukowela ega,14eti, “Chokomende ndokukombolela, ndiwaje zwizekululu zwizwo.”15Nenzila yakaleyo Abhulahamu, amilila nokuzwisimisa, wakapiwa zwaakaba abimbiswa.16Banhu banokowha nomwe unkulwana kwabali, akale mukunyenyejana kwabo kwose ikowe isimiso lyokopeleleja.17Nokudalo Mwali paakada kutondejela zwizhele kubalyi befuma bezwibimbiso kusoshanduka kwechimilo chechinangwa chiche, wakasimisa nekowe,18Kutila kuti muzwinhu zwibili zwisinoshanduka, azwitotubulika kuti Mwali eniepe, isu takatizhila kwaali kuti tiwane kusungwajwa kukulwana kuti tivupule lubimbo lulobigwa mbeli kwedu.19Tina yolu lubimbo lunanga ingobyo yompepo, ilosima akale ikalondoteka, inopinda mukati mobugalo buchena kushule kwenabiko,20yomo Jesu mwaakangwina sontangili ulotimilila, aba untebuji unkulwana nokusinopela nenzila yaMelukizedeki.
The Word for the World International