Titus1
1Paul, Tinggwang kilabe nah Jisu Khrista ne langkegaibe. Acu Tinggwang ne kedetkelu minadung kenlum tei ntip lo nah renet ne ledeu kebeu kesangbe maci de ledeu lo langgai,2cide kelungta kering ngaulu kera kereguide. Tinggwang madaude nretla kemakbe, raitu gade sampet aide kaibeu.3Nah peting siakdau, pa sam aide peu mi miakngau tei gwang. Aide acu nlumbeu, nah Ih Tinggwang, anuide Kelikelube aja gade ledeula.4Ih laisiu aide raupwa kenlum ge nlumkela a napei kesangbe, Titus dage kaila. Peibe Tinggwang nah anuide Kelikelube Khrista Jisu dade ngaugia nah lungciep peu bam kelube tei lulo.5Ih Crete duigwadeu gage ncu pütgai kedi au peu ncu teicang kemakdung petau gage tei gailu kerane nah Ih ncu rang kebeu nzwa namdi leuga ngqwa hangkiamedung de kedetlu kerane,6mina keheibe de pecu mmau gai kelakme, pe nau ket rünne kecume, nah pe name de kenlumme nah pe zaireli keheitei mede samzaitei melie mmau kemakme de peu ngqwa kekwabe teilu maisia.7Kedanemene ngqwa kekwabe au, Tinggwang ki maketeube kecu nzwa, pecu mmau gai kelakme maisia, pa au ngang, mede pe rata zette kerabe ma, zausak, mede mide tei kelame kerabe ma, nah ma hengin kerabe ma.8Meliene, pa au sang hegia keneume, makeyi pesui kelame, mriak, masang, mci, nah pecu ketip kelume ge maisia.9Pa pecu ledeu kebeu samde nzwa eh nlumlukebui samliade kerakbinglu maisia, iciu eh pa kedame de kesangsam teu kecung nah pecu renia kelame de kesiulu kerane.10Kedanemene samzai tei kemakme, kemta sam kerangme, nah mide kecwame kekiee ge la dida, keraide hegeu kerumme maa gade.11Penui rangkelade kaamdi maisia. Penui buikemakpe ledeula eh kelak pelane lung teimaula dida. Nah penui cide kemta kemmi ngaulu kerane teila.12Penuikatei penui kakde mige penui caihakecime ge rangdi, “Cretme au nret mui kelame, pezai kesia makaunedung, nah nhet eh ketyeikaudung.”13Zierang aide au kesang. Aide ziemne, penuide kesiu süt gailo, iciu eh peu penui kenlum ntiplu kerane,14nah Jewme rasamdung mede mina kesangbe gade nreutet kedime ajadung nlum melu kerane.15Helungkemcime ziemne ma pelane de mci. Dede keherame nah nlumkemakme ziemne au magede mci ma, kedanemene penui lungcet nah penui kecetdung au heradi delu.16Penui Tinggwang de cilie rangla, dede penui batadung gade pecu mlai la. Penui au kemneu nah samzai tei kemakme, nah bata keyi gede tei gailak.
Bridge Connectivity Solutions Pvt. Ltd.