1 BaKolinte15
1Ngweno, ndoda kumukumbuluja banakwaina, inzila yandakamubhaunulila iNdebo iMbuya, yeyo imwakatambula akale imumile paili,2iyo ichamuchija kana mubhatilila kundebo yandakamubhaunulila, kuzhe kwokuti kudimbwa kwenu kwakakusi kwechokomende.3Zwandakatambula zwilokosha ndizwo zwandakamupa, zwokuti Kristo wakafila luchinyo lwedu, sobuzwili mumakwalo,4kuti wakajikwa, akamuswa nezhuba lyatatu sokuleba kwaMakwalo Machena,5akale kuti wakazwitondejela kunaKefasi, akale kubalayijwa babe baligumi nababili.6Wakaboneka kubanakwaina banopinda mazana mashanu panshaji umwempela, banji babo bachibapenyu, kojoba bamwe babo bakanyetutukwa.7Wakabonwa naJemusi, nokubapositoli bose.8Kumapejelejo wakazwitondejela kwandili, imi ndili sonhu wokuzwalwa unshaji usanu wakwana, akale wakaboneka kunami.9Nokuti imi ndili untukutuku kubapositoli bose, ndisilokwelela kuwhi ndimpositoli nokuti ndakayabisa igubungano lyaMwali.10Koga nechipiwo chaMwali ndili yezwo zwandili, akale chipiwo chiche kwandili achijakaba chisina unshingo. Kojoba zwakadalo, ndakashinga kupinda ibo bose, kusili imi asi chili chipiwo chaMwali chimo mwandili.11Kungaba kuwhi kwakabeli imi kana ibo, ndizwo zwatinobhaunula akale imwi ndizwo zwamwakadimbwa.12Ngweno kana Kristo ebhaunulwa kuwhi wakamuswa kuna bakafa, bamwe benu bangaleba chini kuti apana kumuka kuna bakafa?13Koga kana pesina kumuka kubafi, zwinova kuti naiye Kristo aajakamuswa,14kana Kristo esakamuswa, zwinova kuti kubhaunula kwedu akunanshingo akale nokudimbwa kwenu akunanshingo bo.15Isu towanika tida kupita Mwali, nokuti takasumikija kuti Mwali wakomusa Kristo, waasakamusa kana chili chokomende kuti bakafa abatomuswa.16Kana bakafa besinomuswa, ndiko kuti Kristo aajakamuswa.17Kana Kristo esakamuswa, kudimbwa kwenu mayabwe, akale muchimo muluchinyo lwenu.18Nezwo bose yabo bakafa beli munaKristo, bakapalala.19Kana lubimbo lwedu muna Kristo lulibubuya kubupenyu chetechete, nokudalo tokwelela kuwhilwa ishe kupinda bose munyika.20Koga ilebeswa ngelyokuti Kristo wakamuswa kubafi, ndiye unchelo wokutanga kunaabo bakafa.21Sezwo lufu lwakabuzwa nonhu, nokumuka kubafi kwakabuzwa nonhu bo.22Sezwabanofa bose munaAdamu, nokudalo munaKristo banooba bapenyu bose.23Koga umwe nomwe nenzila yiye, Kristo unchelo wokutanga, kova pakuzha kukwe yabo baiko kunaKristo.24Ndipo pachaswika umpejelejo, paachasenga bushe kunaMwali Tate mushule mwokupalaja bushe bwose, nobutongi bose akale namasimba ose.25Nokuti iye unokwelela kutonga ejine ebige bose babengi babe pasi pamakumbo awe.26Umbengi wopejeleja uchapalajwa, lufu.27Lukwalo luchena lunoti, “Mwali wakabiga zwinhu zwose pasi pamakumbo awe.” Koga kana kuwhi, “Zwinhu zwose zwilobigwa pasi pape,” zwipopachena kuti azwitoshanganisila Mwali nokukwe, wakabiga zwinhu zwose pasi paKristo.28Kana zwose zwinhu zwichabigwa pasi pape, ndipo pakuchabigwa iye Mwananhulumyana pasi paiye, iye wakabiga zwose zwinhu pasi pape, kutila kuti Mwali ebe zwinhu zwose kubanhu bose.29Biya banotini banhu nokubhabhatizwa bekamilila bakafa? Kana bakafa besinomuswa zwachose, ini bebhabhatizwa bekabamilila?30Ini tigala tilimumakubaji unshaji wose,31banakwaina ndilolingana nolufu izhuba nezhuba? Yezwi ichokomende, sokushiya kwangu munamwi kwandinanako muna Kristo Jesu Tezi wedu,32Ini chandinowana kana ndakalwana nemhuka kuEfesasi nezwinangwa zwabanhu? Kana bakafa besinomuswa, “Ngatilyeni akale tinwe, nokuti mangwana tofa.”33Musichengwe, “Kukwenda nababi kunopalaja chimilo chibuya.”34Bwililani kundangalilo jenu imbuya, musoochinye. Nokuti bamwe abana luzibo lwaMwali. Ndikumuleba yezwi kuti mube neshoni.35Koga umwe unobhuza eti, “Bakafa banomuswa chini? Banozha beli nombili wakata chini?”36Iwi ilema lyonhu! Chaunobyala achitomela kuzhe kokuti chitange chafa.37Akale zwaunobyala azwitoba iwo umbili uchooba ipo, koga unobyala imbeyu yekoloni kana imwe imbeyu.38Koga Mwali unoyipa umbili sokushala kukwe, akale imwe, neyimwe imbeyu unoyipa umbili wayo.39Nokuti mibili yose ayijilotojana, asi kuna imwe yabanhu, neyimwe yemhuka, neyimwe yenyuni, akale neyimwe yehobe.40Kuna mibili yokudenga, nemibili yopenyika, asi kungaima kweyokudenga kumwe, akale nokungaima kweyomunyika kumwe bo.41Kuna kungaima kwezhuba, nokumwe kungaima kwomweji, akale nokumwe kungaima kwenyenyeji, nokuti imwe neimwe inyenyeji inongaima zwilosiyana.42Kwakadalo bo kumuka kwabakafa. Umbili unojikwa unobola, unomuswa autobola.43Unojikwa zwisilolemekejwa, umuswa mulukujo. unojikwa mubutela, unomuswa mumasimba.44Unojikwa uli umbili wenyama, umuswa uli umbili wompepo. Kana pelinombili wenyama, pana bo nombili wompepo.45Nokudalo zwilokwalwa kuti, “Unhu wotanga Adamu wakaba unhu umpenyu,” Adamu wokupejeleja wakaba umpepo unopa bupenyu.46Achitoba chompepo chinotanga, asi ngechombili, kova kutobela chompepo.47Unhu wotanga wehuluba wakava munyika, unhu wabili unova kudenga.48Sezwaakaba eli unhu wehuluba, ndibo bubali behuluba, akale sobwaali unhu wokudenga, ndibo bubali bo bokudenga.49Sezwo tili nechimo chonhu wehuluba, tooba akale nechimo chonhu wokudenga.50Ndomubuja yezwi banakwaina, kuti inyama nelopa azwingawane ifuma yobushe bwaMwali, Nezwino palala azwingalye ifuma isinopalala.51Whililani! Ndimubuje isiswa. Tose atitoofa, asi tose tooshandulwa,52munshaji unshomanana, sokubhwinya kwezhisho, mulukwembo lwopejeleja. Lukwembo paluchoolila, bakafa banoomuswa besichinopalala, akale isu tooshandulwa.53Nokuti umbili unopalala unokwelela kumbala umbili usinopalala, akale noyu umbili unofa unokwelela kumbala umbili usinofa.54Kana umbili unopalala wambala usinopalala, nounofa wambala usisofa, ndipo pachazhajikijwa isumo ilokwalwa kuti, “Lufu lunominywa mukuzunda.”“Awe! Lufu kukoma kuko kupo poni?Awe! Lufu, lubola lulo lupo poni?56Lubola lwolufu luchinyo, nesimba lyoluchinyo mulawo.57Koga toboka Mwali, unotipa kukoma nomuna Tezi wedu Jesu Kristo.58Nokudalo, banakwaina bangu banodikana, imani mukasima, musisundwe nechinhu, unshaji wose mushingila Tezi, muziba kuti kushinga kwenu munaTezi akutoba kwamayabwe.
The Word for the World International