2 Timothy4
1Ih Tinggwang nah ketsaime nah keringme tutiak kerabe Khrista Jisu dwa gade, nah pa gwang kera nah pe hegwangram ziemne, n dage rang sünne gaila:2Samliakeyi de ledeulu; peting daude nah peting kemak daude mteilu; helungtie eh mi mau ranglia, kesiu, nah kecung eh ledeulu.3Kedanemene minadung kesangbe keledeu de kingneineu tadi kecu ting ge gwang zie. Dede, penui lungningbe rünne mzui eh penui ziemne keledeume peei zie, penui kingnei keneube ledeu lu kebuime de,4nah penui kesangbe gade nreu tetdi zie, nah penui nreu pwa kemta sam kerangle ge penui lung kai dizie.5Dede nang au, kehei daude mriak eh bamlu. Keherei kecu ga n qwa pwalu. Samliakeyi kepau tade tei eh n ta tei canglu.6Kedanemene, acu au reca ge nzwa ruigai pwabam dida, nah Ih kideu aikade tetdi kera ting gwangbam dida.7Ih kerenia gade a laikai tei süt dida; Ih hezu kemzu de mzu cang luda; Ih kenlum de kainzeu luda.8Cu au a ziemne kesamsang hegwang peurwa mtei pwabam dida, cide Rampaube, kesamsang tutiakbe, cipaunai a ziehi peuzie, nah acu rünne ma, dede pa gwang kera pesui eh kwa kebamme pelane de ziehi peuzie.9Nang mzet eh a da gwanglu kera n laikai tei lulo,10kedanemene Demas cudau teilung gudung hengin eh acu püt dida, nah Thessalonica ga mie dida, Crescens Galatia ga nah Titus Dalmatia ga mie dida.11Luke rünne acu ngngwa bam. Mark de ngngwalwe gwanglu, kedanemene pa a bata ga acu nghalu builu.12Dede Ih Tychicus de Ephesus namdi gage langgai dida.13Nang gwang kecu dau Ih a pai Troas ga Carpus dage kai kenzeu de keu gwanglu, nah laisiukwakdung de, bamkeraide teihgeu laisiudung de keu gwanglu.14Alexander hegeu ta keteibe a dage makesia teisüt gai. Rampaube pe bata nzwa pe ziehi peuzie.15Nangde pe dade mriaklu, kedanemene pa anui samdung de ngkausüt lalu.16A nzeurang keraidau gade, migede acu ngngwa sap ma, dede pelane acu pütdi. Peu cide lepwa penuide mmaudi helo.17Dede Rampaube acu ngngwa sap eh acu tei ngkieng beu, iciu eh a dade samliakeyi pau cangsiaklu kerane nah Gentileme pelane cide siulu kerane. Nah Tinggwang hinghodung mzeu kebam dade acu kelikebeu nzwa acu ketsai gade kelibeu.18Rampaube kesia ta pelane gade acu kelibeu zie nah acu pe tinggim hegwangram ziemne kelibeu zie. Pecu peu kelungta ndu kelube tei lulo. Amen.19Priscilla penai Aquila, nah Onesiphorus kilungme de kelum gailo.20Erastus Corinth namdi ga bam dida, nah Trophimus mra kedine Ih Miletus namdi gage pütnzeu dida.21Tingtiak dwa nang teilu kebui tane gwang lulo. Eubulus, Pudens, Linus, Claudia, nah sinamedung ncu kelum gaila.22Rampaube de peu n rabe de ngngwa bamlu. Tinggwang ngaugia nnui peciakne da peu bam kelube tei lulo.
Bridge Connectivity Solutions Pvt. Ltd.